اتكل على الله واشتغل رقاصة

مش انا لما رحت الشغل قابلت ناس متضايقة ان هشام طلعت مصطفى اتقبض عليه
بيقولوا كده:
بقى اللي قتل رقاصة يتقبض عليه جنايات واللي قتل الف غلبان رايحين ياكلوا عيش وللا يعملوا عمرة ولا حتى يتمس منه شعرة؟
فيه ناس علقت بانه في احتمال تتطبخ له ويطلع منها
يطلع منها زي بعضه بس على الاقل اهو اتبهدل شوية، اتمرمط له شوية حتى لو طلع منها
يا اخوانا ماهو اتقبض عليه عشان الامارات ضغطت على مصر لو كان زيتنا في دقيقنا كان الموضوع عدى
طيب يعني اعمل ايه انا دلوقت؟ اولع في نفسي مثلا؟ حرام اموت كافرة ما يبقاش دنيا واخرة
لولا ان الامارات كان بيتهم ح يتخرب بسبب جريمة قتل حصلت على ارضهم ولولا ان عادل معتوق مرعوب لبعدين الواد المجنون ده يعمل فيه حاجة خصوصا انه حاول يقتله ما كانش اتقبض عليه هنا في مصر، يعني استثمارات الامارات وحياة منتج فيديو كليب اهم من اكتر من الف اسرة اتشردوا والف مواطن انصهروا في الحريقة وبعدين بلعهم البحر وبعدين اسماك القرش اكلتهم
ده غير اللي اختفوا الى غير رجعة
قال وتامر سايب لي تعليق يقول لي النائب العام جدع، والله انت اللي جدع يا تامر وطيب وابن حلال وراجل سكرة وتتحط على الجرح يطيب كمان
انا ما يهمنيش ان هشام طلعت مصطفى يطلع منها على فكرة، ماهو طالع طالع يعني، بس على الاقل اتقبض عليه، راح طرة، اتوجه له اتهام، اتعمل له اي حاجة
يعني لو كان اللي في العبارة دول مطربات فيديو كليب ومعاهم شوية رجال اعمال وكام قرني ومشهلاتي ومطبلاتي ومسهلاتي وموفق روس في الحرام كان ممدوح اسماعيل اتقبض عليه؟
طيب يا كابتن انت وهو...اتكل على الله واشتغل رقاصة عادل امام قالها كلمة حكمة...لا فض فوه
ولو مش عارف تشتغل رقاصة افتح للزباين اي حاجة مقفولة عندهم
ولو مش عارف البس برنيطة عليها دش
ولو مش قادر موت بقى...موت وريحنا وريح نفسك وروح عند ربنا مش ح تلاقي عنده ابدا اللي انت شايفه هنا