عشان انتوا عارفين، مش فاضية بافكك اسرائيل :)، المهم كلمني مينا النهاردة وقال لي شفتي كلام بلال فضل على المدارس الانترناشونال؟ فقلت له: ما انا عارفة ده بقى انتداب، قال لي بلال استخدم نفس الكلمة، فتحت العمود بتاعه واتكسفت من نفسي، اقول لكوا ليه اتكسفت من نفسي
انا بصراحة مش باحب الناس دي، اه معلش، الناس اللي بتدخل عيالها مدارس بخمسة وستين الف جنيه في السنة، وعشان ما نتدخلش في مهاترات: جايب منين خمسة وستين الف جنيه كل سنة
ح نقول انه جايبها من حلال
طيب بذمتك يا اخي دي بلد يتصرف فيها خمسة وستين الف جنيه في السنة على مدارس تروح لاوروبا والدول المتقدمة؟ يعني انت يا عم الامور بتصرف على اورومبا من فلوسك "الحلال"؟ فبصراحة كده قلت ما بيني وبين نفسيتي: يغوروا في داهية هم وعيالهم الف مرة الف ونص مرة
بس لما قريت المقالات لقيت بلال يا عيني قلبه مخلوع وقايل لنا في المقال ده: انتوا ما بتخافوش ربنا؟
جرى ايه يا عم بلال؟ انت ح توجع لنا قلبنا ليه؟
ايوة، انا عارفة انهم مش بيدرسوا تاريخ مصر ولا جغرافيتها، وعارفة ان الخريطة بتاعة فلسطين عندهم في الكتب مكتوب عليها اسرائيل (ملحوظة: انا افخر كمصرية اننا لحد هذه اللحظة مدارسنا التابعة لوزارة التربية والتعليم لا تعترف باسرائيل في كتب التاريخ والجغرافيا) وعارفة انهم بيطلعوا معسكرات ويتقابلوا مع ناس من كل انحاء العالم من ضمنهم اسرائيليين، وبصراحة ما اهتمتش اتكلم
انا وحشة؟
امممم، انا وحشة فعلا، عشان مهما كان دول بني ادمين، وحتى لو هم واهاليهم اللي جايبين الفلوس مش عارفة منين ما يستاهلوش الواحد يعبرهم ولا يهتم هم بيتعلموا ايه، ممكن جدا يكبروا ويمسكوا مناصب على اساس بقى ان دول اللي متعلمين ومتنورين واحنا ولاد البطة السودا
انا فعلا مش مقتنعة بحكاية اصل تعليم الحكومة مش تعليم، الموضوع ده مش داخل دماغي بنكلة، انا صحيح مش تعليم حكومة، بس انا كمان مش تعليم انتداب، مدرستي كانت ارسالية انجليزية وبعد الثورة ما اتأممتش لكن بقت تابعة لوزارة التربية والتعليم وملزمة بالمنهج بتاعها وتحت رقابتها زيها زي المدارس الحكومة يعني تعتبر حكومية مملوكة لاشخاص ودلوقت حولوها تجريبية، يعني بقت مدرسة حكومة
انا عايزة افهم مال المدارس الحكومة؟ انا كل اللي اعرفهم ومخهم زي الفل تعليم حكومي، بما فيهم بلال فضل، وعلى فكرة لما كنا صغيرين كانوا بيقولوا نفس الكلام: لااااا التعليم الحكومي كان كويس زمان، دلوقت باظ
ودلوقت بيقولوا كده، ماهو انت عندك ابن فاشل ومخه على قده عشان واخد غباوتك الجينية ومش بيذاكر وعايز يصيع، والله لو وديته السربون برضه مش ح يفلح، ما تزعلش مني انت اللي مش عارف تربي، مش المدرسة هي اللي مش عارفة تعلمه، وانا عايزة اعرف تعليم ايه وتربية ايه اللي انت عايزهم لابنك اذا كان العيل ح يطلع ولاءه لبلد تانية غير بلده
يا اخي مش عاجبك البلد دي انت وعيالك غوروا منها احنا كنا ناقصين بلاويكوا؟ لكن تربوا لنا جيل ما عندوش ولاء ولا انتماء وكمان له صحاب اسرائيليين بيقابلهم كل سنة وممكن واحد منهم يكبر ويمسك منصب، وساعتها مش ح يبقى خاين، ساعتها ح يبقى مندوب الاحتلال بجد
ماحدش بقى يقول لي كل واحد عايز يطلع عياله متعلمين كويس، هو ده تعليم كويس؟ ده تعليم كويس؟ ايه وجه الكوسنة في ان ابنك يطلع ممزق ومش عارف هو منتمي لايه؟ يعني عشان يدوا له بسكوت في الفسحة ويلعبوه بالمكعبات تقوم تضحي بصحته النفسية؟ ده ح يطلع ايه؟ مصري وللا اجنبي؟ ويا اما ح يبقى عنده احتقار لبلده ولاهله، ولما يسافر على فكرة ح يتعامل على انه عربي معفن يعني لا طال بلح الشام ولا عنب اليمن، يا اما ح يحاول يستعيد نفسه وهويته الحقيقية لما يكبر (بعد ما يصب عليك اللعنات في اللي عملته فيه) وفي الحالة دي ح يبقى مسخرة كل المحيطين لانه ح يبقى "الواد الخواجة اللي عايز يعمل صايع" ليه كده؟
انا عايزاكوا تقروا كتاب الدكتور جلال امين بتاع "اكذوبة التقدم والتخلف" كتاب صغير مش كبير عشان تعرفوا ان اسطورة: التعليم المصري فاشل، دي اسطورة فاشلة في حد ذاتها
ده كلام فارغ، التعليم المصري مش فاشل، بدليل ان اخيب عيل سقيط بياخد كحك في المدرسة عندنا لما بيسافر يدرس بيجيب ايه وايه بلاس
ماشي، انت طبعا بما انك كنت بتجيب كحك وبتسقط لما تسافر وتدرس وتاخد نمر عالية ح تقول التعليم الاجنبي احسن
طبيعي، ما هو اللي بينجحك يعني وبيديلك نمر عالية
بس واقع الامر ان التعليم المصري مش تعليم وحش ولا حاجة، وخيبتنا مالهاش علاقة بالتعليم ومناهج التعليم بتاعتنا
مش صحيح ان التعليم مليان حشو، مافيش حاجة في الدنيا اسمها حشو، المخ ده زي المعدة، الاتنين نفس فكرة القربة، كل ما تملاهم كل ما يوسعوا، ومافيش حاجة اسمها وانا ح استفيد ايه بكل المناهج دي، ح تستفيد، واستفدت، ولو جربت تعمل دراسات في اي داهية ح تلاقي نفسك استفدت من مناهج البحث اللي درستها في المناهج اللي مش عاجباك
مناهج رذلة صح، بس حضرتك بتدلع، هم مفروض يعملوا لك اراجوز وهم بيعلموك؟
مش صحيح ان التعليم قائم على الحفظ مش على تشغيل المخ، ده برضه هجص
اولا الحفظ ده قدرة ذهنية وتنشيطها واجب لان الذاكرة هي نص التعليم، ثانيا، انت مش بتاخد رياضيات؟ وبتحل مسائل، ايه مافيش تشغيل مخ دي؟ ماهو بتشغل مخك اهو، ثم ان فيه حاجات كتير ما ينفعش معاها غير الحفظ مش الفهم، مش بس في مصر في اي حتة في العالم
عاصمة انجلترا: لندن
ح يفهمها لك ازاي المدرس دي؟ ما انت لازم تحفظها زي ما هي كده
شواذ الافعال في اللغة الفرنسية، ح يفهموها لك ازاي هي بتتحفظ زي ما هي، وعلى فكرة كل ما بتحفظ اكتر كل ما بيحميك من خطر الزهايمر في الكبر اكتر، ده كلام علمي
جلال امين اللي هو استاذ في الجامعة الامريكية بيقول التعليم الامريكاني اهبل، ومعظم اللي تميزوا في مصر لا كانوا تعليم امريكاني ولا تعليم اجنبي، كانوا تعليم وطني، واحنا ما عندناش مشكلة امخاخ، احنا عندنا مشكلة سيستم لتوظيف الامخاخ دي
بيدوا العيال كتب كتير وكبيرة والعيال مش بتقرا الكتب دي كلها، بييجوا اخر السنة يفروا الكتاب وينشنوا ويلخصوه في ملزمة
طيب ايه رأيكوا بقى ان ده اسمه القراءة السريعة اللي الناس في اورومبا والدول المتقدمة بتاخد له كورس ست شهور عشان تتعلمه: ازاي تقرا كتاب كبير بسرعة وتستوعب اهم النقاط اللي فيه وتلخصها، ومعظم طلبة الدراسات العليا بيلتحقوا بالكورس ده
يعني دي مهارة تانية بيتعلمها العيال في المدارس المصرية
والاهم من ده كله: انك بتطلع مصرييييييييي
مصرييييييييييييييييييييييي
لو ح يطلعوك اينشتاين ومالكش ولاء لبلدك يبقى غور في داهية مش عايزينك
