الصلح خير قوم نتصالح ده الصلح خير، خصوصا انهم هم الاتنين قدموا الضحية ودبحوا الدبيحة في يومي 14 و18 نوفمبر بعد ما فضلوا يعلفوها من يوم 9 اكتوبر باغنية احلف بسماها وبترابها احلف بدروبها وابوابها احلف بالقمح وبالمصنع احلف بالمدنة وبالمدفع بولادي بايامي الجاية ما تغيب الشمس العربية طول ما انا عايش فوق الدنيا...آآآآه جات لنا ضربة دوختنا من الشمس العربية
وبما انهم باعوا سماها وترابها ودروبها وابوابها، وبطلوا يزرعوا قمح، والمصانع اتخصخصت وعملوا ادان موحد وما بقاش فيه مدافع والحمد لله، فهم مش مضطرين يصوموا تلات ايام لما حلفانهم يقع
اما بالنوسبة لاولاده وايامه الجاية فدول مالهمش نهاية
وانا لسة عندي في الشارع الناس بتمشي تعمل تيت تيت تتيت تييييت ومشغلين يا حبيبتي يا مصر بصوت عالي، وفي الدوري سمعت مشجع عمرو قال له ان اسمه حميدو بيغني: يا اخلى اس في الوجود يااااامصر.. يا اس مغلوء للخلووووء يااااااامصر
والحمد لله، وكما قال مرتضى منصور في حواره مع خالد الغندور
مرتضى: احنا بلد نجيب محفوظ وعادل امام
خالد الغندور: بس ليلى علوي لها احترامها
مرتضى: طبعا لها احترامها والا ما كانوش شافوا افلامها
يعني الوطنية بخير، وافلام العيد بخير، واخلى اس في الوجود بخير، والناس ماشية تهيص في الشارع من غير ماتش وده يدحض كل مزاعم المغرضين اللي بيقولوا ان الهتاف باسم مصر ده مش وطنية دي مجرد حماسة ماتش زي ما بيقولوا اهليييي اهليييي، وحب وطن ايه؟ ده شكل بلد فيه اي حد بيحبها ولا حتى امها اللي خلفتها؟ وطلع السلاح صاحي اهو وبيهيص في الشارع لسة
ده حتى كوكاكولا لسة بتقول: المصريين كلهم بيشجعوا واحنا معاهم.. كوكا كولا راعي المشجع المصري
وزي ما قال احد الرغايين اللي انا مش فاكراه من كترهم: مصر ح تفضل طول عمرها مصر بتاريخها وجغرافيتها
طب والجراح اللي اتشقت بساطور واتخلقت من ولا حاجة؟ طب والقناطير المقنطرة من الشر المستطير اللي اتضح انه نايم جوة الناس المبتسمة على طول دي؟ طب والرعب اللي تملكني بعد اللي شفته من شرهم واحساسي اني مش ح اقدر اثق في وش طيب مبتسم تاني؟ طب والصدمة؟ طب والغل؟ طب والاحساس المختلط بالوقوع تحت ظلم والاستمتاع بايقاع الظلم بدون ذرة تأنيب للضمير؟ طب والمفاهيم القذرة العنصرية المشوهة المزيفة الدنيئة الحقيرة الكدابة اللي لا راعت دين ولا اخلاق ولا اعراض ولا انسانية واتدلقت جوة معدة الناس بعد ما فتحوا لهم بقهم على مصراعيه وفضلوا يظغطوها لهم بشكل مكثف لحد ما جالهم تخمة منها؟ طب المعلومة المروعة اللي وصلتني ان فيه ناس كتير بتقول انها مصرية وبتحب مصر وهي ما تعرفش البلد اللي هي عايشة فيها؟ طب بلاش جراحنا احنا، الجراح اللي سببناها للناس؟ الاهانة والاستهانة والقهر والتنكيل اللي عملناه في الناس والتصميم على انكار اننا عملنا حاجة؟ طب والناس اللي اتداس عليهم في السكة من غير ما يبقى لهم اي ذنب؟ شالوا في قلبهم قد ايه؟ وح يفجروه في وشنا امتى وازاي؟ طب ودينا وانسانيتنا واخلاقنا واحترامنا ودماغنا وقلبنا اللي خسرناهم؟ الجرايم اللي ارتكبناها وارتكبت في حقنا وكل واحد فينا بقى ظالم ومظلوم لا قابل يواجه نفسه بفداحة ظلمه ولا قادر يستحمل مرارة انه اتظلم؟ طب واس مصر اللي طلع مغلوء للخلوء وانا ما كنتش عارفة ده كله؟ طب والمذيع اللي قدامي اللي بيقول: ح يرد عليك "نغبة" من المستشارين القانونيين؟
هممممم هنا ح نضطر نلجأ لحكمة الرئيس الخالد: ارمي ورا ضهرك
