Friday 31 August 2007

عاجل: حل جمعية المساعدة القانونية

اعمل ايه انا دلوقت
جمعية المساعدة القانونية هي الجمعية القانونية الوحيدة
اللي فيها قسم للاحداث
وجاني الخبر ده دلوقت
:من وائل عباس
قرار حل جمعية المساعدة القانونية لحقوق الانسان
انزلاقة خطيرة نحو المجهول
طالعت جمعية المساعدة القانونية لحقوق الانسان الخبر المنشور اليوم الخميس 30 اغسطس بالصفحة الثالثة بجريدة "المصرى اليوم" والذى جاء عنوانه ("وزير" يدرس حل جمعية المساعدة القانونية بسبب تجاوزات مالية).
وباستنكار شديد تعلن الجمعية عن بالغ استيائها من التبريرات الفظة التى سيقت كمبرر لحل الجمعية ناهيك عن عريها المفضوح من الصحة.
لن نكون الجمعية الاولى ولن نكون الاخيرة ، فقاطرة دهس الحريات العامة قد انطلقت ، وبدأ يسيل لعاب الكواسر بعد ان سالت دماء "ضحايا التعذيب".
هاهم يزعجهم "صوت الضحايا" - النشرة التى اصدرتها الجمعية مؤخرا ، ويريعهم "شهادات الضحايا" الذين راحوا يروون محنتهم على مرأى من الضمير ، وهم الذين حذرونا من مساندة القضاة "فى مطالبهم المشروعة" ، كما هددونا من مساعدة "ضحايا التعذيب"
وهاهو محافظ القاهرة بتورطه فى استصدار هذا القرار يجلس برفقة وزير التضامن الاجتماعى "يتشمسون فى قيظ اغسطس" فى فناء وزارة التضامن الاجتماعى الحديقة الخلفية لجهاز مباحث امن الدولة.
الم تجدوا غير هذه السقطة الفرية "تجاوزات مالية" ويالها من سقطة ، دعونا نزايد عليكم ونطالب باحالة دفاترنا المالية الى "الجهاز المركزى للمحاسبات" تفحص وتمحص ، بل وقدموا مسؤلينا الى المحاكمة العادلة ، ثم قدموا لنا اسفكم واعتذاركم ولن نقبله.
لقد اكد هذا القرار على صحة موقفنا الذى عزمنا عليه بتركيز جهودنا على "مناهضة التعذيب" وليكن قراراكم حافزا لنا على السير قدما فى هذا الطريق ، ولن نلتفت الى تلك الترهات للجمعية "جمهور يحميها" ، فحلوها ، ونحن لن نتوانى عما نذرنا انفسنا اليه ، دعم ضحايا انتهاكات حقوق الانسان والتعذيب.
واسألوا انفسكم ، مانتيجة سد منافذ الضؤ امام حركة مجتمع ، وما عقبى السير فى ظلام السلطة وجبروتها ، وماهى الرسالة التى تريدون ان يتسلمها جيل يتوق الى للعيش فى مجتمع يليق بآدميتهم وكرامتهم.
وتصدر جمعية المساعدة حاليا بيانا تفصيليا يفند الادعاءات والاكاذيب الواردة بقرار محافظ القاهرة كما جاء بالصحيفة المذكورة ، كما تصدر اليوم العدد الثانى من "صوت الضحايا" فى موعده على موقع الجمعية الالكترونى

ملحوظة
لم تتلقى الجمعية حتى الان قرار محافظ القاهرة ، وتعلن الجمعية عن انها ستطعن قانونا عليه امام القضاء الادارى الذى نثق فى عدالته وانتصاره للحريات
جمعية المساعدة القانونية لحقوق الانسان
الخميس 30 اغسطس 2007
=======
القرار ده في منتهى الخطورة
ومعناه ان جمعيات المجتمع المدني
اللي بتساعد الناس بجد ح تتقفل
ومش ح يقعد في ارابيزنا غير
الجمعيات الحبشتكانية اللي بتطلع تساوير مديرينها
في الجرانيل في مهرجان الصياعة للقطيع
او الجمعيات اللي بتاخد التمويل وتشتري بيه صناديق اوزو
ويقعدوا في مقر الجمعية يسكروا ويسبوا الدين
او الجمعيات اللي بتشتغل مع الامن
او الجمعيات اللي بيتوفر فيها كل الشروط دي
يعني ايه بقى الكلام ده؟
يعني لا يرحموا ولا يخلوا رحمة ربنا تنزل
ارجو من كل الاعلاميين
والمدونين
واصحاب مؤسسات المجتمع المدني
اللي بيعملوا شغل خدمي بجد
وبيتبنوا قضايا تخدم الصالح الوطني بجد
انهم يتكاتفوا في الموقف العصيب ده
وبالذات المدونين يا اخوة
عشان شكلها كده بعد ما يخلصوا على المؤسسات اللي نافعانا
ح ينداروا على المدونات
ومش ح يفضل منها برضه
غير اللي بيتكلموا عن المثلية وانا مزة

Thursday 30 August 2007

محاكمة اسلام نبيه يوم الاحد القادم

http://www.youtube.com/watch?v=4iez20eP-ic

يوم الاحد 2 سبتمبر استكمال محاكمة اسلاك نبيه

وان شاء الله متوقع تبقى حكم

للتذكير ده تفريغ الشريط

عماد: الله يكرمك يا باشا
يا باشا معلش
يا باشا معلش
اسلام: ياللا يا بن المتناكة
ياللا يا كس امك
يا باشا انا اسف عماد:
يا باشا انا اسف
آآآآآآآآآه
آآآآآآآآآآآآآآآه
رضا فتحي: ياللا ياد يا بن المتناكة
اسلام: حلوة يا خول حلوة يا خول
حلوة
ها
حلوة ياه
ايه رأيك فيها يا بن المتناكة
ايه رايك يا خول يا عرص
يا عرص
بكرة في الموقف زمايلك كلهم ح يشوفوا الكلام ده يا عرص
عماد: آآآآآآآآآآآه يا باشااااااا
رضا فتحي: قول بولاق مافيهاش راجل يا بن المتناكة
قول انا خول

التفريغ ده للناس اللي مشاعرها رقيقة ومش عايزة تشوف الفيديو
==

ما حدش يجي يقول لي بتكتبي كلام قبيح على مدونتك

الكلام ده مرخص من الحكومة نفسها

من بق الباشا عدل

وناقل الباشا ليس بباشا


Wednesday 29 August 2007

اشاعات اشاعات اشاعات بيقولوا العجل مات

مافيهوش حاجة
مافيهوش حاجة وما حدش يتوقع ان ح يبقى فيه حاجة
لمدة خمسين سنة جاية
بطلوا احلام يقظة بقى
بكرة يطلع لكوا يا كلاب وهو بيشاور بكفه اللي شبه جاروف الاسمنت
انا قصدي طبعا برويز مشرف
اصل برويز مشرف قرر انه يتنازل ان قيادة الجيش
في مقابل انه يحتفظ بكرسي الرئاسة
ولو طلبوا منه يتنازل عن ملابسه الداخلية ح يتنازل
المهم يفضل قاعد على الكرس بفرق توفيق الدقن اللي في راسه ده
اصل الكرسي ده عقبال املتكوا كويس للصحة
ومحصن من العين والسحر وحقد الحاقدين
وبينزل الدود وعم محمود

نتقابل النهاردة في نقابة الصحفيين




صباح الخير

هو ايه ال

new generation project

ده؟ واحدة ست كلمتني من

private number

وقالت لي: الانسة نوارة

طبعا حبيتها موت انا مرة عسكري مرور قال لي يا انسة

اديته عشرة جنيه

قلت لها: ايوة انا

قالت لي انها تبع ال

us aid

وعندهم مشروع اسمه النيو جنيريشن بروجكت

وانها جاية هي والمدير القاهرة وتحب تشوفني

وتاخدني في البروجكت ده

بوظت لي موضوع الانسة وانا كنت لسة صاحية من النوم

ولسة ما شربتش القهوة

وما سألتهاش عن حاجة كل اللي قلته: مش دي تبع

اليو اس ايد؟

قالت لي اه

قلت له: مش باتعامل معاهم لما يخرجوا من العراق

ابقى اتعامل معاهم

معلش بقى ما كانش فيا دماغ اقول لها ولما تبطلوا

تدعموا اسرائيل وتخرجوا من افغانستان وتبطلوا ترازوا في مخاليق ربنا

الحقيقة انا مش فاهمة اليو اس ايد دي
باحس كده انها الخرية في ايد والصابونة في ايد
يموتوا الناس في فلسطين وبعدين يبعتوا لهم مساعدة ولبن اطفال
انا عندي تسجيل فيديو لفلسطينيين جنين وهم بيرموا
صناديق مساعدات جاية لهم من اليو اس ايد وبيقولوا
نموت من الجوع وما ناكلش من ايد اللي بيموتنا
لا لا لا انا ما تقمصتش فلسطينيي جنين
انا بس احرجت منهم
====

النهاردة ام الطفل محمد ممدوح اللي مات في التعذيب

جاية في النقابة

وناصر اللي مات في التعذيب

ههههههه مش هو اللي جاي طبعا

قصدي اخوه

اظن ان الناس دي محتاجة مساندة نفسية ومادية

واظن يبقى كويس لو رحنا وقابلناهم وحسسناهم ان ناس كتير

مهتمة بقضيتهم

انا عن نفسي رايحة ان شاء الله

الساعة سبعة

في نقابة الصحفيي

Tuesday 28 August 2007

عبد الله جول يفوز في انتخابات الرئاسة التركية




عبد الله جول فاز في انتخابات الرئاسة
بعد ما مراته بعتت لمصمصم ازياء عشان يعمل لها
حجاب يعجب الجيش
!!!!!!!
مع ان جول ده لا بيطالب بتطبيق الشريعة الاسلامية
ولا شتم اتاتورك اللي القانون التركي بيسجن اي حد ينتقده
يعني عندهم قانون ازدراء الاتاتورك
هئ هئ هئ
المعارضة التركية رفضت التصويت لجول
والاغلبية هي اللي صوتت له

والاغلبية المنتخبة في البرلمان التركي

هي حزب العدالة التركي
وخطورة جول من وجهة نظر الجيش
ان مراته محجبة و"تصلي الخمس صلوات" و
"له اصول اسلامية"
الا هي ايه اصول اسلامية دي
امال هم اصولهم هندية؟
كمان جول مقدم تعديل في الدستور
ينص على ان اللي عايز يلبس حاجة يلبسها
!!!!!!!!!!!!!!
مما يدل على انه ح يسمح للمحجبات انهم يدخلوا
الجامعة والتعليم الحكومي
ياللهول
===
الظاهر ان الحرية والعدالة
وهمين كبيرين جدااااااااااااا
مافيش بقعة في العالم لا فيها حرية
ولا فيها عدالة
وبما اني مصرية
فاحب جدا اني استمتع بشتيمة اتاتورك
اللي اقدر اشتمه في مصر
من غير ما اتسجن
اتاتورك الحيوان ابن الجزمة القديمة
وامه جزمة قديمة لانها يهودية من الدونمة
وهو شبشب حمام مقطع ومتعاص في المجاري كمان
هه
الله
اهو كده انا مبسوطة
==
يا ترى بفوز جول الجيش ح يتدخل
ويعمل انقلاب
ويخرب الدنيا كعادة اي جيش
بيتدخل في السياسة ويسيطر على الحكم؟
لا وده جيش ايه
هو المنسق الاول للمصالح الاسرائيلية في المنطقة
انا عمالة اتفرج دلوقت على مشاهد من حملات
جول الانتخابية
وشايفة ستات مش محجبات كتير عمالين يهللوا له
يعني الراجل ما عملش حاجة
مراته بتصلي ومحجبة
هو ماله؟
لا تزر وازرة وزر اخرى
وان شاء الله يثبت لهم انه مش بيصلي ولا حاجة
وللا يطلقها بقى
====
تحديث: اهو جول في خطبة البرلمان
بعد نجاحه وحلفانه على جزمة اتاتورك
قال خطبها ملخصها انه حط اتاتورك في النص
وقعد يلف حواليه ويقول: نحن غرابة عت عت

كاريكاتير يفطسسسسسسس من العياط

اهداء من
رامي عمران
إلى
:اطفال غزة

الغاء حفل افتتاح دار ملامح؟ يا ضنايا يابني

الشرقاوي بعت لي
:الميل ده

للأسف الشديد سيتم تأجيل الأفتتاح ..لظروف خارجه عن إرادتنا..التفاصيل سأكتبها لاحقاً..تابعونا... فى الأيام القليلة القادمة.
====
طبعا لسة ح اكلمه الصبح وافهم منه ايه اللي حصل
يا ضنايا يابني
الواد ده معمول له عمل وللا ايه؟

Monday 27 August 2007

رد من العقيد اسامة الصادق على بعض التعليقات

الاستاذة / نوارة الانتصار
بعد التحية :
*بمراجعة بعض التعليقات من الشباب وجدت انه من الواجب على ان اوضح بعض النقاط:-
لا اعتقد ان الداعية الكبير الشيخ محمد متولى الشعراوى رحمه الله سجد شكراً لله على هزيمة مصر والعرب فى عام 1967 حتى لو كانت تلك الهزيمة سوف تؤثر على نظام الحكم وهذا لسبب بسيط .. هل من المعقول لكى اغير نظاما مهما كان رأينا فيه ان نضحى بألاف من شباب مصر .. انها تضحية جسيمة وماذا كانت نتيجة التضحية؟ هل تغير النظام؟

* الشاب المصرى / محمود .. يعلق على الكتاب بخصوص التدريب الذى انتشر من وحدتى الصغيرة الى باقى الوحدات قائلاً " حاجه فاقعه قوى " اعيد ثانية ايها الاحباب لا يجب ان يكون النقد والتعليق هكذاً لانكم لا تعلمون الحقيقة .. ماهى الحقيقة ؟
الحقيقة ان بعض جنودى انتقدونى بأننى غير مُلم بمعلوماتى فى السلاح "مدفع الهاون" وانا اقود سرية .. تخيل اذا كان مدرسا ويعلم بأن طلابه يتحدثون عن جهله بالمادة العلمية .. الانتقاد جاء من جنودى وهم لا يعلمون بأننى كنت نائما اثناء ذلك باللورى الذى استخدمه فى هذا الغرض .. شعرت بأننى ضئيل وخائن للوطن خاصة ان هؤلاء الجنود كانوا على مستوى عال من التدريب لما قام به قائد السرية الذى تسلمت مكانه نظراً لانتقاله لموقع آخر .. شعرت بوخز الضمير والمسئولية .. لم انم ليلتها واحضرت الكتاب المخصص للمدفع والمترجم من الروسية وتخيرت اصعب درس وتفهمته " والحقيقة ما قاله جنودى عنى كان صوابا لأننى حصلت على فرقة بالقاهرة ولم اذاكر جيداً كنت اثنائها لعبى ومهمل" والجنود اكتشفوا جهلى .. اعددت نفسى واليوم التالى لم اذكر الواقعة وسألتهم عن هذا الدرس ونفوا انهم يعلمونه وانا متأكد غير ذلك لما اعلمه عن قائدهم السابق من خبرته وغزارة معلوماته .. شرحت الدرس وفوجؤا بأننى اعلم .. كل يوم اذاكر درساً واشرحه لهم واصبحت اعيد معلوماتى وادربهم .. شاهدنا قائدنا فطلب من باقى الوحدات ان تحذوا حذونا .. هذا هو ملخص ما كانت تخبركم به نوارة نجم .. اعتقد الحكاية لا فاقعه ولا مغمضه
* نفس الشاب محمود مندهش من تعليق الاستاذة / نواره بأن الجنود الاسرائيليون جبناء .. سيدى ..الجنود الاسرائيليون مهرة فى استخدام اسلحتهم وذا كفاءة عالية وليس من الفخار ان جيشنا يهزم جبناء ولكن كل الفخار اننا هزمنا اقوى جيش فى الشرق الاوسط وليس هذا تقييمى بل هو تقييم دولى لما يمتلكونه من الاسلحة المتقدمة وانفاقهم المرتفع على جيشهم .. لكن .. عند الاصابة لاحد منهم او الهزيمة تنتابهم حالة من الفزع والرعب لا مثيل لها .. اما الغلبان المصرى فيعلم ان هذا قدره بل والشهيد نهايته الجنه لانه مؤمن بالله وهذا هو الفرق ..
لهذا ارجوا قبل التعليق ان تقرأ الكتاب حتى يصبح التعليق موضوعيا مع رجاء ترك الهزار اثناء الحديث عن المقاتلين فغالبيتهم لاقوا ربهم سواء نالوا الشهادة او لكبر اعمارهم .. وما الفائدة بأن نتريق عليهم .. هذا آخر خط باق بعد ان فقدنا العديد من خطوط التقدم والانتصار فى مجال الاقتصاد والفن والثقافة والتعليم والسياسة الخارجية

شىء آخر اوجهه للشباب .. لقد دهشت من تفاعل الفتيات مع كتابى سواء من الاعلاميين او المثقفات بل ان العديد منهن استلم العديد من الكتب لتوزيعها على الاصدقاء والاقارب بينما الشباب عدة الوطن نايمين فى العسل ونازلين تريقه والبعض يسأل .. فين الكتاب؟ .. تحركوا ابنائى فانا بعد الله اعتمد على سواعدكم وحركتكم .. الا نجد بعض الشباب الجامعات او مراكز الشباب يعمل على لقائى ويتسلم بعض النسخ لتوزيعها على المعارف بعد ان ضنت مؤسسة الاهرام بتعاونها معى وغرمتنى مالا ليس له مبرر وحجزت الكتاب لديها سبعون يوما لم توزع سوى خمسون بينما فتاة واحدة وزعت اكثر من خمسون كتابا فى ظرف اسبوع .. انهضوا يا شباب مصر فهذا شىء يسير .. واود ان اوجه لشباب المحافظات انه يمكنكم ارسال مندوب لمقابلتى ويحصل على الكتاب لكن بمجموعات " الربطة بها عشرة كتب " والكتاب ثمنه عشرون جنيها .. يحضر لمقابلتى بعد ان يتصل بى تليفونيا ويخصم ثمن سفره من المبلغ قبل ان يسلمه لى .. بل لو احضر اسماء الراغبين فى الكتاب فمن الممكن للراغبين بأن اوقع عليه الاهداء .. الحكاية بسيطة والمواصلات متوفرة وانا متحمل مصاريف السفر ولو كان وقت غداء سأدفع له ثمن الوجبة فى اى محل يختاره .. ايه رأيكم فى الحكايه سهله ومش عايزه تعب وممكن للمهندس قنديل ابن البحيره الهمام ان يبدأ التجربة .. نريد حركه وايجابيه ونريد منافسة مع فتيات مصر فلا اقل من ان نكون فى نفس المستوى .. انا مش باطلب منكم حرب ولا غيره بل الاطلاع على بطولات الاباء والاعمام والاخوال والجيل السابق
فى النهاية منتظر من جميع شباب مصر الايجابية اما الشباب خارج مصر فيمكن تجميع اكبر عدد وارسل لهم بالكتاب ولكن الشحن عليكم تحمله لاننى لا اربح فى الكتاب ولا اخفى عليكم بأننى سوف اخسر فيه ماديا لكن مكسبى ان يصل لكل شاب عاقل متعلم مثقف وطنى يرغب باقتناء سيرة الابطال الشهداء العطرة وفقكم الله جميعا لنصرة مصر .. والسلام عليكم ورحمة الله وبركاته .

مدون : كتاب الناس والحرب
اسامة على الصادق
رقم موبايل : 0127970032

عن محمد عبد اللطيف..امانة من علاء سيف

الموضوع ده علاء سيف مأمنا اننا
ننشره زي ماهو
:اليكم الرسالة اللي جات لعلاء من حمدي قناوي

أمانة يا جماعة برجاء النشر علشان نوصل قصة محمد عبد اللطيف للناس كلها
متى يعود محمد
فاكرين حبسة القضاة و فاكرين أصغر محبوس معانا الشاب الصغير الأسمر الملامح عودة كالخيرزان طويل و نحيل , ملامحة مصرية محمصة بلفحة شمس حوارى المنصورة كان ينادية الشاويش فى تمام الحبس محمد عبد اللطيف درويش و كنا نطلق علية حمادة عبد اللطيف و لكنة حين عمل بالصحافة مراسلا للبديل اختار اسم محمد طاهر ليزين بة كتاباتة المنتمية للفقراء و المضطهدين فى أقسام الشرطة
و فى يوم لم يكن يبدوا فى افقه انه مرتب كان يغطى موضوع ردود أفعال الناس عما نشر فى الوقائع تجاوزات الشرطة و التعذيب فى أقسام الشرطة المصرية بتلبانة و شها قبضوا علية فى الشارع و فى قسم شرطة المنصورة فقط عرف أنة متهم بتوزيع المنشورات : رفض التوقيع على المحضر رقم 12033 أول المنصورة
و فى اليوم التالى تم عرضة على النيابة عذابا صباحا و نكدا مساءا الغريب أن وكيل النيابة طلب عما يثبت أنة صحفى و سأل عن تواجد أى إثبات شخصية لمحمد و كان هذا مؤشرا على الإنفراج و بدانا نتقبل التهانى و هبط محمد و هو طائر فرحا على سلالم النيابة و كأنها سلالم نقابة الصحفيين التى عرفت أقدامة النحيفة
و بعد تحرك موكب الحبس من أمام باب النيابة و بعد عدة خطوات تحركت الموبيلات و نشطت اللاسلكيات لتعيد محمد ثانية إلى وكيل النيابة كنت أنتظر القرار واقفا فى مواجهة مبنى النيابة الشاهق على رصيف كرنيش النيل محدقا فى مياة النيل , أحسست للحظة أن مياة النيل توقفت عن السريان و فجأة أنقطع المور خولنا حين هبط محمد على سلالم النيابة و لكن هذه المرة كانت أقدامة بطيئة متثاقلة لا تقوى على حمل 15 يوم استمرار حبس
بقلب حزين ودعت محمد و عدت أحدق بالنيل ثانية سرحت و أنا أسئل نفسى متى تسرى مياة النيل ثانية , و متى يعود النور , متى يعود محمد .
التوقيع
حمدى قناوى

حفل افتتاح دار ملامح

:جاتلي الدعوة بالميل كده

حفل افتتاح دار ملامح للنشر




أنتم مدعوون لحضور حفل افتتاح دار ملامح للنشر أخيراً ..الافتتاح ده بعون الله هيكون يوم الجمعة 31 أغسطس 2007 بمسرح روابط بوسط البلد..3 ش حسين المعمار المتفرع من محمود بسيونى .. بجوار التاون هاوس..الساعه 8,30 مساءً..حفل الافتتاح سيتضمن فقرات غنائية ل..
فاطمة عادل و محمد إسماعيل عمر مصطفى Bad Apple Bandأسامه فؤادوهناك المزيد ...سيقام حفل توقيع جماعى للكتاب خلال الحفلة..الدعوة عامة وبدون خصم على الكتب وبدون أهداءات..و................ البكا على راس الميت يعنى.
====
طبعا انا ح احضر ان شاء الله لاسباب عديدة
اولا عشان دي اول دار نشر تبقى تبع المدونين ولازم كلنا نشجعها
ثانيا
الحقيقة انا ما اعرفش مين فاطمة عادل ومحمد اسماعيل
ثالثا
دي دار نشر ادارة ابني الصغير
رابعا
انا عارفة العنوان
ودي اول مرة في حياتي تجيلي دعوة ابقى عارفة مكانها فين

Sunday 26 August 2007

صوتوا لتميم البرغوثي أميرا للشعراء



والله أنا مش باتحيز بالذات في الشعر

بس الحقيقة ان تميم احسن واحد في مسابقة امير الشعراء

والجمهور بيصوت له

بس لجنة التحكيم مرة واحدة قللته وقدمت عليه السعودي والاماراتي

مش عارفة ليه

اهي قصائد تميم اللي القاهم في المسابقة

: القصيدة الاولى


قفي ساعةً يفديكِ قَوْلي وقائِلُهْ


قفي ساعةً يفديكِ قَوْلي وقائِلُهْ /ولا تَخْذِلي مَنْ باتَ والدهرُ خاذِلُهْ
أَنَا عَالِمٌ بالحُزْنِ مُنْذُ طُفُولَتي/ رفيقي فما أُخْطِيهِ حينَ أُقَابِلُهْ
وإنَّ لَهُ كَفَّاً إذا ما أَرَاحَها /عَلَى جَبَلٍ ما قَامَ بالكَفِّ كَاهِلُهْ
يُقَلِّبُني رأساً على عَقِبٍ بها/ كما أَمْسَكَتْ سَاقَ الوَلِيدِ قَوَابِلُهْ
وَيَحْمِلُني كالصَّقْرِ يَحْمِلُ صَيْدَهُ/ وَيَعْلُو به فَوْقَ السَّحابِ يُطَاوِلُهْ
فإنْ فَرَّ مِنْ مِخْلابِهِ طاحَ هَالِكاً/ وإن ظَلَّ في مِخْلابِهِ فَهْوَ آكِلُهْ

عَزَائي مِنَ الظُّلاَّمِ إنْ مِتُّ قَبْلَهُمْ/ عُمُومُ المنايا مَا لها مَنْ تُجَامِلُهْ
إذا أَقْصَدَ الموتُ القَتِيلَ فإنَّهُ/ كَذَلِكَ مَا يَنْجُو مِنَ الموْتِ قاتلُِهْ
فَنَحْنُ ذُنُوبُ الموتِ وَهْيَ كَثِيرَةٌ/ وَهُمْ حَسَنَاتُ الموْتِ حِينَ تُسَائِلُهْ
يَقُومُ بها يَوْمَ الحِسابِ /مُدَافِعاً يَرُدُّ بها ذَمَّامَهُ وَيُجَادِلُهْ
وَلكنَّ قَتْلَىً في بلادي كريمةً/ سَتُبْقِيهِ مَفْقُودَ الجَوابِ يحاوِلُهْ

ترىالطفلَ مِنْ تحت الجدارِ منادياً /أبي لا تَخَفْ والموتُ يَهْطُلُ وابِلُهْ
وَوَالِدُهُ رُعْبَاًَ يُشِيرُ بَكَفِّهِ/ وَتَعْجَزُ عَنْ رَدِّ الرَّصَاصِ أَنَامِلُهْ
أَرَى اْبْنَ جَمَالٍ لم يُفِدْهُ جَمَالُهُ/ وَمْنْذُ مَتَي تَحْمِي القَتِيلَ شَمَائِلُهْ
عَلَى نَشْرَةِ الأخْبارِ في كلِّ لَيْلَةٍ/ نَرَى مَوْتَنَا تَعْلُو وَتَهْوِي مَعَاوِلُهْ
أَرَى الموْتَ لا يَرْضَى سِوانا /فَرِيْسَة ً كَأَنَّا لَعَمْرِي أَهْلُهُ وَقَبَائِلُهْ
لَنَا يَنْسجُ الأَكْفَانَ في كُلِّ لَيْلَةٍ/ لِخَمْسِينَ عَامَاً مَا تَكِلُّ مَغَازِلُهْ

وَقَتْلَى عَلَى شَطِّ العِرَاقِ كَأَنَّهُمْ /نُقُوشُ بِسَاطٍِ دَقَّقَ الرَّسْمَ غَازِلُهْ
يُصَلَّى عَلَيْهِ ثُمَّ يُوطَأُ بَعْدَها/ وَيَحْرِفُ عُنْهُ عَيْنَهُ مُتَنَاوِلُهْ
إِذَا ما أَضَعْنَا شَامَها وَعِراقَها/ فَتِلْكَ مِنَ البَيْتِ الحَرَامِ مَدَاخِلُهْ
أَرَى الدَّهْرَ لا يَرْضَى بِنَا حُلَفَاءَه/ وَلَسْنَا مُطِيقِيهِ عَدُوَّاً نُصَاوِلُهْ
فَهَلْ ثَمَّ مِنْ جِيلٍ سَيُقْبِلُ أَوْ مَضَى/ يُبَادِلُنَا أَعْمَارَنا وَنُبَادِلُهْ


:القصيدة الثانية


في القدس
في القدس

مرَرْنا عَلى دارِ الحبيب فرَدَّنا /عَنِ الدارِ قانونُ الأعادي وسورُها
فَقُلْتُ لنفسي رُبما هِيَ نِعْمَةٌ/ فماذا تَرَى في القدسِ حينَ تَزُورُها
تَرَى كُلَّ ما لا تستطيعُ احتِمالَهُ/ إذا ما بَدَتْ من جَانِبِ الدَّرْبِ دورُها
وما كلُّ نفسٍ حينَ تَلْقَى حَبِيبَها/ تُسَرُّ ولا كُلُّ الغِيابِ يُضِيرُها
فإن سرَّها قبلَ الفِراقِ لِقاؤُه/ فليسَ بمأمونٍ عليها سرُورُها
متى تُبْصِرِ القدسَ العتيقةَ مَرَّةً /فسوفَ تراها العَيْنُ حَيْثُ تُدِيرُها

في القدسِ، بائعُ خضرةٍ من جورجيا برمٌ بزوجته
يفكرُ في قضاءِ إجازةٍ أو في في طلاءِ البيتْ
في القدس، توراةٌ وكهلٌ جاءَ من مَنْهاتِنَ العُليا
يُفَقَّهُ فتيةَ البُولُونِ في أحكامها
في القدسِ شرطيٌ من الأحباشِ يُغْلِقُ شَارِعاً في السوقِ،
رشَّاشٌ على مستوطنٍ لم يبلغِ العشرينَ،
قُبَّعة تُحَيِّي حائطَ المبكَى
وسياحٌ من الإفرنجِ شُقْرٌ لا يَرَوْنَ القدسَ إطلاقاً
تَراهُم يأخذونَ لبعضهم صُوَرَاً
مَعَ امْرَأَةٍ تبيعُ الفِجْلَ في الساحاتِ طُولَ اليَومْ
في القدسِ دَبَّ الجندُ مُنْتَعِلِينَ فوقَ الغَيمْ
في القدسِ صَلَّينا على الأَسْفَلْتْ
في القدسِ مَن في القدسِ إلا أنْتْ

وَتَلَفَّتَ التاريخُ لي مُتَبَسِّماً
أَظَنَنْتَ حقاً أنَّ عينَك سوفَ تخطئهم، وتبصرُ غيرَهم
ها هُم أمامَكَ، مَتْنُ نصٍّ أنتَ حاشيةٌ عليهِ وَهَامشٌ
أَحَسبتَ أنَّ زيارةً سَتُزيحُ عن وجهِ المدينةِ يابُنَيَّ
حجابَ واقِعِها السميكَ لكي ترى فيها هَواكْ
في القدسِ كلًّ فتى سواكْ
وهي الغزالةُ في المدى، حَكَمَ الزمانُ بِبَيْنِها
ما زِلتَ تَرْكُضُ إثْرَهَا مُذْ وَدَّعَتْكَ بِعَيْنِها
رفقاً بِنَفسكَ ساعةً إني أراكَ وَهَنْتْ
في القدسِ من في القدسِ إلا أَنْتْ

يا كاتبَ التاريخِ مَهْلاً،
فالمدينةُ دهرُها دهرانِ
دهر مطمئنٌ لا يغيرُ خطوَه وكأنَّه يمشي خلالَ النومْ
وهناك دهرٌ، كامنٌ متلثمٌ يمشي بلا صوتٍ حِذار القومْ

والقدس تعرف نفسها،
إسأل هناك الخلق يدْلُلْكَ الجميعُ
فكلُّ شيئ في المدينةِ
ذو لسانٍ، حين تَسأَلُهُ، يُبينْ

في القدس يزدادُ الهلالُ تقوساً مثلَ الجنينْ
حَدْباً على أشباهه فوقَ القبابِ
تَطَوَّرَتْ ما بَيْنَهم عَبْرَ السنينَ عِلاقةُ الأَبِ بالبَنينْ

في القدس أبنيةٌ حجارتُها اقتباساتٌ من الإنجيلِ والقرآنْ
في القدس تعريفُ الجمالِ مُثَمَّنُ الأضلاعِ أزرقُ،
فَوْقَهُ، يا دامَ عِزُّكَ، قُبَّةٌ ذَهَبِيَّةٌ،
تبدو برأيي، مثل مرآة محدبة ترى وجه السماء مُلَخَّصَاً فيها
تُدَلِّلُها وَتُدْنِيها
تُوَزِّعُها كَأَكْياسِ المعُونَةِ في الحِصَارِ لمستَحِقِّيها
إذا ما أُمَّةٌ من بعدِ خُطْبَةِ جُمْعَةٍ مَدَّتْ بِأَيْدِيها
وفي القدس السماءُ تَفَرَّقَتْ في الناسِ تحمينا ونحميها
ونحملُها على أكتافِنا حَمْلاً
إذا جَارَت على أقمارِها الأزمانْ

في القدس أعمدةُ الرُّخامِ الداكناتُ
كأنَّ تعريقَ الرُّخامِ دخانْ
ونوافذٌ تعلو المساجدَ والكنائس،
أَمْسَكَتْ بيدِ الصُّباحِ تُرِيهِ كيفَ النقشُ بالألوانِ،
وَهْوَ يقول: "لا بل هكذا"،
فَتَقُولُ: "لا بل هكذا"،
حتى إذا طال الخلافُ تقاسما
فالصبحُ حُرٌّ خارجَ العَتَبَاتِ لَكِنْ
إن أرادَ دخولَها
فَعَلَيهِ أن يَرْضَى بحُكْمِ نوافذِ الرَّحمنْ

في القدس مدرسةٌ لمملوكٍ أتى مما وراءَ النهرِ،
باعوهُ بسوقِ نِخَاسَةٍ في إصفهانَ لتاجرٍ من أهلِ بغدادٍ أتى حلباً فخافَ أميرُها من زُرْقَةٍ في عَيْنِهِ اليُسْرَى،
فأعطاهُ لقافلةٍ أتت مصراً، فأصبحَ بعدَ بضعِ سنينَ غَلاَّبَ المغولِ وصاحبَ السلطانْ

في القدس رائحةٌ تُلَخِّصُ بابلاً والهندَ في دكانِ عطارٍ بخانِ الزيتْ
واللهِ رائحةٌ لها لغةٌ سَتَفْهَمُها إذا أصْغَيتْ
وتقولُ لي إذ يطلقونَ قنابل الغاز المسيِّلِ للدموعِ عَلَيَّ: "لا تحفل بهم"
وتفوحُ من بعدِ انحسارِ الغازِ، وَهْيَ تقولُ لي: "أرأيتْ!"

في القدس يرتاحُ التناقضُ، والعجائبُ ليسَ ينكرُها العِبادُ،
كأنها قِطَعُ القِمَاشِ يُقَلِّبُونَ قَدِيمها وَجَدِيدَها،
والمعجزاتُ هناكَ تُلْمَسُ باليَدَيْنْ

في القدس لو صافحتَ شيخاً أو لمستَ بنايةً
لَوَجَدْتَ منقوشاً على كَفَّيكَ نَصَّ قصيدَةٍ
يابْنَ الكرامِ أو اثْنَتَيْنْ

في القدس، رغمَ تتابعِ النَّكَباتِ، ريحُ براءةٍ في الجوِّ، ريحُ طُفُولَةٍ،
فَتَرى الحمامَ يَطِيرُ يُعلِنُ دَوْلَةً في الريحِ بَيْنَ رَصَاصَتَيْنْ

في القدس تنتظمُ القبورُ، كأنهنَّ سطورُ تاريخِ المدينةِ والكتابُ ترابُها
الكل مرُّوا من هُنا
فالقدسُ تقبلُ من أتاها كافراً أو مؤمنا
أُمرر بها واقرأ شواهدَها بكلِّ لغاتِ أهلِ الأرضِ
فيها الزنجُ والإفرنجُ والقِفْجَاقُ والصِّقْلابُ والبُشْنَاقُ
والتاتارُ والأتراكُ، أهلُ الله والهلاك، والفقراءُ والملاك، والفجارُ والنساكُ،
فيها كلُّ من وطئَ الثَّرى
كانوا الهوامشَ في الكتابِ فأصبحوا نَصَّ المدينةِ قبلنا
يا كاتب التاريخِ ماذا جَدَّ فاستثنيتنا
يا شيخُ فلتُعِدِ الكتابةَ والقراءةَ مرةً أخرى، أراك لَحَنْتْ

العين تُغْمِضُ، ثمَّ تنظُرُ، سائقُ السيارةِ الصفراءِ، مالَ بنا شَمالاً نائياً عن بابها
والقدس صارت خلفنا
والعينُ تبصرُها بمرآةِ اليمينِ،
تَغَيَّرَتْ ألوانُها في الشمسِ، مِنْ قبلِ الغيابْ
إذ فاجَأَتْني بسمةٌ لم أدْرِ كيفَ تَسَلَّلَتْ للوَجْهِ
قالت لي وقد أَمْعَنْتُ ما أَمْعنْتْ
يا أيها الباكي وراءَ السورِ، أحمقُ أَنْتْ؟
أَجُنِنْتْ؟
لا تبكِ عينُكَ أيها المنسيُّ من متنِ الكتابْ
لا تبكِ عينُكَ أيها العَرَبِيُّ واعلمْ أنَّهُ
في القدسِ من في القدسِ لكنْ
لا أَرَى في القدسِ إلا أَنْتْ
موقع تميم اهو
وتميم هو رقم سبعة
للتصويت من مصر وبقية الدول انظر الجدول اللي فوق
للتصويت من مصر
9481
وللتصويت من بقية البلاد مكتوب في الجدول

Saturday 25 August 2007

الطفل محمد شهيد الداخلية...احزن يا كل امهات الارض

يعني الطفل محمد من المنصورة شهيد الداخلية
شايفة ان الموضوع بتاعه نام
انا ما كنتش عايزة انزل صوره
ووائل عباس كتر خيره نزل الصور دي
وطلب مننا كلنا ننشرها
بس قال انا عملت فيها رقيقة وبعدين احتقرت نفسي جدا
وانا باعترف اني كنت حقيرة جداااااااا لما ما نشرتش الصور
واحلتكم على مدونة وائل على اساس ان وائل والواد وامه
ما عندهمش دم وانا اللي حساسة

الصور دي لو جات لنا من فلسطين كان احسن

يا ريت

كنا عرفنا نبعتها للقلل المنتحرة ولحفيد ابليس

جورج بوش

ولكل جرائد العالم وكنا قلبنا الدنيا

بس مافيش اتعس من الفلسطيني غير المصري

واسرائيل رغم انحطاطها الانساني لا تجرؤ انها تعمل كده

على الاقل ما تعملش كده في عيل من عيالها

بتعمل كده في "الاعداء" الفلسطينيين

يا كل امهات الارض
يا كل نساء الارض
خرسنا واهلنا التراب على رؤوسنا لو صمتنا على مثل هذا الاجرام
احزن يا كل امهات الارض فهذا الطفل
فلذة اكبادكن جميعا

عار عليكن ان آويتن الصغار الى اسرتهم الوثيرة

وهذه الام تبكي طفلها المظلوم

انا عايزة كل ام

لا

كل ست ربنا خالق الامومة فيها كأوبشن طبيعي

قبل ما تحط راسها على المخدة تسأل

محمد على ما ربنا فك اسره ومات

كان حاسس بايه قبلها

محمد دمه في رقابنا جميعا

عذابه في رقابنا جميعا

قهرة امه في رقابنا جميعا

المركز فتحوا له جنبه وودوه مستشفى الصدر

اللي رمته في الشارع عشان قال ايه كان بيقطع المراتب

طبعا كان بيقطعها من الالم

محمد خرج من مركز الشرطة صاحي بعد كل العذاب ده

واتلطم في الشوارع وما بين المستشفيات

كل العذاب ده لحد ما ربنا فك اسره ورحمه

ومات وارتاح

بس انهي ام في الدنيا

انهي ست في الدنيا تقدر ترتاح بعد اللي حصل لمحمد

دي رسالة لكل مراكز الطفل والمرأة

وكل المدونات النساء

فكروا في ولادكوا ممكن يبقى عليهم الدور

"وليخش الذين لو تركوا من خلفهم ذرية ضعافا خافوا عليهم فليتقوا الله وليقولوا قولا سديدا"

Friday 24 August 2007

احجية: ما الفرق بين الصحفي والزحفي والسخفي


وحل هذه الأحجية
كالآتي: ان الصحفي هو من يعمل بمهنة الصحافة
ولمهنة الصحافة اسم سري كودي
الا وهو
"افضل الجهاد"
حيث ان افضل الجهاد هو كلمة حق عند سلطان جائر
وكثر خير سلاطيننا ليس منهم الا جائر
ولا نعني ان جور السلطان هو تفسيق له
حاشا لله، لكنهم يعطوننا الفرصة للجهاد
حتى ندخل الفردوس وننعم بمقامها
وقد كان الهدف من الصحافة ان تنقل الخبر كما هو
رغم انف من يريد اخفاءه او تجميله او تحويره
وان تنطق بالحق ولا تخشى فيه جور جائر
هذه هي الصحافة
وهذا هو الصحفي
وعلى الله قصد السبيل
===
ولكن
منها جائر
اي السبيل يعني
فهناك الزحفي، لا فرق بينه وبين الصحفي
سوى حرف واحد
والزحفي هو من يزحف على بطنه عملا بنصيحة
اغنية سيد درويش الشهيرة: عشان ما نعلا ونعلا ونعلا
لازم نطاطي نطاطي نطااااااااااااطييييييييييييي
ولا يأبه الزحفي بكون المرحوم سيد درويش قد وضع هذه
الاغنية هازءا بهذا المبدأ، إذ أن سيد درويش ذاته
لم يربح اسودا ولا اصفرا من تهكمه على اصحاب الحكمة
والعقل
ومات بعد أن باع البلاطة وهي نهاية سوداء
لكل من تسول له نفسه "النقورة" على منثنيي الظهور
الزاحفين على البطون
ومن طلب العلا
زحف الليالي
ويتسم الزحفي بالتزامه بقيم واخلاق مهنة الزحافة
فعليه ألا يكف عن الزحف على بطنه
وقد وجد في ديننا الحنيف ضالته
اذ يؤكد أن التولي يوم الزحف من الكبائر
ولا يضيره سفسطتك أيها الزنديق حين تقول
ان الزحف المقصود هنا هو الحرب
اذ لم يوضح الحديث اذا كان الزحف على البطون ام على الاقدام
وعليه ان يطيع ولي الامر كما امر الله
وولي امره ونعمته هو رئيس تحريره ومن ورائه سواء كانوا
رجال اعمال او رجال سلطة
فالحق حق الممول
واللعنة على الابراج
وعلى كل من يناطح ولي النعم
وولي النعم له ولي نعم وولي نعم النعم له ولي نعم نعم النعم من جوة القلب
حتى يصل الى اعلى رأس في العالم
يقول الانجيل ان سيد هذا العالم هو الشيطان
وتقول الاحصاءات ان سيد العالم هو جورج بوش
والله اعلى واعلم
وهناك من الزحفيين من يتصل باعلى رأس في العالم مباشرة
ذلك لان اللف والدوران ليس من شيم الزحفي الاصيل
وان اقصر الخطوط لهو الخط المستقيم
وكلما اختصر الزحفي نعم نعم نعم النعم
كلما زادت النعمة والنعيم
وعاش عيشة هنية ومات ميتة
لا يعلم بها الا الله
====
اما السخفي فهو يعمل في مجال السخافة
وهي تتطلب قدرات نادرة تجمع بين محاسن الزحافة
ونوابغ السخافة
ليخرج لنا من بطون السخفيين شراب مختلف الوانه فيه
سم للناس
وتعرف السخافة باسم اخر وهو المعارضة الحكومية
ولها من الرموز العظيمة ما يرهق العاد ويحير المحصي
وتشترك الزحافة والسخافة
في قول كلمة الحق بالطبع
ولكن بتصرف
فالابداع الذي يفتقر اليه المغفلون من الصحفيين
يجب ان يتوفر في السخفي والزحفي بالتتابع
وبدلا من ان تكون عند سلطان جائر
يتغير الـ"لوكيشن" ليصبح في اذن
ضابط امن دولة عاقل
واحيانا يستقي الزحفي والسخفي كلمات الحق
من فم جهاز امن دولة مؤمن عدل مشهود له بحسن الصلاة
والمؤمن مصدق فصدق الامن
وكذب كل عيني واذني وعقلي جمعاء
===
الفننس
وهو ملحق بكل من الزحافة والسخافة
وهو من يعطي في الهايف
لكي نحبه
يا فننس
===
لله الحمد والمنة
فقد تمكن الزحفيون والسخفيون الاطهار
من الانتصار على المغفلين المدعوين بالصحفيين
وحصارهم
وجاري الاعداد لغزوت غراء لاسكاتهم تماما
وما قانون الصحافة واوضاعها وقوانين الشبكة الالكترونية
الا سرية اعداد يرهبون بها عدو ولي النعم وعدوهم
عسى الله ان يجري الكذب والتلفيق والافساد على ايديهم
الناصعة وسيوفهم الغراء
ولله الامر من قبل ومن بعد

بالنوسبة للتصويت

أولا خدامتكوا لسة ما رقعتش بالصوت في التصويت ده
ح استنى اصوت اخر يوم
ثانيا
انا حريصة ان التصويت يبقى نزيه
وارجو من السادة العملاء الالتزام بالتصويت مرة واحدة
فقط لا غير
ومافيش داعي حكاية التصويت من عدة اجهزة ولا مسح
الانبوكس اللي في كوكيز وكده يعني
ثالثا
ارجو انك تاخد نفس عمييييييييييق من الهواء النقي
وتتخيل ان مصر في حرب فعلا وانك على الجبهة فعلا
وانك مخير ما بين انك تكمل او ما تكملش او تحارب او ما تحاربش
وبعدين ترقع بالصوت على الاستفتاء
يعني مافيش داعي للتسرع
ولا التصرع
وبعد ما يخلص الاستفتاء وهو قدامه أسبوع
نبقى نحلل النتيجة مع بعض
كل واحد يجيب علبة عشان ياخد التحليل بتاعه فيها

والغباء أنواع وأشكال

وزعلانين مني لما قلت ان مطلب علاء سيف
بأن يبحث الصحفيون عن مهنة شريفة
هو مطلب القرن
وزعلانين عشان علاء شتم الصحفي اللي كتب على لسانه كلام ما حصلش
بالاب والام والدين والميتين
يعني ينفع الواحد يبقى ما عندوش اخلاق وضريب اخبار
وينفع يبقى وسخ ويشتغل مع الامن
لكن كمان غبي؟
اصل الصحفي لما يبقى غبي ويعمل
عملة زي دي ويكتب عن مدون وناشط سياسي
انه تنصر وينقى محمد الشرقاوي بالذات
عشان يقول عليه الكلام ده يبقى غبي وللا لا؟
اصل الغباء انواع وكل فئة اجتماعية وكل مهنة وكل توجه سياسي
له نوع الاغبيا اللي بيبقوا موجودين فيه
زي ما بيبقى له نوع الاذكياء اللي برضه بيتمزوا فيه
بس الذكي نو بروبلم بتعرفه على طول
بيبان من اول كلمتين بيقولهم
وواحد زي محمد الشرقاوي الناس كلها عارفة عنه كل حاجة
ومش ناقص غير يبث حياته اليومية على الهوا عبر الانترنت
عشان ما حدش يتوهم انه ماسك عليه ذلة
يقوم الصحفي الغبي ينقى من دون كل الناس محمد الشرقاوي
عشان يقول عليه انه اعتنق المسيحية
ومحمد لو عمل حاجة زي دي كل البشرية في الصين ح تعرف
الصحفي لما يبقى ما عندوش اخلاق يفبرك اخبار ويضرب مواضيع
لكن الغبي لما يشتغل صحفي ينقي الفبركة الغلط مع البني ادم الغلط
في التوقيت الغلط في المكان الغلط عشان يترفع عليه قضية
====
كيف تعرف الغبي؟
الغبي لما يبقى صحفي يتهيأله انه صايع وناصح
ومقطع السمكة وديلها وانه مثقف وواعي وح يعلم الناس الكفتة
الغبي لما يبقى يساري يبقى عامل كدهو: شد صوابعك على جوه
بعصبية وزم شفايفك واضغط على سنانك جامد
اه
هو بيبقى عامل كده
زي الطوبة
ويستنتج كلامك من قبل ما تكمل الجملة
وطبعا بيستنتجه غلط
ولما تقول له مش قصدي كده يقول لك: لا قصدك كده
وانت بتضحك على نفسك انت عايز تشرب بيرة
تقول له: بس انا قلت اني عايز اشرب ينسون وانت ما ادتنيش فرصة
يقول لك: لا ما هو من تحليل الخطابك نقدر نستنج انك عندك احتباس بول
وبتدعي انك عايز تشرب ينسون لانه شبه البول بينما في عقلك الباطن
انت عايز تشرب بيرة لانها مدرة للبول بس التابوهات الاجتماعية والدينية
بتحتم عليك انك لا تعترف امام نفسك بانك عايز تشرب بيرة
تقول له: بس انا نفسي ما اعرفش عقلي الباطن فيه ايه انت عرفت منين
يقول لك تحليل الخطاب...انت بتضحك على نفسك
الغبي لما يبقى اسلامي يبقى عامل زي هاني شاكر: حبايب قلبي
ربنا يخليكوا ليا...ربنا يفتحها في وشكوا
وتبقى قاعد حامل همه يا ترى لابس بامبرز الكبار وللا ح يبل الدنيا
ويزروطها ولو اكل او شرب قدامك تبقى متوتر وخايف يريل على نفسه
وتفكر انك تشتري له بافتة بدل مايجيله التهاب رئوي ويروح فيها
وفي وسط كل الابتسامات وكلمات الحب المعسولة يروح دابك فتوى
من اللي هي فيها ان كل الناس تموت وانا بس اللي اعيش لوحدي
الغبي لما يبقى ليبرالي: يحط دماغك في الخلاط على نمرة تلاتة
وبعدين يحطها في الفول اتوماتيك على برنامج العصر ويقعد
يسفسط يسفسط يسفسط
لحد ما تحس انك عايز ترجع
وممكن فعلا ترجع
مش من القرف لانك غالبا بتبقى مش فاهم هو بيقول ايه ولا عايز ايه
انت بتبقى دخت من الكلام اللي عامل زي متاهة الفار بس مقفلة من كل ناحية
الغبي لما يبقى ناصري: لا ابعد عنه ده
مش هزار بجد
يا تكلمه في التليفون بس يا اما لو ح تواجهه يبقى خلي جنبك
عربية اسعاف، يعني في حال ما عينك تتخرق
كتفك يتخلع
رجلك تتكسر
راسك تتفتح
بطنك تتشق
اهو تبقى جنبك الاسعاف وياريت برضه سيارة تكريم الانسان
الغبية لما تبقى فيمينيست تبقى على رأي مالك مصطفى
مربية شنبها ودقنها ومتغاظة من كل الستات
ومتغاظة من نفسها عشان هي ست
ومتغاظة من ربنا انه خلقها ست
مع انها فيمينيست
الغبي لما يبقى حكومي: اي حد بيشتغل مع الحكومة غبي
مش محتاج علامات ده
واحسن غبي
الغبي لما يبقى شيعبي زينا كده
لا ليه ولا عليه
====
الذكي لما يبقى صحفي: على الاقل يعرف ازاي يداري عدم اخلاقه
ووساخته
الذكي لما يبقى يساري: يبقى بيسب الدين لكل الاغبيا اللي في العالم
ولو قلت له طول بالك هو مالوش ذنب انه غبي
يقول لك: بس له ذنب انه بيفتي وهو غبي
الذكي لما يبقى اسلامي: يدعي ربنا انه يخلص بسرعة بسرعة قبل ما يقتل حد
من الاغبيا ويروح فيه النار
ولو قلت له حرام تدعي على نفسك
يقول لك: في زمن الفتن حلال
الذكي لما يبقى ليبرالي: يبقى فطسان على روحه من الضحك وبيكركع من كل الاغبيا
ولو قلت له بتضحك على ايه
يقول لك:اصلها حاجة مسلية قوي
الذكي لما يبقى ناصري: يبقى بيعيط طول الوقت
رجالة وستات
ولو قلت له بتعيط ليه
يقول لك: مش احسن ما الطم؟
الذكية لما تبقى فيمينست تبقى نازل عليها الكتمة
ومرة واحدة تروح طالعة في وش الغبي زي الصاروخ
ما تخليهوش يسوى تلاتة نكلة
وقلنا الحكومة مافيهاش اذكيا ابدا
والدليل ان مافيش حد من تيار الحكومة
لا بيسب الدين
ولا بيدعي انه يموت بسرعة
ولا بيكركع من قلبه
ولا بيعيط خالص
ومتهيالي ماحدش فيهم يفهم معنى انه يتكتكم
ياريت يتكتموا شوية عشان يرحمونا من الكوارث
الناتجة عن تصريحاتهم
====
يا ترى الغبي اللي فبرك خبر تنصر الشرقاوي
لو قرا الكلام ده ح يفهم حاجة؟

Wednesday 22 August 2007

لا شيء عندي اخسره

لا شيء عندي هاهنا
كي أخسره
في وطن عظامه مكسره
رئيسه مرفه مع قلة متخمة مستكبره
والشعب حي جائع في المقبره
كأن جوعه غدا مسألة
من ربنا مقدره
كأن جوعه على طول المدى
شرط لنيل المغفرة
لا شيء في جعبتي
كي أخسره
في وطن غدا لنا حظيرة مسوره
نحن القطيع قد فررنا عمرنا من قسوره
ذهني تخثرت به حقائق مدمره
كرامتي؟؟؟
خلف الرغيف أهدرت
وصحتي
مع الشقاء مهدره
وصاحب السمو في عليائه
والصولجان زاد ألف جوهره
لا شيء في خزانتي
كي أخسره
قريحتي؟؟؟
تبلدت من سطوة التلفاز
والشباب نصف قوته تفاهة
ونصفه وسائل مخدره
وتلك آدميتي
قد داسها السلطان بالمراكب المجنزره
يدوسنا محتفلا
منهزما
هم أخبروه أنها
هزائم مظفره
: وإن نطقت قيل لي
لا صوت يعلو
فوق صوت المسخره
لا شئ في مكتبتي
كي أخسره
فكل ما جمعته من كتب
أحرقته عند الشتاء حين عزت
مجمرة
وسالبي حريتي ولقمتي
يريدني أن أشكره
:فقلت للمدججين بالغباء
المعذرة
قولوا لسلطان الغباء خفية
هيهات أن يبدي لنا تذمره
من بعد أن جاءت به لقصره
أصواتنا المزوره
قولوا لسلطان الغباء جهرة
أنا الذي حفظت رغم ذلتي
بكارة المؤخرة...!!!
لاشيء عندي فيه أي
قيمة كي أخسره
في وطن صادر مني
فرحتي
وجرع الصبيان من مناهج
التخلف المطورة
وشوه التأريخ
والمستقبل
الموعود منه
صار محض مجزره
أباح للبغاء أن يجتاح
كل منزل ومسجد
بخطة مدبرة
ولم أزل مقاوما طغيانه
بريشة ومحبرة
شعر: عبد الرحمن يوسف

Tuesday 21 August 2007

الصادق يتحدث عن الشاذلي والسادات


الأستاذة / نوارة نجم
شاهدت تعليقات الاخوة الشباب فى الايام السابقة واود ان اتعرض لبعض النقاط:
السيد ابو لهب مازال مصمماً على موضوع الخيانة وتطرق الى ان الرئيس الراحل السادات معلوماته العسكرية لا تزيد عن معلومات اومباشى بالجيش!!
لا اعلم من اين حصل على هذه المعلومات ومن اين استقى مستوى الرئيس .. يا سادة يا كرام .. تختلفون مع اى انسان هذا حق الجميع لكن الاختلاف يجب ان يكون موضوعى وانا يحزننى بأن رئيس اكبر واقوى دولة عربية بهذا المستوى والرئيس لا يجب ان يكون فذاً فى العلم العسكرى وخلافه لان لديه العديد من المستشارين فى كل تخصص ولكنه الذى يملك نواصى الامور بيده لما لديه من معلومات وسلطة وبناء عليه تصدر القرارات .. وهل الرئيس والزعيم الراحل جمال عبدالناصر كان يملك معلومات عسكرية تضاهى روميل او غيره؟ بالطبع لا وهنا اذكر شئياً غافل على الجميع ..
فى حرب 1967 وبعد ان صدر قرار الانسحاب ماذا حدث؟ تم تدمير كوبرى الفردان يوم السابع من يونيو ومازالت القوات بسيناء والاسلحة الثقيلة والمعدات بشرق القناة بالاضافة الى ما يقرب من خمسين الف جندى وضابط .. انهمكوا فى مصر فى تصفية حسابات مع المشير وتركوا هؤلاء التعساء فى سيناء والعدو شرقا والقناة غربا وعليك يا سوبرمان ان تعود لغرب القناة بشطارتك

الفريق سعد الدين الشاذلى
تشرفت بلقائه للمرة الوحيدة والاولى عام 66 قبل تخرجى من الكلية الحربية بعد انتهائى من التدريب للحصول على فرقة المظلات بمدرسة المظلات وكان وقتها يشغل قائد قوات المظلات .. صافحنى مع العديد من الزملاء وسلمنى شهادة نجاحى فى تلك الفرقة العالية المستوى فى التدريب وبعد هذا لم اتشرف بلقائه .. ان سعد الشاذلى وعبدالمنعم رياض هم من طليعة القادة العظام فى العسكرية المصرية الحديثة وهذا لا يهضم الكثير من القادة ولكنهم افذاذ طالعت مدونته وكلها حقائق معروفة لنا نحن العسكريين ولكن الغير معروف ان هذا القائد وهو رئيس اركان ساهم بجزء كبير من علمه ونبوغه للضباط بما كان يرسله لنا من تكتيكات "فن القتال" ملخصة فى كتيبات صغيرة سهلة الحمل مطبوعة بعناية سهلة الفهم والتنفيذ وقبل العبور العظيم قام بأكبر خطة خداع للعدو والامريكان .. لقد كان يتحرك من القاهرة بوحدات عسكرية استعدادا للهجوم .. يتولى قيادة لواء "مثلا" من المدرعات يزيد عن مائة دبابة يدربهم فى الفتح والهجوم طوال المائة كيلو حتى يصل بهم الى القناة ثم يعود بحوالى ثلاثون دبابة من القديمة بنفس الاسلوب .. وفى احدى المرات سقط مغمى عليه من الارهاق لكنه ظل يقوم بعمله حتى انهى مهمته بنجاح وكان عملا قوميا على اعلى مستوى لانه بدون هذا كان الاسرائيليون والامريكان تنبهوا بأن مصر ستهاجم وما يترتب عليه من ضربة اجهاض للقوات الكثيفة بخط القناة وما يتبعه من خسائر ضخمة فى البشر والمعدات .. الشعب لا يعلم مدى ما تقوم به الدول الاجنبية لمساندة اسرائيل .. مساعدات ضخمة للغاية لضمان تفوق العدو على العرب وخاصة مصر

الرئيس السادات له كل احترام وتقدير ولكن :
1- يضرب بكل قسوة المعاونين له اذا عارضوه
2- تقابلت مع الفريق اول محمد صادق وزير الحربية وهذا اللقاء كان صدفة فى مدينة الزقازيق بقلم المرور .. تحدث معى الرجل بصراحة لمدة ساعة عن معلومات غاية فى الخطورة .. لا اعرف كيف انفلت لسانه معى لكنه كان يشعر باحباط وضيق من انكار السادات لما قام به .. بل ان الحديث تطرق الى ابعد من ذلك ايام 1944 ثم بعدها وايام جمال عبدالناصر .. شعر بعدها بالراحة لكنه تدارك قائلا : بالشرف العسكرى الا تخبر احد بذلك وليكن لى ابن اعلمته بما يخالجنى من ضيق وفتحت قلبى لك .. فى نهاية الحديث الذى انتهى بانتهاء الاوراق التى اتى من اجلها وكان ضباط مرور الشرقية محترمين وقدموا له كل احترام .. اردت ان ارافقه حتى سيارته ولكنه اعتذر وانا الح ولكنه اعاد ثانية رفضه قائلا انا اخاف عليك فانا مراقب !!
تخيلوا الوزير السابق مراقب والذى حمى الرئيس السادات من ما يسمى بمراكز القوى .. هكذا نحن نأكل احبابنا فى اول منعطف لاختلاف وجهات النظر .. لابد ان تقول حاضر وتنفذ ولو خطأ .. هذا مع الرتب الصغيرة من امثالى ولكن القادة العظام هم متخصصون فى اعمالهم وخاصة العمل العسكرى والذى اى خطأ به يأتى على مصر وشعبها بالدمار .. انهم قادة عظام ولا يحق لنا الا ان نتذكرهم بكل خير فمن لا قى ربه نترحم عليه ومن على قيد الحياة ندعو له بالستر والصحة .. مقابلتى مع الفريق اول صادق كانت فى عام 1980 على ما اذكر وكنت وقتها برتبة المقدم .. وارجو الا يسألنى احد ماذا قال

مع خالص تحياتى
اسامة على الصادق
الناس والحرب

************************

خاص بالابنة العزيزة نوارة النجوم
1- مستعد لعمل الندوة
2- مستعد للبحث فى موضوع عرض الكتاب الذى عرضه احدهم تحت اسم "زكرياء"
3- اخيرا حصلت على كتبى المخزنة لاكثر من سبعين يوما فى الاهرام ولم يفلحوا فى بيع سوى خمسون كتاباً

مذكرات الفريق الشاذلي اقراها الآن الآن وليس غدا

مع ان نظيف مهندز زمل برضه
عمل حتة عملة
دور على مذكرات الفريق الشاذلي
شايفين القمر ده
اهو ده الفريق الشاذلي برضه لطشت الصورة
من عند الباشمهندز
فكرة الباشمهندز انه بعد ما قرأ شهادة العقيد
اسامة الصادق
قال طيب ده كلام العقيد اللي وقتها كان مقاتل في ميدان المعركة
طيب نشوف بقى وجهة نظر اللي كان فريق
يعني عشان نشوف الموضوع من كل جوانبه

وادي اللنك عشان تحملوا المذكرات
دولا المجد اللي يعلينا فوق الجرح نعود سالمين

Monday 20 August 2007

بيقولوا خمسة وعشرين سنة

ابتداء التدوينة دي عاجباني موت
ولميت زمايلي وقعدنا نقراها
وسط تعالي صرخات الاستحسان مع كل جملة فيها
خاصة الاقتراح العلاء سيفاوي العظيم
بان يبحث الصحفيون عن مهنة شريفة
وانا اعتبر هذا الاقتراح هو اقتراح
2007
وعلينا نحن الاخوة ان نسعى لحملة كبير
للبحث عن مهنة شريفة للصحفيين
تبدأ بكشك سجائر مرورا بمشاريع
الحلاونية واللانجيري ومحلات الجزم وتلاجات الحاجة الساقعة
وانتهاء بتمويل اي حاجة
اي حاجة في الدنيا
الا جرنال بس ممكن حد يجاوب لي على السؤال اللي محيرني
يعني ايه رجل اعمال يساري؟
====
بعد التدوينة المكن دي عملت في نفسي عملة قذرة
ونكدت على روحي ومش عارفة ح انام الليلة دي ازاي
اتفرجت على العاشرة مساء
اتكلموا طبعا عن الاحكام اللي اندبها الناس ما بين مؤبد لخماشر لحلوح
مش مهم قضاء الله وقدره ولا انا عارفة هم دول عملوا كده فعلا
وللا اعترفوا بعد ما اتشنيروا بهدف واحد بس ان ح الضابط
يرجع لهم السنتين اللي وقعوا منهم في الضرب
المهم ابو واحد من المحكوم عليهم بالمؤبد
راجل غلباااااااااان وعجووووووووووووز ومريض اكيد
مش قادر يمشي ولا يقف ولا يتكلم
وشه عليه كل غلب الدنيا والزمن والسنين والهم والبلا الازرق
بيقول: هم الظاهر اللي عملوا الحاجات الارهاب كانوا من شبرا الخيمة
واحنا ساكنين في شبرا الخيمة فاخدوا من شبرا الخيمة عشوائي كده
وانا اعمل ايه دلوقت
والعيال الصغيرة دي مين لها؟
بيقولوا خمسة وعشرين سنة
هي الستين جنيه اللي بناخدها تعمل ايه
ودور وشه وهو بيعيط بوجع سلخ لي قلبي
ومشي وهو بيحسس برجله على الارض لانه مش قادر يرفع قدمه من عليها
ولا قادر يفرد ضهره
اعمل ايه انا دلوقت؟
طول ما انا راجعة في السكة من الشغل
وبرغم اني عليت نجوم اف ام على الاخر عشان تلهيني
الا ان استظراف مذيعينها ما قدرش يغطي على صوت الراجل
وهو بيقول: بيقولوا خمسة وعشرين سنة
انا اصلي هايفة
اجي عند حاجة كده وتمسك فيا
مش عارفة ليه الجملة دي بالذات هي اللي قطعتني
"بيقولوا خمسة وعشرين سنة"
ومش عارفة ليه برضه
"بيقولوا"
بالذات هي اللي نازلة زي الكرباج على قلبي
طول ما انا في السكة حاسة ان حد طلع قلبي
ونزل عليه بالكرابيج وعمال يقول: بيقولوا خمسة وعشرين سنة
العيال دول يعملوا ايه؟ الستين جنيه دي تعمل ايه؟
طيب يعني دول اتسجنوا
وما بقتش عارفة مين المسئول عن حال الراجل ده
الامن اللي عذب العيال
وللا القاضي
وللا هو فعلا الواد عمل كده من غير ما يفكر في الراجل ده
والله ما انا عارفة
والله ما انا عارفة
كل اللي عارفاه ان الراجل ده لو اتساب كده ح يموت
وانه في رقبته احفاده
مش عارفة هل ممكن نلاقي سكة للممدوح اسماعيل
المحامي بتاع العيال دي ونشوف ممكن نساعد الاطفال والراجل العجوز ده
بايه وازاي؟
وللا غلط وللا ايه؟ يعني هم مالهمش ذنب
سواء اللي اتحكم عليهم دول مجرمين وللا ابرياء
اللي وراهم مالهمش ذنب
وللا هه؟

Saturday 18 August 2007

ما تركزوش معايا انا باهييس

لحد امتى اللي نبات فيه نصبح فيه
لحد امتى يا بهية سجونك فاتحة بقها لكل الل بيحبك
واللي يسرقك ترفعيه لسابع سما؟
لحد امتى كل اللي يكتب كلمتين يفك بيهم عن نفسه
وللا يتهبل في مخه ويحاول يدور لك على حل لمشاكلك اللي ما بتخلصش
يغيب في سكة اللي يروح ما يرجعش
وكل مرة بحجة شكل
مرة ده رشح نفسه في الانتخابات
مرة ده قاطع الانتخابات
ده ملحد
ده مسلم
ده محظورة
ده منظورة
ده مبيوئة
ده محصورة
ده مهبولة
ومرات كتير من غير اي توضيحات
هو كده ده النظام
البلد بلدهم وهم حرين فيها
واحنا حتى البحر مش لاقيين نشرب منه
ما احنا نستاهل برضه
لحد امتى كل ما نختلف مع بعض
نقدم بلاغات امنية في بعض وننشرها على صفحات
الجرائد ونحرض على بعض وننشرها على النت
ونشمت في بعض
ولما اللي صاب غيرنا يصيبنا
نعيط ونقول اي؟
وامتى ح نعرف ان الحكومات لما بتتسعر
بتاكل الكل
واننا لما بنقول للحكومة بسك على واحد مختلف معانا
بتتبس علينا بعد شوية
والمصيبة ان اللي بيحبوكي
ما بيتعلموش
مش واخدين بالهم انهم تاعبين نفسهم وحالك هو هو
الفقر زي ما هو
والعطش زي ما هو
والغلب زي ما هو
واحتمالك هو هو؟
ليه البعيدة ما بتحسش؟
وابتسامتك هي هي؟
تضحكي للصبح يـ...
بتضحكي على ايه يا هابلة الضحك من غير سبب
قلة ادب
ح تكشري امتي؟ على الاقل نحس انك معانا يعني
الا لما قريت كتاب ممر التنمية بتاع فاروق الباز
قال ان التاريخ بيعيد نفسه
وانه يتمنى ان تاريخ مصر يعيد نفسه ويرجع لايام مجدها
طيب الاخ التاريخ واضح انه موحول في حتة معينة
عمال يعيد ويزيد فيها زي الاسطوانة المشروخة
مش عارف يعيد غيرها
اسود حتة في تاريخك يا مصر
عجبته ما تفهميش
وللا تاه ومش عارف يخرج منها
وللا بطل يعيد نفسه
وبقى يلف حوالين نفسه
ودوخنا معاه
واحنا تعبنا يا ستي بقى قوي
ايه يا حاجة
انت مش لاقية مية تشربيها بتشربي في دمنا؟
هم صحيح بيقولوا المصريين دمهم شربات
بس انت نفسك ما جزعتش؟
ما نفسكيش في حاجة حرشة؟
وبعدين ايه كل الشرب ده انت واكلة فسيخ وللا ايه؟
وللا مش لاقية تاكلي بتملي بطنك باي سوايل
آآآآه عشان الجلكوز يعني؟
طيب ما نعلق لك محاليل وترحمينا شوية