Thursday 7 October 2010

يااااا ابراهيم بقى اسمه رئيس تحرير الدستور المقال زي الحكومة الفلسطينية المقالة كده



- انا اتعودت كل سنة في ستة اكتوبر اعلق علم مصر واحتفل واشغل اغاني النصر، السنة دي ما احتفلتش، مش قادرة، اول سنة ما اقدرش احتفل، مش قادرة فعلا، واول ما ركبت العربية عشان اروح المعهد فتحت الراديو لقيت اغنية بسم الله الله اكبر بسم الله بسم الله وقعدت اعيط بصوت عالي في الشارع كده: جيييععععاااااااييييييييييااااااااااااا وانا معلية الاغنية على الاخر، تصور؟ كانوا بيقولوا بسم الله.. وكانوا فاكرينها استفتاحة، وكانوا بيقولوا يارب النصرة تكبر.. ما يعرفوش انها كانت ختام، وانها فضلت تكش تكش تكش لحد بقت اميبا

- ماحدش يعيد عليا بمناسبة عيد ميلادي.. عشان حازعل واتضايق فعلا.. قوي يعني

- هيييييه... اسكتوا، مش قعدة القهاوي رجعت تاني، وقلت لدعاء اوعوا تكونوا بتاكلوا سندوتشات فول وطعمية زي المرة اللي فاتت، قالت لي لا، احنا مستوانا الاجتماعي ارتفع، بناكل كنافة
والراجل في البرنامج بيقول لابراهيم: رئيس تحرير الدستور المقال
زي ما بيتقال على حماس الحكومة المقالة

- اسمعوا بقى ابراهيم كويس قوي، بس انا اتضايقت ان واحد قال له الاصوات الشريفة انت وعمرو اديب.. ايه عمرو اديب ده كمان اللي حيتقارن بابراهيم؟ ناقص يقولوا له والمعلق الاهلاوي الشريف الاكاديمي الدكتور علاء صادق الا هو دكتور في ايه؟

- واحد يمني بيكلم ابراهيم عن الاستعمار ههههههههههههه طب والله معاه حق

- انا مبسوطة من تليفونات الناس والحب اللي ادوهوله، اصل هو بيضحك كده بس الهبدة جامدة يعني، اذا كنت انا عمالة اتنفض وبقيت عمالة اصرخ زي المجنونة ما بقاش حد عارف يكلمني، وباكتب دلوقت وانا صدري بينغز عليا ودراعي واقف واول ليلة عرفت فيها الخبر قعدت ارجع.. فيعني ماحدش يتقل ايده علينا يعني، الهبدة مش بسيطة، مش هبدة المنع، هبدة التهزيئة، يعي لو كان رئيس الجمهورية زي المرة اللي فاتت كان يبقى المركز محفوظ برضه، انما اما تيجي من زكيبة فلوس بتاع ترامادول تبقى: معلش احنا بنتبهدل
كان فيه حد معلق بيقول: الله يرحم علي ومصطفى امين، طب علي ومصطفى امين الدولة اممتهم، صحيح جابوا مكانهم عسكري يمسك رئيس تحرير - ههههه البلد دي طول عمرها مسخرة - انما تاجر ترامادول كتييير.. كتييير قوي يعني، التطور الطبيعي للحاجة الساقعة ان بعد خمسين سنة يبقى مسئول التكاتك في القاهرة الكبرى اللي يسرق جرنال من صحفي ويرفده

- انا بقى اي حد رأسمالي مش عايزة اعرفه تاني.. خالص بقى، مافيش اختلاف راي في الموضوع ده، وماحدش يكلمني عن رأس المال الوطني المحترم، عشان ده زي اسطورة الرقاصة الشريفة كده، انا مرة واحدة في حياتي شفت رقاصة شريفة وكانت بتعيط لي انا وام زينب انها مش بتاعة فتح للزباين ولا مسخرة، فام زينب قالت لها ما شاء الله، رقاصة ومش بتقعدي مع الزباين؟ قالت لها: اه.. اصل انا يا اوختي ماليش في الرجالة، ليا في النسوان بس
اه والله.. دي اشرف رقاصة قابلتها، واشرف رأسمالي حتقابله حيبقى زي الرقاصة دي

- السؤال بتاع ان ابراهيم شيعي وله علاقة بايران، انا انبهرت انه عرف يرد، اصل ده سؤال عبثي فعلا وعادة العبث الواحد مش بيلاقي له مدخل يرد بيه، بس انا مبسوطة قوي قوي قوي انه قال دي طريقة سافلة، اصلها سافلة فعلا
ومبسوطة قوي انه قال انا مواقفي مين اللي مع اسرائيل وانا ضده مين اللي ضد اسرائيل انا معاه.. الكلمة دي كانت سكينة فؤاد قالتها لي: معياري الوحيد مين اللي اسرائيل راضية عنه ومين اللي اسرائيل غضبانة عليه
وتصدقوا بقى ان ده بقى كلام يحتاج ان الواحد يقوله؟ اه والله

- فيه رسالة على الموبايل جات على الجزيرة خلتني اعيط: كيف ابدأ يومي بدون من اول السطر؟ ده مين اللي مستقصدني وبينكد عليا كده؟

- انا متكيفة قوي من بتوع الويب كام هههههههههههههههههههه

- الاتصالات من العراق مش معقووووووول هههههههههههه كل شوية يقولوا له وزير الثقافة المصرية هههههههههههههههه وان شاء الله ترجع وزير الثقافة في مصر ايه انهيار الضحك ده؟ وبيكلموه يشجعوه على اساس انه وزير الثقافة المصرية
وبعدين واحد اتصل بيه قال له انا مبسوط قوي انك شيعي بس ايران وحشة وايران مش شيعة ايه رايك انت بقى يا استاذ ابراهيم؟ ايه رأيه في ايه؟ ايه السفر ده؟ يا قلب امهم ده الاحتلال سيح لهم مخهم خالص، ده العراقيين دول عباقرة الامة والله، وزمان قبل القنابل العنقودية كان اقل بياع في العراق مخه ذري، ما كانش يومهم اللي حصل لهم ده

- الحلقة حلوة، بس انا ما بقاش فيه حاجة تبسطني، انا مكتئبة بجد ولا ايه؟
- عشان ماحدش يقرفني كتير... انا حافضل ناصبة المناحة دي شوية لحد ما نعرف كوعنا من بوعنا، مش عارفة استوعب ان الايام السودا بتاعة تمانية وتسعين رجعت تاني

23 comments:

من مغربي said...

أخت نوارة، مارأي صحفيي الدستور فيما قال لهم البدوي من أنه موافق على كل مطالبهم (و "زيادة") ما عدا طلبهم عودة إبراهيم عيسى كرئيس تحرير ؟؟؟

رأيي هو أن الدستور بدون إبراهيم، في أحسن الأحوال ستجعل الدستور كصحية الشروق

Unknown said...

الله

هو مش سيد البدوي المفروض استقال من رئاسة مجلس الادارة؟ بيتكلم ليه؟

عبد الله السلفى said...

حكاية الرواتب دى غريبة اوى امال فين بقى القلم الحر وحب مصر ومحاربة الفساد؟

مواطن مصري said...

الحقيقة وراء اقالة ابراهيم عيسي هو انة زملكاوي و مع حسام حسن و ليس لة علاقة ب البرادعي ولا نور

بس الي بيتكلم من ليبيا اكنة داخل خناقة

بيتكلم بسرعة اوي و بصوت عالي ولا بتاع

العراق الي اتكلم عن ايران و الشيعة

ميكونش هو محمود المصري ؟؟؟

مواطن مصري said...

اة صحيح كل سنة و انتي طيبة يا نوارة


عاوزين نيجي بقى ناكل التورتة

هتعملي عيد ميلادك فين

من مغربي said...

للإشارة فقط، مادكرته فوق منشور في اليوم السابع

باحث عن حب said...

حلوة
اشرف راقصه
ههههههه
بصى
كل سنه وانتى طيبه
ابراهيم عيسى
ربنا مش هيسيبه

hala said...

في الحقيقه ,,, انا قلبي على ابراهيم عيسى حيعيش منيييين ؟؟؟؟؟؟؟

hala said...

جوووود مورنينج
انا صحيت اليوم الصبح عشان اقرأ آآآآآآخر الاخبار لقيت إنه الموضوع لسه عن إبراااااااااااااهيم عيسى
طب بالله بشو بقدر اساعده
لاني في الايام الماضيه بكيت وعيطت و ولولت وانغمست بالاحباط,,,,,كل هذا و برضه ما جابش نتيجه
,,,,, انا كل همي شو رح يشتغل حايأكل عيله منيييييين؟؟؟؟؟؟؟؟؟؟؟؟؟

hala said...

عندي فكره عظيييييمه
ارجوكم انشروا صور فلسطييين وابكوا عليها
ونالاخص صور يافا انا نفسي ومنى عيني أعود الى يافا ارجوكم
ماذا افعل كيييف بقدر ارجع الى حبيبتي يافا عروسة البحر واجمل مدن الارض

hala said...

يا جماعه والله العظيم الحق على ابراهيم عيسى
اصلاً لييييييش يبيع اسهم الدستور لواحد من أذناب الحزب الحاكم
بصراحه وما تزعلوا الحق على ابراهيييييم افندي

محمد نور الدين said...

إلى النجمة بنت النجم
كل عام وانت بألف خير يا أجمل وأروع نوارة .إذا كان من أولها احباط و يأس ،فلاأنت بنت النجم ولا بنت صافيناز .أبحثيلك عن أبوين أخرين.مش انت الي اعتصمت وظليت شهرا كاملا بعد التسعة وقلت مش نازلة حتى تحرير سيناء
وانا سأقول كلام يمكن تستغربيه. الصراع في مصر فيه أطراف خارجية وبوضوح أكثر بين أمريكا وقوى اوروبية تريد أن تحتل موقعا بعدما تبين لهاأن الجماعة يريدون حسم الموقف لصالح امريكا
لأن مصر يا نوارة، كما قلت في تعليق سابق ليست دولة أرض الصومال، إنها قلب العرب النابض ومن يسيطر على القلب يسيطرعلى بقية الشرايين
و أمريكا فهمت الرسالة وتراجعت وهي الآن تبحث عن رجل توازنات داخلية وخارجية ذلك جعلها تنفتح على الجميع بمافيهم الإخوان .مما أربك أركان النظام وجعلهم يخرجون تلك المسرحية على عجل وبدون بروفات لهذا ارتبك من كان على الركح لأنه مكانش حافظ دوره كويس . ومعركةالدستور حزء لا يتجرء من الحرب الشاملة لهذا مطلوب منك أن تشدي حيل وطويلي بالك وتعمليلك همة و بلاش كلام المراهقات
وكل عام وانت بألف خير

Unknown said...

انا مش عارفة المعاتيه اللي ربنا رازقني بيهم في بعض التعليقات دول بييجوا منين، ده من كتر التخلف بابقى حاسة انهم بيهرجوا اكيد مش ممكن يبقواا بيتكلموا بجد


ابو هاجر

كلامك مظبوط جدا

طب ده مفروض يديني امل؟
:)

يديني امل بقى اننا نبتدي من اول وجديد، من اول: الاستقلال التام او الموت الزؤام... تاني.. تاني، الاسطوانة اتشرخت عند الحتة دي وحنعيد تاني

لله الامر من قبل ومن بعد


من مغربي

بص الموضوع ده بالذات مش عايزة اخوض فيه، فيه طقم من الدستور حيقعدوا وجزء مشيوا بالفعل، اللي مشيوا موقفهم واضح، مش عارفة اللي حيقعدوا حيقولوا ايه لسه


محمود باحث عن الحب

ربنا ما بيسيبش حد


مواطن مصري

انا مش قايلة ماحدش يعيد عليا؟ حاتضايق بجد

Unknown said...

ابو هاجر

صحيح، هو كان ايه اللي انقذ مصر من الاستعمار فكرني؟ الحرب العالمية؟

بعدها انجلترا اتكسحت وعرفنا نفلت منها

طيب يعني احنا حنطلع من كل مصيبة بحرب عالمية؟

محمد نور الدين said...

إلى ست الكل
لا يا نوار تشابه المشكلات لا يؤدي إلى نفس الحلول
الوضع التاريخي يختلف
لكن بشكل عام مايميز الوضع العربي الراهن ان الفئات القابضة على السلطة السياسية أصبحت جزء من مشروع الهيمنة الإستعمارية وهذاليس كلام إنشائي
فهي مدعومة خاصةمن قبل الشركات البترولية .إنهم يتعاونون معهم في نهب الثروات الوطنيةو القومية
وهناك شواهد كثيرة
وهذا التحالف يملك المال و السلطة و الدعم الخارجي. واكثر من ذلك لقد اخترق بعض القوى الوطنية تارة بالإغراء ،واخرى بالضغط
و الكثير منها دخل في مساومات سياسية
من أجل الكوتة
ذلك كله يا ست الكل يتطلب من القوى الوطنية أن تعيد النظر في طرق وأساليب عملها وحتى مفرداتها لأنه امام هذا الوضع الذي ينذر بالويلات والأخطار لا يجدي الحديث عن يمبن ويسار أوإسلامي ولبيرالي بل المطلوب العمل على خلق جبهة وطنية أو جبهة إنقاذ وطني
يجمعها برنامج الحد الأدنى يضع على رأس جدول أعماله الدفاع عن استقلال مصر الوطني لأن الفرز في هذه اللحظة الشديدة التعقيد و التداخل و الضبابية يكون بين وطني وغير وطني إسلاميا كان أم شيوعيا من هنايبداالعمل الوطني
المرحلي

مواطن مصري said...

نوارة انتي مش عارفة اننا في دولة محتلة

يعني مصدقتيش الماسونية الي بتحتلنا

من الصبح يعني كل الي بيحصلنا دة أحتلال غير مباشر انا شايف بأننا رجعنا تاني ما قبل 1919

مش فاهمه said...

بالعند فيكى كل سنه و انتى طيبه و بالمناسبه انا كمان مكتئبه بس قصيدة بابا الجديده هايله بجد كنت عايزة اعرف عمنا نجم عمل ايه مع السئ البلوى و بجد بجد الف تحيه له على قصيدته الجديده

ahamed said...

بس لما قال ان رجال الاعمال لازم ما يمولوش الصحف و الفضائيات انا ما فهمتش يبقي ايه البديل

Karim Fadl said...

تحضرني واقعة الحبيب بورقيبة مع فضيلة الشيخ محمد العزيز جعيط مفتي تونس عندما أراده بورقيبة ان يفتي بان الافطار حلال في رمضان حتى لا يتعطل العمل ورحمة الله عليه اقر ما كان حق الله بعدم جواز الافطار وكذّب
بورقيبة

والأن بعد كل هذه السنوات نرى الشيخ محمد يذكر بكل خير وبورقية يقبع فى مزبلة التاريخ

والعبرة لمن يعتبر

mohamad said...

يا ما دقت عالراس طبول

أكتر من كده وربك بيزيح

ربنا يتوب علينا من الرقاصات
والآلاتية

Karim Fadl said...

ايه القرف ده يا نوارة؟ مين اللي اسمه سليم عزوز ده؟

انا جبت الدستور النهاردة عشان اشوف شكلها بقة عامل ازاي لقيت فى الصفحة الاخيرة سليم عزوز مكان جمال فهمي وقلبت الصفحات لقيت جواها برضه سليم عزوز

ده ايه ده راخر؟ إبو افندي؟ إبو حسن إبو الفرارجي ولا عبد الحميد إبو في خط الوسط؟

وبعدين هوا مش سيد افندي البدوي قال انه استقال؟ ولا هوا يعني للدرجة ده مستهيف الناس؟ طيب يصبر شهر كده ويطلع يقول ان المجتمع والناس قالولي انت الكلب الكبير وبحكمتك تحتال علينا ونرجو ان تعود رئيسا لمجلس ادارة الدستور وبناءا على رغبة الحمير عدت اليكم

والله اللي اختشوا ماتوا

ahmedelebyary said...

انا شايف ان تجربة الثورة الايرانية تحديدا هي النموذج الافضل وذلك لتقارب الظروف
بس الفرق ان الايرانيين كانو عندهم ايمان بهدفهم بشكل يخليهم يتقتلو في الشوارع وينزلو مظاهرات بعد كده وهمامش خايفين وكمان كان في قائد واضح وعنده رؤية واضحة عرف يلم شمل الايرانيين
كنا بنعتمد علي منبر حر زي الدستور وبعد اللي حصل هيبقي فيه صعوبة في معرفة اللي بيحصل في البلد
ورب ضارة نافعة
يعني هما قفلو منبر حر ومهم بيعبر عن الناس بس في نفس الوقت ممكن يكون لهذا القرار جانب ايجابي بالنسبة لنا أن الناس بدل متطلع اللي جواها من غضب في الاعلام او في الجرايد(او حتي تقراعن الفساد اللي في البلد )ده نسبيا بيطلع طاقة الغضب بدل ماتبقي مكبوتة وتنفجر في وشهم مرة واحدة
وعلي فكرة هذا ليس رأيي هذا رأي للأستاذ احمد خالد توفيق موجود في الجروب علي الفيس بوك
وكمان هو استدل علي كلامه بالبخار الموجود بداخل البراد عندما لا يكون هناك منافذ لخروجه يخرج مباشرة من فتحة البراد المغلقة ويطيح بالغطاء
انتم في الدستور قمتم بواجبكم و عملتو حركة توعية كبيرة أسهمت في تجميع البخار الموجود
الدور دلوقتي علي الشعب لأنكو أديتو دوركم الأساسي
وأفكركو بقول الله "ويمكرون ويمكر الله والله خير الماكرين"
الامل دلوقتي متركز ان
فيه حقوق ضايعة ولازم نرجعها
وايماننا بها
لما نحبط هيكونوا دمرنوا وهيكونوا كسبوا المعركة
هزيمتنا الحقيقية في ان ينالوا من روحنا
وعلي فكرة الصليبيين قعدوا في فلسطين 200 سنة وبعدين اتطردوا يعني مشيوا في الاخر والهكسوس زيهم
يعني لما تبقي في ارادة حقيقية ممكن نعمل حاجة
بصراحة الكلام سهل جدا وممكن اي واحد يكتب اشعار عن الارادة ولكن صاحبكم ليس أشجع منكم لأن الكتابة ورا الكي بورد سهلة والكلام مبيدخلش السجن بس لازم ياجماعة نقوي بعض احنا في مرحلة صعبة
وأهدي نفسي وأهديكم هذا الفيديو http://www.youtube.com/watch?v=YYaROz-2ssU
لغاية الدقيقة الثالثة

عبد الله السلفى said...

محدش يجيب سيرة الشيخ محمود المصرى
مش كل من هب ودب وكل واحد المعاتيه عملوه زعيم يتكلم عن الشيخ محمود المصرى كل واحد يخليه فى نفسه قال رسول الله صلى الله عليه وسلم(لان يهدى الله بك رجلا واحدا خيرا لك من حمر النعم)صدق رسول الله صلى الله عليه وسلم
شوفوا بقى كام واحد اهتدى على ايد الشيخ محمود المصرى
وكام واحد انحرف وضاع على ايد ابراهيم عيسى من مقالاته الى كلها طعن فى الصحابة والسنة اظن فرق شاسع