Wednesday 4 June 2008

ح تعمل ايه لو امريكا قررت تنشر الديمقراطية عندنا

الفرضية دي مش مطروحة في دماغ المصريين خالص، يعني بوصفنا ناس مؤدبة وبنسمع الكلام وعاملين خدنا مداس لامريكا وايه اللي يخليها تحاول تنشر الغسيل عندنا احنا ما عندناش منشر اصلا
بس يعني يجرا ايه لو فكرنا في كل السيناريوهات المحتملة حتى لو كان احتمال ضعيف، على الاقل عشان نبقى فاهمين ايه اللي ممكن يحصل وما تبقاش الامور مختلطة علينا زي ماهي مختلطة دلوقت
ح نعمل ايه لو ماكين نجح - وهو ح ينجح بقى لعلمكوا - وطق في دماغه ينشر الغسيل عندنا بما انه نظره ضعيف ومش بيسمع كويس وجمهوري يعني ممكن راخر يكون بيسمع اصوات ويقول ربنا بيكلمني وسمعه تقيل فيسمع: انشر الحرية في الكونغو
يسمعها انشب الحرب في مصر
ح نعمل ايه؟ بصراحة انا مش مطمنة لنا
فيه اسباب كتير تخلي امريكا عايزة تنشر الغسيل هنا
انا مش باحب افرض مسلمة على اللي باتكلم معاه بس خلينا نقول اني انا شخصيا مؤمنة بمسلمة ان امريكا ما يهمهاش غير مصالحها وخدمة مصالحها عندنا، ومصلحتها اننا نبقى مداس ونبقى في حالنا زي ما احنا في حالنا كده
والحقيقة النظام الحالي قام بالواجب وزيادة كتر خيره، بس النظام الحالي بقى مكروه قوي من المصريين، انا شخصيا ما كنتش باكره مبارك لحد يوم خمسة مايو بعد خمسة مايو بقيت اكرهه لاني حسيت انه عايز يذلنا ويكسر مناخيرنا
طب ده مؤشر خطر ومش حلو، لان ده معناه ان المصريين ممكن يتحركوا ضد النظام الحالي، طبعا انا وانت عارفين اننا لا ح نتحرك ولا نروح ولا نيجي لان المواصلات غليت بس هم ح يفكروا كده
وفيه من المعارضة كتير مستعدين يتعاونوا مع امريكا عشان ينطوا على السلطة ويحلوا محل النظام الحالي وانا مش ح افسر بقى وكل واحد عارف نفسه وانا وانتوا عارفين، وفيهم ناس مش بتخفي تعاونها مع امريكا وهم لسة معارضة لا راحوا ولا جم وبيقولوا واشمعنى الحكومة بتتعاون مع امريكا جرا ايه لما نتعاون احنا كمان
وش كده وانا مش ح افسر بقى
لحد دلوقت الاخوة المتعاونين بيقولوا لامريكا مافيش داعي تتدخلي احنا ح نتصرف وبيتكلموا بالظبط عن كل اللي امريكا عايزاهم يتكلموا فيه وبيطنشوا على كل اللي امريكا عايزاهم يطنشوا عليه ميت فل وسبعتاشر
بس مؤخرا امريكا بقت تعتمد سياسة بيدي لا بيد عمرو، يعني بقت تحب تستف الامور بايدها مش من بعيد عشان كل حاجة تتظبط وعلى راي المثل ما قتل ضحيتك مثل قنابلك فتولى انت جميع مذابحك
ح نعمل ايه لو لا قدر الله حصل كده؟
هي الناس بتتضايق لما باسأل ح نعمل ايه؟ ما انا فاتحة مدونة عشان ناخد وندي مع بعضيتنا انا مش رفاعة رافع الطهطاوي عشان اقول للناس ح نعمل ايه انا واحدة غلبانة على قد حالي
فيه ستميت طريقة امريكا تدخل بيها: ح يقولوا النظام ده بينتهك حروق اللسان وبالفعل هو بيعمل كده
ح يقولوا احنا داخلين ندافع عن المعتقلين السياسيين (اللي بوش جاب سيرتهم في شرم الشيخ) ح يقولوا احنا داخلين ندافع عن الاقباط اللي كل اللي رايح واللي جاي عمال يفتي ويتكلم بخصوصهم
امريكا: تستخدم الكلام عن الاقباط عشان تضغط على مصر
الدولة: تسلط عليهم بلطجية عشان تبرر لامريكا هي ليه عاملة قانون طوارئ
بعض المعارضين (عشان ماحدش يتهمني بالتعميم): عاملين الاقباط غنوة وموال ومصممين يضخموا الامور ويدوها اكبر من حجمها عشان يعملوا زي ريا: اغريه اغريه
يعني عايزين يقولوا لامريكا النظام الحالي مش عارف يدافع عن الاقباط واحنا ممكن ندافع عنهم اكتر
والدولة وبعض المعارضين بيحبوا يفهموا امريكا ان المسلمين بطبعهم امل حياة كل واحد فيهم انه يمسك دراع قبطي ويقرمه لحد ما تطلع اللغاليغ في بقه
والصورة دي حلوة جدا بالنوسبة لامريكا عشان ده ملف بالنسبة لها زي ملف الشيعة في العراق
وكل اللي رايح واللي جاي عمال يلطش في الاقباط
واحنا (مسلمين ومسيحيين) قاعدين فاتحين بقنا ومش عارفين نعمل ايه بقفانا ده اللي بقى شبه الطريق الدائري
فيه قضايا حقيقية بس ينطبق عليها: كلمة حق يراد بها باطل
وفيه قضايا ثانوية اذا ما قورنت بقضايا تانية حيوية بيتم تجاهلها تماما
وفيه قضايا بيتم تفسيرها بشكل منافي للحقيقة بشكل متعمد عشان تستخدم بما يخدم مصالح ناس معينة احنا مش من منهم طبعا
طب ح نعمل ايه؟ انا ما عنديش ثقة في اي جهة
اكيد ما عنديش ثقة في الحكومة
المعارضة جزء منها ما عندوش مانع للتعاون مع امريكا والحقيقة هم متعاونين لدرجة انهم بقوا شبشب بحيث انهم ما يقدروش يمنعوا امريكا لو قررت تنشر الغسيل في المنشر بتاعنا
والجزء التاني متخلفين واغبيا وكل ما ييجوا يحلوا يعقدوا وبيتصرفوا بعصبية وعبط
طب بالنوسبة للسناكيح من امثالنا، اقصد الشعب المصري الغلبان
المؤسسات الدينية (الاتنين اذا كان دولم وللا دوكهمة) اللي كانت دايما بتبقى المفرخ للمقاومة اتكسحت خالص بسبب اضعاف الدولة ليها والهجوم عليها من المعارضة وفساد لا يمكن انكاره ابدا بداخلها
ح نعمل ايه؟
ده احنا الدنيا لما بتمطر مصر بتتحول الى منطقة كوارث، احنا حمل حاجة؟
طب نقول اننا نعمل اصلاح من داخلنا قبل ما حد يتدخل؟
طيب يعني هم لو قرروا يتدخلوا ح يفرق معاهم عملنا اصلاح وللا ما عملناش؟
ايه ده؟ هي الدنيا ضلمت كده ليه؟
لا خلاص خلاص....انسوا الموضوع
ربنا مع الغلابة جابر يا عم هو انا ايه اللي جاب الافكار السودا دي في دماغي؟


No comments: