Friday 6 November 2009

تحذير للاشقاء السعوديين



لو فلحنا احنا لما ضربنا اليمن تبقوا تفلحوا انتوا
اديني باقول لكوا بقى، اليمن سرها باتع، بكرة تشوفوا ربنا ح يعمل فيكوا ايه، ما كانش ما بين ضرب اليمن والهزيمة تلات سنين
وبرضه ضربنا ناس غلابة وابرياء ماتوا واتشردوا
دي ناس الظاهر زاعق لها نبي، وغلابة ومكسورين ومشاكلهم كتير ومالهمش الا ربنا، اللي بييجي عليهم ما بيكسبش، اديني نصحتكوا، عايزين تتنصحوا اتنصحوا مش عايزين تتنصحوا يكون احسن خلينا بقى نخلص، عقلكوا في راسكوا تعرفوا خلاصكوا
الا النكتة دي، السعودية بقى لها طيران واسم الله عليها بتحارب ولما ربنا نفخ في صورتها وعرفت تستعمل الطيارة تضرب بيها ابرياء ونسوان واطفال، غير الميتين الف المشردين، ناس عندها حرب اهلية، وفي الحرب الاهلية كل الاطراف مجرمة ومافيش ضحية غير المواطنين، مال اهلكوا انتوا؟ نازلين هبد ورقع في المدنيين وقرى وبتقتلوا نسوان واطفال ليه؟ ربنا ح يخرب بيتكوا زي ما خرب بيتنا لما اتدخلنا لهم
اتقوا ربنا بقى، وبعدين انتوا من امتى كنتوا مساندين للنظام ده؟ مش ده النظام اللي جابه عبد الناصر وانتوا كنتوا مساندين للامام؟ وللا هي غلاسة وخلاص

27 comments:

مواطن مصري said...

يا نوارة بلاش تاخدي صف ايران الحوثين مجرمين و ارهابين

و هما الي ابتدو بقتل قوات حرس حدود سعودية

و انا لو مكان السعودية كان دة اقل واجب هعملة معاهم بسلاح الطيران

مشروع الشرق الاوسط الجديد بيتنفذ عن طريق ايران بطريقة غير مباشرة

بعد تفتيت العراق في حرب مذهبية مليشيات المهدي ضد القاعدة

نفس السيناريو بيتكرر في اليمن الحوثين ضد الوهابين

و السلفين جاين في السكة

و الايام هتثبت صحة كلامي ان ايران

بتمثل خطور على امن مصر و الدول العربية

تحياتي

Anonymous said...

على ما اتذكر لان كان عندي عشر سنين بس .... اتذكر ان النظام اليمني ده وقف مع صدام ضد الكويت والسعوديه

والاخوه اليمنيين كانوا راسمين صوره ملك السعوديه ع الشباشب .... ده بناء على توجيهات السيد الرئيس اليمني ساعتها

صحيح الدنيا صغيره :D

Kalimalhus said...

مش عارف إيه جاب سيرة عبدالناصر بس أنا علقت على التويتر و مفيش لازمة أعلق على النقطة دى هنا تانى لأنها خارج السياق..

المهم .. أكاد أقطع بإن مفيش طيارة سعودية تقدر أو تعرف تطلع من مطار سعودى بدون موافقة و دعم أمريكى .. و الموضوع من أوله إحتمال يكون مبيت و منسق مابين السعودية و نظام على عبالله صالح .. بمعنى إن القوات اليمنية ضغطت على بعض الحوثيين و ألجأتهم للدخول للأراضى السعودية و غالبا دى مش أول مرة .. لكن المرة دى قوات حرس الحدود السعودية إتعرضت ليهم فإشتبكوا معاهم و أصبح لدى السعوديين ذريعة لضربهم ..

الهدف تقدرى تعرفيه من أول تعليق للسى إن إن على الموضوع و هو بإختصار إن محللين بول سياسى بيقولوا إن الحوثيين الممولين إيرانيا يسعون لخلق دويلة داخل الدولة على غرار حزب الله فى لبنان و بالتالى يشكلوا خطر على السعودية زى الخطر اللى بيشكله حزب الله على إسرائيل ..

و المعنى هو إن عملية الخطر الإيرانى المتخيل على الدول العربية تبقى حقيقة من لحم و دم و بارود و يبقى بالإمكان القول إن الخطر أهه قدامكم و واضح و مش مجرد تخاريف و أقوال مرسلة..

أما بعد .. فواضح جدا .. بعد ما السعوديين ينغمسوا لبعض الوقت فى الصراع مع الحوثيين يبدأ الكلام يبقى على المفتوح و إن فيه إستهداف من إيران لأمن السعودية مما يبرر أن تقدم السعودية التسهيلات اللازمة فى حال توجيه ضربة لإيران دون خوف من عواقب ذلك داخليا لأن الداخل قد تم تجهيزه أولا بسعار التعصب المذهبى ثم بخيال مآتة الأمن القومى..

كده يبقى خيار ضرب إيران من قبل أمريكا شخصيا أصبح مرة تانية على الترابيزة فى حين تتفرغ إسرائيل لضرب حزب الله اللى أكيد مش هيسكت لما إيران تتضرب .. بس خلاص حرقتلك الفيلم .. فاضل الفيناله و دى ولا حتى الحاج أوباما يعرفها بس من تصرفاته فى أفغانستان شكله أكثر تهورا مما أراد البعض أن يظن و إحتمال يكون بيفكر إن بدء حرب فى الفترة الأولانية بقى بيمثل ضمان لإعادة الإنتخاب لفترة تانية..

الميكروباص said...

الوضع مختلف تماما يا نواره عن أيام عبدالناصر
عبد الناصر كان عاوز يعمل فيها زعيم الأمه كلها وتدخل بالجيش المصري في اليمن والكونغو وفي بلاد مختلفه إلى ان ارهق الجيش تماما وانتهى الامر بهزيمة 67
اما الحوثيين المدعومين من ايران اخترقوا الاراضي السعودية واحتلوا منطقة هناك واعلنوا السيطرة عليها
والسعوديه في الحقيقه تملك سلاح جوي رهيب
معاهم فلوس يشتروا طائرات يا ستي
وحقهم انهم يدافعوا عن اختراق حدودهم
يعني علىا لرغم من ان الحوثيين يريدون الانفصال من فترة إلا أن السعودية الحقيقه لم تتدخل إلا أمس عندما اعلن الحوثيون انهم اخترقوا الحدود السعوديه
الموقف هنا مختلف تماما عن ايام عبد الناصر

Asmaa mahaba said...

عادى ماهم دا اللى فالحين فيه يتشطروا على غلابه انما قدام اسرائيل وامريكا ينخوا ...

Asmaa mahaba said...

وبعدين هى اليمن بس يا نواره شوفي المصريين بيعاملوهم ازاى يا بنتى دا احنا بنتعامل زى الحشرات اللى جايه تاخد لقمه وتمشى ربنا بيدى الناس فلوس يا تفترى يا تصلح وهم الفلوس كانت نقمه عليهم

Unknown said...

لورانس العرب
والنبي انت ساداتي مش كده؟
الطيران السعودي بيضرب مدنيين وبيضرب قرى واطفال وستات
احتلوا ارض الحوثيين ايه؟ هم عارفين يمشوا؟ مافيش تكافؤ في القوى اصلا ما بين علي عبد الله صالح والحوثيين
ثم اللي بينضربوا دلوقت مش الحوثيين
اللي بينضربوا دلوقت يمنيين
والسعودية بتدافع عن نفسها؟
احا
بجد يعني باقولها من قلبي
ما يروحوا يحرروا ارضهم من القوات الامريكية

فتاة من الصعيد
اه يا اختي
تصوري

طول عمر علي عبد الله صالح والسعودية بينهم ما صنع الحداد

فعلا الارضو كرويتون تلفو حول نفسها

مهندس
ايه اللي جاب سيرة عبد الناصر؟
يعني انت مش ح تدافع عن اللي عملناه في اليمن كمان يا مهندس

سومة
مجنونة في بلد عاقل؟ ههههه ماهو البلد عاقل فعلا

مواطن مصري said...

السياسة لا تعرف العواطف ولابد من مواجهة خطر المد الايراني الفارسي


ايران طول عمرها بتصدر الفتن للدول العربية

Kalimalhus said...

يعنى سيبتى التعليق اللى يخشله فى صفحتين فلوسكاب و مسكتى فى كلمة عبدالناصر؟ .. عبدالناصر مات و راحت أيامه و إحنا فى أيام عوكل دلوقت .. خلافنا حوالين ماكان مش هيفرق فى حاجة..

Unknown said...

يا سيدي ما انا باحب عبد الناصر كمان بس الحق حق

على اي حال
السعودية ح يتخرب بيتها
باتكلم بجد يعني
بكرة تشوف، ربنا ح يخرب بيتهم على الظلم ده

حسن على said...

ارجعت صديقتنا الاستاذة نوارة مشاكل الجيش المصرى فى اليمن لأسباب متعلقة ب "اللى يجى ع المظلوم ما يكسبش"...اواشياء من هذا القبيل ,ونست ان اليمن لم يحتل ابدا - على اهمية موقعة الجغرافى- وذلك لانة ميدان قتال يسهل الدفاع عنة وراجلين وكلاشنكوف يقفلوا اجدع ممر فى اليمن وهما بياكلو قات فى اعلى الجبل.

Unknown said...

والله يا استاذ حسن اللي بييجي على اليمن ما بيكسبش

ماما قالت لي ان كان فيه طيار مصري رجع من حرب اليمن عنده صدمة عصبية وتقاعد بسبب الصدمة اللي حصلت له لانه ضرب قرية وكان فيه بنت بتبص له شبه بنته

وفي كتاب الناس والحرب اسامة الصادق بيقول ان الجيش كان راجع بيعاني من ازمات نفسية وصدمات عصبية

احنا عندنا دم برضه مهما كان
دول غلابة

واللي ييجي على الغلابة ما يكسبش

Unknown said...

الحكايه أنها حرب بالوكاله
السنه ضد الشيعه
السعوديه ضد أيران
وللأسف اللى رايح فى الوسط هما الغلابه
نفس اللى بيحصل فى مصر بالظبط بس على الطريقه السياسيه
حرامية الحكومه ضد هليبة المعارضه والشعب اللى رايح فى النص

بس لما الحوثيين يقتلوا حرس حدود سعودى ويخشوا جوه حدود المملكه ؟
واللى سمعته من قناة الحصيره أن الطيران السعودى بيضرب جوه الحدود السعوديه فى جبل دخان

مسلم مصري said...

ربنا يخرب بيت اللي إدى للحوثيين سلاح يخليهم بالقوة دي. ويخليهم يحتلوا موقع داخل السعودية. المفروض طبعا حسب وجهة نظهرك السعوديين يعدوا يعيطوا جنب الحيط ويسيبوا الحوثيين يحتلوا موقع عندهم ويقتلوا جنود سعوديين. ويعيش حزب الله وإيران اللي ادوا للحوثيين السلاح. تتقسم اليمن ظز. يعيش حزب الله وإيران. يحتلوا موقع داخل السعودية طز. يعيش حزب الله وإيران.

Amal said...

يا نوارة ...انا والله منزعجة من الاخبار الي بتصور لنا ان تدخل الجيش السعودي وطيرانه حيخلص الحرب الي بقالها اكثر من 6 سنوات في شمال اليمن ...اولا : انا بطرح نفس السؤال الي طرحتيه .. من امتى والسعودية معاها سلاح طيران ... انا كل ما شفت خبر عن "الجيش السعودي" اتذكر كلام امي واحنا صغار كانت تقلنا ان الجيش السعودي اتفضح ايام حرب الخليج لان كل جنوده اتضح انهم باكستانيين وهنود !
ثانيا : الاعالام العربي الي اغلبه عايش على حس وفلوس السعودية همش دور الجيش اليمني وجنودة الي كل يوم بيموتوا في صعدة ... يعني اليمنين ما يقدروا يحاربوا ولا ايش ؟؟ تعالي قارني بين رجال اليمن ورجال السعودية وبتعرفي مين فيهم يستاهل اساسا تسمية رجال ...

احنا والسعودية معروف من زمان ان احنا ما نحب بعض ! ف الان لا يجوا السعاودة يقنوعوني انه بيساعدوا اليمن ... السعودية الي رجعت اليمنين مشي حفاة الى اليمن مستحيل يكون قلبها علينا !

قلبي على وطني الي اصبح مسرح لصراع ايراني سعودي وضحيته ابناء اليمن !

Unknown said...

لا ياجماعه - ماتستهونوش بالسعوديه دلوقتى
السعوديه فى ظرف 5 سنوات هاتكون قوه عسكريه أقليميه فى المنطقه
السعوديه دلوقتى بتمتلك طائرات أف-15 الهجوميه وطائرات التورنيدو وطائرات اليوروفايتر
والسعوديه هى ثانى أكبر الدول الشرق أوسطيه أنفاقا" على التسليح بميزانيه 90 مليار ريال
وهى أضعاف ميزانية التسليح المصرى والأسرائيلى معا"

Unknown said...

lymona

وانا والله مش قادرة افهم كمان ازاي فيه ناس واخدة صفوف في حرب اهلية

في الحرب الاهلية دايما كل الاطراف مجرمة والضحية هم الناس اللي لا ليهم في الطور ولا في الطحين

ازاي يعني السعودية بتدافع عن نفسها مش فاهمة

ما دافعوش عن نفسهم ضد القوات الامريكية ليه؟ لما العراق احتلت الكويت كان فين الطيران ده بدل ما كانوا يجروا على امريكا ويسيبوها تستعبدهم؟

وللا عشان دول مدنيين عزل ما حيلتهمش حاجة بيموتوهم

ولحد ما كانت السعودية بتدي فلوس لعلي عبد الله صالح وسلاح كانت فضيحتها مدارية لكن تدخل بنفسها عشان تضرب الناس وتموتهم

انا ما شفتش حوثيين ماتوا
انا شفت ابرياء، ستات واطفال وقرويين غلابة هم اللي ماتوا

ازاي فيه ناس تسمح لنفسها انها تبرر بالطريقة اللا اخلاقية دي لمجرد انهم بيكرهوا الشيعة

طب علي عبد الله صالح كمان شيعة
والحوثيين وعلي عبد الله صالح من نفس المذهب

بيساندوا على عبد الله صالح ليه؟

ماهو زي البشير والحوثيين زي المتمردين في دارفور

يعني لو مصر ضربت دارفور بالطيران عشان تساند البشير كان يبقى كويس؟

الحوثيين بينفوا انهم بياخدوا سلاح من ايران ولو بياخدوا سلاح من ايران تبقى ايران مشاركة في جريمة
وزي ما قلت لحد قبل ما لطيران يتدخل بنفسه كان وضع ايران زي وضع السعودية، كلها مجرد شكوك ومافيش عليها ادلة غير تبادل اتهامات
لكن كده السعودية مجرمة علنا

لكن لحد دلوقت انا ما شفتش طيران ايراني بيقصف قرى يمنية
انا شايفة طيران سعودي
نفسي اشتمهم شتايم قبيحة بجد

وحكاية انهم ضربوا عسكري على الحدود دي برضه محتاجة تلات اربع كلمات قبيحة وصوت اسكندراني من الاعماق

ناس بلدها فيها قواعد امريكية مستعبداهم وبتضرب من عندهم دول مجاورة وبيتكلموا عن السيادة
فعلا ما يستاهلوش غير كلمتين

طب ما مصر كل شهر على الله ميت لها كام عسكري وظابط على الحدود من اللي بيتسلى عليهم القناصة الاسرائيليين

ما شفناش طيران مصري فوق تل ابيب يعني

والناس اللي تبرر للمشاركة في الحرب الاهلية دي ناس وسخة وربنا ح يخرب بيتهم هم كمان

اللي يدخل بين ناس متصارعة يصلح ما بينهم عشان الميتين الف لاجئ والمساكين اللي ماتوا مرة بالحرب ومرة بالجوع

مش يدخل يشعلل ويقول ايران ايران

طب يا سيدي
ايران بنت وسخة وبتديهم سلاح

والسعودية بتعمل ايه؟ بتضرب بنفسها

وده مبرر؟

احا فعلا

دي فتنة، وكل طرف فيها مجرم، واللي ياخد صف لحساب صف يبوء بإثم الابرياء اللي بتموت في حرب عبثية

علي عبد الله صالح والحوثيين بيرتكبوا جريمة في حق الناس اذا ما حقنوش الدماء دي

واللي يساعدهم ولو بكلمة يبقى مشارك في الجريمة دي

صحيح القوى مش متكافئة ما بين علي عبد الله صالح، وصحيح علي عبد الله صالح مسئول نفس مسئولية البشير اكتر من مسئولية المتمردين
لان المتمردين متمردين لكن رئيس الجمهورية مسئول يحافظ على امن بلده
لكن ده برضه ما يعفيش الحوثيين من المسئولية وانهم يشيلوا سلاح ويعملوا في الناس كده

بحجة ان الرئيس ده خاين وعميل

رئيس خاين وعميل احسن من حرب اهلية يروح فيها ناس غلابة
وكون ان اللي بيدعم علي عبد الله صالح هي امريكا واللي بيدعم الحوثيين ايران ده ما يطببش كفة الحوثيين ولا حاجة هو يزود من وساخة علي عبد الله صالح لكن لا يعفي الحوثيين من المشاركة في الجريمة

والسعودية بيتها ح يتخرب فعلا انا عمري ما شفت نظام بالحقارة دي
دول احقر من النظام المصري
تصدقوا بالله
فعلا النظام السعودي احقر من النظام المصري
جاتهم القرف

بس هم نهايتهم قربت على فكرة

والله النظام السعودي نهايته قربت
مش عشان الحوثيين اقويا ولا حاجة، دول مكسحين
بس عشان فعلا ربنا مش ح يسيبهم
الجريمة اللي بيعملوها دلوقت هي اخر سطر بيكتبوه في ذكرهم في التاريخ
وبكرة تشوفوا

احنا عملنا جريمة لما رحنا اليمن
وربنا عذبنا على الجريمة دي سنين طويلة
ودالت دولتنا وتراجعت قيمتنا وبقينا دلاديل السعودية وامريكا واسرائيل وكل كلب معدي في الشارع
وربنا كسرنا وقصمنا

بكرة السعودية تشوف نتيجة جريمتها

Amal said...

جريمة ايه الي عملتوها لما رحتوا اليمن ... بالعكس انتوا ساعدتوا اليمن
اين نعم في ناس ماتت بس كمان الحلول السلمية لا تصنع انظمة
وانا هنا بتكلم على نظام جمهوري كا كان الوعد مش نظام شمولي زي ما هو الوضع حاليا ...

يعني من غير مساعدة مصر مين الي كان حيدحر الملكيين الي كانت السعودية ممولاهم ولا زالت تمول اغلب مشايخ اليمن الى يومنا هذا
والسعودية كمان بتمول اعضاء الحزب الاشتراكي المنفيين (الجنوبيين) الى اليوم بس عشان تضرب اليمن وتهدد على عبد الله صالح وشلته انها في اي لحظة ممكن تقلب الطاولة عليه

الثورة اليمنية قامت في 1962 والسعودية ما اعترفتش بينا الى عا 1970 يعني 8 سنوات واحنا بنشحت منهم اعتراف وهما عايزين الامام يبقى عشان تكون اليمن نسخة من السعودية ...

الحوثين وعلى عبد الله صالح مش شيعة زي بعض

صحيح الاثنين تبع المذهب الزيدي الي والله احنا اليمنين مانعرف الفرق بينه وبين المذهب السني الشافعي المنتشر في اليمن كمذهب سني لان دايما لما تقرأي عن الزيدية يقولوا انها اقرب المذاهب الشيعية الى السنة ... يعني صلاتنا واحدة وصومنا واحد واذاننا واحد ومحدش يسب الصحابة ولا حاجة ... والشعب اليمن بأصلة غير طائفي ابدا
لكن المشكلة هي لما بدر الدين الحوثي زعيم الحوثيين الي اتقتل في الحرب الي فاتت في صعدة .. لما هو حب يعمل
upgrade
ويدخل في المذهب الشيعي الاثناعشري .. وهنا بدأ التقارب مع ايران وحوزاتها العلمية وقم ومدينة الصدر والكلام ذا كله

على فكرة احنا في اليمن عمرنا ما نستعمل كلمة شيعي ... لان برأينا الزيود تقريبا مش شيعة طالما ان مافيش اختلاف بينهم وبين الشوافعة
واساسا الكلام الطائفي هذا كل والنبش في مذاهب الناس ما بدأش الا بعد غزو العراق

انا معاكي ان الي بتموت ناس بريئة فعلا والسعودية الي بتعمله ما يجوز ... بس نعمل ايه اذا وزارة الدفاع بتاعتنا بتقول ان السعودية ما ضربتش ولا منطقة داخل الحدود اليمنية والسعودية كمان بتقول انها بتضرب متسللين حوثين الى اراضيها

انا من اشد المعارضين لاي حكم "ثيولوجي" ولو سبنا مجال للحوثين هو دا الي هما فعلا رح يعملوه في اليمن ...اعادة حكم الامامة على قد ما يكون بروبغاندا من الحكومة بس كمان غير مقبولة لدى الشارع اليمن الي هو خلقة متدين كفاية ومحافظ بدرجة مفزعة ...

تحياتي

الخوجة said...

كلامك صح يانوارة تاريخيا

------------

دي ناس الظاهر زاعق لها نبي، وغلابة ومكسورين ومشاكلهم كتير ومالهمش الا ربنا، اللي بييجي عليهم ما بيكسبش، اديني نصحتكوا، عايزين تتنصحوا اتنصحوا مش عايزين تتنصحوا يكون احسن خلينا بقى نخلص، عقلكوا في راسكوا تعرفوا خلاصكوا
----------

صح كلامك

مية المية

العرب هما كدة

النسوان ضاحكة عليهم

وشوفى ولاهما هنا حرمة ممشية زعماء عرب وكلهم لايرون لايسمعون

وماخفى كان اعظم

بس قنوات وافلام نسوان بفلوس العرب

الحقيقة الكل عارفها واحنا بس الصحافة القومية وبفلوسنا بتستعمانا

اهه وبكرة كل الزعماء العرب يتقدموا لمحكمة لاهاى اهه

احنا بس اللى نايمين

وهما والنبى ماتفضحونا

احياه ابوكى ياماما امريكا ماتفضحينا

استرى علينا داحنا ولايا يعنى النسوان احسن مننا

الاخ اللى مش عاجبة كلامه الحاجة نوارة

يعرف ان احنا بنطالب من جد مش هظار ان تنشأ ادارة اسمها

ادارة نوارة نجم للرأى العام

لو بيسمعوا كلامها ماكنش دة حالنا وحال العرب


لعلمك والكلام للجميع يمكن انا اكبركم سنا

تاريخيا كلام نوارة صح

ولو عاوزين مراجع

بس دة مش موضوعنا

لاكن الادلة على فضايح الحكام العرب

واحنا بالاخص

اهه


اتكلموا كلكم زى نوارة

ورونى هتعملوا ايه

ولا حاجة ماهو احنا
نشأنا على سينما اليهود وافكارهم وحكم العسكر والثورة

ادى اللى كسبناة


خطورة المدارس الأمريكية في مصر | الخوجة



we deman justice.trial to those criminals who tortured him.

CONVICTIONS IN ABU OMAR RENDITION CASE A STEP TOWARD ACCOUNTABILITY


CLASSIFIED - NO - TRIAL - JUSTICE- YES.




Sabrina De Sousa | الخوجة




Imam rapito affair - قضية اختطاف أبو عمر المصرى

Unknown said...

احنا ساعدنا اليمن؟

كل الغم اللي اليمن فيه ده من تحت راسنا

احنا كنا فاكرين نفسنا مين عشان نشيل لهم نظام ونحط لهم نظام تاني؟ وبالحرب

اللي احنا عملناه في اليمن زي اللي امريكا عملته في العراق

الفرق اننا عملنا كده في رحمنا وامريكا عملت كده في الغريب

ومافيش حاجة اسمها صحيح ابرياء ماتوا

مافيش حاجة تخرب بيت الانسان الا انه يقطع رحمه ويقتل ناس من اهله

واديهم بيعانوا من نتيجة تدخلنا لحد دلوقت
واحنا اللي جبنا للعراق صدام واويناه
واتدخلنا في كل قطر عربي وشيلنا نظام وحطينا النظام واخرة المتمة جه المنوفي خلعنا منهم بعد ما خليناهم يعتمدوا علينا

اسكتي اسكتي

هو ربنا بيعمل فينا كده ليه تفتكري يعني؟

واحنا لازم نعترف بغلطنا لو عايزين تقوم لنا قومة تاني

بهيج الشرير said...

بصي ياأبلتي الإيميل ده جالي من عضو الكونجرس عن دايرتي (أنا شلت كل الأسماء من الإيميل)

Dear …..-

Thank you so much for your note a few weeks ago sharing your outrage over U.S. tax dollars funding an abuser of human rights like Egypt. I’d like to discuss this issue with you and would welcome a phone call. Please let me know when you are available to chat. I will be in the office all day tomorrow: Saturday, November 7. Otherwise, I will be gone next week and unavailable until Monday the 16th.
Thanks again for sharing your thoughts. Congressman Bilirakis appreciates the benefit of your views.
……….
Legislative Counsel
Congressman ………..
…….
Tel. ……….

وأنا ناوي أتكلم معاه بخصوص موضوع مالك واللي حصل معاه، وشوفي أنتي والناس عندك عايزاني أتكلم معاه في إيه كمان

حسن على said...

الاستاذة نوارة:متفقين على المبداء سواء كانت صياغتة(اللى يجى عااليمن ما يكسبش) اوكانت الصياغة:(الذى يبالغ فى تقدير قوتة ونفوذة ,ف اليمن سيهزم حتما. اردت فقط الاشارة لصعوبة العمل العسكرى فى جغرافيا لا ترحب بالغزاة وتساعد اهل اليمن دائما .

عبد الزهراء المصري (علي الحسيني) said...

أولاً أنا ضد الحرب بكل أشكالها لأن اللي بيضيع فيها الناس الصغيرة الغلابة اللي زينا .
ثانياً الحرب في اليمن مش حرب شيعية سنية ولا حاجة بل حرب بين نظام وهابي تكفيري ومُعادي للإسلام سنة وشيعة وهو نظام فاسد أخلاقياً ودينياً ومعاه نظام خايب أوي وهو النظام اليمني وكلا النظامين عميلان لأمريكا وكل اللي أتكلموا عارفين كده كويس أوي أما بالنسبة للحوثيين فهم حربهم أصلاً مع النظام اليمني وطبعاً النظام الإيراني بتدعم الحوثيين بشكل أو بآخر بس مش علشان هم شيعة لكن علشان فرض للنفوذ مش أكثر من ذلك يعني مش حرب شيعية سنية وخاصة لما تعرفوا إن النظام الإيراني مش بيفرق في ظلمه بين الشيعة والسنة بل هو نظام طاغوتي فاقد للشرعية وللعدالة .
إذاً الحرب سياسية وليست حرب ملائكة وشياطين .
وللعلم فأهل اليمن قديماً لما كانوا بيشتغلوا بالتجارة ساعدوا السعوديين كثيراً قبل عصر النفط عندما كانوا مجرد رعاع عايشين على الرعي والترحال وبعد عصر النفط الغرور أصاب السعوديين وظنوا أنفسهم شعب الله المختار وفسدوا وأفسدوا في الأرض لدرجة أنهم عذبوا اليمنين بشكل يفوق تعذيب الصهاينة للفلسطينين
:
http://marebpress.net/news_details.php?sid=16901

http://www.cyemen.com/vb/showthread.php?t=58054

http://www.alwahdawi.net/news_details.php?sid=5558

http://www.alwahdawi.net/news_details.php?lng=arabic&sid=5560

==================================
علي الحسيني

عبد الزهراء المصري (علي الحسيني) said...

آه نسيت أقول إن الأخوه اللي فاكرين إن بلاد الحجاز الآن والتي يحكمها الطاغوت سليل آل مردخاي هي حصن للإسلام فهو غلطان لأن الناس دي برعايتها للوهابية التكفيرية أظهروا لكل العقلاء أنهم ضد الإسلام ولو نظرنا لنشأة دولة آل مردخاي سنجد أنها قامت على القتل والنحر لزعماء العشائر والقبائل التي لم تبايعهم وتاريخهم كله يشهد بالعمالة والخيانةللإسلام والعروبة .
بالنسبة لسقوطهم فزي ما قالت نوارة سقوطهم قريب أوي أوي بل أقرب مما تتصورا فالله يمهل ولأ يهمل لكن سقوطهم سيسبقه سقوط عدة أنظمة اخرى .
=====================
علي الحسيني

جمال الملك سلطان said...

lymona


معرفتك باليمن تشابه معرفتك بانظمة الحكم وانواعها، انت ضد الحكم "الثيولوجي" ؟ هل تتكرمين بتعريفي على هذا النظام الجديد على قاموسي؟
بدر الدين الحوثي المرجع الزيدي المعروف اصبح اثني عشري وقتل ايضا في الحرب الماضية؟
ماشاء الله
معلومات دقيقة جدا

Anonymous said...

شكرا على التحذير الموجه [ للأشقاء ] في المملكة العربية السعودية

أتعجب وأتعجب عندما أرى موضوعا يتكلم في أمر معين .. والجميع هنا يكتب كل مالديه وكل مايفكر به وكل مايتذكره والذي هو على كل حال لا يمت للموضوع بصله

بغض النظر عن مسميات الدول .. دعونا نشرحها بشكل أقرب

لو افترضنا انك انت وجارك العزيز الذي لا يفصل بينكما سوا جدار تعيشون من فترة طويلة بسلام وهدوء مع الأخذ بعين الاعتبار بأن أبناء جارك منهم الخلوق المؤدب ومنهم الشقي وهم قله .. ودعونا هنا نتكلم عن القله .. تارة [ والكلام هنا عن القله ] يلعبون في ساحة منزلهم العابا عده احيانا مزعجه واحيانا اخف ازعاجا .. وفي يوم من ايام العيد نجد ابناء الجار [ القله ] يلعبون بالألعاب النارية ويتعمدون توجيهها على جارهم .. ومع ذلك ظل الجار ساكتا وقال لن ازعجهم بما اننا في ايام عيد فلندعهم يلهون ويلعبون .. ولكن ظلت الالعاب الناريه حتى وبعد انتهاء ايام العيد تزعج الجار المسكين والاشد من ذلك عندما يتعمد جميع الاشقياء ويتفقون فيما بينهم على أن يسلطوا شخصا منهم على احد ابناء الجار ويطلبون منه أن يوجه احد العابه الناريه المؤذيه الى صغار الجار المسكين

فـ برأيك عزيزي هل من العدل أن يظل الجار ساكتا عن ما حدث لأبنه ؟!؟

عجباً لـ قوم همهم توجيه عبارات أكبر منهم لدول تظل ورغم الكلاب النابحه في المقدمة !!

** أود التنبيه هنا إلى انه من الصعب أو من المستحيل أن تجد دولة جيشها و سلاحها الجوي كما كان عليه قبل عدة سنوات .. الا اذا كانت الشقيقة مصر مازالت على ماهي عليه

اللهم احم الاسلام والمسلمين .. اللهم احم الاسلام والمسلمين .. اللهم احم الاسلام والمسلمين

Unknown said...

z8an

اهلا وسهلا
طب تعالى لي بقى من خلال الشنطة

جنينة ايه وفيلا ايه وابن الجيران ايه؟ هم فهموها لكوا كده؟

هو انتوا متعودين حداكوا في البلد ان لما ابن الجيران يضرب ابنك تقوم تروح تكسر للجيران بيتهم؟ ايه؟ ماعندكوش اقسام وللا ايه؟

انا اللي اعرفه في كل القوانين والاعراف الدولية ان مافيش حرب بتقوم عشان متسللين دخلوا من الحدود وضربوا عساكر وللا حتى قتلوهم

اللي بيحصل
وفقا لقانون الامم المتحدة
ووفقا لقوانين الاخلاق
ووفقا للمنطق
ان الدول اللي بتعاني من التسلل لحدودها بتكثف الحراسة على الحدود واي حد مسلح متسلل بتضرب عليه نار واللي مات متسلل على الحدود مالوش دية لانه متسلل
ولو المتسللين كثفوا الهجوم الدولة دي بتشتكي للامم المتحدة وبتجيب قوات دولية
وانتوا مش محتاجين تسفروهم من اخر الدنيا ولا حاجة، ماهم عندكوا اصلا، يعني ح يركبوا عربية جيب ويقفوا على الحدود

عمري يا اخويا ما سمعت عن حد بيضرب بالطيران البلد اللي جنبه عشان فيه متسللين مسلحين دخلوا وقتلوا ناس

النكتة دي جديدة
بقالي مدة ما سمعتش نكت جديدة

ده اللي بيحصل في اي حتة في الدنيا

مافيش حد بيروح بالطيران يضرب بلد عشان فيه مضايقات على الحدود الا امريكا واسرائيل

اذا كان عاجبك انكوا تحشروا مع امريكا واسرائيل بالهنا والشفا

بالنسبة للسلاح
يا سيدي مبروك على السلاح المتطور والشقيقة مصر مش عايزة سلاح

ح نضرب بيه مين؟ ح نضرب بيه امريكا؟ لا طبعا، ح نضرب بيه اسرائيل؟ العفو

عايزين سلاح نضرب بيه اللي من دمنا ولحمنا؟ لا شكرا
ربنا ما يرزقنا بالسلاح ده ابدا اللي بيقطع الارحام ويركبنا ذنب بني اسرائيل

"ها أنتم هؤلاء تقتلون أنفسكم وتخرجون فريقا منكم من ديارهم تظاهرون عليهم بالإثم والعدوان وإن يأتوكم أسارى تفادوهم وهو محرم عليكم أخراجهم، أفتؤمنون ببعض الكتاب وتكفرون ببعض. فما جزاء من يفعل ذلك منكم إلا خزي في الحياة الدنيا ويوم القيامة يردون إلى أشد العذاب وما الله بغافل عما تعملون"

سامع يا اخ؟
وما الله بغافل عما تعملون

وبلاش تنطيط والنبي وفوق لنفسك
مقدمة ايه ومؤخرة ايه؟

احنا دول عالم تالت يا سيد

كلنا في المؤخرة وفي قعر العالم

والتنطيط اللي بنعمله على بعض ده زي ما واحدة خدامة في مصر الجديدة تتآلط على خدامة في امبابة

الاتنين خدامين، بتتآلط عليها ليه؟ بتتآلط باسيادها اللي ساكنين في مصر الجديدة والتانية اسيادها ساكنين في امبابة؟

مش ح تفرق كتير
برضه خدامة

وبمناسبة انكوا واخدين توكيل الاسلام والمسلمين

وإن طائفتان من المؤمنين اقتتلوا فاصلحوا بينهما يا سيد
ما قالش ادوهم سلاح ودعم لوجيستي واحشروا نفسكوا في حرب اهلية ولما تنضربوا تقولوا اي

اي ايه بقى؟ كان ايه اللي حشركوا من الاول
وانا ما شفتش عقد التوكيل بتاع الاسلام والمسلمين، بس متأكدة ان القوات الامريكية اللي على ارضكوا بتقتل مسلمين مش مذكورة فيه
بص يابني
كل المراحل اللي بتمروا بيها دي احنا مرينا بيها من اكتر من خمسين سنة وجربنا كل اللي نفسكوا تجربوه وما فلحناش
باقولها لك اهو بمنتهى الشجاعة، ربنا خرب بيتنا لما عملنا اللي انتوا بتعملوه دلوقت من خمسين سنة ولا سلاح نفعنا، ولا جبروت نفعنا، ولا ان العالم العربي كله كان في ايدنا زي القطة السيامي نفعنا
عشان كنا ظلمة
وربنا بيقتص من الظلمة
وادي احنا اهو، لو تحب ينتهي بيكوا الحال كده ياللا، اتكلوا على الله

خدوا خبرتنا كده وحطوا عقلكوا في راسكوا وما تفضلوش تكرروا اخطاء اتعملت في الماضي ونتائجها ظهرت وعرفنا ديتها

جربوا حاجة جديدة طيب

ومتشكرين على زيارة الكلاب اللي بتنبح وتعوي يا استاذ مقدمة