Monday 9 November 2009

انا البرادعي يا حسني



رد فعل الناس لاحتمالية تفكير البرادعي في امكانية ترشحه لانتخابات الرئاسة في حال ما حد ضمن له ان الانتخابات ممكن تبقى نزيهة
كدهو:
عريييييس يا بووووووووووي... حلو جوي يابووووي

25 comments:

الميكروباص said...

عواه يمسك عشان البلد كلها تقول انا البرادعي يا رشدي؟
مانتي عارفه اننا بلد مسخره ومش هانسيب الراجل في حاله لو مسك وهانفضل نتريق عليه للصبح

رجاء said...

نوارة
ادخلى على موقع الشاعر
عبد الرحمن يوسف
www.arahman.net
وشوفى هو بيقول ايه فى مقاله الأخير
المقال عنوانه البرادعى رئيسا لماذا وكيف
بصراحة كلامه مقنع جدا

أنفاس الصباح said...

فى ناس بتقول انه جاى يشتغل كومبارس
لحسنى

ياعينى عليك يا مصر
بلد بدون رئيس لرئيس بدون بلد
بقول ما يجيبو بوش بدل ما هو قاعد على
القهوة خالى شغل

الشرقوة حدانا بيسلموا عليك يا نوارة

Unknown said...

هو د/البرادعى عايز أيه لما يقول ضمانات مكتوبه بنزاهة الأنتخابات ؟

وبعدين ياترى رسالته ده كانت بس أهانه للنظام ولا بيفكر جديا" لو فيه انتخابات نزيهه-أبقى قابلنى يادكتور- أنه يرشح نفسه ؟

أمبارح الشاعر فاروق جويده قال كلمه وكان وراها حاجه فى نفسه
قال الريس مش هايقرر ترشيح نفسه الا قبل الأنتخابات بفتره محدوده وكررها كذا مره
ده معناه أيه ؟ أن أحنا بهايم بتتساق ؟

أنا مش هافكر أنى أفكر أنى أفكر أنى أرشح حد الا لما أشوف البرنامج الأنتخابى بتاع كل مرشح ماعدا الطفل المعجزه
لو قال هاجبلكم الجنه هنا على الأرض برضه لأ !!!

بس وحياة ابوكم ياشيخ
وحياة عيالكم
ماتكون زى مهزلة المره اللى فاتت اللى حتى ماعرفناش نضحك عليها من بواختها
الطربوش - والسمك والحاجات أياها

الزنارى said...

هو حد يقدر يقول حاجة انتخابات نزيهة و زى الفل فرئيسنا العظيم هو رمز الشفافية

هتشوفوا said...

طب أقري البوست ده وخلي البرادعي يقرأه على الله يفهم, قال نزيهة قال

المهدى said...

أحلى تعليق على ترشيح البرادعى
يا ريت تثبتى كة للأخر ومتعمليش زيهم
محمد المهدى

soreal said...

الصعيدي ضارب جوي اليام دي يا جبهه P:

منظور شامل للحياة السعيده said...

يخرب بيت مطنك

كرررررررررررررررررر

البنته عندينا ملهاشي رأي في مسأليات الدواز

كلام اخوك الكبير يصير يا بهيه

Unknown said...

أنا مش معاك يالورنس
ماتزعلش منى بس كده أنت بتتكلم زى ناس كتير فى الحكومه
انتوا بهاااااااايم بهاااااااااايم
مابتفهموش ياشعب متخلف ياجاهل


ليه هانتمسخر بالراجل
البرادعى اذا جه وده بالطبع مش هايحصل الا لما يكون فيه انتخابات نزيهه وبرضه ابقى قابلنى يابرادعى
ده معناه اننا شفنا البرنامج بتاعه وأنتخبناه وصدقناه وقلناله اتكل على الله وورينا همتك وصلح البلد اللى خربت
طب ليه هانتريق عليه ونتمسخر بيه ؟

عبد الزهراء المصري (علي الحسيني) said...

ياأستاذة نوارة شفافية إيه وأحنا في دولة بيحكمها عطية السعاتي ؟؟؟
أنا شخصياً مش شايف البرادعي كومبارس لحسني ولا حاجة لسبب مهم أوي وهو أنه متردد يعلن ترشحه ولا لأ يعني بالعربي كده الراجل خايف أوي على نفسه زعلى أولاده وشاف قدامه اللي حصل لأيمن نور وأكيد طبعاً هو عارف إن الأنتخابات دي هتبقى شرسة أكتر من إنتخابات الرئاسة 2005 لأن عوكل هيبذل أقصى جهد عنده علشان يورث جمال حتى لو وصلت للضرب تحت الحزام بشكل علني ومفضوح أكتر من القضية الملفقة لدكتور أيمن نور .
ولا أنتي رأيك إيه يانوارة ؟؟؟

Kalimalhus said...

إحنا مش قتلنا البرادعى قصدى موضوع البرادعى يعنى فعصا إمبارح؟؟ .. بتتكلمى على إيه؟ .. و ألا بتتمألسى على الشعب الغلبان اللى بينام من غير عشا و نفسه فى حاجة يحلم بيها بما إنه كده كده ما بيتغطاش.. و ألا ليكى مزاج الناس تقعد تقدح زينات صدقى و يطلقوا العنان لهلوساتهم السياسية و إنتى تقعدى تضحكى عليهم؟

أصل إنتى اليومين دول بقالك حركات شرانية و إحتمال ده من أثر المذاكرة السواريه بتاعتك..

يا شباب البرادعى أكيد و حتما و لابد مش هينجح و لا هيشم ريحة النجاح .. و الإنتخابات هتتزور يعنى هتتزور .. روحوا دوروا عالشعب و قولوله إن كان عايز مصلحته ماحدش هيجبهاله لغاية عنده لازم يتنحرر و يتحرك و ياخد حقه بنفسه و يوم ماالشعب حتى يتمطع كل العالم الرمة دى هتجرى زى الفراخ..

أى كلام تانى هو تهجيص أو أحلام يقظة توجب الغسل..

أبو عمر - الصارم الحاسم said...

معنى كده انكم هتنتخبوا مبارك او ابنه

او هتنتخبوا سعد الدين ابراهيم او ايمن نور

او هتقاطعوا الانتخابات - طبعا افشل فكرة ممكنة

او هتنزلوا-المعارضة اعني- مرشح - بجد مش تهريج...يعني حد قوي ومعروف يقنع اغلب شعبنا اللي هو عامل زي زهور الحائط لا لون ولا طعم ولا ريحة انه يتخلى عن تابو اللي نعرفه احسن من اللي ما نعرفوش وينتخب الجديد

المرة اللي فاتت ايمن نور خسر ونعمان جمعة خسر ...يمكن مش بنفس النسبة المعلنة لكن خسروا فعليا بغض النظر عن الارقام الحقيقية للخسارة

وخاصة ان الاخوان - وهؤلاء الوحيدون اللي ليهم تواجد فعلي في الشارع العادي وكلمتهم يسمعها عوام الناس شكلهم - لا هيرشحوا حد ويمكن ولا هيزكوا حد


اسئلة بجد

overdose said...

عبد الزهراء ازاي معلش؟

أبو عمر - الصارم الحاسم said...

حاسس ان مبارك وابنه هيكسبوا لاننا هنقعد نشكك في بعض ونضرب في بعض ومش هنجتمع على مرشح ولا كلمة واحدة ويبقى ساعتها كسبوا البلد عن جدارة واستحقاق ونبطل صراخ وصويت عن الظلم اللي بيعملوه

يمكن البرادعي مش افضل شخص على الاطلاق ...لكن لا بأس به ايضا وعندي افضل من عمرو موسى لكن مش افضل مثلا من يوسف ندا..وهو لم يؤيد حرب العراق ولم يدين العراق لكنه لم يتخذ موقفا عندما تم تجاهل تقاريره....ولم يدين ايران على الرغم من تطلع ما يسمونه ىبالمجتمع الدولي لاي ادانة ممكنة له

وبعدين لو شغله مش عاجبنا اديه هيسيبه ويتفرغ لبلده

انا بصفتي من "العوام" مش بارجح البرادعي من باب عريس يا بوي....لكن لانه حتى الآن افضل مرشح ممكن فهو يمتاز عن زويل بالخلفية السياسية ..وعن عمرو موسى بانه مش من ابناء النظام مثله ولم يتغلغل في النظام المصري ويمشي في ركابه كعمرو موسى


الراجل ذو خلفية سياسية قوية اكثر بكثير من جمال مبارك اللي كلاب الوطني عمالين يقولوا على البرادعي انه معندوش خلفية....وجمال مبارك بقى هو اللي عنده خلفية اسم الله على عين امه


المطلوب مننا انه مش بس نقدم مرشحين لكن نزكي ونتفق على مرشح واحد فقط قدام مبارك (الاب او الابن) وكام مرشح احتياطي عشان اذا المرشح الاساسي حصلت له حادثة قبل الانتخابات مثلا
:(

فلو البرادعي حصلت له حادثة يبقى زويل..ولو زويل حصلت له حادثة يبقى عمرو موسى...وهكذا

فان استطعنا خلع مبارك والحزب الوطني...هنقدر يبقى عندنا تداول سلطة حقيقي وحرية سياسية حقيقية وان شاء الله ما بعدها سهل

والناس تعبت بما فيه الكفاية وعازة الاحوال تتصلح عشان تشتغل...وهتشتغل ان شاء الله

مقال عبد الرحمن يوسف مهم جدا ايضا

http://www.arahman.net/modules.php?name=News&file=article&sid=401

Anonymous said...

اعتقد انه موش هيرشح نفسه لان مفيش انتخابات نزيهه

بس الناس موش لاقيه قشايه تتعلق بيها

ايه حكايه الصعيدي مع حضرتك

انتي هتغيري الجنسيه ولا ايه وتنضمي لينا :)

Unknown said...

يا ناس يا عالم

هو الراجل لسة اترشح؟
هو حاطط شرط ان الانتخابات تبقى نزيهة

ده بيقول ممكن اترشح لو فيه انتخابات نزيهة

يعني لو كان عندنا فول كنا عملنا لكوا فول بالقوطة لو كان عندنا قوطة

ما عندناش سكر ما عندناش بن ما عندناش غير زيت خروع

مهندس حر فقسني

لما تبقى تفقسني تاني ابقى ابعت لي على البرايفت بلاش الفضايح دي

Unknown said...

ده مقطع من فيلم البحث عن فضيحة
بتاع نبيلة السيد
هي ايه الحكاية

نجم الصعايدة طائش معايا ليه؟ النهاردة من غير ما اكلمه، واحد زميلي من قنا مسكني، والله ما فتحت بقي معاه، لوحده كده قال لي: احنا مظلومين، احنا مضطهدين

قلت له هو انت بقيت مسيحي؟
قال لي انا صعيدي شوفي كام كوبري في القاهرة وكام كوبري في الصعيد
!!!!!!!!!

وقعد يتخانق معايا انا عشان انا من "بتوع بحري اللي واكلين البلد في كرشهم" ويبرق لي وانا عمالة اترعش وابتسم له بنفاق: انا شرقاوية، ده احنا صعايدة بحري يا باشا، والنبي ما تزعل نفسك
على فكرة ده ذنب المنايفة

اي والله، ربنا بينتقم مني عشان نصرت الصعايدة على المنايفة وعذبت المنايفة

واحد منوفي كشف راسه ودعا: روحي يا شيخة، ربنا يسلط عليكي صعيدي ياكل ودانك

المهدى said...

يعنى طلعت هلوسة منك .... طب لو بجد ؟
نتكلم جد بقى :
1- ممكن كلنا نتفق على فشل النظام وفساده وأنه ممكن يكون منتظر لأخر لحظة ليعلن المفاجأة الكبرى وهى أن جمال مبارك هو المرشح أو حتى أن مبارك سيبقى حتى أخر نفس وكل ده هجص وبالونات أختبار سأمنا منها
2- هل العالم الذى يعتبر مصر دولة هامة ومحورية سيستمر كثيرا يراقب كل هذا العبث ؟ أشك جدا
3- هل القوى الدولية ومصالح البزنس الدولية أيضا بعد أن راهنت سنين على أن الواد ممكن يجيله يوم ويتبلع ممكن ينتظروا (مثلنا ) أمر الله النافذ خلال ست سنوات جديدة ( لأخر نفس ) ولتكن مصر وقتها على زمة شيخ وألا جنرال وألا زعيم شعبى ؟
4- الأخ البرادعى ؟ هل من الممكن أن يطلق هذه التصريحات ( التى قد تجاب أنشاله 1% )إلا إذا كان هناك داخل وخارج مصر من يقول له وبالفم المليان نحن من ورائك مساندين
بلاش أنت يا أستاذة نوارة ممكن تتقدمى للترشيح فى بلدك الشرقية التى لم تعيشى فيها إلا لو درستى خريطة البلد جيدا و كان هناك من يشرح لك كيف بيت أبو فلان ضديات بيت أبو علان وناويين يقفوا معاك على طول الخط نكاية فى أبن أبو علان ؟
والله الموضوع جد وجديد وأدينا عايشين فى البلد سنين وشوفنا كل بلاويها هل شفنا فى يوم ما يحدث الأن وقبل موعد الأنتخابات بسنتين ( الأنتخابات اللى فاتت أتحضرت فى 19 يوم )
فيه تحركات مريبة ولو انت بتهزرى والمهندس قتل الموضوع بحثا فلتفسروا لى موضوع المخرج الآمن وكيف يصدر على لسان شخصية مثل عماد أديب مرة وأثنين وثلاثة وبكل الوسائل الأعلامية ويمر دون حتى حملة شتيمة ؟
أو يبقى الموضوع لسة صاحى ومحتاج لسة جوز أقلام
محمد المهدى

المهدى said...

يا باشمهندس حر
الشعب طبعا هو اللى لازم يتحرك وياخد حقه بأيده دى لأن مفيش حد حيديهولوا وده غاية المراد من رب العباد ولكن مش دايما بتمشى بالشكل ده وتاريخنا بقول كدة ممكن التغيير يتم لأن فيه قوة زاحت قوة أضعف وممكن تتلاقى مصالح دولية وممكن تشيخ دول وتسقط ومكن تتحالف أنجلترا مع الخلافة لتسقط نابليون وينفد بدا كله محمد على ثم تتحالف الخلافة مع أنجلترا مع بروسيا مع روسيا وتطنش فرنسا ليسقط محمد على
فيه ترتيبات أكبر من شبح واد عايز يورث أبوه تنتهى بأيه الله أعلم أنما دورنا أيه ده اللى لازم نعرفه
مش معاك أنه مش حيترشح ولو أترشح مش حينجح بالعكس مادام نطقها فلا سبيل للتراجع إلا يبقى معتوه سياسى ولو تم تغيير الدستور فى قعدة كالمعتاد ( بعد المخرج الآمن ) حينجح
طب لو نجح وهو ممثل لنفس المصالح اللى كاتمة على نفس الغلابة من سنين أيه العمل
محمد المهدى

عبد الزهراء المصري (علي الحسيني) said...

بصي يانوارة أنا سمعت والله أعلم أن فيه ناس طلب من الإتحاد الأورمبي بالإشرافي على الإنتخابات البرلمانية أو الرئاسية أو الأتنين معاً - مش فاكر والله بالضبط - المهم يعني أنا شخصياً أبصم لك بالعشرة أن النظام ده عامل زي العاهرة اللي عايزة تخفي عن الناس قلة أدبها فلو حصل فعلاً الأشراف ده ع الإنتخابات فمش هتتزور بشكل كبيييير لكن بعدها لو عوكل أو ابنه نجحوا في الإنتخابات دي هبطل أهاجم في النظام لأنه معنى كده العيب مش في عوكل فقط لكن فيكوا أنتوا ياشعب لأنكم بتموتوا في اللي يذلكم ويبهدلكم ويطلع عينيكم .
على فكرة أنا شخصياً أتمنى البرادعي يرشح نفسه لكن مش هيحصل لان النظام مش هيقبل بإشرافي أوربي ولو قبل فهيقبل بمراقبة محدودة فقط وده مخالف للشرط اللي أعلنه البرادعي .

مش فاهمه said...

طيب بجد و من غير ما نتكلم عن البرادعى ولا موسى ولا زويل قال زويل قال بجد يا جماعه طلعتو بطاقات انتخابيه ولا لسه على الأقل نبقى مستعدين

محمد فوزي said...

رؤيتي المتواضعه بتقول إنه عشان نستنى مرشح نكون معجبين بكل الصفات اللي فيه ومعندناش أي ملحوظه عليه ويكون محل إتفاق الجميع فده ترف لا تتحمله ظروفنا الحاليه
وعلى رأي الشاعر من يرفض العَشر يقبل بعدها سبعِِ
يعني المفروض أي مرشح تتوفر فيه بعض الصفات الأساسيه ويحوذ بعض القبول ممكن القوى المعارضه تقف وراه وتدعمه وتحشد له التأييد الشعبي وأعتقد إن الوقت لسه بدري وده ممكن يحصل , وقناعتي بتقول إن التأييد الشعبي لما بيوصل لمرحله كبيره بيكون عائق صعب جدا قدام التزوير وخلافه
مش ضروري البرادعي تحديدا لكن بما إنه هو الوحيد اللي أظهر نية الترشح يبقى ليه لأ ؟
خصوصا إنه موضوع إنه عايش بره ومش عارف مصر ده حجه عبيطه قوي من وجهة نظري

ولا نسكت ونقبل بعدها السبعه ولا إيه ؟

Unknown said...

لا انا مش ضد ترشح البرادعي

ولا ضد ان الناس تحاول تستخدمه، بسبب ثقله الدولي، انه يسعى ان الانتخابات يبقى عليها مراقبة دولية وتبقى نزيهة

انا بس مش عايزة الانفعال بتاع ماتش مصر والجزائر ده

مش كل حاجة ناخدها على صدرنا كده

نهدا شوية

احنا صعبانين عليا قوي على فكرة

المهدى said...

طيب ياستى ولو أتعدله الدستور فجأة وأترشح فجأة وأختفى الوريث فجأة وتم الأحتفاء به فجأة ثم تم أستغلال شوق الشعب الطوييييل لريحة الديموقراطية كل ده ولسة معرفناش مين هو حتعملى أيه ؟ دحنا مش حنلحق حتى ناخد الموضوع على صدرنا
تذكرى سرعة تعديل المادة67 أرجوك فكرى معايا دا أنت من أكثر المؤمنين بنظرية المؤامرة أيه سبب هدوئك وروقان بالك المرة دى ؟
طيب كل ده طيبعى ؟
محمد المهدى