Friday 13 November 2009

كانت صاحية وبتلعب

يا عيني يا مصر.. اسم الله عليك يا حبيبتي
طب الجزائر يا عيني من زمان ولهم عذرهم، احنا يا عيني ليه؟

البلاد بتمر بمراحل اضمحلال، بمراحل تخلف، بامراض اجتماعية، ازمات اقتصادية، مشاكل سياسية
عمري ما شفت بلد بتتجنن وتتهبل.. كلها، كلها
الريادة برضه يا عم... عمك ياض
طب معلش، ما تزعلوش، مافيش حاجة مستاهلة، صلوا ع النبي، اهم حاجة صحتكوا، انتوا لاقينها في الشارع؟ ربنا يهدي الحال، اتفرجوا على الماتش بخير كده، وانبسطوا، واحنا ايه والجزائر ليه؟ والمصريين ح يشجعوا الجزائر والجزائريين ح يشجعوا تايوان، وما اخذ بالكورة لا يسترد الا بالكمبيالات، وقال على رأي المثل، اكلك منين يا بطة واكره اللي يقول آمين، وقال لك: تعرف فلان؟ لا ولا اعرفه ولا عمره شفته، عاشرته؟ اه ده احنا حاربنا سوا، يبقى ما تعرفوش فعلا، صلي ع النبي بقى، ده عيان بيلاعب في ميت، ويا مآمنة للرجال بكرة يجيلك شلل اطفال، وقال يا خبر النهاردة الجمعة بكرة يبقى التلات، وكاس العالم وداير على الكل، وما تقولش ايه ادتنا مصر قول ح نتعشى فول بالبيض، بيض، بيض، بيض كتير قوي، بتاع مزرعة بيض كده
وسوا مصر طلعت الجزائر طلعت ان شاء الله، في كل الاحوال احنا الاتنين ح يطلع تلاتين ابونا وح نفضل ننط في البحر عشان نهرب من بلادنا اللي عمالين نقطع بعضنا عشانهم وساعة ما حد يقول لنا ح نسفكروا كل واحد يتف على بلده ويخلع ولو ح يموت في عرض البحر، وكل حاجة بخير والحمد لله، ومن حبنا زنقناه واستلفنا منه فلوس ومن كرهنا زنقناه برضه عشان نبوسه بالعافية بعد اكلة بصل، والشاطرة تغسل رجليها قبل ما تطلع على السرير بعد ما تشرب اللبن، والعبد في التحديف ورئيس الجمهورية في التكييف
خير اللهم اجعله خير


29 comments:

أبو أمك said...

خلي الصحافة والمواقع الرياضية والفضائيات والمطربين وبتوع تذاكر السوق السودا وبتوع الأعلام والطراطير تسترزق
والقرش الأبيض...ما يحدفش الناس بالطوب

الخوجة said...

ايه ده دا نتى ياستاذة مهتمية بس انتى بتدارى

عاشت المنوفية حرة ولاحد يزعل





LA VERITE - Comment l'équipe nationale de football algérienne trompé médias

LA VERITE - Comment l'équipe nationale de football algérienne trompé médias


حقيقة الاعتداء كيف خدع المنتخب الجزائرى الاعلام

THE TRUTH - How did the Algerian national football team deceived media


THE TRUTH - How did the Algerian national football team deceived media
حقيقة الاعتداء كيف خدع المنتخب الجزائرى الاعلام | الخوجة

حقيقة الاعتداء كيف خدع المنتخب الجزائرى الاعلام | الخوجة

بهيج الشرير said...

سؤال بجد ياأبلتي، أنتي ليكي خال دكتور عايش في بنسلفانيا، ياترى عمرك فكرتي أنك تهاجري عنده وتعيشي هناك

Unknown said...

ليه خال عايش في بنسلفانيا وابن خالة عايش في فيرجينيا وقريب تاني عايش في واشنطن وولاد خالي عايشين في هولندا

بس عمري ما فكرت اسيب مصر

خلاص بقى اتكتب عليها واتكتبت عليا
يا اوصلها يا توصلني

Unknown said...

اه وابن خالة تاني بس مش فاكرة فين كل مرة يقول لي وانسى

الخوجة said...

ياستى الاستاذة انا مصدقك بس النت بتاعى طبعا مش هتصدقى هتقولى الراجل دا كبر وخرف

مابيفتحش غير مدونتك بالصلاة على النبى

عاوزة ايه اصلك واصلة وبركة

افتح اليوم السابع

ولا عارف بقى

ماهو احنا من زمان بلد الفطير والحاج ياما كل عندنا فى بلدنا فطير هقبالك

بس الفطير بقى كباب وكفتة

VIVA EGYPT- شجع مصر


أوعى تكونى فاكرة ان أنتى هتنزلى المنوفية وهنسيبك
استحالة

انتقى مقامك عندنا كبير زى ابا الحاج


بس معلومة

صغيرورة

انا لاافهم شىء
بالسياسة
الا منك

ولا حتى بالكورة

يعنى انتى بتعلمى المعلم

البنفسج الحزين said...

ههههههههههههه
ايه الروقان ده كله

وعلي رأي المثل اللي يتكسف من بنت عمه ميجبش فيها اجوان

وسمعني سلام
أمجاد يا عرب أمجاد

الخوجة said...

هما فين الدول دى ياستاذ تبع انهى عزبة
بجد لايكون نواحينا
عند تفهنا العزب

أحــوال الهـوي said...

اروع ما قرات لك
انا كتابع يومي لكتاباتك
و لم اجد اروع من هذا


تحياتي

الخوجة said...

النيابة تثبت افتعال لاعبى الجزائر حادث الأتوبيس
http://www.youm7.com/News.asp?NewsID=156082


ايه دة بقى

بهيج الشرير said...

أنا فعلا كنت متوقع الرد ده، وعلشان كده مش قادر أفهم؛ ليه لو في فرصة أن الواحد يغير حياته للأفضل مايستغلش الفرصة دي؟ ولو مانجحش يقدر يرجع تاني، طبعا المفروض الواحد يخطط كويس الأول ومش أسافر وخلاص، النقطة اللي عايز أوصل لها، إحنا ليه بنخاف من التغيير طالما بنخطط له كويس

Unknown said...

بجد
قرف
قرف
قرف
قرف
قرف

الهى يولع فيكم بجاز وسخ وأولكم اللعيبه
لو شهيد مصرى أو جزائرى من حرب أكتوبر رجع للحياه والله هايرمى سلاحه ويسبلكم واللى جابوكم
أحنا حاربنا وضحينا علشان شوية مخنثين خـ....لات
فيه جريده بريطانيه تقريبا" الغارديان عملت تحقيق سمته مباراة الكراهيه

أنا أسف يانواره البوست ده رائع بجججججججججد ومن أحلى الحاجات اللى قريتهالك
بس ماكانش ينفع انى أبدأ أو أنهى المشاركه غير بـــــ
قرف
قرف
قرف
قرف
قرف

صوت الحق said...

نوارة هيست مننا يا شباب بجد
بس من اجمل التهيسات هههههه

بهيج الشرير said...

سؤال تاني، ياترى إحنا لىه مش عايزين التغيير؟ علشان خايفين من الفشل واللا علشان خايفين من النجاح

الخوجة said...

اية ياجماعه اللى داخلين مدخنين روقوا مش كدة هو احنا كسبانين حاجة بس مش كده اعصابكم شايطة لييه كلها 24 ساعه

منظور شامل للحياة السعيده said...

ايه ده المكان مظبوط

جبهة التهييس الشعبيه

و الدوليه كمان

و سمعني سلام امجاد يا عرب امجاد

Unknown said...

الصحف الاسرائيلية كتبت على فضيحة المصريين والجزائريين

احسن
احسن يا ابطال الخولات احسن الهي تتفضحوا كمان وكمان

بهيج الشرير said...

المهم، نرجع للبوست، حقيقي بوست دمه خفيف ومرة تانية
Good job

Unknown said...

انا اول مره ادخل مدونتك ، واضح انك مهييسه خالص .. لكن جميله و مبدعه و شكلي هخش اهييس معاكم كتير بعد كده

Asmaa mahaba said...

هههههههههههه على راى المثل
اللى خدته القرعه ... واكره الى يقول امين

Asmaa mahaba said...

دول قلبوها لحرب دى لو اسرائيل مكانوش عملوا كدا
دا انا بقول مره لواحد قريبنا فلسطين ونحارب يقولى احنا فى سلام واسرائيل مش وحشه
ونازل شتيمه فى الجزاير عشان حته ماتش

بهيج الشرير said...

أنا عندي سؤال ياأبلتي، لو حكم آل سعود إنتهى في السعودية! ياترى هايسموا المملكة أو الجمهورية إيه بعد كده

Unknown said...

بوست تحفه حقيقي...

فري كاتشي أز زي ساي إن أنجرليش

يستحق يتدشن كشعار للمرحله المقبله

:PPPP

Ahmed Mohamed said...

بتؤمني نظرية المؤامره
قوليها كتير
وانا أتاكدت منها هنا
مش تبقي زي الصحافه السوده
الي كل فيها مصر راحه في داهيه
ومفيهاش خبر يفتح النفس لدخول الامل في النفس
صحيح انتي وطنيه بس يتخاف منك
لانك مصممه تجيبي للناس اكتئاب

Ahmed Fawzi said...

يا خوفى من حرب الحوثيين تتحول لمعركة ضد إيران
و خصوصا مع الإتهامات المتزايدة لإيران

Anonymous said...

وليكي كمان ابن عمك يحيى زكريا نجم دبلوماسي عايش في فنزويلا
أي خدعة :)

حسن على said...

الاستاذ بهيج الشرير :منور وانت مهذب ودمك خفيف

Unknown said...

اعتقد انه من أجمل ما قرأت عن مباراة مصر والجزائر
http://www.al3malka.com/vb/t32577.htm

mohamad said...

من مقاطع خطب الشيخ كشك الله يرحمه
"سعت هرجا ومرجا والناس تقول هييييييه فسألت : خير . . هل حررنا القدس
قالوا لا
سألت : هل ردت للمسلمين حقوقهم المغتصبه
قالو لا
فسألت : إذا .. حصل إيه
قالولي بيبو جاب جون

الحالة مزمنة

النهارده قريت مقالة فهمي هويدي
http://www.shorouknews.com/Columns/Column.aspx?id=154868