Thursday 9 August 2007

جملة اعتراضية تاني عشان ساندي والاخوة الرجالة

والله ساندي قالتها كلمة حكمة لا فض فوها
قالت احنا سايبين الرجالة يحكموا العالم كام الف سنة
لحد ما خربوها ممكن تسيبولنا الدنيا شوية
والله والله والله كمان مرة الكلمة دي قلتها لواحد صاحبي انت ما تعرفوش
من حوالي شهرين
فعلا الرجالة خربوها
واحنا لو ما حسناش الامور يبقى على الاقل مش ح نخربها
زيادة ماهي مخروبة
بقى انا قاعدة احكي والت واعجن في مذكرات واحد
زيه زي الاف الجنود المصريين
اللي شالوا ارواحهم على اكفهم
وضحوا باللي اهم من الحياة والله
بالاعصاب وبنفسياتهم اللي اكيد
بتعاني لحد دلوقت من اللي شافوه
يعني اللي بيموت بيرتاح
خصوصا لما يبقى شهيد يبقى حظه نار
لكن اللي بيعيش بذكرى اصحابه اللي ماتوا قدامه
ويثبت ويجاهد ده يبقى من اولياء الله الصالحين
ومع ذلك يا اخي سبحان الله
التعليقات اللي جات على موضوع الشهيد الحي
اسامة علي الصادق لم تتجاوز الحداشر تعليق في اقصاها
اما التعليقات بخصوص اعتناق محمد حجازي للمسيحية
وصلت الى خمسة وعشرين
معظمها بينضح بالتعصب والغل والكراهية للجنس البشري
طيب انا باقول لكوا اني راجعة من عند المقاتل
اللي شاف الاهوال واني شفته
مليان بالحب والعطاء
ما يعرفش الكره ابدا ولا التعصب
ده المقاتل اللي شغلته يا يقتل يا يتقتل
اللي لف في الصحرا شهر ونص
اللي مافيش حتة في جسمه سليمة
من اول راسه اللي بتحمل اربع شظايا لسة جوة دماغه لحد دلوقت
لحد رجليه اللي اتشقت عشان تخرج المية
وما شاء الله على ايمانه وحبه للناس وللبلد
كل الناس بصرف النظر عن دينهم
الراجل ده في حرب تلاتة وسبعين وهو مسجى جريح
وراسه بتنزف وقع جنبه جندي اسرائيلي النار مولعة فيه
وضابطنا وهو غرقان في دمه حاول يطفي النار
اللي ماسكة في الجندي الاسرائيلي
او بالاحرى القاتل الاسرائيلي
ولما سألته ليه عملت كده
قال لي: انا ما فكرتش انا لقيت انسان النار والعة فيه
ما فكرتش غير في اني لازم انقذ الانسان ده
ده كان رد فعل تلقائي
!!!!!!
شايفين يا اخوانا
رد فعله التلقائي انه ينقذ عدوه
اخص علينا
اخص
اخص
الف اخص وفوقيها تلتمية من عندي
واحنا ولاد بلد واحدة ودم واحد وجنس واحد
وحتى سحنة واحدة
ووالله غباوة واحدة
ونازلين شتيمة في بعض
انا كل اللي شايفاه اني لما باكتب موضوع عن الفتنة الطائفية
الاقي الموضوع ده اخد شعبية كبيرة قوي
حتى الكاونتر بيعد اعداد مهولة من زائري مدونتي المتواضعة
لكن لما اكتب عن تجربة حقيقية لانسان بيمثل
الاف الجنود الاقي الناس فاترة
وزي ما يكون الكلام ما يخصهمش
ومن كتر ما الكره تمكن منا حتى مش مصدقين
انه عاطف شفيق اقرا الفاتحة لاخوه الشهيد وليم شفيق
مش مصدقين ان ام وليم شفيق كانت بتقول للضابط اسامة
يا وليم
ما بتقولوش غير يا وليم
مش مصدقين غير ان الكره في الحياة هو الاساس
وبنحاول نشوف ازاي نزود الكره ده بدل ما نقلله
هو احنا شفنا ايه؟
شفنا ايه في الدنيا عشان نعمل في بعض كده؟
شربنا بولنا؟
توهنا في الصحرا اسابيع؟
وقعنا في الملاحات وبقينا غرقانين طين من راسنا لرجلينا؟
رجعنا مكسورين ومتخانين ومخذولين وفوق البيعة اتشتمنا وانضربنا
على جريمة ارتكبت في حقنا
وبدل ما احنا اللي نحاسب بقينا احنا اللي بنتحاسب؟
ايه؟
مالنا؟
هو اللي احنا فيه ده من الهبل؟
وللا من الفراغ؟
وللا من قلة العقل والقيمة؟
وللا قلة الايمان بربنا؟
وللا قلة الحب لربنا؟
اللي يحب ربنا يحب سنته في الخلق
وسنة ربنا اننا نبقى مختلفين
وفي النهاية احنا انسان
يا ترى لو حد فينا اتحط مكان اسامة الصادق
وشاف عدوه والعة فيه النار
يا ترى ح يحاول ينقذه؟
ما اعتقدش
مش عشان انا متشائمة
بس اللي يهون عليه يحرق البيوت على بني وطنه
امال ح يعمل ايه في عدوه
عارفين ح يعمل ايه
ح يتهزم له ويتذلل له
عشان التجربة العملية اثبتت
ان اللي بيستقوى على ابناء وطنه واهله وناسه
بيبقى جبان قدام اعداءه
وبرضه مش ح يبقى انسان
طيب اياك بقى حد يتكلم كلام طائفي عندي هنا
اهو هو انا بقى كفرت بالديمقراطية
الظاهر احمد نظيف معاه حق
شعب مش مؤهل للديمقراطية
اول ما يشم ريحة ديمقراطية
يشتم في بعضه
ما سمعتش نص الشتيمة اللي بيتبادلها
المسلمين والمسيحيين
اتوجهت لاسرائيل اللي سحلت اسرانا
بعد ما ربطتهم في الدبابات
يا ساندي يا حبيبتي ياللي بتقولي للرجالة يتنحوا
احنا ما بقاش عندنا رجالة
مش كل واحد دقنه نبتت بقى راجل

20 comments:

Anonymous said...

صباح الخير يا استاذه

عندي سؤال عشان مايحصلش لبس زي المره اللي فاتت

هل انا واحد من الناس اللي انتي بتتكلمي عنهم؟


و شكرا

: )

Anonymous said...

اصل انا لو جوايا بترول زى مابتقولى

يبقى انتى جواكى اطران

:)

انتى جيتى عملتى اسقاط للتعصب والغل والحقد اللى جواكى على انا

عارفة

انا هنشرلك كتاب مهم جدا

وعايزك تقريه بحيادية تامة

المشكلة انه حوالى 162 صفحة

يعنى هياخد منى مجهود فى كتابته وهنشره يوم و يوم على اجزاء كده

ومستنى ردك على كل جزء

ده اذا لقيتى رد اصلا

سلام يا جميل

:)

Anonymous said...

فعلا , أنا برضه ملاحظ تأثير الفكر الطائفى فى حياتى اليومية, وملاحظ كمان ان انعدام الثقافة عامل مشترك فى كل الطائفيين اللى قابلتهم , عمرى ما قابلت انسان مثقف الا وكان مؤمن بثقافة الاختلاف,أما شرارات الفتنة دايما ح تلاقيهم من الجهلاء أو مدعى العلم الوصوليين وتحت, ربنا يحمينا

Anonymous said...

انا هاقولك على حاجة الشعب بتاعنا اتدمر من جميع النواحي
قتلوا فيه خصوصيته و سابونا لبتوع الصحراء يغيروا هويتنا
انا شايف ان احسن حاجة كانت في مصر هو التوافق بين كل الديانات
لغاية وكسة الايام دي اللي جابوها لينا اللي بيفرقوا بين البشر
و بعدين في حاجة نقطاني يا اختي في ناس معلقة بانرات "فخور باني مدون
اخواني" و "فخور باني مدون اسلامي"
طب و المشكلة الاكبر واحد يكتبلك اسمه "محمد مسلم"
انا من هذا المزنق باقول فيها اية لو ما كناش عنصريين
انتا كدة هتخلي المسيحي يكتب "جورج مسيحي" و " فخور باني مدون قبطي"
و نبتدي نضرب بعض بالجزم
دا غير اني معترض اساسا على لفظة "الاخوان المسلمين"
و التي بها من العنصرية ما يكفي و كانهم هم فقط اللي اخوان و اصحاب
و كانهم احتكروا الاسلام و ان المجتمع من قبل كانوا مثلا يجتمعون في حب الاصنام
انا اسف للاطالة و لكن اسمعي هيكل و ما قاله عن مقدسهم حسن البنا
و كيف ارتعب حينما كان قد التفت حوله حبال فتاويه و التي كان من نتائجها
اغتياله شخصيا
و مقال "ليسوا اخوانا و ليسوا مسلمين" شاهد على الرعب
و شكرا
محمد حسن

Anonymous said...

مسلم ولا مسيحى؟ هو دة السؤال اللى باسمعة فى كل حتة, هل الجهل تمكن منا لهذه الدرجة؟؟!! أعتقد ان دة ناتج من نواتج ازدهار ثقافة الكوسة فى بلدنا المخروبة, دة ابن فلان يبقى كويس ودة ابن علان يبقى كلب ولا يسوى!! دة مسلم حبيبنا ودة مسيحى لازم نضطهده!!! كل دعاة الطائفية لازم ح تلاقيهم أصحاب مصالح ووصوليين أو منقادين لهم بحكم الجهل وانعدام الثقافة , وشكرا

Anonymous said...

الله يكرمك

أنا مكسوف من نفسى

بس لازم أقولك إن إحنا عندنا مشاكل و بنواجه أزمات مش بسيطه تؤثر علينا
من أول توتو فرقع جيجى
لحد الواوا بتاعة الحاجه هيفاء

ياريت سعادتك تنشرى وسيلة إتصال بالبطل بتاعنا
تليفون أو عنوان أو وسيط

أقل حاجه نقوله شكرا و نسلم عليه و نتبارك بيه

ويا ريت تهدى اللعب شويه ع الرجاله بدل ما توقفى سوقك
;o)

Anonymous said...

صباح الفل
اسمحي لي أعلق على حتة التعليقات المتفاوتة بين الموضوعين اللي ذكرتيهم
وده من منطلق خبرتي المتواضعة في عالم التعليقات
:)
**
الموضوع العادي، أو حتى الموضوع المظبوط المحبوك، مش بيجذب التعليقات
أما العدائي واللي بيروج لاحساس بالخطر للقاريء فبيشجع على التعليق من منطلق الدفاع عن النفس
(أو الدين أو فريق الكورة أو الانتماء..الخ)
**
كمان اللي بيزود التعليقات اي حاجة فيها احساس بالتشفي، أو حاجة تزود من احساس المعلق بالنرجسية
**
هذا رأي شخصي ناتج عن المتابعة، وليس له أسانيد علمية غير التجربة

أقول قولي هذا واستغفر الله لي ولكم

Anonymous said...

واصلي يا خالتي نوارة، الكتاب شيق وجميل بس انتي بتبعتيها رسايل عالميل فالواحد بيقرا التدوينات عالسريع منغير ما يكلف خاطره يعلق :D

على فكرة ياريت، وتبقي خدمتي الأمة بجد، لو تستأذني سيادة العقيد في اننا نعمل نسخة اليكترونية من الكتاب..

هتشتغل نار وهيوصل لكل حتة..كل واحد منا ياخد جزء من الكتاب لغاية ما نخلصه..

أحسن يكون مكتوب كيبورد عشان اللي يحب يعمل عليه سيرش من جوجل ولا حاجة يلاقيه بسهولة..إيه رأيك في الفكرة دي؟

Anonymous said...

السلام عليكم
ربنا يوفقكم في إزاحة العائلة المالكة في مصر وحلال عليكم الحكم ألف سنة

Anonymous said...

أجمل مافي قصة هذا البطل الاصيل هو أنه كان انسانا عاديا حتى وجد نفسه يواجه التحديات والاهوال فصار بطلا. وهو نموذج للشخصية المصرية التي تبدو عادية وغير مكترثة بالاوضاع والمظالم اليومية ولكن اذا فرض عليها المواجهة والتحدي المباشر أخرجت هذه الشخصية من رصيدها الحضاري ما يعجب له الانسان.
اسف للفلسفة ولكن أعجبني رأي لجمال الغيطاني أن الشخصية المصرية مكونة من ضفيرة أو سبيكة من أفضل العناصر واسوأ العناصر معا...... وطبقا للمناخ السائد ونظافة أو قذارة البيئة التي يعيش فيها تتصرف هذه الشخصية.
انسان

Anonymous said...

العزيزة نوارة هانم

انا معاكي ان في حالة من الهبل منتشرة في موضوع اخونا الاقباط ده والواحد مبقاش مركز فعلا
هو مين قال ايه فين وراح عند امتي وازاي كان وكنا وكنتا وكنتي

والحقيقة انا ملاحظ موضوع التعليقات وقلتها في بعض المواضيع الهامة جدا
بس المواضيع دي مهمة بالنسبة لمين؟؟؟؟

وانت ست العارفين ان الميديا والتدوين اصبح جزء منها لها معايرها الخاصة في الاهمية والانتشار

يعني موضوع حسني عبد ربه لازم ياخد الاهتمام اكتر من العالقين علي الحدود

والناس ممكن تصرف دم قلبها علي تليفونات ستار اكاديمي وتستخصر التبرع لشنطة رمضان او مساعدة محتاج

وممكن يموتوا في مظاهرة ضد الدنمرك اللي اغلبهم ميعرفوش هي فين اصلا ويخافوا يطلعوا في مظاهرة علشان اكل عيشهم

ويأخذ موضوع عجيب زي موضوع الفتنة دا حيز واهتمام كبيير جدا من التعليقات وموضوع مهم جدا لا يأخذ نصف هذا الاهتمام

سؤال هام جدا للأخوة بتوع اتحادات مسيحي الشرق الاوسط الغربي الشمالي الجنوبي من اجل الحرية لكل من هب ودب

الاخ اللي الاخوة امناء الشرطة رموه من من الدور الرابع بعد ما خد علقة موت

مش مسيحي برضه؟؟

مشفناش حاجة يعني؟؟
نعم؟؟
ما علينا

اراكي علي خير

ملحوظة هامة
قبل ما حد يستعبط ويحطني في خانة الفتنة
انا مش كده خااااالص

تحياتي
بحري
ه

Anonymous said...

يا ساندي يا حبيبتي ياللي بتقولي للرجالة يتنحوا
احنا ما بقاش عندنا رجالة
مش كل واحد دقنه نبتت بقى راجل

عجبتنى اوى الجملة دى يا نوارة
وجت فى وقتها
اصلى بصراحة لسه شايفه منظر من شوية يحرق الدم
اتنين ذكور بلاش رجاله قاعدين بيلحقوا كلام على بنت ماشية فى الشارع
كل ذنبها انها مش عبرتهم وبصت لهم وهما بيعاكسوها
هيهيهيهيهييييييي
رجالة ايه بلا وكسة
ده النسوان بطلت تلقح كلام
وبطلت تتجمع على سيرة فلانه وعلانة
والله دلوقتى بشوف الرجالة اللى بيعملوا كدا

Anonymous said...

انا متابعة "بشغف" كل كلمة بتكتبيها عن الكتاب و ان كنت ما علقتش لأسباب كتير منها انتظاري لأخر جزء من الموضوع حتي اشكرك و ان كان الشكر لا يكفي في هذه الحالة
كمان لأنه صعب اني اعلق علي حياة او كلمات شخصية عظيمة زي العقيد اسامة علي صادق

لو حاعلق علي كل جزء حيكون تعليقي اغلبه شكر لكِ و للعقيد اسامة و الباقي طلب لتكملة الموضوع

منتظرة "بفارغ" الصبر بقية الاجزاء و بوست خاص عن مقابلتك معه

اشكرك

Anonymous said...

عمرو

هو انت كل اللي يهمك اسمي مكتوب؟
ما تراجع يابني تعليقاتك وتشوف انت كتبت ايه وانت تعرف

ميرااااااااااااج

ياااااااااااا هيافتك وقلة عقلك وتخلفك العقلييييييييييييي

امشي ياد ح نرش مية

ممنوع دخول الاطفال هنا

انت مش ممكن سنك يزيد عن تلاتة وعشرين سنة
وفاكر نفسك ظريف وفهيم

يا بااااااااااااي

خنيق


وكل اللي مضايقك اني كشفتك
يابني انا ما كشفتكش انت كشفت نفسك

يا بتاع الانتصار جتك خيبة

نفسي اشوفك كده في صحراء سينا قدام العدو حتعمل ايه

حتعملها على روحك اكيد


اسد جريح

اللي بيزكي الطائفية ناس لها مصالح
بس اللي بيستجيب لها
ناس اغبياء وعمرهم العقلي سنة ونصر

^^^
انظر الشكل



كنوز

هههههههههههههههه
لا والله
محمد مسلم؟

ده انا كنت فاكرة محمد ده بيبقى بوذي عادة

ليه يعني توضيح الواضح محمد مسلم

امال ح يبقى سيخي

والله انا مش عارفة ايه حكاية التعريف بالدين دي

مش البيني ادم بيني ادم برضه

كل يوم باشوف انهم لازم يلغوا الديانة من البطاقة

انا عايزة افهم ايه اهمية الديانة في البطاقة

ما في سوريا وفي لبنان ودول عربية كتير مش كاتبين الديانة في البطاقة

يعني دول كفرة واحنا بقى اللي مؤمنين؟



الدرويش المرووش

:))

ما تشغلش بالك بيا

مايهمنيش حكاية السوق دي عشان انا مش كيلوا بطاطا

وبعدين هو اللي يقول الحق يزعل

:))

ما انت عارفني مسحوبة من لساني

ابو باشا

اممممممممم

يعني الناس بتحب الخناق

معلش الناس تعبانة يا حورية


ارحم دماغك

ما يقدرش ينزل الكتاب وهو بيتباع على النت

لان الراجل طابعه على حسابه يعني ابسط حاجة يلم فلوس الطباعة

وعموما ح اساله


الباج مهندز مصطفى

ها؟

غير معروف

والله هي فيه حاجة في المصريين

لما يبقى فيه خطر حقيقي

لسة بيهدد

يفضلوا يت...لامؤاخذة لحد ما ياخدوا اللبة المحترمة

اول ما يترنوا علقة يقوموا بقى ويفوقوا

بس ليه يعني لازم يترنوا علقة؟

ليه مش من الاول نبطل هيافة كده ونتنبه لنفسنا

بدل ما نقعد ننقل كتاب طائفي في مية اتنين وستين صفحة ونتعب نفسنا بس عشان نسب دين غيرنا

زي ميراج الهايف ده ما شاغل نفسه بالتفاهات

Anonymous said...

بحري

مين ده اللي اترمى من الشباك بعد علقة الموت

هات لي الرابط كده او احكي لي الحكاية

desert

هاهاهاهاها

والله والله يا اختي دي بقت عادة وليست عبادة عند الاخوة الرجالة

وشفتها كتير

وبيبقى منظرهم قرف

مش ناقص غير يطرقعوا باللبانة وهم معديين على اللي بيلقحوا عليها ويضحكوا

هيء هييييييييي

زي افلام عبد الوهاب

احنا مثلا عندنا اتنين لامؤاخذة ذكور في الشغل ما عندهم غير يلقحوا على دي كلمة

وياختي يزغدوا بعض زي النسوان اللي بتزغد جراتها على ضرتها

بيبقى هاين عليا اقول لهم هو سي احمد بايت عند مين فيكوا الليلة دي


فضفضة

نورتي يا نور

لا ياحبيبتي انا مش قصدي كده

انا قصدي الناس المهتمة بازكاء نار الطائفية
واللي يقول ده انتصار للمسيحيين واللي يقول المسيحيين بيكرهو المسلمين واللي يقول المسلمين بيجبروا المسيحيين وحاجة خرا وتقرف الكلب الاعور الحزين

Anonymous said...

انتي ليه بتحبي تغلطي في الناس

و ماحدش غلط فيكي

هو اللي يقول رأي مايعجبكيش

يبقي حاجه خرا

بنحذركم لوجه الله

من البلاوي اللي بتتحدف عليكوا

مش عاجبك الكلام . . تعالي اتناقشي بهدوء

و فهمينا و علمينا الصح

من غير شتيمه و لا تجريح

دانا مابقوللكيش غير يا استاذه

نفترض قلنا حاجه معجبتش سيادتك

أصبح تاني يوم خرا

بذمتك دا اسلوب حوار

يااما نكتب علي مزاج سيادتك

في الموضوع اللي تختاريه سيادتك

يااما نبقي حاجه خرا

و تقرف الكلب الاعور الحزين

يعني اللي يتنصر هو حر

و اللي يشتم في الاسلام و المسلمين كمان حر

و اللي يقول أه مش حر

ماانتي رحتي موقع الاقباط الاحرار

و شفتي كم السفاله و الشتيمه

في دينك و قرأنك و اهلك

مااعترضيتش يعني

ايوه . . حريه تعبير

بس المسلم لما يقول اي

يبقي خره و يحزن الكلب الاعور



موضوع العقيد اسامه موضوع جميل

و كلنا بنبوس ايده وش و ضهر

و ابويا كان ظابط جيش و حارب

و شاف الويل . . الله يرحمه

بنقرا اللي بتكتبه و بنستمتع

ايه بقي اللي مزعلك؟

بس كل واحد حر

يكتب في الموضوع اللي عايزه

بعدين ايه حكايه الشتيمه في الرجاله

عالطالع و النازل

الحاج نجم مش راجل

و جدك مش راجل

حتقبلي تشوفي واحد يشتم و يهزأ الستات

بسبب و بدون

هو انتي عشان صاحبه المدونه

تشتمي و تسبي الاراء التانيه

و لما حد يشتمك

الموديريشن يطلع هوا

ناس كتير بتيجي هنا

عشان بتحبك و بتحترمك

و انا اولهم

عيب يا نواره الالفاظ دي


داحنا اخواتك

Anonymous said...

السلام عليكم
أنا معجبة جدا بكل مدونتك و بخاصة هذا البوست،لأنه بيعبر عن خوفي الكبير ،انا وغيري مفزوعين من كمية الكره المتنكرة بقناع التدين، أنا نفسي أعرف لماذا أصبح الناس تعتقد لكي أكون مسلم صحيح لابد أن أكره وأعادي غير المسلمين و بجانب طبعا احتقر و أهين النساء لأنهم ناقصين؟؟؟؟؟؟لماذا لا يفهم الناس أن دينا مبني على الرحمة قبل كل شيء؟و ما هي الفائدة من أن أكون مسلم أسما أو وراثة وسلوكي و أخلاقي ليس من الأسلام في شئ،هل أصبحنا مثل اليهود عنصريين،نظن لأننا شعب الله المختار يمكن أن نتعالي علي غير المسلمين وان الله لن يحاسبنا،و عندما ننفر غير المسلمين في ديننا هل أصبحنا أبطال و متبعي للسنة؟؟؟؟؟

Anonymous said...

تسلم ايدك اللى كتبت الكلام ده لو بس كل الناس اللى زيك زو زى و زى ساندى يبقوا ايد واحدة يمكن يبقى فى امل ان عندى واحدة صاحبتى مسيحية وعدتها يوم ما المسلمين يهاجموها هاقول انها فى جوارى بس يا ترى دة هيحميها و لا هنضرب احنا الاتنين

Anonymous said...

لا فض فوكييي

Anonymous said...

عمرو220
ههههههههههههههههههههه
لو سمحت لو سمحت لو سمحت

لما احب اشتمك ح اشتمك بالاسم يا عمرو
هو انا ح اخاف منك؟

نص كلامي اهو:
انا قصدي الناس المهتمة بازكاء نار الطائفية
واللي يقول ده انتصار للمسيحيين واللي يقول المسيحيين بيكرهو المسلمين واللي يقول المسلمين بيجبروا المسيحيين وحاجة خرا وتقرف الكلب الاعور الحزين
انتهى الاقتباس

يا عمرو لما كتبت كلام متعصب قلت لك انت متعصب اهدا شوية

وانت كلامك متعصب

ومتهيالك ان فيه خطر مسيحي على مصر

ممكن تبص كده على عشرة مليون في التعداد التضخيمي والتعداد الحقيقي بتاعهم سبعة مليون

ممكن تبص على دول وتقول لي ايه الخطر اللي ممكن يهدد البلد منهم؟

ماهي دي بلدهم برضه حضرتك يا استاذ عمرو

فيه حد ح يتآمر على بلده؟

آه فيه ناس بتشتغل جواسيس وعملاء

بس ما بيبقوش سبعة مليون

بيبقوا اتنين تلاتة عشرة مية الف

مش سبعة مليون

وليه ما حدش بيتهم المسلمين انهم عملاء

فيه حد يتهم سبعة مليون بالعمالة

معلش بعد اذنك يعني

لما حد يقول على سبعة مليون مواطن انه عميل ضد وطنه ووطن اجداده واجداد اجداد وسنسفيل جدوده

يبقى حاجة من الاتنين يا اما هو بيضحك علينا
يا اما هو نفسه مضحوك عليه

يا اما المعلومة دي صحيحة

طيب ح نعتبر فعلا ان السبعة مليون بيهددوا امن مصر

معلش لما يبقى عندك سبعة مليون جاسوس

ده معناه ان انت اللي غلطان مش السبعة مليون

ده معناه انك مارست عليهم قهر فوق طاقة البشر لحد ما وصل بيهم الامر انهم مستعدين يهدوا بلدهم هم وعلي وعلى اعدائي

بتوع الاقباط الاحرار دول موقع من المواقع

طيب ما دخلتش انت على موقع سلفي وشفتهم بيقولوا على المسيحيين عباد الصليب ودمهم ومالهم ونساءهم حلال؟

هل ده معناه ان انا وانت وملايين المسلمين في العالم نتاخد بجريرة موقع وللا موقعين ولا عشر مواقع وللا حتى الف موقع بيحض على الكراهية والقتل؟

انت عارف دول مين

ما يمكن منهم ناس فعلا عملاء ومدسوسين على المسيحيين

واكيد منهم كتير ناس بيخوضوا معارك وهمية ومضحوك عليهم

زي ما انا شايفة انك انت كمان مضحوك عليك واعداء البلد دي عرفوا يقنعوك ويقنعوا مواطنين كتير مصريين مسلمين ومسيحيين
اننا اعداء بعض

عشان نتلهي عن عدونا الحقيقي

اما بخصوص الخرا واللي يقرف الكلب الحزين فهو الواد ميراج التافه

عامل زي السلفيين بتوعنا

خلاص؟

وبطل كل ما اقول كلمة تقول لي اسمي مكتوب؟

مش ح ارد تاني على شغل العيال ده
:)


مجهولة

والله يا بنتي انا مش فاهمة ازاي قلب الانسان يتسع لحب الله وكره خلقه مع بعض


كيمو

ههههه
لا ح ننضرب احنا التلاتة

عصفور النار

ياااااااا نورت المدونة يا سيدي