Monday 9 May 2011

بلدي في خطر واللي يدوس لها على طرف حادبحه في الشارع

تحديث:
انا لبست ونازلة اهو ان شاء الله... نازلة وانا خايفة ومش مسامحة اي حد يتأخر عن بلدي، ولو اتأخرتوا عليها انا حاشيل القصيدة بتاعة تميم دي
<<<<<<
انا قلابة.. وحاقلب عليكم كلكم لو حصل اي حاجة لبلدي، وحاقلب على تميم كمان.. بس هه.. عشان اداني امل
تحديث:
ابوس ايديكم اقروا بلال فضل.... ويالا بينا على ماسبيرو دلوقت
تحديث:
الفلسطينيين زعلانين قوي وعمالين يعيطوا، لإن اللي بيحصل عندنا ده حيفشل لهم يوم 15 مايو، احنا لازم نحل المشكلة دي بسرعة قبل 15 مايو عشان الناس حاطين امل علينا، واسرائيل متحزمة وبترقص من اللي بيحصل عندنا لانها كده معتبرة ان يوم 15 مايو فشل، وحلني بقى على ما نحل اللي عندنا، المشكلة دي مش حتتحل الا مسلمين كتير قوي ينزلوا ماسبيرو ويبقى عددهم اكتر من المسيحيين ويطالبوا بحق المصري والمتورطين يتحاكموا، وينفع نحلها احنا المهم عددنا.. معلش، ناس كتير متعلقة في رقبتنا، مش لازم نخذلهم
انا ماليش فيه.. دلوقت انا لا باكلم الجيش، ولا باكلم العيسوي، ولا باكلم النائب العام
انا باكلم الناس اللي عملت الثورة، والمصريين اللي البلد دي مسئوليتهم يحموها ويحافظوا عليها
كنت في اعتصام ماسبيرو والوضع مش لطيف، مش لطيف ابدا
اولا، الاعلام المصري بقى قذر اخر تلات حاجات
مش صحيح ان كان فيه ضرب مولوتوف عند ماسبيرو، انا عند ماسبيرو من الساعة ستة ونص لحد الساعة حداشر ومافيش اي حاجة من الكلام ده
كان فيه عند رمسيس هيلتون تحديف طوب، ما كانش فيه ضرب نار
خلوا بالكم بقى، عشان الظاهر ان حتى صحف زي المصري اليوم والاهرام الى جانب سوابق اليوم السائع، ضالعين في مصايب بعلمهم ولا من غير علمهم، مش اي حاجة تتكتب تصدقوها
ثانيا: الناس هناك قلبها محروق
احساسهم ان خلاص بقى.. ما فيش غيرهم في البلد دي، ايام مبارك بينضربوا، وبعد ما مبارك مشي بينضربوا، و"ايه بقى؟ الثورة عملت لنا ايه؟ عملناها ليه الثورة دي؟ كسرنا كلام القساوسة ونزلنا ننام في التحرير ومات منا الشهدا ودي اخرتها؟ كنايسنا تتحرق؟"
ده الكلام اللي قالوه
وواد قلبه محروق عشان كان في امبابه وابوه لما عرف اللي بيحصل خلا امه تكلمه وتقول له ابوك بيموت عشان يرجع بسرعة لانه لو عرف اللي بيحصل كان راح يضرب.. وقلبه محروق عشان حاسس انه متهم انه جبان وما اخدش حقه بايده وما حدش خد له حقه، وده واد من شبرا، يعني من الاخر كده ما يعرفش الكلام بتاع المسيحيين ده اللي هو "احنا مش بنرد على الشر بشر" والكلام اللي هو بيعتبره ماصخ ده، ده لا مسلم ولا مسيحي، ده شبراوي.. شبرا دي دين لوحدها زي ما كلنا عارفين
وعيال عمالين يقولوا لي: فين المسلمين؟ احنا كنا فاكرين بعد الثورة المسلمين حيبقى عددهم اكتر من المسيحيين.. ولا بقى ما كانتش المشكلة في مبارك زي ما فهمتونا.. يبقى هم المسلمين بيكروهنا فعلا؟ مش مبارك هو اللي كان بيعمل فينا كده؟ امال مشيناه ليه وكنا حنموت في الشوارع؟ 
وطبعا سمعنا طراش طائفي بالهبل... مفهوم، والمفروض نستحمل
وممدوح جلال من الاخوان راح ساحب معاه اتنين سلفيين وجم ودخلوا وسمعوا كلام زي الطين، واستحملوا، والمفروض ناس قدهم الف مرة ييجوا ويستحملوا اللي حيسمعوه
احنا في خطر.. احنا في خطر
اسعااااف.. اسعااااااااف.. اسعاااااااااااااااااااااااف
مصر في خطر
والنهاردة كل اللي يشوفني يقول لي: فيه حاجة غلط.. دي خطة تقسيم خارجية وبتتنفذ
مالك عدلي قال لي باللفظ: دي خطة تقسيم رسمي
ومينا زكري قال لي: انا خايف يا نوارة شكلها خطة تقسيم
وماحدش حاطط في بطنه بطيخة صيفي غير تميم البرغوتي، بس تميم حاطط في بطنه بطيخة صيفي عشان مراهن علينا.. على الشعب، وبيقول لي المصريين مش حيستكوا على كده ومش حيسمحوا للخطة دي تتنفذ
اكسفوه بقى... اكسفوه وهو حاطط كل اللي في جيبه عليكم
ومش هو بس.. مصر الغلبانة دي اللي ما شافتش يوم عدل في حياتها، حاطة حالها ومالها وصيغتها عليكم
مافيش حل غير ان بكرة عدد المسلمين قدام ماسبيرو يبقى تلات اضعاف المسيحيين 
مش رايحين يطبطبوا، ولا راحين يهدوا
رايحين يقولوا: عايزين حق المصري. ويحرقوا آخر كارت لابن الوسخة اللي نايم في المستشفى ومش عايز يتحاكم والسعودية وامريكا صارفين مليارات.. مليارات، عشان يعملوا اللي بيعملوه عندنا ده وهو يفلت وما يتحاكمش، مش عشان سواد عينيه، عشان لما يتحاكم فضايحهم حتطلع
المظاهرة اللي في ماسبيرو لحد دلوقت طائفية، والمسلم اللي بيروح فرداني بيسمع احلى خرا، وبيستحمل، ولازم يستحمل، وغصب عن عين اللي خلفوه حيستحمل لحد ما الناس نارها تبرد، ولحد ما عدد المسلمين يبقى قد عدد المسيحيين تلات مرات هناك
ساعتها بقى مش حيبقى فيه هتاف الحماية الدولية الخرا ده
المظاهرة الطائفية ممكن تتحول لمظاهرة مصرية بكرة الصبح.. بس ده في ايد المسلمين بس
ومافيش حاجة اسمها خايف اروح لبعدين يتخانقوا معايا، ما يتخانقوا معاك يا اخي، يتخانقوا معاك وتستحمل وتسكت، يعني ما خفتش من الرصاص وخايف من اخوك يفش غله فيك؟ ما كنيسته اتحرقت.. كنيسته اتحرقت.. ده مالك عدلي بيقول لي دي عمرها ما حصلت من ايام الفتح الاسلامي، وانا مش عارفة حصلت ولا ما حصلتش من ايام الفتح الاسلامي، لكن انا ما اوعاش على كنيسة اتحرقت في عمري
حنصحى الصبح كلنا ونشرخ على اعتصام ماسبيرو بكرة
لا لنا صالح بجيش ولا بنائب عام ولا بشرطة.. لنا صالح ببلدنا وبس، مالهاش غيرنا، وطول عمرها مالهاش غيرنا، ولا حد بينفعها غيرنا
المسلمين حيروحوا اكتر من المسيحيين بكتير، والمسلم اللي مش حيروح يبقى بيخون بلده
والمسلم اللي حيروح مش حيروح يقولهم اهدوا.. عشان كده هو حيعصبهم اكتر
حيقولهم: انا جاي عشان عايزين حقنا من اللي عمل فينا كده في امبابة. بس. 
المسيحيين مش عايزين حماية دولية، فعلا مش عايزينها، بس واحد بيمسك الميكروفون ويخري الخرا ده والناس سخنانة بتقول وراه، لكن لما المسلمين يبقوا تلات اضعافهم ماحدش حيمسك الميكروفون ويقول الكلام ده، حنقول: عايزين حقوقنا.. احنا المصريين، عايزين حقوقنا
انا ما اعرفش حد يقعد لي على النت يشير لنكات ويقعد يحلل في بول ويقول: اصل دي فلول، اصل دول سلفيين، اصل دول مش سلفيين، اصل مؤامرة اصل نيلة على دماغه... ده بيض ده... حي على الجهاد
حي على الجهاد بقى
مصر محتاجانا.. مصر اتكعبلت وعايزة اللي يلحق يقومها، مش يقعد يتفرج عليها وهي واقعة عشان يعرف اتكعبلت في طوبة ولا في حفرة.. المهم انها اتكعبلت وخلاص
الكورة في ملعب المسلمين.. اللي مش حيروح يبقى خانها
واي حد تشوفه بيشحن طائفي وعايز اختي وعايز بنت خالتي وشنودة يمشي وسلاح الكنيسة والقرف ده اشمطه وخلي اللي ما يشتري يتفرج عليه، ده خاين ده، خاين، زي الجاسوس الاسرائيلي، وزي الفلول، ويمكن يكون جاسوس اسرائيلي فعلا انت ايش ضمنك؟ ده خاين وقاتل.. بيقتل مصر
مصر لو اتقسمت عشان واحدة ست انا مش عايزة ابص في وش جنس مسلم مصري هنا في البلد دي.. وايوة انا باحمل المسئولية للمسلمين المصريين... المسئولية مسئوليتهم دلوقت، ومصر محتاجاهم دلوقت، ومتعلقة في رقبتهم
وروها نفسكم... وروا الدنيا نفسكم اذا كنتوا مصريين بجد ولا لا

78 comments:

Unknown said...

أمن الدولة يا أمن الدولة فين الأمن وفن الدولة
لازم نلم ظباط وأمناء أمن الدولة ونحبسهم غير كده حنعيش القرف كله
العالم ده هي أس المصايب

Unknown said...

الحمد لله انك انت بالذات يا نواره بدأتى تحسى بالمؤامره الى بتتحاك فى الخفا على الثوره عشان انتى كنتى بدأتى تنحرفى عن الطريق وتمشى ورا الشائعات الحمد لله انك رجعتى للثوره من تانى مش كلام

gogo said...

طيب ماتكلمي ٦ ابريل والائتلاف ممكن يعملوا عدد كويس

Anonymous said...

والله يابنت الغالى كلامك بيوجع ولسانك بيوجع وانا لو عندكم فى القاهره ماكنتش سيبت اخوتنا المصريين مش المسيحيين وانا واثق ومتاكد منكم زى تميم وعارف انكم تقدروا تعملوها تانى وتالت وربنا معاكى يابلدى والفاتحه لارواح الشهدا

Unknown said...

عيطيني ثاني يا نوارة
يا ريت عندي عشر ولاد وميت قريب كنت بعتتهم كلهم ماسبيرو

touch of fire said...

انا قريت تعليقات كتيره اوى فى مواقع كتيره على الموضوع ده وبجد فيه ناس كتيره اوى حرقت دمى بكلامها ده , يعنى الى يقولك " آدى الى خدناه من الثوره مكنا عايشين كويسين والى يقولك فينك يا مبارك والتالت الاهبل الى عمال يشتم فى السلفيين " بجد حاجه تجنن , يعنى هو البلد دى مكتوب عليها الشقا والقرف ده علطول , /فيش يوم كده هنصحى فيه ونمسك الجرايد المنيله دى ودمنا ما يفورش !!

nosseir73 said...

يعنى اية الوضع سيئ الدنيا سودا الثورة ضاعت البلد خربت
لا على جثتى ابدا ابدا ابدا لا يمكن نسيب البلد يتعمل فيها حاجة او الثورة تضيع
لايمكن نسكت كلنا ايد واحدة انشاء الله وربنا هيكون معانا لان مصر فى رباط الى الى يوم الدين وهيرد كيد الكائدين والسحر هينقلب على الساحر لان الثورة طاهرة بدون اغراض غرضها الوحيد هى رفعة شان مصر ربنا الستار باذن الله وانا واثقة فى الله وفى شعب مصر

Hany said...

الله يا نواره عليكي انت والله بميت راجل و ربنا جعلك من اسياب قيام الوطن بهدوئك وعقلك واكيد كلنا كمسيحيين مش هاننسي لك الوقفه ديو الجدعنه دي

Unknown said...

talama amn el dawla ghar fe seteen dahya. El gehaz el watany el wa7eed elly ye7el makano mo2akatan el mokhabarat el 3ama.

7aga men etneen. El magles el 3askary dah darebha tanash we mesh 3ayez waga3 demagh ella lama el zeeta tekhaley a3da2o mesh 3arfeen yenamo.

aw

kol deeh la3ba 3alashan yelem ma3lomat 3an a3da2 masr men gowa we bara 3ala el gabha el dakheleya. We merahen 3ala el sha3b. Law dah sa7 maye2darsh yetamen el nas khales wa 2ela el kheta matenfa3sh.

law el methal el awel yeb2a day3a baladna law e7na me7amenahash.

law el methal el tany bardo day3a el balad law masamadnash.

Unknown said...

Ostaza ya Nawara !!! Begad !!!! 1000 ta3zeem salam !!!

Unknown said...

والله مهما حاولوا انهم يعملواى فتنه فلن يفلحوا في ذلك
والاعلام المصري بقى وسخ وساخه
يا ريت محدش يصدق اي خبر الا بعد ان يتاكد منه
ربنا ينتقم من اللي عايزيزن يعملوا فتنه يولعوا البلد

نور الدين said...

اولا انا معاكي في كل اللي بتقوليه يا نواره ولازم نوقف مع اخونا المسحيين بس هما لازم يراعوا برده ان في مسلمين ماتوا مش مسيحيين بس يعني المشكله من الطرفيين مش من طرف واحد ده عتابي بس لكن انا معاكي في موضوع اننا نوقف معاهم لان حرق الكنائس ده مش من الاسلام في شئ بل الاسلام امرنا اننا نحمي كنائسهم ..وهما لازم يعرفوا ان ده واجب ديني علينا قبل ما نكون بنحميها عشان اخونا في الوطن وكمان عشان الرسول عليه الصلاة والسلام امرنا باْننا نحافظ علي الاقباط وممتلكتهم وكناْسهم وده برده ..العهد اللي اتفق عليه سيدنا عمر بن الخطاب رضي الله عنه لما تم فتح مصر فاْنا شايف ان ده واجب شرعي علينا ......وبعد ما نرجع للناس دي حقوقها نبقي نعرفهم هما غلطوا في ايه وبس ...,يارتني كنت في القاهره كنت زماني معاهم هناك في ماسبيرو بس للاسف انا اسكندراني ومش قادر اوصل بس بقوم بدوري هنا اني اصفي الاجواء علي قد ما اقدر والله المستعان ...وربنا يحفظ مصر

Unknown said...

انتى بت جادعة اوى واللى خلف مماتش طبعا وربنا يديه طولة العمر
عمنا الكبير نجم

Dr.issamo said...

كلام جميل يا نوارة

بس والله صدقيني
احنا لما سمحنا بمظاهرت اختي كاميليا
وبعدها سمحنا بمظاهرات ضدها

ومظاهرات جامع النور

ومظاهرات مسيحيين تانية

هو ده اللي شجع السلفيين يروحوا تاني على الكنيسة دي ويتظاهروا وبعدين الحكاية باظت


أنا رايي ان احنا نمنع المظاهرات تماما من الطرفين ومن جميع الاطراف
وهو الجيش فهم الغلط فين وهيصلحه

لكن انا خايف من فوضى المظاهلرات دي

وانا ما زلت عندي ثقة في الجيش وشايف بس انهم حسني النية زيادة عن اللزوم بس الحادثة دي هتفوقهم


لاحظي ان فيه مؤشرين كويسين يبينوا ان الجيش محترم ونواياه كويسة
المصالحة الفلسطينية
فتح معبر رفح
تفجير غاز اسرائيل


يا ريت تثقي في الجيش
هو كويس والله

شكرا يا نوارة مصر

Unknown said...

والله انتى بميت راجل يا نواره ؛ وانشأالله ربنا مش هيكسفنا ومصر هتبقى احسن بلد فى الدنيا بينا كلنا مش هنسيب حد يوقعها تانى

gogo said...

فية حاجة كمان تونس فيها قلق بقالهم ٤ ايام وامبارح كان في حظر تجوال عندهم والنهاردة قريت ان رئيس وزرائهم بيقول ان الا نتخابات اللي كان مفروض تكون ف يوليو هاتتأجل .. في حاجة غلط عندهم وعندنا ربنا يستر

Dr.issamo said...

بس عموما اذا كنا مش هنعرف نوقف المظاهرات
يبقى ننزل ننضملهم علشان ما يكونوش لوحدهم وما تكونش مسيحيين بس
تبقى مصرييييين
موافق

arabian_faithful said...

السلام عليكم

أنا مش فاهم هوا أنا المجنون الوحيد و لا أنا العاقل الوحيد لما بأقولكم المظاهرات مش حل و أنتم بتنيلوا هيبة الدولة لما بتخترقوا حذر التجول و مش هاممكم حد و مفكرين ده جهاد جهاد أيه بس أنتم الظاهر أتلحستم خالص !!!!!!

الحل أن الدولة هيا اللى تحل مش تتنيلوا تروحوا تعتصموا أمام ماسبيرو طيب لو بالصلاة على النبى الحكاية خدت أسبوعين تلاته فى التحقيقات حتعملوا أيه !!!!

يا جماعة أنا معنديش عصا موسى و ما أعرفشى الحل السحرى اللى ممكن نعمله بس بالتأكيد الإعتصامات و الخيبة التقيلة دى مش حل عاوزين الدولة تحقق العدل يبقى تساعدوها و ممكن تعملوا لجان شعبية أنما مش تقولوا فين هيبة الدولة و أنتم بتكسروا القانون

أحا يعنى لما بتقولى محدش يخالف القانون و أنت تنزل تخالفه أنهى منطق ده

ضحيـــــــة البيروسول said...

اسمعوا حديث الرسول عليه الصلاة والسلام : عن عمر بن العاص عن عمر
أنه سمع رسول الله يقول : (إذا
فتح الله عليكم مصر بعدي فاتخذوا فيها جنداً كثيفاً، فذلك الجند خير أجناد الأرض) قال أبو بكر: ولم ذاك يا رسول الله؟ قال: (إنهم في رباط إلى يوم القيامة).
يعني مصر لو يجتمع العالم كله اسرائيل وامريكا وروسيا وبريطانيا وفرنسا والصين ضد مصر وحدها فلن... يهزموها ولن يفككوها لأن الرسول قال هذا الكلام قبل أكثر من 1400 سنة

mohamedelnady500 said...

يا ست نوارة هنروح ونقول عايزين حقوقنا كمصريين بس حنخدها من مين انا اقولك حق الناس دى كلها عند مين عند المجلس العسكرى هتقوليلى ليه هقولك علشان المجلس العسكرى اولا هو الحاكم الوحيد لمصر دون منازع له وثانيا المجلس العسكرى عارف ان فى فلول وفى ثورة مضادة وفى انفلات امنى والشرطة حرنانة ومش راضية تشوف شغلها والبلطجية اللى بتلمهم باليمين بتسيب زمايلهم يهربوهم من الاقسام بالشمال وفى عز الثورة المجلس العسكرى خاف من الضباط الصغيرين يعملوا انقلاب عليه فسحب الوحدات المتمركزة فى انحاء مدن مصر ورجعها لثكناتها كان الشرطة رجعت ففضلت البد جنة البلطجية والمجرمين والمتطرفين تقدرى تقوليلى لو اتجمعنا كلنا امبارح قدام الكنيسة مع كل العدد المهول اللى كان هناك مش برضه كانت الكنيسة هتتحرق

ملكش دعوة said...

ماشي يعني نروح ماسبيرو ونسمع الشتيمه عادي ونستحمل عادي بس المواطنه بتفرض عليهم هما كمان انهم يحسوا ان في مسلمين ماتوا واهاليهم محروقين عليهم وهما كمان بشر وليهم عبال اتحرموا منهم
التصعيد الدولي ده خيانه عظمي وغير مبرره اطلاقا لو كانت امريكا بتحمي نصاري كانت حمت نصاري العراق وغيرهم كله اداس بالرجلين ولا همه عايزين المسلمين يتقتلوا برصاص الامريكان يبقي دهع بيأكد نظريه اقباط المهجر الحقيره الموضوع يا ست الكل مش عايز طبطبه ومعدش حد مستحمل المساخه اللي بتحصل
ايوه مسخت اوي اللي عمل العمله دي لازم يتحاسب بالقانون خالد صلاح انهرده بتاع اليوم السائع لاول مره يقول كلمه حق ان مطران الجيزه بيشجه الوقفات التنديديه عشان عارف ان في مسيحيين غلطوا برضه ومش عايز لهم محاكمات عسكريه وبكره تتفرجي لما القضاء يقول كلمته سواء علي مسلم اومسيحي ان النصاري مش هيعجبهم حكم القضاء .. هتشوفي اصلها مسخت اوي

الميدان said...

ربنا هيسترها معنا انشاء الله لازم ننشر البوست ده في كل مكان عشان الناس تقراه وتشارك
http://mtahrir.blogspot.com/

ebn said...

لأ يا نوارة انا مختلف معاكي المرة دي

انا رأيي ان كل اللي في الشارع يمشوا و الموضوع يتحل بالعقل ...

الهتفافات اللي بتتقال ديه ما تشجعش حد يقرب من الاعتصام ... فازاي عايزة الناس تروح كمان ؟؟؟

في خطة و في استغلال واضح لغضب اخواتنا المسيحيين من حد وسخ عمال يخليهم يقولوا هتافات وسخة و هو اللي هيجيب ضرب البلد و هيولعها !!!


طنطاوي ايه و مشير ايه الي بيهتفوا انو خاين ؟؟؟؟؟ بلاش هطل ...

لو هم خايفين عي الثورة .. يمشوا

مش احنا اللي نروح نقف معاهم في الغلط


انا مش بقول ان اعتصامهم غلط ... بس هتافاتهم غلط و في حد مستغلهم غلط و في استغلال لغضبهم في الطريق الغلط


يبقي الصح .. ان اللي خايف علي البلد ديه يروح بيته .. مش يقعد و يهتف و يقول اصلي غضبان !!!

الجيش اخر حاجة ممكن نحاول اننا نستفزها دلوقتي لو بنتكلم علي مصلحة مصر و مصلحة الثورة ...


و ده رأيي

mk said...

اتمني ان يعي المسلميين والمسيحيين ان بقايا النظام تتمثل في قيادات الازهر وقيادات الكنيسه. ولابد من ازاحتهم من المشهد المصري الجديد ان اردنا البناء . لانهم عقليات عاشت وترعرعت وكبرت تحت مظله الطغيان. دعوه لنصره بلادنا من كوارث الماضي

اللهو الخفي said...

ياجدعااااااااااان ماحدش يخاف من ام الفتنة الطائفية لان طالما في حد بيدي حقن وعمال يدلق البنزين علي النار هتفضل الفتنة محدودة علي قد بؤر معينة زى امبابة او الزاوية الحمراء او اي مناطق شبه كده فيها كثافة سكانيه عالية + مسيحيين كتير +تاريخ قديم من الفتنة+بعضا او ان شئت كثيرا من الجهل والفقر + بعضا من اخواننا السلفيين حسني و سيئ النية + قصة مفبركة او حتي حقيقية قديمة او حديثة عن بنت مسيحية اسلمت و هربت مع مسلم......و اديها بقي يا معلم و عيش و الهط في الفتة الطائفية.

اه انا معاكوا ان في ناس كتير بتمشي ورا الحاجات دي وده شئ يقلق لكن بصوا للناس في نفس مواقع الاحداث تلاقوا الناس كلها زعلانة من اللى بيحصل وهو ده طبع المصريين بصفة عامة وتلاقي كل المصريين عارفين ان دي الثورة المضادة......كلهم بلا استثناء مسيحيين وسلفيين.

انا اخاف صحيح لو ان اللي بيحصل ده ممكن يعمل حرب اهليه لكن انا متاكد انشاء الله ان ربنا سبحانه وتعالي حافظ و هيحفظ البلد الجميل المميز ده ( انا مش عارف مميز ليه وربنا ذكره لوحده في القران ليه) و الشعب المصرى شعب اصيل صبور عمره مايعمل حرب اهلية والفتنة هتاخد وقتها وتروح لما اصحاب الدسائس يزهقوا و يروحوا علي مامتهم اما الثورة المضادة انا اكاد اجزم ان ( الفلول ) اضعف من انها تعمل هذا الحجم من المؤامرات... الشغل ده ياجدعان شغل مخابراتي ...هما الفلول في ايه وللا في ايه؟ .... اللي بيحصل ده علشان النموذج بتاع الثورة المصريه ده ضروري وحتما ومن كل بد لازم يفشل ... يا اما نوقع بىن الشعب والجيش او نعمل فتنه طائفية... ولسه ياما في الجراب يا حاوي .... ده كفاية ان المصالحة الفلسطينية تمت في ساعة ....سهله يعني الحكاية دى؟

اخونا ضياء رشوان قال كلام زي الفل مع ريم ماجد عن هذا الموضوع (علي هذا الرابط)

اخواني المصريين المسلمين منهم والمسيحيين ...المدنيين منهم والعسكريين...وحياة ابوكوا تصبروا وتصابروا وترابطوا وتعرفوا ان هذه الثورة المجيدة (بجد مش كده وكده) انشاء الله لما تنجح وننتصر باذن الله علي كل هذه المؤمرات وبعدين نبتدي نشوف الثمار اللي ارتوت بدماء شهدائنا هتعرفوا انها فعلا كانت زلزال علي كل ظالم موجود او هيظهر في المستقبل وده اكيد اللي راعب كل الظلمه الحاليين منهم والمستقبليين... اخذهم الله قولوا اميييين

أمــانــى said...

اناااااااااااااااا قلبى مووووووووجع اوووووووووووووى على بلد ياااااااااريت الناس تفهم اننا كلنا فى مركب واحد وربنا يسترها علينا يااااااااااارب امـــــــــــــــين
ويحفظ مصر والمصرين يااااااااااااارب امين

ebn said...

كمان حاجة
اللي اسمه عمر عفيفي ده عمال يقومها علي الفيس بوك و عمال يقول كله ينزل يهتف ضد المشير الخاين!!!

"نناشد كل المصريين الحريصين علي أمن مصر سرعة النزول أمام ماسبيرو للأنضمام للمتظاهرين من الأقباط والمسلمين لأسقاط المشير الخائن العميل والذي كان غير أمين علي سلامة وأمن مصر ودم الشعب
نرجوكم سرعة النزول والنشر
"

ده كلامه من الفيس بوك !!!!

.. و اظن تجربتنا مع عمر عفيفي وقت الظباط اللي نزلوا اعتصموا لنا في التحرير و بوظوا لنا الدنيا ... تدينا اشارة ان عمر عفيفي و اي مخطط بيقوله المفروض نعمل عكسه بالظبط !!!!

ارض الله الواسعة said...

http://www.youtube.com/watch?v=3g3PD5cluK0

محمد سعدالدين said...

والله عين العقل وكلام ماينفعش حد يعترض عليه

Ahmed . M . Abdulrahman said...

عداكى العيب يا نواره

انا مش عارف اودى وشى منك فين

المفروض كنت اسافر القاهره

بس مش حينفع اسافر

مشكله

مش عارف اعمل ايه

استر يارب

فعلا الموضوع واضح انه تقسيم

بس الجيش ممكن ميرحمهمش

فى لحظه كده ممكن تفلت و تبقى مجزره

ربنا يستر

ربنا يستر

سلام يا نواره
_______________________
اقرأ مقال دليلك لفتنه طائفيه ممتازه
علشان تعرف الحقيقه فين
http://misr25jan2011.blogspot.com/2011/05/blog-post_09.html
_______________________________
الى عاوزنى يجينى
http://misr25jan2011.blogspot.com

salma dodin said...

نوارة حبيبتي، الشعب المصري حبيبي
انا والله بكتب بالتصوير البطيئ علوحة الكتابه العربي لاني في فرنسا و معنديش لوحه عربي لكن انا عاوزة الكل يفهم علي.
انا من امبارح وانا بعيط و بلطم الخدود و بصوت...اصل مصر دي لما بتتكعبل بتشد معاها العرب كلهم
و مصر دي مش بلد بس بشوية صخر و حجار...مصر دي امي...والله دي امي!!
انا يا نوارة امي اللي هي ام فلسطينية و غير عادية ابداً...علمتني يعني ايه مصر و يعني ايه عروبة...وقالتلي بالحرف..مصر دي غير كل العرب...اصل فيها 85 مليون واحد كلهم بحبونا من غير نفاق واحنا ملناش غير بعض...امي دي توفت الى رحمة الله فجأه في مارس 2010 والدنيا ضلمت في وشي..
بعد 25 يناير و تحديدا في 11 فبراير انا حسيت ان امي رجعت تاني..ما عودتش حاسة باليتم و ضهري اتشهد تاني...ومشيت دمعتي على خدي لكن راسي مرفوع و بقيت بكلم امي وقولها شوفتي يمة المصريين؟ شوفتي حبايبك عملوا ايه؟
و دلوقتي انا مش قادره غير اني استسمحكم...انا امي راحت عند اللي خلقها ومش فاضل عندي غير امي مصر...واللنبي ماتيتموني تاني...واللنبي ما تحرمونيش من امي تاني...
عارفه حتقولولي اصل انتي فلسطينية ودي مصر امنا و احنا ناخد بالنا منها...حقولكم ماشي لكن انا برضه ماليش غيرها برضه...اصلي ماليش غير حضنها مدفيني من سنة 1948!!
معلش استسمحكوا تاني...و اللنبي واللنبي...خدوا بالكم من امي...انا عاوزه امي...
انا نفسي انزل مصر دلوقتي و ادق بيبان البيوت واحد واحد...و اقعد مع صحابها و اقولهم...داروا على بعض..خدوا باكم من بعض..انتوا مالكومش غير بعض!!...اوعوا تشمتوا الاندال بيكم!!
اصل انتم والله العظيم مش واخدين بالكم احنا بنحب مصر و بنحبكوا قد ايه!!......اصل لو عارفين ده يديكوا قوة العالم كلوا عشان تقاوموا المخطط الحقير اللي مرسوم ليكم!!!
انا من فلسطين و جرحها واجعني قوي...لكن لو مصر امي تندهلي انا اسيب كل حاجة و اجري عليها افديها بدمي حالا!!..و مصر تؤمرني و جزمتها فوق دماغي...اصلها ياما ادتني...كفايه حبكم لينا بس!!
ابكي يا نواره اذاً ولا مبكيش؟ اخاف ولا مخافش؟......دي امي!!!!!
انا مع تميم...انا حراهن عليكم...وحكسب الرهان ضد امريكا وارادتها الحقيرة
حتكسفونا ولا ايه يا مصريين؟.......انا رهاني على ان اجدع ناس واحسن ناس لا يمكن يكسفونا ابدا..و لا حيحرموني من امي تاني
اشوفك بخير يا مصر

علان العلانى said...

فلتعالج الأمور من جذورها


نعم يلعب آل سعود بفوائض بترول جزيرة العرب في السياسة الإقليمية والدولية والمال له سلطان يفعلون ذلك للدفاع المشروع في نظرهم عن عرشهم فعلوها في اليمن من قبل مع حركة 23يوليو ونجحوا في استنزاف الضباط وكانوا في ذلك كما يشاء من صنعوهم ولكن مع ثورة الشعب المصري! حسنا : آل سعود أمرهم بسيط فقد انشغلت الأمة باستعادة قبلتها الأولي عن قبلتها الثانية في البداية على شعوب الأمة الحرة أن تطالب بأشراف على إدارة قبلتها الثانية وتخلصها من أيدي الوهابية فليفعل آل سعود بثروة شعوب الجزيرة العربية من البترول ما يشاءون ويشاء زبائنهم ( والزبون دائما على حق) و إذا كان فتات مائدة آل سعود الذي يرشون به شعب جزيرة العرب يرضيه و يغنيه عن الحرية فهذا شأنه وشأنهم والله يهني آل سعود بسعيدة ، ولكن أن يتوجه ريع البترول لتكبيل شعوب الأمة وكسر أردة شعوبها ، فسوف تقتلعهم شعوب الأمة من جذورهم وفي البداية : لايجوز أن تدار قبلة الأمة بمن هم ألعوبة في يد القوي المهيمنة

elzahraamegahed said...

اللى بتقوليه ده حل جزئى وأنا أضمن منين ان ما تتهدش كنيسه تانيه ولا تتفجر طالما هما على لصمه كده؟

قبل ما الكنيسه تتحرق ، فيه أضرحه اتهدت

الحل الصراحه المعلنه برؤوس الفتنه من الطرفيم ويتلموا على المنفى ،
اللى هيهديهم انهم يعرفوا انهم عليهم زى ما ليهم

elzahraamegahed said...

أولا مفيش خوف من الانفصال، لأن سيناريو أمريكا فى العراق فشل ووضعنا مختلف عن السودان ونسبة المسيحيين فى مصر ما تساعدش على تقسيم مفيد ليهم

التقسيم ممكن بعد حرب أهليه مسلحه طويله

الحل مش ان المظاهره دى تتفض

الحل ان سبب الاحتقان يزول سبب احتقام المسيحيين هو الكنيسه وسبب احتقان المسلمين هو الكنيسه

الحل اعتقال شنوده وبيشوى والزغبى وأبو يحى واللى يتشدد لهم من الطرفين ورؤوس الفتنه

Mojtba Hmeed said...

نوارة،
أنا سودانى عائش بامريكا، أطهاد المسلون بامريكا أمرمؤلم لان البلد أساسها حرية المواطن وأحترام الدستور والقانون. وعندما أشاهد أطهاد الأقباط/المسيح بمصر، يؤلمنى الأمر أكثر. أنا من أولاد الشمال ومسلم، أدرى أن الأسلام دين حق ورحمة ، الرسول (ص.) أوصانا، وما يحدث يخالف الوصية. معك أناشد أولاد مصر ، أصحاب الثورة بحماية المواطن المصرى المسيحى، مثل غيره عشق مصر وحماها.

حمكشه said...

بدأت اصدق مقاله الاسد والفيل بتاعه علاء الاسوانى ..انتوا عارفين مين السبب فى الدوشه دى ..انتو يا ليبراليين وعلمانيين اتحدتوا مع ساويرس ابعد واحد عن الليبراليه لأقصاء الاخوان المسلمين لمرض فى نفس يعقوب مما دفع الغالبيه الصامته لفقد الثقه فيكم الان التراس السلفيين(امن الدوله) يتحدى التراس جبرائيل وشنوده(امن الدوله برضه) نفسى يخلصوا على بعض لكن للأسف المصريين الغلابه حيروحوا فى الرجلين
اماحكايه الاسد والفيل فدى بتتكلم عن ولاء الاسد للفيل بعد خلع الفيل وتركه للضباع يسعون فى مصر فسادا

مش فاهمه said...

مش حاتيجى بكده حاتيجى بالنزول فى التحرير و تطهير القضاء و الشرطه من غير كده حانفضل فى الوساخه دى كتير كل واحد يعرف حدوده اللى هد كنيسه اطفيح يتحاكم و اللى ضرب نار من الكنيسه يتحاكم كله يتحاكم مش حانطبطب و نطمن مسيحيين رايحين سفارة امريكا يستقووا بالخارج ولا نخاف من سلفيين بدقون رافعين علم السعوديه الأقباط و السلفيين الأتنين رفضوا الأنضمام للثورة و التنين عايوزين يفشلوها حانقف للأتنين لكن ولا المسيحيين ضحايا و لا السلفيين ضحايا الأتنين لازم يفوقوا و ش كده و الشرطه و الجيش يقفوا امام مسئولياتهم .......

حمكشه said...

موضوع المشير خاين ... خاين لمين يعنى ؟
الكارثه ان العجائز المخرفين اللى بيحكموا مصر متعصبين ومتطرفين ... يعنى زكريا عزمى اللى سلم وفاء قسطنطين لمنير فخرى عبد النور كان بيلعب فتنه ..الجمل اللى مش عايز يروح جهنم لوحده ومصر ياخد معاه بعض المصريين متطرف ايضا بس للألحاد ...فتنه برضه !كمان القذر اللى اسمه محمود عامر اللى كفر البرادعى ده فتنه برضه ...انا كمسلم لا اتخيل الاعتداء على مسيحى رغم تعاطفى مع التيار الاسلامى المعتدل
يا اقباط مصر اتقوا الله غالبيه المسلمين غلابه ومضهدين اكتر منكم فلاتستمعوا لمثيرى الفتن من الطرفين وعودوا لدماثه اخلاقكم وطيبتكم فهذا ما سيعطيكم حقوقكم كامله بنجاح الثوره

مش فاهمه said...

نسيت اقولك حاجه كمان وانتى فى ماسبيرو ماقولتيش للأقباط عيب ترفعوا الصليب و ماترفعوش علم مصر ..مصر هة الأولى دلوقتى و بعدين ....انتى عملتى لى بلوك على التويتر ماشى كان ممكن ما اشاركش هنا فى البلوج بس مشاركتى لك فى البلوج بتاعك مش علشان نوارة بس لأ علشان اللى بيتابعوا نوارة

mohamed said...

ايه التبسيط بتاع سيادتك ده اظن انا بعتلك قبل كده وشتمت السلفيين وطلعت امهم عاوزين نبطل نفتح عين ونغمض عين لا انا زعلان منك

mohamed said...

زى ما عمرها ما حصلت من يوم الفتح الاسلامى ان كنيسة تتحرق برضه عمرها ما حصلت من يوم ام البلدى ما اتخلقت ان الشعب اذل فرعون وحايشته وجابه م الشخشخ هو واللى معاه وحطهم فى السجن تفتكرى الفرعون ده هو واللى معاه حيفضلو ساكتين خصوصا وهم قاعدين مدلعين فى السجن ومروقين السلفيين هطل والمسيحيين كمان خدوا ع الدلع والاتنين معاهم كشاكيل رومنى 200 ورقة الله يح... الاتنين فى الارض

مش فاهمه said...

بلال فضل و مقالته النهارده
http://www.almasry-alyoum.com/article2.aspx?ArticleID=296193&IssueID=2130
ماحدش بقى يقول سلفيين و بطيخ و اسلحه و كاميليا و عبير

بساطه said...

طبعا كالعاده هعد اعيط زي الهبل ومافيش مني فايده وهعد اشحت على روحي واقولك هموت وانزل بس مش هقدر عشان ابويا كبير في السن وعنده التهاب رئوي وقاعد معايا في بيتي مقدرش اسيبه تعبان اوي ..

عايز اموت والله عايز اموت
مش قادر اتفرج علي بيحصل في مصر
والله عندي استحداد الحس صوابع رجلين اي مسيحي اشوفه واموت نفسي حقه يلرجعله بس ما باليد حيله
ربنا ما يوري حد احساس التقطيع البشع ده

ياارب يوفقكم يارب بحق جاه النبي
يارب بحق دم الشهداء
يارب لسه دمعنا عليهم مانشفش
يارب انقذ مصر

Unknown said...

أأيدك ولو لا ان بيني وبينكم بلاد لكنت معكم ، ولكن خليني اقول إقتراح تاني أقول اني ها أبني الكنيسة دي بنفسي ولو حتى أحط فيها طوبة وحدة وأكون من شارك في إعادتها، وده برده من منطلق إسلامي.

ويكا said...
This comment has been removed by the author.
ويكا said...

برجاء الاطلاع على هذا المقال لاهميته

حيث انه يصب فى نفس البوتقه

http://besara7aa.blogspot.com/2011/05/blog-post_2800.html

ويكا said...
This comment has been removed by the author.
ويكا said...
This comment has been removed by the author.
omima said...

يانوارة انا معاكى المفروض نقف مع المسحيين فى هذا الموقف وخاصة انى مش مقتنعة ان الاخت كامليا التى شاهدتها تستحق هى ولا غيرها اىا كان ان تسقط مصر ام الدنيا مصر سبعة الاف سنة حضارة مصر الاهرام مصر النيل مصر الناس الطيبين مصر اللى مقهرهاش الهكسوس ولا المغول ولا الصلبيين ولا اليهود مصر اللى اتحدت الزمان مصر التاريخ مصر الشباب الجميل اللى بقابلهم يرجع الامل فى الحياة مرة تانية مصر انت يانوارة مصر بنتى السمرا الجميلة مصر ابنى الشاب المؤدب الراجل ابن البلد مصر ضحكة الامل فى عيون بنتى الصغيرة مصر دى حاجات كتيرة مش ممكن تضيع عشان واحدة بتدلع مع جوزها ولا واحد غبى جاهل اتعملة غسيل مخ من دولة متخلفة مصر اكبر من كدة واغلى ياولاد الكلب

omima said...

شفتى يانوارة قناة العبرية لسة بتلعب دور الدنيئة وهى القناة الوحيدة الى فى تغطية الاحداث المراسل بتاعها جايب اربعة يشتموا فى الثورة وواحد بيقول انابكرة يوم 25 وطبعا تواطؤ القناة مع المخلوع واضح تماما ربنا ياخدهم الاثنين فى يوم ما طلعتلة شمس

كيوبيد said...

دى تانى مره ابكى باسببك بس فعلا بكاء الخايف القلق البلدربنا يستر عليه ومعكى حق ياريت كل الناس تنزل عند ماسبيرو مليونية والى غلط ياتحاسب والاعدام هو الحل الى يعلب فى الامن القومى ومصير البلد مش له الا الاعدام كان سلفى كان وهبى كان مسئول كان غفير الاعدام ولازم نشوف حل فى امن الدوله العسيوى يشوف حل فيه دول هم سبب الخراب ولسه بركاتهم مش ظهرت وربك يستر على مصر وشعبه من الفتنة

nasser59 said...

اول مرة اكتب رد بعد ان بكيت نمن خوفى على البلدز ارى ان يكون النزول الى ميدان التحرير منعا للاى احتكاكات

Anonymous said...

ابحثوا يا مصريين عن الفوضي الخلاقة لم تكن هناك ثورة ولا يحزنون كل شيئ مخطط وعشان نحافظ علي بلدنا لازم نتحد معا لاجهاض تلك الفوضي الخلاقة وسلمولي علي ثورة 25

masry said...

كلمة السر كاميليا
هل اسلمت كاميليا
ولماذا كل هذة الضجة والمظاهرات عند اختفائها اول مرة
هل كان ذلك لعلم زوجها انها اسلمت فعند اختفائها اشاع خبر خطفها من جانب المسلمين
ولماذا انتشر خبر اختفائها بسرعة وانطلقت المظاهرات والاحتجاجات
"هما عملوا لها غسيل مخ، وإحنا هنغسل المغسول" ولماذا قال الأنبا "أغابيوس" أسقف دير مواس
ولماذا لم تظر كاميليا منذ شهر اغسطس 2010 الا الان مع ان اختفائها داخل الكنيسة هو احد اهم اسباب الفتنة الطائفية مؤخرا
للاسف الشديد ان كاميليا هي السبب الرئيسي وراء توتر الاجواء بين المسلمين والنصاري وكان يمكن للكنيسة ان صدقت في كون كاميليا مسيحية ولم تسلم من وأد هذة الفتنة بظهور كاميليا في احد برامج التوك شو الشهيرة علي الهواء نافية اسلامها عندما قام امن الدولة باعادتها الي زوجها عندئذا كان الامر برمتة انتهي ولكن؟ يبقي السؤال لماذا لم تظر كاميليا الا الان؟
اختفت كاميليا زوجة الكاهن "تداوس سمعان رزق من منزلها بديرمواس محافظة المنيا وانطلقت مظاهرات عارمة تتهم المسلمين بخطفها ثم عادت بمعاونة جهاز امن الدولة الذي اعلن ان خلافات زوجية وراء هروبها من المنزل ولكن تنتشر علي النت صور ووثائق تؤكد انها اسلمت وانها ذهبت الي القاهرة بمعاونة رجل مسلم لتعلن اسلامها في مشيخة الازهر الذي اصدرت اليه تعليمات بعدم اشهار اسلامها وتبليغهم بمجرد ظهورها وبالفعل تمكن امن الدولة من الوصول اليها عند احدي الاسر المسلمة وتسليمها للكنيسة ومنذ ذلك الوقت وهناك قضايا تتهم الكنيسة بخطفها وحجزها بدون وجه حق وتوترت الاجواء بين المسلمين والنصاري مما ادي الي حدوث مناوشات هنا وهناك ووسط هذا الجو المشحون تم تفجير كنيسة القديسين وكانت كاميليا كلمة السر فلو افترضنا ان التفجير من جماعة اسلامية متطرفة فهذا وارد فقد كانت هناك تحذ يرات بعمليات مشابهة من تنظيم القاعدة لو لم يتم الافراج عن كاميليا ولو كان التفجير بواسطة دولة اجنبية (اسرائيل) فقد استغلت الاجواء الطائفية بسبب كاميليا وقامت بتفيذ هذة العملية الارهابية لينفجر الوضع او اخيرا استغل امن الدولة موضوع كاميليا وقام هو بالعملية كورقة ضغط علي الكنيسة. انشغل الناس بعد ذلك بثورة تونس واعقبها الثورة المصرية العظيمة ليعود موضوع كاميليا الي السطح مرة اخري بقوة ولتستغل الاطراف المختلفة نفس الموضوع لتحقيق اغراضها فامن الدولة او فلول النظام يسعوا لاشاعة الفوضي ووأد الثورة وتسعي اسرائيل لنفس الغرض فهي مهددة بحرمانها من الغاز المصري فضلا عن صفعة المصالحة الفلسطينية والمكاسب السياسية الدولية التي تكتسبها الثورة يوميا اما الجماعات الاسلامية او السلفيون قهم يسعوا لكسب ارض جديدة وفرض وجود وكيان بعدما استطاع الاخوان من تحقيق مكاسب كثيرة بعد الثورة واستطاعت الكنيسة فرض كلمتها في احداث اطفيح
ظهور كاميليا الان وبهذة الطريقة لن يكون الحل فلابد من حل سريع يتمثل في الحل الامني والطرق بايدي من حديد علي البلطجية ومثيري الفتن بالقانون دون العودة الي بلطجية الشرطة اما الحل الجذري فهو عقد مصالحة بين اطراف المجتمع كله ....... وهذا في الجزء الثاني ان شاء الله من هذه الملاحظة

متفائل said...

تناشدين المصريين كي يذهبوا لنجدة مصر وإقالتها من عثرتها ؟ .. حسناً .. يؤسفني - رغم كوني متفائل - أنه لم يعد هناك (مصريين) فالناس (ومن زمان والفضل للفضائيات الدينية) قد صاروا إما مسلمين أو مسيحيين .. نطاعتهم الدينية وإنعدام وعيهم القومي (الفضل هنا لثقافة السادات ومن بعده) جعلهم لا يفهمون معنى المواطنة .. فهذا مسلم يدين بالإنتماء للسعودية التي أرضعته الدنانير وفكرها الوهابي وأقنعته بأنه (طز في مصر على رأي مرشد الإخوان السابق) وهذا مسيحي يعتقد أن أمريكا هي بلده وموطنه عشان مسيحية زيه لهذا يرفع الصليب أمام ماسبيرو بدلاً من علم مصر .. أنه فكر القبيلة الذي يأبي أن يبارحنا بل هو يسكن منا العقل والروح .. حتقوليلي : طب والميدان واللي حصل في الميدان ؟ حاقولك إن ده كان (مرحلي أملته الضرورة) ضرورة التخلص من مبارك وكان عدواً مشتركاً للقبيلتين .. لهذا إتحدتا مرحلياً وما أن زال سبب إتحادهما حتى عادت الأخت ريما إلى عاداتها القذرة القديمة

duedare said...

أولا تحياتي لمصر نواره...أنا فلسطيني..من جمبيكو من غزه...لا أبالغ اذا قلت أن كلام نواره كله صح,من الموقف الفلسطيني حتى الموقف السعودي..كانت نظريتنا زمان ألا نتخذ أي موقف من أي حد من الدول العربيه,كنا ياعيني دايما مرعوبين ,لكن من يوم ما تحررت مصر بفضلكم,وبفضل الله, فرعنا,وشدينا حيلنا ونوينا عالخير,يوم 15-5 ,ما تحبطوناش ربنا ايخليكو مسلمين ومسيحيه.

Passant said...

تمام كده يا نوارة لازم ننزل كلنا مهما حصل و مهما سمعنا الناس مجروحة و مخذولة انا كنت قدام مكتبة الأسكندريةامبارح سمعت من اول المسلمين هنا بيعملوا ايه لحد الحماية الدولية و نازلة بكرة تانى فى وقفة شارع 45 و حنزل بقيت عمرى
لو الامر تطلب
علشان الحيوان اللى فاكر انه حيعمل فتنة يتلم

elzahraamegahed said...

لازم حمله شعبيه منظمه لحماية الكنائس شباب الثوره ينظموها فى كل حنه فى مصر /البلد مش هتتحمل حادثه من النوع ده كمان

nour1971 said...

افهم ايه لما انزل النهارده ف المنطقه اللي انا ساكنه فيها الاقي كنائس المنطقه مفش عليها امن كالعاده نهائيااااااااااااااااااااا مع العلم انه لغايه الاسبوع الي فات كان موجود امن الكنيسه عادي؟؟؟؟؟؟؟؟؟؟ افهم بايه ان امبارح امام مطرانيه الجيزه اللي طلعت منها جنازه المسيحين اللي ماتوا كان فيها امن و جيش و دبابات لوريين شايلين شرطه عسكريه علشان وزير الداخليه ساكن في العماره اللي امام المطرانيه وزيييييييييير الداخليييييييييييييه ساااااااااااااااكن هنااااااااك فحطين من صباحيه ربنا امن حاطين امن حاطين ايه حاطين امن يا ريت حد يشرحلي لو سمحت

elzahraamegahed said...

أنا بدرس فى فرمسا ومصاحبه مسيحيه عراقيه وهى بتتابع اللى بيحصل فى مصر ، هموقالت لى إنها مصاحبه أقباط كتير وأن متعصبين وبيكرهوا المسلمين جدا ، احنا المسيحيين العراقيين ما فى عندنا التعصب والكره ده

المسيحيين مشحونين قوى والكره مزروع جواهم والحل تفصل الشحن

hardway said...

أنا مش عارف أنت عايزة مننا ايه؟؟
ما تشوفي أصحابك بتوع الثورة هو أنتم مش كفاية
ايه يانـرنـر؟؟؟؟؟؟؟؟؟؟؟
فين وائل..ولاهو خد الجايزة...وفك....
فين شادي..ولاهو خد ساويرس ..وفك....
فين ناصر عبد الحميد..ولاهو خد ممدوح حمزة..وفك
ايه يا نـرنـر؟؟؟؟؟؟؟؟؟؟؟؟؟؟؟؟
وين أصحابك؟؟؟؟؟؟؟؟؟؟؟؟
يعيني عليكي..كله أظبط..وأنت لسه....
مش لسه أوي ماأنت مذيعة في كذا محطة
مذيعة قناة التحرير..مع القابض 9مليون في السنة الواحدة..يامصريين
نـرنـــــــــر
نسيت أسألك أنت لبستي ايه و أنت نازله
ياريت..ياريت.. الجوب الجينز

hardway said...

أنا مش عارف أنت عايزة مننا ايه؟؟
ما تشوفي أصحابك بتوع الثورة هو أنتم مش كفاية
ايه يانـرنـر؟؟؟؟؟؟؟؟؟؟؟
فين وائل..ولاهو خد الجايزة...وفك....
فين شادي..ولاهو خد ساويرس ..وفك....
فين ناصر عبد الحميد..ولاهو خد ممدوح حمزة..وفك
ايه يا نـرنـر؟؟؟؟؟؟؟؟؟؟؟؟؟؟؟؟
وين أصحابك؟؟؟؟؟؟؟؟؟؟؟؟
يعيني عليكي..كله أظبط..وأنت لسه....
مش لسه أوي ماأنت مذيعة في كذا محطة
مذيعة قناة التحرير..مع القابض 9مليون في السنة الواحدة..يامصريين
نـرنـــــــــر
نسيت أسألك أنت لبستي ايه و أنت نازله
ياريت..ياريت.. الجوب الجينز

MarwaGoogle said...

ممكن تعملو حاجة صح لأهالي المتوفين و المصابين بدل ما كل حاجة مظاهرات؟؟

hayat ank said...

انا اسفه قوى يا نواره ما دخلتش الصبح على الفيس بوك بس الدعوه بتاعت ماسبيرو ممتده لبكره ولا لا ارجوكى انا عايزه اشارك انا بعمل مشاركات فى الشارع مع الناس بس لو واقفه ماسبيرو ممتده لبكره انا رايحه انشاء الله ردى حتى برساله

omima said...

يانوارة عيب شباب الثورة قلة الخبرة على مدى يوم كامل تبعت فية جميع الفضائيات العربية والمصرية رايت مدى تشدد المسحيين ووقوفكم بجانبهم فسروة غلط على انهم اصحاب حق مطلق وخد ياشتيمة واتهامات للجيش ارجوكى يانوارة انت وشباب الثورة تفهمونى طلبكم الان بمجلس رياسى فورا سببة اية؟ الجيش حامى الثورة فوقوا شوية واياكم والخيابة انا انىء بكم من ان يتم التلاعب بكم وعجبنى موقف عمرو اديب لما قرر ما يفتحش موضوع امبابة لا ن واضح ان كل واحد يشوف كاميرا بتهبل ويلبخ بكلام استفزازى

وليد said...

من اّن لاّخر يجب مراجعة الحقائق ليكون العمل على بينة ولتبيين التدليس

اولا :من قام بحرق الكنيسة باعتراف الجميع بلطجية

ثانيا :كمية السلاح النارى والذخائر المستخدمة والاستعداد للحدث تكشف ان الكنيسة كانت على علم

ثالثاهجومك الضارى وتحريضك على الاسلاميين الذى بلغ ذروته يوم السيت ومحاولتك الصاق التهمة بالاسلاميين

قبل التثبت من الواقع تبين تاّمرك على الثورة ومحاولتك اعادة انتاج قمع نظام مبارك طالما ان من سيكتوى بناره هم خصومك الفكريين

ولكن الحمد لله الخطة الحقيرة فشلت عندما شارك الجميع فى حماية الكنائس ولم ينقادوا لشهوة الانتقام اللحظى من النصارى فى امبابة

اللذين ارى انه كان من المخطط التضحية بهم حتى يكون اعتصام ماسبيرو و"السفارة" حاشدين وبعشرات الالاف

ويكون بقاء الكنيسة فوق القانون هو اقل الاضرار مقارنة بالتدخل الخارجى

والاّن المطلوب ان يشارك الجميع بكل بلاهة لفتح مخرج مشرف للكنيسة من اعتصام غير مبرر على الاطلاق

بعد تحويل المتهمين للقضاء العسكرى الا لو كان المطلوب هو اطالة امد الاعتصام للمساومة على دفن الحقيقة فى ملف المسلمات المعتقلات

اما التعامى عن الواقع والاصرار على اتهام المطالبين بدولة القانون الذى يطبق على الجميع -والذى من بديهياته انه

عندما تطلب النيابة العامة مثول شخص امامها لا يكون الرد بعرض لقاء مصور يرد فيها مجهول على اشياء ربما

لا تخصه!!!-باشعال الفتنة فى الوقت الذى تعترفين فيه بطائفية وقذارة شعارات الاعتصام!!!!!!!!!!!فلا اجد توصيفا يليق به

اخيرا : لا تنازل عن دولة القانون مهما كانت المؤمرات والتدليس والانحياز و"الاستهبال"

والله الموفق.

مصري بالغربة said...

يجب ان تتم قراءة مقال بلال فضل وبسرعه

مصري بالغربة said...

يجب ان تتم قراءة مقال بلال فضل وبسرعه

وليد said...

اضافة صغيرة: فى البوست ده بتوجهى كلامك للمصريين يحموا الثورة بالانضمام لاعتصام طائفى!وغير مبرر !!!

وفى البوست اللى قبله بتوجهى كلامك للجيش وتحرضيه على قمع الشعب نفسه وتجاهل قضية مواطنات مصريات مجهولات المصير !!!!!

بجد انتى اعجوبة

utopia said...

مبارك : لن اغادر شرم ولن اذهب الى السجن
مبارك : لن اغادر شرم ولن اذهب الى السجن

اعلنت جريدة الشروق الكويتيه انها حصلت على تصريح

من الرئيس السابق لمصر محمد حسنى مبارك

اعرب فيها انه لن يغادر مدينة شرم الشيخ ويتجه الى القاهرة

وانه سوف يمكث مع زوجته فى الجناح المميز فى مستشفى شرم الشيخ العالمى وسوف يقضى فيه فترة نقاهه

هو وزوجته

وانه لن يغادر مستشفى شرم الشيخ الى مكان اخر حتى لو على اعلى مستوى فى مدينه اخرى داخل مصر

وانه لن يمسه احد وليس هناك من يقدر على هذا الامر وهو تحويله الى مستشفى طره مهما كان ولو اتوا له بافضل دكاتره على مستوى العالم

وليس هناك من يملك سلطه فى مصر كلها او خارجها لزحزحته من مقره الحالى الذى اختاره بنفسه ولم يغصبه احد على المكوث به كما يصرحون

http://www.masrawy.com/Moraselon/ArticlesDetails.aspx?AID=108972
السؤال هو ليه واصف من نفسه كده لييييييييييه؟
ماسك ذله لميييييييييين؟؟

utopia said...

مبارك : لن اغادر شرم ولن اذهب الى السجن
مبارك : لن اغادر شرم ولن اذهب الى السجن

اعلنت جريدة الشروق الكويتيه انها حصلت على تصريح

من الرئيس السابق لمصر محمد حسنى مبارك

اعرب فيها انه لن يغادر مدينة شرم الشيخ ويتجه الى القاهرة

وانه سوف يمكث مع زوجته فى الجناح المميز فى مستشفى شرم الشيخ العالمى وسوف يقضى فيه فترة نقاهه

هو وزوجته

وانه لن يغادر مستشفى شرم الشيخ الى مكان اخر حتى لو على اعلى مستوى فى مدينه اخرى داخل مصر

وانه لن يمسه احد وليس هناك من يقدر على هذا الامر وهو تحويله الى مستشفى طره مهما كان ولو اتوا له بافضل دكاتره على مستوى العالم

وليس هناك من يملك سلطه فى مصر كلها او خارجها لزحزحته من مقره الحالى الذى اختاره بنفسه ولم يغصبه احد على المكوث به كما يصرحون

http://www.masrawy.com/Moraselon/ArticlesDetails.aspx?AID=108972
السؤال هو ليه واصف من نفسه كده لييييييييييه؟
ماسك ذله لميييييييييين؟؟

utopia said...

مبارك : لن اغادر شرم ولن اذهب الى السجن
مبارك : لن اغادر شرم ولن اذهب الى السجن

اعلنت جريدة الشروق الكويتيه انها حصلت على تصريح

من الرئيس السابق لمصر محمد حسنى مبارك

اعرب فيها انه لن يغادر مدينة شرم الشيخ ويتجه الى القاهرة

وانه سوف يمكث مع زوجته فى الجناح المميز فى مستشفى شرم الشيخ العالمى وسوف يقضى فيه فترة نقاهه

هو وزوجته

وانه لن يغادر مستشفى شرم الشيخ الى مكان اخر حتى لو على اعلى مستوى فى مدينه اخرى داخل مصر

وانه لن يمسه احد وليس هناك من يقدر على هذا الامر وهو تحويله الى مستشفى طره مهما كان ولو اتوا له بافضل دكاتره على مستوى العالم

وليس هناك من يملك سلطه فى مصر كلها او خارجها لزحزحته من مقره الحالى الذى اختاره بنفسه ولم يغصبه احد على المكوث به كما يصرحون

http://www.masrawy.com/Moraselon/ArticlesDetails.aspx?AID=108972
السؤال هو ليه واصف من نفسه كده لييييييييييه؟
ماسك ذله لميييييييييين؟؟

متفائل said...

شوفي اللينك ده .. وهو تحقيق صحفي نشرته (المصري اليوم) ويتحدث عن (الولايات المتحدة الإسلامية) التي أعلنها الإجتماع الإخواني - السلفي المشترك الذي إنعقد اليوم في الهرم وضم خمسين ألفاً منهم .. يتحدث أيضاً عن (الخلافة) التي يتعهدون باحيائها .. دستور أيه بقى ؟ وتداول سلطة أيه بقى ؟
http://www.almasry-alyoum.com/article2.aspx?ArticleID=296190

ملكش دعوة said...

عزيزتي النواره لسه عندك شك دلوقتي ان اللي حصل في امبابه ده كان عشان نشوشر علي موضوع كاميليا وعشان نضرب كرسي في الكلوب ونصرخ ونولول ونقول السلفيين هيهدوا الكنايس السلفيين هيطردونا من البلد الحقونا يا خلق هووه
اسلوب مبتذل ورخيص واحمق في الخروج من الازمه دايما بتقع فيه الكنيسه وبعدين تتعك فيه اهو دلوقتي ملف المسلمين الجدد هيتفتح واللي كانت الكنيسه عايزه تدفنه اهو بقي علي عينك يا تاجر اشربوا بقه
العيب بأه مش علي الكنيسه العيب علب اللي بيطبلولها
اما بخصوص السلفيين والاسلاميين والاخوان وغيرهم اللي اتشتموا برعايه حضرتك متهيألي في الزحمه دي وانتي بتحشدي الناس للتفاعل في حل الازمه يبقي انتي مدينه لهم بأعتذار ... اعتذار فوري اذا كنتي قبلتي كل اخطاء النصاري الفادحه اللي عايزه تودي البلد في ستين داهيه فمن الممكن انك تبلعي هفوات السلفييين اللي بيحركهم النخوه والشهامه " مش الهيجان " اللي وصفتيهم بيه وانتي فاهمه كويس كلامك بيرمي لايه ويا ريت تكوني منصفه وتفكري في حده وتهور ردود فعلك الغير محسوبه واللي صدمت ناس كتير فيكي ناس والله ياما حبوكي واحترموكي بالرغم من اختلافهم معاكي فكريا واذا كنتي عايزه الموكب تمشي بينا كلنا مسلم مسيحي يميني يساري ليبرالي فلازم كلنا بقبل بعض بعبلنا كده من غير تحيز ولا تمييز نراجع بعض اه ونصحح مفيش مانع لكن طريقه انا كده وبحب كده ولا عمري هاعيش الا كده معادتش تنفع عجبك كلامي ولا معجبكيش ارجو نشر التعليق

esraa said...

انا مش بدافع عن عمر عفيفي هوة راجل مهيس اساسا بس المفروض كل كلام يتقال و يتكتب يدخل على جهاز اسمه العقل ولو احنا من الاول بنعمل عكس كلامه مكناش انتبهنا لكلامه عن حادثة 2 فبراير طيب بالنسبة ان المشير خاين الله اعلم بس هوة مش بعيد عن كدة عموما بالعقل كدة اتكلمتو عن عواجيز النظام المشير بقاله وزير دفاع 25 سنة لو مكنش بيخدم مصالح مبارك و اسرائيل كان مبارك شاله طيب احنا عمالين نقول فلول النظام هوة مش المشير ده فلول جيشنا زي الفل بس المجلس العسكري الله اعلم فيه مؤشرات كتير تخلينا نشك اولها الكلام الي قاله المشارك الي اتكلم ان الحراسة اتشالت من ادام الكنايس و تانيها ان الجيش انسحب قبل ضرب النار في امبابة ب 10 دقايق و ده كلام لجنة تقصي الحقايق الي فيها عمرو حمزاوي طيب الجيش بيفرد ريشه جامد اوي على المعتصمين الي في التحرير و مش بيعمل حاجة للسلفيين الي رايحين يتهجموا على كنيسة مبارك طلع تصريح انه قاعد في شرم الشيخ و مش هيتنقل منها
طيب بالنسبة للزباط انتو صدقتوا كلام المجلس العسكري الي قال ان الي في التحرير كانوا بلطجية و همة بشهادة ائتلاف الثورة همة نشطاء ثوريين و اتقبض عليهم و اتحاكموا هوة المجلس لم الثوار اصلا طيب الي يخلي مجلس عسكري يكدب و هوة بيتكلم عن ناس خدمت البلد برحها يبقة مش ممكن يكدب عن الزباط عموما نفس تصريحات الجيش متضاربة يعني شوية يقلك اصل الناس حبسوهم وشوية يقول انهم افراد اتحكم عليهم بالسجن طيب همة مش في السجن ليه؟
طيب اهالي الشداء متصرفلهمش المكافاه و كمان الجرحى مرمين في الشارع في مفارقة غريبة ان الجرحى في الشارع و مبارك في مستشفى شرم الشيخ بصوا خلاصة الكلام الحل في اللنك ده
http://www.facebook.com/notes/muhammad-maza/وعندك-واحد-فكرة-بسيطة-سريعة-عشان-تعدل-دماغ-الثورة-وصلحوااااااااااااااااااااااااا/203390393033495

د. هانى احمد said...

هو سبب الفتنه الدائم ايه؟؟ واحد مسيحى اسلم او واحد مسلم اتنصر او .. او.. اى تغيير للعقيده يبدا المتعصبين دينيا وامن الدوله والفلول وام الخلول فى القيام بدورهم لتدمير مصر.. طب ما نعمل قانون حريه العقيده ويبقى الفرد محمى بقوة القانون ويبقى حد من الاغبياء او المتأمرين على مصر يقرب منه.. يطبق عليه القانون وبحزم

DOLA said...

يارب قوينا على تحمل هذة الكوابيس
لاني مش مصدق ان حلمنا بيسرقة مننا اعز شئ عندنا اللي بنسمية عزنا وصرحنا وحضننا سامحكم اللة وانقذ مصر الغالية من كيد الكائدين ياخسارة

DOLA said...

يارب قوينا على تحمل هذة الكوابيس
لاني مش مصدق ان حلمنا بيسرقة مننا اعز شئ عندنا اللي بنسمية عزنا وصرحنا وحضننا سامحكم اللة وانقذ مصر الغالية من كيد الكائدين ياخسارة