Wednesday 24 March 2010

اخلص بقى علتنا

هي ايه الحكاية؟ ما داهية الدكتور البرادعي فاكر الشعب نايم على ودانه؟ امال الاعتصامات اللي كل يوم دي ايه؟ في كل حتة، موظفين، وعمال، وفلاحين وسواقين وكل الناس بتعتصم
الليلة استوت وهو بس جاي يقطف.. ما يخلصنا بقى ايه؟ ايه؟ ايه الشلل ده؟ جه عمل كان لقاء تلفزيوني، وراح مسافر شهر كده بدون ايتها سبب، حد بيستلم جايزة في شهر؟ وبعدين جاي يقول لنا انا مش حصان ابيض انا كبريت جنب البنزين. وعمال يقول لنا ساعدوني ساعدوني، نساعده نعمل له ايه يعني؟ ما يتحرك بقى.. ده علنا، ح يعمل حاجة وللا جاي يخرط على قلبنا بصل؟ يقول لنا بس بدل التوقيعات واللجان ووجع الراس خلينا نلتفت بقى لاشغالنا.. ده ايه الخايلة الكدابة دي؟
الناس اهي زي الفل، مطرح ما يحب يروح يتفضل، عايز يروح اعتصامات عمال اهلا وسهلا، عايز يروح يزور فلاحين اهم قاعدين، عايز يروح نقابة الصحفيين اهم هناك ع السلم، عايز موظفين اهم هناك برضه، وكله مش ساكت، مافيش حد ساكت غيره، ما ياللا بقى انجز خنقتنا
ايه ده؟
خلصناااااااااااااااااااااا.. بلا كبريت بلا ولاعة

14 comments:

مواطن مصري said...

المشكلة أن البنزين مش موجود في السوق

و سعرة غالي :D

البرادعي كان في كوريا الجنوبية بيلقي محاضرة و كان متفق على معادها قبل ما يجي مصر

و كان بيستلم جائزة يعني ميتكرمش

مش فاهمه said...

من كتر ما انتظرنا كتير مش عايزه اصدق و باكدب على نفسى و باقول يا بت انا اللى متهيألى الراجل شكله كده جات له اوامر عليا انه يسكت و يتهد شويه مش عارفه خايفه فعلا تكون دى الحقيقه ده غير موضوع ان الناس لازم هى اللى تبتدى و الناس لازم هى اللى تكون ايجابيه طيب ما عمال امنيستو داخلين على شهر اهو نايمين فى العراء مافى حد حن عليهم الا رجل طيب جاب لهم ب3 الاف كشرى و اساتذه الجامعه فى اعتصامات و الفلاحين فى اعتصامات و لا حد عبرهم نعمل ايه تانى

312asdf said...

ياااااااااااااااه ,,, الراجل ده لسة عايش
الواحد كان نساه الكام يوم اللي فاتوا.

نعيب زماننا

عين فى الجنة said...

صباحك فل يا نوارة ، وده مين اللى زقه علينا تفتكرى؟
ممكن ايتام الديموقراطية الامريكية؟

Unknown said...

مش فاهمة
همممممممممممممممم

انت مين اللي ضحك عليك وفهمك انك مش فاهمة؟

يا مواطن

اني اتنقطت خلاص

راجي

طب تصدق بالله، حتى لو كان... يخلصنا وينجز بقى

هي الفكرة كلها في تعديل الدستور

او بالاحرى تجميع الجهود اللي موجودة في الشارع

انا ما بيغظنيش غير بيقعدوا يقولوا الشعب ساكت

ده ساكت ده؟ ده ماشي يكلم نفسه في الشوارع

هو بس ما عندوش ثقة في النخبة ومش عارف يجمع جهوده

صفا حرك said...

من أول البرادعي ما طلع و انا ضده
مبحبش أمشي مع الموجة و خلاص
أنا لو عندي البيت هيقع ماروح أختار بيت تاني آيل للسقوط !!

بس أنا مع تغيير الدستور بنسبة 100% و زي ما مش فاهمة قالت
دي شكلها كده حركة عشان يبقى فيه معارضة في الانتخابات و ديموقراطية و الشاطر حسن يتجوز ست الحسن و علي عليوة مضربش الزميرة ولا حاجة هي اللي فرقعت لوحدها

ربنا يستر على

utopia said...

المشكلة ان العريس اول ما اتكلم قال انا هاعمل تغيير سلمى ولازال البحث جارى عن اللى اسمه سلمى ده لانه هو اللى معاه سر شويبس هههههههههه
لا بجد يا نوارة هو الدكتور مستنى ايه؟
ما داهية ليكون مستنى المثكفين والمعارضة يتفقوا يبقى علينا العوض وندور لنا على عريس تانى

شمس العصارى said...

هو اكيد فى ان و يمكن انات فى غيابه
هل لانه اكتشف ان الوضع اسوء مما تصور
هل لانه اكتشف ان تغيير الدستور حاليا من رابع المستحيلات
هل لانه عاين بنفسه فساد النخبة و اختلافها
هل صعب عليه الشعب و قال اسيبه فى حاله احسن هههههههه
اتفق مع " مش فاهمة " و معاكى ان اكيد فى رسايل وصلتله
و ازيد بان تلك الرسائل شملت التهديد و الوعيد من ناحية و الترغيب من الاخرى
يعنى العصا و الجزرة
علشان كده هو صرح ان مش حيكون جزء من نظام فاسد يعنى اكيد عرضوا عليه وزارة خارجية او منصب كبير
اقلك نسال لطفى هو اكيد الى عارف اخباره كلها
ههههههههههههههههههههههههههه
نلتقى بعد البرادعى

مش فاهمه said...

اللى خلانى اشك ان الفرصه كانت مواتيه اخر حاجه لما الريس سافر يعمل العمليه يعنى ولا اسهل من كده و جايله زى البيضه المقشره كان ناقص بس يحط الجون لكنه خذلنا بصراحه
طيب عبد الرحمن يوسف ثورجى جدا و انا باثق فيه و ماعندوش لف و دوران و مابيرضاش بالعوج ياترى ساكت ليه دلوقتى و مش بيعلق ولا بيقول حاجه على الجبهات اللى بتطلع كل يوم و اللى بيتكلم حسن نافعه اللى بصراحه مش مالى مركزه و نى زياده عن اللزوم مش ده برضه بيثير الشكوك يا جماعه احنا ناس على قدنا و مش على صله بمحركى الأحداث و العالمين ببواطن الأمور حد يطقس لنا و يجيب لنا الخبر من عبد الرحمن يوسف و بالمرة يسأله القرضاوى حايعمل ايه بعد الأهانه و قلة الأدب اللى عملوها فيه بتوع قطر احسن انا قاعده على النت من امبارح علشان اعرف القرضاوى حايعمل ايه ولا حس ولا خبر هى الناس بقت بطيئه و ممله و رتمها واقع ولا انا اللى متحمسه زياده

المهدى said...

مش بس دول أقرى كمان الخرا اللى قايله فى المصرى اليوم امبارح والنهاردة الراجل ولا على باله ده خلص وعايز يرتاح و مشكلته يرتاح فى الريف الفرنسى ولا فى حديقة منزله بمصر و متعرفيش ده متسلط علينا من انهى داهية جاى ينظر ده أحنا مفيش حيلتنا غير منظرين الخلاصة الراجل يا أما مزقوق ومستنى الإذن من اللى مشغلينه يا شريف فعلا وجاى يقضى فراغ شيخوخته فى التحسر على حال أهل وطنه البسطاء بصراحة أنا سمعت عبد الرحمن يوسف وشايف أنه برقبته حتى على مستوى تشريحه لأوضاعنا الحالية والماضية أنضج و أرقى على فهو يعلى قيمة مستقبل وطنه عن ثأر والده الشخصى عكس الأفندى الدكتور اللى مازال محتقن من ضياع تميزه وتميز عائلته فى العهد البائد

مش فاهمه said...

ما تيجوا ننقل العطا على عبد الرحمن يوسف

طنطـــا واى said...

معى انى حلفت انى منكدش عليكى بتعليقاتى بس مش خسارة فى الموضوع دة صيام 3 ايام عشان خاطرك

برافوا عليكى اول مرة اشوفك بتتكلمى كلام ناس عاقلة زيادة عن اللزوم ....مصيبتنا يا ام المدونات فى كلمة الاستاذة مش فاهمة اللى بتقول ننقل العطا ...... ولية يكون فية عطا ولية يكون فية برادعى ولية يكون فية توريث ..... الناس عايزة والناس هى اللى شغالة والناس هى اللى حتعمل .... اية ام الجبن بتاعنا دة ؟؟؟ لازم نحط خيال ماتة نتدارى وراة ؟؟؟

احنا الشعب الوحيد فى العالم اللى ماشى من ايام الفراعنة بنظرية تالية ( يعنى تصنيع الة ) الزعيم

من اول رمسيس لغاية عمدة كفرتنا او مدير الادارة ابو دبلون تجارة ... الراجل يبقى كويس ومحترم ... يشتغل فية النفخ من مرؤوسية لحد ما يفسد ؟؟

طيب البرادعى دة حاجة من تلاتة ؟
1- البديل الامريكى لال مبارك؟؟
2- فرش ارضية لابن بلدة عمرو موسى
وعلى فكرة الاتنين طنطاوية وحاقولهم عليكى لما طنطا تبقى عاصمة مصر بدل :)
3- الراجل دة اتلحس ومخة ضاع لما لقى نفسة فجأة بقى احمد عرابى جديد وحلم الشعب المصرى والمهدى المنتظر وتقدروا تسالوا اخوة اللى جنبة فى كل الصور على اساس انة حيكون رئيس الوزرا الجديد

طنطـــا واى said...

خلى بالك قوى من حكاية انة فرش ارضية لعمرو موسى وابقى ادعى لى

طنطـــا واى said...

معلش اعذرينى تعليق عشان موضوع البرادعى دة خبلنى وهبلنى وبقى عامل زى الفيرس اللى صاب الطويل والقصير .... بعد كل التعليقات اللى تطمننى ان مصر لسة فيها ناس عاقلة وكنت فاكر ان مصر كلها بقت دراويش البرادعى واللى حارق دمى ومنكد على ام اللى جابت امى : هى الناس اللى مع البرادعى .. ااقل واحد فيهم يوزن فى عقول وقلوب الناس الف برادعى وبرادعى ... وربنا الحالة جت لى والهرشة اشتغلت وبقيت مرعوب اصحى الاقى فى الفيس بوك صورة لجمال مبارك وهوة بيناصر ويدعم البرادعى

عايز اعرف ردك فى انى مش عارف لية كل ما أشوف البرادعى وانصارة أفتكر الزعيم المفدى والبطل المغوار محمد نجيب وهوة قاعد زى النوارة وسط مجلس قيادة الثورة