مستشفى المطرية التعليمي ماعندهمش مولد كهربا؟

مستشفى مافيهوش مولد كهربا؟ يتقطع النور تلات اطفال في الحضانات يموتوا؟
يعني ايه ده
الفيديوهات عند احمد عبد الفتاح حاولت اشوفها ما قدرتش اللي يقدر يشوف انا ح احاول استجمع شجاعتي واشوف تاني
والخبر اهو
اهم ارتاحوا الله يكون في عون امهاتهم
----
شفت الفيديوهات
ده اسمه كلام؟ ده اسمه كلام؟ انا بجد عندي سؤال بما ان عيلتي كلها دكاترة ومافيش مرة جرؤت اسألهم السؤال ده لكن الدكتور يجاوبني: انتوا بتدخلوا كلية الطب ليه؟ ها؟ بتدخلوها ليه؟ عشان المجموع؟ يعني انت مش عارف انك في البلد الوسخة دي بعد ما يطلع عينك في المذاكرة واهلك يبيعوا هدومهم عليك والدكتور رايح والدكتور جاي في الاخر ح تشتغل حانوتي؟ حانوتي؟
قبل ما اشوف الفيديوهات كنت باقول الله يكون في عون امهاتهم دلوقت باقول ربنا يعوض على امهاتهم انما الدكتور اللي عيل يموت في ايده مش لاي سبب غير لان المستشفى الوسخة اللي هو شغال فيها الكهربا اتقطعت منها كانه شغال في طابونة مش في مستشفى ده احساسه ايه؟ ح ينام ازاي وهو حاسس انه فشل في انقاذ حياة انسان مش لاي قصور منه ولا حتى يقدر يقول عملت اللي عليا، لاهو عارف عمل اللي عليه وللا لا؟ ولا هو عارف هو بيشتغل في ام المستشفى دي ليه؟ ولا هو عارف ايه اللي طسه في مخه وطلعه دكتور؟ والدكاترة في مصر اكتر من الهم على القلب ويا اما بيهجوا من البلد يا اما بيلسعوا يا اما بيسيبوا الطب ويدخلوا معهد خدمة اجتماعية
ولما احنا شايفين حال الدكاترة كده، ليه فيه ناس تانية بتدخل كلية طب؟ بجد ليه؟ عشان يقولوا عليك الدكتور؟ بلا نيلة الصيت ولا الغنا ده انت الطبيب الوحيد في العالم اللي تحت خط الفقر
عشان جبت مجموع؟ لو الفلاحة بالمجموع ما كانش حد غلب
وتفضل تذاكر قبل التخرج وبعد التخرج وماجيستير ودكتوراه وابحاث وتفضل الطالب الخالد ما تبطلش مذاكرة ابدا وكل اللي يشوفك حتى في عزومة غدا: والنبي يا دكتور وركي بينقح عليا، والنبي يا دكتور ارنبة مناخيري بتترعش
وكل ده عشان ايه؟ انت فاكر نفسك بتساعد الناس؟ بايه؟ اطبخي يا جارية كلف يا سيدي ما انت عارف انك مش ح تقدر مهما استقتلت عشان تساعد الناس
بس تعيش نفسك في كوابيس؟ ح تشتغل في مستشفى استثماري؟ اتلهي على عينك اشتغل حرامي اسهل وارخص ومش ح تضطر تمقق عينيك في المذاكرة وتقرف نفسك بدم الناس ومخاط الناس ومصارين الناس وانف الناس واذنهم وحنجرتهم ده انت اكتر واحد بيشتغل في القرف ولا كأنك في السلخانة وكل ده على ايه؟
الدكتور اللي في الفيديوهات دي، اللي فضل يحاول ينقذ العيال وفي الاخر مسك ايد عيل وفضل يبص له وهو بيموت في ايده بعد ما فشلت كل المحاولات
ده احساسه ايه؟ ح يعيش ازاي؟ ده باظ خلاص...ما بقاش ينفع تاني، ده ح يلبس باروكة صفرا وبنطلون استرتش دهبي ويمشي يرقص في الشارع
حرام عليكوا حسبنا الله ونعم الوكيل استلموا الفيديوهات
واتفرجوا عليها اشمعنى اتغميت