Tuesday 1 June 2010

فضيحة لوسائل الاعلام العالمية

البي بي سي، والاندبندنت، والسي ان ان متبنيين موقف وسائل الاعلام الاسرائيلية واللي هي يعني اعلام متخلف الى ابعد الحدود
كاتبين يقولوا الضحايا ضربوا الكوماندوز واعتدوا عليهم
وعشان تعرفوا ان الشعوب زي ما احمد شوقي قال عليهم في "مصرع كيلوباترا": ياله من ببغاء عقله في اذنيه
الناس اللي بتعلق على المواقع دي عمالة تقول وتكرر وراهم الكلام
الحمد لله يارب الحمد لله يارب، عشان اللي شمتوا فينا لما كنا بنكرر ورا وسائل الاعلام من غير ما نعقل الكلام
اهو كل الناس كده اهو
فيه حاجة اسمها قوات كوماندوز خاصة تعمل انزال على سفينة مساعدات وتقول اعتدوا على قوات الكوماندوز؟
ايه الجملة اساسا؟ هم مش مكسوفين يكتبوا الكلام ده؟ واسرائيل دي مش مكسوفة تنزل فيديوهات للعيال وهم بيحدفوها بالنبل ويضربوها بالعصي وهم نازلين عليهم في مياه دولية؟ امال يعملوا ايه؟
طب ما احنا لما الامن بيهجم علينا بنضربه
يقوموا يموتونا؟
واذا كانت البي بي سي والسي ان ان بجلالة قدرها والاندبندنت شايفين ان ضرب الكوماندوز المسلح اللي هجم على الناس بعد ما اخترق مياه دولية مبرر كافي لقتل عشرين شخص منهم خمس ستات
على كده ده نجاد ملاك لا ينقصه الجناحين كمان
ماهو كانت حجته انهم حرقوا البلد وكسروها وضربوا الباسيج وقتلوا عشرين واحد منهم كمان
طب ده انا اللي نجاد صعبان عليا مش شايفة ان ده عذر ولا مبرر عشان الباسيج تقتل 72 متظاهر غير مسلحين
انتوا بتلخبطونا ليه؟ يعني ضرب القوات مبرر للقتل يا سي ان ان انت والبي بي سي؟
طيب قولوا كده بقى
ومن حق القوات انها تخترق مياه دولية وهي مسلحة بدعوى انها بتحمي نفسها؟
طب قولوا كده بقى
اتكل على الله يا نجاد
خد لك طيارة وفي وسط البحر كده ووقف مركب امريكية حاملة اسلحة لاسرائيل واهي مركب مسلحة بقى مش مدنية وموت اللي عليها
واياك حد يفتح بقه
وللا اخترق المياه الدولية واقطع الشبكة اللي عاملها اوباما للمعارضة ولو حد اعترضك اقتله واياك حد يفتح بقه
واحنا بقى ما نعرفش ننزل في الشارع عشان اي ظابط حيتبلى علينا ويقول ضربناه ويموتنا في الشارع
اتفو عليكوا وعلى اشكالكوا القذرة
على الله بقى اسمع حد بيتكلم عن اللوبينج في الخارج
على الله مالوش عندي غير اقدم شبشب يتنسل على دماغه

20 comments:

utopia said...

لو لم اكن مصريا لوددت ان اكون تركيا
اردوغان رفع راس التراكوة لفوق واداهم للصهاينة جوز وفرد

Unknown said...

لا

ماحدش يقول كده علينا

لو احنا ناس وحشة ما كانتش امريكا دفعت الفلوس دي كلها لمبارك عشان يفضل معتقلنا

احنا بس بختنا مايل وسبع صنايع والبخت ضايع

sal said...

اتفو عليهم وعلى اشكالهم القذرة

Dr90 said...

utopia
و هيا تركيا هترضى
احنا اللي جايبين الوكسة لبلدنا
العيب فينا مش في البلكيد
لكل اللي بيقول نفي ابقى تر
عايز \تبقى تركي خليك تركي
هتخربهاو ترجع تقول لو لم اكن تركيا لوددت ان اكون .....
و هكذا

soreal said...

شوفي بالله :


http://www.youtube.com/watch?v=sMzc1N1Cx3s

هذا و تركيا حليفتهم ...
اللي عندو أمل في الإسرائيليين ... ينطم و يسكت....
اللي عندو شرف و عقل فيهم ترك اسرائيل من زمان .

utopia said...

نوارة انا والله بحب بلدى وهوده اللى قاهرنى ,احنا مش اقل من التراكوة بس مافيش عندنا اردوغان
كل المعارضين بيلعبوا لمصلحتهم وعلشان كده الناس مابتشاركش وحتى البرادعى اللى الناس صدقته فى الاول طلعت مش فاضيلنا
وعايز يشتغل قائد فى وقت الفراغوالناس زهقت منهة خلاص
ماتكلميلنا اردوغان يجيلنا شهرين وياخد عرقه
:D
Dr90 :
بلاش جلد للذات كفاية العيب مش فينا
احنا زى ماقالت نوارة زى الفل
العيب فى اللى حلكمنا بالعافية وحابسينا والنخبة بتاعتنا بتدور على مصالحها واياكش يسولع المصريين
ارجوكوا كفاية لوم للمصريين احنا شعب
متبهدل والله

أنا - الريس said...

يا حلاوة شمسنا ..
وخفة دم حكام اهلنا
علي رأي خلة القله
ناس معندهومش دم

بي بي سي و سي ان ان وحتي الجزيرة والعربية
قنوات موجهه
قنوات موجهة بتخدم أجندا

صحصحوا

تكرم يا اردوغان يا رافع راس الضمير الاسلامي والضمير المحترم .. مش موطي زي ناس

سامي said...

حسنى مبارك فتح المعبر وشكله حيطول الفتحة !!

Me7'o said...

هى مصر عملت إيه للاتنين نواب مجلس الشعب اللى كانوا مع أسطول الحرية

ما سألتش عليهم طيب
ولا هما يستاهلوا كده
علشان اللى ما يسمعش كلمة ماما تقولها

تحياتى

Unknown said...

اللى قتل الأسري فى 67
هو هو نفس اللى قتل الجنود فى 1991

مدونة رائعة تتحدث عن ما حدث قى 1991
اكبر مذبحة فى تاريخ العالم للجنود
و مجرمي الحرب الأمريكان فى هذا الوقت

http://ishtar-enana.blogspot.com/2010/04/1.html

محمد صبرى said...

القوى المنتصر..يمتلك الحق دائما ..دا منطق العالم , أغلب مراحل التاريخ ان ماكنش كلها

...

utopia

فعلا هى مشكلة زعامة

و المسألة مش عقم أصاب 80 مليون و منعهم عن انجاب زعامة

المشكلة انه فيه عملية تتبع على أعلى درجات الدقة لكل مشاريع الزعامة و إجهاضها قبل وجودها أساسا , المشكلة انه فيه عملية تفتيت للوعى الشعبي و تمييع للعقل الجمعى , و بالتالى منع امكانية التفاف الجماهير بشكل كاف حول اى فكرة و بالتالى حول اى انسان

........

فى حاجة كمان

الزعامات و طبيعتها -فى البيئات اللى لازل فيها امكانية نسبية لخلق زعامة- مرتبط وجودها و طبيعتها بخصوصية كل بيئة و ظروفها

يعنى مثلا أردوغان جه فى دولة ممكن فيها انك تلعب سياسة , و تصل لشيء حتى فى الوقت اللى مخالفى قناعاتك مسيطرين فيه على مراكز مهمة فى الدولة ..عشان كده بقى فيه اردوغان , و لو كان موجود فى اى دولة بوليسية غير ديموقراطية استحالة كان يصل لشيء
...

مثال آخر

حسن نصر الله بزغ نجمه فى وجود احتلال مباشر لقوات أجنبية , فطبيعى انه مثله ممن يتمتع بكاريزما خاصة و يمتلك رؤية أبعد ما تكون عن القصور الطائفى , مع توظيف راق لمعانى الدين و الوطن و القومية بتناغم ملفت يبقى مركز تلتف حولة الجماهير

و من خلال تأكيده مرة بعد مرة على مصداقية وعوده قدر الراجل انه يحفظ للتوجه المقاوم مكانة عصية على التجاهل أو التعدى عليها , قبل ما يحكم الاحتلال غير المباشر سيطرته من خلال عملائه اللى كان دايما منتبه جدا ليهم و قدير جدا على التعامل معاهم

شمس العصارى said...

وانتقد فيسك ردود أفعال قادة الغرب على مذبحة أمس، فالأمين العام للأمم المتحدة بان كي مون كانت تصريحاته "سخيفة"، وتصريحات البيت الأبيض كانت "مثيرة للشفقة"، أما توني بلير فاكتفى بالتعبير عن "أسفه الشديد" فقط لا غير!

وأشار الكاتب إلى حقيقة أن النشطاء المدنيين الآن هم الذين يتخذون القرارات التي فشل في اتخاذها القادة الكبار. النشطاء المدنيون هم الذين يصنعون الأحداث، بينما السياسيون الغرب أجبن من أن يفعلوا شيئا لإنقاذ أرواح الأبرياء.

إن الأتراك أيضا أوروبيون، وكان ينبغي على القادة الأوروبيين أن يفعلوا شيئا لهؤلاء المواطنين الأبرياء الذين قتلتهم نيران دولة شرق أوسطية هي إسرائيل، ولو كان هؤلاء من أي جنسية أوروبية أخرى لاندلع الغضب في أنحاء العالم!

وقال فيسك إن ما حدث يدل على جهل إسرائيل وعدم اهتمام الإسرائيليين بأي عهد. إذ لا ينبغي أن نتجاهل أن تركيا كانت من أقرب الحلفاء لإسرائيل، ولم يكن الأتراك ليتوقعوا بأي حال من الأحوال الهجوم الإسرائيلي الضاري على مواطنيها المسالمين.
http://www.shorouknews.com/ContentData.aspx?id=239200

كريم البحيرى said...

new video about ISRAEL attacks Flotilla
فيديو جديد يوضح الهجوم الاسرائيلى على اسطول الحرية
LA VERITE CRUE EN DIRECT DU MARMARA TURQUE
و
مختل "القبطية الأمريكية" يقدم التحية لإسرائيل على "مذبحة أسطول الحرية"

التفاصيل على مدونة عمال مصر على اللنك التالى

www.egyworkers.blogspot.com

dr.lecter said...

امال انتم عايزينهم يقولوا ايه

مش كفايه مبارك يقولك مكانش فيه داعي للعنف المفرط
يعني الكل مش معترض علي العنف بس بلاش بافراط علشان محدش يتعور

حلقه اببراهيم عيسي النهارده كانت جامده

مش فاهمه said...

معلقتيش على خير فتح معبر رفح ليه يا نوارة انتى عارفه ده معناه ايه معناه اننا ممكن نفتحه و نقفله وقت ما احنا عايزين

Unknown said...

هههههههههههههههه

والله العظيم يا بنتي اول ما سمعت الخبر قلت لهم على التويتر: ما شافهومش وهم بيسرقوا شافوهم وهم بيتحاسبوا

مصر فضحت نفسها بعد ما بقالها تلات سنين عمالة تقول: والله ما قافلاه، ماهو مفتوح اهو، وبعدين هو بايدينا؟ مش احنا اللي محاصرين غزة

وبعدين ياختي في ثانية راحت فاتحة المعبر

هههههههههههه

بس بصراحة ما رضتش اتكلم احسن يحرنوا ويقولوا انتوا مش عاجبكوا حاجة نقفله مش عاجبكوا نفتحه مش عاجبكوا طب هاه ويروحوا قافلينه

حرام الناس مالهاش ذنب

محمد صبرى said...

عادى ,فتح المعبر -اللى دايما و يا سبحان الله كانوا بيقولوا عليه مفتوح-دا بس تحرك تكتيكى عشان تخفيف الضغط على اسرائيل الايام دى , و غالبا دا لاستقبال راشيل كوري تحديدا فى موانى مصر لمنع حدوث مواجهة مرة تانية فى التوقيت الحرج دا بينها و بين اسرائيل

kholy said...

ابعتي المقارنة دي لروبرت فيسك عشان ينشره في صحفهم و لو إنه هو شخصيا مشلول من ازدواجية المعايير بتاعة الغرب

سواح في ملك اللــــــــــــــــــه- said...

بسم الله الرحمن الرحيم واذا اردنا ان نهلك قرية امرنا مترفيها ففسقوا فيها فحق عليهم القول فدمرناها تدمير صدق الله العظيم

سواح في ملك اللــــــــــــــــــه- said...

معبر رفح مهي اسرائيل بتتلكك بتقول في ارهاب في سينا عشان نقفله