عماد الكبير أخد العصايا ودفع الاتعاب

لطشت الفيديو وفكرة الالحاح بيها من مراقب مصري

جميل سعيد واحد من اكبر المحامين في الشرق الاوسط
وما بينزلش القضايا غير القضايا الكبيرة والتقيلة قوي
الحقيقة ان فريق الدفاع عن اسلاك معظمه من الفئة دي من المحامين
اللي عشان بس يتحرك من مكتبه مش اقل من ميت الف جنيه تندفع له
ان لم يكن اكتر
طيب حد عارف مين اللي بيدفع الفلوس دي؟
انا اقول لكوا
الداخلية
الداخلية
يعني ضرايب
يعني فلوس عماد الكبير نفسه
وفلوسك
وفلوسي
وخوزقنا يا جدع
يعني حمدي الكهربائي ابو دبلون
اتهزأ في المحكمة بفلوسه
وعماد الكبير
واحد من سواقين الميكروباصات اللي فاتحين بيوت الظباط وامناء الشرطة
بالاتاوات اللي بيدفعوها
اخد العصايا
ودفع كمان اتعاب محامي اسلاك
ده غير انه اصلا كان دافع تمن العصايا
وتمن البدلة اللي لابسها اسلاك بيه
وتمن العربية اللي بتاخد اسلاك بيه من البيت
وتمن كل خيط في ابرة في القسم وللا في بيت اسلاك بيه
وبعد ده كله يتهزأ ويتقال عليه "ده سواق ميكروباص..وانتم تعلمون من هم...هم الذين يروعوننا في الشوارع"
وما قالش
ان هم الذين بيدفعوا مرتبات فوق المرتبات اللي بياخدها الظباط
وهم الذين دافعين له اجرة ما بيدافع عن سفاح
"جميل يافع"
انا بقى اصلي ساعات حاجات هايفة قوي هي اللي تغيظني
يعني انا اكتر حاجة غايظاني في الموضوع ده
ان الداخلية اللي انا بصرف عليها
هي اللي دافعة اتعاب المحامين بتوع اسلاك
طيب انا ماحبش حد ينصب عليا في فلوس
انا ادفع بمزاجي
ما حدش ياخد مني حاجة بالنصب دي اكتر حاجة تغيظني
هاتوا الفلوس اللي عليكووووووووووو
ملحوظة تانية: قاطعوا قناة المحور
واحنا قاعدين ع المنصة المحامين بتوع اسلاك
كانوا بيسألوا على قناة المحور
واحنا لاحظنا ان مراسلين القناة بتربطهم صداقة شخصية
او نوع من الالفة مع فريق الدفاع بتاع اسلاك

تحديث

للسادة المتشككين

أولا: في اول جلسة بعد خروج عماد من الحبس

ادهم الصفتي اتصل بيا وقال لي اللاجئين السودانيين محجوزين

شوفي لهم اي محامي

رحت للاستاذ عصام محامي رضا فتحي امين الشرطة

قلت له على اللي حصل قال لي: انا محامي الداخلية

ما اقدرش اتدخل في قضية زي دي

رحت للدكتور احمد الجنزوري اللي هو محامي اسلام قال لي باللفظ: احنا محامين الداخلية

ما نقدرش نقف ضدها في قضية تانية

ورغدة قالت له بهبل: طيب مافيش محامين مش داخلية

قال لها: انا ما اعرفهمش

ورغدة شاهد على الكلام ده

لو شهادتي مش كافية

ياريتني كنت صورت

بس انا ما كنتش واخدة خوانة

ولا كنت عارفة اساسا ان الداخلية هي اللي موكلاهم

بالنسبة لقناة المحور

فيه اتنين مراسلات

من قناة المحور

واحدة لازقة لجميل سعيد

والتانية شفتها بعيني داخلة مع اسلام نبيه

وبتضحك معاه وما كانش معاها كاميرا دي داخلة معاه

يعني مسموح لها تقعد معاه قبل ما يدخل المحكمة

بينما ما بيرضاش يبص لنا عشان نصوره

وقلت لها(تريقة يعني): هو حضرتك المدام؟

قالت لي: لا

متهيالي انا مصوراها فيديو

اي اسئلة تانية؟

آه

نسيت

فيه محامي صغير في السن كده

من محامين اسلاك

وده اللي لما سألته: انت بتدافع عن اسلام

بص في الارض

وده برضه ابن عمته اتقتل في مستشفى الاهرام

اللي بتموت الناس من الكسر والزايدة الدودية دي

المهم

المحامي ده برضه لما رحت له قال لي نفس الكلمة: احنا محامين الداخلية

والنبي وحياة ابلة ظاظا

راجعو التغطيات السابقة

عندي

وعند جيمي

والتغطيات الجديدة عند

وائل عباس

ومراقب مصري

اللي هو مينا بس مش قايل

كركركركركركر