Thursday 27 November 2008

رد احمد ماهر على ما اشيع حول انقسام داخل ستة ابريل

قبل ما انشر الرد، انا مش عايزة جليطة وتكبر وخنفان من توجهات سياسية وناشطين فشلوا في اللي نجح فيه مجموعة من الشباب وبدل ما الواحد يفرح بيهم يقوم يتنطط عليهم، ماحدش قال ان شباب ستة ابريل مسييسين ولا مفكرين ولا حد فيهم ماركس ولا حسن البنا ولا حد فيهم ادعى حاجة زي دي، بس هم شباب قرر يبقى ايجابي ويشارك انشالله حتى بتواجده عشان بلده تبقى احسن، والحقيقة انا سافرت معاهم في سراندو وشفت الاسلوب اللي بعض الناس اللي كانت موجودة بتتعامل معاهم بيه: انت يابني قاري ايه؟ انت يابني تصنيفك ايه؟ انت يابني ثقافتك ايه؟ وتسفيه وتغليس لحد ما مشيرة ردت على واحد فيهم وقالت له: انت ما تقعدش تجيبني في ندوات وترغي في ودني، انا عايزة اعمل حاجة، قول لي اعملي حاجة مفيدة وانا انزل من بيتي واروح اعملها
طيب ده سلوك المعارضة المصرية تجاه شباب قرر انه بدل ما يروح حفلة تامر حسني وللا يشرب بيرة في حفلة منير يعمل حاجة مفيدة للبلد، وعملوا نشاطات كتير يشكروا عليها، غير الاضراب بتاعهم اللي كان ناجح، ما اتأخروش في اي حاجة ولا في اي قضية
لما العيال دي يجيلهم دعوة من الخارجية الامريكية بوصفهم اهم وانشط واشطر..الخ، والله انا لو مكانهم وفي ظل التسفيه المتعمد والتربص الدائم المحيط بيا من المعارضة قبل الحكومة كنت ح اتلوح، خصوصا لما ابقى تلاتة وعشرين اربعة وعشرين سنة
لكن اللي حصل ان معظمهم ما اتلوحوش ولا حاجة، وقالوا احنا مش بنتعامل مع حكومات! يعني الكلام بتاع: انت يابني قاري ايه؟ وفاهم ايه؟ وتنظيمك ايه؟ وكادرك ايه؟ وكل القرف ده مالوش اي لازمة ولا له محل من الاعراب، ومش كل فاشل يستكبر ان غيره ينجح في حاجة، ولو المعارضة المصرية مخلصة فعلا المفروض تتعامل معاهم باحترام اكتر من كده وتعترف بان الحركة نجحت في اللي هم فشلوا فيه وتنسق معاهم، بدل ما تسيبهم لقمة للي يسوى واللي ما يسواش والنهاردة هم صبروا وجم على نفسهم وما انبهروش بالدعوة ماحدش عارف لما يفيض بيهم الكيل ح يعملوا ايه؟ انكت منهم وراح يشحت من الامريكان
وفي كلام احمد ماهر ابلغ رد:
مفيش اساسا انقسام ده كله حوار و عنوان مثير كعادة فاروق الجمل اللى بيحب يحور فى الكلام عموما مش هاطول عليكى يا نواره الحركه زى ما انتى قولتى مش حكر على حد الحركه اتكونت من الشباب اللى دعى لاضراب 6 ابريل و حب يكمل مش اللى قال انا حرمت و توبت و بطلت سياسه و حطينا مبادىء و اهداف و كمان لينا هيكل و مسئولين و حوارت كتير مش مكانها على النت اساسا و الجديد بقى يا نواره ان معظم الاعضاء الجداد دلوقتى ماشاركوش فى الدعوه للاضراب و فيه اعضاء ماعندهومش نت اساسا.. ولا كمبيوترتقوليلى ازاى .. اقولك هاحكيلك لما اشوفك .. اصل اكيد هاشوفك فى يوم من الايام المهم ان فيه ناس دعوا للاضراب.. و الجروب اتعمل و حصل اللى حصل فى 6 ابريل فيه ناس كملت فى فكرة تكوين حركه شبابيه مستقله تهدف للتغيير السلمى و ناس اتمسكت بالصدفه و خارجين عاملين فيها مناضلين بالاسم و ناس بطلوا و حرموا و تابوا و ناس مقتنعين بالفكره و مصممين على الانتشار و التوعيه المستمره وسط الناس فى الشارع بهدوووء .. و هدفها فى الاخر هو التغيير زى ما كلنا عايزين ووسائلهم متعدده و مبتكره بعضهم ليه بعض الخبره السياسيه من 2005 و بعضهم مدونين .. و الاغلبيه منهم هما اللى شاركوا لاول مره فى حياتهم فى حدث سياسى يوم 6 ابريل او فى الدعوه ليه يعنى اللى دعى للاضراب يشكر و زى الفل لكن عضو الحركه هو اللى كمل شغل بعدهاو عضو الحركه هو اللى بيفكر مع باقى اخواته و يناقش و ياخد دور و ينزل ينفذ مش اللى يقعد يتمنظر على الناس و يقول انا اتسجنت كام يوم فى اضراب 6 ابريل و هو اساسا بطيخه و اغلبية الاعضاء رفضوا المشاركه فى مؤتمر منظماه الخارجيه الامريكيه .. و زى ما هايفيدوا .. برضه هايستفادوا اغلبية الاعضاء اتناقشوا على الملأ و رفضوا يبقى اللى مصمم يروح مش تبع الحركه و اللى فرحان بالاضواء و امريكا و السبوبه يتحمل هو النتيجه يعنى هو يروح و يتظبط و احنا هنا نشيل مسئوليته ايه رايك؟؟
------------
انتهى رد احمد ماهر
انا عايزة بس اقول حاجة، اللي يعارض حكومته يبقى عيب عليه يروح يتمسح وياخد دعم من حكومات تانية حتى لو حكومة الكونغو
واللي بيروح امريكا يستنجد بيها على مبارك يبقى ايه الفرق بينه وبين الجلبي واياد علاوي؟ وانا الحقيقة مش ح استجيب للارهاب الفكري اللي بيمارسه البعض لمجرد ان الواحد بيوصف الامور وبيسمي الاشياء بمسمياتها: دي اسمها خيانة، مالهاش اسم تاني، انت رايح تستجلب قوة خارجية، سواء بقى بالسلم وللا الحرب، على بلدك
حاجة كمان، مبارك بيتعامل مع الادارة الامريكية، والحقيقة هو له صفة وله عذر كمان انه يتعامل مع الادارة الامريكية، بس مبارك قاعد في الحكم اساسا بسبب الادارة الامريكية، ولو علاقة اي معارض باي شيء حكومي امريكي شبه علاقة مبارك تبقى الروس اتساوت في النقطة دي ونبتدي المقارنة بقى ما بينه وبين مبارك في اي حاجة تانية غير ان مبارك قاعد على قلب شعبه بغير رغبتهم بسبب دعم الادارة الامريكية، لان اللي رايح يقول لامريكا هاتيني بدل مبارك ما يصحش يعيب على مبارك تزوير الانتخابات وفرض نفسه على شعب مش عايزه لانه هو بيعمل نفس الحكاية، ولو المنافسة وصلت للنقطة دي بصراحة يبقى مبارك يكسب
على الاقل اخدنا عليه واخد علينا وعرفنا طبع بعض، وايه الاكل اللي بيحبه وايه الاكل اللي بيكرهه، وبينام الساعة كام الضهر
احنا مش ح نقعد نغير في وكلاء الادارة الامريكية هنا..هي مش غية يعني
ووالنبي بلاش الكلام بتاع سعد زغلول ومصطفى كامل ده عشان انا باتنقط، خللي عندنا كرامة بقى، واقع الامر ان مافيش احتلال امريكي في مصر، احنا ليه مصممين نتعامل مع امريكا على انها حكومة الانتداب؟ الناس نفسهم ما قالوش كده، ده ايه تلقيح الجتت ده؟

12 comments:

utopian said...

شكرا ً يا ماهر
إنك لما جتلك الدعوه طرحت الموضوع للنقاش العام و إلتزمت برأى الأغلبيه

جميل إننا من البدايه نقول إن المحدد لكل الأشياء اللي بنختلف فيها هو الرأى الغالب , جميل أن مش فرد بيقود إن الأغلبيه بتقود

يوميات مواطن مصرى said...

اعتقد يا احمد يا ماهر انك كنت اول واحد موافق على السفر لامريكا
وانك بلغتنى بنفسسسسسسسسسسك انى ابلغهم انك موافق
بس قلت حاتعرض الامر على الجماعه
ولما رفضوا لاقيتك مش بتقول رايك كعادتك وبتحاول تقول راى الاغلبيه
طيب يا راجل قول انك كنت موافق ولما هما رفضوا انت تراجعت والله كلنا حانصقفلك ونقول انسان محترم وحاينفذ راى الاغلبيه

لكن تعمل انك كنت رافض من الاول

فمعلش بقى اسمحلى انى اتكلم لانى بجد اتخنقت من السكوت من زمان اوى انا رافض اتكلم علشان مافرحش امن الدوله فينا
بس ماتوصلش انك تتهمنا باننا بتوع سبوبه واضواء وشهره
طيب انت لما وافقت كنت بتاع ايه تقدر تقولى
حاتقولى ماوفقتش
طيب نسأل اصحاب الدعوه ايه رايك ؟؟؟؟ وهما يقولنا كان رايك ايه

بلاش الحركات دى ومش علشان تكسب تعاطف الناس تغلط فى ناس تانيه من وراهم

كان اولى بيك لما تتصل بيا تقولى انت مش محترم وبتاع اضواء وسبوبه مش تقولى معلش انا حاظبط العيال دى وحانمسح البيان المكتوب والاقيك بتكتب فى اماكن تانيه شتايم ليا

على فكره عايز اقول للناس اللى زعلانه منى بسبب سكوتى على افعال 6 ابريل

بقلهم خلاص من النهارده ماتزعلوش انا لانى حاتكلم وحاتكلم وكل حاجه مضايقانى حاقولها فى وقتها ومش حاسكت تانى

ويلعن ابو ام امن الدوله مش حانعملها حساب فى اعتبارتنا

يوميات مواطن مصرى said...

ليه مانزلتيش تعليقاتى الاخيره ولا انتى بتنقى التعليقات اللى تعجبك بس

يا ريت تنزلى تعليقاتى الاخيره لو سمحتى

مهندس مصري بيحب مصر said...

وا الله ناس جدعان
احسن من اللي بيتمنظروا على خلق الله
دول بيعملوا من غير منظرة

Unknown said...

اي تأخير في نشر التعليقات كان بسبب اني نايمة

Unknown said...

احمد نصار

احمد احمد....ارجو انك ما تحسش بجو عدائي وانك في محكمة

ولا هي خناقة يا احمد
احنا كلنا بنحبك، وانت عارف اني باحبك، وعارفة انك كويس ولك نشاطات كتير كويسة
واحمد ماهر كمان بيحبك
وماحدش بيشكك فيك يا نصار خالص
انا عن نفسي بانبهك انك بتعمل حاجة ح تضرك والله العظيم والله العظيم كمان مرة ح تضرك

اما كون ان احمد ماهر كان موافق في الاول وبعدين رفض

وماله يا نصار؟ وماله؟ انا عشان باحبك اتمنى من كل قلبي انك ترفض بعد ما وافقت

مافيهاش حاجة لما الواحد يدي
second thought
على راي الامريكان ويغير رايه للاحسن

واحنا المفروض نشور بعض
ومدام مجموعة يا احمد التزمت مع بعضها يبقى لازم تلتزم مع بعضها

ومدام اتناقشوا وسوا ووصلوا لحل احسن يبقى المفروض ان الاقلية تنزل على راي الاغلبية، مش هي دي الديمقراطية وللا ايه يا نصار؟

طب عشان خاطري فكر تاني

ويا احمد اذا كان اي حد بيتكلم بعنف

بالذات انا

اذا انا اتكلمت معاك - وانت عارف معزتك عندي - او مع اي حد تاني بعنف

ده بسبب اني باحبك ومستنضفاك ومستخسراك

ارجوك راجع نفسك
والمفروض انك تشور يا احمد قبل ما تاخد قرار زي ده

Fatma said...

خسارة

البت المشمشية حلوة بس شقية said...

ياريت تنورى مدونتى المتواضعه

البت المشمشية حلوة بس شقية said...

فيه ايه يا جدعان استهدو بلله كلكو على الراجل ولا ايه ياريت تنور مدونتى المتواضعه

مواطن مصري said...

معرفتيش يا نوارة مش الاهلي انهزم من اتحاد الشرطة


لية الزمالك ميبقاش تبع الشرطة على كدة هيفوز الدوري و الكاس

مواطن مصري said...

ملخص الموضوع
انا كان راي عرض المشاكل في الخارج و يبقى الجبهات مفتوحة في الداخل و الخارج
مع راي الاغليبية
يبقى الاغلبية تكسب
بس كان نفسي يعرضو مششاكل في الخارج

اةة نواررررة العراق وافقت على الاتفاقية الامنية و على
الجدول الزمني ل الانسحاب من العراق


انا شايف ان العراق دي هتبقى فرنسا العرب

Unknown said...

العزيز احمد نصار
انت عارف كويس حبى و احترامى ليك عامل ازاى

و اتكلمنا امبارح و قولتلك ان اللى مكتوب فى المصرى اليوم مبالغ فيه
و كلنا من زمان عارفين ان فاروق الجمل نفسه من زمان ينشر كلمة انشقاق فى حركة شباب 6 ابريل و حاول يصورها كذا مره فى مواضيع سابقه .. و اهى الفرصه جاتله على طبق من ذهب
الكلام اللى قولته اتشال منه اجزاءو تم التركيز على اجزاء... و كلام اللى انت قولته اتشال منه اجزاء وتم التركيز على اجزاء اخرى

نيجى بقى للبيان بتاعنا
انا قولتلك امبارح ان البيان فعلا تقيل ولازم يتعدل و يتشال منه الاسماء علشان ده مش فى مصلحة الجميع

اما بالنسبه لكلامى عند نواره نجم فده مش موجه ليك
و الله العظيم انا بحترمك و كل الناس هنا عارفين مجهودك و اخلاصك
بتوع السبوبه و اللى هايفرحوا بالاضواء مش انت و لا اسراء... كلنا عارفين ده كويس و عارفين كمان مين اللى انا اقصده بالظبط

انا كان لومى الشديد عليكوا انكوا كان لازم تعرفوا ان الموضوع بجد شائك
انت هاتروح كشخص او اسراء ... و انا اللى عمال اتهزأ من كل القوى السياسيه و انفى و ابرر
ينفع كده
انت يا عم هدفك نبيل
لكن الامريكان بيقولوا عندنا حركه فى مصر اسمها حركة شباب 6 ابريل و هايحضروا المؤتمر ... راجع فيدوهات المؤتمر الصحفى للخارجيه الامريكيه يوم 24 نوفمبر اللى فات
المتحدث الرسمى باسم الخارجيه كان بيتكلم عن حركة شباب 6 ابريل فى مؤتمر رسمى
و بيتكلم عليها بكل فخر
كأنهم ولاد اخته
و المشكله ان محدش وجه اى لوم لا ليك ولا لاسراء
اللوم كله و التهزيء جه ليا من كل القوى السياسيه و المدونين
كله بيسأل انتوا فعلا طلعتوا تبع امريكا بقى؟؟

تخيل لو ماكانش حد راح ...او كان وضح بجديه ان مافيش حد بيتكلم عن حركة شباب 6 ابريل
اذا كنا احنا هنا بنقول فيه فرق بين الدعوه للاضراب و الناس اللى صمموا يكملوا الطريق و يعملوا حركه شبابيه .... لكن الناس فى امريكا مايعرفوش الفرق بين الداعيين للاضراب و الحركه التى تكونت بعد انتهاء الاضراب

و اه يا عم
انا بعترف هنا قدام الناس انى اول ما جاتلى الدعوه ماكنتش عارف انهامن الخارجيه الامريكيه
و كنت موافق ضمنيا على الحضور لو كانت من منظمه حقوقيه مستقله استقلال تام
و لما اتكلمنا فى التليفون وقتها قولتلك انا قلقان من الدعوه دى ... فاكر ولا لأ
و قولتلك هاعرض امرها على المجموع ... و لما اتأكدت انها تبع جهه حكوميه امريكيه عرضتها بالفعل علشان مانشرش دعوه مش صحيحه
و قولت للناس قولوا رأيكم ايا كان رأيى الشخصى

و الاغلبيه رفضوا و قالوا ان الدعوه سلبياتها اكتر بكتير من ايجابياتها ... لو كان ليها ايجابيات

اما بخصوص عيد الحب و مؤتمر الحزب الوطنى .. احب اصحح معلومه
فكرة المؤتمر الموازى الالكترونى .. و كمان فكرة عيد الحب تم النقاش فيها منذ اكثر من 4 شهور فى قعده وديه مع المستشار هشام البسطويسى و دكتور نادر فرجانى اللى ساعدنا كتير جدا فى التحضير للمؤتمر الافتراضى من قبل التجهيز ليه بفتره طويله

و لما بلورنا الفكره و كنت انا مقترح فكرة عيد الحب و ظبطنا الايام بحيث تكون حدث احتجاجى جديد و جذاب بعد المؤتمر الموازى على طول

طب فاكر لما قعدت تتريق علينا وتقول اننا شوية شباب هايفين و عيد حب ايه و الحزب الوطنى بيجهز لمؤتمر
ساعتها سألتك و قولتلك هو مؤتمر الحزب الوطنى هايكون امتى ؟؟؟ قولتلى ماعرفش .. قولتلك لماتعرف بالظبط و تفكر شويه هاتفهم احنا بنعملايه بس مش كل التفاصيل بتتنشر و ماينفعش احكيلك فى التليفون

و حتى قولت لداليا وقتها اللى احمد نصار بيقوله و اللى انا بقوله واحد بس هو مش عارف يربط ... المشكله انك لغاية دلوقتى مش عارف تربط
بس ما علينا ... اتمنى تكون فهمتنى

عموما انت اخ قبل ما تبقى زميل فى حلم التغيير
و انت ليك حق تروح
و احنا لينا حق نكذب و نقول الناس دى مش بتعبر عننا

صدقنى الدعوه دى مش مجرد دعوه
ترجم كويس ما بين سطور دعوتهم و حلل اهتمامهم الكبير بحركة شباب 6 ابريل و ادرس الموقف كويس و حاول تتوقع ايه اللى ممكن يحصل

اما بالنسبه للبيان .. فلم يتم نشره فى وسائل الاعلام

و زى ما انت قولت
هانفصل ازاى حد مش عايز يكون معانا اساسا