Tuesday 11 September 2007

اللي قتل المتناوي امين الشرطة؟ يا خيبتي التقيلة

اقول حاجة وما حدش يطلع في زوري ويشتمني؟
انا ظباط الشرطة والامناء بيصعبوا عليا
اه وربنا
يعني بجد النظام المحطوط لهم نظام حالة طقس غير محتمل
وفي المقابل لهم صلاحيات انه ياخدوا حقهم المهضوم من الناس
مش من اللي مفروض يدوهم الحق ده
يعني ظابط الشرطة بيطلب منه عدد معين من القضايا كل شهر
عشان يترقى
ومرتبه ستميت جنيه
طبعا بالنسبة لسواق ستميت جنيه تجوعه فما بالك بباشا ولازم يعيش عيشة باشا
والسيط ولا الغنا خصوصا اننا مجتمع طبقي بطريقة مقززة
وقاعد في القسم مثلا في مكتب شبه الزنزانة كئيب ومقبض ومقرف وقذر
والاخ بقى اللي مطلوب منه عدد كذا قضايا في الشهر
مش متدرب التدريب اللي يخليه يواجه المجرمين بجد ويعرف يوقع بيهم
لا تدريب بدني ولا تدريب ذهني
ما تصدقوش المسلسلات بتاعة الظابط النبيه الذكي اللي قعد يفكر ويحل
لغز الجريمة ده
ولا الظابط الشجيع اللي ضرب خمستاشر بايده اليمين وتسعتاشر بايده الشمال
وفضل له واحد في النص فرقه اتنين
الظابط اللي بحق وحقيق غلبااااااااااااااان ولما بيعمل شغله بيتقتل زي الشهيد المتناوي
ويا ريت اللي قتلوه هم المجرمين
لا
الا اللي قتله امين الشرطة
يا ريته كان قاصد
ده قتله بالغلط
يعني انا مثلا لو معايا مسدس وقاعدة جنب غودي صاحبتي
ودخل علينا حرامية ممكن اتخض وارتبك واقتل غودي بالغلط
بس ده انا
انا مش امين شرطة المفروض انه متدرب على المواجهات
مع اعتى المجرمين ومتدرب ذهنيا اكتر ما هو متدرب بدنيا
لان المواجهات مع المجرمين محتاجة حسن تصرف وذهن يقظ من بتوع ادهم صبري
رجل المستحيل
مش لازم يعني يحرك اطرافه الاربعة
بس المفروض انه واخد شوية تعليمات كده يعملها في المواجهات
عشان يشل حركة المجرمين
والمجرمين دولم كانوا يا عمي سواقين مكروباظ
يعني مافيش توخولف اكتر من كده
ده ممكن لو جيت من وراه وقلت له بخ يرمي المطوة من ايده
وياعيني امين الشرطة دفع تمن انه ماتلقاش التدريبات اللازمة
واندب ست سنين سجن
وتهمته: القتل الخطأ واستخدام العنف مع المتهمين
هئ هئ هئ
قال يعني قلبهم على المتهمين
طيب والنبي انا عندي سؤال
المتهمين دولم لمن اتقبض عليهم وانهاروا واعترفوا
طبعا انت بتقراها دايما: وانهار واعترف
ما تعرفش انهار ازاي؟
واحد داخل القسم اعصابه حديد ايه اللي ينهاره جوة بالظبط
المهم يعني الظابط اللي انهار على ايديه المتهمين واعترفوا
بجريمة ما عملوهاش
يا ترى استخدم ايه معاهم
ولولا انهم لما طلعوا الرصاصة لقوها ميري كانت العيال دي لبست اعدام
يعني هو امين الشوربة اللي مجرم اثيم عشان استعمل معاهم العنف؟
وامين الشوربة هو اللي مجرم اثيم عشان ما عرفش يستخدم الفرفر اللي هم ادهوله
وما شرحوش له ازاي الفرفر ده بيشتغل؟
قوووووم ايه
قوم الظباط والامناء اللي مش متدربين وما بيعرفوش يواجهو المجرمين
بيعملوا ايه؟ بدل ما يموتوا زي الشهيد المتناوي او يتسجنوا زي امين الشوربة
بيطلعوا القضايا اللي مفروض يجمعوها كل شهر من الناس اللي مش محتاجة مواجهة
يشوف له واحد كده على شرط انه يكون اغلب منه
من الظابط يعني
اللي هو غلبان فعلا
ويروح ماسكه مكتفه ونازل فيه هبد ورقع ومرمطة
ماهي دي الحاجة الوحيدة اللي اتعلمها وما يعرفش يعمل غيرها
لحد ما الواد يعترف باي حاجة
وبكده يطلع له العدد المطلوب من القضايا عشان يترقى
يعني الناس كلها شتمت الشرطة عشان ما تدخلتش في احداث التحرش
طيب يعني ماهم ما يعرفوش يعملوا حاجة يا اخوانا
بجد ما يعرفوش ما علموهمش
اوعى يغرك جسمك
واوعي يغرك البدلة
ده زيه زيك بالظبط
حتى ما يعرفش يضربك وانت مفكوك
لازم يبقى معاه طقم عشان يكتفوك وهو يضربك
لو الماتش مان تو مان ممكن ح الظابط يتفسخ في ايدك
طيب يعمل ايه
ما هو مطحون زيه زيك
ومقهور زيه زيك
وعايز فلوس زي ما انت عايز فلوس
وعايز يترقى زي ما انت عايز تترقى
والحكومة بتقول له: خلص حقك من الناس يا بطل
بس على شرط الناس دول يبقوا غلابة
انت مش قد المجرمين اللي بجد
==
كان فيه عصابة بتقف في اخر الهرم بترفع اي حد يعدي
العصابة دي عبارة عن عيال ستاشر وسبعتاشر سنة
كل ما حد يروح يشتكيهم البوليس يقول له: لا احنا بنخاف منهم
اصلهم مجرمين
ده اسم الهرم اللي كان فيه الظابط بتاع كليب الاقلام على وش مواطن
اكيد مش من ضمن العصابة دي
===
انا مش بالاقي تبرير لعناصر الشرطة اللي بتستغل سلطاتها
وبتخلص حقها من الناس
لانهم استسهلوا
بدل ما يشتكوا وللا يعتصموا ويطالبوا بحقوقهم الادمية
من الجهات المسئولة
مستمرئين انهم يخلصوا من الناس ويقلبوا رزقهم من البشر
خصوصا ان النموذج الشريف من الشرطة مش مشجع ابدا
بيموت
زي المتناوي
بس الحقيقة هم مالهمش تبرير لكن ده تفسير
تفسير ليه هم بيصعبوا عليا
فعلا هم ولاد مصر
ماهو الغلبان في مصر لما بيقدر على اللي اغلب منه ما بيرحموش
عشان كده انا متحمسة لمصريين ضد التعذيب
عشان احنا عايزين ثقافة جديدة غير ثقافة الغلبان في الاغلب منه
عايزين ثقافة: نساع بعضينا كده ونقدر ظروف بعض
انا مقدر انك بتاخد ستميت جنيه
وانت تقدر اني مش انا السبب في الظروف اللي انت فيها
واني زيك بالظبط
وان علينا احنا الاتنين نحاسب المسئول عن ظروفنا دي

1 comment:

Anonymous said...

أختى الحبيبة
كـل رمضان وانتى بخير وياااااارب يكون رمضان سعيد عليكى ويكون فيه الخير كله يااااااارب آمـــــــين