Sunday 8 November 2009

عاشجاه يا بوي


هو ليه ماحدش شايف البعد الرومانصي اللي في قصة هاجر وملاك غيري؟ ده انا مستأثرة فحت، وللا انا سنتمنتاليتي المهترئة وصلت لمعدلاتها الخطرة؟ مش ممكن سووووووو دراماتيك سووووووو رومانتيك
بس انا محتاجة اعرف سن البطل بالظبط، عشان قريت في حتة انه 35 سنة وقريت في حتة تانية انه 20 سنة، جولييت الاختلاف على سنها مش كبير ناس قالت ستاشر ناس قالت خمستاشر ناس قالت تلاتاشر، بس لو الواد طلع خمسة وتلاتين سنة تبقى القصة باظت ودخلنا كده بقى في فيلم مهمة في تل ابيب او الباطنية

وقريت انه طلب منها يهربوا بس هي رفضت، فقام قال في عقل باله انه يصورها معاه عشان يعمل لها فضيحة وترضى توهروب معاه
الصعيدي لما يخطط بقى... اتسبب في فتنة طائفية وجتلوا صاحبه اللي تطوع لخدمة صديقه حيث ان للصاحب على صاحبه تلات حاجات كلنا عارفينهم، وجتلوا البه في الشارع وع يجولوا انهم جتلوه هو راخر
ع يجولوا كماني ان اخوها هو اللي متزعم حرب التار، وع يجولوا ان ملاك صاحب اخوها الروح بالروح، ده اخوها ده يطلع منه عواطف ومشاعر كتير

واليوم الساقع ناشرة خبر بتقول فيه ان الفيديو فيه واحد لابس تي شيرت احمر وناس بتقتله وبتقول الله اكبر يا كافر وتفتح الفيديو اللي في نفس الخبر تلاقي واد لابس تي شيرت كحلي وماحدش بيفتح بقه ولا بيتكلم لا جالوا له يا كافر ولا يا مؤمن الناس عمالة تغربله وخلاص، هو الصاعيدي لما ع يوجتل ع يتحادت وهو ع يطخ؟

وده اسمه كوميك ريليف... اقصد دور اليوم الساقع في القصة، يعني زي دور عبد السلام النابلسي في فيلم يوم من عمري كده
ويا سلام بقى على ثورة المدينة وتكسير العيال لمحلات الناس، واااااو سو درامتيك، صحيح كان فيه كوميك ريليف حيث ان الناس كسرت محلات مسلمين وهي بتقول الله اكبر، بس شغال، ممكن معركة الذروة يبقى فيها كام حاجة كوميدي تعملها زينات صدقي او اسماعيل يس... انا سامعة مزيكا في دماغي حاليا دوقت ده ولا قصة غادة وكاميليا ولا شوليو ورومييت ولا سيس وليلى

حتى الواد اسمه ملاك... اسم رومانصي موت، ولو انه بيفكرني بمسرحية وجهة نظر، عموما هم بيقولوا له يا روماني، روماني شبه اسم أرمان، بطل مرسحية غادة وكاميليا

يااااه الصعيد طول عمره ملهم للدراماتيسيت، اصله غامض والناس هناك مشاعرها عميكة عميكة: اصطلحنا واللي في الجلب في الجلب
وحيث انهم لما بيفكروا بيعملوا كوارث، فبيبقوا عاملين زي الابطال الدراميين اللي بيعملوا مصيرهم الاسود بايدهم وكمان اللوكيشن هناك رومانصي جوي جوي يا بوي، النيل هناك نيل بصحيح مش السحلية الجعانة اللي بتعدي عندنا في القاهرة دي

ياي... قصة جميلة آخر حاجة انا قلبي بيزقزق
-----
نسيت اقول حاجة: الغموض اللي بيلف مصير ملاك بعد مقتل حبيبته وصاحبه سووووووووو رومانتيك
يااااااااي، القصة دي تجنن 

52 comments:

مواطن مصري said...

لو الفيديو دة في مصر يبقى كدة احنا في خطر فعلي

مع ان حاسس ان الفيديو في احدى مناطق العراقية

مش في مصر

مواطن مصري said...

ثانيا سلاح المستعمل مش الكلاشنكوف


و الصعايدة عارفين انهم بيحبو الكلاشنكوف و هو الوحيد الي بيدخل لمصر


يبقى الفيديو دة مش في مصر

Unknown said...

لو الفيديو ده في مصر احنا مش في خطر ولا حاجة لان الصعيد كده من اول ما اخترعوه

ثم انا باتكلم في نقطة تانية خالص

هي الناس ما بقتش رومانسية ليه؟

Unknown said...

يا مواطن
فيه واحد كاتب بيقول في التعليقات ان الفيديو ده منتشر على المنتديات العراقية بقاله خمس شهور

ahmed samir said...

أول مرة اتفق مع مواطن مصري
فعلاً البندقية دي امريكاني مش كلاشنكوف
و ما اظنش انها موجودة في مصر

Unknown said...

يانهار أسود
أيه ده ؟
انا حاسس فعلا ان ده متصور فى فلسطين - نفس ابواب المحلات بتاعتهم فى كل حته فى غزه وغير كده شايلين أسلحه مابتخشش مصر الا للجيش بس
والأسلحه دى بتخش غزه بسهوله


أنا محتار فى الفيديو ده أوى - بس اللى أعرفه أن اللى حصل فى الفيديو ده حتى لو كان صحيح فى مصر فمش فتنه ولا حاجه

لو كان شاب مسلم هو اللى عمل كده كان هايترمى نفس الرميه على الرصيف وهايطخ وبرضه الناس كانت هاتهتف الله أكبر
الشرف والعرض فى الصعيد مالهمش حل
القتل
مسلم مسيحى بوذى
هايتقتل اشنع قتله

أقتباس من اليوم السابع :
بينما انتشرت رواية ثالثة تنفى قتل الشاب، ويردد أصحابها أن الشاب مدعوم من الكنيسة لتنفيذ واقعة التشهير بالفتاة، مختبئ فى أحد الأديرة بمدينة الإسكندرية

هى الوساخه بتاعة الجرنال ده مش هاتقف ؟
ساكتين عليهم ليه ؟

Unknown said...

أنا كلمت واحد زميلى وفرجته على الفيديو وشافه أكتر من مره وأفادنى بالتالى

البندقيه المستخدمه دى سلاح أمريكى أسرائيلى
البندقيه أسمها M16
ودى فى الدول العربيه مقصوره الأستخدام على الجيوش بس وأستحاله تتسرب ومش فى كل الدول كمان

الأسلحه دى تكون موجوده فى أيدى الناس أما فى العراق عن طريق تهريب الأسلحه من المخازن الأمريكيه
أو فلسطين عن طريق تجار السلاح الأسرائيليين
أنا متأكد دلوقتى ان اللقطه دى مش فى مصر

مواطن مصري said...

اليوسم الساقع الظاهر واخدة الفيديو زي خبر سيفون سبورت ههههههههههههههه

Unknown said...

ماهو واحد كان كاتب ان الفيديو ده منتشر على المنتديات العراقية بقاله كتير

كده بقى اليوم الساقع بتقوم بدور شكوكو مش عبد السلام النابلسي

Unknown said...

وممكن يا مواطن يبقى الشائعات المضادة بان الامن هو اللي طلع الاشاعة دي عشان يعرف يهرب الواد برة البلد تبقى صحيحة

بس لو قالوا ان اهل البت قتلوه اهل البت ح يكدبوا

الا اذا كان اهل البت نفسهم هم اللي مطلعين الاشاعة دي عشان يحفظوا ماء وجههم بعد الفضيحة دي

وممكن يكون الامن هددهم
ماهم قاتلين تلاتة لحد دلوقت

Unknown said...

وممكن يا مواطن يبقى الشائعات المضادة بان الامن هو اللي طلع الاشاعة دي عشان يعرف يهرب الواد برة البلد تبقى صحيحة

بس لو قالوا ان اهل البت قتلوه اهل البت ح يكدبوا

الا اذا كان اهل البت نفسهم هم اللي مطلعين الاشاعة دي عشان يحفظوا ماء وجههم بعد الفضيحة دي

وممكن يكون الامن هددهم
ماهم قاتلين تلاتة لحد دلوقت

Unknown said...

على فكرة

مواطن مصري طلع المفتش كرومبو بجد ههههههههه

Unknown said...

وحل الفزورة: حمبوزو لاوي بوزو

Kalimalhus said...

الحدوتة تنفع فيلم ميوسيكال و ألا عرض من عروض برودواى يتحول برضه لفيلم ..

بقولك إيه إنتى الكورس اللى بتاخديه بوظلك دماغك .. قومى طشى وشك بشوية ميه ساقعة و بلاش سينتمنتالية لحسن دى خطر فى البلد دى .. هنا ديروط الشريف أسيوط مش بروكلين نيو يورك

Anonymous said...

يا دي الصعايده اللي محيرينك

الصعايده لما يفكروا برضو .... ماشي

عموما يا استاذه الموضوع موش رومانسيكي ولا نيله

الموضوع بنت وولد موش متربيين قوي يعني .... والولد صور البنت .... واهلها قالوا استدرجها .... بس مااعرفش يعني ايه استدرجها دي الصراحه

المهم البنت موش اتقتلت .... البنت اختفت .... واختفت دي رمز لانها ودوها بلد تانيه


ابو الولد هو اللي اتقتل ... انضرب بالنار غايه ما راسه انفصلت عن جسمه

الولد سلم نفسه للامن

المسيحيين كانوا بيخافوا يمشوا في الشارع

احداث الشغب حصلت لما النيابه امرت بتجديد حبس المتهمين بقتل ابو الولد

الناس ثارت وكسرت محلات المسيححيين

ايووووووووووون عندنا سلاح متطور في الصعيد

ادي الحكايه اهي

ولد عرف بنت ... صورها .... اتمنظر بالصور مع اصحابه .... الحظ الحلو ان البنت مسلمه والولد مسيحي

لو كان مسلم كان انتطخ عااااااادي بس ماكنتش البلد ولعت

تحياتي

Unknown said...

فكرة الميوزيكال دي روعة
بس ع يغنوا كيف بالصاعيدي

Kalimalhus said...

نجيبلهم على الحجار و ديانا حداد صوتها حلو فى الصعيدى عشان ماعندناش واحدة مصرية يليق عليها اللهجة ..

حضرتك إعملى السيناريو بس خلى بالك عيلة البت هيبقى كده إنضاف لها راس على قايمة أهدافها..

Unknown said...

فتاة من الصعيد

انت بتحطمي ليه احلامي الرومانسية؟
:(
اني جلت رومانصية تبجى رومانصية ما تخلنيش ازهج عليكي عاد

والله هو انا قريت في مصدر مش موسوء اللي هو اليوم الساقع اللي ضاربة فيديو من العراق وحاطاه ان فيه محلات مسلمين اتكسرت كمان

وجابوا اسامي ناس، محمد وعلي الخ، بيقولوا احنا محلاتنا انضربت مع اننا مسلمين
:)
اندال بشكل ههههههه

وقريت في حتة تانية، مش فاكرة فين، ان الولا جال للبت تعالي نوهروب جام جالت له لع جام صورها

حتى كنت حطيت اللنك على التويتر بس مش ح الاقيه دلوك بجى

ههههههه الصعايدة مش محيرني ولا حاجة
انا باحب الصعايدة، وسبحان الله يا شيخة، سبحان الله، معظم صحابي يا اما من الصعيد يا اما بلدياتي من الشرقية ومافيش حد اتخانق معاه الا يطلع منوفي
تصدقي؟
كيميا الظاهر وللا انا ما باعرفش اتعامل غير مع الهبل اللي زيي
:)

مهندس حر

على الحجار ايه؟ ده انت قديم قوي
وبعدين انا شفت صورة الواد مش زي ما اليوم الساقع بتقول، شكله صغير
الظاهر فعلا عنده عشرين سنة زي ما قريت في المصدر الاخر

هي اليوم الساقع دي ما تعرفش ما تكدبش؟ بيعيوا لما ما يكدبوش

هع هع هع
تخيل لو جبنا تامر حسني وشرين عبد الوهاب

اخيييييييييييييي
وللا احمد الفيشاوي والبت المبيوءة اللي بتمثل معاه
يعععععععععع

انا باقول نجيب برضه سعيد عبد الغني ونادية الجنسي بما انهم نجومي المفضلين

Unknown said...

الله

انا عمالة اتخيل ان الفيلم بطولة سعيد عبد الغني ونادية الجنسي

وطبعا بقى نادية الجنسي ح تتظبط مع الواد وح تعمل رقصة اخراء في الفيديو اللي الواد مصورهولها انما ايه
وتلبس البيبي دول الاسود بتاعها اللي بتطلع بيه في كل الافلام

واهلها في الصاعيد يمسكوها يضربوها وهي تمارس هوايتها في انها تنضرب لما يبان لها صحاب في الاخر تقول لعااااااا

واظن لعااااا في الظرف ده مناسبة قوي حيث انهم في الصعيد

بس يا ترى ح ترقص على هافا ناجيلا برضه في الفيلم ده؟

وابوها يبقى ياسر جلال وامها تبقى الهام شاهين
نادية الجنسي تتحدى الزمن

------
اه يا فتاة من الصعيد

خصيمك النبي ما تقولي عليهم مش متربيين

الحب يا ابلة الحب

وبعدين انا قريت في حتة تالتة انهم موتوها في الشارع بالرصاص

سؤال بقى جوهري

هو ليه الاخبار اللي بتيجي من الصعيد دايما متضاربة كده؟

طب زمان ما كانش عندنا الا القناة الاولى والتانية ولما فتحوا القناة التالتة كانت تطور وثورة في الاتصالات

انما دلوقت كل الناس بتعرف كل حاجة

اشمعنى الصعيد اخباره عكس بعضها كده

ثم استدرجها كيف يعني؟ دول كتبوا في حتة

(معلش اصل انا زي ما انت شايفة مهتمة قوي بالموضوع فما بقتش فاكرة قريت ايه فين)

انه "ظل يغتصبها لمدة شهر كامل في شقة عمته" يعني هي كانت بتروح لمدة شهر مخصوص تغتصب وتروح؟

Unknown said...

الله

انا عمالة اتخيل ان الفيلم بطولة سعيد عبد الغني ونادية الجنسي

وطبعا بقى نادية الجنسي ح تتظبط مع الواد وح تعمل رقصة اخراء في الفيديو اللي الواد مصورهولها انما ايه
وتلبس البيبي دول الاسود بتاعها اللي بتطلع بيه في كل الافلام

واهلها في الصاعيد يمسكوها يضربوها وهي تمارس هوايتها في انها تنضرب لما يبان لها صحاب في الاخر تقول لعااااااا

واظن لعااااا في الظرف ده مناسبة قوي حيث انهم في الصعيد

بس يا ترى ح ترقص على هافا ناجيلا برضه في الفيلم ده؟

وابوها يبقى ياسر جلال وامها تبقى الهام شاهين
نادية الجنسي تتحدى الزمن

------
اه يا فتاة من الصعيد

خصيمك النبي ما تقولي عليهم مش متربيين

الحب يا ابلة الحب

وبعدين انا قريت في حتة تالتة انهم موتوها في الشارع بالرصاص

سؤال بقى جوهري

هو ليه الاخبار اللي بتيجي من الصعيد دايما متضاربة كده؟

طب زمان ما كانش عندنا الا القناة الاولى والتانية ولما فتحوا القناة التالتة كانت تطور وثورة في الاتصالات

انما دلوقت كل الناس بتعرف كل حاجة

اشمعنى الصعيد اخباره عكس بعضها كده

ثم استدرجها كيف يعني؟ دول كتبوا في حتة

(معلش اصل انا زي ما انت شايفة مهتمة قوي بالموضوع فما بقتش فاكرة قريت ايه فين)

انه "ظل يغتصبها لمدة شهر كامل في شقة عمته" يعني هي كانت بتروح لمدة شهر مخصوص تغتصب وتروح؟

Unknown said...

يا بهيج

ما اعرفش حاجة بخصوص مجلسي الشعر والقورة دول

حد سمع عن حلهم يا جماعة يوم حداشر نوفمبر؟

mido said...

حب ايه يا نوارة ؟

انت بتهذرى عاد ؟

علاقة غير شرعية و تصوير العلاقة

و تقولى حب

mido said...

انت قلتى 35 سنة

حب ايه بقى؟

Unknown said...

اليوم الساقع هي اللي قالت خمسة وتلاتين سنة مصدر تاني ناسياه قال عشرين سنة

Unknown said...

دي صورة ملاك

http://moftah-moftah.blogspot.com/2009/10/blog-post_4662.html

شكله اصغر من خمسة وتلاتين بكتير
يادوب عشرين زي ما قالوا في المصدر التاني

Unknown said...

بس هو بيخرف من ساعة ما ربنا خلقه يا بهيج

ايه موضوع المركب ده؟

Unknown said...

لا احكي لنا بقى يا بهيج الحكاية دي بتاعة هيلاري والسفينة وعوكل وانا ح انشر تعليقك

بس من غير شتيمة

بهيج الشرير said...

اللي سمعته ياأبلتي أن عوكل ملك الفياجرا وقاهر الهكسوس كان متأثر وزعلان قوي وبشكل هيستيري إن إسرائيل صادرت المركب ولمحت أن مصر لها علاقة بالموضوع ده وبالذات في ميناء دمياط، المهم كلامه ماكنش راكب على بعضه مع هيلاري كلينتون وكل شوية كان بيقول بقى بعد كل اللي عاملناه ده برضه الرد! وكان بيجيب سيرة شاليط عمال على بطال، بصفة عامة كلامه ماكنش راكب على بعضه

Asmaa mahaba said...

غسيل يقع من بلكونه مواطن على بلكونه المواطن اللى تحته والظاهر ان الميه مش ولابد تصور للعالم كله ان فى مصر فى فتنه طائفيه:))
انا مستغربه احنا ليه بناخد الخناقات دى انها فتن طائفيه
مثلا انا واخواتى طول النهار قافين بعض فى البيت ماتشات توم وجيرى واالمسلمين مع بعضهم بيتخانقوا والمسيحيحن مع بعضهم بيتخانقوا انا شايفه انه عادى موضوع الخناقات دى ...يعنى دى مش فتنه طائفيه ...دى بلطجه والبلطجه اصبحت سلوك مجتمع كامل حتى فى بيوتنا منغير ما نحس

فلاشاوي said...

حضرتك بترفضي العنصرية ضد اليهود وبتمارسيها ضد الصعايدة
؟؟!!

المفروض مني أن أضحك وأنتي بتهينيني وتقولي ..الصعيدي أما يفكر بقى

لا حول ولا قوة إلا بالله

يا ريت نعرف أهلنا بجد قبل ما نروح نحلل ونبحث عن شعوب تانية

حضرتك بتبني معلوماتك بناء على مجموعة من النكت الوقحة اللي ظهرت ضمن مسلسل أنحدار مصر وبقى يسخر على جزء وقطاع عريض من أهلها

مجموعة من المنولوجستس الأراجوزات عديمي المواهب لقيوها طريقة وسبوبة يضحكوا بيها الناس والسلام عشان يستمروا

للعلم مجموعة كبيرة من المثقفين في مصر معلوماتهم عن شعوب تانية أكتر بكتير من معلوماتهم عن الصعيد واهل الصعيد اللي هم بالمناسبة بيحملوا الجنسية المصرية كمان .. تصدقي

اللهجة اللي كتبتي بيها مش لهجة أي حد في الصعيد .. دي لهجة المسلسلات العبيطة وأفلام عادل إمام وسمير صبري الوقحة

كون بعض البسطاء غير المتعلمين من الصعيد هاجروا للقاهرة بحثا عن أكل العيش لا يعني أن هما دول الصعايدة

وإلا هتعملي زي السعوديين اللي شايفين إن كل الهنود خدامين وسواقيين لان هي دي الفئة اللي بتجيلهم في بلدهم

في حين أن الهنود ملوك في البرمجيات بل والصناعات النووية كمان

ده إسمه قصر نظر رهيب أو غباء مركب

أنا صعيدي مقيم في القاهرة وبعمل كمبرمج في شركة أجنبية هنا في القاهرة .. طبعا مش بقول كده على إعتبار أن ده دليل على ذكاء الصعايدة مثلا .. لا طبعا وغلا أبقى إنسان سخيف جدا

لكن اللي عايز أقوله أني من اسيوط .. وشوارعنا في أسيوط انضف من شوارع القاهرة .. وجامعتنا أحسن من جامعة القاهرة واسألي أي حد تعرفيه عن طب أسيوط وهندسة أسيوط وحاسبات ومعلومات أسيوط

كل مثقف يجيلنا في ندوة يفاجأ بمستوى الطلبة وفكرها وانهم متابعيين حتى ما هو خارج مصر

هو بيتفاجيء وأحنا كمان بنتفاجيء من ضيق أفق بعض اللي إسمهم مثقفين دول

!!

مواطن مصري said...

ههههههه الابطال خالد صالح يطلع في دور الشيخ و يكون دة ابو البت و يكون تبع جماعات


و يكون فية قسيس شرير و دة يمثلة خالد الصاوي


و نجيب بقى حبة رقصات شعبية و نجيب تحابيش للفلم


هة

و عمرو سعد يطلع في دور ملاك و منة شلبي تطلع في دور البت

و نجيب عمرو واكد يطلع قريب البت و كان ابن صاحب الشيخ و هيتجوز البت

و لما عرف هو الي هيج الدنيا


و اية الواد الي صور البت دة يكون تبع

منظمة اقباط المهجر الي تبع القسيس الشرير الي بيعملة دور خالد الصاوي


و عمرو عبد الجليل الي يعمل دور الواد الندل دة

و نجيب خالد يوسف يخرج لنا الفلم الجميل دة و يكون فلم الموسم و يكسر ايرادات شباك السينما

و يكون من انتاج تهامي باشا

Unknown said...

يا سومة
بس هي قلبت فتنة طائفية فعلا بسبب الاحتقان
لكن هو طبيعي ان كل الناس تتقتل في واقعة زي دي

فلاشاوي
يااااه ده انت دمك تقيل قوي
الصعايدة دمهم مش تقيل كده انت اكيد لك جد منوفي بقى

مواطن

ايه الفيلم اللي اخراج خالد يوسف ده
لا يا عم
ثم ايه الشيخ الشرير والقسيس الشرير دول؟

مواطن مصري said...

ما هو لازم اكشن

فلم فية رقص و روانسي و اكشن

عبد الزهراء المصري (علي الحسيني) said...

هههههههههههههههههههههههههه
إيه العنصرية دي يانوارة ؟؟؟
حرام عليكي والله دا أحنا غلابة أوي واي ومش عارف ليه ليه أنتوا شايفينا أغبياء كده ليه ؟؟؟
فكرتيني بواحد صاحبي من عندكم يابتوع بحري كان جاي يزورنا وماكنش متوقع أنه يلاقي أبراج وكازينوهات وكنتاكي والحاجات دي وكأننا يعني أولاد البطة السودا وغريب علينا الحاجات دي ههههههه.
المهم بالنسبة للبنت والواد دول فبصراحة الموضوع أخد أكبر من حقه على الرغم أن المواضيع دي عندنا بتخلص في الصعيد بسرعة أوي وهي ديتها رصاصتين للواد وزيهم للبت والموضوع ينتهي بدل الدوشة دي وفتنة ومش فتنة وكأن أحنا مش ورانا غير العيال التيت دي .
وصدقيني المستخبي أكتر من كده بكتييييييييييير بس اللي أنا مستغرب منه فعلاً هو حقيقة الأمر فهل هو أغتصبها ؟؟؟ وهي خافت تقول لأهلها ولا هي سلمت له نفسها بمزاجها؟؟؟
على فكرة بتفرق كتيير في الحاجات دي
بلا أسيبكوا أنا واكمل المسلسل الاجنبي الجميل ده ... ;)
باااااااااااي

هتشوفوا said...

أنا عايز أقرأ كتابك ومش عارف أجيبه أزاي أصل أنا عايش في الكويت وأنا أصلا من المنصورة ,على فكرة هو اسمه عش ع الريح يعني عيش وسيبني أعيش ولا عش اللي الأم بتبقى فيه ولما تزهق بتطير, انتي طبعا هتقولي بعد البقين دول أنت ما ينفعش تقرأ الكتاب, أو حتى تحكيلنا عنه

مـــروة كمــال said...

عايزين رأيك على الخبر ده


الأسد يدعو تركيا إلى تحسين علاقتها بإسرائيل لتتمكن من الوساطة

http://aawsat.com/details.asp?section=1&issueno=11304&article=543486&feature=

Anonymous said...

الاقوال متضاربه علشان محدش بيكلف خاطره يروح يشوف اللي حصل

استدرجها دي كلمه اهل البنت .... علشان حفظ ماء الوجه

وموش شهر ولا حاجه .... وزي ما قال ميدو ... علاقه غير شرعيه ومتصوره

واضيف على كلام ميدو .... عيل حب يتمنظر مع اصحابه .... والبلوتوث اشتغل والنت كمان

وعلى فكره .... الولد صغير .... يمكن اصغر من عشرين كمان

وابوه كان بيدي البنت درس .... وهذوها هو اللي خلاهم يعرفوا بعض

المؤسف في الحكايه ان المسيحيين كانوا بيخافوا يمشوا في الشارع .... وبيطفوا نور بيوتهم

انا حزينه ان عيال " موش متربيه " يخلوا الدنيا نار كده

والامن طالع تاني يوم يقول الامن مستتب

وعموما الحاله هديت يا استاذه نواره خلاص

انتم ايه اللي فكركم بيها :)

على فكره انا معلوماتي اصدق من اليوم الساقع ده .... اصل انا من المنيا فاحنا جيران اسيوط ... وعندي مصادري الموثوقه .... ناس بتشتغل هناك :)

Anonymous said...

انا قريت تعليق فلاشاوي حالا

على فكره الصعايده بتقفش من التريقه عليهم

احنا تريق اه .... غيرنا يرتريق لااااااااااا

واللهجه دي صعيدي .... بس موش قوي يعني

بس علشان احنا ولاد عم .... خلاص :)

حسن على said...

هو ليه الاخبار اللي بتيجي من الصعيد دايما متضاربة كده??????????????????????? السبب هايكون فى الترجمة!!

مواطن مصري said...

http://www.almasry-alyoum.com/article2.aspx?ArticleID=232660

تنشر «المصرى اليوم» قصيدة الشاعر الكبير فاروق جويدة الجديدة هذا عتاب الحب للأحباب»

حسن على said...

العنوان "عشجاة يابوى" هو مربط الفرس وبيت القصيد,ومحور الرحى,وحجر الزاوية مجتمعين معا. الكلمة دى ملخص وافى للقصة والاحداث الاخرى تفاصيل

Unknown said...

فتاة من الصعيد
يا عيني علينا
ده الشراقوة عبط فعلا بقى، احنا ما بنزعلش ليه لما بيقولوا
ش ك ع
شرقاوي كاوركي عبيط

وزودوا عليها

أ ب

مؤخرا
:)
انا ح ابلغهم حدانا في البلد يبقوا يزعلوا بقى
والمنايفة مش بيزعلوا كمان على فكرة بيفرحوا لما بيحسوا ان حد خايف منهم صاحبتي المنوفية الوحيدة قالت لي: انا شريرة انا منوفية ههههههههه
مع انها بقى هابلة وبينضحك عليها من طوب الارض ولا شريرة ولا حاجة بس عايشة على السمعة

Unknown said...

عبد الزهراء

لا صاحبك ده اهبل بقى مش متوقع يلاقي كنتاكي في الصعيد ليه؟ ده الصعيد منطقة سياحية هو بس تلاقيه كان بتابع الضوء الشارد ههههههه
يابني ده هزار
طب ما انا شرقاوية، شايفني عبيطة؟
اوعى تقول اه... انا ناصحة
:)
بس فلاشاوي ده مخه صعيدي فعلا ههههههه

لا بص هو ما استدرجهاش ولا اغتصبها

باقول لك اهلها عشان من كسفتهم من الفضيحة قالوا: ظل يستدرجها ويغتصبها على مدى شهر

هو طبعا فيه شكل من اشكال الاغتصاب المعنوي لان دي عيلة صغيرة ما تفهمش حاجة

وستاشر سنة عيلة وما تفهمش حاجة وينضحك عليها بسهولة

لكن اذا كان الواد صغير فعلا يبقى لعب عيال

اذا كان عنده خمسة وتلاتين سنة فعلا يبقى اسمه تشايلد ابيوز لانها تعد طفلة بالنسبة له

وفي الحالة دي الفيلم الرومانسي بتاعي باظ

هتشوفوا

طب اما تنزل مصر بقى
لاني مش عارفة فين في الكويت

مروة كمال

انت بتتكلمي جد؟

فتاة من الصعيد

الواد طلع صغير؟
الحمد لله
الفيلم الرومانسي ما باظش

انا عارفة ان الموضوع هدي يا مروة بس كده ح يستنوا حاجة تانية تحصل وتتحول لفتنة طائفية

يعني زي ما قلت

واد وبت عيال صغيرة حبوا بعض

ده ايه دخله في ضرب الكنائس وتحويلها لفتنة طائفية؟

طب باقول لك

انا واثقة طبعا ان معلوماتك اصح

بصي يا ستي، اليوم الساقع قالت انه متجوز ومخلف وعنده خمسة وتلاتين سنة هههههه

على فكرة ولاد كلب قوي
يعني اذا كانوا بيألفوا يبقوا ولاد كلب
واذا كانوا عارفين الحقيقة يبقوا ولاد كلب واشرار

لانهم لما يقولوا ان الواد خمسة وتلاتين سنة ومتجوز وعنده عيال الناس ح تشك فعلا انه متسلط من الكنيسة

لكن لما يقولوا سنه الحقيقي ده يوضح الصورة انه لعب عيال

انا لما شفت صورته قلت مش ممكن ده خمسة وتلاتين سنة

المهم يعني

موضوع السن ده كان مهم بالنسبة لي سواء في الفيلم الرومانصي او في الواقعة نفسها

ايه اللي خلا الموضوع يتحول لفتنة طائفية؟

يعني ازاي اتحول كده

طبيعي لو ولد وبنت حصل بينهم حاجة زي دي ح يتقتلوا
حتى في الاحياء الشعبية في القاهرة على فكرة

بس انا كنت قريت ان فيه ناس بتقول ان الكنيسة هي اللي ورا الواد
وبصراحة سامحيني يعني، عيل عنده تسعتاشر وللا عشرين سنة، الكنيسة يعني فاتحة حضانة؟ ح تسلط عيل زي ده على عيلة هابلة ليه؟

هل صحيح ان هي دي الفكرة اللي كانت مسيطرة على مخ الناس وهم بيكسروا المحلات؟

هل صحيح انهم كسروا محلات مسلمين كمان في الزحمة؟

البت ما ماتتش؟ امال راحت فين؟ وليه ما قتلوهاش؟ وليه اشاعوا انها اتقتلت؟

المفروض ان اليوم الساقع راحت قرية العتالين

بس انا حاسة ان سبب تضارب الاخبار مش ان ماحدش بيروح يغطي

انا شايفة ان حتى اللي بيغطوا عندهم تعصبات وعدم موضوعية وبيكتبوا اللي هم عايزين يصدقوه

سؤال كمان: هل صحيح انه عرض عليها يهربوا وهي رفضت وده اللي خلاه يصورها؟

وقولي بقى من الاخر
المسلمين والمسيحيين اللي بينهم ده مش عايز يصفى ليه بقى؟

بمناسبة اسباب تضارب الاخبار

انا ح اقول لك مثلا عن موضوع الفتنة اللي ابتدت من ايام الجماعات الاسلامية

انا ما سبتش حد ما سألتوش وما سمعتش اقواله :) اهالي العيال بتوع الجماعات الاسلامية، المسلمين العاديين، المسيحيين، ظباط امن دولة خدموا في الصعيد، وكان فيهم واد صريح قوي قال لي: انا بيجيلي كوابيس لحد دلوقت من اللي عملته في الصعيد

بس يا مروة كل واحد بيحكي حكاية تانية خالص

يعني انا بعد سؤال عشرات البشر من مستويات عدة، من اول الناس اللي ما بتفكش الخط لحد العائلات الكبيرة، جمعت ان الامن هو السبب وهو اللي قومهم على بعض

لكن كل واحد بيحكي حكاية تانية خالص من وجهة نظره هو

يعني مثلا في حكاية ان بعض المسيحيين اشتغلوا مرشدين

ناس قالت الجماعات هددت المسيحيين فهم اضطروا يبلغوا الامن

ناس تانية قالت لا الامن هو اللي ضغط على المسيحيين

ناس تالتة طبعا بتكره المسيحيين قالوا كلام مش منطقي زي مثلا انهم اشتغلوا مع الامن كده محبة من غير اي اسباب لانهم بيكرهوا المسلمين هههههههه بس دي باين قوي انها واسعة، ماحدش بيحب يشتغل مع الامن

هي المشكلة ان لما كل طرف بيحكي بينزع الانسانية عن الطرف التاني ويطلع نفسه هو المظلوم ومضطر بشكل مبالغ فيه

فما بقتش عارفة اصدق حد فيهم خالص

حتى الظباط اللي خدموا في الصعيد وحكوا لي على اللي عملوه كانوا بيتكلموا على اهالي الصعيد على اساس انهم وحوش كاسرة وما ينفعش معاهم الا كده

ما لقتش اي طرف يحكي بمحايدة خالص

بس كلهم اجمعوا ان العلاقات كانت كويسة قبل التسعينات وانها عمرها ما ح تتصلح بعد اللي حصل ده

حسن علي

اه والله
القصة رومانسية
بس مروة مصممة انهم مش متربيين
:(

عبد الزهراء المصري (علي الحسيني) said...

نوارة عايزة تضحكي بجد ؟؟؟
أتفضلي ياستي وشوفي العبقرية بجد وأحمدي أن جيرانكم صعايدة مش خلايجة ههههههههههههههههههههههههههه
==================================
أفتحي الرابط ده وأدعي لي واوعي تدعي عليا ههههههههههههههههههههه
http://vb.we3rb.com/t13634.html

عبد الزهراء المصري (علي الحسيني) said...

يانوارة هم أخوانا الأسايطة كده طيبين أوي ودمهم حامي بس خلي بالك بقى علشان الأسايطة بنسميهم في الصعيد المعتدل اللي هو "منايفة الصعيد" وسبحان الله خرج منهم عبد الناصر ...
هههههههههههههه

Unknown said...

هو الواد ده عبيط ولا أيه
ومين نحن العرب دول؟
ده شكله عبيط باين
سامحيهم يانواره

عبد الزهراء المصري (علي الحسيني) said...

هو الواد ده عبيط ولا أيه
ومين نحن العرب دول؟
ده شكله عبيط باين
سامحيهم يانواره
---------------------
ياعم أهدئ شوية ومايبقاش دمك حامي كده وماتجرحش في حد .
دول خلايجة ودماغهم على قدهم ومايفهموش إن اللي كتبته نوارة هو نوع من الفانتازيا وفاكرين إن نوارة بتقول هو ده اللي هيحصل أو بيحصل .

Unknown said...

ههههه اخصصصصصصص وكمان طلع من اسيوط

طبعا معروف ان الاسايطة منايفة قبلي
ههههههههههههه
اتاريني كنت باقول له لك اصل منوفي
هيع هيع هييييع

Unknown said...

هم ما يقصدش خرافات يعني انا باخرف
هو يقصد زي تهييسات
بس هم كلامهم تقيل
ههههههههههههههه
ما بقصدوش حاجة

Anonymous said...

استاذه نواره .... موضوع تضارب الكلام

فتنه التسعينات كانت بسبب فتاوى كفر واستباحه مال المسيحي .... ادت لقتل الصياغ وسرقتهم

طبعا ليه كده .... بسبب ان الامن خلا الجماعات الاسلاميه مراكز قوى في الجامعات

كانوا بيقيموا الحد على الشباب في جامعه اسيوط وسط الناس

فطبعا الناس كانت بتصدقهم وبتقدر كلامهم

بس كده

البنت موش اتقتلت .... حكايه مؤامره من الكنيسه اتاصلت في دماغ الناس لان الولد نشر صوره البنت ع الموبيل والنت

بصي استاذه نواره .... حكايه الشرف والعرض شيء مهم جدا في مصر كلها والصعيد خصوصا

لما واحد يقصد يفضح بنت من بلده يبقى الامر وراه مؤامره لانه المفروض عارف انه ممكن يتقتل

طبعا كونه مسيحي فظهرت فكره المؤامره الكنسيه

اقول لحضرتك شيء .... حدثت نفس القصه عندنا بس الطرفين من نفس الديانه .... فظهرت نظريه مؤامره على البنت برضه بس من زوجها .... او من الولد اللي عمل كده

البنت لسه عايشه والولد هو اللي هربان .... يعني بلاش تحطي في دماغك حكايه هنادي .... البنت ممكن تفضل لو في شك في مؤامره ما ..

يا ريت اكون افدت حضرتك .... عايزه معلومات عن حوادث التسعينات ممكن افيد حضرتك .... بس انا كنت صغيره موش كبيره اوي .... بس اكيد فاكره

تحياتي

Unknown said...

أصل العبد لله يكره العناد لما يكون بطعم الغباء أوى

عبد الزهراء المصري (علي الحسيني) said...

هم ما يقصدش خرافات يعني انا باخرف
هو يقصد زي تهييسات
بس هم كلامهم تقيل
ههههههههههههههه
====================
ههههههههههههههههههه الله ينور عليكي بتفهمي والله يانوارة .
الخلايجة للأسف ماعندهمش تذوق للرومانصية وللفانتازيا .
على فكرة أنا جبت لك الرابط علشان تعرفي قيمة الصعايدة ياصعايدة بحري ههههههههههه