هو انا بطلت اسمع ام كلثوم ليه؟

يا اخي انا عرفت الناس في الستينات كان يتعمل فيها مهما يتعمل فيها وساكتة، لا مش عشان الحلم القومي ولا عشان الصبر لتحقيق احلام الثورة ولا كاريزما الزعيم
عشان ام كلثوم عاملة زي المهدئ
انا راجعة في التاكسي، بعيد عنكوا العربية عفشتها عايزة تتغير بتعمل الاصوات دي: تؤ تؤ تؤ، كيئ كئ كئ، إيآآآآآه إيآآآآآآه إيآآآآآآآآآآه، إيو إيو إيو،
والميكانيكي قال لي بصراحة انا مش عايز اخضك بس احنا عايزينك
المهم راجعة في التاكسي لقيت السواق، وهو ينتمي الى تاريخ مصر التليد، مشغل اغنية لام كلثوم، والله كنت نازلة من الشغل مهيبرة سمعت الشوية اللي سمعتهم، هي طبعا طول السكة بتقول في كوبليه واحد، المهم سمعت: أنساك..أنساك...أنساك ياسلام...أنساك...ده كلام... انساك يا سلام..انساك ...انساك...انساك ياسلام...انساك...ده كلام...انساك يا سلام....أنساك...انساك...انساك يا سلام
لحد ما وصلت البيت، على ما وصلت كانت اعصابي هادية والحياة لونها بمبي وانا جنبك وانت جنبي، واول مرة اخد بالي ان عندنا في العمارات شجر حلو كده، واول مرة اخد بالي ان الزهر بتاعه فتح والوانه حلوة كده
واذا فكرنا بنظرية المؤامرة اللي انا واخدة تصريح من جلال امين اني افكر بيها انا حرة، المهم، نقدر نقول ان الفن موجه سياسيا، وعشان كده مثلا النظام في ايام الستينات كان عايز يهدي اعصاب الناس عشان ما تعملش مشاكل
السؤال بقى
ليه النظام الحالي عايز يعصبنا؟ ايه السر؟
----
ملحوظة: انا عجبني البوست بتاع سو عن فيلم الغابة، الحقيقة انا كنت متوقعة ان فيلم الغابة ح يصدم ناس كتير مش بس فيما يخص الموضوع ولكن كمان فيما يخص التكنيك، على اي حال
وبالرغم من اني عمري ما شفت سو ولا قابلته ولا حتى اعرف اسمه الحقيقي ايه، بس انا فهمت من مدونته انه دارس سينما، على ما اظن، آمل ان يكون فهمي صح، بس البوست بتاعه عن فيلم الغابة بتاع واحد بيفهم في السينما بجد، مش بيعمل نقد على ما تفرج يعني
شوفوا كده