Saturday 30 October 2010

اثبت يا عبد الهادي

عرفت حالا ان النقابة وقعت صفقة مع رضا ادوارد في مقابل استبعاد ابراهيم عيسى، وان فيه ناس لما عرفوا ان النقابة باعتهم قرروا انهم يروحوا، بينما فيه مجموعة تانية مستمرة في الاعتصام ورافضين الصفقة
لسه ما اعرفش عدد اللي بيشاوروا عقلهم وعدد اللي مصممين على الاعتصام
بس كل اللي اقدر اقوله: اثثثثبتتتتت.. فليبق كل في مكانه، اهدوا
اهدوا، والله العظيم تلاتة ده لعب وتضييع وقت ومحاولات يائسة من رضا ادوارد والسيد البدوي للفلفصة
يا شباب اثبتوا وما تبوظوش الطبخة على حبة ملح، ده فات الكتير ما بقى اللي القليل وخلاص قربت تفرج، تعالوا على نفسكم الكام يوم دول، واللي فاكر ان مدام النقابة باعته يبقى الموضوع اتقفل هو واهم
نقيب الصحفيين كان ضد ابراهيم وضد الدستور في الاول، افتكروا، وانتوا بضغطكوا وبموقفكم المذهل فعلا، واللي انا نفسي ما كنتش متوقعة انه حيبقى بالقوة دي، اجبرتوه على الصمود
اللي حصل ان رضا ادوارد والسيد البدوي لما لقوا ابراهيم راح النقابة وبيطمن الشباب ان الموقع حيشتغل، وان قريب قوي فيه مطبوعة ورقية، جات لهم اوامر ان بسرعة الحق فركش الفراكيش، ووافق لهم على اي حاجة، عدا ابراهيم عيسى، المهم العيال دول ينفضوا ويتفركشوا باي تمن
ما تخافوش، دي محاولات يائسة، نقيب الصحفيين عمره ما كان معاكوا عشان تحسوا انه اتخلى عنكم، انتوا اللي زنقتوه، وبيجيله تعليمات زي ما بييجي لادوارد والبدوي تعليمات، وانتوا اقوى من التعليمات
على فكرة انا عمري ما قلت الكلام ده، وطول عمري من اول الازمة باقول اللي عايز يروح يروح ما تجبروش حد على القعاد، وكنت باقول اللي حيقرره الشباب حيبقى صح، هم خلاص سجلوا موقف محترم، واحنا حنحترم اختيارهم، وانهاء الموقف يرجع لهم
بس الوضع دلوقت اتغير، انتوا تقدروا تحققوا مكاسب، ما تجوش على الاخر وتخيبوا، والله العظيم تلاتة انتوا كنتوا في موقف الاضعف وهم الاقوى دلوقت والله والله والله انتوا الاقوى عشان كده بيطبشوا وبيوافقوا على اي حاجة
اثبتوا
اثبتوا
اثتبوا
اوعوا تضيعوا مجهود كل الايام اللي فاتت دي، اصبروا يومين بس، يومين بس.. اتوسل اليكم، وتاني، انا اول مرة اعمل كده، لأن المواقف البطولية مواقف تطوعية بالاساس، وماحدش يقدر يطالب حد بالموقف ولا بالتوقيت ولا بالمدة اللي يستمر فيها واخد الموقف
لكن انتوا خلاص اخدتوا الموقف وخلصتوه وجه وقت تجنوا فيه ثمار موقفكم العظيم، هم كل اللي بيعملوه دلوقت انهم بيضيعوا عليكوا فرصة جني الثمار
اوعوا تعملوا كده
اوعوا يضحكوا عليكوا
اوعوا... خلاص.. فاضل خطوة
والله العظيم دي نصيحة مخلصة.. وبكرة تشوفوا ان كلامي ده صح، ما حدش يعمل حاجة يندم عليها، مش بعد ده كله، كان من الاول، مش بعد التعب والشقى والمرمطة في الشوارع والاعتصام وهزيتوا الدنيا مش بعد ده كله يحرموكوا ويضحكوا عليكوا ويقولوا لكوا بصوا العصفورة
والنبي والنبي والنبي

5 comments:

Ahmed Fawzi said...

http://www.youm7.com/News.asp?NewsID=297972
اتفضلى !!!!!!!!!!!!!
مش وزير ده مقاول أنفار

مواطن مصري said...

المشكلة يا نوارة

في الصحفين الغير متثبتين

على ما فهمت انهم مش اعضاء في

النقابة طيب اية موقفهم

سواح في ملك اللــــــــــــــــــه- said...

اسمعي يابنتي مكرم من ساعه ماطرد ادوارد منالنقابه وانا عرفت انه مش عايز يحل ده منظر كده اتعمل عليكوا وشربتوه

Unknown said...

مزبوط يا نوارة .. اظن الكل عارف و متفق على التحليل ده ... بيحاولوا يضعفوا المعتصمين ويلعبوا على ضعفهم ..
بس انا عندي عتاب بسيط على ابراهيم عيسى .. كان لازم يظهر في الصورة أكتر من كده والمعتصمين يحسوا أنه واقف معاهم وجنبهم ...

كمان مشروع الموقع الإلكتروني والجريدة الورقية كان لازم يبدأ قبل كده بكتير عشان يدعم صمود الصحفيين وثباتهم على موقفهم
..
وصّلي الكلام ده لعيسى .. يمكن يكون في حاجات إحنا مش فاهمينها يبقى يوضح موقفه أكتر للناس
عموما ما حصلش حاجة ولسه ملحوقة بإذن الله

hala said...

في الحقيقه يا نواره انا عندي تسائل؟
في عندك بديل عشان يصمدوا ويثبتوا ؟؟؟
وبتقولي اثبتوا مش فاضل كتيير
طب بعد ما يثبتوا رح تلاقيلهم شغلانه محترمه مع الحريه والرخاء الاقتصادي والحياه الكريمه ؟؟؟؟؟
والله من كل قلبي بدعيلكم ..الله معكم