انا لا اعمل لقاءات تلفزيونية ولكني باقتم على مخاليق ربنا

الدستور كاتبة النهاردة نقلا عن مصادر في الحزب الوطني وعن الفاينانشال تايمز (والله عال بنعرف اخبار بلدنا من الخواجات) ان حمادة عزو بعد ما سيخ الشعب بحديد عز دفع خمسة وسبعين مليون لحملة اعلامية لتحسين صورته
احسن يا حمادة...احسن، مال الكنزي للنزهي، لا وايه...ده جاب فرقة حسب الله تدربه على انه ازاي يتكلم ازاي يفلت من المطبات ازاي يتمشى ازاي يتدلع، علموه الكتاكيت يعني.
يعني البت سنية اللي طفشت ولم التعابين..هي فين التعابين طب هو فين الظابط وكل الهبل ده المحروس دفع فيه فلوس عشان يتدرب عليه، يعني حتى الهطل جاب ناس تعلمهوله، يا اخواتي، ايه الطفل المعجزة ده؟ هو ده اللي حاكم البلد؟
اتاري منى الشاذلي كانت مضروبة على قلبها ومكبوسة من اول الحلقة، ماهو جاي بالامر بقى
طب ليه كده يا حمادة؟ ليه؟ انت لاقي فلوسك في الارض ياخويا؟ اه لاقيها في الارض انا عارفة، بس طب ما بدل ما تصرف فلوس عشان تشخبط صورتك وتشوهها زيادة ماهي متشوهة ما ايه رايك تدي الفلوس دي لاصحابها؟ يعني حضرتك لو من الاول كده عملت رجل البر والتقوى وقلبتنا باليمين وصرفت شوية من الفلوس اللي قلبتنا بيها بالشمال على الفقرا مثلا، مثلا يعني ولو اني انا شخصيا باتضايق من المشاريع الخيرية، بس لو كنت عملت كده كانت صورتك اتحسنت لوحدها عشان الناس غلابة، غلابة قوي، ومش ح يقولوا لك انت ح تحسن علينا من فلوسنا؟ لا ابدا، ح يقولوا لك بالهنا والشفا
انا عايزة اعرف مين يا حمادة اللي فهمك انك لما تطلع برغيك وتقل دمك ده صورتك ح تتجمل انت خنقتنا وكبست على انفاسنا، ثم من الاخر كده احنا بنكره رجال الاعمال، انتوا احسن حاجة تعملوها انكوا تغوروا من وشنا الساعة دي عشان عفاريت الدنيا بتتنطط في وشنا عشان انتوا السبب في اللي احنا فيه
غوروا بقى من وشنا..غوروا من وش...اففففف مشيه يا عم مشيه انا مش عايزة اكلمه، مشيه من وشي الساعة دي دي ساعة شيطان وانا مش عايزة اغلط
صورة ايه يابو صورة؟ اذا كان ساويرس الصعيدي الحرش ابو دم خفيف كرهناه عشان تصريحاته واراءه اللوذعية وهو نازل فتي يمين وشمال في اللي يفهم فيه واللي ما يفهمش فيه واتحفنا اخر حاجة لما قال الحكومة دي احسن حكومة جات مصر قوم انت يابو دم بق وكمان منوفي وعايزنا نستحملك؟
هو احنا ياربي انكتب علينا نتسرق ونتقلع ملط وكمان ما نعرفش نفتح التلفزيون ونشوف فيه اي حاجة عدلة؟ يعني سرقة وكتمة نفس؟ مش كفاية اللي عامله فينا صاحبك
الا احلى حاجة في برنامج العاشرة مساء ان منى بتقول له بيقولوا انك انت والسيد جمال مبارك بينكوا صداقة شخصية
فرد بمنتهى التلقائية: لا لا لا انا وجمال مافيش بينا صداقة خالص
وبعدين انا وجمال ايه اللي ح يخلينا نبقى صحاب، انا اكبر من جمال بتلات سنين، وانا كنت في مدرسة بورسعيد وجمال كان في مدرسة تانية وانا وجمال وانا وجمال وانا وجمال وقبل ما يقول: انا والواد جيمي بتلات ثواني اخد باله وراح قايل: الاستاذ جمال
وده برضه تدريب فرقة حسب الله السادس عشر؟ طب ارفدهم بقى، امال لو ما كنتش متدرب كنت عملت ايه؟
انا والله مش صعبان عليا غير الخمسة وسبعين مليون....فلوسنا يا ناس
-----------
ملحوظة: ماجدة شيدر (الرومي سابقا) كانت واقفة تغني قدام حسني مبارك وهو طبعا كالعادة بيهز رجله وبيغني - على فكرة انا شاكة انه ممكن يكون عنده موهبة الغنا زي ما السادات كان عنده موهبة التمثيل، طب ما اشتغلوش في الفن ليه ورحمونا احنا؟ - وكان عمال يغني معاها، بمنتهى الجرأة، بمنتهى البجاحة، بمنتهى العين الباجسة: احلف بسماها وبترابها/ احلف بدروبها وابوابها/ احلف بالقمح وبالمصنع....بسسسسسسسسسسسس
عنننننننننننننننننننندك
يعني اذا كان حسني مبارك ح يحلف بالقمح وبالمصنع، يبقى ضروري انا كمان احلف بالعربية الشيروكي اللي عندي وشعري الاصفر وعينيا الزرقا والواد مينا يحلف باسلامه ومالك يحلف بلسانه اللي بينقط سكر وغادة عايزة اتجوز تحلف بشهر العسل اللي قضته في فيينا واحمد عز وجمال مبارك يحلفوا بخفة دمهم وخالد يوسف يحلف بادبه وعمرو خالد يحلف بفقره واحمد نظيف يحلف بنباهته وفاروق حسني يحلف بالنسوان اللي في حياته
لا والمصيبة بقية الغنوة: بولادي بايامي الجاية
ولاده واهم كابسين على نفسنا، لكن جاية؟ جاية مين؟ جاية فين؟ ليه نبرة التهديد دي؟ وانتشوا لازم تشرعبوني هو انا قلتش لأ؟