Saturday 21 November 2009

الإعلام الراقد



انا عرفت احنا بنعمل ايه، احنا بنحاول نثبت مكانتنا كأخف دم ناس في العالم، دي الجمهورية واللي بين قوصين بالاحمر تعليقاتي:


مصدر أمني: الجماهير عبرت عن غضبها قرب سفارة الجزائر بأسلوب متحضر
البعض ألقي الحجارة فأصاب 11 ضابطا (باسلوب متحضر) و24 جندياً (باسلوب متحضر) وأتلف 15 سيارة (بتحضير متأسلب)

صرح مصدر أمني مسئول بأن مجموعات من المواطنين حاولت التوجه إلي مقر السفارة الجزائرية بالزمالك.. منذ مساء أمس الأول وحتي فجر أمس رافعين الأعلام المصرية بأسلوب متحضر وملتزم للاعراب عن غضبهم واستنكارهم لما أقدم عليه عدد من مشجعي الجزائري من أحداث مؤسفة خلال مباراتي القاهرة والخرطوم.
أضاف المصدر أن قوات الشرطة حرصت علي إتاحة الفرصة لهم علي مسافة نصف كيلومتر تبعد عن مقر السفارة.. واستمر ذلك حتي الفجر.. إلا أن البعض لم يستجب للنداء الذي أوضحت فيه مسئولية الدولة عن تأمين سلامة البعثات الدبلوماسية علي أراضيها.. وقاموا بإلقاء الحجارة (باسلوب متحضر وملتزم) وزجاجات بها مواد ملتهبة (بتلزوم متأسلب ومحتضر) نحو قوات الشرطة (المصرية مش الجزائرية مع انها هي اللي محرضاهم اصلا وواقفة تحميهم لاول مرة في تاريخ مصر من سبعتلاف سنة) مما أسفر عن إصابة 11 ضابطا و24 فرداً وتلفيات في 15 سيارة شرطة وتهشيم واجهات أربعة محلات (باسلوب متحضر) ومحطة وقود و12 لوحة إعلانية مما اضطر الشرطة لتفريق المتجمعين وضبط متزعمي الشغب.. وتباشر النيابة التحقيق.. أكد البيان أن الداخلية مع التزامها بموقف الدولة وتقديرها لمشاعر المصريين لا يمكنها في ذات الوقت التغافل عن انتهاك للقانون (خصوصا لما يبقى باسلوب متحضر وملتزم).. أو الالتزام بحماية المصالح العامة والخاصة وعلي ثقة من استجابة المواطنين والتزامهم بالسلوك الحضاري (تاني؟ عايزين حضاري تاني؟ طب ابعتوا الظباط اللي عايزين تخلصوا منهم، هم مش ح يضربوهم، هم بس ح يعرفوهم غلطهم).. وألا يتركوا المجال لكل من قد يبادر باستثمار الموقف لإثارة الشغب أو تحقيق أهداف خاصة.
(ايوووواااا، موووش عايزين اهداف خاصة، عايزين اهداف عامة: يعيش البحر الاحمر المتوسط)
الراجل مش بس بكلمته، الراجل بموبايله وعدته.... اهم حاجة الاسلوب المتحضر، احنا مش شوية همج بربر امازيغ فرنسيس جيرمان افارقة اقباط شيعة، احنا ناس متحضرة
احنا بمنتهى الاسلوب المتحضر اعلامنا الراقد، الى جانب شتيمة العرب والقطريين والغزاويين والسودانيين اللي الازاز جه في وشهم وهم قاعدين ما عملوش حاجة، شتم اليهود والفرنساويين كمان، والحكاية لو استنت شوية ح نطرطش على الصين واليابان والهند والتبت وجرين لاند وقبائل المايا، كل ده والاعلام الجزائري ما شتمش حد غيرنا احنا بس، والغزاوية طبعا، عادي هم متعودين على كده، احنا اللي عمالين نلوش، وطبعا انا لا سمح الله مش واقفة ضد الهبة الوطنية للدفاع عن كرامة مصر ولا عندي اي موانع شرعية لانها تاخد اقصى مداها، انا بس باقول لكوا اننا بنتكلم ومش سامعين نفسنا بس الناس بتسمع، عشان ما ترجعش بس منى الشاذلي تعيط لنا وتقول لنا: احنا بيحصل فينا كده ليه؟ ايه السر ورا ده كله؟

25 comments:

donya said...

مساء الخير
مش فهماكي يانواره
الموضوع مش كوره
الموضوع حاجه تانيه
المفروض اننا عرب ماينفعش نعمل كده في بعض بس ليه بقي حصل هو ده السؤال
فين القوميه العربيه والمهلبيه اللي اتفلق دمغنا بيها فين الجزيره اللي وجعت دمغنا ساعة الاتوبيس الجزائري
عملت ودن من طين وودن من عجين
انا مرتبكه ومش فهمه حاجه
ايه كم الاغاني الوطنيه دي
في ايه
ليه سجناء
ليه نبعت في ماتش زي ده شوية افنديه اوه لا لا
فين المخابرات اللي بتعرف دبة النمله
فين السفاره المصريه في السودان اللي سمعت ان محيطها اصغر من شبرا
معلش انا مش فاهمه ومتلخبطه حد يفهمني لله

Asmaa mahaba said...

نواره انا جايه اسلم وقولك كل سنه وانتى طيبه وسامحينى لو كان صدر منى اى شىء ضايق
ومتدايقيش على اللى بيحصل ان شاء الله كله خير ربنا يهدى الاحول باذن الله

مواطن مصري said...

نفسي أشوفلك موقف مع حق المصرين



في السودان الموضوع مش كورة الموضوع مؤامرة صهيو جزائرية

ل أيقاع السودان في خصومة و أيضاً لقتل و أهانة المصرين في السودان

هو أنتي مصرية مش كدة؟؟؟؟ المصري الي يسيب حقة يبقى لمؤخذة

تحياتي

Unknown said...

مؤامرة صهيو جزائرية

وحشتني ابداعاتك يا مواطن

Unknown said...

على فكرة انا مش مع تعليق مواطن بس مش معاكى كمان اسلوب جلد الذات و احنا زبالة و ازبل ناس مينفعش خالص

مش عارف انتى مقولتيش اى شىء غلط ضد الجزائرين

الجانبين غلطوا بس انتى مركزة مع المصريين و كأن التانيين عادى يعملوا اللى عاوزينه

بس انا عاذرك لان الإعلام المصرى كمان مش عارف يدير الأزمة صح لدرجة ان على رأى ميدو فى الفيس بوك محمد فؤاد طلع يعيط
و ادهم الكمونى مذيع طلع يقول بنعرف الجزائر من حريمها
!!!!

و قناة الحياة بتذيع اغنية عدى النهار
!!!

Unknown said...

لا معلش يا بدراوي

انا محايدة

انت بس اللي مش مركز وما شفتش غير الكلام اللي اتوجه للمصريين وما شفتش الكلام اللي اتوجه للجزائريين

انت عايزني اقول همج وبربر وامازيغ

وانا مش ح اقول كده

الاتنين غلطانين

الاعلامين الجزائري والمصري، مين الابتدى مش عارفة والظاهر بقى انه مش مهم لان مستوى الانحطاط وصل لاقصاه

والكلام اللي اتقال عن الجزائر في البيض بيضك يجرح اي انسان عنده احساس

واي بني ادم يرضى بالحلقة القذرة اللي معمولة على البيت بيتك يبقى بني ادم قذر وواطي وخنزير

والحقيقة يا بدراوي انا اه غلطت الجزائريين بس انا قريت الشروق ولقيت نبرة هيستيرية وقلة ادب وهبل وكدب

لكن ما شفتش كمية التكبر والغطرسة اللي في الاعلام المصري

قلة الادب قلة ادب
الكدب مالوش رجلين

لكن العنصرية والتكبر والغطرسة دول مرض

بهيج الشرير said...

ده إيه العظمة دي ياأبلتي

لكن ما شفتش كمية التكبر والغطرسة اللي في الاعلام المصري

قلة الادب قلة ادب
الكدب مالوش رجلين

لكن العنصرية والتكبر والغطرسة دول مرض

ده أنا مهما كنت في عز التجلي ماأعرفش أجيبها كده، يابنت الناس شدي الرحال على خالك وولاد خالتك

مواطن مصري said...

طبي يا نوارة مستني بوست واحد يدين الطرف الجزائري

Unknown said...

مواطن
ابقى اسمع تامر امين واسمع كل الكلام الواطي العنصري الحقير المنحط اللي نفسك فيه

البلد كلها بتقول اللي نفسك فيه يا مواطن

مستنيني انا ليه؟

عامل زي اسرائيل اللي مصممة ان العرب تعترف بيهودية دولتها

يعني العالم كله معترف انها دولة يهودية وبيديها فلوس وسلاح والعرب واخدين بالجزمة وبيقطعوا يشرشحوا لبعض
عايزة منهم ايه؟

انت عايز من مدونتي الفقيرة ايه؟
ما كل الناس بتشتم الجزائر مستنيني انا اشتم الجزائر بالذات ليه؟

مواطن مصري said...

مقولتش تشتمي قول تديني تعرضي الفيديوهات هجوم على الشركات المصرية


بس و يبقى فية حيادية في الموضوع

تيجيبي وجهة نظر الجزائر مع وجهة نظر مصر انما متاخديش وجهة نظر الجزائر فقط

Unknown said...

انا واخدة وجهة نظر الجزائر؟

هو انتوا الاتنين عندكوا اي وجهة نظر يا غجر؟

اقول لك

عارف يا مواطن؟
انا عميلة للجزائر

بهيج الشرير said...

والنبي ياأبلتي أنا عندي سؤال، هل ياترى في يوم من الأيام الواد إبن عرس هيبقى زي الممثل يول برينر

lastcrazyboys said...

النــاس طلعــت بتغــش من ورقتك يا استــاذة

http://www.sawt-alahrar.net/online/modules.php?name=News&file=article&sid=12951

حزيــــــــــــــــــن said...

والله انا قرفان من اللى بيحصل حاجة تقرف بجد

وعلاء مبارك هيبقى الريس بسبب مكالمته ... تعالى عندى البرفايل عل ىلافيس وشوفى الناس بتدافع عنه ازاى

انا كتبت رأى على المدونة
لو فاضية ابقى عدى
http://mazaag.blogspot.com/

احمد مهنى

lastcrazyboys said...

معليش يا مواطن ..أنــا أول يومــين كنت متغــاظ جــدا من موقفها ده برضــه

ازاااي مابتشتمش زي التانيين
ليييه ما بتقولش يا ولود كذا ..ويا ولود كذا
ومنييين بتقول انها من الشعيب ..وما بتتكلمش لغة الشيعب

بس بعــدين هديت وقلت..أهو ربنــا ابتــلانــا بــواحــدة عاقــلة هنعمــل ايييه ..نعترض..؟

سيبــها انت للزمــن ..وهتــشوف مصيرها هيكــون ان شاء الله زي كل العاقلين اللي قبل منها ..وبكرة تشـوفوا

Unknown said...

هههههههههههههههه

لاست كريزي بوي

انت عامل دماغ ايه هههههههههههههههه

مواطن زعلان قوي، على ايه مش عارفة

انا نفسي اعرف

لحد اللحظة دي

هو ايه اللي حصل؟ ايه اللي حصل؟ فين التعابين؟

قال لك بعتوا لنا عشرتلاف بلطجي خلصوا على كل السكاكين اللي في السودان

وشوف يا اخي

عشرتلاف بلطجي بسكاكين وسنج ما عرفوش يعملوا اكتر من اصابة 20 واحد اصابات خفيفة وقلعوا البنطلون لفردوس عبد الحميد ووروها اعضاءهم التناسلية ودخلوا الازاز في تي شيرت محمد فؤاد وخلوا محمد العدل يعيط

ايه البلطجية السيس دول؟

وبعدين يرجعوا النهاردة في البيض بيضك يقولوا: احنا ما اتضربناش على فكرة... عشان هم بيقولوا احنا ضربنا المصريين

لا
مش المصريين اللي ينضربوا

امال ايه اللي حصل؟

يعني هم بيقولوا ما انضربناش اهو

امال ايه؟ امال لا امال طبعا

فيه دين ام ايه في دين ام الليلة الوسخة دي بالظبط

ومالها كرامة مصر؟ جرا لها ايه؟

Rateb said...

يا نوارة الكبار انضربوا والكبار دول هما اللى ماسكين الاعلام والتليفزيون وصعبان عليهم نفسهم وحاسين بالاهانه والعوام حاسين ان الجزائرين استفردوا بالناس الفافى وذلوهم ونفسهم يفهموا الجزائريين ان انتم مش كل المصريين ينضربوا انا بقترح حلا للمشكله ننظم ماتشات مصارعة بين مصريين وجزائريين

Unknown said...

لما دوله فيها 80 مليون مصرى وحكومه ورئيس يسلموا الخطاب الأعلامى اللى فى الدول العربيه بيختلط بالخطاب السياسى لأن معروف عندنا أن الأعلام هو صوت الحكومه ومحدش يقولى أعلام مستقل

لما يسلموا صوتنا ل ناس من عينة شوبير ومصطفى عبده ومحمود معروف وخالد الغندور و الأوسخ تامر أمين وخيرى رمضان
يبأه أنتوا دولة معرصين

أيه كمية الوساخه بتاعة تامر أمين وخيرى
لا ومين بيتكلم
يسرا
ياست طب أقفلى صدرك الأول وبعدين اتكلمى عن الشرف والوطنيه وخلافه وربك ستار حليم
واحد وسخ قال على التليفون أحنا بنعرف الجزاير من حريمها
وتامر شيخ المهرجين مقدرش يمسك نفسه من الضحك
حريمها من عينة جميلة بوحريد أرجل من أهلك كلهم اللى معرفوش يربوك
فيه مذيع على الهوا يقطع البرنامج ويقول عايز أخش الحمام ؟
ولما الشباب قدام الجزائر شتموا وحطوا صفاره بدل الصوت أستظرف بروح أهله وبيقول عطل قمر صناعى

مين فتحلهم الشباك ينطوا منه وياخدوا أسم مصر رهينه ؟
مين أدالهم الحق يتكلموا بأسمنا

وأيه حكاية علاء مبارك
داهيه ليكونوا هايلبسهولنا بالراحه كده وسط الزحمه بدل أخوه
ويكون هو ده المخطط
ماهو برضه بالنسبه لجمال هايبأه أخو رئيس الجمهوريه وأهلا" بالعيله كلها فى الرئاسه وكاس وداير وهايجيلى زى ماجه لبابا وجالك
بس تكون الناس هديت عنى شويه

من الحياه لدريم للبيت بيتنا مش بيتك
أنتم ولاد ستين تييييييت
معلش - عطل فى الأنترنت

muhanad said...

فعلا صعب جدا ان حد يقدر يخرج من تحت حملة التعبئة والشحن الحالية التى تقودها كل الالة الاعلامية المرئية والمسموعة والمقروئة

الجزائر اصبحت هى العدو بجد بعد ما كنا بنقولها تريقة وسخرية واستهزاء ( يا سواد الحلل )

يا اخونا فوقوا شوية كرامة علاء وجمال هى اللى انداست المرة دى معاكوا علشان كده بيستنفروكوا

يا اخوانا فلوس علاء وجمال اللى اتاثرت المرة دى علشان كده بيستنفركوا

يا اخوانا صناعة العدو البديل احد اهم الرؤى بعدما فشلوا فى وضع حزب الله فى هذا الاطار لصناعة التحالف والتكاتف الشعبى الذى يصعد على اكتافه جمال لتكملة عملية التوريث الذى يمثل انعدام الشعبية لجيمى اهم معوقاته

يا اخونا الشرطة بقت تنضرب وتسكت قدام السفارة امبارح علشان محتاجينكم جدا ومش عاوزين يزعلوكوا

يا جماعة الموضوع بدا كورة وقلب سياسة واقتصاد وما فيش فيه حاجة اسمها كرامة الشعب ولا كرامة مصر

ــــــــــــ
اعلام مصر هبل واعلام الجزائر عبط ، ما حدش يقدر يختلف على كده

لكن الاتنين ولاد جذمة اقذر من بعض وكل اعلام فيهم تحت سيطرة فاسد هنا وفاسد هناك

اعتقد ما يخرجش من حالة الشحن الشديد دى غير واحد يعيد ترتيب اولاوياته من جديد علشان يعرف ايه الاهم فالمهم

وعلشان الامر يكون واضح وما نكونش بزايد على حد

شتيمة وحدف علاء وجمال ده شىء يسعدنى جدا ومفرحنى ومش هتشحن بسببه

موضوع الكورة والخروج من كاس العالم زيه زى عدمه وواخدين على كده

الجزائر متوحشين عادى عندنا الاكتر منهم توحش فى الحكومة والشرطة ومن الشعب العادى

هما منحازين لفرنسا على حساب عروبتهم عادى احنا منحازين لاسرائيل على حساب نفسنا مش عروبتنا بس ( طبعا الحكومتين مش الشعوب بدليل موضوع قانون اللغة العربية اللى البرلمان هناك واخد فيه قرار من 18 سنة والرئيس مش عاوز ينفذه )
وكمان بصفة شخصية موضوع ضرائب تليكوم الجزائر ده كله فى صالحى لحد دلوقتى بس وما ينفعش يشحنى

ـــــــــــــــــــــــــــــــــــــ

يبقى مش فاضل من اسباب الشحن اللى ممكن تؤثر عليا غير بهدلة الشعب المصرى الحقيقى فى السودان

وده انا متاكد اننا محتاجين ننزع احترامنا جوة مصر الاول من اللى راكبين عليها ووقتها غصب عن الكل هيحترمونا برة مصر

قويدر أوهيب said...

مساء الخير يا أستاذة.
مثل هذا الموقف التمتزن ،العاقل ،و الشجاع في نفس الوقت و الذي أتفق معك فيه خصوصا في شقه المتعلق بالجزائر ..مثل هذا الموقف هو الذي كان دائما يجعلني أقتنع بأن المثقف المصري الحقيقي جدير بأن يكون في طليعة المثقفين العرب..
ــــــــــــــــ
جبهة التهييس الشعبية.تقول
لا معلش يا بدراوي

انا محايدة

انت بس اللي مش مركز وما شفتش غير الكلام اللي اتوجه للمصريين وما شفتش الكلام اللي اتوجه للجزائريين

انت عايزني اقول همج وبربر وامازيغ

وانا مش ح اقول كده

الاتنين غلطانين

الاعلامين الجزائري والمصري، مين الابتدى مش عارفة والظاهر بقى انه مش مهم لان مستوى الانحطاط وصل لاقصاه

والكلام اللي اتقال عن الجزائر في البيض بيضك يجرح اي انسان عنده احساس

واي بني ادم يرضى بالحلقة القذرة اللي معمولة على البيت بيتك يبقى بني ادم قذر وواطي وخنزير

والحقيقة يا بدراوي انا اه غلطت الجزائريين بس انا قريت الشروق ولقيت نبرة هيستيرية وقلة ادب وهبل وكدب

لكن ما شفتش كمية التكبر والغطرسة اللي في الاعلام المصري

قلة الادب قلة ادب
الكدب مالوش رجلين

لكن العنصرية والتكبر والغطرسة دول مرض

قويدر أوهيب said...

مثال آخر عن مثقف مصري صامد في زمن انكشفت فيه عورة أشباه المثقفين
ـــــــــــــــــــــ
النت بتتكلم عربى- الفيل قال:
نوفمبر 18th, 2009 at 18 نوفمبر 2009 1:09 م
الموضوع قومى مش مقتصر على مدونين مكتوب
——–

فى مصر والجزائر ممكن الانسان يقتل انسان ويهدر ادميته ويسلبه حياته بالفقر والمرض وعدم اتاحية العلاج والعمل
عادى
يعنى ان المصرى يقتله مصرى او يهينه او يسلبه مافيهاش حاجة
والجزائرى كلك
وحتى لو الاعداد من الضحايا كبيرة مش مشكلة
المواطن يفقد حياته او كرامته او حقوقه على يد مواطنية
انما لو ده حصل من مصرى لجزائرى او العكس
ولو مرة كل عشرة سنوات
ولو ان اعداد الضحايا قليلة جدا تصل احصائيا الى اقل من العدم وبنسبة اقل من الصفر اذا ماقورنت بحوادث المرور
يبقى نحن لانقبل
والوطنية بتوجعنا
وانا مع حرص المواطن على مواطنية
بس يحتفظ بنفس الغضب تجاه انتهاك حياة وكرامة المواطن فى بلده بنسبة وتناسب حسب اعداد الضحايا
يعنى اغضب بنسبة عشرة اذا ما اهدرت حقوق المواطن فى عشر حالات
واغضب بنسبة مليون ضعف الغضب-اذا ما نتهكتحقوق وانسانية مليون مواطن
واذا اعتبرت ان اهانة مواطن تعتبر اهانة للبلد كلها نظرا لحسابات وطنية شهيصية
فتجاهلنا لمعنى انتهاك كراة وحقوق الملايين وطناشنا على النسبة والتناسب بينها وبين حالة الاهانة الفردية
يعنى شئ مش معقول
ويكشف مدى نفاقنا واننا مع اللعبة السهلة والرائجة والتى تظهرنا بصورة الوطنى الغيور دون استحقاق
ودون عائد منتج واننا نتعامى حين تكون المسالة اصعب ومواجهتها تحتاج لجهد اطول واصعب من مجرد الصراخ لعدة ايام وننسى بعدها

يعنى انا مش قادر افهم ان مواطن او مواطنين
هم خارج خطة بلادهم ف الصحة والتعليم والمشاركة ف السلطة والثروة وحتى فرصة العمل
وزعلان قوى ان مواطن انضرب بطوبة خارج البلاد او حد شتمة او ضايقة

لا ويقول لك دا الستعمار اللى عمل كده
وحياتكم مفيش استعمار اشنع من الدماغ الخربان

قويدر أوهيب said...

تحياتي و احتراماتي لك أيتها الخت الكريمة لك و لكل مثقف مصري أصيل.
توفيق التلمساني الجزائري

زمان الوصل said...

بجد أنا سعيده أوى بالبوست ده
و نفسى نعمل حصر و توثيق لسفالات الإعلاميين و الممثلين و من يدّعون أنّهم مثقفين عشان أكيد هنحتاجه فى يوم ما يحاولوا يدّعوا أنّهم ناس محترمه و لهم كلمه تستحق أن نسمعها

doudou said...

ياااااااالهوي
ياااااااااخرابي
المصريين عاوزين يطردوا السفير الجزائري
معملوهاش مع اسرائيل لما قتلوا الأسرى بوحشية مش مهم خالص ولا لما داسوا علي الجنود المصريين بالدبابات ولا لما قتلوا كام مصري خطأ على الحدود ولا لما طائراتهم اخترقت المجال الجوي المصري
أمااللي بيعملوه في الفلسطينيين فبرضه مش مهم برضه و مجازر غزه
طيب الواحد يتغاظ ويتفقع ويكره الحكومة عادي بس شعب كله يااااااالهوي

Unknown said...

عادى يعنى وفيها ايه انتوا جيتوا هنا وبتتشطروا
وعلشان ايه اصلا علشان كرامة الشعب ماهيا كده كده متهانة ومن زماااااااااااااااان وعلي راى واحد كاتب هنا لما نعرف نجيب كرامتنا جوه بلدنا نبقي نتشطر ونطالب بيها بره بلدنا