لو نحكم عقلنا

ماو تسي تونج لما قالوا له: لديك مائة الف بطن جائعة، قال: بل لدي مائتي الف يد عاملة.
لو نحكم عقلنا يا عقول العصافير يا حكومة وسخة، ح نسأل عن مشاريع التنمية اللي مفروض تشغل الناس، لو نحكم عقلنا ح نسأل عن اراضي الفلاحين اللي بينطردوا منها وبتتجرف من الطمي وتدوها لرجال الاعمال وبعدين تاخدوا الصحرا بتاعتنا برضه تدوها لرجال الاعمال وتعملوا كومباوندز للاجانب واحنا مش لاقيين نسكن وتخلوا رجال الاعمال يزرعوا اورجانيك ويعملوا كيلو الخيار بخمستاشر جنيه وكيلو القوطة بعشرين جنيه وبلاش نتكلم عن الفاكهة عشان مش عايزة اسمع اصوات مش كويسة في المدونة هنا
لو نحكم عقلنا نستغرب منين عددنا كبير قوي ومحتاسين فينا ومنين بتبيعوا المصانع وتشردوا العمال؟ بدل ما تزودوا المصانع وتزودوا التنمية وتشغلوا الناس
لو نحكم عقلنا نعرف ان عددنا مش كبير بالنسبة لمساحة مصر ابدا بالعكس، مساحة مصر، بالصحرا اللي بعتوها لرجال الاعمال المصريين والاجانب، والشوية بتوع الوليد بن طلال، وان المساحة دي تستوعب تمانين مليون فوق التمانين مليون، ومش ح اكون حالمة واقول الدولة تعمل تنمية بس على الاقل المشاريع التنموية اللي عملها طلعت حرب واللي اتعملت بعد الثورة ما تتحطمش وتتكسر وتتباع روبابيكيا
وبعدين يرجعوا يقولوا بتخلفوا ليه؟
الاطفال دول نعمة ربنا، والمفروض انهم ثروة قومية، احنا من ارخص الايدي العاملة في العالم وانشطها، اشمعنى في كل حتة في العالم بيطلبوا مصريين يشتغلوا واحنا اللي بلدنا مش عايزانا وعايزة تجهض نسوانا وتخصي رجالتنا زيادة ما هم...ماعلينا ما علينا...والاكادة ان اصحاب العقول في راحة
خلاص دخل في اللا وعي بتاع المصريين ان الخلفة - اللي في كل الاديان وفي كل الحضارات نعمة واللي يكرهها يعمى - دخل في دماغهم ان الخلفة دي حاجة وحشة، وبقينا البلد الوحيدة اللي النعم فيها بقت مصايب والمصايب - زي تحويل كل حاجة في الدنيا لسلعة بما فيهم البني ادمين - بقت نعمة والناس بتجري وراها
لما الحنفية تخر تصلح الجلدة وللا تقطع المية
هي المشكلة في ان مصر فيها شعب؟ وللا المشكلة ان مصر فيها حكومة مش عارفة تشغل الشعب وتعمل له مشاريع وتسيبه يزرع ويصنع وعايزة تبيع البلد بالقطاعي ورجال الاعمال اللي كلهم سماسرة ومافيهمش منتجين عشان السمسرة بتكسب اكتر
قال نحكم عقلنا قال...انتوا خليتوا فينا عقل؟