Saturday 9 October 2010

سيد البدوي يجتمع مع صحفيي الدستور

راح لهم بقى
قال لهم ابراهيم عيسى مش حيرجع عشان شتم رضا ادوارد في مكالمة هاتفية بالفاظ نابية وانا مش في حل اني اقول تفاصيلها فشادي عيسى قال له: ورضا ادوارد شتم ابراهيم عيسى بابوه
بصراحة اعصابي ارتاحت لما عرفت انه شتم رضا ادوارد بالفاظ نابية، ده سيد علي كان حيشتمه على الهوا بالفاظ نابية وهو لا له في الطور ولا في الطحين، وهو رضا ادوارد ده مش ملاحظ انه كل ما يكلم حد يستفزه ويخليه يشتمه؟ يعني معقولة كل الناس دي غلط وهو اللي صح؟
الحمد لله ان ابراهيم شتمه، اهو انا كده اعرف انام مرتاحة، عايز يشتمه بابوه ويسكت له؟
سيد البدوي قال لهم: اصل رضا ادوارد شهم وجدع بس لما بيغضب بيتصرف تصرفات غير مسئولة، هو قلبه ابيض بس عصبي!!!
فدعاء سلطان قالت له المواصفات دي لها توصيف واحد اقول هو ايه؟ قال لها لا ارجوك ما تقوليش، انا عارف
(هي كانت عايزة تقول له ده مجنون، والتاني عارف!)
المهم من هنا لهنا بيقول لهم اعملوا اللي انتوا عايزينه بس ابراهيم عيسى ما يرجعش!
دعاء سلطان قالت له: انت راضي عن الدستور اللي نزل؟ انا بطلت ادخل الدستور بيتي، وكنت سمعت اشاعة كده ان رضا ادوارد طالب من كل صحفي في الدستور انه ييجي بكرة معاه ولي امره وزمزمية.. قال؟
قام سيد البدوي قال: لها انت بتزعقي لي ليه؟ انا ما احبش حد يزعق لي!!!! (ايه الناس دي؟ احنا ربنا حدفهم علينا منين؟) وقال لها: انا مش راضي عن عدد الدستور بس انا اسمي لم يحترق فدعاء قالت له: اسمك احترق بمجرد وضعه على عدد جرنال زي ده
الغريبة بقى انه متمسك بايمن شرف اخر حاجة، وبرضه قال لهم اطلبوا اي حاجة غير ان ايمن شرف يمشي
فدعاء برضه قالت له: يعني كنا بنتفاوض على ان ابراهيم يرجع بقينا بنتفاوض على ان ايمن شرف يمشي؟ وبعدين حتعمل ايه مع الصحفيين الموجودين دول وهم مش عايزين ايمن شرف وسطهم؟ ومين حيبقى رئيس تحرير؟ انسى ابراهيم منصور، عشان هو مش حيبقى رئيس تحرير ولو رضي يشتغل معاك انا حاطلب منه الطلاق
قال لها: حيبقى فيه رئيس مجلس ادارة جديد ويبقى شخص محترم جدا بس مش حاقول اسمه
قالت له: مين؟ مفيد فوزي؟ هيهيهيهيهييييييييييييي
الا انا ملاحظة ان دعاء بس اللي بتتكلم وبتزعق له وهو ما يحبش حد يزعق له لان قلبه ضعيف وعيناه بتغرورق على طول ومش حيقضيها مشاوير رايح جاي على اسكندرية بقى عشان يريح احصابه، طب ما كانوا الباقيين يزعقوا له برضه ويغرورقوله عيناه، هو حيعمل فيهم ايه اكتر من اللي عمله فيهم؟
لا وبيقول لهم: حاولوا تحسنوا صورتي بقى وما تخلوش حد يشتمني على النت، ده رضا ادوارد هو اللي عمل كده مش انا
!!!!!!!!!!!!!!!!!!!!!!!!!!!!!!!!!
اييييييييه الناس دي؟ حد يقول لي الاي كيو بتاع الناس دي كام؟ أنا حاسة اني باتعامل مع نيرون وكاليجولا، واحد مجنون وعصبي وقلبه قلب خساية وواحد عمال يزنبق في صاحبه ويعيط، طب احنا ذنبنا ايه في حالة الهبل المعين دي؟

12 comments:

مواطن مصري said...

يا نوارة انتي لسة مصدقة

موضوع رضا دة رضا اداة بس

الموضوع من فوق و ابراهيم

كويس انة عايش أحمدي ربنا

Kalimalhus said...

مع إنى مستمتع بسردك للكوميديا الفارس دى .. بس لما الموضوع يقلب لتهريج بالشكل ده فيبقى مش باينلها هتنتهى على خير..

على أى حال .. أنا ما يهمنيش إذا كان محررى الدستور هياكلوا عيش فى جرنال أصحابه ممكن يصرفوا عليه بإعلانات شركاتهم و شركات إصحابهم .. يعنى اللى بياكلوا عيش فى البلد بالطريقة دى أكيد مش أحسن منهم و أكيد الواحد لا يلام إذا إختار ياكل عيش بدل ما يعض فى الأرض و دى للأسف شكلها هى البدائل المتاحة..

الحمدلله على كل حال و كل جرنال و إنت طيبة ..

سواح في ملك اللــــــــــــــــــه- said...

فرق---تسد

أحرار مصر said...

الله يكون فى عونكم يا نوارة. معقولة السيد البدوى اللى قلنا عنه وعن انتخابات الوفد قمة فى النزاهة والديمقراطية يعمل البلاوى دى؟!
ومعقولة يكون خسيس لدرجة انه يتفق مع الحكومة على الاطاحة بابراهيم عيسى عشان كام مقعد فى مجلس الشعب؟!
حسبنا الله ونعم الوكيل

hala said...

إلى مواطن مصري
انا بجد احترم آرائك وانا متأكده انك مؤمن تماماً باللي نتقوله
وانت فعلا على حق في اي إعتراض
بس على ما اعتقد ما كانش لازم يكون خروجك من الدستور يظهر بان رح يقطع عيشك ويظهر مؤيدييك بانهم خسروا الوطن دون رجعه
لالالالالالا ابداًهذه قطره من غيث اذا عايز تكمل المشوار أكيد انت عارف ان طريق الحريه لسه طويييييييييل

hala said...

انا شايفه انه السيد البلوي مش سائل لا بالصحفيين ولا بالجريده
المهم عنده هي الاوامر اللي صدرت من اسياده اتنفذت

hala said...

وبعدين؟؟؟؟؟
شو رح يقرروا الصحافيين اللي مش راضيين برئيس تحرير جديد
واللي استقالوا واللي تضامنهم ما عملش حاجه
بجد اللي فوق اقوياء ومش رح تقدروا عليهم

abdul hamid said...

البدوى فعلا انتحر سياسيا - ونا لو منه انتحر من الأحراج

abdul hamid said...

البدوى فعلا انتحر سياسيا - ونا لو منه انتحر من الأحراج

من مغربي said...

اليوم السابع تنشر : --انفراج أزمة جريدة "الدستور".. الصحفيون يفضون اعتصامهم بعد موافقة "البدوى" على مطالبهم.. وتوقيع الاتفاق فى نقابة الصحفيين اليوم.. واستحالة عودة "عيسى" لرئاسة التحرير --

أشك في دلك خصوصا أنني لم أرى في الصور عناصر متل إبراهيم منصور أو جمال فهمي، و لكن لو حدت دلك فهو شيئ محزن .... أرى أن تُصروا على بقاء إبراهيم كرئيس تحرير بشكل مباشر، و هدا أمر ليس فيه تعلق بشخص، لأن إبراهيم عيسى يشكل رمز مرحلة مهمة للصحافة المصرية و لا يمكن أن نبعده من ما أسس و صنع، بعملية سطوة حقيرة متل هده، و إن كنت متأكد أن ذكاء إبراهيم عيسى قادر على إعادته بشكل أقوى و أعمق ...

faisal said...

مش عايز حد يشتمه ع النت...؟
.
.
.
..هو مين بيشتمه ع النت غيرك يا نوارة..؟ :D

حسن على said...

السيد البدوى شحاتة ورضا ادوار فى قمة البجاحة والتناحة وقلة الاصل,الصيدلى اللى يشترى جريدة ليفصل سبب نجاحها وشهرتها -اقصد حرية التعبير-شخص رخيص ومأجور وسبة او وصمة عار لأى مجموعة ينتسب اليها- سواء كانو فى المهنة او فى الحزب