وضع ال..لامؤاخذة...هجوم

هو البوليس الامريكاني ضرب المتظاهرين الديمقراطيين ليه؟ هم دول ايه؟ دول امريكان يعني، وامريكان خواجات يعني مش من الامريكان العرب اللي بيروحوا يبقوا شبشب هناك وييجوا يعوجوا ضبتهم علينا
دلوقت مؤتمر الجمهوريين ابتدا جلسته التانية وجورج بوش قال كلمة عبر الاقمار الصناعية وقعد يقول ماكين ماكين ماكين ماكين ايه البواخة دي لف وارجع تاني، وماكين هو الراجل المناسب لان الراجل الدلو يحب الدلو وقال كده: علينا ان نظل في وضع الهجوم
لا مؤاخذة يعني...ما اعرفش والله احنا في رمضان
وان انسب واحد لوضع اللا مؤاخذة هجوم هو ماكين، قوم الديمقراطيين عملوا مظاهرات في اثناء الجلسة دي في الشارع
قاموا ضربوهم وضربوا عليهم قنابل مسيلة للدموع واعتقلوهم
ممكن اعرف ليه؟ لا بجد يعني هو طول العشرة معانا هنا في العراق وافغانستان ح تبوظهم وللا ايه؟ يعني عنصريين ومن زمان وعرفنا، بس اللي عملوا المظاهرات مش عرب، ولا حتى ملونين، اهو...في التلفزيون اهو اسم الله عليهم الشعر الازرق والعيون الحمر والوش اللي لو الجبنة الريكفور اللهم صلي ع النبي وبغال بسم الله ما شاء الله واكلين يعني مش المألحفين زي بتوع المظاهرات بتوعنا اللي اعجل واحد فيهم تخنه كله مية
طب ضربوهم واعتقلوهم ولا كأنهم امن مصري ليه؟ حد يضرب كلابيظو كده؟
----
بوتين بيسأل سؤال منتكي: البوارج الحربية الامريكية بتعمل ايه على شواطئ جورجيا؟ هي المساعدات الانسانية بتيجي على بوارج حربية؟ طيب يعني هم جايين كده ومتوقعين اني اسكت؟
ردوا بقى يا متعلمين يا بتوع المدارس، خلوا بالكوا ان مش اي اجابة ح تقنعه، ده مولود في نفس اليوم اللي انا مولودة فيه :) دماغه زلطة يعني..ياللا ربنا ينفخ في صورته