Thursday, 7 October 2010

كل هذا الانحطاط

يعني احنا كلنا عاملين ناس كبيرة، بما فينا ابراهيم عيسى نفسه، ومش عايزين نشخصن القضية، وعمالين نقول ان التجربة الصحفية هي الاساس واللي يهمنا السياسة التحريرية، وزي ما عبد المنعم محمود قال تعقيبا على بيان النقابة: احنا مش جايين نحل مشكلة شخصية لابراهيم عيسى، احنا هنا عشان تمسكنا بالسياسة التحريرية وهي مرتبطة برئاسة ابراهيم للتحرير بدليل العدد بتاع النهاردة، ومش حنشتغل الا تحت رئاسة تحرير ابراهيم عيسى لتمسكنا بالسياسة التحريرية بتاعته
اه.. شفتوا العدد بتاع النهاردة؟ يا مدندش يا قميص النوم يا مقور يا كومبيليزون، اوعوا تشتروه، خلي حد جابه يوريهولكوا، او حد عنده العدد يعمله سكان وينزله، خصوصا صفحة الحوار مع "جميلة الدراما العربية ندى بسيوني" المهم
احنا عاملين ناس عاقلين، وهم مصممين يتصرفوا زي التشرد الاطفالي ويشخصنوا القضية
في الاول يطلعوا اشاعات للوقيعة بين ابراهيم عيسى وبين ناس في الدستور، وانا حاقول الاسماء لانهم فوق الشبهات، زي ابراهيم منصور اللي صاحب ابراهيم عيسى من ايام ما كانوا بالشورت وعبد المنعم محمود اللي يقول للاخلاق قومي وانا اقعد مطرحك
وناس تانية كتير، وكلام حقير ومنحط وشغل طفولي، وبعدين تشويه في ابراهيم عيسى، ويكلموا كل واحد فرداني وياخدوه لوحده اللي يكلموه يقولوا له احنا عارفين انك مش مثبت وان ابراهيم ما زودكش وحولك للتحقيق مرة قبل كده تعالى واحنا نثبتك ونزودك تلات مرات ويشيعوا في كل حتة ان ابراهيم عيسى بيشتم المسيحيين وبيشتم الكنيسة، ويقولوا ان ابراهيم عيسى شتم البلوي بالاب والام هههههه، طب يارب يكون عمل كده، ويكلموا ناس وتوصل لتسجيلات متفبركة يتصلوا بناس يقولوا لهم ابراهيم بيقول عليكم مش عارفة ايه؟
ايه شغل العيال ده؟ طب انا لو ابراهيم بيقول عليا ما في الخمر مش حازعل، براحته، ويقول اكتر من كده كمان، حد عايز حاجة بقى؟ وعلى فكرة لما حد يحب يعمل تسجيلات تعبيرية يبقى يجيب ام متخصص يظبط له التسجيلات عشان تطلع كويسة ومش مقطعة بالطريقة المضحكة دي، وعلى فكرة كمان، احنا صحفيين، فاهمين يعني ايه؟ يعني اهيف عيل فينا اكيد الاي كيو بتاعه اعلى من زكايب الفلوس الحرامية اللي عاملين فلوسهم بالفساد والسرقة والترامادول والفياجرا، مش كل شوية تاخدوا واحد على جنب ومرة تقولوا له تعالى واحنا نجيب لك عسلية، تعالى نوريك القطر، ده ابراهيم عيسى بيقول عليك مش عارفة ايه... ايه ابراهيم عيسى بيقول عليك دي؟ ايه شغل النسوان الاميات اللي من ورا الجاموسة ده؟
اذن الهدف هو عزل شخص ابراهيم عيسى نفسه، يعني هي المشكلة مع شخصه، ما عرفوش يحبسوه فقالوا نحبسه بطريقة تانية يعني احنا بقى كنا غلطانين لما كنا عاقلين، خلاص، حنوريكوا الجنان بقى، وايه الشغل الواطي ده بقى؟
طب شغل واطي وعرفنا... ايه شغل الطفولة المشردة دي؟ احنا في تانية اعدادي هنا؟
-------------
بيان النقابة طلع زي الزفت، وبرضه ينطوي على وقيعة بين محرري الدستور وابراهيم منصور وبين ابراهيم عيسى: نرجع المحررين وابراهيم منصور، وابراهيم عيسى لو عايز تعويض حنقف معاه ولن يعدم صحيفة تشغله بكفاءاته العالية
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
احنا رايحين نطلب منهم يشوفوا لابراهيم عيسى شغلانة بدل ما ينحرف ويضرب مخدرات مثلا؟
اللي اشتغل في الدستور، سواء محرر (من اول كتابة الخبر لحد التحقيق)، او سكرتير تحرير، او مدير تحرير، او رئيس تحرير تنفيذي، او كاتب مقال اتعود ان مالوش سقف، وعدم وجود السقف مرتبط بالسياسة التحريرية اللي اسسها ابراهيم عيسى في الدستور اللي هو اسسه اصلا، وده اللي متمسكين بيه، وكنا لحد قبل الحركات القرعة اللي اتعملت مش ناويين نشخصن الموضوع بما في ذلك ابراهيم عيسى نفسه، اللي حتى ما حضرش عشان ما يتفهمش انه محرض، ولاننا عايزين نقول ان ده مطلبنا احنا لتمسكنا بسياسة تحريرية معينة
لكن بما ان الهبل وصل للجبل، والمستوى بقى منحط وطفولي وامني وبقى فيه تصميم على الشخصنة، احنا كلنا ملفوفين حوالين ابراهيم عيسى بشخصة، واحنا مع بعض، لا احنا حنصدق عليه حاجة، ولا هو حيصدق علينا حاجة غير اللي احنا نعرفه عن بعض وبس وكتر خير فبريكانو انتصار وتعبير اسامة سرايا اللي نبهنا للخطط التعبيرية الفاشلة اللي بتستخدم للوقيعة بينا
احنا كدهووو

ايه الغباوة دي؟ امال جاب مجموع في الثانوية العامة ودخل صيدلة ازاي؟

11 comments:

A. Abdel-Hamid said...

مش عارف اقول ايه ....
ربنا موجود
وطول ما احنا متمسكين بربنا وواقفين جنب المظلومين.. ربنا مش هايسبنا

power of truth said...

السلام عليكم
هذه اول مشاركة لي في مدونتك استاذة نوارة رغم اني من متابعيها من زمن ليس بالقصير
انا مواطن سوري واحببت ان تكون اولى مشاركاتي في مدونتك هي للتضامن ولو بالكلمات مع الصحفي الحر ابراهيم عيسى
واعتقد ان كلمة حر هي الكلمة الاجمل التي يمكن ان نصف بها أي انسان مهما كان عمله في هذا الزمن الرديء
لن اتحدث عن وضع الحريات بمصر او غيرها لأن هذا ليس من شأني اولا ولأن وضع الحريات ببلدي يستحق مثل هذا الحديث بشكل اكبر وحتى لا تكون هناك مزايدات في هذا الموضوع
ما اريد ان اقوله ان مثل هذه المضايقات والمحاربة للشخصيات الحرة هي التي تصنع الاسماء التي يذكرها التاريخ
عبد الرحمن الكواكبي مثلا لم تكن افكاره لتعيش حتى الآن لولا المحاربة التي تعرض لها من السلطات في زمانه والامثلة كثيرة على اسماء خلدها التاريخ لأنها لم تفرط بحريتها التي منحها الله لها ارضاء لسلطة او حاكم او مصلحة
الموضوع ليس متعلقا بشخص ابراهيم عيسى بل يتعداه الى كل كاتب او صحفي او شاعر او حتى فنان لا يقبل المساومة على حقه بمعارضة حكومات العمالة والاذعان
ربما مثال الاستاذ حمدي قنديل في مصر الغالية هو مثال آخر حديث على عدم تقبل من يحاول البحث عن الحقيقة وقولها دون مواربة او تحفظ
وانا اقول باختلاف الوضع من هذه الناحية ببلدي سورية ليس لأننا نملك حرية اكبر بقول ما نريد ولكن الامر ببساطة يتعلق بالسياسة العامة المتعلقة بالقضايا المحورية للأمة والتي اراها اقرب للمزاج الشعبي مما يجعل اصحاب التوجه المقاوم والتحرري اكثر حرية في طرح مقولاتهم
ومع ذلك يبقى الاطار العام للحريات ليس افضل بالتأكيد ونبقى جميعا كعرب نعاني من مشكلة باستيعاب من لا يخشى في قول الحق لومة لائم لأن من بيدهم الامر تعودوا على النفاق والتمجيد والتهليل ولم يتعودوا على ان يواجههم أيا كان بالحقيقة
تحياتي استاذة نوارة لك ولك قراء مدونتك المحترمين

Bienveillant أوفياء مصر d'Égypte said...

المسألة مش إبراهيم عيسى ولا إبراهيم موسى ولا إبراهيم فرعون ولا الدستور كله على بعضه - المسألة إن فيه خطة لضرب وتشتيت وتلغيم وتفجير كل صحف المعارضة من الداخل - وبعدين بجى الدور على فلترة الإنترنت والمدونات أو يقفلوها خالص لمدة سنة ونص - زى الصين كده - لغاية ما تعدى فترة الانتخابات كلها من أصغرها لأكبرها - طيب فاكرين لما السادات قبض على كل الناس فى اعتقالات سبتمبر حتى حسنين هيكل وقال إنه (عايز البلد تهدأ لغاية ما ياخد طابا والعريش 1981 ؟ ) - أهم دلوقت خبراء النظام المبارك بيعملوا حاجة زى كده برضه بس بشكل جديد - وبكره نشوف يا إما حايستأنسوا جرايد المعارضة الأخرى - أو حايفجروها من الداخل زى الدستور - ومثلاً النهاردة زار مدونتى الغلبانة الصدمانة العدمانة جوز مـخبرين من وزارة الاتصالات المصرية ووزارة الاتصالات السورية وبالبادج بتاع الوزارتين كمان عينى عينك - ومستنى بكره ولا بعده وصول السادة باقى مـخبرى العالم العربى كله (على خساب صاخب المخل - أخلين وسخلين - أخلين وسخلين) - جاتهم خيبة كلهم على بعضهم - وعندهم حق مادام الشعب من ورا الجاموسة ماشى عدل أوى - يتعدلوا هما ليه بقى - وبأمارة إيه بقى إن شاء الله كده

utopia said...

اما عن هذا الاسلوب الدنىء فهو اسلوب ادارة رجال الاعمال لموظفيهم ولقد ظن سىء البدوى انها ستفلح مع الصحفيين
اسلوب فرق تسد لكن طلعت حمراااا
.....
فلا تهنوا ولا تحزنوا وانتم الاعلون
فأذا كانت هذه بداية سد المنافذ على حرية الكلمة فسيؤدى هذا لزيادة الضغط وبالتالى الانفجار والثورة كما احب واتمنى-ثورة كل الشعب قولى يارب
وعسى ان نكره شيئا وهو خير لنا

MN said...

Ya Nawara aboos edekom, nas keteer mosta3eda tedfa3 fe 2ktetab le gornal gedeed, 7'odo 7'atwa we sebkom men el 7ewar ele homa bey7awlo yesh3'eloko beeh. El mohem eno Eissa we entom tekamelo 3'asben 3anhom, 27nna me7tagenkom bel zat el fattra ele gayia

Bienveillant أوفياء مصر d'Égypte said...

La Victoire d'Égypte en octobre 73 إنتصار مصر فى أكتوبر

أغنية شهرزاد
جمعنا كل قوتنا وساندتنا عروبتنا

http://www.youtube.com/watch?v=bqzm_uwoChE

جمعنا كل قوتنا وساندتنا عروبتنا وسمينا وعدينا وإيد المولى ساعدتنا وشقينا طريق النصر وإيد المولى ساعدتنا ورجعنا إبتسامة مصر - وشقينا طريق النصر ورجعنا إبتسامة مصر


بطولات 73 لن تنساها مصر ولا بعد مائة ألف عام

بإسم الله - الله أكبر - بإسم الله - بإسم الله - نصرة لبلدنا - بإسم الله - بإسم الله - بإيدين ولادنا - بإسم الله Chorale - Chanson 1 بإسم الله

رايحين شايلين فى إيدنا سلاح - Chorale - Chanson 2

Les surprises Égyptiennes en 1973 tombent sur la tètes des Sionistes comme des coups des foudres, ils tombent et se rendent aux militaires Égyptiens

L'attaque Égyptienne sur le Canal de Suez pour libérer Sinaï des Sionistes

Les Sionistes ont perdus la guerre de 1973 contre l’Égypte

Sadat raconte la victoire d’Égypte en 1973

ahmedelebyary said...

يا جماعة لنك مقال استاذ احمد خالد توفيق علي الدستور http://dostor.org/politics/egypt/10/october/7/31214

ESSAM said...

نواره انا قلقان ان بعد ما يقيدوا حريه الاعلام والصحافه يقضوا على حريه الانترنت ..وهو اللى فعلا اعطى الحركه للشارع المصرى وسهل منه التجمع وعمل الاحتجاجات وبعض منا له عمله التجارى الصغير على الانترنت ....انتى ايه رايك يا ست المدونين ابراهيم عيسى كان يمثل لى مثل اعلى وحمايه مع انى لا اعرفه شخصيا.. كنت حاسس بأمل مع كل ما اقنع حد انه يمضى بيان التغيير او يفهم مع ان النتيجه كانت بطيئه بس فى حاجه كانت مجمعه الناس الدستور النت ربنا يستر ع النت ...انا متلغبط ع الاخر وحاسس اننا هنرجع للوراء 10 سنين

egyptionabroad said...

يا مدندش يا قميص النوم
يا مقور يا كوبيليزون
احلى تعليق
ههههههههههههههههههههههههه
على الي بيحصل في مصر والوطن العربي

hala said...

كل اللي حاصل ده بسبب تزاوج السلطه بالمال
يعني مش رح يعجبهم اي مخلوق يقف بوشهم باعتبار ان المعارضه من الرعاع

hala said...

يا جماعه الحريه عايزه تضحيات كبيره
والناس عايفه حالها وما نتفكر غير بالامن والامان لمستقبل اولادها