Monday 20 August 2007

بيقولوا خمسة وعشرين سنة

ابتداء التدوينة دي عاجباني موت
ولميت زمايلي وقعدنا نقراها
وسط تعالي صرخات الاستحسان مع كل جملة فيها
خاصة الاقتراح العلاء سيفاوي العظيم
بان يبحث الصحفيون عن مهنة شريفة
وانا اعتبر هذا الاقتراح هو اقتراح
2007
وعلينا نحن الاخوة ان نسعى لحملة كبير
للبحث عن مهنة شريفة للصحفيين
تبدأ بكشك سجائر مرورا بمشاريع
الحلاونية واللانجيري ومحلات الجزم وتلاجات الحاجة الساقعة
وانتهاء بتمويل اي حاجة
اي حاجة في الدنيا
الا جرنال بس ممكن حد يجاوب لي على السؤال اللي محيرني
يعني ايه رجل اعمال يساري؟
====
بعد التدوينة المكن دي عملت في نفسي عملة قذرة
ونكدت على روحي ومش عارفة ح انام الليلة دي ازاي
اتفرجت على العاشرة مساء
اتكلموا طبعا عن الاحكام اللي اندبها الناس ما بين مؤبد لخماشر لحلوح
مش مهم قضاء الله وقدره ولا انا عارفة هم دول عملوا كده فعلا
وللا اعترفوا بعد ما اتشنيروا بهدف واحد بس ان ح الضابط
يرجع لهم السنتين اللي وقعوا منهم في الضرب
المهم ابو واحد من المحكوم عليهم بالمؤبد
راجل غلباااااااااان وعجووووووووووووز ومريض اكيد
مش قادر يمشي ولا يقف ولا يتكلم
وشه عليه كل غلب الدنيا والزمن والسنين والهم والبلا الازرق
بيقول: هم الظاهر اللي عملوا الحاجات الارهاب كانوا من شبرا الخيمة
واحنا ساكنين في شبرا الخيمة فاخدوا من شبرا الخيمة عشوائي كده
وانا اعمل ايه دلوقت
والعيال الصغيرة دي مين لها؟
بيقولوا خمسة وعشرين سنة
هي الستين جنيه اللي بناخدها تعمل ايه
ودور وشه وهو بيعيط بوجع سلخ لي قلبي
ومشي وهو بيحسس برجله على الارض لانه مش قادر يرفع قدمه من عليها
ولا قادر يفرد ضهره
اعمل ايه انا دلوقت؟
طول ما انا راجعة في السكة من الشغل
وبرغم اني عليت نجوم اف ام على الاخر عشان تلهيني
الا ان استظراف مذيعينها ما قدرش يغطي على صوت الراجل
وهو بيقول: بيقولوا خمسة وعشرين سنة
انا اصلي هايفة
اجي عند حاجة كده وتمسك فيا
مش عارفة ليه الجملة دي بالذات هي اللي قطعتني
"بيقولوا خمسة وعشرين سنة"
ومش عارفة ليه برضه
"بيقولوا"
بالذات هي اللي نازلة زي الكرباج على قلبي
طول ما انا في السكة حاسة ان حد طلع قلبي
ونزل عليه بالكرابيج وعمال يقول: بيقولوا خمسة وعشرين سنة
العيال دول يعملوا ايه؟ الستين جنيه دي تعمل ايه؟
طيب يعني دول اتسجنوا
وما بقتش عارفة مين المسئول عن حال الراجل ده
الامن اللي عذب العيال
وللا القاضي
وللا هو فعلا الواد عمل كده من غير ما يفكر في الراجل ده
والله ما انا عارفة
والله ما انا عارفة
كل اللي عارفاه ان الراجل ده لو اتساب كده ح يموت
وانه في رقبته احفاده
مش عارفة هل ممكن نلاقي سكة للممدوح اسماعيل
المحامي بتاع العيال دي ونشوف ممكن نساعد الاطفال والراجل العجوز ده
بايه وازاي؟
وللا غلط وللا ايه؟ يعني هم مالهمش ذنب
سواء اللي اتحكم عليهم دول مجرمين وللا ابرياء
اللي وراهم مالهمش ذنب
وللا هه؟

8 comments:

Anonymous said...

الله أعلم الغلط عند مين بس أنا خايف ان الغلط في الأخر يطلع عندك لأنك حاسيتي بجد بالراجل ده ولو فضلت كده هتتعبي لأن المصريين نصهم فى نفس المعاناه

Anonymous said...

بصي يا نوارة
مع احترامي الشديد ليكي ولرايك وانتي عارفه انا بقدرك قد ايه
كلامك لا يليق بحد عالاقل مثقف مش هقول
ناشط سياسي
الصحفيين الي حضرتك بتتكلمي عنهم بيعملوا مهنة من اجل المهن في التاريخ
دول ناس وهبوا حياتهم للحقيقة
وانتي ادري مني بالف مرة ان واحد منهم ممكن يروح في شربة مية بسبب معلومة صغيرة جدا كان عايز ينلقها للقارئ بتاعه
بصي يا نوارة
مش عشان حد منهم وحش يبقي هما كلهم ولاد بتاع
مش عشان حد عمل حاجه غلط يبقي كلهم بيشتغلوا في مهنة مش شريفة
بلوم عليكي حكمك الظالم ده
ممكن تقولي يا ست الي بتدوري لهم علي مهنة شريفة ايه منظر حياتنا بدون صحف وبدن الجزيرة والبي بي سي ورويترز ؟
انا معاكي ان الي هبب الهباب ده حد مش صحفي اصلا
بس ده يصوغ لعلاء سبه بامه ؟
ويسوغ لكي وله انكم تقولوا يدوروا علي مهنة شريفة ؟
نوارة يوم ما حد مننا بيتاخد اول حد بيقف جنبنا واول حد بنجري عليه هو الصحافة
تحياتي يا زعيمة
بس اتمني تراجعي كلامك الي مصر انه ظالم للغاية
واعتقد انك مدينة للاعتذار للصحفين كلهم

Anonymous said...

دكتور سامبو
اه مااناتعبت فعلا

احمد عبد الفتاح

والله يا احمد انا نفسي صحفية

وهربت للتدوين لاني بصراحة
و...يووووووووووو انت يا احمد شرير وكل شوية تخش تستدرجني في الكلام

بص يا احمد الصحافة المصرية بقت طراش

انا مش باتكلم عن افراد زيد او عبيد
والا انا واحدة من هؤلاء الافراد اللي بيعانوا من حالة الصحافة دلوقت
انا باتكلم عن المنظومة الصحفية

بقت حاجة تثير الاشمئزاز والغثيان والقئ والاسهال والضغط والسكر والقلب

الجرنال يا اما يبقى هجص
يا اما يقدم بلاغات امنية في البشر ويقول خبطة صحفية

يا اما يضرب اخبار

واسألني انا بقى عن الصحفيين الضريبة

واللي بيقعدوا في مكاتبهم يألفوا ويلحنوا وقال الدكتور فلان وصرح البتنجان علان

بص يا احمد

انا في ام مطبخ الصحافة ده من وانا عندي تسعتاشر سنة

امال انت فاكرني مهسهسة ومهيسة كده من شوية
والله ده انا كنت زي الوردة المفتحة

وشغلانتنا ما بقتش شغلانة شريفة

ودلوقت لما تكلم رئيس تحرير في ميثاق الشرف الصحفي يتقصع على جنبه اليمين ويضحك كأنك بتقول له نكتة

وانا اساسا زهقت من اننا نحط روسنا في روس بعض ونقعد ننم على رئيس التحرير ونرسم له خطط عشان ما نتورطش في حاجة لا اخلاقية وفي نفس الوقت نعرف نشتغل وما نترميش في الزبالة عشان مش على مزاجه

وما تقوليش مش عارف ايه

ومش عارف ايه

الصحف القومية وللا المستقلة حاجة تطرش

واللي ما يطرشش يتقفل على مش على مزاج صاخب المخل

فهمتني

يوووووووو انا قلبي معبي وما تجرجرنيش في الكلام اكتر من كده خلينا ناكل عيش

Anonymous said...

انا شفت حلقة العاشرة مساء كمان ومش عارفة انام لغاية دلوقتي من منظر الراجل العجوز

وحاسة انهم مظلومين

صراحة الواحد تعب

Anonymous said...

http://almwatn.blogspot.com/2007/08/blog-post_7962.html
ياريت تشاركونا

Anonymous said...

http://almwatn.blogspot.com/2007/08/blog-post_7962.html
شاركونا

Anonymous said...

الاستاذة العزيزة
نوارة هانم

بجد مش عارف اقولك ايه ؟

بس ليه ديما بتحولي تثبتي من فترة للتانية انك متناقطة مع نفسك

ليه بتزعلي اوي لما واحد بيشتمك بامك مثلا وفي موقف آخر تعجبك الشتيمة دي ( موت ) لو طلعه من علاء

ايه الجميل في واحد عمال يسب ويلعن ودي مش اول مرة في صحفي علي اقصي تقدير أخطأ خطأ مهني يمكن انت تقعي فيه وبسهولة بدون قصد

ايه الرائع والجهنمي في كس أمك ويا ابن الوسخة ودين اهلك

هي الحاجات دي بقت عبقرية واكسسوار للمدون الجامد

ليه مصرة وتحديدا في تعليقاتك عند علاء أو مالك أنك متبقيش نوارة؟؟؟؟

مرة تستخدمي الفاظ دنيئة جدا وأخري تحاولي تثبتي انك برم وبيئة وثانية تصري علي تنبيه الناس انك ضريبة سجاير وبتشربي مونديال

لييييه؟؟؟؟

علي فكرة بس انا كنت صحفي واخترت ان اترك الصحافة مختارا واعلم تماما حجم السلبيات في الوسط الصحافي في مصر ولكن هناك فعلا من الصحفيين من يؤمن بالناس وبأهمية دوره وهم ليسوا بقلة

من العبث وضع الصحافيين كلهم في سلة واحدة

ثم ان كل مجتمع يحصل علي الاعلام الذي يستحقه

بجد نصيحة من واحد يحترمك ويقدرك

انت محتاجة وقفة مع نفسك لمراجعة اولوياتك وأسلوبك

وفي الآخر

انت حرة في كل ما تفعليه وتقوليه
ولا استطيع ان أملي عليكي أفعالك ولا أجرؤ أساسا

بس ساعات بحس ان أنت مش أنت

وربما هو إحساس غير سليم
بحري

Anonymous said...

انا كمان شفت الراجل الغلبان ده
وانا مش عارف ليه متعاطف مع الشباب دول مع ان المفروض انهم ارتكبوا جريمه
اما عن التدوينه الحقيره اللى عند السخص اللى اسمه علاء
مرفش ازاى حاجه زى دى ممكن تعجب حد
انا بقول حقيره من طريقته فى عرض رأيه لانى لا صحفى ولا هكون ولا حد من بلدنا حتى صحفى
بس يعنى لما الصحفيين وحشين
يبقى مين المحترم
صاحب المدونه؟
قوليله يحترم نفسه شويه
انا شفتك على دريم
كنتى منوره