Tuesday 12 October 2010

ويتوالى الخراء تباعا

هم الاخوة بتوع كاميليا مش حيعملوا مظاهرات عشان قناة الناس؟ ولا احنا اللي حنتدبس فيها لوحدنا كالعادة؟ ولا عشان قناة الناس ما بيشتغلش فيها ستات واعلاناتها كلها كان بيعملها اتنين موظفين ببدل بيعلنوا عن دستة كوبايات وطقم ملايات؟ هههههههه والله حرام، طب على الاقل ده قطع عيش ناس كانت بتسترزق يعني وفاتحة بيوت


الفلاحة ماتت ولازم نسلم نفسنا
كانوا زمان يقولوا: اضرب المربوط يخاف السايب
وده مثل ساذج، النظام المصري عمل بحكمة: لو عرفت تقفش السايب وتخليه عبرة، المربوط حيعمل بيبي على روحه، روح هات له بامبرز
بعد قفل الدستور وعزل ابراهيم عيسى تعسفيا، الا وهو السايب في هذه البلد، بدأت النقنقة في المربوط
1- قانون جديد يحظر على الصحف تغطية الجرائم الماثلة امام القضاء، حفاظا على سمعة مش عارفة مين، وعدم حضور الصحفيين تصوير المتهم البريء حتى تثبت ادانته الخ الخ الخ
وقبل ما واحدة مغيبة ومش دراينة بالدنيا ومش شايفاها غير من ورا ازاز عربيتها المكيفة تقول لي: صحيح، الصحافة زودتها قوي، وبقت تشهر بالناس، والمفروض يحافظوا على خصوصية المتهم، ناس كتير اتظلمت، رجل الاعمال الفلاني ده صاحب بابا وبنته صاحبتي، ومراته صاحبة ماما وكانت حالتهم صعب قوي، وبنته ودوها تتعالج في لندن من الصدمة، عشان شوية صحفيين زبالين عايزين يعملوا سبق، طب ذنبها ايه بنته اللي خطيبها سابها بسبب الفضايح اللي حصلت، وذنبها ايه مراته اللي ما بقتش تعرف تروح للكوافير خالص من نظرات الناس؟
وباقول واحدة عشان عادة هم البنات اللي اعرفهم بيقولوا كده، ربنا ما يكتب عليكم والله
طيب، الكلام ده كله لطيف، ومحترم، وخالص تعاطفنا مع كوافير مرات الراجل والدكتور الانجليزي اللي عالج بنته بعد ما خطوبتها اتفسخت، لكن الكلام ده يمشي لو فيه استقلال قضااااااااااااااء
في اوروبا والدول المتقدمة، القضاء مستقل، ومش محتاج لرقابة شعبية عليه، لكن احنا في مصر قضاءنا مش مستقل، ويحتاج رقابة، وغالبا ابو صاحبة صاحبتي طلع براءة مش لانه بريء، لانه معاه فلوس، فيبقى على الاقل الصحافة لما بتشهر بميتين امه هو وبنته ومراته وخطيب بنته، على الاقل اخدت حق الناس المعنوي بما انه عمره ما حياخد عقوبته اللي يستاهلها بالقانون، يبقى ياخد عقوبته الشعبية بالطريقة المصرية التقليدية الا وهي التجريس
وقبل ماحد يتكلم على تجاوزات اقول له اتوكس، انت عيشتك كلها عبارة عن تجاوز كبير قوي، تجاوز قانوني، وتجاوز اجتماعي، وتجاوز اقتصادي، بدل ما يطلعوا قانون لحظر رقابة السلطة الرابعة، واللي تقريبا هي الوحيدة اللي بتضطر تاخد صف الناس ولو لشوية صغيرين عشان تعرف توزع، ما يطلعوا قانون ضد غلاء الاسعار، الناس حتاكل ايه لما القوطة اللي مافيش حتى طبق كشري يخلو منها توصل لتلتاشر جنيه؟ بيبي؟
خلاص، كل الربط والضبط والاحضار حصل مش باقي الا تجاوزات الصحفيين الوحشين اللي بيشهروا برجال الاعمال ويخلوا بناتهم تتفسخ خطوبتهم؟
2- قانون تاني لمراقبة رسائل الموبايل، اي حد مشترك في خدمة رسائل اخبارية مش حيوصله اخبار الا يكون موافق عليها وزارة الاعلام والمجلس الاعلى للصحافة والا الرسالة ترجع للمرسل وكل ده على حسابك انت، على رأي منى الشاذلي: حندفع فلوس عشان الرسايل ما تجيلناش
3- لسه راجعة من برة عرفت ان قناة الناس اتقفلت!!!!!!!!!!!!!!!!!!!!!!!!!!!!!!! يالهو بالي... دي قفزة جامدة كيك، قفل قنوات كده وش؟ قبل كده شالوا قناة العالم من النايل سات وقفلوا مكتب القناة بس ده بسبب علاقتهم السيئة بايران مع انهم فتحوا خط طيران بينهم وبين ايران مش لتحسين العلاقات لا سمح الله، ولكن لان رجال الاعمال المصريين عايزين يستغلوا الحصار اللي على ايران ويبيعوا البضاعة الكسر ويكسبوا ويتنغنغوا، يعني رجال الاعمال بيتحكموا حتى في العلاقات الدولية المصرية، حتى لما النظام المصري يحب يقاطع ايران عشان شارع خالد الاسلامبولي - وزي ما كلنا عارفين ده سبب وجيه جدا، ازاي يسموا اسم شارع بتاعهم في عاصمتهم على كيفهم من غير ما يسألونا يعني؟ مافيش احترام للعالم - بس حتى ده النظام المصري مش حيعرف يعمله
طب انا املي ان مصر تحسن علاقتها بكل الدول العربية والاسلامية وتسوأ علاقتها بامريكا واسرائيل من منطلق ايديولوجي، بس بصراحة يصعب عليا قوي لما النظام يحب يقاطع ايران وما يعرفش عشان فيه بضاعة في المخازن عند رجال الاعمال عايزين يصدروها لايران وهي في الحصار.. كده كتير
لكن الاكتر والابجح ان القفزة تصل لقفل قناة فضائية، دول عمالين يصعدوا، بيصعدوا في سكك وسخة اخر حاجة، وممكن فجأتن نمشي نلاقي الدبابات في الشارع... انا كنت متوقعة ان ضربة السايب يعقبها تبعات طين
بس ما كنتش متوقعة ابدا ان الامر يوصل لقفل قنوات فضائية
وقبل ما حد يقول لي: قناة الناس دي قناة قذرة، عملت فتنة طائفية
اقول له: ايوة ايوة.. وافق انت من حيث المبدأ على قفل قناة قذرة ومن بكرة اي قناة نضيفة عاجباك حتتقفل
ولا نوافق ولا ما نوافقش... هو حد سائل احنا عايزين ايه؟ ولا حد حتى بيفكر يكدب علينا؟ مش ممكن الشفافية اللي هم فيها دي... لا، شوية مراعاة لمشاعرنا او نحس انهم مكسوفين مننا.. انما مافيش كده خالص؟ مطرح ما نحط راسنا نحط رجلينا؟
قال لك اتقفلوا عشان مخالفات، الناس والحافظ والصحة والجمال
واون تي في جالها انذار هي وقناة الفراعين
يااااااااااا على قناة الفراعين والراجل التحفة اللي بيطلع يتكلم فيها.... طب حيحرمونا من الراجل الاعجوبة ده ليه؟ عشان ماحدش ينافس رضا ادوارد في الهبل؟
مازلنا في انتظار
4- .....
5- ......
6- ......
7- ......
ده احنا حنشوف ايام لون سنان نادية لطفي

31 comments:

احنا المأجورين said...

شوفي يا نوارة
الامن الاول كان بيضرب شباب الاخوان بس في الجامعات
دلوقت الامن بيضرب البنات وبيبهدلهم وبيعريهم زى ما يكون البنات دى يهود ولا جواسيس
زمان كان التحذير والانذار هو السلام
دلوقت بقي القفل والعزل والاقالة
زمان كان كيلو الطماطم بجنيه
دلوقت كيلو الطماطم ب 12
زمان كان الثوم الكيلو بجنيه
دلوقت الرأس ب 2 جنيه
زمان الريس كان بياخد 99 في المية
دلوقت 98 في المية من مجلس شورى الاخوان وافقوا على خوض الانتخابات التشريعية
نوراة بصراحة اناعايز انام

مواطن مصري said...

نوارة قناة الناس مسابتش حد من المعارضة

و الا شتمتة او كفرتة و مع عوكل

خلي بقى عوكل ينفعهم سيبيهم يتكو

بالنار الي كو بيها المعارضة


انا ضد وجود قنوات دينية لأنها

بتخلي الدين سلعة و الشيوخ و القساوسة ليهم سعر ولا اسعار الفنانين

انا ضد وجود قنوات الفتنة ولا شيوخ الفتنة

ولا مع قنوات العري

النايل سات عاوز فرمتة و ينزل

من جديد

عباس ابن فرناس said...

طول عمرنا واكلين خرنجع وشاربين قطران غذانة المفضل والوحيد
بس كل الحكاية اننا حبينا نتبتار شوية على النعمة الى احنا فيها فا همة حبو يفكرونا

7amada said...

حرام اللي بيحصل فينا ده
يعني نطفش من البلد ولا نستنى
رأيك ايه؟؟؟

محمد نور الدين said...

إلى ست لكل
آخر لقطة ذكرتني بفيلم تيتانيك.
نسلم نفسنا لمين يا نوارة؟
الوضع العربي يشبه تيتانيك الجميع يغرق حتى القبطان.

utopia said...

لا وخدى عندك كمان
http://www.almasry-alyoum.com/article2.aspx?ArticleID=273108
مع انى مش شيعى والله بس دى محاكم تفتيش فى الضمائر ولا ايه؟؟؟
حد لسة بيقول الحرس القديم ما رجعش وركب تانى؟؟؟؟
فاضل بقى المدونات والفيس بوك يا ترى امتى؟؟

hala said...

عام 1990 كان كارثه على الحكام العرب
لان الغرب فرض على العالم العربي فتح الفضئيات وإعطاء الحريات وإلغاء الاحكام العرفيه
بس بعد مضي 20 سنه تغيرت الاوضاع العالميه بسبب ما يسمى الارهاب فانتهزت االانظمه الوضع وفرحت وهللت لانها بذلك سوف ترجع بلاوضاع الى ماكانت عليه قبل الثورات والملكيات والجمهوريات ورح تصبح الانظمه تنظر للشعوب بفوقيه ومتعاليه

عبد الله السلفى said...

حسبنا الله ونعم الوكيل بكره هيجيى اليوم الى يقفلوا فى الجوامع والاستاذه نواره بتقول قناة قذره والاستاذ ابراهيم عيسى بيقول قنوات كفرت المعارضة والله انتم السبب فى قفل هذه القنوات بسبب تحريضكم حسبنا الله و نعم الوكيل فيكم وفى الى قفل القناة

hala said...

والله يا جماعه
قناة الناس كويسه وكنت في بعض الاحيان اتابعها لما اكون فاضيه ,,,وكنت اسمع كلام رائع عن الدين والتقرب الى الله
لانه لازم يكون في قنوات تذكرنا بالله
لاننا غرقانين في مشاغل الحياة
وناسيين انه في آخره

عباس ابن فرناس said...

وبما ان القرف بالقرف يذكر فيه حدوتة مقرفة بتقول انه كان فيه واحد مسكين وغلبان وقرفان عايش هوا واسرته فى اوضة مترين فى مترين فراح لواحد من المسولين يشكى له ضيق الحال فاالسيد المبلول قصدى المسول قل له انا ممكن اساعدك بس بشرط انا عندى خنزير عايزك تستضيفه عندك لمدة اسبوع فالمسكين مكنش قد امه غير انه يوافق على امل المساعدة ,ايام قليلة والخنزير يقلب حياة الراجل الى جحيم ويمر اسبوع وعشرة ومحدش سائل فيه وبقا كل همو فى الحياة انهم ييجو ياخدو الخنزير بتاعهم
الله يمسيك بالخير يا ابرهيم يا عيسى

hala said...

ليش مستغربين إللي بيحصل ؟؟؟؟
طب ما إحنا طول عمرنا مقموعين ,,,يعني حتة الحريه المزيفه اللي طعمتنا إياها الحكومات ما هي إلا لظرف طارىء ..وبعد ما خلص الظرف الطارىء عادت الاوضاع لنا كانت عليه سابقاً

مواطن مصري said...

يا سلام لو يعتقلو الحويني و حسان و المصري و بيشوي مكاري يونان في معتقل واحد

المهدى said...

شوفتى بقى الموضوع مش إبراهيم عيسى الضحية والبدوى -رضا مصاصى الدماء الموضوع أكبر من كل دول
حتى كاميليا وغسيل المغسول و هبل بيشوى ومظاهرات السلفيين المنظمة لسب البابا شنودة كل ده داخل الإطار
ربنا يستر

عباس ابن فرناس said...

وبما ان القرف بالقرف يذكر
فيه حدوتة مقرفة بتقول كان فيه واحد مسكين وغلبان وكحيان وطبعا قرفان لانه كان عايش فى اوضة مترين فى مترين فراح يشكى حاله لولى الامر الى هو اسمه (حظرتونا)فحظرتنا قال له انا ممكن اساعدك بس بشرط انا عندى خنزير عايزك تستضيفه عندك لمدتة اسبوع فالمسكين وافق على مضض,فات اسبوع وعشرة والمسكين محدش سال فيه لحد ماقال حقى برقبتى
وبقا كل همو فى الحياة انهم ييجو ياخدو الخنزير بتاعهم
وعجبى
الله يمسيك بالخير يا ابرهيم يا عيسى

Ahmed Mohamed said...

القانون الجديد ده ميه ميه والله بلا حورات فكسانه بلا وجع دماغ وقنوات تبث مباشرة من قاعة المحكمه من 6 الصبح عشان محاكمة ما خخخخ دا ايه البيض ده
ايه الاكشن في الموضوع يعني عشان نسمع محامي ده ومحامي دي ما الخبر هينتشر علي صفحات الجرائد بجانب حكم المحكمه دا غير الناس الموجوده في القاعه ومحدش بيمنع نعرف حيثيات الحكم بردو
اهو مثلا طلعت اتحبس والسكري اتحبس ومش اتعدمو عشان اسرة الفنانه تنازلت انا استفدت ايه بقي
دا غير اني شوفت فريد الديب ده بيشخط في القاضي خلي الراجل يتنرفز ويرفع الجلسه
حاجه تكسف يعني

القضاء مش مستقل ههههه ايوه كده يا جيفارا هيس هيس انت شاب كويس
حتي القضاء محتاج رقابه اهدي كده شويه احنا مش باقي اساسا لينا غير القضاء الي بيحكم من ورق ادامه فقد لا غير ملوش دعوه بغير كده بلاش نشكك في القضاه آمال بنطالب بأشراف قضائي ليه بقي علي الانتخابات ولا انتي عايزه ايه ؟ طب وضحي ازاي مش مستقل ؟

Nicholas Urfe said...

حاجات صح للاسباب الغلط !

زي قلته !

هكون مبسوط لما قناة الناس تقفل من نفسها وتخسر وما حدش يجي له نفس يتفرج عليها عشان الشعب بقى واعي وعارف انها قناة تخريبية تستغبي خلق الله مثلها تماما مثل قنوات الأغاني العريانة ..


في مثل سوري بيقول : فخار يكسر بعضو !

خلي الوضع يوصل أسوء ما يمكن ، وخلي الموجة توصل لأدنى نقطة في القاع
يمكن نحس ويبقى عندنا دم وننتفض

عبد الله السلفى said...

الى مواطن مصرى
ان شاء الله هيعتقلوك انت مع اقبال بركة و ايناس الدغيدى و انيس منصور قريبا ان شاء الله

محمد صبرى said...

هو الراجل بتاع مهيطل خد كارت اصفر بس

هههههههههههه

الحمد لله , انا كفرد من أفراد السبانخ مقدرش أعيش من غير الطلعة البهية, الراجل دا بقى معجزة الإعلام المصري الحقيقة, عايزينه يتشال ازاى بس

اه صحيح قبل ما امشى

هو مين اللى بيحكّم الماتش دا؟

مواطن مصري said...

محمود السلفي


ما اقبال بركة و الست الهبلة

الثانية يطلعو في موجة كوميدي

مواطن مصري said...

محمود السلفي


انت بالذات متتكلمش يا بتاع دقن كامليا

free mind said...

أحسن خليكي اهو السلفين بيدعوا عليكي ابقى انصريهم كويس و عبدالله السلفي مش قادر يخبي الغل اللي في قلبه بيقول لمواطن مصري هتعتقل ان شاء الله والله مصر بقت خبلانه على الاخر

جون اللي انت مابترديش عليه

free mind said...

أحسن خليكي اهو السلفين بيدعوا عليكي ابقى انصريهم كويس و عبدالله السلفي مش قادر يخبي الغل اللي في قلبه بيقول لمواطن مصري هتعتقل ان شاء الله والله مصر بقت خبلانه على الاخر

جون اللي انت مابترديش عليه

عبد الله السلفى said...

الاستاذه نواره مش بتنصر القنوات الاسلامية الى اتقفلت حبا فيهم لا ده عشان الحرية المطلقة الى انتو بتتمنوها يعنى مثلا موافقين على النقاب بس لو واحدة مشيت بالبكينى محدش يتكلم وعم ابراهيم بيقولك كمان دقن كاميليا اسكت انت خالص يا هيما انت دخل فيك جون تمام ادوك استماره سته من جرنان وقناة فضائية دفعة و احدة وبقيت قاعد يا عينى عاطل صعبان عليا يا هيما

Nicholas Urfe said...

سؤال ، هل يرضى السلفي إن حد يتدخل في حياته وفي لبسه علشان وفي عيشته ؟

يعني انا مثلا شايف ان السلفيين ناس عصاة يرتكبون كبيرة من اكبر الكبائر من خلال فهمهم للدين اولا وتطبيقهم لمبادئه - بالطريقة التي فسروه وفهموه بها - ثانيا.

هل من حقي أن اوقف سفلي في الشارع وانصحه / أجبره أن يحلق لحيته وأنيرتدي شئ مناسب يراعي التطور التاريخي للثياب في سنة 2010 ؟

هل يمكن للدولة اصدار قانون يمنع ارتداء الملابس التاريخية الا لممثلي المسرح والسينما اثناء التمثيل وليس في الشارع؟

هل من حقي أن اتدخل لتغيير افعالك عندما اراها منكر

افعال السلفيين بالنسبة لي هي ما تسميه انت المنكر، فهل من حقي التدخل كما تتدخلون؟

لماذا يحشر السلفيين انفسهم في خصوصيات الناس ؟ هل يظنون أنهم شعب الله المختار وان فكرهم هو الصحيح الذي يستحق التطبيق وفكر الآخرين اقل درجة ؟

هل التدخل في خصوصيات النس من الذوق ؟ألم اقل سابقا أن السلفية تشوه أخلاق الإنسان وتجعله يفعل القبح وهو يظن انه رقي وفضيلة؟

لا توجد شعوب مختارة ولا افكار مختارة ومن حق الجميع التواجد يا زميل.

عبد الله السلفى said...

Nicholas Urfe
حضرتك مين الى فهمك اننا بندخل فى خصوصيات الناس شفتنا بنخبط على بيوت الناس شقة شقة مسكينلهم جنازير احنا بننصح بس وانت لو مسلم وفتحت المصحف اقرا قوله تعالى (كنتم خير امة اخرجت للناس تامرون بالمعروف وتنهون عن المنكر
الله اعلم انت قريت الايه دى ولا لا
بس الحرية المطلقة الى انتو عايزينها مينفعش تكون فى بلد اسلامية زى مصر انتو عايزين ايه بقى انا اقولك
اولا دولة علمانية فصل الدين عن الدولة يعنى نبقى زى تونس و تركيا وده بعينكم عمره ما هيحصل باذن الله
ثانيا عايزين حرية صحافة مطلقة زى اقبال بركة وابراهيم عيسى وانيس منصور الى كل مقالتهم طعن فى الدين والسنة
ثالثا عيزين كمان تسمحوا بنشر التشيع والتصوف بحجة حب اهل البيت وطبعا حب اهل البيت على دماغنا لكن مش بالتمسح والذبح لغير الله والخزعبلات الى بيعملوها هل انا كداب ولا بقول الحق يا ريت ترد عليا

Unknown said...

ممكن افهم اللي بيتناقش مع عبد الله السفلي ده بيتناقش معاه ليه؟

والله انتوا اللي تستاهلوا

انا سايباه يفضفض ولو انا ما استحملتوش مين حيستحمله واهو كله بثوابه

لكن انتوا بتتناقشوا معاه على اساس انه انسان طبيعي عقله في راسه مش في كعب رجله يعني؟

طب اشربوا بقى

Nicholas Urfe said...
This comment has been removed by the author.
Nicholas Urfe said...

ها ؟ اسيبك تفضفض ولا تصحصح كده وتفوق شوية وتطلع من الي انتا فيه ده؟

عبدالله باشا ، مفروض مش تعيش جوه النموذج ( القالب ) الل انت بتفسر بيه الحاجات والمواقف والافكار وردود افعال الناس،

أنت مثلا من ضمن القالب بتاعك ان اي حد يعارضك هوه مش عارف المعلومات اللي هي عندك، طيب ، اقولك انا ، انا في فترة من الفترات كنت زيك كده ايام الجامعة ، ومعظم المثقفين او القراء العرب _ للعلم انا قراء ،،،مش مثقفين - وعيهم الاساسي الأول كان وعي ديني بطبيعة السياق المعرفي اللي احنا اتولدنا فيه وبننتمي ليه .

يعني مفروض تستنتج اني عارف كل كلامك وحججك ومنطلقاتك وكلام مشايخك بل ووضعك جوه البيت والشارع كمان

اطلع بره العلبة اللي انت حابس نفسك فيها..حاول مرة تقرى كتاب مخالف لافكارك الدينية وتكون محيد افكارك المسبقة وشايلها مؤقتا على جنب ، علشان تعرف تفهم الكاتب عايز ايه

..فكر شوية يا أخي !وبعدين ابقى سلفي زي ما انتا عايز

ربنا يوفقك

عبد الله السلفى said...

استاذه نواره
سؤال واحد انتى وابوكى واخدين دكتوراه فى الشتيمة وماجيستر فى السخرية ودبلومة فى المسخرة على خلق الله
عرفتى منين يا بروفسير نواره ان عقلى فى كعب رجلى هيا المناقشات على المدونة مؤشر للحكم على عقل انسان
ولا انتى بس مش فالحة غير تتمسخرى
فين بقى النقاش و الحوار ولا لازم اكون علمانى عشان تتناقشى معايا اقولك انا كمان مش عايز اتناقش معاكى انا عايز اتناقش مع ناس غيرك يكون افضل

عبد الله السلفى said...

استاذه نواره
سؤال واحد انتى وابوكى واخدين دكتوراه فى الشتيمة وماجيستر فى السخرية ودبلومة فى المسخرة على خلق الله
عرفتى منين يا بروفسير نواره ان عقلى فى كعب رجلى هيا المناقشات على المدونة مؤشر للحكم على عقل انسان
ولا انتى بس مش فالحة غير تتمسخرى
فين بقى النقاش و الحوار ولا لازم اكون علمانى عشان تتناقشى معايا اقولك انا كمان مش عايز اتناقش معاكى انا عايز اتناقش مع ناس غيرك يكون افضل

مخنوق كيك said...

بجد مدونة جامد كيك لحد اخر الشارع كده
احنا الحق يتقال شعبنا جميل . شعب بتاع نكته بيزعل علي كل حاجة
يعني مثلا اتضربنا في الاستاذ . اشطه يلا نزعق ونخبط برجلينا وندخل الكرامة الوطنية والمهلبية في الموضوع
موضوع كاميلينا يلا بينا نظيط
موضوع الواد بتاع اسكندريه اللي مات من التعذيب لووز اوي يلا بينا نطلع مظاهرات دا ابننا ومات شهيد واكيد قاعد في الجنه

شعبنا طيب اوي هيفضل يعترض علي اي حاجة سواء دين او كورة او سياسة لذلك احنا مش نافعين في حاجة ولا عمرنا هيكون لينا حساب عند الحكومة
عمرنا ما هنتقدم طول ما خوفنا علي حاجة واحده بس واهمال الباقي

قناة الناس احب القنوات لنفسي والشيوخ نحسبهم عند الله علي خير ومن افضل الناس ولكن ايه اللي هيحصل يعني لما القناة اتقفلت .؟ الناس هتنسي الدين ؟ ليه مختزلين الدين والفقة والاخلاق في قناة فضائية ؟ ليه محدش بيمسك كتاب ويقرا فيه في المواصلات زي اي حد محترم

بدل ما نتفرج علي القنوات دي ونطلع بالليل نقعد علي القهوة
ولا هي طاقة داخليه بتطلع علي مزاجك شويه علي ميلودي وشويه علي غيرها ؟؟؟

احنا لازم نفوق لاااااااازم نفوق
ولا اقولك ؟ سمعني اغنيه التنجيد