Monday, 3 November 2008

خطة النسناس الشعبوي للتعليم الابتدائي

انا تصنيفي النسناس الشعبوي، لمزيد من التفاصين انقر هنا

كان السيد جمال مبارك قال اللي عنده بديل يقدمه، وماما قالت لي ما انتوا بتشتموهم عشان كده هم متعصبين ما تكلموهم بالراحة، طيب ح نكلمهم بالراحة، انا باسمع كلام ماما

انا وضعت خطة للتعليم الاساسي
اولا: انتوا بتصحوا العيال بدري كده ليه؟ يصحى الساعة خمسة الصبح؟ ده ربنا مش فارض عليه صلاة، ربنا اللي هو ربنا مش مكلفه بحاجة، ما يصحى متأخر شوية سبعة تمانية، ويدخل الفصل عشرة الصبح ح يجرا ايه؟

ثانيا: ليه المناهج بتاعتهم ما يحطهاش واحد بتاع قصص اطفال؟ وتبقى بالرسومات الحلوة والملونة؟ وليه ما يبقاش معاها شريط وللا سي دي عليه اغاني راقصة فيها الدرس؟
زي احمد حلمي لما كان بيحفظ البنت الصغيرة في مطب صناعي:
اتنين في اتنين باربعة
اتنين في اتنين باربعة
لولولولولوليييييييي
انا مش باخرف على فكرة، ابن خلدون في المقدمة قال كل تلميذ له مدخل في فهم الدرس فيه اللي بيحفظ باعمل له الدرس على شكل قصيدة، فيه اللي بيفهم بالرسم بارسم له، فيه اللي بيفهم بالعلاقات باعملها له قصة شيقة. ده ابن خلدون من 600 سنة، كان بيكلف نفسه ويشوف كل عيل بيفهم بانهي طريقة عشان يفهمه.

ثالثا: الواجب يبقى انه يحفظ الشرايط اللي فيها الاغاني، ولما يكبر شوية والدرس يتعقد يبقوا يعملوه فيلم قصير كوميدي عشان العيال بيحبوا الضحك، ما تروحوش تعملوا له الفيلم رخم، يعملوه كارتون كوميدي

رابعا: يبقى تسميع الواجب انه يسمع الاغنية او يمثل هو وصحابه الفيلم تاني يوم

خامسا: الامتحان ما يبقاش خضة وتسييب ركب بالطريقة دي، يبقى كأنه مسابقة ويتقسم على مراحل بعدد الاسئلة وكل مرحلة بعدها يقعد يلعب ويغني ويدوله شيكولاتة
هو ده مش طفل ومن حقه ينبسط؟ ما الدنيا شيلاله بلاوي كتير لما يكبر

وبالطريقة دي ماحدش ح يسقط ابدا، وماحدش مش ح يعمل الواجب وعليه فيبقى المدرس مش مضطر يطلع تلاتين العيال لحد ما يموتهم

1 comment:

daem60 said...

طريقة جميلة جدا
بس فيها مميزات وعيوب
مميزات الطلريقة ان الاولاد بعد تخرجهم
مش جيجملوا هم الوظيفة ولا القوي العاملة لانهم حيتخرجوا وهم ضامنين العمل في شارع الهرم
وعيبها كما قال لي شخصيا شعبان عبد الرحيم انه حيكون المرشح الاول للوزارة في اول تعديل وزاري
ويجعله عامر