Sunday 6 June 2010

طب انا اعمل فيكوا ايه؟ ما قلت لكوا ما تشتغلوش في المصري اليوم

ما انا عارفة انهم فوق ان لهم اجندة معينة تبع اللي بيدفع قلالات الذوق وجلياطين وشبعة من بعد جوعة
ما قلت لكوا انا الكلام ده 
حسام الحملاوي قدم استقالته من المصري اليوم بعد ما عمل لهم موقع المصري اليوم الانجليزي من اول: استعنا ع الشقا بالله لحد ما بقت الناس تقرا النسخة الانجليزي وما تقراش العربي عشان النسخة الانجليزي مهنية اكتر
الشهادة لله اول ما عرفت ان حسام استقال خمنت انهم عملوا معاه اللي عملوه مع امي، يعني اتدخلوا في شغله او زي ما عملوا مع امي ما نشروش مقالها تيجي تتصل باي حد ما يردش عليها لدرجة السويتش يقول لها الناس كلها مشيت :)) كأنها رافعة عليهم قضية نفقة
وبصراحة بقى سكت زي ما سكت على اللي حصل مع امي عشان انا شايفاهم يستاهلوا، ما ده صلاح دياب، وكولن باول حاطط لهم وديعة، وكل شوية يغيروا في سياسة الجرنال على حسب اللي بينقطهم، واللي بتعملوه ده غلط
مثلا امبارح ام زينب قالت كلمة مهمة قوي يا ريت الناس النضيفة تحطها حلقة في ودنها: المصري اليوم كويسة، والاستاذة بتكتب فيها، لو ما كانتش تعرف انهم ناس نضيفة ما كانتش كتبت عندهم
عرفتوا بقى؟ عرفتوا بقى نظرية: مش مهم باكتب فين المهم باكتب ايه.. دي نظرية فاشلة؟ انتوا بتدوا سمعة كويسة لناس ما تستاهلهاش
وفضلت ساكتة، لحد ما قلت يا بت خشي كده اقري نص استقالة حسام الحملاوي اللي ناشرها على المدونة بتاعته
يا حوووومتيييييييي
حسام الحملاوي يتعمل فيه كده؟ وياكلوا فلوس الناس؟ وانا عايشة؟ ومحررتين بنات ينطردوا ويتشتموا قدام الناس من مجدي الجلاد؟  بيشتم المحررين؟ بيشتم؟
لا كده شبعة من بعد جوعة اخر حاجة
فضة المعداوي يعني: ولا يا حمو التمساحة يالا 
اللنك اللي فوق ده فيه استقالة حسام واستقالة لينا اللي انطردت من الاجتماع
وتاني مرة ما عدتوش تشتغلوا مع الناس دي بقى انتوا بتعملوا في نفسكوا كده ليه؟ تحرقوا دمكوا وتنضفوا ناس ما تستاهلش حد ينضفها

6 comments:

lastcrazyboys said...

المصــري اليــــوم ..ودستـــور ابراهيم عيســى وجهــان لعملــة واحـــدة

مع الفــارق إن المصــري اليـوم بينـزّه النـاس بتــوعه زيــادة

العلم نور said...

ما تعملش حاجة بس قول حسبي الله ونعم الوكيل

محمد صبرى said...

لو كل واحد ساب بيته عشان تحتيه رقاصة , البلد كلها هتبات فى الشارع


:D

لا بجد انا موافقك تماما,و ربنا يسترها لانه حاجات كتير اوى بقت فاسدة و ريحتها طلعت

(abu al-alaa) أبو العلاء said...

http://wikilivres.info/wiki/La_Soci%C3%A9t%C3%A9_du_spectacle

Monzer said...

دي بالانجليزي

ياااادي الاحباط

AmmAr said...

ليه البلوك في تويتر ؟
@flashpack