Monday, 21 June 2010

صباح الخير على الورد اللي فتح في جناين مصر

ده فيديو على الفيس بوك
ومحمد توفيق جاب لي فيديو من اليوتيوب


ما عرفتش اكتب حاجة امبارح عشان كنت راجعة تعبانة وبعدين لما رجعت سمعت كلام زي الطين ضايقني فدخلت اتقلبت نمت
الشهادة لله انا ما كنتش متوقعة ابدا ان مظاهرة امبارح تنجح ولا تتم خالص، كنت فاكرة انها حيحصل فيها زي اللي حصل ايام مظاهرة التعديلات الدستورية اللي سببت لي صدمة عصبية مش قادرة انساها، بس قلت حانزل برضه، وطبعا لاني لخمة وموكوسة بطبعي قعدت احاول القح جتتي على اي حد يسحبني في ايده:
مالك تاخدني معاك المظاهرة؟
لا...
حسام تاخدني معاك المظاهرة
انا مش رايح
يا جماعة حد ياخدني معاه المظاهرة
ماحدش رضي يعبرني عشان عارفين اني حالخمهم في المظاهرة وانا اصلا لخماهم في حياتهم كلها، مافيش غير سلمى سعيد حبيبتي اللي بحماس شديد قالت لي تعالي معايا يا نونة، بس ما اعرفش مين ابن ال... اللي وشى بيا عندها وخلاها تتهرب مني في اخر لحظة
جمال عيد قال لي عدي عليا في المكتب وانا اخدك المظاهرة، الوقت اتأخر ما لحقتش اروح له المكتب وقعدت الف في ميدان التحرير
كلمت عايدة سيف الدولة وفهمت منها انهم في قصر النيل قلت لها استنوني قام سبحان الله قالت لي في وشي كده: لا مش حنستناكي!
ايه المعاملة دي؟ المهم محمد واكد اخد منها التليفون وقال لي: لا... حنستناكي... تعالي ياللا
في اخر لحظة المكان اتغير لان جيش عرمرم كان في ميدان التحرير قدام كنتاكي والميدان متقفل خالص كأن اسرائيل حتحاربنا
بصوا بقى انا مش بافهم في الشوارع فحقول لكوا بالشبه كده
احنا مشينا لحد ما وصلنا عند الشارع اللي كان فيه جرنال البديل زمان، واروى مرعي بتكلمني وتقول لي انتوا فين؟ قال بتسألني انا احنا فين على اساس انا اللي حاشرح لها الشوارع، قلت لها: احنا هنا... ماشيين في شارع كده
وطبعا البنت فضلت تعافر عشان تعرف توصل لنا
انا بانصحها نصيحة اخوية لوجه الله... تدور لها على مرشد غيري، هي مش شايفة من كتر وكستي الناس بتتهرب مني ازاي؟
وصلنا عند الشارع ده قام لقينا بتاع تلاتين اربعين واحد متجمعين ورحنا فجأة مشينا في مسيرة الناس تسمع يسقط يسقط حسني مبارك وتنضم في الاول الامن حاول يجري ورانا واحنا في الشارع بس الحمد لله العدد كان بيزيد فلقوا نفسهم مش عارفين يسيطروا، مشينا من شارع لشارع تاني مش عارفة اسمه، بس حتى بالامارة عدينا على قهوة البورصة، ومشينا في شارع تاني، وبعدين قالوا تعالوا ندخل من الشارع ده، كان شارع جانبي، تقريبا قالوا لي ده باب اللوق او حاجة زي كده، بس ناس المجموع مشي في شارع تاني وقالوا لي ان ده شارع شريف، المهم كان غلط نمشي في شارع شريف ده عشان بيوصل على ميدان التحرير حيث الثكنات لو كنا كملنا في الشارع التاني اللي على جنب مش اللي على طول كانت المسيرة بقت اطول واكبر، بس عموما انا كنت مبسوطة قوي
المسيرة ابتدت تلاتين اربعين خلصت وهي حوالي خمسمية ستمية
ما كانش زمان الناس بتنضم كده
الامن قفل علينا شارع شريف ونزل ضرب في العيال وقبض عليهم وسمعنا صوت بنت بتصوت وبعدين مشينا من شارع شريف ده وبقينا نجري لحد ما وصلنا لحتة انا عارفاها دي.. اسمها شارع الشواربي
ضربوا البنات والشباب واتحرشوا بالبنات، بس سلمى سعيد جدعة، شتمت الظابط وراحت طلعت تجري
كل ده واروى مرعي بتحاول توصل لنا وكل ما تمشي في حتة يضربوها
اتضربت كتير قوي ومافيش فايدة عندها اصرار تيجي برضه.. البت دي بميت راجل على فكرة، ومن غير صياح ولا باللو، بهدوء شديد كده واللي يشوفها يفتكرها الكتكوت المفترس ما توحيش ابدا بشدة البأس دي
المهم لما سلمى شتمت الظابط خفنا عليها لان الراجل عرف وشها وبقينا خايفين يحطها في دماغه، قلنا لها يا سلمى ما تمشيش لوحدك
كل ما نمشي دي تعمل زي البطة اللي لسه فاقسة وتروح سارحة بعيد لوحدها، واروح اسحبها من ايدها: يا سلمى ما تمشيش لوحدك لو سمحت
ومالك كل شوية يكلمني.. طب ما كان ييجي معايا، عمري ما حاسامحه ابدا عشان خلا شكلي عار على التويتر وانا باترجاه ياخدني معاه وهو قالبني، بس هو عموما قعد في مركز هشام مبارك يلم اسماء المعتقلين وبعدين جالنا على النقابة بعد كده
الاول قلنا حنروح على مركز هشام مبارك، جينا نروح على هشام مبارك قام واكد واحنا معديين قال فيه حاجة دار القضاء العالي اهي
رحنا ما لقيناش حد، بس المدرعات اوهمتنا ان فيه وقفة هناك
كان عددنا قليل بتاع خمستاشر واحد وللا حاجة، والعيال كانوا حيتخانقوا مع الحرس بتاع دار القضاء عشان عايزين يمشونا
المهم لقينا صعوبة في اننا نعمل وقفة عن القضاء العالي بعددنا القليل ده وبقينا نتصل ببعض عشان نلم بعض على نقابة الصحفيين واحنا ماشيين لنقابة الصحفيين مشي جنبي لزق مخبر طول بعرض لابس ازرق زي الكشافة وعمال يتصنت عليا وانا باتكلم في التليفون وكان ناقص يلزق ودنه في التليفون زي المخبر اللي كان ماشي جنبي انا وعبد الرحمن فارس قبل كده وعايدة بتكلمني في التليفون: انتوا رايحين فين
وده لازق ودنه وبيلمع اكر
طبعا قلت لها انا مروحة حاقول لها انا رايحة النقابة؟ لا ما انا ناصحة يعني، هو صحيح فضل ماشي ورانا لحد ما شافنا رايحين النقابة بس انا حبيت اعمل تمويه، انا دايما باعمل تمويه وبانصح غيري بالتمويه في التليفونات المتراقبة، على التليفون وش كده: ما تبقاش تبين ان معاك تليفون وابقى خبيه عشان تعرف تكلمنا لو اتقبض عليك.. اعمل زي فلان، ماهو بيعمل كده.... لحد ما الناس تقفل السكة في وشي بعد ما يقولوا لي: ده كلام يتقال في التليفون ده؟ طب اعمل ايه طاه؟ ما انا عايزة اوصل لهم معلومة حاوصلها على النت وللا على التليفون وللا وانا ماشية معاهم في الشارع والمخبر جنبي؟ مافيش غير اني ازنقهم واحد واحد في الحمام عشان اقولهم اللي عايزاه.. وللا مراقبين الحمامات كمان؟
رحنا على النقابة لقيناهم مقفلين النقابة فهتفنا برة الكوردون راحوا فاتحين لنا بسرعة عشان يدخلونا
المرة دي العيال ما حدش فيهم كان خايف، الكل كان غضبان خصوصا انهم ضربوا ناس كتير، ضربوهم وهم شايلين صورة خالد سعيد وهو متشوه، الظاهر احساسهم ان دي بجاحة ما بعدها بجاحة خلاهم يقولوا وان شالله يموتونا زي خالد سعيد
لما كنا وصلنا النقابة كان عددنا زاد شوية، بتاع تلاتين واحد، هوب هوب بقينا حوالي تلتمية ربعمية وفضلنا قاعدين معتصمين عشان يفرجوا عن اللي قبضوا عليهم
فيه ناس ما كانتش في المسيرة جات وناس من اللي كانوا في المسيرة اتفرقوا، بس لاول مرة عدد الناس اللي في المسيرة يبقى اكبر من عدد الناس اللي على سلم النقابة
بالرغم من زعلي على الناس اللي انضربت، بس انا فرحانة باليوم بتاع امبارح قوي
طبعا انا جربوعة ولما الدنيا ليلت والعيال ما خرجتش لسه قلت لهم: هيييييه حنباااااات... صح؟ صح؟ حنبات على السلم؟
كل الناس احولوا كده في وشي وامل رمسيس قالت لي: انا كنت فاكراكي مناضلة طلعتي عندك مشاكل في البيت ومش عارفة تطفشي
بس طبعا ماحدش ساندني في فكرة نومة الشارع دي غير محمد واكد مجيبا: طبعا لو ما خرجوش حنبات.. هي دي محتاجة مناقشة؟
العيال بقوا يتصلوا بينا ويقولوا لنا انهم رموهم على الدائري بعد ما اخدوا كل فلوسهم وبطاقات بعضهم بلغت كمال خليل في ساعتها فراح باصص للظباط وقال لهم: عيشوا بشرف جاتكوا القرف هههههههههههههه
الا صحيح ياخدوا فلوسهم ليه يعني؟
لقينا واحد جاي في المظاهرة معاه صورة على الموبايل لواحد اسمه هاني خيري متعذب تعذيب السنين ومصورين ضهره لدرجة ان عايدة سيف اللي ما بتشوفش في حياتها غير التعذيب اتفزعت لما شافت الصورة
بيسان كساب اخدت الصورة واخدت نمرة هاني وان شاء الله بقى ينزلوها في الدستور
للاسف بقى كلهم خرجوا وما عرفناش نبات :)) ياللا الجايات اكتر من الرايحات ان شاء الله
بس على فكرة.. الجايات فعلا اكتر من الرايحات
الغريبة ان التغطيات ما كانتش كويسة قوي
اون تي في بس غطت كويس قوي على حسب ما سمعت ما شفتش، سمعت من الناس اللي جات في الوقفة على سلم النقابة ان الجزيرة غطت وحش، اتصلت بسمير عمر قام اتنرفز عليا وقال لي انا عامل تقرير طويل وطلعت على الهوا
النهاردة اظن الصحف ما لحقتش تنزل كل حاجة، يمكن ينزلوا بكره
يارب يكون حد من العيال صور المسيرة، كانت كبيرة وحلوة وناس كتير عادية من الشارع انضمت وما كانوش خايفين
وعلى فكرة بقى على فكرة، احب اقول لكل الناس اللي تهربت مني زي ما بيتهربوا من الديانة وما رضيوش ياخدوني للمظاهرة خصوصا مالك اللي قعد ينظر لي عشان يتهرب مني: انا مش احسن واحد تروحي معاه المظاهرة.. وحسسني اني خانقاه في حياته، اني صحيح لبخت محمد وكل ما يحاول ينتحر اصوت: يا لهوي انت حتسيبني؟ بس لولا كده كان اتعجن واتقبض عليه زي كل مرة، والمرة دي بقى كانوا بياخدوا الفلوس والبطاقات يعني حرقة قلب... ساعات بيبقى ليا منفعة، هو زهق شوية :) بس عمل الخير قعد له في عينه وعافيته ورجع البيت سليم يعني
عندي ملحوسة رفيعة
الا احنا ما نشبهش المعارصة الايرانية اللي عملوا لنا عليها باللو وحدوتة؟ الا ما شفت السي ان ان ولا البي بي سي ولا اي حد اهتم بينا زي ما كانوا مهتمين بالمعارصة الايرانية اللي كنا كل ما نكلمهم على التويتر يقولوا لنا يا عرب يا جرابيع

32 comments:

مهندس مصري said...

آخرتها طلعتي عايزة تطفشي من البيت
:))

mido said...

كل برامج التوك شو روقت الظهور المفاجئ لـجيمي في عزبة هريدي "المطورة"، وتجاهلت أو مرت بسرعة ع أخبار المظاهرة.. إلا (بلدنا بالمصري) فعل العكس

mtwfeeq

Kontiki said...

الله ينور ولسة

إنـســـانـة said...

هههههههههههه

ايه مغامرات إسماعيل ياسين فى المظاهرة دي .. فتحتي نفسي لنزول المظاهرات يابنتى بس عشان أحتاس أنا وانتى سوا

فعلا لا بعرف شوارع من بعض خصوصا وسط البلد دي متااااااااااهة ولا بفهم فيها حاجة

المهم حمد الله على سلامتكوا

Founoon said...

في سؤال بيؤرقني من امبارح ...هو ايه المشكلة في سندويتش الفول ليه الموقف العنيف ضد الفول ;p

MR.PRESIDENT said...

مبروك عليكي يا مصر ولادك الحرة
مبروك ليكي فرحك ..
ربنا يسعدك
ويسقط يسقط جدي جدو حسني

جبهة التهييس الشعبية said...

ههههههههههههههههههههههه

عنده قرحة

MR.PRESIDENT said...

مبروك عليكي يا مصر ولادك الحرة
مبروك ليكي فرحك ..
ربنا يسعدك
ويسقط يسقط جدي جدو حسني

Founoon said...

هههههههههههههه ماشي ياختي يخليكي للغلابة :P

شيماء علي said...

ههههههه
أضحك الله سنّكِ
وألف حمدا لله على السلامة
سلمتم وسلمت بكم مصر

mUsLiM said...

ربنا يحميكو يارب

الحركات على الرغم انها مازالت تفتقد لكثير من مقومات الإصلاح الحقيقي والتغيير

لكنها من ركائز الأمل والحياة فى مصر فى الوقت الحالي

أتمنى أنول الشرف وإن ربنا يقدرنى وأطلع فى حاجه زى كده لما اكون فى مصر قريب

وأسأل الله أن يجعل ذلك فى ميزان أعمالنا يوم القيامة

إنه بكل جميل كفيل وهو حسبنا ونعم الوكيل

السلام عليكم

أبو هاجر said...

إلى النوارة العربية الجميلة ألف تحية من الجزائر

ahmad.rihan said...
This comment has been removed by the author.
ahmad.rihan said...

هو ده الكلام , فعلا اون تي في غطت كويس و كالعادة عمنا ابراهيم عيسى بدع
كان نففسي ابقى معكوا

أبو هاجر said...

ألف تحية من الجزائرnou

أبو هاجر said...

إلى النوارة العربيةالجميلة الف تحية من الجزائر

GiGi world said...

انتى بجد جادعه

ووالله و ده الورد فى مصر

ربنا يعزك يارب ويكرمك

مواطن مصري said...

رائعة احمد خالد توفيق خالدنا وخالدهم د. أحمد خالد توفيق http://www.boswtol.com/politics/prespectives/10/june/21/15752

utopia said...

عقبال المرة اللى ننزل فيها كلنا وما نرجعش الا لما ننضف البلد من الزبالة كلها.
بس ياريت نشوف الراجل ده ونلحقه قبل ما يقتلوه كفاية سعيد صيام
http://6april.org/modules/news/article.php?storyid=1288

utopia said...

اسف قصدى زى ما قتلوا يوسف ابو زهرى مش سعيد صيام معلش الزهايمر حكم

Wild at Heart said...

اتفضلي يا ست الكل ده فيديو المظاهرة http://www.vimeo.com/12734226
وعلى فكرة الواشنطن بوست كتبت مقال كويس عنها.

amr565 said...

http://www.tanseerel.com/main/articles.aspx?selected_article_no=7693
جبهة علماء الازهر وشنودة...شفتي البيان ده يا جديدة

target said...

اعلم ان الشعب يئن من الظلم كلما تلفت حوله وهذه احدى صور الظلم الواقع عليه .ارجو المعذرة على الاطالة:

الطبقية والفساد وانعدام الكفاءة تسيطر على منظومة الكهرباء فى مصر
تعانى معظم طبقات الشعب مؤخرا من الانقطاع المتكرر للكهرباء اثناء الذروة وهى من السادسة الى الثامنة مساءا فى فصل الشتاء ومن الثامنة الى العاشرة مساءا فى فصل الصيف وذلك بسبب ارتفاع احمال الشبكة عن الحمل الاقصى الذى يتم توليده من محطات التوليد مختلفة النوع والكفاءة فى انحاء الجمهورية . حيث يتم فصل بعض الاحمال وهو ما يعرف بتخفيف الاحمال فى محاولة جادة على الرغم من قسوتها فى تجنب ما يسمى بالـ Black Out وهو ارتفاع اجمالى الاحمال الفعلية عن الحمل الاقصى التى تتحمله شبكة التوليد والنقل للطاقة الكهربية وعدم قدرة المنظومة بالكامل على توفير هذه الطاقة. ورغم ان المهمة الاولى للعاملين بقطاع الكهرباء هو استمرارية توصيل التيار الكهربائى بكفاءة عالية فانهم يقومون بعكس ذلك عمدا . يمكن تحليل الازمة الصارخة التى يتعرض لها معظم الشعب المصرى للعام الرابع على التوالى لعدة اسباب اهمها الطبقية والفساد وانعدام الكفاءة التى تسيطر على منظومة الكهرباء فى مصر:
• تتحكم الطبقية فى المناطق التى سيتم فصل الكهرباء عنها حيث يتم الاتى :
 تحديد المغذيات الممكن فصلها من اجمالى المغذيات التابعة لكل مركز تحكم فى الكهرباء حيث يتم استثناء محطات المياه ومحطات الصرف الصحى والمستشفيات العامة وخاصة الكبرى منها واقسام الشرطة والشوارع الهامة والرئيسية.
 تصل نسبة احمال هذه المغذيات الى اكثر من 60 بالمائة من اجمالى الاحمال التى يتحكم فيها كل مركز وتتغير النسبة طبقا للبعد الطبقى والاقتصادى للمناطق التابعة لمركز التحكم .
 فى مختلف محافظات الجمهورية وحتى بالقاهرة الكبرى يتم تقسيم المناطق بشكل طبقى عنصرى خالص يجعل من اسم المنطقة او الحى ومستوى المعيشة بها معيار لحرمان قاطنى هذه المناطق من الكهرباء فى حين انهم اقل استهلاكا للكهرباء من الطبقات والمناطق الاعلى اقتصاديا وحيث يتم تجنب الاحياء الراقية والأحياء المتوسطة رغم ان ساكنيها اهم اكثر استهلاكا للطاقة حيث يوجد على الاقل جهازى تكييف بكل وحدة ، يتم عمدا اطفاء الاحياء الاقل اقتصاديا واجتماعيا وهى التى لا يستطيع معظم ساكنيها شراء جهاز تكييف واحد بل يستخدمون المراوح بشكل مقنن اما لعدم قدرتهم على شراءها او توفيرا لتكاليف الكهرباء التى تؤرقهم . وذلك اثناء اشد ساعات ارتفاع الحرارة ظهرا ومساءا كمناطق بولاق الدكرور ، امبابة ، ومناطق اخرى كثيرة يتم تقسيمها ايضا محاولة لتخفيف الصورة وحتى لا يقال انه يتم اطفاء منطقة بكاملها .
 يتم وضع جدول يحتوى على كل المغذيات الممكن فصلها ويتم تسجيل كل مرة يحدث فيها الفصل العمدى فى محاولة لتقنين تكرار الفصل خلال عدة ايام حيث يتم الفصل لمدة تتراوح بين 45 الى 60 دقيقة ويتم تبديل هذه المغذيات باخرى فى نفس القائمة حتى لا تطول المدة لاكثر من ساعتين خلال اليوم ويتم تكرار الفصل فى الايام التالية عند الحاجة بعد انتهاء القائمة وقدوم الدور فى الفصل.
 تتدخل المحسوبية والعلاقات فى رفع بعض المناطق من قائمة الفصل نهائيا او على الاقل توصيلها قى الحال وذلك حسب قدر ومدى علاقات المتصل حيث يصل الامر الى تدخل بعض رؤساء شركات التوزيع فى تغيير القوائم بسبب نائب مجلس شعب او مجلس محلى او صديق فلان او صحفى ذو لهجة مهددة او صاحب مصنع بالمناطق الصناعية القديمة التى تنتشر بالقاهرة الكبرى ذاكرا كلمة التصدير او الكويز حتى لو كان مصنع صغير ينتج منتج ردئ لا يناسب حتى السوق المحلى ،وذلك يظهر مدى هشاشة وتخبط القيادات العاملة بقطاع الكهرباء ومحاولتها التغطية واسكات كل من له صوت معارض للظلم الواقع على الشعب .

target said...

ثانيا:
 لم يتم ارتفاع الاحمال بهذا القدر الصارخ بين يوم وليلة حيث يتم تخفيف الاحمال للسنة الرابعة على التوالى ومن المفجع انه يحدث ايضا فى فصل الشتاء حيث تقل الاحمال الكهربية بشكل كبير .
 وزارة الكهرباء والطاقة التى تشرف على منظومة الكهرباء فى مصر من خلال الشركة القابضة لكهرباء مصر التى تضم حوالى ستة عشر شركة مابين انتاج ونقل وتوزيع للكهرباء فى انحاء الجمهورية تصلها تقارير دورية عن الاحمال المتوقعة فى السنوات اللاحقة وهناك مقرر كامل يتم تدريسة لطلبة كليات الهندسة بقسم القوى والالات الكهربية يهتم بما يسمى توقع الاحمال او الـ Load Forecasting وهو يعتمد على عوامل كثيرة منها عدد السكان والنمو الاقتصادى والصناعى ودرجة الحرارة وهناك دراسات كثيرة ووسائل للوصل الى ادق التوقعات وبأقل معدل خطأ ومن المؤكد ان الوزارة والشركة القابضة لديها ملف كامل بالاحمال الحالية للشبكة والاحمال المستقبلية لأربع اعوام قادمة على الاقل على مستوى التوزيع وسنوات اكثر على مستوى الانتاج للطاقة الكهربية ولكن يبدو ان انعدام كفاءة قيادات الوزارة والشركة القابضة وعلى رأسها الوزير الدكتور المهندس حسن يونس واهتمامها بتنفيذ خطط سياسية تسمى مجازا (محور الربط العربى الشامل مع ليبيا وسوريا ولبنان والاردن ، محور الربط الكهربائى الاروبى مع دول جنوب البحر الابيض المتوسط ، محور الربط الكهربائى مع دول حوض النيل ) وهى اتفاقيات سياسية تهدف بعضها للتهدئة ومحاولة ارضاء بعض الدول العربية وهذا غير جائز حيث ان وقت الذروة لدول الربط واهمها مصر يكاد يكون متزامن ومهما كان انتاج الكهرباء لهذه الدول كبيرا فلن يساهم بأى شكل سد احتياجات مصر عند الحاجة ولو لعدة مئات من الميجا وات لساعة واحدة.
 يكاد يكون تخبط الوزارة واضحا فى الاهتمام الضخم بمصادر الطاقة البديلة وانشاء محطات لطاقة الرياح والطاقة الشمسية والطاقة النووية حيث الارتفاع الهائل للتكلفة الاولية لهذه المحطات على رغم من كفائتها العالية وانخفاض تكلفة الميجاوات الواحد عند التشغيل ولكن هذه المحطات يتم انشاءها بمناطق ذات ظرووف بيئية خاصة وخاصة المترامية منها وفى المجمل هى معدة اما للعمل بنظام الـ BOT لمعظم عمرها الافتراضى او للربط الخارجى الذى يكون عطاء ولو بمقابل من جهة واحدة وهى مصر متناسين حال الشبكة العام والاحتياج الشديد لزيادة قدرة محطات التوليد العاملة او صيانة بعضها التى تعمل بنصف طاقتها فقط .
 تبدو قيادة الوزارة والشركة القابضة فى منتهى السذاجة عندما يتم احراجها اعلاميا بالوضع الحالى من تكرار انقطاع التيار المتكرر المتعمد فيلجأون لحجج واهية واسباب لا ترقى لمستوى هذه القيادات مثل التحجج بأعمال الصيانة والتى تتم فى معظم المحطات فى أدنى حمل وبعيدا عن شهور الصيف وبجداول زمنية صارمة فى اقل الحدود حيث انه يتم معظمها بتغذية المشتركين من مصادر بديلة .يبدو الوزير ورؤساء شركات التوزيع اكثر ضعفا حينما يجنحوا فى دفاعهم الى تسويق اللمبات الموفرة للطاقة وكأن الانارة هى السبب الرئيسى لارتفاع الاحمال المفاجئ .
 ارجو ان تساهم السطور السابقة فى فهم الحالة التى يعانى منها معظم الشعب المصرى وان تكون نداء من اجل محاسبة القائمين على وزارة الكهرباء وتنبيههم بأن هناك شعب يؤخذ من حقه الدستورى فى الحصول على مرافق من مياه وغيرها واهمها الكهرباء خاصة فى أقسى درجات الحرارة التى نتعرض لها خلال الصيف فى مصر .
امضاء: مهندس ومواطن مصرى يفكر فى ترك عمله بقطاع الكهرباء لعدم جدواه الفعلية حاليا

Ahmed said...

محمد مسلم طلع براءة بس البراءة بعد ما اتقتل و اتعلق في لبنان, و لا حول و لا قوة إلا بالله
الله يخرب بيت الجهل و تطبيق القانون باليد

http://www.youm7.com/News.asp?NewsID=244388&SecID=12

مواطن مصري said...

ظهور أجسام غريبة في سماء العريش يثير الذعر بين الأهالي.. والأمن يدرس الموقف


سيناء- أشرف سويلم- فوجئ أهالي محافظة شمال سيناء وخاصة المقيمين على ساحل مدينة العريش مساء يوم الثلاثاء بظهور أجسام غربية في السماء عبارة عن كتل ضوئية استمر ظهورها لعدة دقائق.
وبحسب شهود عيان فإن الأجسام ظهرت على شاطئ مدينة العريش المطل على البحر المتوسط وكانت عبارة عن جسم مضيء بدأ ظهوره في السماء وظل يقترب من سطح البحر حتى حوالي 2000 متر واستمر ظهوره حوالي دقيقتين ثم اختفى تاركا وراءه سحابة من الضوء وعاود الظهور مرة أخري بكيفية مغايرة حيث ظهر أكثر احمرارا وظل مستمرا في الظهور لحوالي دقيقتين ثم اختفى.
بعدها سادت حالة من الذعر والترقب على رواد الشاطئ خوفا من أن يكون هذا الجسم يشكل خطرا ما على أرواحهم وأرواح أبنائهم.

شاهد الفيديو
اجسام غريبة
ومن جانبه وفي تصريحات خاصة لمصراوي أكد الناشط السياسي خليل جبر أحد أبناء قبيلة السواركة انه رأي نفس الجسم بمدينة الشيخ زويد الواقعة على بعد حوالي 15 كيلوا من العريش .
وأكد عدد من رواد الشاطئ لمصراوي ومنهم عبد الرازق عبد الحليم "فني صيانة" وعبد التواب عبد الحليم "مهندس" أنهم شاهدو الجسم الغريب وراقبوا حركته التي استمرت عدة دقائق بين الظهور والاختفاء وما سببته الأضواء الهائلة من ذعر وفوضى.
نفس الأنباء والمشاهدات أكدها شهود عيان بمحافظتي بورسعيد والإسماعيلية.
وفي تصريحات خاصة لمصراوي أكدت مصادر أمنية رفيعة المستوى بمحافظة شمال سيناء أنها تعكف على دراسة الموقف وأنها تحاول العثور على الصور ومقاطع الفيديو التي تم التقاطها للأجسام الغريبة لبيان حقيقة الموقف.. وأكدت المصادر أن أفراد أمن رصدوا الأجسام الغريبة فوق قناة السويس.

http://www.masrawy.com/News/Egypt/Politics/2010/june/23/areesh.aspx
هههههههههههههههههههههههههههههههه
هههههههههههههههه

http://videohat.masrawy.com/view_video.php?viewkey=50bfc372d18455649a5c

و دة الفيديو

الكائنات الفضائية بتعمل زيارات لمصر يا نوارة

مش فاهمه said...

موضوع المظاهرات ده تشكروا عليه و الله و حاجه تفرح لما بتقولى على وصول الوعى للناس باهمية المظاهرات بدليل ان العدد زاد شويتين .......الا فين حمدين صباحى و البرادعى و الناس الحيلوة المستحميه دى من اللى حصل لخالد
المهم الأخ target
بيقول كلام خطير و صحيح جدا احنا بيحصل عندنا قطه متعمد و مجدول كده للكهربا لازم نشوف حل بجد و خصوصا ايام الحر ده و الأمتحانات الله يلعنهم
و عايزه اقوله خليك فى مكانك جايز ربنا حطك فى المكان ده علشان تحكى لنا على المهازل اللى بتحصل هناك و تفيدنا بدل ما تسيبهالهم مخضرة

هشام علاء said...

السلام عليكم يا نوارة

وصفك للمظاهرة كأنى شايف فيلم سينما قدامى بجد حسستينى انى بجرى معاكوا فى الشوارع

انا كنت حزين جدا ان الناس انضربت لغاية ماقريت البوست بتاعك حسيت ان المظاهرة كانت عاملة شغل جامد بس فعبل التغطيات ماكنتش كويسة

انا حاسس ان بداية من المظارهة دى الامن هيرجع تانى يضرب المتظاررين عشان خالد سعيد رغم ان عندنا فى اسكندرية لحد دلوقتى اربع مظاهرات ووقفة و محدش من الامن اتجرا يمد ايده على حد بش شكلنا هنتعلق الجمعة الجاية

عموما بالنسبة لان ماحدش عايز ياخدك معاه مظاهرات ابقى اخطفى رجلك و تعالى اسكندرية و انا اخدك كل المظاهرات بتاعتنا

و احنا فى اسكندرية مظاهرتنا قرب البحر و الوقفات بتاعتنا على الكورنيش يعنى حاجة اخر نزاهة هيبقى منها مظارهة و منها مصيف
:)

تعالى بس و مالكيش دعوة
:))


هشام علاء

utopia said...

اهم طلعوا مظلومين اهو

http://www.youm7.com/News.asp?NewsID=244687&SecID=65&IssueID=117

بقى يا ظلمة عايزيين نصدق قلة مندسة من اكثر من 100 شاهد ونصدق عيننا اللى شافت صور الجريييمة ونكدب الحكومة؟؟؟؟
احنا هانعرف زى الحكومة
الله يرحمك يا سعد
فعلا مافيش فايدة

utopia said...

اهم طلعوا مظلومين اهو

http://www.youm7.com/News.asp?NewsID=244687&SecID=65&IssueID=117

بقى يا ظلمة عايزيين نصدق قلة مندسة من اكثر من 100 شاهد ونصدق عيننا اللى شافت صور الجريييمة ونكدب الحكومة؟؟؟؟
احنا هانعرف زى الحكومة
الله يرحمك يا سعد
فعلا مافيش فايدة

Tota said...

النيابة اللبنانية تؤكد براءة القتيل المصرى بكترمايا من الاغتصاب

23 - 06 - 2010

كشفت التحقيقات التى أجرتها نيابة بعبدا اللبنانية فى قضية مقتل الشاب المصرى محمد مسلم بكترمايا ان الطب الشرعي أكد براءة «مسلم» من تهمة اغتصاب الفتاة اللبنانية التى اتهمته باغتصابها بعد وفاته ، كما أوضحت ان احد الشيوخ أول من قام بطعنه بالسكين وان والدة مسلم اكدت أن الشرطة اللبنانية لفقت لابنها التهمة، بالاضافة الى عدم وجود أى دليل مادى يدين الشاب المصرى.

وذكرت صحيفة الوسط اللبنانية ان النيابة استمعت فى تحقيقاتها إلى «بدرية» والدة الفتاة «جميلة»، التى اتهمت الشاب المصرى باغتصابها تحت تهديد السلاح، إلا أنه بتوقيع الطب الشرعى على الفتاة تبين عدم صدق كلامها وأنه لم يتم معاشرتها خلال هذا التوقيت بناء على التقرير الطبى الصادر بمعرفة الطبيب جبرائيل بطرس إخصائى الطب الشرعى بجامعة القديس يوسف بلبنان.

وأوضحت تحقيقات النيابة أن والدة بدرية اعترفت بتحريضها مسلم على قتل جارهم يوسف أبومرعى وزوجته وطفليه لوجود العديد من الخلافات بينها وبين القتلى الأربعة الذين يقطنون أمام شقتها، وأن هذه الأقوال مناقضة تماما لتقرير الطب الشرعى الذى أكد أن وفاة الجدين كانت قبل وفاة الحفيدين بساعة ونصف وأنه لا يعقل أن يكون الشاب المصرى قتل الجدين ثم انتظر فى المنزل ساعة ونصفا حتى عودة الطفلين من المدرسة ليقتلهما أيضا.

وسرد المتهمون الثمانية بقتل مسلم تفاصيل الواقعة كاملة أمام النيابة واعترفوا بالاشتراك مع 4 آخرين هاربين، فقد أوضح المتهم الأول «عبد سعيد على» ويعمل جزارا بقرية كترمايا وشهرته «الزعرور» قال إنه تولى ذبح الشاب المصرى بمساعدة أحد الشيوخ ، أما المتهم الثانى «موسى محمد طافش» ،

فقال إنه علق المجنى عليه على العمود، واعترف المتهم الثالث «فهد محمد السيد» بأنه طعن القتيل العديد من الطعنات بالاشتراك مع آخرين، وقال المتهم الرابع «على محمد علاء» إنه أحضر سيارته وربط بها القتيل وسحله فى شوارع كترمايا.

في حين أقر المتهم الخامس «على عبدالحفيظ أبومرعى» أحد أقارب المتوفى اللبنانى بأنه شارك 14 شابا فى طعن الشاب المصرى بسكاكين كانت بحوزتهم،واعترف المتهم السادس «محمد أسعد» بأنه أحضر الشنكل ووضعه فى رقبة الشاب المصرى حتى خرج من فمه ثم رفعه على العامود، فيما اعترف المتهم السابع «عبدالحميد أشرف» بأنه من المشتركين فى عمليات الذبح بالسكاكين، وقال المتهم الثامن «على جميل» إنه أحضر السكاكين لذبح الشاب المصرى.

النيابة وجهت للمتهمين الثمانية تهمة القتل واستعمال أسلحة بيضاء والتمثيل بجثة مواطن مصرى، كما أوقفت الضباط المسؤولين عن تأمين موكب الشاب المصرى عن العمل لإهمالهم فى المحافظة عليه وتواطئهم مع المواطنين حيث إنهم تركوه فريسة لهم.

من جانبها، نسفت «سيدة سيد الكحكى» والدة مسلم، أدلة الاتهام، وقالت إن الشرطة اللبنانية لفقتها لابنها، حيث أكدت أن رجال الشرطة دخلوا شقتها عنوة وحصلوا على مجموعة من السكاكين ووضعوا عليها عينة من دم ابنها لإثبات الجريمة عليه.

كانت التحقيقات قد أوضحت اقتياد الشاب المصرى محمد مسلم (28 سنة) فى 28 أبريل/نيسان إلى المخفر «اسم قسم الشرطة بلبنان» عقب اتهامه بقتل يوسف أبومرعى وزوجته كوثر وحفيدتيهما آمنة وزينة بقرية كترمايا، ثم أجبرته الشرطة على الخروج للدلالة على الجريمة فى مكانها، حيث تم قتله هناك على يد مجموعة من المواطنين اللبنانيين.

Sosso said...

شفتي الشعر اللي كتبه فيك جلال عامر النهاردة ؟

«وأنا ضد الأدب النسائى والأغنية الشبابية لكننى أقرأ لكثيرات وأحترمهن جداً لكن حبى محجوز لكريمة العنصرين (صافى ناز ونجم) نوارة النهار وكوكب الليل وللناس فيما يقرأون مذاهب..»