Saturday 7 November 2009

فهل عسيتم إن توليتم أن تفسدوا في الأرض وتقطعوا أرحامكم


عمرو بيقول: ما تستهونوش بالسعودية دي ح تبقى قوة عسكرية في ظرف خمس سنين
مش ح يحصل، والله ما ح يحصل، مدام استفتاحهم لبن كده، مشششش ح يحصل انهم يبقوا قوة عسكرية مدام اول طيارة تستخدم قتلت فلاحين يمنين، لا هم حوثيين ولا هم علي عبد الله صالحيين
ناس بريئة، واللي يدخل بين فئات متخاصمة من المؤمنين يعمل بأمر الله ويصلح بينهم، لا يديهم سلاح، ولا يقتل لهم اهالي، نسوان وعيال، عشان ينتقم منهم
واللي عنده كرامة وخايف على سيادته اولى به يطرد القوات الاجنبية اللي قاعدة في جزيرة الرسول تزني وتسكر وتقتل الابرياء وتحتل بلاد فتحها صحابة انطلقوا من النفس الارض اللي قاعد عليها الامريكان يموتوا الناس
علي عبد الله صالح موقفه زي البشير، والحوثيين موقفهم زي المتمردين في دارفور
ليه بقى مصر ما تدخلش هي كمان تضرب بالطيران عشان تساعد البشير؟ لو واحد فيكوا يرضى على بلده انها تعمل الجريمة دي يبقى يرضى على غيره انهم يعملوا كده
طب ما المتمردين بياخدوا سلاح من الدول الافريقية المجاورة ماحدش اتكلم في الموضوع ده
لو علي عبد الله صالح هو الرئيس يبقى حد يكلمه هو مسئول يصلح ذات البين ويحمي المواطنين ويحفظ امن بلده او يتنحى
لو الحوثيين بيهتفوا: الموت لامريكا الموت لاسرائيل، وبيدعوا انهم بيخافوا ربنا
يخافوا ربنا ويحقنوا الدماء دي بلدهم، دول اهلهم اللي بيموتوا، ولو علي عبد الله صالح خاين وعميل لامريكا واسرائيل زي ماهم بيقولوا، يبقى هم مسئولين ومطالبين اكتر منه، كل واحد يطلب منه على قدر تقواه، واذا كانوا هم اتقى يبقى هم عليهم مسئولية اكبر
ووالله العظيم، والله العظيم، والله العظيم كمان مرة يمين احاسب عليه، اذا السعودية ما سكتتش دلوقت حالا وبطلت اللي هي بتعمله ده، لربنا ح يعذبهم عذاب لعشرات سنين، ودولتهم ح تزول، وربنا ح يكتب عليهم الذلة والمسكنة وح يقصمهم ويكسرهم
زي ما عمل فينا بالظبط
لان ده جزاء الناس اللي بيقتلوا أنفسهم ويخرجوا فريقا منهم من ديارهم ويتظاهروا عليهم بالإثم والعدوان
انا مش ح اسكت عشان ربنا ما يعذبنيش، واللي ياخد طرف في الجريمة دي يبقى بيجني على المساكين اللي مالهمش لا في دول ولا في دول وبيدفعوا تمن مالهمش ذنب فيه، الاطراف كلها لازم تسكت حالا دلوقت
والسعودية اللي فرحانة بطيرانها وسكرت بمالها واتغرت بدعم امريكا لها تفتكر:
( ( فهل عسيتم إن توليتم أن تفسدوا في الأرض وتقطعوا أرحامكم ( 22 ) أولئك الذين لعنهم الله فأصمهم وأعمى أبصارهم ( 23 ) أفلا يتدبرون القرآن أم على قلوب أقفالها ( 24 ) إن الذين ارتدوا على أدبارهم من بعد ما تبين لهم الهدى الشيطان سول لهم وأملى لهم ( 25 ) )
واذا كانت ايران بتدي الحوثيين سلاح طلعوا الدليل بس يكون دليل تاني غير السفن المضروبة دي، ولما تتوصلوا الى الدليل كلموهم وادعوهم لكلمة سواء ويتعهدوا ويحلفوا على المصحف انهم ما يشاركوش في الجريمة دي
لكن لحد دلوقت، بحق ربنا، ايران مافيش عليها غير شتايم واتهامات، واللي بيضرب هو الطيران السعودي
يعني هي ايران ما عندهاش طيران يعني؟ ما شفناهوش ليه؟ وللا هو ده المقصود؟ ان ايران تدخل في حرب مع السعودية؟ اه، ماهم جربوا اسرائيل هي اللي تضرب جات اتوحلت في جولدستون، جربوا يخلقوا مشكلة ما باكستان بالتفجيرات جات ايران عملت عبيطة، بيجربوا يجروا شكلها من ناحية السعودية؟
طب اما نشوف، لو ايران فعلا بتدي فلوس للحوثيين مش ح تسكت على ضرب قراهم بالطيران وح تدخل هي كمان بطيارنها
لو ما دخلتش يبقى قدام العالم ماحدش يبوء باثم قطع الارحام غير السعودية والسرائر لا يعلمها الا الله بقى، احنا لينا الظاهر
اتقوا الله، ده العز اللي انتوا فيه ده رزق ربنا طلع لكوا من الارض من غير تعب، والطيران ده جايبينه برزق ربنا من غير تعب، وعيشتكوا كلها دعة وراحة من غير ما تسعوا، رزق وواقع في حجركوا من غير سعي خالص
خافوا ربنا ده امتحان، ربنا ما عملش كده عشان انتوا شعبه المختار، ده امتحان، ده امتحان، عمالين تسقطوا ليه؟
ما تعبتوش في حاجة وربنا سايبكوا على كل الفجر والظلم ده عشان بتخدموا بيته، لكن الا تقطيع الارحام، اليمن؟ اليمن؟ هي اليمن ايه والجزيرة العربية ايه؟ كام يمني في السعودية وكام قرشي في اليمن؟

48 comments:

مواطن مصري said...

يا نوارة الاول عاوزة الحوثين يحتلو مناطق في السعودية و السعودين يقعدو يتفرجو


دول مش غلابببببببببببببببببببة


الي يعمل كدة و يقتل جنود سعودين ع الحدود مش غلابة

من حق السعودية و من حق اي دولة مكان السعودية

تتصرف باي طريقة لحماية حدودها من الارهابين

يا نوارة دي حرب ب الوكالة


الحوثين بيحاربو باسم ايران


يا نوارة راجعي موقفك من ايران

الميكروباص said...

يا نوارة السعوديه لم تخطيء
السعوديه تضرب المتسللين إلى أراضيها وهذا ليس عيب ولا حرام
هل المطلوب منها أن تترك حدودها على البحري لأي أحد يفعل فيها ما يشاء؟
يعني هي عندما تدافع عن حدودها نهاجمها؟
ما هو المطلوب منها؟
ان تترك الحوثيين يعبثوا بأراضيهم حتى تكون المملكه طيبه وشقيقه للأخوه العرب؟
الحوثيين حدث منهم الخطأ وعن عمد بواسطة من يقوم بتسليطهم في ايران التي تريد تدمير أي بلد عربي في طريقها وتضع السعوديه على رأس المهتمين بهذا الأمر
لا داعي للهجوم على السعوديه فهي تدافع عن نفسها
وإن كانت السعوديه تقتل فلاحين كما تقولين - من الذي قام بقتل فرد الامن السعودي على الحدود؟
هل هم فلاحين أيضا؟
ارجو الانصاف في الحديث عن القضيه
وعلى كل حال تم أسر 155 فردا من الحوثيين
وسيظهر إن كانوانساء وفلاحين أم متمردي الحوثيين الذين يقاتلون ضد علي عبد الله صالح

Asmaa mahaba said...

مين دول اللى حيبقوا قوه عسكريه تعالى شوفى العقول هنا شكلها ايه
وانتى تعرفى ان ولا بعد 20 سنه
عارفه امتى تبقى قوه عسكريه اما تخلى مصر ولا الهند تصدرلهم جيش ان شاء الله:)
واراهنك ان اللى كان سايق الطيارات ميه فى الميه واحد مش سعودى

Dr Nemo said...

عارفه اجدع حاجه فى مقالاتك او تدويناتك دى ايه يانواره ؟؟ بجد بجد انك "بتشخصنى " الدول
ايوه بصراحه
لان التعاملات الدوليه مهما حاول السياسيون تعقيدها واعطائها مصطلحاتها الملولبة دى
الا انها فى الاخر اشبه ما تكون علاقات بين اشخاص لهم عقد ومزايا وعيوب واخلاق منها الندل بس قلبه طيب والغلبان بس خبيث واللى عادل بس عصبى
بكم التناقض دا بتعيش دول
اجدع حاجه انك بتبسطى الامر وبتنورينا بسهولة كده
دا عموما
بالنسبة بقا للموضوع العويص الخبيث دهليزى المجرى ده
احب اقولك ان الرسول كان بيحب اليمن اوى اوى
لدرجة انه لما اشار بتجاها قال فى معناه او حتى بلفظه لا اتذكر " الايمان يمنى " او فى حديث اخر اشار اليها وقال " الايمان ها هنا" اى فى اليمن
على عكس لما اشار للعراق وبلاد الفرس وقال الفتنه ها هنا
فالسعوديه بصراحه وزى ما انتى جبتى من الاخر
طالما دكوره كده يطلعوا الامريكان من بلدهم الاول احسن ما هما زعلانين من شوية مقاتلين غلابه اخرهم الجبال والزخنقه فيها
....................
بالحق ربنا يستر فى حج السنادى لان فيه لبش كتير الحجاج الايرانين ناويين يعملوه
شكل اللى حصل فى تسعه وتمانين هيتكرر تانى
على اوسخ
انا ابويا وامى رايحين يحجوا
ربنا يستر عليهم

Kalimalhus said...

بصراحة أنا ما بفهمش فى حكاية دول ولايا و اللى ييجى عليهم ما يكسبش و الحاجات دى لأنها ما ينفعش الواحد يتناقش فيها بشكل عقلانى أصلا..

السعودية ليها مصلحة و داخلة تقضى مصلحتها و على عبدالله صالح له مصلحة و لقى السعوديين مستعدين يساعدوا فيها فرحب و الحوثيين ليهم مصالح بس الدنيا غمقت معاهم .. و مش بعيد أبدا إن الإيرانيين يكون ليهم دخل فى القصة فعلا .. زى ما ليهم دخل فى العراق و فى أفغانستان .. عادى يعنى..

و بعدين تنزيل الأحكام الشرعية على الوضع ده غير جائز لأن الأطراف مش مختلفة و بتحارب لمقاصد شرعية أصلا فدول جنابك لا ينطبق عليهم قوله تعالى و إن طائفتان من المؤمنين ... إلخ .. همه فين دول المؤمنين ..؟

Unknown said...

طبعا اول اتنين مرضى بالتعصب
ومريض التعصب ده مالوش علاج تجيلي من عند ربنا يا يهديه يا ياخده

سومة
بياخدوا اسلحة كتير من امريكا يا سومة
وبيقضوا مصالح امريكا بالكام طيارة اللي ان شاء الله ربنا ح يولع فيها بيهم

نيمو

انا عارفة ان الرسول بيحب اليمن
بس هم الطرفين الظاهر اتجننوا
دي مش اول حرب اهلية
هم مالهم بيتحاربوا كتير كده
علي عبد الله صالح لو خاين يا ينشوا شخصه يا يناضلوا بشكل مدني مش عارفة ليه بيحاربوا


مهندس حر
يعني اعتبرت ان قدرة ربنا كلام مش عقلاني وفصلت المصلحة لوحدها وكمان كفرت الناس وقلت عليهم مش مؤمنين وافتيت بان الاحكام الشرعية ما تتطبقش

والمفروض ان ده الكلام العقلاني بقى

هههههههههههههههه

Unknown said...

بس كلمة بس للاخ لورنس العرب اللي مافيش في دماغه غير الشيعة واكلينها له

السعودية ما كانتش غرة غريرة بريئة عذراء الربيع قاعدة في امان الله وفوجئت بالحوثيين اللي بياكلوا العيال بيتحرشوا بيها

السعودية كانت بتفتح حدودها للجيش اليمني يتسلل منها ويلف عشان يهاجم الحوثيين من الخلف

مالها السعودية بحاجة زي دي؟ تفتح حدودها ليه وتعدي جيش ليه وتسمح لهم يهاجموا من الخلف ليه؟

وعلى اثر التصرفات دي الحوثيين ضربوا من الناحية اللي بينضربوا منها

يعني مش بس بتساعد في حرب اهلية وبتساعد على الغدر كمان

وربنا ح يخرب بيتهم

وعلى فكرة للاخوة هنا جمعاء

ربنا موجود، وما يرضاش بالظلم، وبيقتص
واقتص مننا قبل كده
ومافيش اوحش من ان الواحد يقتل اهله
انا ما باصدقش في قرآن مكتوب على رجل عيل
انا باصدق في محتوى القرآن نفسه والقرآن بيحذر من الحرب الاهلية وبيقول ان عقوبتها الذلة والمسكنة

ومافيش ناس اقتتلوا ما بين بعض وفلحوا ابدا
ومافيش حد ساعد على ان الاخ يقتل اخوه وربنا سابه ابدا

Kalimalhus said...

إنتى بتلبسينى حاجة من إتنين يا تهمة يا قميص أكتاف!!؟؟

أنا إتكلمت عن قدرة ربنا؟ يا مفترية .. أنا قلت إن الحاجات دى لا تناقش بالعقل يعنى مش موضوع لأخد و رد و خلاص كده..

ثانيا أنا ماكفرتهمش .. أنا قلت الخلاف بينهم مش على مقاصد شرعية و لكن على مصالح دنيوية و بعدين لو عايزة فتوى شرعية ألبسلك العمامة و أقولك إن الحوثيين خرجوا على ولى الأمر و يحل له قتالهم بينما لا يحل لهم قتاله و بالتالى برضه لا تنطبق عليهم آية الإصلاح و إنما يتم دعوتهم إلى ترك الشقاق دون شرط منهم و يمهلوا فإن أذعنوا فبها و إلا يحل قتالهم ..

دى فتوى أزهرية ما تخرش المية و ماتخرجش غير للحبايب و متهيألى شيوخ السعودية هيؤيدوها تمام التأييد..

أما كلامى اللى ماعجبكيش عن المصالح فده كلام الناس المتورطين فى الموضوع و دى حقيقتهم و لو فيهم جهة واحدة تبتغى وجه الله مخلصة النية إبقى تفى على قبرى و جيبى إصحابك يعملوا حفلة تف جماعى..

AhmedEzzat said...

سبـحااااان الله !! نفس الاشخاص اللي كانو بيشتمو في السعوديه و كانو مديين احساس ان السعوديين مجموعه من اكلي لحم البشر ! هما نفسهم دلوقتي برضه اللي بيقولو السعوديه عندها حق !! مقدرش اقول غير سبحان الله !!

اسد الجيزة said...

الي بيحصل دا ياستاذه فتنه فتنه زرعها ملالي ايران وعملاء امريكا واليمن والسعوديه انجروا ليها والي بيدفع تمن الفتنة ديه الناس الغلابه الي لا ليهم في الحرب ناقه ولا جمل

مدير التحرير said...

انتي عارفة انه امن الاوطان لا يبدأ عند حدودها و إنما في الاراضي المجاورة ، بعدين الحوثين قام بقتل حرس الحدود السعودي ، يتركوهم يعني و غير قصفهم لمستشفى سعودي و قتل 7 ممرضات

الميكروباص said...

الحوثيين شيعه- ويريدون الانفصال عن اليمن، يا ترى من الذي يؤيدهم في الانفصال؟ مصر مثلا؟
من في مصلحته أن يكون هناك شيعة في كل البلاد ويتبعون ذو العمه السوداء في ايران؟
لماذا تظهري ايران في مظهر المسكين المغلوب على أمره ؟
انتي تعترضين على وجود الجيش الامريكي على الاراضي الخليجيه ومعك الحق
لكن الله يدفع الظالمين بالظالمين
لولا وجود امريكا لأكلت ايران الخليج
ومن كان يقف امامهم هو صدام حسين
وإلى الآن هم يطلقون على الخليج أنه فارسي وليس عربي
يعني هم ليسوا مساكين ومفترى عليهم كما تقولين
ليس من الطبيعي او المنطقي ان يكون هناك مصر والسعوديه والبحرين -التي ادعوا سابقا انها احدى محافظات ايران- والعراق -التي ساعدوا المخابرات الامريكية في احتلالها- والمغرب وما حدث بهم جميعا من محاولات عبث ايرانيه ثم يكون كل هؤلاء كذابين وايران وحدها هي الصادقه
أمس قتل الجندي تركي القحطاني وتم احراق 6 سيارات
لا يعقل ابدا ان يقوم بهذا العمل نساء وأطفال
اما أن تفتح السعودية الحدود لتطويق الحوثيين فهذا لم يحدث
والحرب مستمرة بين الطرفان من فتره طويله
وإن كانت السعوديه تريد شيء مثل هذا لفعلت من فتره
وإلا بما تفسري أن تفتح السعوديه الحدود لتطويق الحوثيين ثم يهجم الحوثيين على الحدود السعوديه؟
كيف يحدث شيء مثل هذا؟
هذا ضد المنطق

المهدى said...

والله كل كلامك مظبوط إلا موضوع إن ربنا أقتص مننا عشان موقفنا فى اليمن فده هو الغريب اليمنيين نفسهم لا يملكون هذا اليقين بل كانوا ومازالوا منقسمين لكن الأكيد أن اليمن ورغم كل ما بها الأن تقدمت أكثر من 300 سنة عن حكم الأمام ( ده تعبير محسن العينى رئيس وزراء اليمن الأسبق والذى عانى من أطهاد المصريين على أعتبار أنه محسوب بالكذب على البعثيين ) يا نوارة كان هناك ظالم آخر على أعتبار أننا كنا الظالم الأول هو نفس الحكم السعودى الحالى وكانت له أجندة عميلة كما هى الأن وكان للغرابة متحالف مع الأمام الشيعى وصديق حميم للشاه الشيعى أيضا وعلى الرغم من كل ذلك فقد حاولنا الخروج من اليمن بشكل مشرف منذ العام 65 ولكن كان المطلوب أن لا نخرج وحتى بعد النكسة وحين تركنا الأمر لليمنيين قامت الجمهورية ولم تعد الأمامة
يا نوارة يجب أن نميز دائما بين أخطاء الوطننيين وخطايا العملاء
مش يمكن ده اللى ربنا بيحاسبنا عليه لغاية دلوقت أننا ساوينا بين من كان يبنى ويخطئ أحيانا ومن كانوا يتعمدون الهدم طوال الوقت
بالمناسبة أحتاج رايك جدا فى موضوع أمبارح
محمد المهدى

مهندس مصري بيحب مصر said...

بصي يا نوارة
حأقول لك اللي في نفسي و ما تتعصبيش عليا
حكاية بيفتحوا لهم الحدود يلفوا دي كذبة من الحوثيين ليس عليها أي دليل

و بالنسبة للمدنيين فأنا أعرف إن 5 مدنيين سعوديين ماتوا بقذيفة أر بي جي من الحوثيين ضربت سيارتهم فقتلت رجل سعودي و زوجتيه و إبنتيه

الحوثيين هما اللي إخترقوا الحدود السعودية و قتلوا 1 من حرس الحدود السعودي و أصابوا بقية دوريته في حركة غدر ملهاش مثيل

و المفروض أي دولة ذات سيادة تدافع عن حدودها ضد اي إعتداء مسلح عليها
و يبقى كده السعودية ما غلطتش

حتة بقى يروح يطلعوا الأمريكان فدي ردها بسيط جداً
و هو إن الأمريكان قاعدين بمزاجهم
و معزومين من صحاب البيت
و ما قتلوش حد من الجيش السعودي
يبقى ما تشبهيش ده بده

ثم السعودية بتضرب المتسللين داخل حدودها و لم تجتاز خط الحدود اليمنية السعودية
يبقى هي في حالة دفاع شرعي عن النفس

السعودية بتدعم علي عبد الله صالح بفلوس و بس
لكن لا بتعدي الجيش و لا بتديه سلاح حتى

ده اللي أنا عارفه من مصادر كتير قوي
و من اليمنيين اللي أعرفهم هنا

Unknown said...

مهندس حر
انا اعترضت ان المسألة مسألة مصالح؟ امال الناس بتضل من ايه؟ من المصالح
ولو اتمسكوا بالمبادئ مش ح يضلوا

ماهي مصالح طبعا، امال بيموتوا بعض ليه؟ السعودية دي اللي عايشة حياتها تاكل في قتة محلولة وتقول لده كافر وده مسلم، ايه اللي ح ينحررهم ويقومهم من النوم ويخليهم يضربوا قرى بالطيران؟ ماهو عشان مصالح

هم آل سعود ح يقعدوا ثانية على كراسيهم من غير مساندة امريكا؟ بس ده ما ينفيش ان ربنا ح ينتقم منهم


احمد عزت

شفت؟ شفت يا اخويا؟
ويرضوا على الناس اللي ما يرضهوش على نفسهم

طب اشمعنى مصر مش بتتدخل في دارفور يعني؟ ولو احنا بعتنا طيران لدارفور ح يبقى موقفهم ايه؟


اسد الجزيرة
والنبي تقعد

معلش رد على كل الناس اللي بتبرر قتل اهالي القرى من غير ما يخافوا ربنا من كلامهم ده

انا باسأل سؤال واحد

ماحدش فيكوا اتكلم عن الامن والسيادة وفيه قوات امريكية ليه؟

والا اللي بيتكلم عن الامن اللي بيبدأ من الدول المجاورة ده راخر

طب انت حدودك يا معلم بتنضرب كل شوية وحرس حدودك بيموتوا كل شوية واحنا بنعمل عبط
تعرف تتليس بقى؟

ولورنس العرب ده
انت سلفي، وساداتي، وتلاقيك منوفي كمان
يا عم انت بتفهم؟ باقول لك علي عبد الله صالح شيعي هو كمان
والسعودية بتكفر الشيعة
يعني لا ليها في دول ولا في دول
الاتنين شيعة، هي ايه اللي حشرها؟ هي مالها ينفصلوا وللا يقطعوا بعض يشيلوا هم ذنب بلدهم اللي بيقطعوها دي

مهندس
انت عرفت منين انها كدبة؟ كلهم بيكدبوا دلوقت حاليا
كلهم، وماحدش بيموت غير اهالي القرى
انا عايزة اعرف يعني الطيران ده موت مين غير اهالي القرى؟

وانا باسألكوا كلكوا
ترضوها على بلدكوا؟ ترضوا ان مصر تدخل في دارفور وفجأة نلاقي نفسنا الجيش بتاعنا بيقتل سودانيين؟ ده الجيش بتاعنا لما راح اليمن رجع عندهم صدمات عصبية

مش ممكن التعصب يعمي الناس كده
دول لو يهود ما يستاهلوش يتقتلوا بالطريقة دي
هو مين بيعاني غير اهالي القرى
يعني السعودية مش مكتفية بانهم بيموتوا بعض داخلة في الزفة؟
انتوا مش خايفين من ربنا؟

Unknown said...

محمد مهدي

ايه الفرق ما بين اللي عملته امريكا في العراق واللي عملناه احنا في اليمن؟ سؤال بس لو سمحت يعني ياريت تشرح لي؟ احنا كان مالنا نتدخل ونغير نظام في بلد تانية

مواطن مصري said...

اتفق مع لورانس العرب و مهندس مصري

و بكتب موضوع عن دة

مواطن مصري said...

نسيت اقولك ان مذهب الي علية علي عبد الله صالح بيختلف مع مذهب ايران في الشيعة الي هي الاثنا عشرية

انا قريت المعلومة دي في موقع

مدير التحرير said...

و حد قلك انه راضي عن ضرب الجنود المصرين على الحدود
بس اذا السعودين مسكتوش عن ضرب جندوهم بيقوا غلطانين...؟؟؟

مهندس مصري بيحب مصر said...

آه يا نوارة
لو متمردين دارفور دخلوا و قتلوا ناس من حرس الحدود المصري و إحتلوا حتة من ارض مصر فأنا أوافق على ضرب المحتلين في الحتة اللي محتلينها لحد ما يخرجوا من ارض مصر و يرجعوا مطرح ما جم
و لا اوافق على تتبعهم عبر الحدود و لا ضرب قواعدهم خارج حدود مصر

و ده اللي بتعمله السعودية
السعودية بتضرب في أرضها مش في أرض اليمن
السعودية بتقصف مقاتلين معاديين محتلين حتة من ارضها
السعودية ما قصفتش القرى اليمنية و ما أصابتش أي مدني يمني
و إن كان مدنيين كتير مطحونين بين الجيش اليمني و الحوثيين
بس السعودية ما ضربتش و لا قرية يمنية

عارف بحكم إني في السعودية و ليا ناس في جازان و بأعرف منهم الاخبار

السعودية مش هدفها تبيد الحوثيين
لأ كل هدفها تطهر ارضها من المتسللين

كون إن الحوثيين بقى بيستعبطوا و بيقولوا إن جبل دخان يمني و مش سعودي فده إستهبال واضح لأنهم عبروا السياج الحدودي علشان يحتلوا النقط اللي متمركزين فيها حالياً داخل الاراضي السعودية و أصابوا مدنيين سعوديين ياما بقذائف الأر بي جي الطائشة اللي أطلقوها على المنازل السعودية في القرى
الحدودية و مات 5 مدنيين سعوديين على الأقل و بعض التقارير بتوصلهم لـ 13 مدني سعودي قتلوا
دا غير إعتداء الحوثيين على حرس الحدود السعودي و قتلهم 1 و إصابتهم 11 و حرقهم 6 سيارات

السعودية قامت بإخلاء سكان القرى الحدودية السعودية لمخيمات بعيدة عن ساحة القتال لتجنب أي إصابات أخرى في المدنيين

و كل ما تريده السعودية هو تطهير أرضها من المتسللين و لن تتبعهم إلى داخل اليمن إذا إنسحبوا من الاراضي
السعودية
السعودية بتدعم الرئيس اليمني بالمال فقط
لكنها ترفض التدخل المباشر بقواتها العسكرية فيما هو خارج ارضها
لكنها إضطرت للدفاع عن نفسها و ارضها

و ده مش تعصب مني
دي الحقيقة اللي أنا عارفها
و لو الحوثيين إنسحبوا بكره الصبح الموضوع حينتهي من طرف السعودية و مش حتضرب عليهم طلقة واحدة بعد ما يخرجوا من حدودها
لأن السعودية مش بتاعة حرب و بتحب تكبر دماغها بس هما ما يقدروش يسكتوا على هجوم مباشر عبر الحدود و إحتلال لأراضي و يطنشوا زي ما
إحنا بنعمل مع إسرائيل
عارفة ليه ؟
لإن المواطن السعودي له ثمن و قيمة عند حكومته
مش زي المواطن المصري ملوش تمن
و الحكومة هنا بتوفر الأمن للمواطن فعلاً
مش بتحرص على حماية أمن النظام الحاكم و بس زي عندنا
بل بيحموا كلاً من الحاكم و المواطن و بيعتبروا ده واجب مقدس

مي ثابت said...

بالمنطق كده

آل سعود بيقولوا إحنا بنطارد الحوثيين اللى دخلوا أرضنا

!!

طيب اللى يطارد مجموعة من البشر

إيه اللى يخليه يستخدم طيارات و مظليين

و يضرب فى القرى اليمنية الحدودية
!!

إلا إذا كان الهدف أكبر من مجرد القضاء على بعض المتسللين كما يدعى

بغض النظر عن إنتماءات كل طرف

يظل أتباع الحوثى جزء من النسيج اليمنى اللى المفروض تدخل أى أطراف خارجية يكون بهدف الإصلاح بينه و بين نظامه

حتى لو إدعى البعض إن الحوثيين ليهم أجندة خارجية
(من منكم يا حكامنا ليس له أجندة)

طيب يا دول الجوار إجمعوا أطراف الخلاف و إنزعوا فتيل الأزمةو إلزموهم ببنود صلح

و لننظر بعدها ما يكون

و لا مبادرات و خيار السلام الإستراتيجى دواء لا نستخدمه إلا مع الصهاينة

اللى بالتأكيد أجرموا أكثر من الحوثيين ملايين المرات

mido said...

مهندس مصرى




السعودية تقدم دعم لوجستى للجيش اليمنى

الدعم اللوجستي هو من المقومات الأساسية للحرب الحديثة ، هو مخزون الجيش من عتاد وذخائر ومحروقات وتأمينها في الوقت المناسب . والدعم اللوجستي يعني وجود جهة متخصصة مهمتها المتابعة وتوفير الدعم لألوية الجيش وأفواجه والمواقع والقطع المستقلة والطبابة العسكرية ، هذه الجهة تضم إداريين واختصاصيين ، ولأن عمل هذه الجهة معقد لذا يتطلب الأمر تضافر الجهود بين مختلف الأقسام فبدونه تتوقف عملية التموين وتتأخر المساعفة ويتعثر النقل


فالسعودية متورطة فى الحرب ضد المتمردين

متجيش بقى لما تتلسع تقول اى

و تعيش دور المدافع عن السيادة و الكرامة

اذا كنت انت اتخذت المتمردين خصم بدعمك للنظام اليمنى

و لما المتمردين يقطعوا الدعم ده و يضربوك تزعل و تقول اعتداء على السيادة

المهدى said...

يا أستاذة أنت ليه بتغفلى الدور السعودى الأمريكى فى اليمن مجرم الأمس هو مجرم اليوم
والتدخل المصرى الذى بدأ شرعيا ( لم يكن بغرض سرقة اليمن ولم يكن يهدف إلا صالح ما كان وقتها يعرف بالأمة العربية ) بل بالعكس كان له مؤيدين داخل اليمن وداخل كل قطر عربى وأزعم أنهم كانوا أغلبية
على عكس موقف السعودية المشبوه دائما فهو أما منفذ لأجندة أمريكية أو مدافع عن عرش صنعته ثروات تستخدم دائما لحساب العدو
الدور السعودى الأمريكى هو السر فى الورطة المصرية التى حاول جمال عبد الناصر الخروج منها منذ العام 65 فى زيارة رسمية للسعودية أتفقوا فيها على ترك الأمر كله لليمنين وخروج القوات المصرية وكذلك جيوش المرتزقة ولم ترضى أمريكا عن هذا وهو العام الذى حدثت فيه كل أخطاء النظام الناصرى لأنه كان يستشعر خطرا لا يراه
لاحظى أنه عام وقف المعونة الأمريكية وعام تنظيم الأخوان وعام رصاصة فتح الأولى وعام قمة الحرب الأعلامية بين الملكيات والجمهوريات الرجعية والتقدمية هو عام شديد الألتباس كثير الأخطاء ولكن
خلينا فى النهاردة ما نراه ونعيشه هو نتيجة أنتصار الرجعيات والأمريكان السعودية تلعب نفس الدور المعهود ولكن لا توجد مصر
محمد المهدى

Unknown said...

مي دايما تقول القول الفصل

مافيش بعد كلامها كلام

غير بس لاذكى اخواته مواطن مصري

الحوثيين زيدية وعايزين يرجعوا نظام الامام اللي عبد الناصر شاله واللي سبحان الله السعودية كانت بتدعمه

http://fr.wikipedia.org/wiki/Za%C3%AFdisme

ده الحوثيين دول الزيديين على اصلهم وعلي عبد الله صالح زيدي مودرن يا نبيه

Kalimalhus said...

الله يفتح عليك كمان و كمان يامواطن .. عرفت أخير إن الشيعة اليمنيين زيدية و الشيعة فى إيران إثناعشرية أو إمامية؟؟

الإخوة المدافعين عن موقف السعودية بحسن نية .. إنتوا عماين زى اللى دخل فيلم فى آخر خمس دقايق و شاف واحد ماسك سكينة حيقتل التانى قوم التانى فلفص منه و هبده بطوبة على دماغه جاب أجله .. منطقى إن رأيكم يبقى إن التانى كان فى حالة دفاع عن النفس و إنه على حق .. بس يا ترى لو شفتوا الفيلم من أوله كان يبقى ده رأيكم؟

طبعا .. حضرات المدافعين عن السعودية داخلين بأجنداتهم أو بلاش أجندات لأنى عارف إن أغلبكم ملكمش أجندات و إنما عندكم مخاوف فوبيا يعنى .. الغالب هنا هو الشيعوفوبيا و الإيرانوفوبيا .. المهم إن الإستسلام لما تمليه علينا مخاوفنا من آراء و ردود أفعال لا يسمح لنا بوضوح الرؤية اللازم لتكوين آراء سليمة ..

أنا مش هشرح حاجة لأن الكلام موجود و ممكن تقروه فى كذا حته .. بس ياريت أولا: تقروا المصادر المخالفة لتوجهاتكوا زى المشايعة ليها و ثانيا كل واحد منكم لما يعدى على الكلمة اللى عنده حساسية منها يستعيذ بالله و يكمل .. و ربنا يعفى عنا جميعا و يشفى مرضانا و إبقوا طمنونا عليكم..

Unknown said...

المهدي

والنبي بلاش نتكلم في حرب اليمن
احنا لو مش حاسين بالذنب من اللي عملناه في اليمن يبقى ربنا مش ح يعفي عنا ابدا بالطريقة دي

خلينا نتعلم بس لما نغلط نقول غلطنا مافيش داعي للشوفنية اللي تودي في داهية دي

مافيش تدخل دولة في دولة تانية يبقى شرعي ابدا

Unknown said...

مهندس حر

ههههههههههههههههههههه
جامد جدا التعليق ده

لا فض فوك

Unknown said...

لا مؤاخذة حطيت لمواطن لنك بالفرنصاوي

مش عارفة ليه؟

عربي اهو

http://ar.wikipedia.org/wiki/%D8%AD%D9%88%D8%AB%D9%8A%D8%A9

mido said...

مواطن بيفهم فى الفرنصاوى

عبد الزهراء المصري (علي الحسيني) said...

ياجماعة أفهموا بقى ... فيه دلوقتي دم بينزف سواء الدم كان مسلم شيعي أو مسلم سني أو غير مسلم .
فكروا بشيئ من الآدمية وبلاش النظرة السطحية دي لأن اللي بيموتوا دول بشر عزل والسعوديين بيضربوا زي البقر بالضبط جوه الحدود وهم أعترفوا بكده أنهم بيضربوا جوه الحدود ومعروف من زمان إن الحوثيين طلبوا من السعودية أنهم ماتدخلش في حربهم مع نظام الطاغوت عبدالله صالح اللي معروف أنه زيه زي أي حاكم عربي عميل وخاين وطبعاً مش ببرأ الحوثيين لكنهم دافعوا عن أنفسهم من تواطئ آل سعود مع عبدالله صالح لأنهم بيسمحوا لجيشه بالصعود على جبل الدخان ويضربوا الحوثيين والمدنيين من فوق بالصواريخ والمدفعية وده ما ينفش يتسكت عليه بأي منطق عسكري .
أما بالنسبة للسعودية والقواعد الأمريكية اللي فيها فماينفعش نقول أن صاحب البيت راضي بكده لأنه أصلاً مين قال إن آل مردخاي هم أصحاب البيت ؟؟؟ المعروف تاريخياً أنهم شوية دمويين عملوا صفقة مع واحد منحرف أسمه محمد عبدالوهاب كفر كل الناس إلا أتباعه وقتلوا ودبحوا زعماء العشائر والقبائل وتاريخهم كله عمالة وخيانة وبالنسبة لمن دافعوا عن وجود القواعد دي فأكيد طبعاً هم عارفين ده أسمه إيه وبيحصل إيه في القواعد دي ؟؟؟
طبعاً ده شيئ طبيعي وخاص إن السعودية ليست بلد الإسلام ولا العروبة حالياً بل هي هي أرض محتلة زيها زي أي دولة عربية إسلامية والمستضعفين هم أحنا الشعوب المسكينة .
أسئلة للأذكيا فقط :
ماقيمة وجود القواعد الأمريكية والفرنسية في السعودية وبلدان الخليج ؟؟؟وخاصة إن الخليجين أكثر الدول في العالم إنفاقاً على التسليح "الفشنك" ؟؟؟
لماذا لأ يذهب الإنتحاريين التكفيريين لبلدانهم ويفجروا ويقتلوا الأمريكان اللي عايشين في بلدانهم ويبعدوا عن العراق ؟؟؟

mido said...

بس واضح ان الرئيس اليمنى شم نفسه

بيقولك الحرب لم تبدأ الا من يومين بس
:))

عبد الزهراء المصري (علي الحسيني) said...

دي مشاركتي في البوست اللي فات :
=========================
أولاً أنا ضد الحرب بكل أشكالها لأن اللي بيضيع فيها الناس الصغيرة الغلابة اللي زينا .
ثانياً الحرب في اليمن مش حرب شيعية سنية ولا حاجة بل حرب بين نظام وهابي تكفيري ومُعادي للإسلام سنة وشيعة وهو نظام فاسد أخلاقياً ودينياً ومعاه نظام خايب أوي وهو النظام اليمني وكلا النظامين عميلان لأمريكا وكل اللي أتكلموا عارفين كده كويس أوي أما بالنسبة للحوثيين فهم حربهم أصلاً مع النظام اليمني وطبعاً النظام الإيراني بتدعم الحوثيين بشكل أو بآخر بس مش علشان هم شيعة لكن علشان فرض للنفوذ مش أكثر من ذلك يعني مش حرب شيعية سنية وخاصة لما تعرفوا إن النظام الإيراني مش بيفرق في ظلمه بين الشيعة والسنة بل هو نظام طاغوتي فاقد للشرعية وللعدالة .
إذاً الحرب سياسية وليست حرب ملائكة وشياطين .
وللعلم فأهل اليمن قديماً لما كانوا بيشتغلوا بالتجارة ساعدوا السعوديين كثيراً قبل عصر النفط عندما كانوا مجرد رعاع عايشين على الرعي والترحال وبعد عصر النفط الغرور أصاب السعوديين وظنوا أنفسهم شعب الله المختار وفسدوا وأفسدوا في الأرض لدرجة أنهم عذبوا اليمنين بشكل يفوق تعذيب الصهاينة للفلسطينين
:
http://marebpress.net/news_details.php?sid=16901

http://www.cyemen.com/vb/showthread.php?t=58054

http://www.alwahdawi.net/news_details.php?sid=5558

http://www.alwahdawi.net/news_details.php?lng=arabic&sid=5560

Unknown said...

عبد الزهراء

لا انت ازاي تقول كده؟ دم الروافض والنصارى يسفك ويطلع دين امه وبعد كده يبقى لنا عين نتكلم عن اضطهاد المسلمين ومروة الشربيني
كل واحد مخبي هتلر في قلبه وبيقول للتاني يا عنصري
حاجة وسخة فعلا
بجد يعني لما الواحد يدافع عن السعودية وهي بتضرب اليمن ويرجع يشتم امريكا واسرائيل ده يبقى كده مخه سليم؟
احا ما امريكا كمان كانت بتدافع عن نفسها
هم مش المسلمين ضربوها في حداشر سبتمبر وكانت "مضطرة" تحتل العراق وافغانستان وتطلع ميتين ابوهم
وكل برغوت بقى على قد دمه
السعودية تضرب قرى على قد دمها وامريكا تحتل بلدين على قد عافيتها
ده حتى اللي قتل مروة الشربيني معذور ماهي استفزته زي ما الروافض والنصارى بيستفزونا وبيضطرونا نضربهم
طالبة معايا اباحة ولو تركت العنان لنفسي المدونة ح تنفجر في وش كل اللي يدخل

مهندس مصري بيحب مصر said...

أنا ما جبتش سيرة لا روافض و لا نصارى
و إحتلال ارض الغير غير الدفاع عن ارض الوطن المحتلة و تحريرها
ما تلخبطيش ابو قرش على ابو قرشين
و هاتي لي دليل إن السعودية ضربت قرى يمنية
علشان أكذب الناس اللي في جازان و أصدقك انتي

المهدى said...

مفيش شوفينية ولا حاجة وأحنا قولنا أكثر من غلطنا قلنا أتوحلنا وأتورطنا ولما عبد الناصر راح للملك فيصل فى 65 للحل كان يعترف ضمنيا بالخطأ كل الحكاية أنى بحاول أفهم الخطأ وأربطه بزمنه وظروفه ( ودون تبريره ) ولكن كمان من الخطأ أن نشبه دور مصر فى اليمن المختلف عليه حتى الأن بما فعلته أمريكا فى أى حد مش فى العراق بس
كان فيه خطأ فى الأندفاع لنصرة طرف أعتقدنا أنه قد يكون إضافة للقوى الثورية
كان فيه خطأ الأندفاع لتغليب طرف أعتقدنا أنه يملك تأييد شعبى مطلق
كان فيه خطأ محاولة حصار السعودية و رد صفعة الأنفصال
كلها أخطاء المرحلة الأولى من التدخل فى اليمن ولكن كلها أخطاء أجندة مصرية يمكن مراجعتها وليست خطايا عمالة دولية أو رغبات أستعمارية هى أخطاء تشبه ما وقع فيه النظام الإيرانى فى بداية ثورته وراجعها وتجاوزها وحافظ على البناء
أما خطايا المرحلة الثانية ( ما بعد التورط ) فهى تشبه مع الفارق تورط أمريكا فى فيتنام وليس العراق وهى بالمناسبة ما تريدين التركيز عليه ولا يمكن مناقشتها إلا بدراسة عام 65 وخطاياه المتعددة والتى أنتهت بكارثة 67
المهم خطايا أو أخطاء نحن الأن لانملك رفاهية نقدها فنحن لا وجود لنا على الخريطة
يا أستاذة الأن نحن نحاول أن نثبت أن حزب الله صديق وأن إسرائيل عدو
زمان كان ممكن أن نتحدث عن أخطاء تجربة أما الأن فلا توجد تجربة
روحى ياشيخة غلطات ولا خطايا يا ريتها دامت أيام
محمد المهدى

Unknown said...

مهندس حر

موضوع الروافض ده انا كنت بارد على عبد الزهراء

التعليق ده مش ليك خالص

Unknown said...

http://www.youtube.com/watch?v=zteZlwqN-HA

وادخل عند الخوجة جايب فيديوهات كتير

بس غريبة ان السعودية بتنكر انها ضربت قرى

ده الجزيرة بتقول

امال هم بيضربوا ايه؟

http://www.youtube.com/watch?v=YI6rnF1iyHk

Unknown said...

http://www.youtube.com/watch?v=vrI4ZyKW9ys

وائل صلاح said...

مهندس مصرى
_______________
السعودية ضربت شمال اليمن و كمان ضربت معسكرات الحوثيين في منطقة صعدة" شمال غرب اليمن

و كمان جبل الممدود ومنطقة الحصامة والمجدعة و ديه مناطق داخل اليمن

http://www.afaqdubai.com/vb/showthread.php?s=d5e3637827feaae0cd9861345418dc8d&p=16375#post16375

Al said...

قرأت في القرآن
تبت يدا ا بي لهب
فأ عـلنت وسائل الإذعان
أن السكوت من ذهب
وصودر القرآن
لأنه حرضني
على الشغب

عبد الزهراء المصري (علي الحسيني) said...

عبد الزهراء

لا انت ازاي تقول كده؟ دم الروافض والنصارى يسفك ويطلع دين امه وبعد كده يبقى لنا عين نتكلم عن اضطهاد المسلمين ومروة الشربيني
كل واحد مخبي هتلر في قلبه وبيقول للتاني يا عنصري
حاجة وسخة فعلا
بجد يعني لما الواحد يدافع عن السعودية وهي بتضرب اليمن ويرجع يشتم امريكا واسرائيل ده يبقى كده مخه سليم؟
احا ما امريكا كمان كانت بتدافع عن نفسها
هم مش المسلمين ضربوها في حداشر سبتمبر وكانت "مضطرة" تحتل العراق وافغانستان وتطلع ميتين ابوهم
وكل برغوت بقى على قد دمه
السعودية تضرب قرى على قد دمها وامريكا تحتل بلدين على قد عافيتها
ده حتى اللي قتل مروة الشربيني معذور ماهي استفزته زي ما الروافض والنصارى بيستفزونا وبيضطرونا نضربهم
طالبة معايا اباحة ولو تركت العنان لنفسي المدونة ح تنفجر في وش كل اللي يدخل
=============================
بصي يانوارة أنا كنت دلوقتي بسمع مسلسل أجنبي بيتكلم عن الأكاذيب وصدقيني من غير ما أشوف أي حد من المؤيدين للسعودية الآن فأنا أعلم وكلي يقين أنهم إما كذابين لأنهم بيخافوا يقولوا الحقيقة أو أنضحك عليهم أو بيكذبوا أنفسهم نتيجة لأنهم مصدومين من اللي بيحصل ...
وأنا وجدت إن الأصناف الثلاثة موجودة فهناك من يكذب ويكذب ويستمر في كذبه لأن اللي بينضربوا شيعة روافض دون النظر أنهم بشر لحم ودم أطفال ونساء وشيوخ وشباب وكلهم عزل وأبرياء .
ياجماعة أفهموا بقى معنى العدالة وقولوا الحق .
زي ما بنقول إن إسرائيل علطانة علشان بتضرب مدنيين عزل لازم نقول إن السعودية بتضرب مدنيين وعزل فالبشر واحد مهما أختلفوا في إعتقاداتهم وافكارهم الدينية التي تخصهم وحدهم فقط .
ياجماعة الغرب -الشعوب وليست الحكومات- تعاطف معانا ومع قضية فلسطين لأنه عارف قيمة البشر على الرغم أننا في نظرهم إرهابيين لكن هما بيقولوا لنفسهم دول برضه بشر .
==========================
الخبر ده ده لمن لأ يصدق إن السعودية تضرب داخل الحدود اليمنية وفاكر إن النظام السعودية نظام شريف وعادل وصادق في كلامه على رأي محمد سعد "ده عند أمه ياأدهم":

إباء : وكالات
اعلن الناطق بإسم الحوثيين محمد عبد السلام أسر عدد من الجنود السعوديين بيد المقاتلين الحوثيين في المواجهات التي جرت مع الجيش السعودي في بداية تقدمه البري نحو الاراضي اليمنية.و اعلن ذلك في اتصال مع قناة العالم قائلا " سنقوم باجراء مقابلات مع هؤلاء الجنود الذين تم اسرهم وسنعرض الصور في الساعات القليلة القادمة ".
و شدد الناطق بإسم الحوثيين علي أن هؤلاء الاسري سيعاملون بكل احترام.
و كان الطيران الحربي السعودي واصل امس الجمعة، غاراته الجوية على مناطق الملاحيظ والقرى الحدودية اليمنية، فيما اعلن مستشار للحكومة السعودية ان قوات برية بدأت تتحرك باتجاه الحدود مع اليمن.
و اضاف المستشار " ان القوات السعودية تستعد لشن عملية واسعة وستواصل هجومها على الحوثيين، وان الطيران الحربي السعودي قصف الخميس مواقع للحوثيين داخل الاراضي اليمنية ".
و قالت الحكومة السعودية في بيان لها " انها اتخذت سلسلة من الاجراءات من بينها تنفيذ ضربات جوية مركزة على تواجد الحوثيين في جبل دخان والاهداف الاخرى ".
و من جانبه، أكد متحدث باسم الجماعة، ان الطائرات السعودية شنت عشرين غارة والقت قنابل فسفورية على مناطق آهلة بالسكان في مديرية الملاحيظ وجبل الممدود ومران، ما ادى لسقوط عديد من الضحايا.

جمال الملك سلطان said...

عجبي والله.
طاغوت محلي يريد ان يسير في شعبه بسيرة فرعون، نهض جزء من شعبه للدفاع عن انفسهم رافعين شعار نوقف القتال فور توقف العدوان
واستجابوا لكل مبادرة صدرت من اي جهة، والتزموا بكل اتفاق وقعوه. وخوفهم من الله وحرصهم على وطنهم سمحا بانهاء خمس حروب شنت عليهم قبل الآن ، برغم ان خصومهم كانوا في موقف لا يحسدون عليه من جراء هزائمهم المتكررة في الميدان
مثل هؤلاء يمكن التحدث عنهم بكل هذا الاستكبار والشماتة والتحريض؟

نسأل الله الفرج والخلاص ممن يظلمونن في اوطاننا، ونفتي بقتل نظراءنا لشأن لا يخصنا ومعلوماتنا عنه لا تتخطى ماتتناقله وسائل الاعلام والجرائد الرسمية، بكل هذا اليقين والطمأنينة ...سبحان الله

بديهيات مايحدث في اليمن لا تتخطى عدة نقاط بسيطة وواضحة :
هناك نظام يستخدم الطيران والصواريخ والمدفعية الثقيلة لمعالجة مشكلة سياسية مع مواطنيه

قطر قدمت مبادرة لايقاف الحرب قبلها الحوثيون والنظام اليمني، وسافر بموجبها الفقيه الذائع الصيت بدر الدين الحوثي الى حيث طلب منه من قبل النظام واضعاً نفسه تحت خطر
القتل او الاعتقال
واخلى الحوثيون كل مواقعهم العسكرية وعادوا الى بيوتهم وظلوا فيها حتى اخرجهم النظام منها عندما شن عليهم حرباً جديدة ظن نفسه مهيء لكسبها

اي كان مايحدث باليمن هل يبرر الدعم السعودي لاحد الاطراف بالسلاح والاموال وتحريضه على الآخر ثم السماح له بالالتفاف داخل الاراضي السعودية واستخدامها منصة لقصف الآمنين في محافظة صعدة ثم التدخل لانجاده بالطيران والصواريخ ومدفعية الميدان؟

الحوثيون الذي لم يعلنوا الى الآن اي امر لم تبرهن عن صدقه الايام والافلام والصور والشهادات المحايدة يقولون :
برغم الدعم العسكري والمالي والاعلامي وتحريض السعودية ضدنا، كنا حريصين على عدم استعداءها وشرحنا لها مراراً طبيعة مشكلتنا المحلية جدا والمحصورة مع
النظام الحاكم في اليمن

وعندما سيطرنا على الحدود المشتركة اجرينا اجتماعات تنسيق مع السعوديين بموجب طلبهم واتفقنا على اجراءات لضبط الحدود ومنع الاساءة الى سيادة بلدينا، وبرغم اطلاقهم النار على دوريات تابعة لنا وفتح نيران الرشاشات على مواطنينا في مناسبات مختلفة الا اننا كظمنا الغيظ وفضلنا العض على الجراح على امل ان تراجع هذه الدولة الحاقدة نفسها ولو من باب المصالح بعد ان تأكدنا انها لا تراعي العقائد
وكانت القشة التي قصمت ظهر البعير ، سماحهم لوحدات من مسلحي الظام اليمني بالدخول الى اراضيهم والتمركز في جبل الدخان واستخدامه لشن الهجمات ضدنا وضد اهالينا، وبعد ان استنفذنا وسائل التفاهم السلمي مع من اعار نفسه للشيطان في كل مكان وصلت اليه امواله ومرتزقته وابواقه، هاجمنا جبل الدخان وسيطرنا عليه في المرة الاولى ولم نعلن عن ذلك حرصاً على حفظ ماء وجه هؤلاء وخرجنا منه بموجب اتفاق يقضى بعدم السماح لمسلحي النظام اليمني بالعودة اليه
وبعد تسليمنا للجبل لحرس الحدود السعودي فوجئنا باعارته مجددا لنفس الجهات وهذه المرة علنا وقد اعلن النظام اليمني صراحة سيطرته على جبل الدخان، وترافق ذلك مع زحف بري سعودي الى داخل الاراضي اليمنية وقصف بالطيران والصواريخ للقرى والمدن المحاذية للحدود فرددنا على مصادر النيران وهزمنا المهاجمين واعدنا تطهير جبل الدخان والسيطرة عليه

وتقول الرواية السعودية التي يمكن مراقبة مصداقيتها من خلال الناطقة الرسمية باسمها قناة العربية التي يسميها احرار العرب من المحيط ال الخليج قناة العبرية:
تسللت عناصر حوثية مسلحة الى داخل الحدود وهاجمت دورية عسكرية وقتلت وجرحت من فيها ونقوم بمحاربة هذه العناصر وسنستمر في ذلك ماداموا في الاراضي السعودية

والسؤال الذي يطرح نفسه، هل يقدم محاصر ومستضعف ومهدد من كافة الاتجاهات ومعزول في بقعة نائية لا تصلها الامدادات الا بشق الانفس على فتح جبهة جديدة ضد دولة من حجم ووزن وموارد وتحالفات السعودية؟
حتى المجنون يخاف على جلده، فمابالكم بمن اثبتت التجربة حنكتهم وتعقلهم ومسارعتهم لقبول اي اتفاق يضع حداً لسفك الدماء؟

جمال الملك سلطان said...

بالنسبة للتعليقات على الموضوع، ابدأ مع الاخت نوارة
يااختي الكريمةاضمني توقف النظام عن العدوان المميت على الناس اضمن لك توقف القتال منذ الغد
وارجوك لا تضعي المقتول مع القاتل
الشعب الفلسطيني مهدد بخسارة ارضه وندعوده للقتال ولو بالاظافر
الشعب اليمني مهدد بخسارة آدميته وحياته وموارد رزقه، فلا نطالبه بما لايطيق.
مهندس حر
انت تصف الواقع كما تراه والاخت نوارة تصفه كما ترغب ان يكون، وهي تفعل ذلك لان القبول بالواقع كما هو لا يترك لنا لا دنيا ولا دين، والتحريض على تغييره يبدأ بوصف مايجب ان يكون عليه
وشكراً على ماخطته يمينك في آخر تعليق

مواطن مصري ولورنس العرب
كما تدين تدان، وماتقبله لغيرك ستساق اليه، وعلى يديكما الكريمتين دماء من يقتل ممن تحرضون عليهم وتبررون قتلهم.

اسد الجيزة
وقبل ظهور ملالي ايران من ورط عبدالناصر بحرب قصمت ظهره في اليمن؟
من حول باكستان من دولة ديمقراطية حرة ومتقدمة الى دولة عميلة وفاسدة غير انقلاب ضياء الحق المدعوم من السعودية؟
من بدد طاقات الامة العربية في افغانستان، وارسل زهرة شبابنا تحت لواء الجهاد المقدس ضد الكفرة الروس لصالح اهل الكتاب الامريكان؟
من مول ميليشات الحرب الاهلية في لبنان، وادام امد الحرب ثلاثة عقود من الزمن؟
من اين انطلقت الجيوش التي دمرت العراق واستباحت اهله وسرقت موارد عيشه؟
من عبث بتركيبة السودان ودعم حركاته
الانفصالية بالمال والسلاح؟
الملاللي ظهروا في اوائل الثمانينات وانشغلوا بحرب العراق الى بداية التسعينات، هل تتكرم بذكر العهد الذهبي الذي كنا نعيشه قبول ظهورهم؟
هل تعلم ان نظام الملالي ماكان لينتصر ضد نظام الشاه العميل لولا دعم احرار العالم وفي مقدمتهم مصر في عهد الثورة؟

مهندس مصري

انت بالذات قصة كبيرة، وجلوسك في غرفة الكنترول على الحدود اليمنية - السعودية يكفي لاقناع كل من له عقل وبصيرة، والاخت نوارة يجب ان تنتحر بعد ردك المفحم عليها
تقول : لإن المواطن السعودي له ثمن و قيمة عند حكومته؟!
هل تعرف سعودية اخرى نحن لا نعرفها؟
له قيمة عند حكومته ... هزلت
وارغب في سماع رأيك هل انت مع اطلاق حرس الحدود المصري النار على الفلسطينيين اذا حاولوا دخول الاراض المصرية للاحتماء بها من عصف النار الاسرائيلية؟
وفي حادثة مقتل ضابط مصري اطلق النار على الفلسطنيين فردوا عليه بالمثل وقتلوه، انت ترى الحق مع من ؟ مع من بادر او من دافع؟
صدق من قال الغرض مرض

مدير التحرير
من الانصاف القول ان كل دولة يجب عليها ان تدافع عن نفسها ضد من يخترق سيادتها، ولكن من الانصاف ايضاً القول بان السيادة كل لا يتجزأ، واعارة ارضي لمهاجمة دول الجوار بدون وجه حق يجيز لدول الجواران تدافع عن نفسها ولو استدعى الدفاع الوصول الى مصادر النيران واسكاتها
من واجبك المهني ان تبرز وجهتي النظر والا اسمح لنا ان نرحب بك مديرا للتحرير في بلاط الصحافة الحكومية

ميدو
هو ماتقول بالظبط على فرض اكتفاء السعودية بذلك، ولكنها متورطة بالقتال المباشر وتجاهر بذلك

Unknown said...

جمال الملك سلطان

ماهي فرصة المصالحة راحت خلاص

يعني هو كل اللي عنده نظام خاين يمسك سلاح؟ كان زمان الدنيا اتقلبت وماحدش عاش

طب ما لبنان فيها نظام خاين، ياخدوا سلاح وينزلوا يموتوا في بعض؟

انا برضه لحد دلوقت مش شايفة اي مبرر للحوثيين لحمل السلاح

اذا كانت المشكلة في علي عبد الله صالح وللدرجة دي ايدهم واكلاهم على السلاح كانوا يقتلوه هو

لكن فيه ميتين الف لاجئ
وفيه ابرياء كتير ماتوا
ذنبهم ايه؟ هي اليمن حمل ست حروب اهلية؟ ده يرضي ربنا يعني

هم بيقولوا الموت لامريكا والموت لاسرائانيل، بس انا شخصيا ما شفتهمش عملوا حاجة لامريكا واسرائيل هم في حرب اهلية دلوقت واللي بيشارك في حرب اهلية حتى لو له حق بيضيعه وبيركب نفسه الغلط

انا مش باحاول اتخيل الوضع على هوايا زي ما حضرتك بتقول، بس هم بيقولوا انهم دولة اسلامية وبتطبق الشريعة
حتى لو احنا عارفين ان ده نصب بس في النهاية هم لهم مرجعية يتحاسبوا على اساسها
انا اقصد السعودية يعني
اللي هم بيعملوه ده ح يخرب بيتهم
مش الحوثيين ح يهزموهم ولا حاجة
الحوثيين شكلهم كده بيعملوا عملية انتحارية وانا مش عارفة هم مالهم مقطعين البطاقة كده
بس ح تجيلهم من عند ربنا احنا جات لنا من عند ربنا واتعاقبنا عقوبة شديدة قوي قطمت ضهرنا
دي مش اول حرب اهلية في اليمن ولا اخرها، شكلهم كده مدمنين حروب اهلية
بس اللي بيتدخل لهم ربنا بيقصمه ومن زمان وهم كده، من ايام ابرهة والمفروض ان السعودية حاطة لا اله الا الله محمد رسول الله على علمها ده بجد ده نصب هم يتحاسبوا بالكلام اللي بيدعوه لنفسهم
والا لو ح نتكلم على كل واحد بحقيقته يبقى مش ح ننطق خالص، ماهم مافيهمش امل بقى خالص دول بس اكيد حريصين على شكلهم على الاقل

دلوقت علي عبد الله صالح امبارح قال لا مصالحة ولا هدنة ولا وقف للقتال لحد ما اخلص عليهم

وانا مش فاهمة الحقيقة ح يخلص على قرى بكاملها ازاي؟

الا اذا كان بياخد دعم
ومش مفروض انه ياخد دعم هو بيعمل جريمة حرب وللا يعني هو البشير اللي تف عليه الكلب؟
اللي بيدي له الدعم هي السعودية
والسعودية لازم تتوقف دلوقت حالا، فورا
لان العواقب وخيمة على دماغها
والسعودية جربت تسليط صدام عليها
ولما اتسلط عليهم هم نفسهم قالوا: احنا اعناه على الظلم وعشان كده اتسلط علينا

هم نفسهم قالوا كده، هم بيندموا دلوقت على انهم ساعدوه
اللي اقصده اني مش باكلمهم بلغة غريبة عليهم ولا بيعتبروها مش عقلانية ولا حاجة
هم من عادتهم انهم يفسروا الاحداث بالشكل ده وكل مرة يستحلوا دم الشيعة بدعوى انهم مش مسلمين وكل مرة ربنا يديهم على دماغهم وكل مرة يندموا ويرجعوا يقولوا اعنا ظالم وسلط علينا
وسبحان الله اغبيا ما بيتعلموش عاملين زي اللي بياخد خمسين قفا على سهوة

انا ما اضمنش حاجة انا اضمن ليه؟
بس ما تقنعنيش ان الحوثيين لو دلوقت اهو طلبوا الصلح والقاء السلاح ح يبقى علي عبد الله صالح عنده فرصة انه يستمر في الحرب

اذا كان مبارك اللي هو مبارك لما الجماعات الاسلامية القوا السلاح هو وقف الحرب

ح يحارب نفسه يعني؟

والايام بيننا وبكرة تشوفوا

وانا ياسيدي ام احمد بتاعة الفجل بس ابقى افتكر كلامي

السعودية ح يتخرب بيتها خراب مالوش اول ولا اخر

الحوثيين ح يضطروا في الاخر انهم يعملوا زي الجماعات الاسلامية عندنا في مصر ويقولوا هالله هالله ع الجد والجد هالله هالله عليه

وعلي عبد الله صالح ح يتغول ويتجنن ويتوحش ومش بعيد يتسلط على السعودية وفي الاخر ح ينتهي زي صدام

يعني كل الاطراف ح تطلع خسرانة

عشان احنا اصلنا كنا ناقصين خراب
احنا اصلنا عايشين في الجنة ونعيمها فاليمنيين قالوا يعني يحاولوا يفكرونا اننا في الدنيا

يعني انا شايفة الكل بيتكلم عن الحوثيين والسعودية
وماحدش عامل حساب الوضع الانساني خالص

المواطنين والفلاحين ذنبهم ايه؟ ماحدش بيفكر فيهم ليه؟

Unknown said...

على فكره لتكونوا أخدتوا فكره غلط عن مغزى كلامى
انا كنت بوضح فكره مش أكتر- يعنى مش واخد صف حد من التلاته

انا عقلى ابتدى يهيس بجد
فى الأول قلت حق السعوديين أتقتلهم جنود على الحدود
وبعدين لقيت السعوديين بيتغابوا وبيرموا بتقلهم وفين ؟ على المدنييييييين


الله - الحكايه مش مطاردة متسللين بأه

والنهارده على قناة الحصيره شفت على عبد الله صالح بيتكلم بلهجه قويه أوى وواثقه بشكل غريب ! ياترى ليه ؟
ليكون أعتمد على الأشقاء السعوديين أنهم يخلصولوا his dirty work !

على فكره
الأيام القادمه ستشهد توتر فى العلاقات بين مصر والسعوديه نتجية لأزدياد القوه العسكريه السعوديه .

Unknown said...

ههههههههههههههههه
أنا أسف بس نسيت أعلق على نقطه مهمه

ومين قالك يانواره أن مصر مابتساعدش ؟!!!!!!!

هههههههههههههههههههههههه

جمال الملك سلطان said...

الاخت نوارة

اشرت لمهندس حر ان المنهج في المخاطبة ليس مانراه بل مانرجوه ومانؤمن به ومايدعيه الآخر عن نفسه، بغض النظر عن الواقع على الارض.
المخاطبة شيء والتخطيط على اساس الوقائع الفجة شيء آخر.
وموقفي من اسلوبك في المخاطبة هو موقف التأييد وليس اي شيء آخر

نعود لموضوع نفورك من حمل السلاح، ووجهة نظرك حول ضرورة ان يتنازل من يخاف الله امام من لا يخافه حقناً للدماء ومنعاً للحروب الاهلية
وجهة نظرك تشبه الحديث المأثور الذي يقول : اسد حطوم خير من سلطان ظلوم وسلطان ظلوم خير من فتن تدوم.
دعينا نتفق على مبدأ ان الاصل هو ماتقولين والاستثناء هو الاضطرار للدفاع عن النفس في وجه من قرر ان في قتالك ربحه الشخصي وفي مهادنتك خسارته الشخصية، وفي هذه الحالة لا يمكن التوصل الى وقف اطلاق النار الا من خلال مقاومته بشراسة تجبره على اعادة النظر في حساباته.
والمثل الذي تكرمت بضربه حول الحالة اللبنانية يؤكد هذا الاستثناء:
يتحرش الخونة بالمقاومة ويفرضون عليها القتال، فتبادر الى الدفاع الذي يوجب عليهم وعلى رعاتهم الاجانب اعادة النظر وايقاف القتال، لان المنطق الذرائعي يقر بان الربح الجزئي خير من الخسارة الكلية
ومنطق المقاومة في ايقاف قتال هؤلاء برغم قدرتها على الانتصار، يخضع لقانون ان المصلحة المتحققة من هزيمتهم الكاملة تستدعي قتل آلاف المغرر بهم من اتباع هؤلاء، وهذه المصلحة على اهميتها لا يجوز تحقيقها بهذا الثمن الباهظ اذا امكن تحقيقها بثمن اقل
ولكن هذا القانون يتعطل فور مبادرة الآخر للهجوم، ولو قرر السنيورة او جعجع او الحريري مهاجمة المقاومة اللبنانية في الغد، ستبادر المقاومة للدفاع بغض النظر عن اي حسابات اخرى

بالنسبة لموضوع ان الحوثيين يرفعون شعارات الموت لامريكا والموت لاسرائيل ولا يفعلون شيئاً لهما، وكل من يشارك في حرب اهلية يتسبب بضياع حقه
انا على يقين من ان الحرب الاهلية هي خسارة لكل الاطراف المشاركة فيها، ولكن بديلها اذا انحصر في غلبة نظام متفلت من القوانين يسير في شعبه بسيرة فرعون يستحي من يشاء ويميت من يشاء هي خسارة للانسانية جمعاء ولمسيرة يفوق عمرها تسعة آلاف سنة من محاولة تحكيم الشرائع والقوانين في العلاقات بين البشر
وبخصوص الشعارات التي يرفعونها،الحوثيين كغيرهم من احرار العرب، محكومين بواقع الجغرافيا وعندما تتيح لهم الجغرافيا ترجمة شعاراتهم الى افعال سيصبح الحكم على صدق شعاراتهم ايسر
وشعار الموت لامريكا وخلق حالة من العداء الشعبي للوجود الامريكي على ارض اليمن، ساهم في تخفيف جاذبية الاراضي اليمنية في نظر الراغبين في اتخاذها قاعدة عسكرية تنضم الى مثيلاتها في دول المنطقة
ولو كان هذا الشعار لا يمثل اي خطر على الطواغيت، بماذا تفسرين شن ستة حروب طاحنة ضد حامليه؟
في لبنان وفلسطين والعراق واليمن الشعب والمدنيين يدفعون ثمناً باهظاً للحروب، وجميع المظالم المرتكبة بحق هؤلاء في رقبة المبادر الى الظلم والاعتداء

مهندس مصري بيحب مصر said...

جمال الملك سلطان
===============
أولاً : سامحك الله
ثانياً : لم أدعي أنني أجلس في غرفة الكنترول بل قلت أن لي اصدقاء من المصريين العاملين في جازان أستقي منهم بعض الأخبار
ثالثاً: طرحك للموضوع في تعليقك الأول منطقي و عقلاني و مقنع في بعض نقاطه و يجعلني أعيد التفكير

رابعاً : نعم المواطن السعودي العادي له قيمة كبيرة عند حكومته و تسارع إلى
حمايته في أي مكان في العالم بل و تطلب رضاه طالما لم يتكلم في السياسة
و هذا ما اشاهده هنا داخل السعودية

خامساً : لو أنك راجعت ما كتبته في مدونتي وقت حادث قتل الضابط المصري على الحدود لوجدتني قد نشرت فتوى جبهة علماء الأزهر التي أكدت أن الضابط مخطئ في إطلاقه النار على أشقاؤه المسلمين المستجيرين به من القصف الإسرائيلي

فالخطأ يقع على الضابط المصري

و أخيراً سامحك الله فأنا بلا غرض و صاحبة المدونة تعرفني شخصياً و تدرك ذلك