Tuesday 15 June 2010

جنازة حاشدة للشهيد خالد سعيد

وان شاء الله شهيد وعلى مسئوليتي، قال حشاش قال
ده على اساس ان ظباط الداخلية ما بيفوتوش فرض؟ واللي قتله بالطريقة دي بقى كان بيحمي المجتمع من الحشاشين؟ ده انا لما شفت جثته افتكرته من الفلسطينيين اللي ماتوا بالفسفور، دي ايدين بني ادمين عادية اللي عملت فيه كده؟ 
فيه جريمة ابشع من جريمة قتل خالد سعيد بالطريقة دي، جريمة تبرير الجريمة
محاولة اقناع الناس بانه يستاهل يموت كده عشان كان مجرم والصاق التهم بيه، مش بس تشويه لانسان بريء مات بالظلم
ده تشويه لنفسية الناس، لان الناس حتبقى على فريقين، يا اما يقولوا حتى لو مجرم ما يستاهلش، يا اما ناس تقول ماهو كان مجرم وما يستاهلش نزعل عليه
دي جريمة.. دي جريمة في حق المجتمع وحق الانسانية وبقالهم سنين بيعملوا فينا كده لحد ما تحولنا الى شعب من الحلاليف ماعندوش دم ولا احساس ولا مشاعر كله بسببهم كله بسببهم
كله بسببهم
عمرنا ما كنا كده عمرنا ما كنا بالقسوة دي
بس اعتماد تبرير الجرائم دي والزن على دماغ الناس بيها ومحاولة انهم يمنطقوا كل السفالات اللي بيعملوها هو اللي وصل الناس انها تبقى غليظة الحس وقاسية عمالين يغذوا الناس بحقارة حقارة حقارة عشان ينزعوا من قلوبنا الرحمة ويحولونا لكائنات حقيرة زيهم
للاسف مافيش قانون يعاقب على جريمة تبرير الجريمة
بس انا بقى شايفة ان تبرير الجريمة اوحش من الجريمة نفسها ويستحق عقوبة ضعف العقوبة على الجريمة
لو حد من صحابي بقى رئيس جمهورية حاخليه يطلع قانون على الموضوع ده
جنازة الشهيد خالد سعيد.. اطلبوا له الرحمة:

24 comments:

Muhammad Al-Ansary (@iOrto) said...

هــانت يا نوارة

والله العظيم هانت

وإن شاء الله قرب جداّ جداً اليوم اللي هنعلق فيه على الشجر فتوات التعذيب وبهوات الفساد ومحمد علي بعرور والمراسل بتاعه في اسكندرية، وقاذورات صحافة النظام

والله العظيم أنا متفائل بشدة

الأنظمة لما بتقرب تموت بتعمل كده

تحيـــــــــــــــاتي

أنا - الريس said...

ربنا يرحمه
وياخد اللي قتله
بالفعل أو السكوت علي القتله

هرطقة said...

أنا حارق دمى جدا بيان الداخلية
وكل تفكيرى ان الكائن اللى طلع البيان ده لازم يتحاكم
وكل ال "قيادات" اللى بتضغط وتبرر لازم يتحاكموا
مش فى تهمة التواطؤ
مش فى التستر على مجرم
مش فى كتم الشهادة
بجد حاجة تحرق الدم
والأشكال دى كلها لازم نقتص منها

ahmedyosry21 said...

كل حاجة فوق حدود الاحتمال

مهندسة كريمة said...

اللهم ارحمه رحمةً واسعة
اللهم إلهم أهله الصبر و السكينة
اللهم انتقم ممن ظلم خالد و هو حي , و مازال ينتقم منه حتى بعد موته

اللهم لا تسلط هؤلاء الظلمة على أحدٍ بعده
و إلهم المخلصين "و إجعلنا منهم و معهم " العمل على الأخذ بحقه

312asdf said...

لأ, و لما طلعت شهادة أداء الخدمة العسكرية
يقولولك شوفتوا ده كانت درجة أخلاقه في الجيش رديئة.

قولك
"ده تشويه لنفسية الناس، لان الناس حتبقى على فريقين، يا اما يقولوا حتى لو مجرم ما يستاهلش"
من يقل هذا ليس مشوه فطريا بل الفطرة السليمة تقول أن الجزاء و تحديده بيد قاضي محايد و حكيم و عالم.
الفريق الثاني غليظ القلب لا يعرف العدل و لا يستحق الرحمة, يكيل بمكيالين لأنه لو وضع ابنه في هذا الموقف لم يكن لينطق بهذا الكلام
لذلك لو لاحظتي كل دعوات الناس على من يقول أن خالد يستحق ما حدث له لأنه مسجل خطر و حشاش, كانوا يدعون عليهم أن يروا مثل ما حدث لخالد في أنفسهم و أهليهم

نعيب زماننا

312asdf said...

بالمناسبة للتوضيح فقط, هذه لم تكن صلاة الجنازة بل صلاة الغائب على روحه الطاهرة.

نعيب زماننا

ahmed said...

شوفي دي
http://sphotos.ak.fbcdn.net/hphotos-ak-ash1/hs529.ash1/31048_399627482201_523867201_4661084_5159012_n.jpg

suidreams said...
This comment has been removed by the author.
إبراهيم أبوسيف said...

أنا بقى اللي حارق دمي منى الشاذلي في العاشرة مساء والمصري اليوم يعني تحسي أن اللي بيتكلم أو بيكتب ضابط أمن دولة وحقير كمان


الصراحة لو الضابط بتاع القسم ده والمخبرين اللي عملوا كده اتقتلوا ماحد من الظباط هايكررها تاني
وبلاش بقى نقعد نستنى القضاء والكلام الفاضي ده دول بيلعبوا بالقوانين لعب

Wild at Heart said...

تعرفي؟ زي ما الأستاذ علاء الأسواني كتب قبل كده في ظباط في الداخلية مابيفوتوش فرض فعلاً، هتلاقي مواظب على الصلاة وبرضو بيضرب الناس ويشتمهم ويطلع سلسفين أبوهم، تناقض عجيب.

شمس العصارى said...

الله يرحمه
طريقى البدو هى احسن طريقة فى التعامل مع الامن و الداخلية

utopia said...

Ahmed :
ده الكليب اتفرج عليه احسن من الصورة

http://www.youtube.com/watch?v=iiS2v75jAP0&feature=player_embedded%D8%B1%D8%AC%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D8%A7%D9%84
يا ريت يا نوارة تحطى الكليب ده هنا علشان نتفرج على الفن الاصيل
رجعونا لايام الفن الاصيل سامية جمال
وفيفى عبده
على فكرة اللى بيحصل الايام دى شبيه قوى باللى حصل اخر ايام السادات
قولوا يارب

الخوجة said...


خالد محمد سعيد - دمك مش رخيص - دمى فى رقبتكم يامصريين


وللمرة المليون كلامك كله طلع صح عن المصرى اليوم

العلم نور said...

رحمه الله وحسبنا الله ونعم الوكيل فقد طفح كيل الظلم


أرجوا المساهمة في دعم الحملة لو تكرمتم

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي أعقل مجنونة في الوجود .. ويكتبون فوقها ..

(حملة الجـسد الواحـد)

رابط المدونة

http://dndanh111.blogspot.com/2010/06/blog-post_14.html
جعله الله في ميزان حسانتكم .. آمين

Anonymous said...

لا حول و لاقوة ألا بالله العلي العظيم ، أنا من يوم الحادث المشئوم و أنا دمى فاير زي كل الناس . الأباء و الأمهات زعلانين على شباب المسكين المغدور و حاطوا نفسهم مكان أسرته كان هيحصلهم أيه لما يسمعوا أنا أبنهم مات مقتول غدر و خيانة و بلطجة ، و الشباب كمان حاطوا نفسهم مكانه ما حدش يرضى باللى حصل مع المرحوم يتكرر معاه . بس و الله لولا الفيس بووك و التويتر لكانت الداخلية طرمخت على الموضوع و راح زي مع راح كتير غيره هدر على يد البلطجية دول . بس عندى سؤال غريب شوية : المخبرين و الضباط دول بيجبوا القوة و الفجر ده منين ؟ ، اللى أعرفه أن اللى بيعيش من حرام ربنا بيهد حيله ألا دول كل مدى فى فجر أشد و بقى علنى و قدام الناس من غير ما يستخبوا زي زمان
ربنا يرحمه برحمته و يسكنه فسيج جناته ، و يصبر أهله و يعنيهم على فراقه
نور على .

lastcrazyboys said...

بس بقى عشــان اللي انتــوا عملتــوه في غــزة ده كــان عييييب ..وما يصحــش

وده طبعـاً مش كلامي ..ده كلام "منســوب " لوزارة الأوقـاف المصــرية العريقة ..يعني رسمي فهمي

الأوقــاف المصــريـة:اسرائيل جارة لا يجوز الحرب و الاعتداء عليها

وعلى الله تقولولي اللي انتوا عملتوه ده ما يعتبرش ..اعتداء وترويع

Om Osama said...

الله يرحمه ويحسن اليه ويصبر أهله على ما ابتلاهم يعني كل انسان له قلب يجعل هذا الشاب في مقام ابنه هل يقبل هذا حتى ولو كان الشاب على خطأ هناك شيء ما يسمى انسانية ..
لا حول ولا قوة إلا بالله العلي العظيم

وحسبنا الله ونعم الوكيل على كل من امتدت يده عليه ..

مصيبة كبيرة هذه أن يتحول من يحمي الشعب لسيف مسلط على رقاب الشعب ..

عموماً بيضل خلاص الشعوب لا يكون إلا بأيدي الشعوب ..

Unknown said...

ربنا يرحمه
هو ان شاء الله أكيد شهيد.أنا من أسكندريةو قسم سيدي جابر و له سوابق في تلفيق التهم للناس .
وأخص بالذكر هنا الظابط محمد عثمان التابع لقسم سيدي جابر.الظابط ده لفق تهمة لخالي..نوارة القصة الأنا حقولها حصلت والله العظيم با نوارةوحصلت من أربع سنين.عائلة أمي لهم بيت عائلة في منطقة رشدي قريب نسبيا من قصر هشام طلعت مصطفي.ولأن المكان امام البيت هادي و مظلم.فكان دائما يقف شباب فرافير في عربيات غالية و معاهم بنات و مخدرات المهم العائلة عندي كانوا بيزعقوا للشباب دول.وفي مرة واحد من العائلة أتخانق معاهم جامد.....المهم العائلة أتفجأت في نفس اليوم ده بليل بمجموعة من الشباب الفرافير دول و معاهم العصي البتطلق الصدمات الكهربيةو عصي البيسبول و بيتهجموا علي البيت و اتجمعوا علي ابن خال ليا و اقعدوا يضربوا في بس لما باقي العائلة اتجمعوا اتخانقوا معاهم في واحد اتصاب منهم في رأسه أصابة خفيفة..هما طلبوابوليس النجدة ولم يحضروا.العائلة عندنا مهتموش يعملوا محضر لأن في نظرهم شباب صغير و فرافير. وطبعا كانوا غلطنين...
اليوم البعديه الضابط محمد عثمان جالهم البيت و طلب خالي و قالوا احنا عايزينك في حاجة بسيطة .عشان نحلها ودي..خالو بحسن نية راح معه بدون أذن نيابة ودي كانت غلطة كبيرة..
المفاجاة أو المصيبة أن الولد الذي أصيب طلع أبن هشام طلعت مصطفي..والضابط محمد عثمان لفق محضر لخالي و قال جابه من الشارع و هو بيحاول الهرب و انه قاوم الشرطةو أنه اعترف بالتعدي علي ابن هشام طلعت مصطفي.....و...و ...المهم نيم خالو في الحجز في قسم سيدي جابر لمدة يوم بس الحمد الله قريبنا الشاغلين في النيابة و الشرطة خرجوا خالوا من الحجز و صرفوه من سراي النيابة ..بس المحضر اتحول لقضية..المهم حاولوا يتصاحوا مع عائلة هشام طلعت مصطفي طبعا اتكبروا.اتكبروا وهما المعتدين أصلا الولد أتصاب وهوا بيهاجم ناس في بيتهم هو وصحابوا..بس ربنا كبير الولد ابن هشام طلعت مصطفي عمل مصيبةتانية و خبط واحد بعربيته علي كورنيش البحر عشان كدا ريضيوا بتصالحواوتنازلوا علي القضية..
عشان كدا أن متأكدة أن خالد سعيد بريء وانهم فعلا لفقولوا التهم دهي وانهم فعلا قتلوا..زي ما أنا متاكدة أن هشام طلعت مصطفي قتل سوزان تميم..الحصل ده والله العظيم حقيقي.. وأكيد في ناس كتير أتظلمت من قسم سيدي جابر و ظباطه ربنا ينتقم منهم منهم هما وكل الظباط الفاسدين في مصر

dr.lecter said...

اختي جاوز الظالمون المدي

كلنا خالد كلنا حصلنا اللي حصل له واللي اصابه يهمنا
والله هانت خلاص
الكرسي السوس بينخر فيه والجسم ميت من زمان ومسيره يقع

احمد خليل said...

نفضحهم احنا الاكتر على الانترنت نكتب فوائم باسماهم ونجرسهم .اعتقد بهمهم شكلهم امام اطفالهم

Unknown said...

Nawara, is it true there was another man who lost his life because of torture at Madinat Nasr Police station this week? If so, why isnt any one talking about him and supporting his family too?
is it true that the journalist who wrote that awful Al Masry Al Youm article is the sister of the police officer who was in the car that dumped Khaled's body? Nawara, I hope you or any of your journalist friends find out the truth and let us know.
Also, I sure hope someone from Khaled's family will sue that person from El Gomhoryia along with Khairy Ramadan. Its time we Egyptians clean up the society, we've been far too forgiving for so long

الخوجة said...

رد
الخوجة
على محمد ابراهيم
رئيس تحرير الجمهورية
فيما كتبه

خالد محمد سعيد - دمك مش رخيص - دمى فى رقبتكم يامصريين

------
نشر موقع مصراوى الاتى:
صحيفة حكومية تصف خالد سعيد
قتيل الأسكندرية
(شهيد البانجو)
استكمل محمد علي ابراهيم الحديث في مقاله عن قتيل الاسكندرية قائلاً ""مدمن وسوابق سرقة وسلاح أبيض وتحرش جنسي وهروب من التجنيد أصبح فجأة "ضحية" الداخلية. صحيح أننا لا تعجبنا الحكومة في تصرفات عديدة. لكن هذا ليس معناه أن نضع صورة "القتيل" بعد أن قام الطب الشرعي بتشريحه علي أنها صورة له وهو تحت التعذيب! "

وأكد إبراهيم في مقاله أن الربط بين قانون "الطوارئ" ومقتل "خالد سعيد"، ربط ظالم.

اولا استاذ محمد ابراهيم

مفروض كرئيس تحرير جريدة قومية

ان لاتدافع عن الحكومة بالباطل

مرتبك من فلوس مين

من المضلل

من تقصد

اتفضل


ماهذة اليست شهادة تأدية الخدمة العسكرية

من المضلل نحن ام من
وبعدين المتهم برىء حتى تثبت ادانته
من اعطى المخبرين
ان يتصرفا معه
كما اشارت الصحف والمواقع
ليس من حقك او حق اى فرد ان يهين فرد او اى فرد مصرى تحت اى مسمى
أسألك بالله
عمن تدافع
اقرأ التقرير فوق امامك فور حدوث الحادث
فورا
تم عمل تقرير وه قولك مجافى للحقيقة
للاسف
ستسأل أمام الله عز وجل عما قلت وعما تقول
وانا شخصيا كفرد من الشعب المصرى لن أسامحك فى مليم من مرتبك
بعد قولك هذا
أحسن ليك أعتزل وأجلس فى بيتك
لن تنفعك الحكومة أو تنفع عيالك
هل سيدافعون عنك أمام الله
عما قلت
الكلام نوعين استاذ محمد ابراهيم
يأما لك يأما عليك
صنف كلامك.... او مانقل على انه كلامك
حسبنا الله ونعم الوكيل فيك
وفى كل من استلم راتب من دم الشعب اللى مش لاقى ثمن العلاج
كله سلف ودين والديان لايموت
وأعلم من عير مؤمن بذنب ارتكبه لم يمت من الدنيا حتى يرتكبه
ان شاء الله تدور عليك الدوائر
شوف الصورة عندك فوق
هل ترضاة
لفرد من عائلتك
بدلا من ان تطالبهم بالقصاص العادل
ماهو لو انته فى دولة زى السعودية
من قتل يقتل مهما كانت الاسباب
دم هذا القتيل فى رقبة من
ان شاء الله بكلامك هذا او بالاصح بالكلام المنقول يكون عليك جزء من دم القتيل ان صح
ماقيل ونقل عنك
منك لله
انت وكل ظالم
مفترى تحسب ان عملك كرئيس تحرير يعصمك من الله
هات دليل يعطيك الحق فى ماقلت عن هذا الشاب
هات دليل من انك حر ان تقول على الناس ماتريد لأنك رئيس تحرير
اللهم ان كان هذا الرجل قال هذا الكلام على الشاب المقتول خالد سعيد بدون وجه حق فأعطة مايستحق من عندك
حسبنا الله ونعم الوكيل فى كل من هو على شاكلتك
-------------------

خالد محمد سعيد - دمك مش رخيص - دمى فى رقبتكم يامصريين

احمد سعيد said...

متخافيش
اوعدك باذن الله هطلع القانون دة فى اول اسبوع
:)