Tuesday 19 October 2010

ابراهيم بيه يتحدث

ياااا يا اخي، انا اول مرة افرح وانبسط من ساعة ازمة الدستور، انا مخبية عليكم، بس من ساعة ازمة الدستور وانا باعيط كل يوم، واتنرفز على الناس واتخانق معاهم كلهم وما بقاش حد عارف يكلمني
بس انبسطت من احتفالية امبارح، وبهاذوها المناسبة احب اشكر خالد كساب وكل الشباب اللي معاه اللي يستاهلوا الف بوسة على التنظيم ده، واحب اشكر كل اللي حضروا، بما فيهم ابويا اللي كان عنده خراج تحت ضرسه ولما عرف ان ابراهيم جاي نزل على طول
وبلال فضل.. كلمة بلال فضل كانت مهمة قوي لانه من الدستور الاولاني اللي لما اتقفل ما كانش لاقي ياكل، حرفيا مش مجازا، يعني ما عندوش في البيت عيش وجبنة، وكان مهدد بانه ينام في الشارع لان كان عليه ايجار، حاجة كده زي افلام انور وجدي وزينات صدقي صاحبة البيت، ولولا ربنا نجده كان ممكن يتجوز صاحبة البيت عشان يلاقي يسكن، ومش هو لوحده، وسمير عمر، واكرم القصاص، وحمدي عبد الرحيم، طب ده بلال وابراهيم وقتها كانوا بطولهم، اكرم وحمدي كانوا متجوزين جديد، كانت ايام سودا
عشان كده كلمة بلال كانت مهمة قوي، قوي قوي قوي، لانها لمست الشباب المعتصم جدا، وحكى لهم بالتفصيل حصل له ايه وعمل ايه، وقال لهم بالمختصر كده ان بيع النفس والمطاطية دي قلة قيمة ومش جايبة تمنها والله، اللي عنده موهبة مش بيجوع، والمواقف الشريفة المحترمة حتخلي الانسان يعيش راضي عن نفسه، وصحته كويسة، والفلوس حتيجي والله، ولما تيجي بتعبك وشقاك وموهبتك وانت واخد موقف محترم والله حيبقى لها طعم تاني خالص غير الفلوس اللي بتيجي بقلة القيمة
اللي كان بيقدم الحفلة بثينة كامل، ههههههه عسل يا بسبس
ما اقولكوش بقى، بسبس بقى، عايزين منها ايه؟ 
فاكرين؟ فاكرين لما من كام سنة اخدت شمعة وراحت وقفت قدام قسم الهرم عشان واحد اتقتل من التعذيب هناك لوحدها؟ واكلمها: يا بسبس ارجعي ابوس ايدك
- لا انا واقفة هنا معايا شمعة
والدنيا ليل، وهي زي لهطة القشطة في الهرم وقدام القسم وعاملة وقفة احتجاجية لوحدها كلمت العيال قلت لهم حد يروح لها حيخطفوها جوة القسم ومش حنعرف نلاقيها تاني
والعيال نزلت وانضربوا ضرب غرائب الابل واكلمها يا بسبس ارجعي تقول لي: لا.. انا باعمل دور هنا.. باكلم العساكر وافهمهم انهم غلط جدا يعذبوا الناس وحرام عليهم الناس تموت من التعذيب لان ممكن ده يحصل لهم.. وهم بيستجيبوا وبيهزوا راسهم
هههههههههههههههههههههههههههههههههههههههههههههه 
بسبوسة بقى.. مسكت الميكرفون وعملت دور وكلمتنا واحنا هزينا راسنا
اول حاجة، اول ما ابراهيم عيسى دخل طبعا حاجة فظيعة ما اقولكوش الاستقبال كان عامل ازاي، وبسبوسة راحت ماسكة الميكروفون وشاورت على نجلاء بدير: انا شايفة نجلاء بدير بتعيط هناك.. برافو يا نجلاء كويس اللي بتعمليه ده
لا مش بتتريق.. هي بسبوسة كده
وبعدين مسكت الميكروفون تاني وقالت: نوارة عاملة لي بلوك على التويتر عشان انا عاملة فولو لوائل عباس 
جيميهود راح واقع على ضهره وشرق من الضحك
جمال فهمي اتكلم، عسل جمال عمري ما شفت لورد بروليتاريا
وبعدين بسبوسبة بقى.. مسكت الميكروفون تاني وقالت: والناس كانت بتقول لي ابراهيم ماله مرطرط كده، على برامج رمضان، قلت لهم ابراهيم ما بيصدق يلاقي فرصة يكلم الناس فيها عشان هو عارف انه بعد شوية حيتمنع، اصله ابن موت
يا بسبس ده يا بسبس حرام عليك يا شيخة، بعد الشر عليه انشالله انا.. بس بسبوسة بقى، حنعمل ايه؟ وتقول له ما تزعلش اني باقول كده ههههه.. طب انا بقى اللي زعلت
:(
الحمد لله.. الشباب في الدستور كانوا محتاجين يشوفوا ابراهيم ويديهم طاقة وامل، وابراهيم كان محتاج يشوفهم قوي، عشان يهدا، لانه فعلا وهو بيتكلم كان غضبان قوي، انا شخصيا ما شفتوش غضبان بالطريقة دي قبل كده، ايام قفل الدستور الاولاني كانوا مكتئبين، بس مش غضبانين، حاجة كده كان زي كارثة وقعت على راسهم
لكن المرة دي ابراهيم عيسى غضبان غضب عارم، واوعى حد يقول لي ليه؟ انا بجد مش قادرة افهم الناس اللي مش فاهمة مصدر الغضب، يعني المعارك والاهوال الناس بتواجهها، لكن الاهانة والتشهير وقلة الادب وتطاول شوية جرابيع
ومعلش يعني، ودي حاجة لازم اي حد يتفهمها واللي ما يتفهمهاش يبقى فعلا حيوان، الانصاص قامت والقوالب نامت، مش جربوع زي ده يهزأ ناس تعبانين على روحهم، على الاقل بيفكوا الخط يعني، مش امر محتم فيه، دي حاجة كده عاملة زي مسلسل الراية البيضا وفضة المعداوي اللي جاية تهد الفيلا بتاعة السفير، وقلة ادب وتطاول وتشهير بالناس، وواحدة لا بيها ولا عليها تيجي سيرتها بالظلم والافترا والبهتان البجح، ولا كدب مساوي ولا صدق منعكش، وبجاحة في الكدب وقلة الادب والتطاول، ورئيس تحرير تنفيذي يتهزأ على الهوا ويتقال له: انت عايز العقد على كام دلوقت اعملهولك.. ورئيس التحرير يتقال له اقعد في البيت ونبعت لك الفلوس
هي الناس اللي مش فاهمة وجه الاهانة فين مش فاهمين ليه؟ بجد والله، للدرجة دي هم مهزأين؟ ماهو مافيش انسان ما ياخدش باله من الاهانة الا اذا كان هو نفسه ما عندوش دم ولا احساس ولا كرامة، والاهانة تسبب الغضب، وتخلي الواحد يصعب عليه نفسه، الناس تستحمل الجوع ومسيرهم يلاقوا حاجة ياكلوها، تستحمل المعارك ومسيرها تنتهي، لكن تستحمل الاهانة عشان ايه اللي حيحصل بعد كده؟ فاهمني ولا ايه؟ اقصد كل حاجة لها نهاية، بس ان حد يهينك دي نهايتها ايه غير انك تقتص لكرامتك، وغصب عنك بتبقى غاضب، انا عمري في حياتي ما كنت اتخيل اني ابقى مضطرة اشرح ده كله
حاجة غريبة فعلا
اول حاجة قالها الحب متعب هههههههههههههههههه اصله اتباس لما اتهرا، وقلت له اوسخ حاجة عملها فيك رضا ادوارد انه اتسبب في ان كل العدد  ده يبوسك
انا بانزل كلمته بس هي كانت طويلة قوي، فضل ساكت ساكت ساكت، وعامل بقى العاقل الهادي الحكيم، وبعدين انفجر وقعد خمسة وسبعين ساعة يتكلم، فحتلاقوا الفيديوهات كتير وحانزلهم تباعا ان شاء الله
وحانزل اجزاء من كلمة بلال وفيهم فيديو لحظة دخول ابراهيم منصور وكان بيعيط ولما سلمت عليه ما ردش راح واحد من الواقفين شاور لي انه ما ردش، ههههههههههههههه يا ساتر على الناس المريضة، قلت له مالكش دعوة ما اخدش باله، ولو خد باله وطنش برضه مالكش دعوة
هي ايه الناس دي؟ 
وفي نفس الفيديو بابا دخل والناس قعدت تغني شيد قصورك، الحقيقة موقف بابا من حزب الوفد كان مهم لينا قوي، جبرة خاطر بصراحة بعد قلة القيمة دي، وقلة القيمة دي لم تلحق بابراهيم عيسى ومحرري الدستور بس، كل اللي عنده شوية دم، من مدونين ولا حتى قراء حاسس ان قفا سخن نزل على قفاه، ولولا اعتصام شباب الدستور ما كانتش حتقوم لنا قومة ابدا، كنا حنبقى ملطشة اي كلب، كله، النشطاء والمدونين والصحفيين، ما احنا خلاص بقى، جزء مننا قبل التهزيء، بس شباب الدستور وصلوا رسالة ان لحمنا مر، وعملوا لنا مثل في حفظ الكرامة، وان شاء الله مش حيعرفوا يعمولوا فينا كده تاني ابدا، واللي عامله شباب الدستور ده حماية لينا كلنا من البهدلة والتنكيل والتهزيء وقلة القيمة، ولازم كلنا نقدر ده، هم مش ثايرين لكرامتهم بس، هم بيحموا كرامتنا احنا كمان وبيقفوا الكلاب عند حدهم

وتاني مرة ايها الاب مبارك لما تحب تقفل لنا جرنال ما تبقاش تسلط علينا شباشب، اقفله انت بنفسك
اول حاجة احب انزلها استقبال الناس لابراهيم عيسى
ولو سمحتوا لو سمعتوا حد بيسرسع مش عايزة قلة ادب ولا طولة لسان، كل انسان يحترس نفسه
وطبعا عيطت، والماسكرا باظت، وكل ما اروح النقابة واقعد مع الدستورجية الماسكرا تبوظ، منهم لله، مش حاحط ماسكرا وانا رايحة لهم تاني
وعيطت اكتر حاجة لما قال: يوم القيامة الصبح حاطلع جرنالي
ولما قال: البلد دي برغم كل اللي فيها تستاهل ان الواحد يموت عشانها
انما ايه حكاية ابراهيم بيه؟ رضا ادوارد بيقول لابراهيم عيسى يا ابراهيم بيه؟ ابراهيم عيسى ابراهيم بيه ازاي؟ استاذ ابراهيم.. انا باقوله يابو يحيى.. بس ابراهيم بيه دي ههههه طب انا لو قابلته حيقول لي يا نوارة هانم؟ طب انا عايزة اقابله الراجل ده، انا عمري ما حد قال لي يا نوارة هانم.. الا اذا كان بيتريق عليا بقى: كنتي فين يا هااانم.. نفسي حد يقول لي يا نوارة هانم وهو قاصد بجد
خلاص انا احاول اقابله كده، افهمه اني حابيع له المدونة عشان يقدمها هدية للآب مبارك ويقول لي يا نوارة هانم، تسوى والنبي ابيع المدونة عشان اسمع نوارة هانم، او هم يشتروها من جوجل ويقولوا لي يا نوارة هانم ويقيلوني والمعلقين يعتصموا، ويقولوا لي حنبعت لك الفلوس على البيت، طب ما انا في البيت اصلا، يبقى يقيلوني من البيت ويبعتوني الجراج
على رأي بلال فضل: بكرة سيد البدوي يشتري الكابينيهات ويحافظ على السياسات التخريرية
انما ايه اللي اتحصل فينا ده؟ ازاي يخلوا عزة بلبع تغني في الناس كده بلاي باك والسيديهات شكلها بايظ وبقيت خايفة يحصل معاها زي زينات صدقي في فيلم بلبل افندي لما كانت بتغني شبيكي لبيكي والاسطوانة علقت وقعدت تقول: شوب شوب شوب شوب، ليه كده؟ هم جايبينها لابراهيم والمحررين عشان تهون عليهم بلوتهم ولا ايه مش فاهمة؟
الفيديوهات حتنزل تباعا، اي انسان حيتريق على ان ايدي بتترعش يبقى يصور هو
وبعدين ابراهيم بيقول لسيد البدوي وادوارد: كذابون كذابون وسيذهبون الى قبورهم كذابين
:) 
هههههههههه يا حبيبي.. ده منوفي ازاي ده؟ ده لا منوفي ولا فيه ريحة المنوفية، ده دسيسة، زعلان انهم كدابين؟ وكان ناقص يقول ورايحين النار كمان، طب ده اول منوفي اقابله في حياتي ما بيعرفش يكدب وبيكره الكدب والكدابين زي ماجدة الخطيب في نص ساعة جواز
ان شاء الله لما افضى ابقى احط فيديو لابراهيم وقصاده فيديو لابو شنب مصبوغ عشان الابيض ما يبانش نصاعته الا لما يتحط جنب الاسود، والنقي ما يبانش قد ايه نقاؤه الا لما تتعرف على النجاسة بيبقى شكلها ايه
انا حاقول اللي في قلبي وخلاص، اصلا اصلا ماحدش بيحب التشبيه الاولاني عشان يحب التشبيه التاني وكده، حد فاهم حاجة؟
بس المهم، انا حاسة ان ابراهيم عيسى حسن نصر الله الصحافة، وحتى نفس الحمقة ونفس دماغ وتسلسل التفكير والمواقف وكده
متشابهين، او انا بالنسبة لي هم الاتنين متشابهين جدا، بس كل واحد في مجاله، بس نفس الشخصية
وانا مش شايفة ان التشبيه فيه اي خلل خالص، لان كل واحد فيهم بيقاوم، وبيقاوم عشان كرامته، ومنطقهم واحد، ونفس الكاريزما، والناس بتغير منهم حتى في مصايبهم ههههههههههههه ده حتى اللي بيكرهوا السيد حسن هم هم نفسهم بالظبط اللي بيكرهوا ابراهيم عيسى، اي والله العظيم، اعمل حصر كده ودي اكتر حاجة غايظاني من سيد البدوي وادوارد، انهم جرابيع ومش عارفين اقدار الناس
بس رغي بقى.. الله، انتوا مالكوا رغايين قوي كده؟ اسكتوا شوية انا فاضية لكم
ملحوظة: لما تبقى تتصل بحد، ما تقضيش خمس دقايق من المكالمة تعتذر له انك ازعجته وعطلته لانك كده بتزعجه وتعطله، لا مافيش، انا بس حبيت اقول
خدوا الفيتونهات

































44 comments:

اسماعيل يس said...

ماهى طريقه تشغيل الفيتنوهات يا نواره هانم
لانى مش عارف اشغلها ازاى يابنت الغاليين

اسماعيل يس said...

ماهى طريقه تشغيل الفيتنوهات يا نواره هانم
لانى مش عارف اشغلها ازاى يابنت الغاليين

Unknown said...

الخيبة الثقيلة للبحث العلمى فى الجامعات المصرية

محاولة منهجية للحصول على إجابة على تساؤل وارد فى مقال منشور فى المصرى اليوم - الثلاثاء 19 أكتوبر 2010 - تحت عنوان

«المركزى للمحاسبات»:
«صفر» للجامعات المصرية فى قائمة أفضل ٦٠ بحثاً بالشرق الأوسط

http://www.almasry-alyoum.com/article2.aspx?ArticleID=273980&IssueID=1928

ملخص التساؤل
لماذا لا يوجد بحث علمى راقى ومتميز فى مصر؟

ملخص الإجابة
الإجابة ملخصة فى 28 سبباً - فلا تسألونا بعدها هذا السؤال أبداً إلى يوم القيامة

01 - لا بحث علمى بدون تمويل وفير

02 - لا بحث علمى بطريقة الشاطرة تغزل برجل حمار

03 - لا بحث علمى بدون ديموقراطية الإدارة

04 - لا بحث علمى بدون تسليم القيادة للعائدين من بعثات فى الخارج دون توصيلهم لسن المعاش سعياً لقمع ما تعلموه فى الخراج قمعاً بيروقراطياً مصرياً أصيلاً بدعوى أن غلية العلم فى مصر هو فى مستوى كفر البطيخ ولا يلزمنا العلم الذى عادوا به من الخراج فى شىء ولا مكان بيننا للعائدين

05 - لا بحث علمى إذا تحكم جاهل فى رقبة عالم

06 - لا بحث علمى إذا كان الأستاذ لا يتمتع بمرتب مرتفع

07 - لا بحث علمى فى بيئة المحسوبيات

08 - لا بحث علمى فى غيبة مراكز وطنية عملاقة عالية التأهيل والتجهيز المعملى

09 - لا بحث علمى دون تحكيم خارجى

10 - لا بحث علمى إن غاب الربط بين الجامعات ومراكز الإنتاج

11 - لا بحث علمى فى غيبة نسق عالى التأهيل من المعاونيين الفنيين

12 - لا بحث علمى إن اعتمد على رسائل الماجستير والدكتوراه كوسيلة لإجراء بحوث

13 - لا بحث علمى دون إعادة تنظيم هيكل برامج الدراسات العليا على مستوى الوطن

14 - لا بحث علمى دون افساح المجال للأفكار الجديدة الجيدة والجادة

15 - لا بحث علمى دون ربط مراكز أبحاث الوزارات بمراكز وأقسام الجامعات معاً بحكم القانون لا بحكم الشلل ورباطيات الصدفة

16 - لا بحث علمى دون ربط مع احتياجات القوات المسلحة

17 - لا بحث علم دون حريات مفتوحة لا تضع سقفاً يحجب الأفكار الجديدة

18 - لا بحث علمى إن كان وسيلة للإسترزاق الموسمى للأساتذة

19 - لا بحث علمى دون خطط تستمر كل منها على الأقل عشر سنوات

20 - لا بحث علمى دون شفافية فى تحكيم مشروعات البحثية للقبول ضمن برامج التمويل

21 - لا بحث علمى دون تمويل جيد لنشر البحوث فى دوريات عالمية

22 - لا بحث علمى دون شفافية فى تحكيم البحوث للنشرمحلياً

23 - لا بحث علمى دون الإجادة التامة للغات الأجنبية

24 - لا بحث علمى دون تجميع الفروع التخصصية على المستوى الوطنى
25 - لا بحث علم دون الخروج من أسر الفكر المحلى وقيوده

26 - لا بحث علمى دون تعليم جيد فى المرحلة الجامعية الأولى

27 - لا بحث علمى إذا إضطر الباحث لأن يتحول إلى إدارى كى يخترق الصفوف ويلمع نجمه ويتلقى مالاً يكفيه وزيادة

28 - لا بحث علمى وعشرون سيارة أمن مركزى تحاصر كل جامعة مصرية ليل نهار منذ ثلاثين عاماً وإلى أن يشاء الله ويتغير نظام الحكم فى مصر إلى نظام حكم رشيد بدلاً عن نظام الحكم الغبى الجاهل الخائن الذى يحكمنا منذ ثلاثين عاماً

hala said...

ياااااااا رب ...تطلعوا بنتيجه كويسه وتعوووود الدستور لكم
وتطردوا رجال الاعمال الاوباش
بصراحه يا نواره ...ابراهيم عيسى نفسه ما هاج ولا ماج زيك كان عنده ضبط نفس واتزان
فعلا ابراهيم عيسى لديه عقل راجح ورح يعرف يدبر اموره ...بدون فرقعات وطرقعات

أحمد حلمى الشناوى said...

الواحد عينه دمعت و الله
كنا مستنيينه من ساعتها و عايزين نعرف أخبارة ( سألتك عنه قبل كدة و معبرتنيش يا نوارة )
قام أتحفنا بكلمتين بل ريقنا بيهم
بس واضح أنه متأثر قوى نفسياً بدليل أنه لابس حزام مش حمالات هههههههههههههههههههههههه

و عايز اقولك يا استاذ إبراهيم لو القيامة الضهر هنشترى جرنالك الجديد الصبح

عباس ابن فرناس said...

ياويلك منى لو خاب املى فيك ياابرهيم
مش هرحمك مش هسامحك

حسن على said...

ابراهيم عيسى ورفاقة وجوة نبيلة مضيئة فى ليل بهيم ..كثرت بهائمة وحشراتة السامة ,ان من يجروء على اعلان انتماؤة لخزب الوفد الان معرض لكل امارات السخرية والهزؤ ممن يسمعونة ,سيعرف الجميع انة عميل رخيص مثل رئس الحزب المفضوح سيد البدوى شحاذة وتابعة -الاهبل- قفةرضا ادوار البدوى شحاتة ايضا

drkishk said...

من فضلك ضعى بقيه الفيديوهات

الشاطر حسن said...

نوارة هاتي بقية الفيديوهات وحطيها أنا هنا في الغربة ومتشحتفة يا اختي من كلام ابراهيم عيسى وعملتلكم فضايح في ابو ظبي.. هاتي بقية الفيديوهات خلليني اكمل شحتفة.. لعنة الله على الصبغة. محدش فعلا يثق في راجل بيصبغ شعره لو ست ماشي لكن راجل هيبقى كداب من ساسه لراسه زي اللي اشترى الدستور وباعها تاني يوم
دعاء سلطان الصحفية
أم حسن وربة منزل حاليا.. ههههههههه

Unknown said...

انت وحشتيني
عندي نميمة قد كده

تعالي بقى

Unknown said...

ياريت لو فيديو الإحتفال وكلمات ابراهيم عيسى وبلال فضل يكون كامل يا نوارة ..
معقول محدش عنده التسجيل ده كامل ؟! كل اللي ظهر لغاية دلوقتي على النت مقتطقات

Unknown said...
This comment has been removed by the author.
Mohamed said...

plz ya nawara kmly elvideos

Unknown said...

باستأذنك ترفعهم على اليوتيوب يا نوارة .. كدة يتشافوا أكثر وطبعا الحقوق محفوظة :)

بالنسبة لتشغيل الفيديو لازم يكون الجهاز عليه برنامج عرض فيديو مناسب

أنصح بـ
vlc أو realplayer SP
موجودين على النت عن طريق جوجل .. مجانا وتحميلهم مباشر من موقع
http://download.cnet.com/windows/

تحياتي

Unknown said...

موجودين بالفعل على اليوتيوب، باحولهم على طول على اليوتيوب والفيس بوك

http://www.youtube.com/user/nawaranegm#p/u

Unknown said...

ما كنتش عارف .. على العموم ده زيادة الخير

أتمنى منك فقط بقية الأجزاء وكلمة بلال فضل .. رجاءً

hala said...

والله يا أوفياء مصر بتحكي درر
ليش هذة المره لما قرأت كلامك...شعرت انك ..زدت على جروحي جرح..

Anonymous said...

وجدتها
عندي فكرة نحل بيها جميع أزماتنا
نعمل جمعية يشترك فيها ال 80 مليون مصري كل حد يدفع جنيه فقط في الشهر
و أنا هقبض الجمعية أول شهر و كل من تعجبه الفكرة يقبض في الشهور التالية و اللي مش عاجبه هقبضه في الأخر يعني بعد 80 مليون شهر

lastcrazyboys said...

والله مجهود مش عارفين نشكرك ازاي يا استــاذة ..خصوووصاً غني مش عارف "هشـوّي وري" ازاااي لشباب الدستور اللي بلغوني بمعاد الوقفـة بتاعة حزب الوفد ومعرفتش اروحها

بس بجد ربنا يقويكي عالمجهود الجبار ده ..وبالنوسبة بقى للاهتزاز والسرسعة كل ده مش مهم

انا بس اللي مش عارف افسره في كل اللي مكتوب ده حاجة احدة بس
معلش يعني ولا مواخذة ..هو يعني ايه " ماسكرا" ..؟
انا في البداية افتكرت انها "خلطة " مطبعية ..بس مع التكرار اتضح انها بجــد
فحبذا لو اتسع وقتك الثمين لايضاح المسألة

Unknown said...

يعنى انتى عمالة تتخانقى مع الكل بصوتك المسرسع ده وعمالة تذلى فيهم أنا باصور أنا باصور ودستوا على رجلى وناقص تضربى الناس على ايه القلاطة دى؟

وايه حكاية أبويا أبويا فى كل بوست دى.. هو كان راح الوفد ليه عشان يستقيل أصلا.. طول عمره بيقول أنا بتاع الشعب والحوارى..ايه علاقة حوش قدم بحزب الباشوات ؟ ولا هو كان شو عشان البدوى يعين زينب و خطيبها عنده ؟

حاجات جوايا said...

كلمة فوق الرائعة
عمرى ما شوفت ابراهيم عيسى بالقوة دى والجرأة دى والغضب ده والثورة دى
بس طبعا طبعا عنده حق مليون فى الميه
الظلم والقهر والقمع محدش يقبلهم ولا يقدر يستحملهم
ربنا ينصره وينصر كل صاحب حق وكل صاحب مبدأ وكل صحفى شريف


ربنا كبير
ومهما ساد الظلم
فدولة الظلم ساعة
ودولة الحق الى قيام الساعة

ربنا معاكوا يا نوارة
تحياتى يا جميل

Kontiki said...

زمان من كام قرن فى ايطاليا كان رأس المال دعم للفنون ولاصحاب الفكر الحر والجديد والثورى وكان له وجهه مستقلة يعنى حاجة كدة بالبلدى عندة فلوس و عندة اصل ومبأ دلوقت فى بلدنا راس المال دلدول ومساح لجزم وخادم للحكومة عشان مصالح متبادلة من اجل مص دم الشعب ماتت عندهم المبادىء والكرامة
يسلم اولاد الدستور ثوار ذوى قضية فعلا :)

محمد نور الدين said...

إلى الأستاذالمحترم أوفياء مصر الف تحية من الجزائر
أنت تحدثت عن آليات البحث العلمي
وجميع ما ذكرته صحيح، لكن السؤال الملح هو: لماذا لا يوجد بحث علمي على امتداد الوطن العربي؟
في تقديري السبب الرئيسي يعود إلى
غياب أصحاب المصلحة في البحث العلمي لأن العلم و البحث العلمي لا يتطور من تلقاء نفسه إذا أخذنا أوروبا كمثال
العلم تطور وازدهر وتقدم لأن الطبقة الرأسمالية كانت لها مصلحة في تقدم العلم و البحث العلمي لتطوير الصناعة و التقنية .
حتى حرية المرأة التي دافعت عنها الراسمالية لم تكن من أجل سواد عيون المرأة ،إنما كانت تبحث عن يد عاملة بخاصة بعد توسع الصناعة لهذا أخرجت المرأة إلى سوق العمل
أما في الوطن العربي فلا توجد طبقة رأسمالية ولا حتى قوى وطنية من مصلحتهاالدفاع عن العلم و البحث العلمي
أما من يطلقون على أنفسهم رجال أعمال فهم مجرد وسطاء لتكريس التبعية .ولقد تناول ذلك المفكر سمير أمين في نظريته حول المركز و الأطراف

Unknown said...

على فكرة يا ست نوارة ما عدش ينفع إن إسمك يكون فقط (نوارة الإنتصار أحمد فؤاد نجم) - أنا قررت أطلق على حضرتك إسم (قمر الدولة) - ليه مش عارف - أهو كده وخلاص - وجايز لما نظام الحكم يتغير إن شاء الله فى مصر عن قريب ويحكم مصر نظام حكم رشيد بدلاً من النظام الهمجى الحالى تبقى مصر الرشيدة دى بقى - عقبال أملتك - تعمل جايزة للصحفيين وتسميها قمر الدولة وأنا أرشح حضرتك لكى تكونى أول واحدة تاخد الجايزة دى

Fait gaffe à toi chère amie, on a besoin de toi ; nous vivons parmi des vrais chiens d’un régime qui est devenu complètement fou

Salut

مواطن مصري said...

http://shorouknews.com/ContentData.aspx?ID=317600

انضم الرئيس الأمريكى الأسبق جيمى كارتر إلى قائمة الشخصيات والمؤسسات الدولية التى تطالب الحكومة المصرية بالسماح لها بالمشاركة فى مراقبة الانتخابات البرلمانية المقررة الشهر المقبل.

ففى تصريح لـ«الشروق»، قالت مسئولة فى «مركز كارتر» بجامعة إيمورى فى ولاية جورجيا، شريطة عدم نشر اسمها، إن «الرئيس كارتر قدم عدة طلبات للحكومة المصرية كى تسمح باستقبال نحو 25 مراقبا لمتابعة الانتخابات القادمة، لكن لم يتضح بعد إن كانت الحكومة ستوافق».

جاء ذلك فيما بدأ الرئيس الأمريكى الأسبق زيارة للقاهرة مساء أمس الأول، ضمن جولة فى المنطقة لدعم عملية السلام المتعثرة بين إسرائيل والسلطة الفلسطينية. ويطالب مشروع قانون أمام لجنة العلاقات الخارجية فى مجلس الشيوخ الأمريكى، من المتوقع حصوله على دعم أغلبية أعضاء المجلس المائة، الحكومة المصرية باتخاذ كل الخطوات اللازمة للتأكد من أن الانتخابات القادمة ستكون «حرة وعادلة وشفافة وتعبر عن إرادة الناخبين»، ولا سيما السماح لمراقبين دوليين بمتابعة الانتخابات دون أى معوقات. غير أن الحكومة ترفض حتى الآن كل الدعوات لرقابة دولية على الانتخابات



كارتر يطالب برقابة دولية على الانتخابات البرلمانية


الحقي كارتر جاي يخربها و يقعد

على تلها

hala said...

الى السيد ابو هاجر
صدقني انه البحث العلمي مغلق من قبل الحكومات ..لانه التعليمات الصادره للحكام العرب من اسيادهم الغرب هي اولا :غغراق العرب نالجهل
ثانيا:الغرب يدرك تماما ان العقول العربيه من انظف العقول واذكاها ثالثا: الغرن لايحتمل ان تظهر دوله عربيه ذات مكابه علميه لانهم يعتبروا ذلك خطر عليهم ...خذ ابسط مثال ..العراق
انا في الاردن والعراق على حدودنا يوجد عندنا عراقيه اكثر من مليون لو تكلمت معهم لوجدتهم شعب ذكي جدا واكثر الشعوب العربيه يقرأ ..وشفت ماذا حصل ...اعادوهم الى الوراء مئة عام

hala said...

بدي اسأل..سمعت انه صحفيي الدستور رح يضربوا عن الطعام؟؟؟؟؟؟
بجد رح تعملوها؟؟؟؟

Solo said...

شـكراً يـا نـوارة

Ebn 5aled said...

http://img85.imageshack.us/img85/1417/3eesa2.jpg

http://img684.imageshack.us/img684/6949/3eesa.jpg

Ahmed Fawzi said...

يا ريت تنزلى باقىالفيديوهات على اليوتيوب لأن المشاهدة هنا صعبة قوى و مش عارف أكمل كليب واحد و مشكرين خالص :)

Unknown said...

أولاً قبل الرد على الأخت هاله / من الأردن وعلى الأخ / أبو هاجر من الجزائر فى موضوع البحث العلمى لازم أستأذن الأستاذة نوارة لأن كده أنا حاعمل من مدونة قمر الدولة (نوارة نجم سابقاً) منتدى نرد فيه على بعض - ودى حاجة منظرها مش ولا بد - ده كفاية إن قمر الدولة بتوافق على ظهور الكلام الفارغ إللى بأكتبه هنا كتعليقات ليس لها أى علاقة بالموضوع إللى هى بتتكلم فيه أصلاً - لكن طبعاً ده من ذوقها الأصيل العالى وفهمها التلقائى فى لمح البصر إن فيه حاجة متحاشة فى زورى ونفسى الناس تسمعها ولكن مدونتى غلبانة وصدمانة وعدمانة ولسه فى اللفة (عمرها 3 شهور) وجمهورها أقل من جمهور المسحراتى بتاع شارعنا لو عملوا له حفلة فى الرويال أوبرا هاوس فى لندن - والحقيقة نفسى أقول لنوارة نجم (قمر الدولة حالياً) يانوارة هانم وهى طبعاً بالفعل هانم وأفضل من كل الهوانم - ومرة كتبت عنها فى صحفة الفيس بوك بتاعتى قبل ما أعمل مدونتى إن نوارة نجم هى أجدع ست فى العالم العربى - وبالتالى فهى هانم وست الهوانم كمان

أما موضوع البحث العلمى فهو كل عمرى وقبل أن يضيع هذا العمر فقد كنت أفهم - من أول ما اشتغلت معيد فى جامعة القاهرة - إن قتل البحث العلمى لا تشجيعه هو التكليف الخفى الصادر لكل وزراء التعليم العالى المصريين والعرب - وحتى من غير تكليف خفى ولا تعليمات غير مكتوبة ولا حاجة فإن اختيار هؤلاء الأشخاص - إللى أصل معظمهم مخبريين - كوزراء تعليم عالى يُظهر معنى تعبير إن الجواب باين من عنوانه - وإنهم جاءوا كوزراء لتبويظ الدنيا على العلماء والتنكيد على عيشتهم وجهلهم يتقاتلون على مائة جنيه فيفرحوا فيهم

وعلى فكرة مسألة تطوير البحث العلمى دى ليست شديدة التعقيد لكن محدش عايز - كله عايز يعمل - كده وكده - إنه بيطور وهو فى الواقع بيدمر

والموضوع مش عايز إثبات

شوفوا إزاى كدبوا على البروفيسور الدكتور / أحمد زويل - منذ عشر سنوات - بمقامه العالى الرفيع فى دنيا العلم فى العالم كله ووعدوه وأخلفوا - بمنتهى التصميم على أن يخلفوا الوعد - حتى لم يعد الرجل يتكلم فى موضوع مشروعه لإنشاء مراكز بحث علمى متميزة للغاية فى مصر - فالسادة على أعلى مستوى فى مصر ودن من طين وودن من عجين عند سيرة البحث العلمى - لأنه من المطلوب دولياً عدم وجود علم عربى رفيع المستوى فى أى قطر عربى وبالذات فى مصر (أى نعم وبالذات فى مصر) - كده م الأخر - وللكلام بقية - إن شاء الله أن يكون فى العمر بقية

محمد نور الدين said...

hala

ألف تحية من الجزائر
اولا أنا زرت الأردن الشقيق ولي حكاية طريفة جدا معه
أما بخصوص ما ذكرتيه هو صحيح لسبب بسيط جدا
لأن الفئات القابضة على السلطةالسياسية في الوطن العربي هي جزء من مشروع الهيمنة .إنها عبارة عن دمى و الدمى يا هالة لا تصنع التاريخ

واحد said...

معندناش اكتفاء ذاتى من الفول
وقود الشعب
طلع بنستورده من فرنسا

Anonymous said...

ابراهيم عيسى مثال للمصري اللي بلده تفخر بيه .. فعلا راجل

hala said...

شكرا لك يا نواره ...الكلام في هذه المدونه ممتع ..وشكرا لك ابو هاجر ...وشكرا لك يا اوفياء مصر
صار مده بحاول ادخل مدونة اوفياء مصر ..بس مش لاقياها

Unknown said...

عندى كام سؤال يا نوارة
أولا: الفيديو رقم 11 مقطوع ليه؟ وفين بقيته؟
ثانيا: فين باقى الحفل؟ ولا ماتسجلش؟
ثالثا: فين كلام بلال فضل؟
رابعا: فى أى حد تانى اتكلم؟
خامسا: فى أى رد فعل للاحتفالية دى سواء إيجابى أو سلبى لأى حد فى البلد دى بس يكون بيفهم؟
سادسا: نفسى أعرف نفسى أطمن إبراهيم عيسى ناوى على إيه دلوقت؟ وحيسيبنا كده من غير دستور لحد إمتى؟ ولا لازم نستنى لحد يوم القيامة الصبح؟

Unknown said...

بعدما اتفرجت على باقى الفيديوهات إلى نهاية كلمة إبراهيم عيسى - لقيت بيقيتها على فكرة- خطر على بالى قول عنترة: "ولقد أبيت على الطوى وأظله حتى أنال به كريم المأكل". ياه ياجماعة دى أخلاق الفرسان لسا مانقرضتش، والدتيا لسا بخير. ربنا يكرمك ياإبراهيم يا عيسى. إن الله مع الذين اتقوا والذين هم محسنون. فاضل الإجابة على باقى الأسئلة: لحد إمتى؟؟

Unknown said...
This comment has been removed by the author.
Unknown said...

أنا مش فاهمة ليه كل ما إبراهيم عيسى يتكلم عن الإيميلات اللى بعتها للسيد البدوى يقول: أتمنى عليه أنه يطلعهم بس بأمانة وبدون ما يتلاعب بيهم


حتى لو حاول يتلاعب ما يقدرش لأنهم محفوظين فى ال
(sent folder)


ما تستناش يا أستاذ إبراهيم أنه يطلعهم. طلعهم أنت وافضحه فورا

Unknown said...

= = = = =
النظام المصرى الذى لا يمثل سوى نفسه يستبعد (جورج جالواى) من قافلة (شريان الحياة) - 20 أكتوبر 2010 - إلى غزة المحاصرة إسرائيلياُ ومصرياً – لاعتباره (شخصاً غير مرغوب فيه) بمصر

الله عليه هذا الرجل العظيم (جورج جالواى) الذى يعوضنا (بأفعالة الإنسانية الرائعة فى المقاومة السلمية العظيمة لنصرة أهلنا فى فلسطين ضد النازيين الجدد من الصهاينة المجرمين المحتلين للأرض الفلسطنية العربية التى لم تكن لليهود يوماً واحداً طوال الـ 3750 ستة الأخيرة) - ولو أدبياً عن حريمة تواطؤ الإمبراطورية البريطانية وفرنسا فى أربعينات القرن العشرين مع الصهيونية الدولية للاستيلاء على أرض فلسطين - وحكامنا بخياناتهم المعهودة يقفون حجر عثرة فى طريق هذا الرجل العطيم (جورج جالوى) الذى يمكن اعتباره بحق (غاندى البريطانى) الذى ينصر قضية العرب الأولى فى حين أن العرب أنفسهم لاهون لاعبون راضون بالاكتفاء بشن حروب ملاعب كرة القدم ولسان حالهم الغبى يقول فلتذهب قضايانا فى التنمية والحرية إلى الجحيم طالما نتمتع بمباريات كرة القدم وحروبها الهبلة العبيطة البلهاء بين مصر والجزائر وتونس - وطالما كان من بيننا خونة يعتبرون أن إيران وتركيا أشد خطراً على الأمة العربية والإسلام من إسرائيل - من الممكن أن نفهم أن بعض الحكام العرب أعمى البصر و البصيرة وأعمى القلب والضمير - وهذا الرجل البطل (غاندى الجديد) يفضح خيانتهم ولهذا فهم لا يطيقونه - ناهيك عن أن يساعدوه أو أن يسهلوا له عمله فى المقاومة السلمية - لقد أصبح شعار الخيانة العظمى وبيع الوطن فى أسواق النخاسة هو كلمة السر المشتركة والشىء الوحيد الذى إتفق عليه الحكام العرب - خيبهم الله وأدخلهم الله فسيح جحيمه فى الدنيا والأخرة

من كلمات الشاعر أحمد مطر - ثم تعليقى النثرى

التهمـة
كنتُ أسيرُ مفـرداً
أحمِـلُ أفكـارى معـى
وَمَنطِقي وَمَسْمعى
فازدَحَمـتْ
مِن حَوْلىَ الوجـوه
قالَ لَهمْ زَعيمُهم : خـُذوه
سألتـُهُـمْ: ما تـُهمتى؟
فَقيلَ لي :
تَجَمُّعٌ مشبوه !

توبَة
صاحبي كانَ يُصَلـّى
- دونَ ترخيص ٍ -
و يتلو بعضَ آياتِ الكتابْ .
كان طفلا ً
و لذا لم يَـتعرَّضْ للعقابْ .
فلقد عَـزَّرَهُ القاضى
.. وَتابْ !

حالات
بالتّمـادى
يُصـبِحُ اللّصُّ بأوربّـا
مُديراً للنـوادى .
وبأمريكـا
زعيمـاً للعصاباتِ وأوكارِ الفسـادِ .
وبأوطانـى التى
مِـنْ شرعها قَطـْعُ الأيادى
يُصبِـحُ اللـّصُّ
.. رئيساً للبـلادِ !
اعتذار
صِحـتُ مِـن قسـوةِ حالـى :
فـوقَ نَعلـى
كُلُّ أصحـابِ المعالـى !
قيـلَ لى : عَيبٌ
فكرّرتُ مقالـى .
قيلَ لي : عيبٌ
وكرّرتُ مقالى .
ثُـمّ لمّا قيلَ لي : عيبٌ
تنبّهتُ إلى سـوءِ عباراتى
وخفّفتُ انفعالـى .
ثُـمّ قدّمـتُ اعتِـذاراً
.. لِنِعالـى !

= = = = =
تعليقى
= = = = =

الله الله الله
أتكتب الشعر أيضاً
ما كل هذا الجمال
هنيئاً - فالشعر سيد الخصال
وهو أمير الكلام فينا
حبن يشتد بنا النزال
وليذهب لصوصنا حكامنا
إلى جحيم قوامها
يحرق الصخر والصلصال
كم نود لو بأيدينا هذه
نشعل من حولهم
سرادقاً فى الجبال
وقبيل الحرق
نأتى ونهديهموا على ملأ
من الناس ومن البغال
كل ما يكون قد بقى لدينا
من قيح البصاق
ومن قديم النعال

= = = = =
وبعد إذن (قمر الدولة) - (نوارة نجم سابقاً) - عنوان مدونة (أوفياء مصر
Bienveillant d'Egypte
هو التالى
= = = = =
http://egyptelibre.blogspot.com/
= = = = =

amt said...

كان نفسي من زمان مع بداية الازمة اقول لكم اخرسوا واهدوا لأن لا انتم و ولا ابراهيم عيسى الخسرانين - لكن احنا قراء الدستور و عشاقها اكتر ناس متضررين من مقتل الدستور غير المبرر دة - لكن كل اللي اتكلم ساعتها عن وجهة النظر التانية قالها بطريقة غير شريفة بالمرة زي سليم عزوز و فراج اسماعيل اللي ماحدش عارف سر شماتتهم المستفزة دي

لكن اهو واحد منكم وعليكم قال اللي في صدر قراء و جمهور الدستور الحقيقي ووصل الرسالة اللي كان لازم تسمعوها من زمان قبل ما تنصبوا سرادق الجرنال اللي كنتم احد اركان موته الثلاثة

http://www.youm7.com/News.asp?NewsID=293945

سكوت هنصوت said...

انا بضم صوتي لصوتك في حكاية السرسعة دي.....اي حد هيتريق على السرسعة بقى ذنبة على جنبة وهدعي عليه السلعوة تاكل زورة ويبقى مسرسع هو راخر....الواحد اتفضح من سرسعة صوته :))
كان يوم رائع يا نوارة...قد ايه كنت محتاجة الجرعة دي والدفعة دي من التشجيع واني اشوف ناس مخلصة وشريفة بجد...مش انطاع..
ميرسي على الفيديوهات

Nicholas Urfe said...

حاجة ترفع نسبة الكرامة في الدم ، الرب والشعب معاك يا ابراهيم ،اقبل اثر ممشاكم يا اخوتي في الدستور.

Unknown said...

Nawara you must read this article. I don't like this guy but his opinion in this issue is very accurate.

http://www.masrawy.com/News/Egypt/Politics/2010/october/22/ali_gomaa.aspx