بعد الاستقبال الحافل العظيم لجنودنا
سلم ضابطنا نفسه لموقعه وبعدين جاله امر
انهم يروحوا يسلموا نفسهم في بورسعيد
مشوار ابن كلب برضه شاف بهدلة الدنيا
وهو في طريقه تعب لانه ما كانش كمل علاجه
ولولا ان ربنا كرمه وهو في سكة وبيوقع قابل
ضابط رتبة اخده على المستشفى ولقى ان المستشفى هناك
مافيهاش تجهيزات
ما كانش اتعالج ولا كانت المستشفى دي تم امدادها
بالتجهيزات اللازمة
يعني بالصدفة كده تم تجهيز المستشفى اللي المفروض يتعالج فيها
جرحانا وضباطنا
بعد ما خف راح سلم نفسه لوحدته على الجانب الشرقي على الكنال
وبقى في مفرزة مدافع الهاون
ومن هنا تبدأ قصة نصر أكتوبر
بقى النصر ده صناعة مصرية فلاحيني صعيدي اسكندراني
ليس لقائد ولا زعيم اي يد فيها
وباقولها بالفم المليان واحط راسي في بق الناصريين والساداتيين مع بعض
بدل ماهم ماسكين النصر وكل واحد عمال يشده من ناحية
يقعدوا لنا في حتة ناشفة بقى
بعيد شوية
عشان النفس
اوامر بناء الجيش اللي جات من القيادات العليا ايه؟
ملخصها كالتالي
اولا: يحظر حظرا باتا اي سب بالاب والام والدين والميتين
للمقاتلين المصريين من قبل الرتب الكبيرة
ثانيا: يحظر حظرا باتا استخدام الجندي المصري في مسح وكنس
وغسيل مواعين الهانم زوجة ح ضابط الرتبة
ثالثا: على الجيش ان يوفر طعاما ادميا خلاف الاسهال
اللي كان بياكله الجند
رابعا: يصرف لكل جندي بيجامة عشان ما ينامش بالاوفرول
خامسا: يسمح لهم بانهم يستحموا بعد ما يصرف لهم اوفرولات
جديدة غير المرقعة والمقطعة
سادسا: يتم التشديد على ان الجندي يبقى عارف هو ماسك ايه بالظبط
يعني يعرف اسم السلاح اللي في ايده ويعرف وشه من ضهره
ويعرف بيشتغل منين
اما التدريب فيا اخي مش كل حاجة ع الحكومة
ضابطنا الجميل اللي كان مسئول عن مفرزة مدافع الهاون
كان شاب امور يعني وحليوة وعايش الحياة ومبسوط
في مرة سمع اتنين عساكر بيتكلموا
- ملحوظة: الرغبة في تحسين وضع الجيش
كانت رغبة العساكر والضباط الصغيرين
المهم سمع اتنين عساكر واحد بيقول للتاني
والله ح الضابط اسامة راجل طيب
قال له واحنا ح نحارب بطيبته ما عندوش معلومات
ومش مهتم بمستوانا العسكري
- ده كلام العساكر -
قوم الضابط اسامة نزل عليه الخبر كالساعقة
ازاي قاعد نايم على وداني ومستنيهم يدربونا
طلع كتب الحربية وهاتك يا مراجعة
كل ما يراجع درس تاني يوم ينادي على جنوده
عشان يطبقوه ويتدربوا عليه
لما هركهم تدريب
والجند بيبذلوا مجهود خرافي بكل الغل اللي شايلينه
من الهزيمة
لما القيادات سمعت ان الوحدة دي بتتدرب لوحدها
انبسطوا منهم قوي الصراحة
وادوهم جايزة
قوم بقية الوحدات عملت كده
برضه كل ضابط واخد عياله وعمال يدربهم منه لنفسه كده
قوم القيادات لقت شكلها محرج قام قالت لهم
وانا ح اشرف عليكوا
وبقت تبعت لهم ناس من برة وحداتهم
من كبارات الجيش يشوفوهم ويدوا احسن ناس فيهم
انواط واوسمة وحاجات كده
اه
نسيت
في بداية الاعداد لحرب الاستنزاف
الضابط اسامة قاعد لا بيه ولا عليه
لقى عربية جيب جاية قام كده متكاسل
لقى جمال عبد الناصر جاي يشوف عياله
!!!!!!!!!!!!
ما اعرفش ما افتكرهمش غير دلوقت ليه
ما اعرفش ما افتكرهمش غير دلوقت ليه
المهم بس عشان نكون واضحين
المقاتل اسامة الصادق بيحب عبد الناصر
مهما يشوف منه ومهما الناس وللا حتى هو
قال عنه
آه آه آه آه
احبوووووووووو
وقعد يقول والله عبد الناصر كويس
والله قعد على الجركن معانا وقعد يهزر ويضحك
كتر خيره
لان الزيارة دي رفعت من روحهم المعدنية جدا
بس برررررررضه
الزيارة دي جات متأخرة اربعتاشر سنة
حرب الاستنزاف كانت انجازات الجندي المصري
وبس
وبس
وبس
بطولات رائعة وحب لام البلد دي زي ما يكون واحد
بيحب واحدة وهي مغلباه وممشياه يكلم نفسه
وكانت دي رفع لروحهم المعنوية وتأكد انهم ماشيين في التدريب صح
وتطوير لخبراتهم اعدادا للنصر
ح نقول لسة
9 comments:
انتى عارفة الفرق بينا وبينهم ايه
انهم كان فيه حاجة يلتفوا حوليها وقضية مقتنعين ببها
احنا معندناش
تحياتى ومش لازم تنورينا ههههههه بهزر طبعا
أنا كمان بحب ناصر مهما قالوا عنه . دى حاجه فى دم معظم اللى شهدوا عصره مهما عانوا ودخلوا السجون ! حاجه مش ها تفهميها يا نواره ,
نوارة..
مع احترامي لوجهة نظرك حضرتك وليكن ما يكون ومن غير قصد استفزاز.. ومع احترامي للكاتب..
انا مش مصدق أكتر من نص الكلام ده..
المبالغة فاقعة جداً جداً جداً..
خصوصاً حكاية التدريب اللي انطلق من وحدته ليعم على الجيش كله.. دي حتى انقح من حكاية قراية الفاتحة..
يافندم انت اللي بتنورني دايما
انا جيت عندك وسبت لك تعليق
ساندي
هو انت من اللي دخلوا سجون عبد الناصر
:)
محمود
لا لو سمحت يا محمود
انت تقدر تقول عني انا ما تشاء وتهاجمني او حتى تشتمني
من غير سب الاهل يعني
زي ما انت عايز
بس الراجل ده ارجو احترامه وتقديره
انت بتتكلم فيه ايه اساسا
ده واحد من الكتائب الاولى اللي دخلت حرب اكتوبر
وكل اللي كانوا معاه ماتوا
وهو كان المفروض يموت بس ربنا اراد انه يعيش عشان يحكي لنا
لا دي حقيقة
والجوائز لسة عنده
وارجو ان الناس دي تنال الاحترام الواجب
يكفي انهم ما نالوش التقدير اللي يستحقوه من بلدهم
باقول لك كل مفرزته ماتت عن اخرها
يا اخي يعني مين فينا يعرف يستحمل اللي الناس دي استحملته
انت تقدر تستحمل شهر ونص بتلف في الصحرا؟
احنا قاعدين قدام الكمبيوتر ونحكم على ناس شافوا الموت بعنيهم؟
معلش رجاء من كل اللي بيدخل المدونة
اللي عايز يشتمني انا يشتمني زي ما هو عايز
بس ما حدش يشير اي اشارة فيها اساءة للراجل ده
ودي اخر مرة ح انشر تعليق يسيء له
انا بس حبيت اوضح لك ان كل كلمة بيقولها صح
ثم هو ما قالش التدريب انطلق من وحدته ليعم على الجيش كله
ده كان بيتكلم عن كتيبة المشاه اللي هو منها
ومش حتى كتيبة المشاة
بعض وحدات من كتيبة المشاة المحيطة بيه
وهو مش بيدعي ريادة ولا حاجة
هو بيوضح انهم ما اهتموش بالتدريب غير لما لقوا العساكر هم اللي عايزين يتدربوا
عبدالناصر كان راجل . . و كان انسان . . و كان مخلص
عاش شريف . . و مات مديون
بس الكتره تغلب الشجاعه
العصابه اللي كانت حواليه جوه مصر
و المافيا اللي كانت محواطاه بره مصر
الله يرحمك يا عبدالناصر . . و يسامحك
بتقولي اللي عاوز يشتمك يشتمك بس مش بالاب
انا عاوز اشتمك
و اقولك
يا عثل
يا بنت العثل
يلعن ابو عثلك
:)
يا فندم كلامي لا ينتقص من احترام الراجل شئ..
خاصة وإني أقريت باحترامي له قبل ما اتكلم عن انطباعاتي تجاه الكلام..
اعتذر إذا كان كلامي لم يوضح هذا.. لكن من حقي يكون لي راي في اللي باسمعه.. خصوصأً إذا تناقض مع روايات أخرى كثيرة.. متفرقة لكن يعضد بعضها البعض وكفيلة بصنع تصور شامل يختلف نسبياً مع ما يتفضل بروايته السيد أسامة..
أرجو أن تغيري انطباعك أني أسأت للرجل.. لأنني بالفعل لم أفعل هذا لا عن عمد ولا عفواً..
لاحظي أن انطباعي تكون عن سردك انتِ لا عن النص الأصلي..
تحياتي
عمرو : كلامك صح , بس أضيف أن مشكله ناصر هى أهل الثقه اللى كان معتمد عليهم فى كل حاجه للظروف اللى أنت ّذكرتها وده هو سبب هزيمه 67 الرئيسيه وده اللى خلاه يتفقد الجبهه متأخر اوى ذى ما قالت نواره , لأنه كان يثق فى المشير ثقه عمياءومش بس المشير اللى خذله ,كثير من اللى أداهم ثقته خذلوه . ربنا يرحمه ويغفر له أخطاؤه ويكفيه أنه كان بيحب مصر بجد . على فكره لسه من كام يوم كان عبد الرحمن الأبتودى بيتكلم عنه وقال أنا دخلت سجون عبد الناصر وكنا بنضحك لما نسمعه بيقول أذابه الفوارق بين الطبقات ,دلوقت لما بنشوف اللى بيحصل فى مصر وأد أيه الحكومه دى بتحتقر الفقراء ,عرفنا قيمه ناصر وأنه كان بينحت فى الصخر عشان خاطر الفقرا ,بس أحنا ما قدرناش ده!!!
الي ساندي
اللي عاوز يعرف مين كان عبدالناصر
يتفرج علي جنازته
ملايين بتبكي و تتألم
زي مايكون ابوهم هوا اللي مات
يا تري مين حيبكي عليك يا سونه؟
حتي جيمي حنشوفه فرحان بالورث
Post a Comment