البوست اللي اتلكمت فيه عن مسيحيين مصر وطلبت يركزوا معايا شوية
الحقيقة فرحني جدا التعليقات اللي جات عليه
لأن المسيحيين والمسلمين ركزوا معايا قوي
وكل اللي جه يتناقش ويعلق
فعلا مخلص ووطني وحريص على صالح البلد
وانا استفدت جدا من كل المشاركات واضافت لي كتير
ونورت في ذهني حاجات ما كنتش شايفاها
وعدلت لي رأيي في حاجات
وشاكرة للجميع
وكلنا اتفقنا (مسلمين ومسيحيين) على ضرورة المصارحة
والمكاشفة
النظام الحاكم تمكن من انه فعلا يخلي
يعيش اهل بلدي وبينهم مافيش
تعارف يخلي التحالف يعيش
تعيش كل طايفة من التانية خايفة
وتنزل ستاير بداير وشيش
===
ياسلام القصيدة دي حلوة قوي مش عشان اللي كاتبها ابويا
انما هو ابويا عشان كتبها
====
المهم
أنا فكرت في حاجة كويسة
إننا نفتح مجال النقاش
ويشارك فيه كل اللي الأمر يهمه
ومتهيالي اي حريص على البلد دي يهمه الامر
وفيه مواضيع وقضايا كتير
زي المخاوف الوهمية المتبادلة ما بين المسيحيين والمسلمين
زي اغترابهم عن بعض
زي احساس كل واحد فيهم بالخطر وازاي الاحساس ده بيخليهم يعملوا ردود
افعال تفاقم المشكلة وما تحلهاش
تحفظات كل جانب بصراحة على الاخر
زي الكلام اللي بيتقال عن المسيحيين في بعض المساجد
بدل برضه ما نقعد نسب ونلعن في الشيوخ دول
اللي الواحد فيهم يادوبك بيفك الخط
عايزين نفهم ايه اللي خللا دي مشاعره
ونحلها ازاي
بدل ما نتهم الاقباط بالخيانة عشان هتفوا بحياة شارون
عايزين نفهم ايه اللي وصلهم للمرارة دي
موضوع اخر حساس بين المسلمين والمسيحيين
الا وهو المادة التانية من الدستور
وانا قصرت الكلام ع المسلمين والمسيحيين
ماحدش يتدخل
وارجو ان البهائيين ما يزعلوش
بس هم مشكلتهم تتحل لوحدها منفصلة عن مشكلة الطائفية
بس انا بافضل ان نقطة المادة التانية دي نتكلم عليها في الاخر
وللا انتوا رأيكوا ايه؟
انا في انتظار اقتراحاتكوا
على شرط
المجانين يمتنعون
انا مستعدة النقاش يفتح لابعد مدى
وكل طرف لو جواه مرارة يطلعها بكل صراحة
على شرط
ان تكون نية المشاركين فعلا اصلاح ذات البين
والصالح الوطني
بتوع عباد الصليب والعرب غزاة دول
يطلعوا منها
اظن الكل متفق على ان كل الاديان بتكفل حرية العقيدة
واظن برضه الكل متفق على ان كلنا مواطنين
ومافيناش غزاة المفروض ينطردوا
فيما عدا ذلك
انطلقى يا نورماندي
في انتظار الاقتراحات
والمناقشات
25 comments:
المسيحيين مش هاممهم أي حاجة غير ان الاسلاميين ميوصلوش للحكم
هو دا الرعب الاعظم
فتلاقيهم بيقولوا نعم لتعديل الدستور عشان الإخوان ضده
يعني هو مش فارقة معاه ديمقراطية ولا حاجة
ودا بسبب الصورة اللي الوضع هيبقي عليها لو الاسلاميين وصلوا للحكم
ببساطة ... هيحصل زي ما حصل ف السودان
تحياتي
بسم الله الرحمن الرحيم
من وجهة نظري المتواضعة أن فعلا هناك نوع من التميز ضدد الأقباط و لكنة تميز قد يكون من دون قصد يبدأ مع الطفل القبطي من دخولة للمدرسة
فنجد ادارات المدارس الحكومية تتبع نظام العزلة لهم في فصول قد يكون الغرض منها هو بسبب حصص الدين لكن ذلك يؤدي ألي أن يعي ذلك الطفل معني لثقافة التميز أو الأحساس نه غير الباقي فيعيش مع أصدقائة من الأقباط دون قصد في عزلة حتي أن يصل ألي الجمعة و هو يظن أنه ليس من حقة أن يشارك في الحياة العامة أو الأجتماعية
أما المنطق المختلف يحدث في المدارس المسيحية (أنا أحد خريجي هذة المدارس من الحضانة للأعدادي) تجدي هنا الجميع في فصل واحد كلنا أصدقاء كلنا نشارك وأنا عن نفسي أقرب صديق لي هو مسيحي صداقتنا فوق ال16سنه من ال 21من عمري تجدي أبناء هذة المدارس مشاركين في الحياة يكل بساطة لأنه لم يشعر في صغرة بمنطق العزلة و تلاحظي ذلك فب الجامعات فتستطيعي أن تعرفي أن هذا القبطي خريج مدارس حكومية و الأخر أجنبية مسيحية
من الأخر شايف العيب في التعامل مع الطفل الي بتكبر معة المشكلة
لكن هذا لا يمنع وجود مثيري الفتن في الجانبين لن أقول مخطط صهيوني لتفتيت نسيج الطن و....... لأنه ببساطه صعب
هناك أصوات يجب معاتبتها و مواقع و برامج محادثة تشعل و تفتعل فتن
ولن تنتهي المشكلة ألا بمعالجة أصحاب الفتن و مناقشتهم
مثل أبادير أو مايكل منير أو أو
و يجب أيضا التوعية بمعني الأسلام الحقيقي أسلام الرحمة
ومعني المسيحية المحبة
فالأسلام برئ من أرهاب القاعدة
والمسيحية بريئة منأرهاب أمريكا
ودمتم
إنتي يا بنتي هتدوخينا نعاكي ليه... كان الأفضل تحطي انك في التدوينة هنا ياخد الناس على التدوينة دكهي عشان الحوار المفتوح هناك يتواصل مش يتقطع ونبدأ من جديد وعشان اللي ما قروش التعليقات هناك ما يجوش يبدأوا من الأول هنا
م الآخر أعتقد إنك تقفلي التعليقات هنا وتحطي اللتك للتعليق هناك
يوووووووه
إيه الخبطة دي... اعملي اللي تشوفيه بقى... أنا أصلي لسة سايب تعليق طويل هناك وكان فيه تشغيل دماغ وتركيز عالي مش هاقعد بقى أفتح حوارات على تسمعيت جبهة.. وحدي الجبهات مدام هو نفس الموضوع
السلام عليكم
طالما مافيش حد راضى ييجى يزورنى هانقل البوست عندك
كنت قد وعدت فى البوست السابق أن أنشر سلسلة من المقالات حول رأيى فى مشكلة جزء عزيز من المجتمع المصرى أفخر بوجوده فى حياتنا وأعلن أنه قدم مازال ويقدم الكثير لمصرنا الحبيبة متعاونا مع كل المصريين
أحب أن أستخدم كلمة مصرى بدلا من كلمة مسيحى أو مسلم, لذلك سأستخدم كلمة مصرى عبر كل كلامى للتعبير عن مشاكلنا كلنا كمصريين
مظاهر تلك المشكلات:
أحداث هنا وهناك من الكشح إلى بمها مؤخرا
توتر فى العلاقات الشخصية بين بعض الأشخاص
المشاكل التى يشعر بها جزء وشريحة من المجتمع المصرى تتلخص فى الآتى:
الشعور بالغبن والظلم نظرا لتجاهل المؤسسات الحكومية لهم فى بعض المناصب
الشعور بالظلم لعدم إعطائهم الحرية فى بناء أماكن العبادة
الخوف من مستقبل مظلم فى ظل تنامى التيار الدينى وإستخدام شعار الإسلام هو الحل بكثرة
الشعور بالظلم نظرا لأن الدولة تتعامل مع قضاياهم بالذات من منطلق أمنى بحت
الشعور بالغربة وذلك بنظرة الشك والريبة التى يشعروا بها فى نظرات إخوانهم المصريين
ينتظرون أن ينظر لهم الطرف الآخر بعين المساواة وأنهم ليسوا أغراب عن ذلك الوطن وليسوا أعداء ولكن هم شركاء فى صنع مستقبل هذا الوطن
السؤال المهم هل هذه المشاكل والمخاوف فى محلها أم هى نوع من التهويل :
من وجهة نظرى هذه المشاكل والمخاوف فى موضعها الصحيح ولكن دعونا ننظر ما أسبابها لكى نقتلع تلك المشكلات من جذورها وصولا لحل يجعل مصر خيرا لنا كلنا ونصنع مع بعضنا البعض نحن كل المصريين مستقبل أفضل لنا ولأولادنا
أسباب تلك المشاكل والمخاوف:
رواسب من الماضى حدثت ومازال العقل يسترجعها بين الحين والآخر تجعل شركاء الوطن فى خوف وريبة من بعضهم البعض
إنعدام الشفافية والصراحة على جميع المستويات وفى كل المشكلات التى حدثت فى الماضى وماهى نتائجها
عدم تحديد إختصاصات كل من الحكومة والكنيسة والأزهر ووضع حد فاصل لمسئوليات كل طرف منهم
إختفاء مفردات الحرية والديموقراطية من الحياة المصرية لفترة طويلة وذلك بعد قيام الثورة وبخاصة فى تلك الأيام
إنتشار الفساد والظلم وغياب تطبيق القانون
ظهور بعض النماذج الفاسدة من رجال اعمال و وزراء و موظفين أعطت صورة سيئة لكل طرف وانعكاسات ذلك على نظرة كل طرف للطرف الآخر
التعامل دائما بالمنطق الأمنى مع ظهور أى مشكلة بين عنصرى الأمة من المصريين
نظام تعليمى فاشل ومنظومة ثقافية لم تربى النشء والمواطن على تقبل الآخر
مؤسسات دينية لم تنظر لجوهر الدين الصحيح وتربية النشء على ذلك بل تركت الدين لأفراد من الطرفين يتحدثون فيه كيفما شاءوا وإختذال الدين فى مظاهر كالجلباب والصليب والمصحف فى العربات وعلامات على العربات لإبراز الهوية وتعميق فكر التطرف فى كلا العنصرين
ضعف دور المؤسسة الدينية
عدم نضج العلاقة بين عنصرى الأمة إلى الدرجة التى يتم فيها المناقشة العلنية للمشكلات دونما تجريح أو إهانة أو المساس بالعقيدة الدينية للآخر والإكتفاء بمظاهر كاذبة من العناق إلى موائد الوحدة الوطنية الفاشلة
ريب وخوف من كل طرف تجاه الآخروذلك بالإعتقاد أن هناك طرف يستقوى بالخارج لتحقيق أغراضه والآخر يستقوى بالعدد والشعارات التى تلهب المشاعر للإنقضاض على الطرف الآخر
فى النهاية من الذى يتحكم بمن الدين أم الدولة أم أن هناك علاقة فيما بينهم؟ سؤال سأجيب عنه بإستفاضة فى مقال لاحق
فى النهاية أسباب تلك المشكلات يمكن تلخيصها فى :
نظام سياسى فاشل وفاسد
نظام تعليمى متخلف
نظام دينى غير مؤثر فعليا
عدم الصراحة والشفافية مما يؤدى لتضخيم المشكلات وبالتالى تصبح فقاعة تفجر فى أى لحظة
فى البوست القادم سأناقش بعض الحقائق التى يجب الإعتراف بها قبل وضع الخطوات التى يجب أن نقوم بها كأفراد نعيش على نفس الأرض الحبيية نتشارك نفس الهموم والأفراح وما هو الدور الذى نتوقعه من الدولة
هو فيه فعلا حاجات كويسة جدا شغالة بالفعل .. واصحابها قاطعين فيها شوط افتكر انه معقول جدا
قريب قوي هتشوف النور .. واعتقد انهم هيرحبوا بمشاركة أي حد مهتم فعلا
ya3ainy 3al akbat el masakeen . . 3'allabah wallahy . . 6% ma3ahom 1/3 el ektasad el masry . . wa beyhaddedona wa yeshtekona le mama amreeka kol youm . . wa meyeshtemona fel television wa wal internet . . wa bey3mello aflam wa masraheyat zai "kont a3ma (moslem) wa shoft el nour (ba2eet meseehy) . . wa beyeshtemo el islam wel rasool . . wa tool el nahar wel leel beyhawlo yenassaro el moslemeen . . ya3ainy 3allehom . . fe3lan massakeen
Star
طيب
فيه كام رأي اتعرض
alien
بيقول ان المسيحيين خايفين من نظام حكم اسلامي
عشان ما يحصلش زي اللي حصل في السودان
طبعا احنا ما نقدرش نشبه ببلد تانية
لاننا مش عارفين ظروفها
احنا عايزين نعرف
بصرف النظر عن رأيي في الاسلاميين
لكن بفرض جه حكم اسلامي
وغالبا ده مش ح يحصل
ايه اللي مخوف المسيحيين؟
حاجة تانية
الاخ مجهول
اللي فوقي ده
بيعرض وجهة نظر كتير من المسلمين
اللي بيقولوا ان المسيحيين بيدلعوا
وبيستقووا بامريكا على المسلمين
وخلافه
وبصرف النظر عن ردي
اللي انا ح اكتبه ان شاء الله
بس لما اروق واطمن على عمر
احب اعرف تعليق الاخوة المسيحيين بكل صراحة على الكلام ده
نواره [نا بصراحه مع مراقب مصري في تخوفه من الأسلاميين ده كمان فى مسلمين كتير خايفين منهم ومحدش مصدق أنهم أتغيروا فعلا لأنهم بيكشفوا نفسهم بأخطاء غير مقصوده زى مثلا طز فى مصر المشهوره وعلى فكره أنا من كام سنه كده كنت باتكلم مع واحد أخوان عن حجاب رانيا علوانى وقولتله دى حريه شخصيه بس خساره دى كانت رافعه أسم مصر وطبعا كان هياكلنى وقال نفس اللى قاله المرشد طز فى مصر واللى جابوا مصر ودى حاجه خطيره جدا أن مايكونش عندهم ولاء لمصر نيجى بقى لموضوع الأقباط لازم نسأل نفسناأمتى أبتدأ شعورهم بالأضطهاد أمتى أبتدينا نصنف بعضدنا ده مسلم وده مسيحى أعتقد أن ده بدأ من أيام السادات لما قويت شوكه الأسلاميين وأنا فاكر أنهم كانوا بيدخلوا علينا المدرجات فى كليه الطب ويطلبوا من الأقباط أن يغادروا لأن كلامهم موجه للمسلمين فقط يعنى كان ليهم مواقف كتير وأبتدينا نلاحظ تباعد المسيحيين عنا وتكتلهم مع بعضهموطبعا حاولنا كتير نفهمهم أن الناس دول لايعبروا عن كل المسلميين لكن كانوا خلاص فقدوا الثقه والأحساس بالأمان وأنا فاكر أىامها كان فى ناس بتخاف ولادهم يروحوا المساجد وحدهم عشان كان فيه غسيل مخ للأطفال وتحريض على الكراهيه مش بس كراهية المسيحيين لآ ده كمان الولاد كانوا بيتهموا أهاليهم بالكفر أيام سوده الله ما يغيدها أزاى بقي نغير المفاهيم دي أزاى نكسر حاجز الخوف ده عايز أراده من الدوله نفسها جاجات كتير عايزه تغيير من أول المناهج الدراسيه مرورا بدور العباده والآخطر الأممه والقساوسه الى بيحاولوا يشعللوها ما هو مش معقول المثقفيين يصلحوا من ناحيه وتيجى ناس تانيه يهدوا يعنى هندور فى حلقه مفرغه
اصطبحنا واصطبح الملك لله
الي الاخوة المركزين
بصوا بقه علشان الكلام يكون جد ومفيد لازم نتفق علي عدة أمور
أهمها بلاش الكلام بالمطلق والتعميم ونسب عمل او تصريح فرد لتيار كامل والحكم علي هذا التيار من ذلك التصريح او العمل علشان كده حتقلب شتيمه وعماله وتطرف والحاجات الهبلة ديه
حاجة تانية الاعتراف بوجود المشكلة مع عدم التقليل اوالتهويل منها
ماشي كده؟؟
الاخ مراقب مصري
اولا حضرتك بتتكلم عن الاخوان بأسلوب العالم ببواطن الامور داخل الجماعة وده حقيقي مش لصالح كلامك
علشان نكون متفقين أنا مش إخوان وده مش تنصل والحاجات اللي الواحد بيتهم بيها
من الآخر أنا كنت من الاخوان سابقا وما زلت مهتم جدا بيهم وبأخبارهم وبتطورهم الفكري وتعاملت مع القيادات التاريخية والوسطي والكوادر والشباب واعرفهم كويس اوي
بالنسبة لموضوع التجنيد والجيش فده فعلا كان رأي الاستاذ مصطفي مشهور احدي مرشدي الاخوان وعندما صرح بهذا الرأي رد عليه وقتها الاستاذ سليم العوا ببحث طويل جدا وبعدها اصدر الاخوان وثيقة فكرية لموقفهم من الاقباط والمرأة اظن سنة 95 وفيها رفض قاطع لموضوع التجنيد والجيش وان من حق الاقباط ان يدخلوا الجيش المصري ليدافعوا عن بلادهم
وشرح فقهي لموضوع الجزية اللي هي اصلا عبارة عن ضريبة الدفاع فغير المسلم في بلاد المسلمين يستطيع ان يدفع هذه الضريبة مقابل ان تدافع عنه الدولة ومن يرفض يجند في الجيش ويدافع هو عن البلد زيه زي المسلم
طز في مصر
ايوه الراجل قال كده
وانت ممكن تقول كده في اي وقت
وكلنا بنقول كده بس السؤال امتي بنقول كده وفي اي مناسبة؟؟؟؟
واي مصر نقصد
مصر الشعب والناس والاهل و و و و و
ولا مصر الحكومة والحزب الوطني وامن الدولة والفساد؟؟؟
نرجع لواقعة طز في مصر
مهدي عاكف قال انا عندي يحكمنا واحد ماليزي عادل - وماليزي ديه مش صدفه - احسن من مصري ضالم يقمع الناس ويسد كل القنوات الشرعية
فالصحفي اللي هدفه الرئيسي تصيد اي كلمة يعمل بيها ضجه سئله طب ومصر والانتماء فكانت الاجابة طز في مصر
وممكن تختلف وتتفق مع المنطق ده بس الموضوع مش الاخوان معندهمش انتماء وكلام جرايد الموالسه ده
وانا بكل صراحة عندي يحكمني واحد عادل ان شالله موريتاني احسن من اخويا لو كان ظالم مستبد
يعني الاخوان دول ملائكة
لا طبعا وعندهم ديفوهات كتير سواء فكرية او حركية
بس موضوع اضهاد الاقباط ده مش موجود علي المستوي الفكري للاخوان كجماعة وقيادات
بس ممكن تلاقي واحد من الاخوان وخاصة الشباب الموضوع مش واضح عنده
اصل الاخوان دول مش روبرت
اول ما يدخل الجماعة بيتحول او بياخد قرص برشام يبقي اخوان ومطلع علي كل فكر وتاريخ الاخوان
اما موضوع ان هما بيمثلوا انهم اتغيرو فده موضوع غير منطقي ان احنا ننقشه
لان زي اي جماعة او تيار في العالم هناك تطور فكري عند الاخوان وتطور متسارع كمان وطبيعي جدا ان التطور ده يجد بعض المقاومة وده دور الاطراف الاخري
يعني لازم نشجع الخطوات ديه وبدل ما نشكك في النوايا نشجع هذا التطور والتغير
دا حتي جماعات العنف بدأت في المراجعات الفكرية وانا شايف ان نفس وجهة النظر تنطبق عليهم
لي كلمة اخيرة
ممارسات التميز ليست ضد الاقباط فقط ولكن ضد المصريين بشكل عام
كام الف طالب درسات عليا تم استبعاده من اجل الوسطة والمحسوبية
كم مدرس اسلامي تم تحويلة الي اعمال إداريه
ثم لو القينا نظرة علي صفحة الوفيات في الاهرام حنجد ان الاقباط موجودين وبقوة في المناصب العليا والجيش وامن الدولة كمان
انا مبقلش ان مفيش تمييز ضد الاقباط
لا في تمييز بس مش الاقباط بس ومش بالصورة اللي وصله للاقباط
وللحوار بقية
بحري
طيب فيه تخوف من الاسلاميين
ومسئولية الاسلاميين انهم يردوا عليه
بس مش معقولة يعني الاقباط معزولين وفيه مشاعر طائفية متبادلة
لان الاسلاميين فيه احتمال ياخدوا الحكم
ده بقى يبقى الناس بتتلكك
يعني الاخوان دلوقت مش في الحكم
وبيتعرضوا لتصفية
متوحشة
وانا الحقيقة مش حابة اتدخل في سير الحديث
لكن
حابة اني اتابعه ونبص عليه مع بعض
احنا بنتكلم على مشكلة المسلمين والمسيحيين في مصر
وان حصلت بينهم فجوة وتخوف من الجانبين
لقينا الموضوع قفز على مناقشة برنامج الاخوان
ده معناه ايه؟
انا باسأل بجد
وانا شخصيا جه في بالي عدة اجوبة
اولا ان يكون فعلا الاخوان لهم التأثير الفظيع المريع ده ع الشارع المصري
لدرجة تخلي كل المواطنين المسلمين اخوان من غير ما يحسوا ومن غير ما ياخدوا بالهم
تاني حاجة جات في بالي
ان فيه ناس فعلا عندها اخوانو فوبيا
وبتحمل الاخوان نوائب الدهر كلها
بشكل مرضي وهيستيري
وده غالبا بيبقى لصالح تيار سياسي تاني
الحاجة التالتة
ان ممكن يا جماعة نبقى فعلا منفصلين عن الناس
ومش فاهمين ايه اللي بيدور بينهم
وفاكرين ان الاخوان هم السبب
معلش
انا شخصيا سمعت رأي واحد مسيحي
بينفي عن السادات تهمة الفتنة الطائفية
وبيقول ان السبب الحقيقي هي ثورة 23 يوليو
وبيدلل على كده بأن المسيحيين كانوا ايام الملك مشاركين في الحياة السياسية والاقتصاد وكل حاجة
وكانت ظروفهم كويسة
واحاسيس الناس كمان تجاه بعض ما كانش فيها اي مرارة
والكلام ده وجيه جدا
بدليل
معلش من غير ما حد يضحك عليا
بدليل نجيب الريحاني
ايون
لو تابعت نجيب الريحاني ح تلاقي ممكن في افلامه مطلع واحد قبطي وبيتريق عليه
وفي فيلم تاني يطلع واحد شيخ ويتريق عليه
وفي فيلم تالت يطلع يهودي ويتريق عليه
تعالى دلوقت
افتكر كده فيلم باحب السيما
وكم الحساسية التي ووجه بيها الفيلم
وازاي الكنيسة اعترضت وما اعرفش ايه
مع ان بقى في فيلم ابو حلموس
كان شرفنطح عامل دور واحد مسيحي مسخرة
وما حدش اعترض
وكلنا لحد دلوقت بنضحك
وما حدش من المسيحيين بيزعل ولا بيحس بالاضطهاد
ولما بنشوف نجيب الريحاني مطلع مدرس عربي وللا شيخ وبيضحكنا عليه
المسلمين ما بيحسوش باي اسى
لحد دلوقت
لكن نفس المشهد لو عادل امام اللي عمله المسلمين - وانا اولهم - ح نزعل قوي
مع ان بقى
وبما اننا بنتكلم في الطائفية
نجيب الريحاني مسيحي وعادل امام مسلم
بس كلنا عارفين سلامة نية نجيب الريحاني
وطبيعة المجتمع وقتها
ووساخة نية عادل امام مثلا
ونفس الحكاية بالنسبة للمسيحيين
كلهم عارفين ان افلام زمان بتعبر عن مجتمع متعدد بجد
وبيعبر عن نفسه
طيب ايه اللي حصل
فيه واحد مسيحي بيقول ان عبد الناصر والضباط الاحرار هم السبب
وهم اللي اتعمدوا يعزلوا المسيحيين
عشان يعرفوا يسيطروا ع البلد
كلام وجيه محتاج دليل لتأكيده
ومحتاج دليل لدحضه
بس واقع الامر
ان مصر قبل الثورة
كان فيها مكرم عبيد بيشارك في العمل السياسي
وكان بيشارك بجد
مش مسيحي الحكومة حاطاه فاسوخة عشان تعبر عن الوحدة الوطنية اللي مش موجودة
ولانه كان بيشارك بجد
كان منافسيه وانصارهم
مش بيلاقوا غضاضة فانهم يشتموه ويهتفوا ضده
من غير ما يخافوا ان ده ممكن يعمل فتنة طائفية
وما كانش اللي بينتخب مكرم عبيد بالضرورة يبقى مسيحي
وكان فيه مسيحيين انتخبوا النحاس وما انتخبوش مكرم عبيد
والكنيسة ما كانتش بتتدخل في ده
وده مالوش علاقة بظهور التدين في المجتمع
لان في الفترة دي المجتمع كان متدين جدا
متدين خالص
متدين بشكل مش معقول
وكان الدين متغلغل في نفوس الناس بجد
مش مظاهر وخلاص
وكان دين الدولة الاسلام
والشريعة الاسلامية برضه مصدر رئيسي للتشريع
وكان فيه حاجة اسمها محاكم مختلطة
بيحتكم اليها غير المسلمين
وما كانش عندهم احساس بالمرارةولا احساس ان فيه فرق بينهم وبين المسلمين ولا بيقولوا اشمعنى المسلمين لهم قانون واحنا لنا قانون تاني
والقضاة وقتها كان اسمهم: قضاة شرعيين
وبيحكموا بالشريعة الاسلامية
اذن المشكلة في الشريعة الاسلامية
ولا في التدين اللي هو ما غابش عن مصر غير فترة قليلة جدا الا وهي فترة ما بعد قيام الثورة
اللي الغت المحاكم المختلطة والقضاة الشرعيين
وقالت كلنا مواطنين وكلنا لنا نفس القانون
واحنا تقدميين
واحنا ما عرف ايه
ومع ذلك ابتدت من اللحظة دي المشاعر الطائفية في الظهور
وابتدى يبقى فيه حساسية في التعامل
والمسيحي اللي عايز يقول رأيه في سياسي مسلم يخاف
والمسلم اللي عايز يقول رأيه في مسيحي يقلق
طيب ايه اللي حصل؟
انا باسأل بجد
برضه مش عارفين نحط ايدنا
انا شخصيا شايفة ان القهر بيخلق عداء مابين المواطنين
والدليل على كده
العراق
العراقيين دول انا عشت وسطهم
والحقيقة هم مش شعب متدين قوي
مش زي المصريين
وعمرهم ما فرق معاهم ده سني وللا شيعي وللا مسيحي وللا صابئي وللا حتى يزيدي
بعد الاحتلال فجأة بقوا طائفيين
طيب مالناش دعوة بام العراق دي لها ظروفها
بحري بيقول كلام وجيه جدا
كلنا بيقع علينا قهر
واذا كان المسيحيين معمول لهم نسبة في الجيش والبوليس
فالاسلاميين ممنوعين منه اصلا
والمحجبات مثلا ممنوعين يطلعوا على الطيارة كمضيفات
وممنوعين يبقوا مذيعات
ولما واحدة محجبة كفاءة بتتقدم لشغل وواحدة تانية مش محجبة واقل كفاءة بتتقدم معاها
بياخدوا اللي مش محجبة خصوصا في مؤسسات الدولة
يمكن كلام مينا لما قال لي: دي نظرة ذكورية مش دينية لان في عرف الناس دي الست لازم تبقى مزة وما ينفعش تبقى حشمة
ممكن يكون كلام صح
بس تصريحات حسني مبارك لمجلة لو فيجارو
واللي ماحدش اخد باله منها غيري تقريبا
والتصريحات دي من كام سنة وهاجم الحجاب وقال والله انا ما اقدرش افرض على الست مصرية تلبس ايه بس بكرة الستات يفوقوا لنفسهم ويعرفوا ان الحجاب ده مش حاجة كويسة
واحنا نقدر نعالج الامر ده بالسياسة مش بالغصب
!!!!!!!!!!!!
الكلام ده كان ردا على سؤال - أوالحقيقة محاسبة - صحفي لو فيجارو لحسني مبارك حول انتشار الحجاب
بلاش
اصلا موضوع الحجاب ده يا اخي موضوع غريب قوي
ايه الحكاية
ما المصريات طول عمرهم بيغطوا راسهم
مسلمين ومسيحيين
بس هم اليهود اللي ما كانوش بيغطوا راسهم
لكن معروف ان المسيحية القبطية كانت بتلبس البيشة والبالطو
وكانت بتلبس الحبرة
وبس اليونانيات والايطاليات هم اللي ما كانوش بيلبسوا اللبس ده
لكن المصريات كلهم
كانوا بيغطوا شعرهم
ايه الحكاية بقى
عاملين منه قصة ليه؟
وليه مصر كان فيها مسيحيين اقباط ومسيحيين يونان وايطاليين ويهود ومسلمين وشوام
كلهم مختلفين
كلهم بيلبسوا لبس مختلف عن بعضهم
كلهم متمسكين بدينهم وطايفتهم
وكلهم مشاركين في الحياة الاقتصادية والسياسية
وكلهم مافيش بينهم اي حساسيات
وكان فيه تدين
وكان فيه شريعة اسلامية
ومع كل ده
الناس كانت متعايشة وما كانش فيه اي طائفية ولا تعصب ولا كان موضوع المواطنة ده مطروح للنقاش اساسا
وكان فيه برضه الخط الهمايوني موجود
صحيح يعني ما كانش معمول بيه قوي
بس كان موجود
كل ده كان موجود وما كانش فيه مشكلة
وبعد ما اليهود والطلاينة واليونان مشيوا
وبعد ما اتلغت المحاكم المختلطة والقضاء الشرعي
ظهرت الطائفية
فيه ايه؟
فيه ايه؟
اتفضلوا
اديني بافتح الميل اهو
لقيت واحد باعت لي عبر مجموعة: حكم قول باي او تحياتي
!!!!!!!!!!!!!!!!!!!!
الاخت نوارة والاخوة المركزين
كنت عايز اقول ان جزء هام جدا من اللي بيحصل راجع لغياب الدين
وليس العكس
يمكن نوارة اشارت ليه علي خفيف
انا مرة في الجيش كان واحد صحبي مسيحي مؤهلات عليا وكان الصول بتاع السرية
الله يخرب بيت اهله
كل ما الكتيبة تطلب طلبة بضم الطاء -اللي دخلوا الجيش يعرفوا اللفظ ده كويس - يقوم الصول مختار فليب
رغم ان في قاعدة غير مكتوبة بان المؤهلات العليا ميطلعوش طلبة فرن
وكان فليب ياخد الموضوع بضحك ويعادي ايامه
انا بقه الموضوع غظني جدا فسئلت الصول انت ليه بتعمل كده مع فليب
فرد عليا ببجاحة علشان مسيحي
فسئلته تاني طيب ليه مبتصليش؟؟؟
رد عليا اصل مبحبش الصلاة
النماذج ديه كتير قوي قوي
اللي عايز اقوله ان معظم الممارسات ديه بتيجي من ناس جهلة ولا تعرف الدين اساسا
اممممممممممممم
غياب الدين؟
وللا حضور الدين بشكل مصطنع ومفاهيم مغلوطة
مش عارفة ليه الايام دي الناس بتتعامل مع الدين على انه اكتشاف
مش في مصر بس
في العالم كله
باشوف دلوقت برنامج في الجزيرة عن الانجيليين في امريكا
والولية المجنونة بتقول انا عايزة اطفال المسلمين اللي بيموتوا عشان دينهم يبقوا مسيحيين لاننا احنا اللي عندنا الحقيقة
الولية بتحسدنا على عيالنا اللي بيموتوا
!!!!!!!!!!!
متهيالي الكراهية باسم الدين جزء من النظام العالمي الجديد
الناس معظمها بتصلي
زي ما هي طول عمرها بتصلي
والمصريين مؤمنين طول عمرهم
بس كان عندهم اخلاق
وما بقاش عندهم اخلاق
كان عندهم تسامح وما بقاش عندهم تسامح
انا ماليش دعوة بان العالم كله ما بقاش فيه قانون
وبتحكمه الكراهية
انا في مصر
ومصر حاجة تانية غير العالم
هل ممكن يكون الجو العالمي له تأثير على علاقة المسلمين بالمسيحيين؟
هل ممكن تديين الصراع اللي بيقوم بيه بوش بشكل متعصب وعنصري
احد اسباب الحساسيات اللي بين المسلمين والمسيحيين؟
ليه المسيحيين مدام لهم مطالب عادلة
فيه منهم بيطالب بيها وهو برا مصر
ليه مش بيقعدوا في مصر ويطالبوا بمطالبهم دي؟
ولو الاخوان المسلمين هاجروا لامريكا وعلموا التظلمات اللي بيعملها المسيحيين في المهجر
ح يبقى موقفنا منهم ايه؟
يمكن يكون المسيحيين لهم خصوصية بتخليهم ما يقدروش يطالبوا بمطالبهم وهم جوا مصر؟
انا مش عارفة
علي فكرة يا نوارة فعلا قريب في كلام كتير اوي و حوار مشابه لده بقي له فترة طويلة شغال هيتنشر
-------------
انا بجد مبسوط من طريقة كلامك
جدعه بنت جدعان صحيح
اضافة صغيرة
انا قصدي الدين بمعني الدين
انما بعثت لاتمم مكارم الاخلاق
التظاهر بالدين والتمسك بالشكل فقط ده مش دين
او علي الاقل دين منقوص
هاني
انت بتعمل لي
سسبنس وللا ايه؟
احنا مش عايزين اطراف حكومية تتدخل
لانها ما عملتش المشكلة عشان تحلها
هم سبب المشكلة اصلا
بحري
وانا فهمت قصدك
بس انت ما تقدرش تقول لواحد دقنه قد كده وبيكره المسيحيين مثلا انت ما عندكش دين
حتى لو كان فعلا ما عندوش دين
بس هو تاعب نفسه وواقف يصلي طول الليل بالساعة والساعتين
وبيختم المصحف كل اسبوع
ح تقول له ما عندكش دين؟
ح تقول له بتقرا القرآن ومش بتفهمه؟
طيب ح تقول له كده
هو ح يسمع؟
مش كل المتعصبين يا بحري جهلة
فيه منهم معاهم دكتوراة مثلا
انا كان معايا واحدة زميلتي في الجامعة
ما شاء الله ما بتبطلش قراية في الدين وكتب الفقه ووووو
ولا فاهمة حاجة
فوجئت بيها مرة في المحاضرة بتقول لصاحبتها قومي اكتبي في الحضور فلانة وفلانة
قلت لها بس دول مش موجودين
لما يجوا يبقوا يمضوا
قالت لي لا ماهم مش جايين والدكتورة بتحاسب ع الغياب والحضور في النمر
قلت لها ايه ده يا فلانة
ده غش
قالت لي بمنتهى الالاطة
من غشنا فليس منا
الدكتورة مسيحية
!!!!!!!!!!!!!!!!!
طيب دي يتعمل في امها ايه؟
في المقابل
انا كنت في كلية الاداب قسم انجليزي
معروف ان معظمه مسيحيين
وشلتنا كانت معظمها مسيحيين ومافيهاش مسلم غير انا وواحدة تانية صاحبتي ابوها ازهري صعيدي
عشان كده ما كانش عندها تعصب ضد المسيحيين
المهم
كان صحابي المسيحيين مصاحبين واحدة
قال بيقولوا عليها بركة وملاك وبياخدوا من بركاتها
عشان متدينة قوي
الحقيقة البت دي انا عمري ما شفت كم الكراهية اللي في قلبها
وكانت لما واحدة في القسم تتحجب مثلا
تعمل مناحة قدامنا كده كأنها شافت واحد اتقتل قدامها
وكانت مش بتطيقني لسبب وحيد
ان كل المسيحيين اللي في القسم كانوا بيحبوني
الحقيقة والمسلمين كمان
:)))))))
كل ما تشوف وشي تبرق لي وتقول ياااا يسوووووووووع
كل شوية
مش عارفة كارهاني انا بالذات ليه
يعني مثلا نظارتها النارية دي ما كانتش بتتوجه للبت الحيوانة
اللي بتقول ان غش المسيحيين حلال
وهي كانت منقبة اصلا ومحرمة علينا عيشتنا
وطبعا طبعا
ما كانتش بتكلم المسيحيين
ولما كانت تيجي تكلمني وانا واقفة مع مسيحيين تبص لهم كأنهم مقلب زبالة مثلا
المهم البت بتاعة يا يسوع دي ما كنتش بتعمل كده مع البت اللي بتحتقرها وما بتتعاملش معاها اصلا
انما كانت حاطاني في دماغها
لحد ما مرة كالعادة بتبص لي وتقول لي: يا يسوع
قلت لها نعم
قالت لي نعم ايه
قلت لها نعم بتنادي عليا
هههههههههه
بعدها عملت معايا خناقة فظيعة
وبطلت تكلمني خالص
طيب دول طلبة جامعة
لا جهلة
ولا فقرا
ولا محرومين
مالهم
انا مش عايزة ادين دي وللا دي
لازم فيه سبب خللا كل واحدة فيهم بالتخلف ده
ايه اللي يخلي البت بتاعة غش المسيحيين دي يبقى اهلها ناس عاديين وتقول لي اصل انا اهلي ما يعرفوش الاسلام الصح
وايه اللي يخلي الست المبروكة تبقى بتحضر الصلاة وناسكة متعبدة وجواها كل الكراهية دي؟ واكيد برضه اهلها ناس عادية وهي شايفاهم مش عارفين المسيحية الصح
نواره
فعلا زي ما قال اليين انا سمعت مسيحين بيقولوا ان لو الاخوان وصلوا هيعملوا كذا وكذا فينا عشان دول ارهابين !! ولازم يا نوراه فعلا نتواصل لاننا اخوه في الوطن وناس مسيحين كتير ميعرفوش حاجه عن الدين لدرجة ان وحده بنت مسيحيه قالت انها كانوا بيقولولها في الكنيسه ماتشتريش من محات مسلمه زي التوحيد والنور عشان بيصورا البنات ويقولولهم لومبقيتوش مسلمين هنوزع الشريط علي الناس !! عايزين نتحاور نتقرب ونعرف المفاهيم لخاطئه
عيب علينا قوي عايشين مع بعض ومش عارفين بعضنا
تحياتي
نوارة
معليش هو مش من حقي أقول كده.. بس رأيي ماتنزليش بوست جديد إلا لما الموضوع ده ياخد حقه علشان لسه في كلام كتير ممكن يتقال وكمان لسه في ناس كتير عايز تتكلم
تسمحي لي اقترح انك تعملي بانر بالبوست ده كلينك لصورة تعبر عنه في السايد بار.. وتكتبي فوقيه عنوان يشد.. وتسيبي الموضوع مفتوح الى مالانهاية..الموضوع اكبر قوي من بوست يومين وينزل بوست غيره..أو بوست جديد يفكرنا بالقديم وفي الغالب الناس هتكسل تبص في القديم
احنا عايزين منصة الللي عنده كلمة يقف ويتكلم واللي عايز يسمع غيره برضو يقدر يروحها ويسمع اللي بيتكلم
يارب اكون قدرت اوصل فكرتي
ده تعليق كده في السريع.. علشان لازم اقوم اروح دلوقتي.. وعندي كلام كتير هقوله في تعليق ليا اكتبه من البيت برواقة
مودتي واحترامي ياجميلتي
Dear Nawara,
I think there are 2 seperate issues here that we should not mix.
1. There are discrimination actions taken by the Egyptian state against Christians like the issue of building Churches and jobs. This should not be blamed on Muslims or Islam. This is an issue of a government that discriminates and should be dealt with accordingly.
2. The issue of Christian Muslim relations and why they have worsened throughout the years. Here we can talk about each sides faults and mistakes and the general atmosphere of intolerance in society.
In the first issue it is a political issue and needs a political action. No sweet words can solve it. What is needed is a for the state to stop discriminating against Christians. No society effort can remedy that.
In the second issue all of us need to work on solving this issue as a society without state interference
نواره الشعب المصرى قبل الثوره كان بيجمعهم هدف واحد وهو التخلص من الأحتلال الأنجليزى وكان شعارهم الهلال مع الصليب ودايما المحن بتجمع الناس وبتبين معدنهم الحقيقى طب أحنا دلوقتى برضه بنعيش فى ظروف ظالمه من القهر والفساد ودى على الجميع مسلميين ومسيحيين يعنى من المفترض أن الظروف دى توحدنا وتدوب الخلافات الطائفيه لكن ده محصلش ليه بقى ؟ ده هو السؤال لبه الأحنلال الأمريكى ما جمعشى العراقيين ؟ ليه أشتعلت الخلافات العرقيه ؟ عشان زى ما قولتى قهر وأستبداد صدام حسين؟ ولا عشان الساحه بقت خاليه وكل واحد عايز جزء من التورته؟ولا أحنا شعوب متعرفشى تتفاهم وتتفق؟ يعنى لغه المصالح والنزاع على السلطه اهم من أرواح الناس اللى بتموت كل يوم؟ نرجع لمصر ليه ما اتحدش الهلال مع الصليب للتخلص من النظام الفاسد؟ هل لأن الأسلاميين وهم أكبر حكه مؤثره رفعوا شعار الأسلام هو الحل فتصور المسيحيين أنهم خارج المعادله؟ هل هو الخوف من المجهول واللى نعرفه أحسن من اللى مانعرفوش؟ هل المسيحيين محقين فى هذه المخاوف؟ طب فى سؤال مهم هو المسلميين فى حياتهم اليوميه بيصحوا من النوم وهما بيفكروا هيضطهدوا كام مسيحييى النهارده؟لأ طبعا أفيه مسلميين كتير ليهم أصدقاء مسيحيين سواء صداقات عمل أو صداقات عائليه وكلنا بنجرى ورا أكل عيشنا ومش فاضيين حتى نفكر فى نفسنا يبقى لما تحصل أحداث زى اللى حصل فى العباط مثلا أكيد مش الناس المطحونه هى السبب بالمنطق كده لازم فى ناس تانيه عايزه تولعها ليه بقى؟ ممكن أى حاجه جهل مصالح عايزيين يشغلوا الناس عن الفساد عايزيين يضربونا فى بعض عشان يسرقوا البلد براحتهم؟ويمكن كل ده مع بعضه الحل أيه
هاتقولوا عليا مجنون لو قلتلكم أنه فى يد الأسلاميين؟ لو نجحوا يشيلوا الخوف من قلوب المسيحيين ويوحدوا الهلال مع الصليب رى رمان ما حدش هيقدر علينا
ظ
معلش عايز أعطى مثال بمناسبه التعليق اللى قبلى. تصوروا لو الأخوان فى مجلس الشعب هما اللى طالبوا الحكومه بحل مشكله الكنائس وطالبوا بذيادتها.وكمان تصوروا لو هما اللى قدموا أستجواب للجكومهبعد أحداث العياط.ولا هتقولولى ذودتها أوى؟
incomplete
انا يا ستي سمعت كلامك
وعملت مدونة مخصوص عشان الموضوع ده
صمويل تادرس
كلامك صح مية في المية
موضوع الكنائس ده المفروض ان المسلمين يطالبوا بيه قبل المسيحيين
لانه مش قانون اساس
ده فرمان تركي
مجهول1
الحل في ايد الاسلاميين
صح
ايدي بقى على كتفك
مجهول 2
لا ما زودتهاش
الحق احق ان يتبع
هو ده الكلام الصح
سسبنس
ضحكتيني لا مش سسبنس يا نوارة يا جميلة
بس كنت باقول لك خبر
طايب نفترض ان الاقباط كانوا الاغلبيه وا المسلمين كانوا الاقليه, يعني كانو هياعدونا علي حجرهم وا يدلعونا و يغنولنا ماما زمانها جايه جايبه معاها شنطه فيها جوامع و حاجات؟ و ياتري كانو هيزعلوا لو فتحنا لهم محطه فضائيه تسب في المسيح ليل و نهار؟ و يا تري يضايقهم اننا نفتح غرف عل بال توك كل مهمتها انها تشككهوم في دينهم؟؟؟ يا تري كانو حيمسيكونا امن الدوله و المخابرات و مجلس الشعب؟ زي الامريكان كده ما ادو كل المناصب الهامه ل السته مليون مسلم اللي في امريكا؟؟؟ متبطلوا سماجه و غتاته بائه
الاستاذ اللي سايب ميله
ارجو من كل الاخوه و الاخوات تجاهل التعليق الطويل و السخيف عن الاستاذ نجم
يلا روح العب بعيد يا شاطر . . مش حنقرض هنا
الاستاذ اللي سايب ميله
Post a Comment