Monday 16 November 2009

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

تحديث:
انا شيلت فيديو جريدة الشروخ الجزائرية عشان انا ناوية اقاطع كل من:
الشروق الجزائرية
اليوم الساقع المصرية
الخبر الجزائرية
القاهرة اليوم (عمرو اديب/ احمد موسى) - اوربيت
ومودرن سبورت - مدحت شلبي
الصيع اللي فوق دول عملوا فلوس بالهبل على قفانا، وكانت النتيجة ان الناس ح تموت بعض، وزي ما يكونوا بيستعجلوا النكد
اشاعوا ان جزائريين ماتوا، وامبارح كان فيه اشاعات ان مصري مات في فرنسا على ايد جزائري، وفوق البيعة، اليوم الساقع فرحانة قوي باهتمام معاريف الاسرائيلية وبتنقل عنها ان معاريف بتقول الفريق المصري احسن من الفريق الجزائري! هو من امتى الاسرائيليين بيفهموا في الرياضة؟
المهم انا باناشد اي حد مهتم انه على الاقل اذا مش ح يفضح الناس اللي عملت مليارات باحزاننا وخناقنا ويعمل عليهم حملة على الاقل يقاطعهم
هم عملوا فلوس، واحنا نابنا ايه؟
هيييه، على الله يكون بفايدة، وللا لو مش بفايدة برضه اهو الواحد يبري ذمته قدام ربنا



تحديث:

وكالات الانباء: البي بي سي، رويتزر، الجزيرة، وحتى العربية، مافيش عليها اي خبر بان فيه اي مشجع "اتقتل" في مصر، كل الاخبار عن مشجعين جات لهم ازمة قلبية بسبب الماتش، وطبعا دول شهداء الكفاح الوطني
انا طبعا ما دورتش لا في مصدر جزائري ولا في مصدر مصري لانهم عار فعلا.
يعني لما ناس تعمل فيديو زي ده وتوزعه، وفيه صورة واحد فعلا واقع، ممكن يكون ميت بازمة قلبية. تبقى ايه الناس دي غير انها عار؟
الشروق اتحطت في موقف محرج عشان طلعت كدابة، عشان كده نزلت الفيديو ده
حاجة تانية بقى، اول ما المصريين شافوا الفيديو ده كدبوا على طول، ما استنوش يشوفوا الخبر صح وللا غلط، ما كلفوش نفسهم يعملوا سيرش زي ما انا عملت على وكالات الانباء، وانا بقى باكد لكوا، انه لو كان اللي في الفيديو ده مصري كانوا عملوا مناحة برضه من غير ما يتأكدوا
زي ما هم مصممين كده لحد دلوقت ان الاتوبيس اتكسر من جوة وان الجزائريين عوروا نفسهم وواحد فيهم جاب لنفسه ارتجاج في المخ كنوع من انواع المؤامرة على مصر يعني، مع ان كل وكالات الانباء بتقول ان الالتراس ضربوا اللعيبة

عليه العوض ومنه العوض
منه له... جاي رايح منه له
انا قلت عموما، انا مش حريصة لا على الاخلاق المصرية ولا على الاخلاق الجزائرية



وربنا يخلي لكوا تنظيم الالتراس الاحرار قادة الثورة الكروية الـ...حمرااااااااااااااااااااااااااا
اه
نسيت اوريكوا دي كمان: المخابرات الاسرائيلية: الانظمة الاستبدادية تسهل جدا تجنيد العملاء العرب
ههههههههههه انتوا ح تقولوا لنا؟ طب ما كنتوا تسألونا واحنا نقول لكوا، كانت محتاجة مخابرات دي؟

17 comments:

مواطن مصري said...

الفيديو مش شغال و يا نوارة دافعي عن المصرين الي في الجزاير الي تحت الحصار و مهددين ب القفتل


دافعي عن اهلك الي في الجزاير

Unknown said...

المصريين اللي في الجزائر نزل لهم الجيش الجزائري عشان يحميهم

انا عايزة اعرف اي معلومات عن الواد اللي في الصورة ده

ولا الجزائر ولا مصر ح يقولوا الحقيقة

يمكن الفيفا تقدر تفصل في الموضوع

ماهو احنا محتاجين اجانب ييجوا يحكموا بينا عشان احنا ناس ما عندناش عدالة ولا خايفين من ربنا

Unknown said...

http://www.korabia.com/news.aspx?q=18260-1-0-0

http://www.korabia.com/news.aspx?q=18233-1-0-0

http://www.korabia.com/news.aspx?q=18232-1-0-0

http://www.korabia.com/news.aspx?q=18231-1-0-0

Tota said...

ماحدش بيحمى المصريين فى الجزاير يانوارة ولاحتى السفارة المصرية انا باشتغل فى شركة سياحة ولينا تعاملات مع شركات جزائرية واللى واصلنا من العملا بتوعنا ان المصريين بتحدفوا بالمولوتوف وماحدش بيحميهم ولا بيدافع عنهم غير جيرانهم الناس العاديين وبس
يعنى اللى بيحصل من الجزائريين المتعصبين لا يقل سوءاً عن اللى بيحصل من المتعصبين المصريين ان لم يكن افدح واكثر ايذاء لابرياء مالهمش ذنب
ولمعلوماتك ان الجزائريين اللى كانوا مسافرين من مصر بعد الماتش كسروا صالة السفر وشتموا وتفوا على المصريين وده مش من الاعلام ده من مندوبين الشركة بتاعتنا والشركات التانيه اللى كنا منظمين برامج للجزائريين فى مصر لحضور الماتش وعلى فكرة فى واحد سواق عندنا فى الشركة فلاح غلبان بجد كان بيستقبل زباين للشركة قبل الماتش الولد ده اتشتم واتسب بالأم والاب والميتين والصاحيين من اهله علشان مصرى والولد ده اغلب من الغلب وحتى مالوش فى الكورة واتصل بيا بيعيط بالدموع علشان مارضيش يرد علشان مايبوظش شغل الشركة وعلشان هما برضه ضيوفنا
انا مش عاجنى اللى بيحصل من اوله لآخره وكنت اتمنى المباراه تتلغى وتتحرم المجموعة بتاعتنا كلها من السفر لكاس العالم عقابا للجميع على سوء الآداء من الاربع فرق
بس مش بجد الجزائريين مش مظلومين ابدا ولا يستحقوا تعاطف حضرتك المبالغ فيه..عن معايشة للجنسية دى ( ده مش تعالى بس احنا بتعامل مع جنسيات كتير وبفرق بين زبايننا بالطريقة دى)

شكرا لحضرتك

mido said...

الشخص الذي يكون في حالة إغماء يكون وجهه مندى بالعرق (كما في الفيديو) بتأثير من الجهاز العصبي الباراسمبثاوي

هل رأى أحد من قبل شخصاً ميتاً وعلى وجهه عرق؟؟
هههههههههههه


الجزائريين للفيفا : بيضربني بوشه علي ايدي يا سعادة البيه

=))

مواطن مصري said...

الواد اسمة رضا سيتي 16 من الالتراس

و نزلي لينكات الفيدييوهات بتاعت اعمال الشغب

بتوع الجزائر في فرنسا

عشان يبقى الرأي و الرأي الاخر

مواطن مصري said...

و الله يا tota بنقول زيك من الصبح

المصرين في خطر في الجزاير

مواطن مصري said...

اخر تعليق عندي للجزائرين


بسم الله الرحمن الحريم

يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين

صدقق الله العظيم

Unknown said...

أولا" أنا مش فاهم من المرا اللى بيعيط فى الفيديو ده ولا حاجه

ثانيا" لم تسجل حاله واحده لجثة مشجع جزائرى خرجت من الحدود المصريه

كمان سمعت أن الشروق أعتذرت النهارده

اللى فى خطر فعلا" هما المصريين المتحاصرين فى شركة أوراسكوم والمقاولون العرب وكامب العمال المصريين

الأمن الجزائرى مقدرش على الجزائريين ونزلوا فرق القوات الخاصه

بغض النظر عن أى هبل حصل من مصريين وجزايريين
العمال اللى هناك مالهم ؟

دول بيجروا على أكل عيشهم
يموتوا ليه فى بلد غريبه وبعاد عن أهلهم ؟
علشان الكوره؟

كل المشجعين الجزائريين اللى ماتوا وربنا رزقهم سوء الخاتمه ماتوا فى الجزائر وعددهم كان 5

ولعلمكم مفيش مشجع جزائرى اتضرب فى مصر بعد الماتش لأن فرق مكافحة الأرهاب التابعه لوزارة الداخليه هى اللى تولت تأمين الجماهير واللعيبه مش الأمن المركزى

وكلامك صحيح أن الأنظمه الأستبداديه بتسهل تجنيد عملاء للتجسس
بدليل أن فى ال 20 سنه اللى فاتوا معظم عمليات التجنيد اللى تمت كانت عن طريق الأنترنت
يعنى بكل سهوله ومش محتاجين يبعتوا حد هنا علشان يجندوا الجواسيس
وكمان كان فيه ناس بمنتهى البساطه بتروح السفارات الأسرائيليه برجليها

Kontiki said...

مصريين فى خطر فى الجزاير وجزائريين فى خطر هنا عشان ******** ماتش كورة ؟ الناس دى عقلها فين ولا هو كبت وامراض نفسية معقدة مبنصدق اى خرم ابرة للتنفيس اية العدوانية والشر دة .
والادهى ان كل مواقع الاخبار ملهاش سيرة الا توابع الماتش خلاص المشاكل خلصت ومش فاضل الا الماتش
همجية و اعتداءات
حاجة مستفزة

الزنارى said...

الشروق و منذ البداية و هى فى أزمة
تحياتى
أحمد الزنارى

مدير التحرير said...

الجزائرين شاطرين يعني اليوم مثلاً جايبين على قناة الجزائر برنامج عن حضارة السودان العظيمة
----------------------------

بصراحة أنا شفت قناة الجزائر يوم المباراة و كان كل الكلام أنه اللي ضربوا الباص لا يمثلون مصر و لا شعب مصر و بس

Unknown said...

ياريت توضحى انها الشروق الجزائرية عشان فيه ناس فاكراها الشروق المصرية

أبو أمك said...

أنا على أخويا وابن عمي
أنا بس مع الغريب

إلا يطلع إيه التويتر ده صحيح
تكونش شوكولاتة ؟؟

Unknown said...

ههههههههههههه

التويتر اللي هو ده

http://twitter.com

والنبي تشترك فيه

بص انا دي

http://twitter.com/nawaranegm

wahat_alshohada said...

نوارة انا عايزة منك حاجتين
اولا يعنى ايا الالتراس معلش اصلى ماليش فى الطبيخ :)
كمان عايزة الكل يشارك و يجمع كل وسائل الاعلام و الاعلاميين الزبالة القذرين اللى شاركوا فى توليع الدنيا
كله يتجمع عندك و حطيهملنا فى تدوينة و علينا فضحهم فى العلم كله وبالعربى و الانجليزى وكله
بس عايزينهم كلهم و ياريت بالصور ومش عايزين نترك اى حد جبان منهم

عم مينا said...

من فضلك يا نوارة زودي علي القائمة دي الزفت مصطفي عبده
في حلقة كانت قبل الماتش بإسبوعين أعد ربع ساعة بيشتم في الجزائر بسبب صورة قال انها نشرت في الصحف الجزائرية و أعد يقول كله الا كده و احنا عندنا كرامة و مش عارف ايه..
المهم انه حط الصورة علي الهواء.. عارفة الصورة كانت ايه ؟ أبرعن تابوت و عليه علم مصر و ناس واقفة بيفت مكتوب عليها بالإنجليزي
Constitutional Amendments = Death of Egypt
طبعاً الصورة دي متاخدة في مصر أيام التعديلات الدستورية .. عمرك شفتي جهل أكتر من كده.. و للأسف ان الجهلاء دول بيقدروا يحركوا الناس بكلمتين بيقولوهم في برنامجهم