عن سب الذات الالهية واشياء اخرى

المصري اليوم عترت في الشاب اللي اصبح دلوقت مدافع عن الذات الالهية شخصيا وبصل الاسلام والعروبة
هلبت البت حكت له العربية، انظر الفيديو، ومشيت راح جاري وراها ونزل وخبط جامد على الازاز ودفعت له التكاليف 200 جنيه واخدهم المعفن، وهو بيقول انها قالت له: على فكرة ..امك، يعني بصرف النظر عن ان واضح ان دي مفرادتها، بس مجمل القول انها استنقصته، وبصراحة لها حق، انا شايفة الخبطة في العربية ماهياش خبطة اصلا دي حكة، يقول لها 200 جنيه وهو بنفسه بيعترف انه بالغ في الفلوس عشان اسلوبها استفزه، يعني المفروض انه ماشي في الشارع يربي الناس واللي يتكلم باسلوب استفزازي يدفع غرامة للشاب السائق المؤمن بصل الحرب والسلام والدفاع عن الذات الالهية، بعد ما دفعت له الفلوس وقالت له الكلمة دي اللي بصراحة لها حق فيها راح واقف لها بعرض الشارع عشان يجبرها على الاعتذار، ولا بيقول ايه انه وقف لها بعرض الشارع في وش عربيتها وما كانش قصده اي حاجة غير انه يعرفها غلطها، وبعدين هو بيقول انها نزلت وراحت على طول مطلعة الصاعق وشفتوا المشهد، ولولا انه معاه خطيبته (اللي انا لو مكانها كنت فسخت الخطوبة)، ده هو اللي بيقول، ما كانش سابها تمشي، امال ايه التليفون اللي عملته ده؟ امال ايه: ابعت لي ظابط دلوقت حالا؟ ما بعتلهاش ولا حتى عسكري مراسلة...هو مين بقى اللي مفروض يبعت لها؟ آآآآه ابوها...طيب هي بعد ما مشيت وما استنتش الظابط اللي ابوها كان مفروض يبعته، اقطع دراعي ان كان ابوها امين شرطة، هو نفسه بقى الشاب الضحية المسكين المنكسر مهيض الجناح اتصل بواحد صاحبه ظابط شرطة قام صاحبه قال له: هات لي البت دي انشالله تبقى بنت وزير...قوم راح الواد جاري وراها لحد ترعة المريوطية واستوقفها تاني، وبيقول انها تاني نزلت هددته بالعصايا، والله انا لو مكانها كنت فتحت دماغه بالعصايا دي واللي يحصل يحصل، قامت مامتها جات واغمى عليها.
امال فين عسكري المراسلة اللي طلبته هوم ديليفري بالتليفون؟ ابوها سعات اللواء الطبيب المهندس اركان حرب ما جاش ليه؟
ومين اللي استغل علاقاته الشخصية بحد في الشرطة في الواقعة دي؟
دلوقت فيه انسان حك عربية لانسان والانسان التاني بنتانته لقى ان اللي سايق واحدة ست ومع ذلك نزل يستوقفها وبالغ في تكاليف تصليح العربية واستوقف العربية بعد ما البنت دفعت له الفلوس واتخانقوا مع بعض ولما مشيت اتصل بصاحبه ظابط الشرطة وجري وراها عشان يجيبها لصاحبه الظابط
يبقى مين اللي بلطج دلوقت؟ المتعارف عليه في الشارع ان لما بنت بتخبط عربية لراجل مش بيرضى ياخد منها فلوس خصوصا لما بتبقى خبطة بسيطة، ده لما يبقى ابن ناس يعني مش بلطجي، ودي حكت العربية ما خبطتهاش
دلوقت ايه جريمة البنت دي اللي ماحدش لسة سمع شهادتها؟ كل الكلام ده وبالمناسبة فيه ادانة للشاب الضحية رافع راية الايمان والذائد عن حياض الذات الالهية، كل الكلام من بقه هو، هي لسة ما اتكلمتش
جريمتها انها قليلة الادب؟ يا محن.. على كده 95 في المية من المدونين المفروض ياخدوا مؤبد.. يعني ح تمشوا تربوا الناس في الشارع؟ وللا جريمتها انها سبت الذات الالهية؟
اههههههههههه ما يحكمش...انتوا ح تخلونا نردح بقى يا عمر؟ على كده بقى كريم عامر يستاهل اعدام بقى، الشيخ البدري ده راجل له الف حق في كل اللي بيعمله، لا وعبده كمان...امال بتغنوا له لا والنبي يا عبده ليه؟ انتوا خليتوا فيها نبي؟
الواد بيقول انا مش متأكد ان ابوها ظابط...يعني ماحدش داس له على طرف
يبقى ابوها ظابط ايه؟
ظابط ايقاع اكيد