Monday 29 March 2010

السادة المعلقين.. هو حضراتكوا ما بتفهموش؟

تحديث:
ده تقريبا فيه ناس مش بس مش فاهمة اني ما بانزلش تعليقات طائفية وعنصرية، دول كمان مش فاهمين ايه الطائفي وايه العنصري وايه المذهبي
احم.. طيب، بالبلدي كده:
الاساءة لمجموعة بشرية، او تحقيرها، او اطلاق احكام عامة عليها بسبب دينها او مذهبها او عرقها او جنسها. مثال:
النصارى عباد الصليب.. النصارى عباد الخروف.. الشيعة الانجاس.. الروافض ابناء المتعة.. الامازيغ الهمج.. العرب جرب.. اليهود الخنازير.. المسلمين الارهابيين.. الاسلام دين عنف.. "الملمين" - يعني المسلمين - الغزاة...إلخ
الاساءة الى ما اقرت المجموعة البشرية بشبه اجماع انه يشكل رمز لها:
زي الكعبة والنبي محمد عليه الصلاة والسلام والمقدسات عند المسلمين، الصليب والمسيح والمقدسات عند المسيحيين، الشمعدان واللبس اليهودي عند اليهود، وهم مش بيهتموا بالانبياء والرموز قوي هم بيهتموا بالمجموعة البشرية اليهودية اكتر، يعني رسم اليهودي مثلا بانف معقوف يعد اساءة للمجموعة دي، علم بلد - نستثني من ده علم الكيان الصهيوني عشان هي مش بلد اصلا ولا نستثني العلم الامريكي لانه بلد وانا مش فاهمة بيحرقوه ليه - الخ.
بالمختصر كده.. قبل ما تشتم الناس فكر ان الكلام ده بيتقال عليك.
ودي الحاجة اللي ما عرفتش الامم المتحدة تعملها: انها تنص على ان كل انسان بصدق يحب لأخيه ما يحب لنفسه.لا وقال "لا يؤمن" لا يؤمن أحدكم حتى يحب لأخيه ما يحب لنفسه.. ومافيش اكتر من اللي بيقولوا انهم مؤمنين هم اللي ما بيحبوش لاخيهم ما يحبون لانفسهم. اخوك هو اي انسان زي ما الامام علي قال: الناس اما اخ لك في الدين او اخ لك في الخلق.
------------
أنا تقريبا المدونة الوحيد - في حدود علمي - اللي حاطة قانون ثابت وواضح للتعليقات، وغيري بينزل تعليق او ما ينزلوش يخليه او يمسحه على حسب مزاجه لان دي مدونته وهو حر فيها، مالوش قانون معين، على حسب مزاجه
انا الوحيدة اللي حاطة لنفسي قانون وبامشي عليه واظن اني وضحت القانون ده قبل كده.. بعض السادة المعلقين واضح انهم ما بيفهموش لا مؤاخذة.. طب نعيد تاني:
1- ممنوع منعا باتا التعليقات الطائفية
2- ممنوع منعا باتا التعليقات المذهبية
3- ممنوع منعا باتا التعليقات العنصرية
وطبقا للقوانين الدولية، التلاتة اللي فوق دول لا يندرجوا تحت بند حرية الراي والتعبير لانهم خطاب كراهية - وبيحطوا معاهم كمان التشهير بس انا مش حاطاه - ايه بقى ماسورة التعليقات العنصرية والطائفية والمذهبية اللي طفحت في ام المدونة دي؟ 
ماهو حاجة من تلاتة، يا اما اللي بيعلق التعليقات دي عايز يغلس، يا اما ما بيفهمش، يا اما ما عندوش تعريف واضح للطائفية والعنصرية والمذهبية:
ما يدخليش مسلم يشتم المسيحيين هنا
ولا مسيحي يشتم المسلمين
ما يدخليش سني يشتم الشيعة هنا
ولا شيعي يشتم السنة
ما يدخليش مصري يشتم العرب والجزائريين على وجه الخصوص
ولا مش مصري يشتم المصريين

وحيث ان الغالبية بيبقوا رجالة مصريين مسلمين سنة بيشتموا في غير المصريين اللي مش مسلمين او مش سنة، فاحب اقول لحضراتكوا ان اي حد فيكوا لو اتولد مسيحي كان حيبقى مسيحي، ولو اتولد شيعي كان حيبقى شيعي، (لا معلش ما كنتش حتفكر كده وتقرا في الديانات وتغير دينك او مذهبك، لان عادة المتعصب ما بيفهمش وما عندوش الحياد اللي يخليه يقرا غيره بموضوعية ويحكم بالحق، فزي ما اهله علموه حيمشي وراهم وحيبقى قفل بصرف النظر عن دينه او مذهبه او جنسيته، هو فيه مذهب لوحده كده اسمه مذهب الاقفال) وقطعا لو كنت مش مصري كنت حتفضل مش مصري يعني
مافيش بقى واحد عشان فاشل ومش عارف يعمل حاجة في حياته تخليه يفتخر بنفسه يقوم يلجأ الى انه يفتخر بانه اتولد راجل او مسلم او سني او مصري.. دي حاجة مالكش فضل ولا ذنب فيها، سواء كانوا فضل او ذنب
وما يجيش واحد معقد من حياته وكاره الدنيا يصب جام كراهيته على ناس مالهاش ذنب في اللي حصله في حياته، لو شخص محترم يروح يشوف مين كرهه في عيشته وينتقم منه
احترم نفسك كده لو عايز الناس تحترمك، كل واحد شايف دينه وجنسيته ومذهبه احسن حاجة
وانا باعترف اني تسيبت اخر حاجة في التعليقات مؤخرا ودي قلة ادب مني، لاني المفروض التزم بالقانون اللي حطيته لنفسي
ومن هنا ورايح مافيش تعليقات طائفية ولا مذهبية ولا عنصرية ح تنزل
اللي عايز يطرش يروح يطرش في حتة تانية

44 comments:

amr565 said...

كلام جميل جدا ولازم الكل يؤيدة ومن هنا ورايح مش حنشوف ناس بتشتم في شيوخ ولا في قنوات اسلامية لان في المقابل في ناس حترد بنفس الطريقة واللي عايش دور المضطهد والمظلوم يشوفله مدونة تانية عنصرية طائفية تطبطب عليه وتقوله الاغلبية دول كخه وانا حخدلك حقك منهم
شكرا صاحبة المدون علي هذا الخطوة المتاخرة شوية لكن خطوة عزيزة علي كل حال

Unknown said...

لا نشتم في شيوخ وقسس وقنوات زي ما احنا عايزين دي مش طائفية

اتعب نفسك كده ودور على تعريف الطائفية والمذهبية والعنصرية

لما انا اكتب عن الحويني وللا عن البابا في موقف او كلام هم بيقولوه دي مش طائفية لاني باتكلم عن افراد وباهاجم اراءهم مش ديانتهم ولا مذهبهم

لكن لما واحد عامل لي متدين وبيعرف ربنا ويقول على ناس كتابيين بيعبدوا ربنا زينا انهم بيعبدوا خروف دي اسمها طائفية وخطاب كراهية

لما انا ما يعجبنيش السيستاني دي مش مذهبية بس لما واحد يقول الشيعة انجاس ولا يجمعنا بهم رب ولا نبي ولا كتاب دي اسمها مذهبية وخطاب كراهية

لما انا ما يعجبنيش كلام علاء مبارك غير لما علاء مبارك يقول على شعب بحاله انهم همج دي اسمها عنصرية وخطاب كراهية

ماحدش هنا قال السنة ولاد كلب مثلا، ولا المسلمين بيعبدوا جاموسة ولا المصريين بهايم

لكن فيه ناس هنا دخلت شتمت المسيحيين كلهم، والشيعة كلهم، والعرب كلهم والجزائريين طبعا

دي عنصرية وطائفية ومذهبية ووساخة وقلة ادب وسفالة وانحطاط وفقر انساني وامراض نفسية ويروحوا يشوفوا لهم حتة يتعالجوا فيها

لكن الاراء في اشخاص او اراء دي حرية راي وتعبير

ولما اقول قناة الناس كنيف من غير سيفون ده رأيي لان قناة الناس لا هي مذهب ولا هي ديانة ولا هي جنسية

ولما اقول الحويني بيقول كلام شيطاني ده رايي لانه مش النبي محمد وشتيمة النبي محمد عنصرية مش لانه شخص او فرد ولكن لانه بيرمز لمجموعة بشرية بتتبع ديانته، وهو مات، واهانته ليس المقصود منها الا اهانة هذه المجموعة البشرية

اللي له نبي اسمه ابو اسحاق الحويني يوريني نفسه

مواطن مصري said...

يعني اهاجم اراء السلفين و قناة الناس

Unknown said...

انت براحتك يا مواطن
:)

عم مينا said...

amr565

تعليقك يثبت ان حضرتك معندكش أي فكرة عن معني الطائفية و العنصرية

و ده السبب الرئيسي وراء هجومي علي الشيوخ و القنوات الدينية.. لأنهم استطاعوا أن يقنعوا حضرتك و كثير من الناس.. ان الشيخ و القناة الدينية هما الإسلام.. و الهجوم عليهم يمثل هجوم علي الإسلام..

لكن اللي لازم حضرتك تفهمه ان القنوات دي زيها زي أي قنوات تانية... و الشيوخ دول زيهم زي أي مقدمين برامج في قنوات تانية.. يعني زي ما من حقي أشتم قناة الجزيرة أو تامر أمين.. من حقي أشتم قناة الناس و الشيخ الحويني

mUsLiM said...

الحقيقة أن لى بعض الملاحظات الفكرية على هذا المقال وهذا الموضوع الهام خاصة فى الفترة الأخيرة

لأنه بالفعل كثر الشتم والسب بلا وعي ولا أدب ولا أخلاق حميدة

والحقيقة أن قوله صلى الله عليه وسلم ((لا يؤمن أحدكم حتى يحب لأخيه ما يحب لنفسه )) فهو على الأخ فى الدين وليس الأخ فى الإنسانية كما حاولت صاحبة المقال تصويره

ولكن هناك أيضاً أحاديث أخرى عامة كقوله صلى الله عليه وسلم ((المؤمن من سلم الناس من لسانه ويده ))

وهذا الحديث أبلغ وأنسب للموضوع لأنه يتعلق مباشرة بمخاطبة الخلق جميعاً وأن المؤمن الصادق هو من يسلم الناس من لسانه وكلماته

لكن الموافقة من حيث المبدأ على منع العنصرية فى التعليقات والخطابات

لا يجب أن تجعلنا نغير بعض الحقائق

فمثلاُ كلمة ((عباد الصليب)) هذا توصيف للواقع فى الحقيقة

فالنصارى يعبدون الصليب وهذا واقع فهم يسجدون ويركعون ويصلون إليه

ولا يجب على النصارى أن يغضبوا من ذلك

بل هو رمز مقدس عندهم

فمثلاً وصف غير المسلمين بالكافرين

هذه ليست عنصرية هذا توصيف للواقع فكل أصحاب ديانة كافرين عند أصحاب الديانة الأخرى

فأنا مسلم وكافر بسائر الديانات الأخرى

وكذلك النصرانى كافر بسائر الديانات الأخرى

لكن مع ذلك أنا لا أدعو إلى مخاطبة النصارى بكلمة كافر أو عابد الصليب

فالمسلم عليه أن يكون حسن الخلق طيب النفس حلو الكلام

ولا يجب على المسلم أبداً أن يعتاد السب والشتم حتى مع الأعداء لأنه أسلوب دنئ فى الحقيقة

إلا أنه وجب التنويه لأن هناك اختلاف بين العنصرية وبين توصيف الواقع على الحقيقة

أما بالنسبة للشيخ أبي إسحق

فأنا لا أدرى ما مشكلة الشيخ أبي إسحق فى هذه المدونة

ولكن دعونا من أ[ي إسحق، ولكن لو أخذنا بمفهوم صاحبة المدونة فإنه يجب عليها ألا تسئ إلى السلفية

باعتبار أن السلفية صارت اليوم تياراً إسلامياً لا ينكره أحد وموجود على أرض الواقع

وبالتالي فشتم هذا التيار وسبه ولاشك عنصرية وفق مفهوم الكاتبة

هذا على الرغم من أن مفهومى للسلفية أن كل المسلمين سلفيون يجب عليهم الإقتداء بالسلف الصالح رضوان الله عليه

على أي حال فالموضوع جدير بالطرح والمناقشة

السلام عليكم

312asdf said...

سؤال هي مش الشتيمة دي عيب و ميصحش, و لا لازم القلل المتحدة تقول انها عيب الأول. طب ايه لازمتها الشتيمة أصلا يعني متعرفيش تنتقدي بدون سب. و هو مين اللي قال أن الشتيمة صح حتى لو بننتقد أفراد و ليس جماعات. و بما أنك الحكم هنا, هو ايه الفرق من وجهة نظرك و ليس القلل المتحدة و حروق الانسان, بين العنصرية و المذهبية و الطائفية و النقد. يعني لو قلت الشيعة ضالون لأنهم بيسبوا السيدة عائشة هل ده مذهبية و لا نقد و مناظرة في نقطة خلاف, لأن أكيد حيكون في خلافات مذهبية و دينية و ده مش عيب و عادي و مناقشتها باحترام مفيهاش مشكلة, و أيضا لا يوجد مشكلة أن أقول أنهم ضالون بسبب هذا أو حتى خرجوا من الملة و نتناقش في خطئي من صوابي, أنا شفت من أكتر من 7 سنين برنامج لجاسم المطوع على اقرأ, و كانت حلقاته حوارات رائعة بين 3 شيوخ و 3 قساوسة و كل حلقة قضية و النصارى قالوا في حلقة القرآن محرف عشان كذا و كذا و الشيوخ ردوا عليهم و الشيوخ قالوا حرف الانجيل عشان كذا و كذا و القساوسة ردوا عليهم في منتهى الرقي و الافادة للمشاهد. يعني تخيلي واحد يقول القرآن محرف و اسمعه عادي مادام باحترام. انما رفض طرح الخلافات المذهبية على الاطلاق فأنا أراه ظاهرة غير صحية,,, و بالمناسبة صحيح, زقزوق عندما قال حكاية الخروف أنا اتاخدت بس طنشت بس لما رجع لحكاية الشامبو كنت حكلمه بس انتي سبقتي بالمنشور الجديد ده. تكملة لموضوع الشيعة طب انتي بتقولي بلاش المذاهب, لو حولتها لأفراد و قلت حسن نصر الله بيقول كذا على السيدة عائشة هل سيسمح بذلك, طب لو خدت راحتي و شتمته مسموح و لا الأفراد اللي يتشتموا هم الحويني و بس أو أي شخص مش فارق معكي في شيء.
طب مش قناة الناس لها أيضا جمهور عريض يسيئه أن يعمم الكلام على القناة هكذا, مش عايزين ليه نراعي مشاعرهم. و لا أقول لا تنتقد انتقد بحجة و برهان, مينا لما قال القنوات فيها زبالة عدنها و قلت قصده على حاجات معينة التي يمكن طرحها للخلاف بغض النظر عن كلمة زبالة, أما عندما عمم الكلام على القناة ككل فهذا لا يمكن قبوله. و نفس الكلام بالنسبة لكي, عندك اعتراض أو نقد قولي عندهم كذا و كذا و كذا و نتكلم أنما التعميم يعتبر نوع من التحيز و هو أعمى مادام لم يصحب بدليل. طب ممكن توضحيلي حكاية الكنيف دي يتبنى عليها حوار أو مناظرة ازاي و لا يترد عليها ازاي.

ممكن أبدي رأيي في موضوع طرحتيه بالنسبة لحكاية الدين و الاختيار و أنا أكلمك كمسلمة فاللي حيحس ان الكلام حيؤذيه ميقراش من أولها.

هناك حديث في البخاري
ما من مولود إلا يولد على الفطرة ، فأبواه يهودانه ، أو ينصرانه ، أو يمجسانه ، كما تنتج البهيمة بهيمة جمعاء ، هل تحسون فيها من جدعاء ، ثم يقول : { فطرة الله التي فطر الناس عليها لا تبديل لخلق الله ذلك الدين القيم }
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 4775
خلاصة حكم المحدث: [صحيح]

فأنا أؤمن أن الانسان في أصل فطرته الاسلام, ثم يتحول بسبب أبويه الذين يضلونه, و لكن لو طلب الهداية و تدبر في الاسلام و نهى النفس عن الهوى لعاد إلى فطرته. مثله في ذلك مثل العاصي هو أيضا بمعصيته تنكس فطرته شيئا فشيئا حتى ينغمس في الحرام و لا يراه حراما. القس السابق و الداعية يوسف استس حكى عن كيفية اسلامه, أخر القصة بعدما تدبر في الاسلام و تعاليمه و كان في تردد فسجد لله و قال اللهم لو كان الاسلام و محمد حق فابعث لي بآية, و كان يتوقع هذه الأية عصافير تطير أو رياح تهب و لكنه يقول لم أجد شيء من هذا و لكن كانت راحة و سكينة وجدتها في قلبي لم أشعر بها قط في حياتي

السؤال الأخير: هو حتنشري التعليق ده و لا حيطلع طائفي و هتلري

نعيب زماننا

عادل المصري said...

الناس معندهاش ثقافة تقبل الاخر واختلافه معها واحترامها لوجوده العملية محتاجة تربية انا مش فاهم اصحاب المذاهب كانوا عايشين مع بعض ازاي

Unknown said...

ابلتشى يا ابلتشى
انا فهمت الدرس...كده يعنى إحنا مش ينفع نعلق بحاجه إلا لو كانت على مزاجك..صح؟؟
يعنى نشتم فى اللى بتكرهيهم بالشخص وكده يعنى عشان التعليق يطلع
إيه المعيله دى
إيه قلة العقل دى
انا دلوقتى بمارس القاعدة اللى موجودة هنا وهيا الهجوم على شخص -اللى هوا انتشى يا ماما- مش موافق معاه ولو جزئيا
لأن موضوع الطائفية ده شبه متعارف عليه ومش حاجه جامده أوى منك إنك تعملى قانون تمنعى فيه التعليقات الفارغه اللى اشرتى ليها فى البوست اللى ملوش لازمه ده
ومعروف ان اللى يخش يشتم بس ايا كان الجماعة او الشخص الهدف يبقى ياغبى ياما معندوش نقطه يناقشها
إلا فى حالة الغضب الشديد بسبب اللى الطائفة دى بتعمله او جزء منهم
وده بيبقى جزئيا متفهم من الناس التانيه اللى عارفه ان ده بس حيزود الطين بله

ماجد العياطي said...

كلام جميل جدا

وقوانين ممتازه للمدونات ربنا يبارك فيكي

ياريت الناس تفهم الكلام ده

جزاكم الله خيرا

Anonymous said...

كلام مره حلو..اما مصر وسفاه ماوا وحب الاحرار في العالم بقت لا يزارها اليوم الا اعداها شيمون بيريز و بنيامين نتنياهو وإريل شارون
.

ehabafndy said...

كلامك رائع و جميل جدا
بس أنا ليا إعتراض واحد مقولة سيدنا على هى الناس إما أخ لك فى الدين أو أخ لك فى الخلق غير دقيقه لكن الدقيقة هى أو نظير لك فى الخلق .
و هذاليس داع إلى العنصريه أو تقليل أو إعتراض على كلامك لكنه نوع من التدقيق .
علاقتى بأخى أو نظيرى يجب أن تكون طيبه فى كل الأحوال و منفتحه و قد لا تخلو من الخلاف سواء بين أخى أو نظيرى .
لكن لا يمكن لعلاقتى بأخى أن تكون متساوية مع علاقتى بنظيرى من المؤكد أن علاقتى بأخى أكثر خصوصيه و تميز .
الخلاصه أن نظيرى ليس أخى لكن يمكن أن يكون شريكى جارى زميلى إلى آخره بما يرضى الله الخلاف لايمكن أن يفسد للود قضيه و من حق نظيرى أن أحترمه و لا أهينه لأن ذلك فيه إحترام لنفسى و من حق نظيرى أن أحترم معتقداته حتى أجبره على إحترام معتقداتى .
أحترم و أقدر جدا ما قلتيه فى هذا الموضوع . و شكرا

amr565 said...

اه طبعا واضح ممكن ننقض كلام شنودة قاله او الاخر ينقض كلام الشيخ الحويني قاله لكن التعرض الي شخوصهم والتجريح فيهم فده كده كده حيودي االي ابعد من كده ولو رجعتي الي حوارنا مع مينا فلن تجدي مني علي الاقل او الاخوة وكذلك مينا اي تعدي لا علي الاسلام ولا علي المسيحية كديانة ولكن هو سب في شيوخ وانا بينت تشنج الكنيية وتطرفها وتكفيرها للاخر المسيحي وان ذلكك النهج التكفيري ليس حكرا علي بعض المتشنجين المسلين ويجب تسليط الضوء علي تعصب وتطرف الكنيسة المصرية لان فكرها يرجع الي فكر جماعةالامة القبطية طب ليه بقي حضرتك يا استاذة قلتي عليا انا دون بقية خلق المدونة طائفي وارجعي الي حواري مع مينا وراجعي ما كتبته من بنود وقوانين ووو وقارني حواري مع ميناولا تعتذري لان الذي ياخذالناس بالشك وتاخذه العزة بالاثم فده لا يرجي منه اعتذار

Early bird said...

لما تقولى قناه الناس كنيف ما لوش سيفون

كل اللى فيها من اول اللى بيعلموا القران للى بيعملوا اعلانات منتجات حيختصموا معاك يوم القيامه وربنا بقى يفصل بينكم

مواطن مصري said...

وقال جمعة ردا على أسئلة المشاركين فى أعمال مؤتمر "الإرهاب" الدولى المنعقد بالمدينة المنورة:"إن جهاد الدفع جهاد مطلوب"، مستشهدا بأيات من القرآن الكريم، ومشيرا إلى أن مقررات جنيف الأولى والثانية تجيز مقاومة المعتدى باعتبار ذلك كفاحا مسلحا وليس إرهابا.
وأضاف ان "هذا الوضع ينطبق تماما على فلسطين، ولا يعد الجهاد المسلح فيها إرهابا.. بل هو مطلوب".
ولفت المفتي إلى أن الجهاد يتطلب "المُكنة" أي القدرة والإمكانية والاستطاعة تعليقا على موقف الحكام المسلمين من الجهاد، موضحاً أن رسول الله - صلى الله عليه وسلم - وأصحابه ضربوا المثل في ذلك

مفتي الجمهورية: الجهاد المسلح في فلسطين ليس إرهابا.. بل هو مطلوب

http://www.masrawy.com/News/Egypt/Politics/2010/march/29/mofti.aspx

الشيخ علي جمعة راجل محترم

Unknown said...

طب هم بييجوا منين الناس دي؟

يعني اللي اسمه محمود ده محروق مني من زمان لاسباب خاصة بيه

انما الباقي بييجوا منين؟

amr565 said...

ابدا يا مينا ده تعليقي يثبت اني لا احب ان اشتم او اسب او العن تلاثة ميتين اي قسيس لان ديني واسلامي ورسولي علمني كده لكن ممكن النقد وبادب لكن فرش الملاية وسب الناس بغل وحقد وتفريغ طاقة الكره في شيخ من الشيوخ بحجة انه شخص ومش طائفة ومش مقدس فده بيتسمي اسقاط مرضي وتقريبا واضح ان مجمل حدود علمك عن الحرية هو انك تشتم الشيوخ والقنوات الاسلامية يعني حرية وان واي وحضرتك بتتكلم عن الشتم كانك بتتكلم علي السلام عليكم او بنجور مثلا يعني للاسف معندكش ادب اختلاف ولا رقي وارتقاء بالحوار من درجة المراهقة الفكرية الطائفية اللي انت فيها
اما صاحبة المدونة فانا تحدتها ان تظهر في حواري مع مينا اي طائفية بالمقايس التي وضعتها فانا لم اشتم صليب ولا قدحت في الوهية المسيح المزعومة ولا في الكتاب الذي يحوي عهد قديم وعهد جديد مكون من 27 سفر ده علي الجديد ولا ذميت عقيدة الفداء والصلب كل اللي قلته كلام عن بيشوي وشنودة ورفائيل فهل الكنيسة ورجالها خط احمر في المدونة اللي مش بيالها وش من افه دي ولا مسموح بشتم الشيخ الحويني فقط هو وشيوخ وعلماء المسلمين فاذا قلتي لا مسموح بنقدهم طب ليه قلتي عليا ان طائفي واخذ الناس بالشيهة وانا لم افعل اكثر من النقد
يبقي في بند غير معلن في ذهن حضرتك ولم تكتبيه في تعريف الطائفية كما قلتي وهو ممنوع منعا باتا المس بالكنيسةوالا حتعتبر طائفي ده بند مكتوب بالبنط الابيض وهو غير مرئي

اسد الجيزة said...

احييك علي الخطوة ديه ونا مأيدك عليا احنا دعاة هدي مش لعانيين بس رجاء سيبوا ام السلفيين في حالهم رجاء كفاية عليهم الاعلام والدولة اهو دابقي التمييز بعيينه هههههه يقول رسول الله صلي الله عليه وسلم (لايزال طائفة من امتي ظاهريين علي الحق لايضرهممن خالفهم ولا من خذلهم حتي تقوم الساعة ) ويقول النبي صلي الله عليه وسلم افترقت اليهود علي احدي وسبعين فرقة كما افترقت النصاري علي اثنتين وسبعين فرقة وستفترق امتي علي ثلاث وسبعيين فرقة كلهم في النار الاواحد قيل من يارسول الله قال ما انا عليه واصحابي .

Unknown said...

انا شفت لسه التعليق اللي بيقول لي طب بقى ما تشتميش السلفية والا تبقى عنصرية

ده اعتراف بقى ان السلفية خارج السنة؟ وانها ديانة او مذهب وليست تيار؟

السلفية زي الاخوان، لو واحد مش عاجبه الاخوان وبيشتمهم

انا بانزل شتيمته ولو اني انا مش باشتم الاخوان لان ح اشتم فيهم ايه؟ ناس مدنيين في السجن العسكري

واحد مش عاجبه الشيوعيين وبيشتمهم ده تيار

والسلفية المفروض، المفروض، انها تيار

اذا كانت عايزة تعتبر نفسها ديانة او مذهب خارج السنة

ياريت

ده منى عيني والله

بس يعلنوها بقى

اسد الجيزة said...

اه علي فكرة اخوتنا في الدين لئلاما كانشي فيه حاجة اسمها الولاء والبراء ( يأيها الذين امنوا لاتتخذوا عدوي وعدكم اولياء تلقون اليهم بالمودة وقد كفروا بما جائكم من الحق)
في كافر فيه مسلم كل من لايدخل الاسلام فهو كافر بس انابس اعترض انه يكون اللعن و السباب اسلوب للدعوة او استخدامه بغرض الكيدة والمحرانة بس

اسد الجيزة said...

لا السلفية هم اهل السنة والجماعة

Unknown said...

وادي كمان اعتراف تاني ان السلفية هم الفرقة الناجية مما يعني انهم خارج مجموع السنة

كويس

ما يقولوش على نفسهم سنة تاني بقى

سامي said...

وانا باعتباري قفل كبير باعلن التزامي بالقوانيين الدولية وبلاها تعليقات بس اكيد حقرأ فى المدونة طبعا ولا كمان منقراش ؟؟ ههههههه

utopia said...

بعد اذنك يا نوارة
انا عايز بس افكر الشباب اللى بيدافعوا عن قناة الناس
ان قناة الناس اول ما بدأت كانت قناة رقص وصاحبها لاقاها موش جايبة همها غير المحتوى لقناة دينية
ونفس الحكاية حصلت مع قناة اسمها الخليجية وصاحب القناتين واحد
الحكاية فى الاخر سبوبة الدين فى الكتب مش ممنوع ولا مقصور على حد فكروا بعقلكم شوية

amr565 said...

انا حاسس اني قاعد في الكرنتينة او جبل ناعسة اومتاهة كرموز كل الاختلاف علي نشتم ولا منشتمش هو اللي بيشتم ده اصلا بني ادم في حاجة اسمها نقد لان اللي بيشتم بيكون مش اكثر من رداح الكتروني والفرق بينه وبين ام سهير القوادة اللي في اللاجتيه هو امتلاك لاب توب فقط

312asdf said...

الأخ Muslim

أنا اللي أعرفه أن الحديث يقول المسلم من سلم المسلمون من لسانه و يده.

فكنت عايز أعرف الرواية التي ذكرتها معاك سند لها أو على الأقل إما الصحابي الذي رويت عنه أو الكتاب الذي ذكرت فيه
و شكرا.

أبو أمك said...

أنا اسمي مكتوب ؟؟

Tamer said...

معلش سؤال انا مش عارف اجابته فعلا

هما الصوفية مذهب ولا تيار ؟
و المعتزلة مذهب ولا تيار ؟
و الأشعرية مذهب ولا تيار ؟
كل واحدة من دول برة السنة ولا لأ ؟
و يجوز التعرض لها هنا ولا لأ ؟

الكاثوليكية و البروتستانتية مذاهب ولا تيارات ؟
يعني يجوز مينا مثلا يتكلم عليهم ولا لأ ؟

طب التعرض لشخص البابا هنا يجوز و ما يتمسحش زي ما قالوا ؟
طب التعرض لشخص اسماعيل هنية و خالد مشعل ؟
طب التعرض لشخص الشيخ حسن نصر الله ؟

انا بالنسبة لي مش مهم مسموح ايه و مش مسموح ايه , انا حتى تعمدت اني اختار اشخاص و (طوائف/تيارات/مذاهب) من كل اتجاه عشان ماحدش يفتكر اني بادور على الغلط في جهة معينة

انا عايز افهم بجد وجهة النظر و شكرا لسعة صدرك يا استاذة نوارة

شمس العصارى said...

على الهامش
و تعليقى هنا كله على الهامش يعنى مش فى صلب الموضوع لانه واضح ان الموضوع مبنى على موضوعات تانية سابقى
فانا حعلق على الهامش بس
1- ان الذى يحمل سيف السماء لابد ان تكون صرامته فى مثل طهارته و ان يحاسب نفسه كما يحاسب الناس
- انا بدلت صرامته وطهارته بعكس النص الاصلى على ما افتكر -
2- لما اصف واحد بما هو معروف عنه و بما يعلنه هو كده ابقا ضمن الطائفيين ... مثلا
3- بفرض عدم علمى ؟؟؟؟ كتير من المعلقين خاضوا فى السلفية
طيب مش يقلولنا يعنى ايه سلفية و بيستندوا لايه و ايه ادبياتهم و ايه ملامح فكرهم و ........
اختصارا يحدثونا عن السلفية الاول
انا معرفش و بسال بس
4- ينفع اقول بحب اردوغان ولا مينفعش ههههههههههههه
ـــــــــــــــــــــــــــــــــــ
برضه على الهامش بس ليكى يا نوارة
الموضوعات السابقى بما شملته من تعليقات - اصاب من اصاب و اخطأ من اخطأ و تجاوز من تجاوز - التعليقات بكل ما حوته ما هى الا تعبير عن الحوار المجتمعى الحادث الان فى مصر
و الذى لن يحسم خلال العقدين تلاته الى جايين
وكل التعليقات تقريبا - هذا البوست - ممكن تصنف باطائفية و العنصرية و المذهبية
و عليه فالحوار المجتمعى كذلك
بعد كده هل هناك احد فى مصر يخر عن تصيف البوست الاخير ده
اللهم الا انتى يا نوارة و اربعة تانيين
هما مين مش عارف و ابقى قوليلنا عليهم
هههههههههههههههههههههههههههه
طبعا حتردى بعنف كالعادة
اسيب هنا بقا واروح ارد عند اردوغان
هههههههههههههههههه
ولو زعقتى عند اردوغان حروح على يلا كورة

عم مينا said...

يا جماعة السلفية تيار
الناس قناة تلفيزيون
الشيوخ بني أدمين

التهجم علي أي من هؤلاء لا يعد طائفية

أستاذ عمرو.. مين قال انك مش من حقك تتهجم علي الكنيسة و لا القسس في المدونة
دا انت يا راجل بهدلتوا البابا شنودة و أنا حتي معلقتش.. لأنه حقك

و الأخ بتاع عباد الصليب.. انت يا ابني بتجيب الكلام ده منين.. من قناة الناس بردو؟ هاها
المسيحيين لا يعبدوا الصليب.. المسيحيين يعبدوا الله و لا احد غيره

أما بالنسبة للفرق ما بين الأخ و النظير
و ان اخوك في الدين أقربلك من نظيرك في الإنسانية.. فطبعاً انت حر.. ما قدرش أجبرك علي غير كده
بس عندي سؤال.. ازاي بتقدر تفرق ما بين ٢ بني أدمين علي اساس الدين و هم أشخاص اعتبارية؟ لأنك لو نزلت للواقع مش ممكن كل المسلمين يبقوا أقربلك من غير المسلمين.. يعني أكيد هتقابل في حياتك مسلمين مش كويسين و غير مسلمين كويسين.. ساعتها هتعمل ايه في نظريتك دي؟

الميكروباص said...

اتجاهك ده انا شفته على ناس كتير
بيقولوا انه لا تفرقه بين مختلف البشر
بل وعندك استعداد للدفاع عن الشيعه وغيرهم وحتى اليهود
وهذا بالفعل يتضح منه كم الانسانيه التي تتمتعين بها مثلك مثل هذه الطائفه من الناس
وفي نفس الوقت تهاجمين المشايخ مثل الحويني وتسخرين منه
وتهاجمين القنوات الدينيه بشكل مستمر
يعني انتي مع الجميع ولكنك مختلفه مع المشايخ
وليس عندك اي مانع إلى أن تتحدثي عن حاخام او قس بشكل طيب حتى تظهري امام العالم المتقدم بأنك متقدمه وروحك متسامحه ومثال حسن للمسلمين في نظر غير المسلمين حتى يتمنى غير المسلمين لو صار المسلمون جميعا مثلك
وفي الوقت نفسه تهاجمين المشايخ الذين هم منك وعلى نفس ملتك

لا يوجد شيء غريب
فهذا الأمر منتشر في الوقت الحالي بين أوساط الاعلاميين داخل مصر

استمري فيما انتي فيه
لكن اعلمي تمام العلم ان الذين سيقوموا بتحيتك على هذا القول من أتباع الملل الأخرى لا يقدرونك كما تتوقعي- ولكن يتخذونك مثالا على صدق رأيهم في غيرهم وانا هنا أقصد المسلمين بالتحديد او الطائفه اللي مش عاجبينك منهم

dr.lecter said...

وهي دي جديده عليكم ماطول عمر المصريين بيحبوا انهم يهاجموا اصحاب المعتقدات التانيه زي البهائيين والاقباط واليهود والشيعه علشان يثبتوا لنفهم انهم بتوع ربنا وبتوع قال الله وقال الرسول وصلاه النبي احسن ورقصني ياجدع
والنبي بطلوا ده بقي بطلوا ده ماجابناش الا ورا الا التعصب والتطرف والتشدد
لكم دينكم ولي دين اتلهوا في حاجات احسن واهم واخطر من الهبل اللي انتم بتعملوه

dr.lecter said...

وهي دي جديده عليكم ماطول عمر المصريين بيحبوا انهم يهاجموا اصحاب المعتقدات التانيه زي البهائيين والاقباط واليهود والشيعه علشان يثبتوا لنفهم انهم بتوع ربنا وبتوع قال الله وقال الرسول وصلاه النبي احسن ورقصني ياجدع
والنبي بطلوا ده بقي بطلوا ده ماجابناش الا ورا الا التعصب والتطرف والتشدد
لكم دينكم ولي دين اتلهوا في حاجات احسن واهم واخطر من الهبل اللي انتم بتعملوه

dr.lecter said...

وهي دي جديده عليكم ماطول عمر المصريين بيحبوا انهم يهاجموا اصحاب المعتقدات التانيه زي البهائيين والاقباط واليهود والشيعه علشان يثبتوا لنفهم انهم بتوع ربنا وبتوع قال الله وقال الرسول وصلاه النبي احسن ورقصني ياجدع
والنبي بطلوا ده بقي بطلوا ده ماجابناش الا ورا الا التعصب والتطرف والتشدد
لكم دينكم ولي دين اتلهوا في حاجات احسن واهم واخطر من الهبل اللي انتم بتعملوه

amr565 said...

يا استاذ مينا في فرق كبير بين السب والسفالة والنقد وانا لم اتهجم علي القسس لاني مش هجام انا ا نقد ما تقوم به الكنيسة من تكفير للاخرين حتي للمسيحيين نفسهم وقلت لابد من وقفة من كل شخص بيفهم حتي لاتتفاقم الامور وكما يتم تسليط الضوء علي التكفيرين المسلمين والمتشددين في خط وتيار مسيحي بقيادة الكنيسة القبطية موجود وبقوة والجميع بيتعامي عنه او لايستطيع ان يواجهوه حتي ولو بالنقد ودليلي علي كده ولا اريد ان افتح نفس الجراح حادثة مرسي مطروح هل في حد من الاقباط او المسلمون الجدد وجه اي نقد للكنيسة التي تطاولت وقفلت الطريق والا اللوم جه علي المسلمين اللي في الغالب بيكونوا رد فعل وصدقني المواقف والمشاحنات الطائفية دي حتتكرر كتير وعلي مدد متفاوتة والجميع بينظر لعدد الجرحي واللي بيكونوا في الاغلب مسيحيين بحكم الكثرة فده بيغطي علي سبب الازمة
اما من ناحية نقد الشيوخ فده محدش قالك لاتعمله لاننا معندناش قداسة ولا مقدس الا لله سبحانه وتعالي ثم توقير وتبجيل للنبي الكريم وغير كده الجميع ممكن تنقده لكن حضرتك اكيد مش صغير علشان لاتعرف الفرق بين السب والشتم وتفريغ الغل الي نقد ومناقشة فكرة الشيخ وبالدليل مش سب وشتم يبقي حضرتك لسه عليك بدري لما تعرف تتعامل مع المخالف لك وسؤال لحضرتك اخير ما هي القناة الاسلامية التي تعجبك والتي لا تجد فيها اي تطرف والا تكفير الخ الخ وايضا مار ايك في التكفيرين من االقساوسة الكبار امثال شنودة وبيشوي ورفائيل اللي كفروا بقية المسيحيين كما وضحت لك في التسجيل وفي تسجيلات اخري لو احببت وما هو الفرق بينهم وبين الشيخ الحويني كما تعتقد انت ?

السينيور said...

من حقك طبعا
دى مدونتك وانتى حرة فيها
والقوانين دي ايجابية جدا
بس ليه متمنعيش الشتيمة وخلاص
يعنى الشتيمة تبقي في حاجات معينة بس ولا ايه؟

amr565 said...

سؤال للاخت الجديدة حتي تكتمل الاستفادة هل قراءة الايات الكريمة من القران التي تتحدث عن اليهود في التليفزيون يدخل ضمن تعريف الطائفية اللي حضرتك اتيت به?

amr565 said...

موضوع نشتم ولا منشتمش نساني اهم شي حضرتك كتبها ولم اعلق عليه
اه بنحرق العلم الامريكي لان امريكا ليست دولة مثل اسرائيل بالضبط امريكا دولة مستعمرة وطردت واستعبدت سكانها الاصليين وابادت من الهنود الحمر رقم في بعض الدوائر ما بين ال 70 مليون الي 110
لدرجة ان بعض الاكاديمين قالوا ان العاصمة واشنطن تسبح فوق دماء حوالي 14 مليون هندي ولا نسيتوهم دول

مهند said...

الحقيقة جيت ارد على البوست لاقيت نفسى دخلت فى كتابة بوست وربع كفتة سياخ
فمسحته الكلام كله لانى لاقيته مش معبررررر خالص

وبصراحة البوست ده ما ينفعش ما يتردش عليه

فممكن استغنى عن الرد كتابة بانى اشغل للبوست (ومهمة قوى للبوست دى)الشخارة الكهربائية بتاعتى على كل سطر فيه ؟

ممكن ؟

اما الجزء بتاع القوانين الدولية ده مخصوص
فلوحده انا هرسمله خرتيت كامل لان الشخارة مش هتجيب معاه نتيجة

فى مقال لذيذ لمحمد عمارة لسه جديد عن تجديد الخطاب الدينى ينفع رد على كام جزئية من اللى مكتوبين

عبد الزهراء المصري (علي الحسيني) said...

ما أنتي يانوارة برضه متناقضة وعملتي معايا قبل كده زي ما بيعمل حسحس تمام ...
هفكرك ياستي امتى وأزاي عملتي كده .
من فترة أنتي كنتي منزلة بوست في صورة كبيرة لحسن نصر الله وأنا أنتقدته بشكل محترم وأعتقد أن حسن نصر الله شخص وليس مذهب بل حتى أنا كشيعي إمامي من نفس مذهبه يعني لا هي طائفية ولا عنصرية من حد مختلف معاه وبيكرهه كشيعي .
وطبعاً مش هقولك إن كل كلمة قلتها معايا عليها بدل الدليل 10 ولو تحبي أنزل لك أدلة على كده فأنا تحت أمرك بس مالوش لازمة وهدفي من هذا الكلام أنك ماتناقضيش نفسك يانوارة وتعملي باللي بتقولي بيه فحسن نصر الله أو إيران خامنئ ونجاد ليست دين او مذهب أو حتى فكرة محترمة ندين بها .

تحياتي

Unknown said...

و هل التريقة على المنايفة ما بتبقاش عنصرية؟

عم مينا said...

علشان بس اللي بيدافعوا علي قناة الناس.. و تعرفوا مشكلتها الوحيدة مش اسائتها للمسيحيين و لكن اسائتها للعقل البشري بصفة عامة

http://www.youtube.com/watch?v=oTXywWqXQd0

Rasim Marwani said...

كل المراد من هذه التدوينة ان نحترم الحق الآلهي بالاختلاف والتنوع، وان لا يجرمنا شنآن قوم ان نعدل

كل المطلوب الاضاءة على محرمات تسببت بانهاك جسم الامة على مدى قرون، ولم تؤدي لانتصار التشيع على التسنن او التمسلف على التصوف
بل ادت لانتصار مذهب نفعي ذرائعي استبدادي قمعي يدين به كل من تولى حكماً على شبر في هذه الديار

الصخب والجلبة والضجة والكركعة والتمريك والتفحيط اسلوب للتنكيد على كاتبة التدوينة لن يؤدي الا للمزيد من الحرية لخطاب الكراهية والمزيد من الضيق والاسر لخطاب الوحدة والقوة
والعجيب مع العلم انه ليس جديداً، استخدام الآيات القرآنية والاحاديث الشريفة لتسجيل اهداف رخيصة في مرمى الاسلام نفسه نكاية بنوارة نجم

ادعوكم ونفسي باخلاص للذهاب الى مدرسة القرآن والحديث بدون افكار مسبقة نريد ان ننتزع من القرآن والحديث مايؤيدها

هذا عطف للقرآن والحديث على الرأي الشخصي، بدلاً من عطف الرأي الشخصي على القرآن والحديث الشريف

جوهر فكرة نوارة نجم، ان الاسلام ورواده الاوائل تعايشوا مع اليهودية والمسيحية والمجوسية والصابئة وخاضوا متحدين معارك وحروب ضد المستغل الاجنبي
وان الاسلام القادر آنذاك على استئصال وابادة مايخالفه، لم يفعل ذلك ابداً
بل على العكس امر باحترام الاديرة والكنائس والبيع وذكر ان فيها يذكر اسم الله
لا اسم الصليب
ولا كلمة الكفر
ولا اي شيء آخر

وعندما بدأ البعض بالتوحش، وامتطاء الاسلام كركوبة للوصول الى الحكم والبقاء فيه، لم يقبلوا الا بهدم الكعبة نفسها بالمنجنيق واباحة حرم المدينة المنورة للسلب والاغتصاب والقتل
وهذا لم يكن ليحدث لولا فقهاء السؤ ووعاظ السلاطين، ممن جعل من قتل الناس واستباحتهم ديناً لا علاقة له بنبي الرحمة

وعندما انتهكت حرمات المسلمين الاقدس في مكة والمدينة، وتجرأ الحاكم الظالم على قتل الحسين بن علي بن فاطمة الزهراء سبط رسول الله لم يبقى من بعدها اي غضاضة في التعامل وفق مصلحة الحاكم مع اي معلم ديني اسلامي او غير اسلامي

وبعض مفاهيم ذلك الزمن الاسود يعود من جديد بفضل قنوات فشلت في منافسة روتانا والام بي سي في مجال الهشك بشك فعادت للبث في مجال تخلو فيه المنافسة
ويسهل على داعميها العبث بالادمغة الطرية

من يريد ان يعتبر الاضاءة على تجاوزات هؤلاء تهجماً على الاسلام
نقول له ببساطة نحن نرى في هؤلاء قتلاً للاسلام وافراغاً له من معناه
ونحن احرار فيما نرى وانت حر فيما تراه
فتوقف عن الكركعة والتفحيط نريد الاستماع بهدوء يرحمكم الله

AMRMAX said...

اصلا العنصريين دول شوية مذهبيين ودى اكيد عنصريه !!!!!! لك الله يا مصر