Sunday 1 November 2009

والناس مش عايزينكوا تنجحوا ليه يا نظيف؟



بعد ما تقدم التحيات للـ"هيئة البربرامية" و"ناواب" الحزب الوطني واثنى على الانتخابات اللي اتسمت بـ"الحيدة والشفاهية" واستظرف استظراف فوق الطاقة، وحيا المعلم محمد منصور الوزير الشجاع، اللي شرف ونور، وحيا رجال الامن، وحيا القوات المسلحة وحيا القضاء وسمعني الضوء الشارد
قال: احنا عايزينكوا تقفوا ورانا (على اعضاء الحزب يعني عشان عارف اننا احنا مالناش في الكلام ده) عشان فيه ناس مش عايزانا ننجح، المعارضة مش عايزانا ننجح
والمعارضة دي طبعا اللي هي الشعب يعني اللي مش اعضاء للحزب الوطني
ليه؟ ليه يا نظيف مش عايزنكوا تنجحوا؟ متجوزين امنا مثلا؟ ايه اللي بينا وبينكوا عشان مش عايزينكوا تنجحوا؟ 
طيب انا واحدة اهو مش عايزة حاجة غير ان الناس تعيش كويس وتتعامل معاملة ادمية، واعملوا بعد كده اللي انتوا عايزينه
نفسي بلدي تبقى دولة محترمة، زي اي دولة محترمة تانية، ايه الجريمة في كده؟
نفسي يبقى عندنا صناعة وزراعة وكرامة ودور
ابقى فخورة اني باقول اني مصرية، بدل ما اقول: انا مصرية، والله احنا كويسين، بس ربنا يعفي عننا
هو فين النجاح ده؟ انت كل ما تشوف وش امنا تقول لنا بننمو، بننمو، بنشرب اللبن وناكل خضار وننمو
وماسكينا عمالين تقولوا لنا: بتخلفوا بتخلفوا
يعني عشان كده عاملين اوسخ نظام صحي؟ عشان تموتوا الناس؟ عشان كده محمد منصور عمل صفقة جرارات قطارات معيوبة ولما حصلت الحادثة لحق نفسه واستقال بدل ما يتمسك ويتحقق معاه؟ عشان كده حاطين لنا هرمونات في الاكل تجيب عقم وعجز جنسي؟ عايزين تخلصوا مننا؟
اذا كان ده الهدف، اه مش عايزينكوا تنجحوا، ياروح ما بعدك روح، ح ندعي لكوا تنجحوا تموتونا؟ ما تشيلونا من دماغكوا شوية

انت مش ملاحظ انك انت بالذات، دونا عن كل رؤساء الوزراء اللي خلقهم ربنا في مصر، خربتها خراب مالوش اول ولا اخر؟
حسبي الله ونعم الوكيل

16 comments:

أبو أمك said...

يا ريتهم ينجحوا
يمكن لما ينجحوا ويجيبوا مجموع يحولوا على بلد تانية أحسن من دي ويسيبونا

mado said...

الحزب الوطني فكر جديد تصميم جديد : )
تحية مني للحزب الوطني وقياداته بمناسبة المؤتمر

wahat_alshohada said...

معاكى حق و حمدا لله على السلامة
كان لكى يومين مش ظاهرة هنا كنت هبعت اسأل عنك خفت تكون مرارتك اتفقعت
ربنا يكرمك

أحساس لسه حى...كلام من جوه روح لكل روح said...

هما بقوا فاشلين فى الضحك على عقولنا واستغفلنا

كان زمان مفيش صوت الا صوتهم

دلوقتى فضايهم مش بتستخبا

وفشلهم بيتنشر بره وجوه

Ehab Fayez said...

حكومة نظيف من أكثر الحكومات المصرية التى عملت بجهد وإخلاص على نظافة جيوب المصريين

Unknown said...

طيب انا واحدة اهو مش عايزة حاجة غير ان الناس تعيش كويس وتتعامل معاملة ادمية، واعملوا بعد كده اللي انتوا "عايزينه"
شوف الطمع ياأخى!!!!!

الحاجات الوحيده اللى بتنمو فى البلد دى هى (نظيف وكل يوم بيطول عن اللى قبله - وثروه عز - ونفوذ جمال)

Kontiki said...

صباح الخير
كلة كوم و بطولة محمد منصور كوم الناس فى الشغل مالهاش سيرة الا التلات دقايق تصقيف له !!! بيصقولة على اية
!! والله لو حطيت كل علامات التعجب من كفاية عارفة اعضاء الحزب دول خونة خانوا البلد و خانوا المسئولية و سرقونا وخربوها مصر سلة القمح بتستورد قمح القطن المصرى طويل التيلة انقرض مش بيتزع بلد نهر النيل ميهاش ميه نضيفة والناس بتشترى المية بالجركن بلد تمثال الكاتب المصرى فيها تعليم قضى على الطلاب والله يا نوارة اختى عندها انهيار عشان مش عارفة تحول من كليتها عشان موظفين ادارة الجامعه بيسيبوا مكاتبهم الساعه 12 الظهر و تضارب فى الكلام بين كل واحد والتانى و مولد - بلدنا اللى كانت اعظم حضارة واعظم علماء بلد بناه الاهرامات بلد جيل اكتوبر خربت بسبب الخونة وبقى فيها الطلبة بيشربوا حشيش فى المدرج
دول خونة ولازم يتحاكموا كخونة

Tamer said...

مبروك يا استاذة نوارة
الحمد لله مجندي الحزب عرفوا طريق مدونتك
:)

Tamer said...

مبروك يا استاذة نوارة
الحمد لله مجندي الحزب عرفوا طريق مدونتك
:)

Dr Nemo said...

مع ان الكلام عن صحة الرئيس بيودى ورا الشمس
بس بجد لو حد من الدكاتره يقولنا لو اللخبطه وعوجة اللسان اللى حصلت لمبارك دى دليل على مرض معين ولا عادى مفيش مشكلة " انا طبيب بيطرى عشان اللى هيستغرب انى بسأل"
الحاجه اللى استفزتنى بجد بقا
لو حد كان لسه عنده مراره يكمل فرجه بعد مع صاحب الحكمة الابدية خلص كلامه
ان عائشه عبد الرحمن وهيا ماشيه جمب ماما سوزان وماسكه ايدها"الشمال تحديدا" وطت عليها باستها وسوزى ولا كأن حصل حاجه
ايه قلبت ملكيه وبنقبل ايد الملكه فعليا بدون مواربه ولا ايه؟
فيه واحد خبيث قالى ان السبب ان التعديل الوزارى الجاى ممكن تطلع فيه عائشه
يجوز
بس سيبك انتى
شوفتى الراجل ابو جلابيه اللى راح يسلم
الحرس الجمهورى كانوا هيطلعوا تيته؟

blogger said...

مجلة ويكلي بول الشهيرة تجري استطلاع حول
من السبب الرئيسي في المشاكل في العالم

1. أمريكا
2. العالم الإسلامي!!
3. إسرائيل
4. الأمم المتحدة
5. لست متأكداً


صوت رقم ( 3 ) ...!!!؟





يرجى التصويت لقلب النتيجة الموجودة حاليا و دعوة كل اصدقاءك للتصويت


افتح الرابط وصوت رقم (3)... لا تنتظر

http://www.qsoftonline.com/weekly-poll

Unknown said...

ابو امك
ههههههههههههههههههههه
ربنا يسعدك يا رب

مادو انا طول النهار برة البيت ولسة برة لما ارجع اشوف التصميم

ايمان
واي اتفقعت

احساس لسة حي

هم برضه ما بقوش مهتمين قوي يراعوا مشاعرنا زي الاول

ايهاب

هههههههههه

عمرو
لالالالالالا
ده طويل بزيادة
اوفر يعني
ولما بيمشي جنب احمد عز باحس اني دخلت في فيلم كارتون

كونتكي
ياخويا انا مش عارفة عملوه بطل عشان استقال
اللي زيه بينتحر
وبعدين هو عامل صفقة بجرارات معيوبة
يعني استقال عشان يهرب

تامر
لا انت فهمت ايهاب غلط كمل الجملة للاخر


نيمو
الريس صحته زي البمب

ده بجد

عائشة باست ايد سوزان؟
عندك صورة؟

Unknown said...

بلوجر
باحاول اصوت مش بيرضى يقبل

هي جنسيتها ايه الجريدة دي؟

Dr Nemo said...

للاسف معنديش
ووالدتى اتمنت انى اسجلها
بس للاسف محصلش نصيب
بس لو حد ياجماعه شاف وسجل ياريت تورونا
دا تبقا تحفة للوليه موردت الخادامات دى

Sky net said...

Dear Madam
Greetings
Because you are one of the best Arab Bloggers
And because the blog of the most famous Egyptian and Arab blogs
I appeal to you that the participatory approach to the campaign "No to the swine flu vaccine"
This vaccine, which would destroy the dreaded Human
This vaccine sold by the millions to save the owners money in America and Europe
Dear Madam: Take part in exposing the plot
Conspiracy to swine flu vaccine
Look up on my website and many of the reports and research that confirms this
Look up the reports and videos are more than one language, including Arabic language
http://h1n1h5n1virus.blogspot.com/2009/10/h1n1-virus-arabic.html

Tamer said...

@ استاذة نوارة

لا ده انا طلعت فهمت مادو غلط
اتكلمت من غير ما ابص على اللينك
:))