انا ما عنديش ثقة في ام العلم ده
باحب اقرا فيه
زي ما باحب احل الكلمات المتقاطعة ومربع الحسابات
بس ما باصدقوش
زمان بقى وانا غرة غريرة كنت باقول العلم لا يكيل بالبتنجان
بس لقيته عامل زي الراجل الندل
يقول الكلمة ويخليني اصدقه
وبعدها بشوية يلحس البقين اللي قالهم ويرجع يقول كلام تاني خالص
وكل ما الدنيا بتتقدم
كل ما بيزداد ندالة
يعني زمان على ما اكتشفوا ان الارض كروية
اخدوا وقت شوية
على ما اكتشفوا ان القلب عضلة والعقل هو المسئول عن العواطف
اخدوا وقت شوية
دلوقت
هوب كلوب
كل ساعة بنظرية عكس النظرية اللي قبلها
اكيد فيه شوية مننا شافوا البرنامج الوثائقي
اللي بيقول ان العلم
اللي اتسبب في ان ناس كتير تطلع من دينها
وناس تانية تدور على تفسيرات ملتوية
تلزقها وترقعها عشان تتفق مع العلم
هذوها العلم
بعد كل السنين دي
اكتشف ان القلب فيه خلايا مخية
وانه عقل تاني
وانه بيستجيب للمتغيرات وبيرسل انفعلات
منفصلة عن استجابات المخ
وساعات اسرع
وابتدى الموضوع ده لما عملوا عمليات زرع قلب
ولقوا واحد جاهل ابتدى يكتب شعر
وواحد غلس بقى لطيف
والناس اللي بتركب قلوب
شخصياتها بتتغير وبيزيد عليها مهارات
وبتفقد مهارات
فابتدوا يدوروا في الموضوع
هم لسة بيدوروا
لحد دلوقت ما عندهمش ادلة غير الخلايا المخية اللي لقوها في القلب
والتغيرات اللي بتحصل للناس اللي بتزرع القلب
والتجربة اللي عملوها وشفتها في البرنامج
حطوا حاجة كده شبه الكوبس ع المخ وع القلب
عشان يسجلوا الانفعالات ولقوا ان القلب بينفعل بشكل منفصل
واسرع من المخ
مش دي اول حادثة خلتني افقد الثقة في العلم
اللي عامل زي حنفي: خلاص تنزل المرة دي
بس كمان قراءاتي عن النظريات العلمية
والناس اللي نقدوها
وحججهم
كلها حاجات بتقول ان العلم ده مش موضوعي ولا حاجة
وانه بيخدم مصالح
ومثلا الحاج داروين كان متأثر بفكرة رقي الجنس الابيض
وحب يرسخ للمفهوم ده من خلال نظرية النشوء والتطور
واللي من خلالها يثبت ان كل ما الانسان كان لونه اغمق
دل على انه اقرب للقرد
وكل ما كان افتح كل ما ده دل على انه اكثر تطورا
وعليه فالانسان الابيض هو ارقى الاجناس البشرية
وبالتالي فهو من حقه يحتل الناس ويطلع تلاتين الاجناس التانية
لانهم ولاد قرود والنفر فيهم كان قرد اول امبارح
وان كنتوا نسيتوا اللي جرا هاتوا الدفاتر تنقرا
وهكذا
الراجل الرمة بتاع نظرية الجريمة
ناسية اسمه
بس هو الماني على ما اظن
اللي كان بيقول ان المجرم له سحنة
وعمل علم فراسة اجرامي
اثبت فيه ان كل الافارقة مجرمين
لان المجرم لازم تبقى شفايفه غليظة
وكل الشرق الادنى اغبيا
لان الغباء دليله هو الجبهة الضيقة
اللي بيتميز بيها الاجناس في الشرق الادنى
وكل الشرق الاقصى اشرار ولا اخلاقيين
ومتخلفين عقليا كمان
لانهم قصيرين وعيونهم ضيقين على راي عمو فؤاد
وطبعا مافيش ذكي ولا اخلاقي ولا طيب ولا متطور
غير الجنس الاوروبي
طيب جورج بوش ده نموذج للانسان الاوروبي
طويل القامة وشفايفه رفيعة
وجبهته عريضة ومناخيره مدببة
بذمة النبي
ده عنده مخ وللا اخلاق وللا انسانية
وللا متطور باي شكل من الاشكال؟
الحقيقة انا كمان ازدادت عدم ثقتي في العلم
مش بس عشان هو حنفي
انما كمان عشان عامل زي اللي بيلف حوالين نفسه
وعامل دوشة
وهو في الواقع ما بيعملش اي حاجة
عمالين نهيص
التقدم العلمي
ثورة الاتصالات
البتنجان
والعلم لحد اللحظة دي
ما قدرش يسعد انسان سعادة حقيقية
ما قدرش يرتقي بخلق شخص واحد
ما قدرش يوقف الحروب ليوم واحد
ما قدرش يعالج الانسان من مرض الظلم
ولا عرف يزرع له عدالة
ولا طلع من كمه يركب له صدق ولا امانة
ما قدرش يحمينا من الكوارث الطبيعية
بل العكس
ده اتسبب في زيادتها
بس برضه باحب اقرا فيه
عشان مسلي
اكتر من رجل المستحيل
33 comments:
علم العليم وعقل العاقل اختلافا
من ذا الذى منهما احرز الشرفا
فالعلم قال انا احرزت غايته
والعقل قال انا بى الرحمن قد عرفا
فاصح العلم افصحا وقال له بأينا الرحمن فى قرانه اتصفا فبان للعقل ان العلم سيده فقبل العقل راس العلم وانصرفا
ست الكل وكبيره المهيسين كان نفسى اتعرف عليكى بجد فى نقابه الصحافيين فى الموتمر اللى عاملوه واشكرك وجها لوجه على مجهودك الرائع ولكم كلماتك الرقراقه خففت عنى الام محنتى
الف حمد الله ع السلامة يا عمر
نورت النت والنقابة والبلد كلها يا بطل
وعيب تقول الكلام ده انا ما عملتش ولا حتى الاقل من الواجب
ربنا يحميك
حتى لا ننقرض
اشكرك بشدة على هذه الاضافة
عمري ما كنت ح افتكر اسمه
بس انا فاكرة كويس انه كان بيقول من صفات المجرم ان تكون شفتاه غليظتان
وللا انا اتلخبط؟؟؟؟؟؟؟؟؟
لا بس انا فاكرة
ده حتى كان راسم كام وش للمجرمين
وكلهم كانت شفايفهم غليظة
عموما اشكرك
موضوع اختذال نظرية النشوء والإرتقاء فكون دارون عنصري ابن وسخه ,عليه فكل اللي قاله ابن وسخه زيه..دا بيقتطع الكلام فعلا من سياقه,وبيضيع كل الشغل اللي راجل عمله من قرنين وشوية سنه ودراساته وابحاثه والإكتشافات العملية المتتالية اللي على مدار القرنين اللي فاتوا اللي كل واحده فيهم بتأكد نظرية النشوء والإرتقاء بشكل ما او بأخر"الهياكل العظمية المتحجره اللي بتعود لعهود سحيقه الخ"
الازمه ان نظرية النشوء والإرتقاء مبتتعارضش مع كون ان هناك خالق اول واله الخ,وطبعا انا مبقولش هنا بنظرية التطور الذكي بتاع متطرفي البروستانت امريكا على شاكله بوش وخلافه,بس النشوء والإرتقاء مش لازم تنفي الإله.
بالنسبة لمبروزو فالإرشاد النفسي ميعتبرش علم بالمعنى المتعارف عليه للعلم في فلاسفه ياما"الناس بنت الوسخه اللي حطت تعريف كلمة علم الخ"شالوا التاريخ والطب النفسي والأديان الخ من العلوم,وان كان دا لايبرر ان راجل اتكلم عن حاجه اواخر القرن التاسع عشر انك تيجي بعد مية وخمسين سنه ولا حاجه وتقولي ان العلم بيغلط.
لان العلم مش بيغلط يانواره العلم بيتطور,النهاره ميعرفش التليسكوب ولا الرياضيات والدين بيقولك ان الأرض منبسطه"أيات من القرءان والإنجيل والتوراه بتؤكد على كدا"فيبقى دلؤتي الأرض منبسطه يجي حد ويكتشف انها كرويه "ودا التطور"ميعنيش ان العلم كان غلط قبل كدا انما يعني ان العلم كل يوم أدواته بتكتر وبتزيد ,وبيتطور,دا طبعا خلاف الأديات اللي مستحيل تطور لان كل الكتب السماوية حسب ادعاءات البعض كتب صالحه لكل زمان ومكان ودين ودنيا وتنبئكم بأخبار السابقين واحوال اللاحقين الخ.
شوفي ياحاجه.
النقاش في الموضوع دا لابيودي ولا بيجيب محاولة اثبات ان الدين صح بالعلم دا محاوله خطيره وبتؤثر على ايمان كل مؤمن الدين مش بيتطور الدين كائن ثابت مينفعش نربطه بكائن متطور
مينفعش نفرح عشان فيلم تسجيلي لسه مخضعش للدراسات الكافيه والأبحاث الكافيه بيقول ان فيه مايسمى بالخلايا العقليه في القلب,لان بكره الصبح ممكن يطلع دا وهم او الخلايا دي لها وظيفه تانيه او اي إفتكاسه ساعتها كسبنا احنا ايه ؟
مسا الفل يا عم
السلام عليكلم ورحمة الله وبركاته
اسمة لومبروزو يا نوارة سيزار لومبروزو
دة استاذ ودكتور علم نفس مشهور اوى وهوا الى اسس المدرسة التكوينية (الوضعية) فى تفسير سلوك المجرم
النظرية طويلة ورخمة وغلسة يمكن اشرحها فى يوم ...بس حتى لا ننقرض جايبها الى حد كبير
المهم بصى يا نوارة
انا من الناس الى مؤمنين ان القران صالح لكل زمان ومكان ودة بجد وجداا وكلا منطقى وعلمى بحت
بس مش مع اى حد يثبت ان القران صح بالعلم لان القران اعلى من العلم انت مؤمن بالله بقلبك وبعقلك مش علشان نظرية ممكن تطلع غلط الصبح....
بس العل برضة خلى ناس كتير اوى تدخل فى الدين ودول مش عدد قليل
موضوع القلب دة الابحاث فية يمكن تستمر لحد وقت كبير بس انا مؤمن ان القلب بتاثر وبيؤثر طبعا...
ودة ايمان بالقران يمكن اكتر يعنى بصى معايا كدة
خَتَمَ اللّهُ عَلَى قُلُوبِهمْ وَعَلَى سَمْعِهِمْ وَعَلَى أَبْصَارِهِمْ غِشَاوَةٌ وَلَهُمْ عَذَابٌ عظِيمٌ [البقرة : 7]
قال قلوبهم لية مقالش عقولهم؟؟
مش عارف الله اعلم
بس كلمة قلب او قلوب وعقل ذكرو كتير بمعانى مختلفة بس الاكثر كانت القلوب
ودة مش اثبات لحاجة انا بعرض وجة نظرى وبس
تشارلز داروين و ألفريد روسل والاس جوز المجانين
الى كتبو كتاب أصل الأنواع .وعملو النظرية الهبلة بتاعت النشوء أو التطور
دارون كان مجنون اصلا يا مالك ونظريتة مش هبلة وبس لا متخلفة كمان واثبات خطائها مبيخدش من طالب ربع ساعة
والنظرية الخايبة بتاعت أصل الأنواع عن طريق الاصطفاء الطبيعي
مش عايز اتكلم فيها لانها هبلة بجد
بس العلم بيتطور بس العلم النزيه هوا الى هايفيدك اكتر
اخيرا شوفى انتى قولتى اية
----------------------------------
قدرش يسعد انسان سعادة حقيقية
ما قدرش يرتقي بخلق شخص واحد
ما قدرش يوقف الحروب ليوم واحد
ما قدرش يعالج الانسان من مرض الظلم
ولا عرف يزرع له عدالة
ولا طلع من كمه يركب له صدق ولا امانة
ما قدرش يحمينا من الكوارث الطبيعية
----------------------------------
لان السعادة مش بس بالعلم بانك تكون مرتاح مطمئن ودة بيديهولك الايمان مش العلم قلبك يؤمن وعقلك يفكر بس
والقادر على كل ما سبق من وجة نظرى هوا رب السماء مش عبد من عبادة
عاجبنى اوى البوست دة سيبية شوية يا نوارة بجد الكلام فية هايبقى حلو اوى
نوارة انا هابعلتك شكل الوشوش ال كان راسمها معايا نسخ من الكتاب
pdf
بعد اذنك يا نوارة هعلق على كلمة لمالك
لا يا مالك الارشاد النفسى علم ...وعلم كبير جداا بالمعنى المتعارف علية مش عارف جبت معلوماتك منين بصراحة
والعلم بيغلط يا استاذ مالك وبيغلط كتير اوى كمان والغلط اساس التعلم ودى قاعدة مفهومة ان مفيش بشرى مش بيغلط اصلا
بالنسبة للقران لانة الى يهمنى فى كلامك
كلمة الارض ذكرت كا مرة فى القران بس انا بتحداك انك تجبلى اية مش تفسير لا اية اثبت اى عالم مخرف خطائها اى اية
بالنسبة للارض وبسطها
فكلمة الارض ذكرت حوالى 164 مرة فى القران بين سورة البقرة وال عمران والنساء والمائدة والانعام والاعراف والتوبة ويونس وهود ويوسف والرعد وابراهيم
والحجر والنحل والاسراء والكهف ومريم
والانبياء والحج والمؤمنون
والنور والفرقان والشعراء والنمل والعنكبوت والروم ولقمان والسجدة والاحزاب وسبا وفاطر
ويس والصافات و صــ
والزمر وغافر والشورى والزخرف والدخان والجاثية والاحقاق والفتح والحجرات وقـ
والذريات والرحمن والطور والحديد والحشر والمنافقون والتغابن والنبأ
والنازعات والبروج ...
ومش عارف كلام حضرتك دة اية هجوم مثلا ولا بتفسر وجة نزر ولا اية اساسا؟؟
الايات الى تقصدها زى كدة؟؟
وَالْأَرْضَ مَدَدْنَاهَا وَأَلْقَيْنَا فِيهَا رَوَاسِيَ وَأَنبَتْنَا فِيهَا مِن كُلِّ زَوْجٍ بَهِيجٍ [قـ : 7
]
ودة
وَإِذَا الْأَرْضُ مُدَّتْ [الانشقاق : 3]
ودة
وَالْأَرْضَ بَعْدَ ذَلِكَ دَحَاهَا [النازعات : 30]
ودة
هُوَ الَّذِي جَعَلَ لَكُمُ الْأَرْضَ ذَلُولاً فَامْشُوا فِي مَنَاكِبِهَا وَكُلُوا مِن رِّزْقِهِ وَإِلَيْهِ
النُّشُورُ [الملك : 15]
ودة
الَّذِي جَعَلَ لَكُمُ الْأَرْضَ مَهْداً وَجَعَلَ لَكُمْ فِيهَا سُبُلاً لَّعَلَّكُمْ تَهْتَدُونَ [الزخرف : 10]
انا مؤمن بكل كلمة من كتاب ربى عز وجل ومؤمن انة صح
حتى وان جاء عالم مخرف باى شئ عكسها لانى
مؤمن بالرساله وبالقران وبانة صالح لاى عصر ولاى زمان ومكان بس تطبقة عقول وعاية وفاهمة وبالحق
نصوص العهد القديم والجديد تعنى اصحابها هم اقدر واجدر بالرد
يجيى حد يكتشف انها كروية بطيخة حتى
برضة هايفضل القران الاصح من وجة نظرى
والعلم يبقى اخطاء فى دة ...انا مرجعيتى كمسلم هوا القران وكتاب والله وسنة رسولة لو اختلف معهم العلم ادرس واحلل وافهم
بس
واديان اية الى حضرتك بتتكلم عنها وعايزها تتطور دى؟؟
كلام من ربنا لعبادة وصالح فعلا لكل زمان ومكان والادلة التاريخية كثيرة للغاية والعقلية ايضا لو اردت ان اثبتها لك
والقران كتاب صالح لكل العصور حضرتك
ومعرفش انت بتسخر ولا بتتكلم جد بس انا شوفت ردودك كذا مرة وكلامك وهوا كان متزن عاقل للغاية واعلم انك مسلم
ولا انكر علك فضلا ولا علما بس عايز توضيح من حضرتك
والدين صح بالعلم ومن غيرة ...
بس لان العلم العلم الذى درستة ودرسة كثيرا مثلى داخل او خارج المحروسة ..
ببساطة بيخليك تقتنع اكثر بكلام الله
بس اخر نقطة انا معاك فيها
لو كنت فهمتها صح من كلامك
اننا منفرحش ونهلل لان فى حاجة اثبت العلم صحتها فبقت صح والقران اثبت انها صح فتبقى كدة وخلاص,,,
لا القران فيه حجات اعمق من كدة بكتير ومينفعش اربطة زى ما انت قولت بكائن متغير متذذب زى العلم
تحياتى اليك وارجو الا تفهم كلاماتى انها هجوم شخصى ..
ا
استمتعت بشدة بالتعليقات..وخصوصا تعليق حتى لا ننقرض, لإنه منهجي جدا, و اضاف لي الكثير, سمعت عن لامبروزو و نظريته في تركيب المجرم, واعلم ان المحاكم في انجلترا طبقت هذه النظرية مرة واحدة فقط ثم اسقطت العمل بها, عن العلم بقى. فالحقيقة اول مرة اسمع موضوع الخلاية المخية في القلب, ولما قريتها عندك.اتشاهدت, حقيقي ما فرطنا في الكتاب من شئ. انا كنت طول عمري محتارة قوي في تفسير الأية الي بتقول( اليس لهم قلوب يعقلون بها)؟؟ ربنا قال على القلوب يعقلون..و العلم نفي صفة العقل عن القلب, لكن تلف الأيام و يثبت العلم انه مالوش كبير, و كل ما هتمر الأيام كل ما هنتعلم اكتر..تحياتي على المقال القيم, و شكرا انك اتحتيلي الفرصة اسمع كل المعلومات الي هنا دي.
مش موافق علي تشبيهك لداروين بالعنصري
وكلامك علي إن النظرية كلها أساسها عنصري
الكلام دا مش سليم
وبعدين موضوع القلب والمخ دا تحت الدراسة
ولو فيه كام واحد زرعوا قلب وإتغيروا شوية
ففيه أكتر منهم متغيروش بتاتا
بلاش نربط الدين بالعلم
العلم بيساعد البشرية وبيسهل حياتنا
ومش مطلوب منه يثبت علي رأي عشان يثبت أو ينفي الدين
تحياتي
الاخت الفاضله
برجاء ذكر اسم البرنامج الخاص بموضوع علاقة العقل بالقلب... و تاريخه اذاعته و اسم القناه اللى ذاعته لانه موضوع بيهمنى
فى عملى
و شكرا
والله برافوا عليكي يا نوارة
انتي اخر حاجه تتكلمي عنها العلم
ده انتي بوظتي المعلومتين الي بقالي اربع سنين باخدهم في كلية العلوم
ممكن بس أعرف يعنى إيه خلايا مخيه؟ خلايا المخ ما هى إلا خلايا عصبيه بالمقام الاول, ومن المعروف أن القلب به خلايا عصبيه مسئوله عن التوافق العصبى العضلى وهى المنطقه المسماه
pace maker
أنا لا استبعد أى شئ فى العلم ولكن الخلايا "المخيه " إللى اعرفها عصبيه و خلايا الذاكرة. بلاش نربط الدين بالعلم لأن الإتنين متجددان
ألف شكر
جتك خيبة يا نواره
ليه ؟؟؟
لأنك اتكلمت عن العلم باعتباره حتمى وهو فى الحقيقة احتمالى بل مبنى على استحالة اليقين الكامل حتى فى المعمل وتقدرى تقرى فى فلسفته والمساحة الصغيرة بتاعة الشك دى هى فى الحقيقة باب الفتوحات العلمية وتقدرى تقرى بنية الثورات العلمية لتوماس كون ترجمته عالم المعرفة من يجى بتاع خمتلاف سنه مش عارف
المهم العلم اللى عامل زى المعلم حنفى ده هو اللى أثبت للبشرية الفكرة الدينية القائلة بنقصان الإنسان ولا زال ثمة صراع أبدى بينه وبين الدين مركزه هو السعى الدائم للإنسان ناحية الكمال بمعنى السيطة المطلقة على الطبيعة والموجودات مستخدما العلم وسعى آخر نحو الكمال الربانى ووسيلته الدين
وهما كمالان لا يتحققان أبدا
العلم زى الدين هو اللى حط الحيرة للإنسان وخلاه دايما مع وعد بالخلاص
خلاص بالعمل والصلاح يوصل للجنه
وخلاص بالتجربة العلمية يوصل لاكتشاف المجهول والتحكم بالحياة
فيه ناس حاولت تلعب فى المنطقة الوسطى بينهما وغالبيتهم يا إما لوو رقبة الدين عشان يتكلم علم زى العم أوز الشهير بزغلول أو لوو عنق العلم عشان يتكلم دين
مش حابب اتكلم فى الثابت والمتحول بينهم بس هما بينهم دايما صراع على العقل البشرى وده بالمناسبة صراع ممتع جدا ومفيد للبشرية مش ضدها زى ما البعض ممكن يتصور
م الآخر العلم هو اللى أسس لمبدأ الشك واستحالة اليقين الكامل من خلال التجربة والعقل، ورغم إنه ماحسمش حاجات كتير لسه زى ما نتى قلتى فهو برضه حسم حاجات أكتر بكتير ماننسهاش
يعنى دلوقتى حضرتك زعلانه عشان العلم ماعلجش الظلم بس متنسيش إنه عالج الكوليرا والربو والحصبه اللى هى أمراض كانت بتحصد زمان البشر بالملايين وكنت باضحك فعلا لما اقرا حكايات الطاعون اللى فى الآخر طلع إنه مش مرض بل اسم حركى للامراض التى لم يعرف لها البشر علاجا فى هذه الاوقات ودلوقتتى ما بيستخدمش اللفظ الاهبل ده ليه لان العلم عرفنا الامراض سواءاللى لها علاج او اللى ملهاش
العلم جابلنا الكهربا وطلع مخففات الآلام، وخلى البشرية تعيش أطول
بس للعلم سقف، طب ليه؟ لإنه محدود بمحدودية العقل البشرى الذى ينتجه وأقصى حدوده هو مجموع العقول البشرية يعنى لو اندمجت كلها وبقت عقل واحد جبار برضه يفضل محدود،
والأهم إنه ليس دائما خيرا ولا صالحا يكفى أن نسرد قائمة بالاسلحة النووية والكيماوية والبيولوجية وملوثات البيئة لكى نعرف حدود العلم من منظور منتجاته
طب نقفل باب العلم ونعمله اقراص لتعبئة الطعمية أو للتسلية أو حكايات قبل النوم
لأ طبعا
لإننا بالمختصر برضه لن يمكننا مكافحة هذه المخاطر والآفات إلا بالعلم حد عارف طريقه تانيه ينورنا بيها ينوبه ثواب
مخى المحدود بيقولى ليس من وسيلة أخرى
يعنى العلم صحيح عامل زى حنفى ومش راجل مبيرجعش فى كلامه بس برضه إحنا عاملين زى الست مراته منقدرش نستغنى عنه
يحسم يشك يتراجع يطلع مش ولابد متحيز متنيل ملناش حضرتك غيره
ضل علم ولا ضل خرافه
---
كلامك عن العنصرية والعلم فكرنى بحاجه لذيذه
سنة 1860 افتتحت برلين أول حديقة حيوان بها، لاحظى إنه فى نفس توقيت حديقة الحيوان بتاعتنا لو انا مش باخرف تقريبا ايام الخديو اسماعيل - المهم فى حديقة الحيوان دى كان فيه قفص مسيج به بنى آدمين أيوه والله وفيه صورة اتنشرت للقفص ده
القفص فيه أسرة من جد وأب وأم وأطفال من الأفارقة وكتب عليه أسرة من البدائيين المتوحشين تم اصطيادها من إحدى غابات إفريقيا
---
بس برضه محدش انتقد هذه العنصرية إلا العلماء ومدرسة نقد المركزية الاوربية فى العلوم الحديثة نشأت وسط العلماء، يعنى بالعلم وحده حضرتك قدرتى تقولى النقد اللى قلتيه ده، واللى انتقدوا داروين ولامبروزو علماء برضه
أولا: ممكن حضرتك تتكرمي عليا وترشديني للمرجع الصلي الي ذكر اكلامده؟
ثانيا: لو العلم ما عملش كل ده ممكن حضرتك تقولى لى أيه الى عمل؟
لا ثانية واحدة بس مين اللي جاب سيرة الدين في الموضوع
آآآه عشان انا قلت ناس طلعت من دينها
لا ده كلام عابر
لكن بالذات في التدوينة دي انا ما قصدتش اربط الدين بالعلم خااااااااااااالص
وانا الحقيقة مش مهتمة بقراية كتب الاعجاز العلمي في القرآن والحاجات دي
يعني مش باغلطها ولا باقول عليها صح
لكن انا مش مهتمة بيها
لاني شايفة ان النظريات العلمية مش ح الاقيها في القرآن
وانا علاقتي بالقرآن مش اني ادور على نظريات علمية خالص
انا كل اللي قصدته من التدوينة دي ان العلم فعلا لا يكيل بالبتنجان
بمعنى انه بيغير رأيه
مالك زعل
وقال لي بيتطور
آه بيتطور صح
بس برضه بيغير رأيه
واليومين دول كل شوية طالعين في نظريات مالهاش علاقة ببعض
زي البرمجة العصبية
اللي كانت لسة طالعة اول امبارح
وبعدين طلعت نظريات تانية عكسها
البرنامج الوثائقي اللي بعدك على بالي بتسأل عليه
اتذاع في الجزيرة
من حوالي شهر كده
انا شخصيا كل اللي اقصده ان مافيش حاجة اسمها موضوعية بحتة
حتى العالم اللي بيمقق عينيه وبيتعب
ماهواش موضوعي بحت
وبيبقى متأثر بالثقافة المحيطة بيه
وابو جمال دخل يقول لي طيب ما العلماء هم اللي نقدوا النظريات اللي بتقولي عليها عنصرية
آه
ما انا عارفة يعني مش معلومة جديدة
امال مين اللي ح ينقد نظرية علمية
انا؟
انا اتكلمت عن حتمية العلم؟
لا معلش مش انا
او انا من عشر سنين بقى: العلم بيقول كذا
والعلم ده لما يقول خلاص الناس تسكت
لا مش لازم يعني الناس تسكت
لانه ممكن يطلع بعد كده الكلام اللي بيقوله العلم مش صحيح
وهو بنفسه يصحح النظرية اللي ناس كتير اعتقدت في صحتها
بالمناسبة يا مالك
مشكلة كروية الارض دي كانت في اوروبا
العرب او المسلمين هم اول ناس اكتشفوا كروية الارض
ولم تتعارض مع القرآن وما حصلش مشكلة لما اكتشفوا كرويتها
من القرن التالت او الرابع الهجري وهم بيقولوا الارض كرويتون
هم بس ما كانوش اكتشفو انها تلف حول نفسها
لكن انا ماليش دعوة بموضوع تعارض مع القرآن او الانجيل والكلام ده
انا شخصيا
وده رأيي الشخصي البحت
شايفة ان المقارنة ما بين النظريات العلمية والدين
زي المقارنة ما بين ريحة الجوافة وسلك الكهربا
وعمري ما حطيت الحكاية دي في بالي
انا باقرا الحاجات دي عشان اتسلى
كنت زمان لما اقرا كتاب علمي او اي نظرية بقى علمية
احس اني بقى اللي قريته ده مافيش بعده كلام
وبيطلع بعده كلام
وهو هو نفس الصخص اللي بيقول النظرية هو اللي بيرجع في كلامه
وانا مش باقلل من مجهود العلماء ولا محاولاتهم للاكتشاف
انا بس بالفت نظر العبط من امثالي اللي بيراهنوا ع النظرية العلمية على انها الحقيقة المجردة
والكلام حوالين موضوعية العالم ده كلام ما يدخلش ذمتي ببصلة
العالم ده بني ادم
ومافيش بني ادم موضوعي
والمفاهيم المسيطرة عليه وعلى زمنه هي اللي بتحكمه وبتحكم رؤيته للحقائق وصياغته ليها لما بيصيغها في نظرية
انا بس عايزة اوضح
ان التدوينة دي مالهاش دعوة بالكلام عن علاقة الدين بالعلم او عن ان العلم اثبت من الدين او الدين اثبت من العلم
انا مش شايفة ان دي مقارنة جائزة ابداااااااااااااااااااااا
هو الدين والعلم مش اتنين عرسان متقدمين لي وانا بانقي منهم
والكلمة اللي قلتها عن الفيلم التسجيلي دي
ما كانش قصدي بيها اني اربط الدين بالعلم او اقول بصوا اهو طلع النظرية غلط والدين هو الصح
عشان كلام ربنا عن القلوب مفهوم في سياقه وانا مش محتاجة نظريات علمية تأكد او تنفي
انا بس ضربت مثل بالموضوع ده
وجبت سيرة الناس اللي طلعت من دينها
مش عشان اتكلم عن علاقة الدين بالعلم
بس عشان اقول ان فيه ناس العلم بيسيطر على مخهم لدرجة انهم بيحشروه في كل حاجة
حتى في الحاجات اللي هو مالوش علاقة بيها
زي الدين
يمكن ما عرفتش اوضح كويس
بس اديني باوضح اهو
او يمكن باتكلم عن حالة خاصة بيا انا مالهاش علاقة بالناس
يعني انا العلم ده كان عندي هو كل حاجة
العلم بيقول
يبقى خلاص
وقبل ما اعمل اي تصرف اقول : اكيد في حل علمي
ولازم نستخدم المنهج العلمي
والكلام الخرا ده
والله كنت عبيطة قوي
بس اكتشفت اني باحمل العلم اكتر مما يحتمل
وده لا ذنب العلماء
ولا ذنب العلم
ده ذنب الدعاية المبالغ فيها
لنظريات علمية ممكن تستغل في اغراض سياسية
حتى لو صاحبها نفسه ما كانش ده قصده
ها؟
وضحت؟
الاخ اللي بيسأل عن الخلايا المخية
والله يا ابني انا باحكي لك عن برنامج وثائقي شفته في الجزيرة وقالوا باللفظ كده: خلايا مخية
وقالوا انها حاجة تانية غير الخلايا العصبية اللي موجودة بقية الجسم
وانا ايش عرفني يعني ايه
انا باقول لك اللي سمعته
الاسكندراني البعيد
ههههههههه
بتسأل عن مرجع لايه بالظبط؟
هو انت شايفني باقول نظريات علمية
انا باقول علاقتي بالعلم
عايز لها مرجع؟
انا
العلم ما عملش ده كله فعلا
هو انا اتبليت عليه
يعني ينفع يزرع لك سعادة مثلا؟
ما عملش ده كله ليه؟
وانا ايش عرفني
طيب ايه العمل؟
والله انا اصغر من اني اقدم نصائح لحد
بس فيه حاجات الانسان محتاج يبقى فيها نفسه عشان يحقق الحاجات دي
ثانية واحدة بس اوضح عشان الظاهر ما بقتش باوضح كلامي
يعني انا شايفة ان الانسان لما يرجع لنفسه
قلبه يعني
روحه
ما اعرفش
مش عارفة هي ايه
هي حاجة كده مش ملموسة
حاجة جوانا كلنا
العلم لحد دلوقت لا اكتشفها ولا حط لها تعريف ولا اسم
ولا انا كمان عارفة اسمها
حاجة بتخليك
مهما اللي حواليك ادوك مبررات
ما تقدرش تقترف الظلم
ما تقدرش
لان فيه حاجة بتنغزك
يجي واحد يقول لي الدين
يا سيدي انا الحمد لله مؤمنة وموحدة بالله
بس حتى الدين بيتم التلاعب بيه
وعن طريق العلم برضه
واحد يطلع فتوى ويعمل تخريجة فقهية عشان يخدم بيها مصالحة
ويسوغ لنفسه الظلم او الكذب او الاذية
وفجأة تلاقي الناس عمالة تقتل في بعض وتظلم في بعض وتسرق من بعض
وكله بالعلم
والقانون
والدين كمان
بس فيه حاجة جواك ما انتاش عارفها
تفضل تقول لك: لأ لأ
ده اسمه ظلم
انت بتضحك ع الناس وعلى نفسك
وتفضل تزن في دماغك لحد ما تكتمها انت باي طريقة
انا من وجهة نظري الشخصية المتواضعة جدا
شايفة ان ده العمل
العمل
انك ما تعملش حاجة تقوم عليك نفسك
ولما نفسك تقوم عليك
ما تحاولش تكتمها
واذا ما سكتتش تقتلها
هي عمرها ما بتموت
بس الواحد لو يحفر جواه ح يلاقيها
واخد لي بالك؟
حد فهم مني حاجة؟
عزيزتى جبهة (التهييس)
نظرا لاهتمامى بالبحث العلمى تابعت هذه التدوينه ومابها من التباس فى ماهية العلم وجدواه
وبعيدا عن الرد والتوضيح والذى تكفل به الاخوه الافاضل ومابها من التباس وتشويش بين ما هو علمى و دينى و سياسى.
و لكن مايهمنى هنا هو مرجعية او مصدر ما كتبتيه عن علاقة العقل بالقلب ... فقد كتبت بمدونتى مقاله عن هذا الموضوع موضع العقل من جسم الانسان
و قرات ردك على الفاضله بعدك على بالى ... و بحثت فى ارشيف قناة الجزيرة عن هذا الموضوع ولم اجد له اى دليل هناك سوى برنامج واحد يحتوى على كلمة عقل و هو الخلايا الجذعية تعيد إنبات أجزاء من الأسنان
فهل تتفضلى يا سيدتى و تذكرى لنا المرجعية التى نقلتى منها هذه الجزئية لاهمية الامانة العلمية تفاديا لهز ثقة قرائك و متابعينك فى ما تكتبين
و لك منى خالص الشكر
لنك مقالى
http://kalambelmasry.blogspot.com/2007/05/blog-post_29.html
لنك الجزيرة
http://www.aljazeera.net/news/archive/archive?ArchiveId=1029145
يااااااااااالهوى لو كان سمعك الحاج أحمد زويل
ولا الحاج يعقوب
ولا الحاج الباز كانو ظبطوكى
هههههههههههه
ومن لم يعشق صعود اجبال يعش أبد
الدهر بين الحفر
عنوان البرنامج
مش فاكراه
بس هو اسمه تقريبا: "القلب مخزن الذاكرة"
استنى
ثانية واحدة
لا كتبت كلمة القلب
مالقتش
هو برنامج وثائقي
اليوم اللي اتذاع فيه
اظن 28 29 مايو
اسمح لي ارجع البيت وابص في النوتة بتاعتي
لاني برة
بس ح ابص في النوتة واقول لك اليوم بالظبط اللي اتذاع فيه البرنامج
هو برنامج وثائقي مترجم
يعني مش الجزيرة هي المنتجة ده تقريبا هم شارينه
هو غالبا اتذاع يوم 29 مايو بعد الحصاد
وبرضه ح ارجع للنوتة اتأكد من اسم البرنامج وتاريخ عرضه واقول لك
بس الاغلب 29 مايو
دي حاجة
الحاجة التانية
اني مش باتكلم عن البحث العلمي خالص
لانه مش تخصصي
انا باتكلم في نقطة تانية واضح ان الجميع ما فهمنيش فيها
او انا ما عرفتش اوصلها
ممكن تقرا ردي على كومنت
alexandrian far away
اللي فوق تعليقك على طول
لو النقطة اللي اقصدها ما وصلتكش برضه
ابقى قول لي اوضحها تاني
ابن يسري
اشمعنى زويل؟؟؟؟؟؟؟؟؟
يا اخوانا انا باتكلم على حاجة تانية
اللي ح يفهم قصدي ح اديله شيكولاتة
هههههه
أنا أغيب أغيب و آجى ألاقيكى عاملة مشكلة
مرة بين المسلمين و المسيحيين،و مرة بين مؤيدى حماس و مؤيدى فتح، و مرة فى جدال حول العلم.
محسسانى إنك عاملة زى فيصل القاسم، شغلته يسخن الناس على بعض
:)))))
أنا بهرج طبعا.
أنا اللى فهمته من التدوينة بتاعتك، إن العلم لا يملك الحقيقة المطلقة، و إنك تقريبا إكتشفتى الموضوع ده قريب.
طبعا العلم لا يملك الحقيقة المطلقة، لأن العلم ببساطة هو نشاط إنسانى، و الإنسان نفسه غير كامل، إذا فأى منتج طالع منه حيكون ناقص.
علشان كده فيه حاجة إسمها "تطور علمى"انا أتفق مع مالك فى النقطة دى، بس أتفق مع الآخرين أيضا فى مقولة إن العلم يخطأ أحيانا.
إذا العلم يخطئ أحيانا و يصيب أحيانا، و فى صوابة يتطور ليصل لمراحل تانية قد تصل إلى التغير عن النقطة الأصلية التى بدأ منها
بالنسبة للدين،و انا عارف إنك مجتيش جنبه فى التدوينة، بس الكلام ده إضافة للتعليقات. أنا من رأيى إنه يختلف عن العلم فى وجود ثوابت من لحظة ظهورها زى نقطة وجود الإله، فهى ثابتة منذ ظهور الدين حتى تلك اللحظة، ووجود متغييرات فى الدين أيضا.
و الدين ليس كامل لأن من قام بتطوير متغيراته هو إنسان أيضا غير كامل(طبعا أنا مش قصدى على الانبياء، أنا قصدى على رجال الدين بعدهم)، إذا فنتايجة أيضا غير كاملة
النقطة الواضحة من تدوينتك، إن لو دخل العنصر الإنسانى فى شئ، يبقى أكيد النتيجة هى غير كاملة، و غير مطلقة، و قابلة دائما للتطور.
هه؟ أكسب الشيكولاته؟
تكسب الشيكولاتة الا صف
عشان كمان انا فيه حاجة جوا الانسان اكبر من العلم واكبر حتى من الاجتهاد الديني الفقهي
حاجة بتقول للبني ادم ع المظبوط حتى لو العلم
سواء بقى علم فقهي وللا علم فزيائي حتى
بيقول له ده غلط
بس هو جواه حاجة بتعرف الصح
وبعد شوية العلم بيرجع في كلامه
والحاجة اللي جوا البني ادم دي
اللي مش عارفة لها لا اسم ولا تعريف
هي اللي بتطلع صح
شاخدلي بالك؟
من ضمن تعريفات العلم انه يمكن نقضه بالنظرية المضادة و البرهان التحليلي كما يمكن اثباته و الا أصبح دين ....
عقيدة لا تقبل النقض مهما كانت البراهين أو النظريات المضادة
ما لا تحبينه في العلم هو كونه يقبل النقض لكونه علم!!!
اهم شوية تهييس على أصوله
أحب أشارك بكلمة عجبتني:
اللي خللا الناس يقعدوا آلاف السنين ما يعرفوش ان الأرض كروية موش انهم موش عارفين ... أو ان البراهين ما كانتشي قدامهم
اللي خلاهم ياخدوا كل الوقت دة هوة انهم فاكرين نفسهم عارفين
محمد الريس
اولا الأخ اللي رد على تعليقي بالنسبه للإرشاد التالي فتعريف كلمة علوم زي ما فلاسفة العلوم او الناس اللي قاعده في أبراج عاليه ولاد وسخه قالوا ان التاريخ والإرشاد النفسي والادب والأديان مش علوم
مش علم بالمعنى التجريدي لكلمة علم
فهمتني ؟وحتى لو اعتبر علم كملت وقلت ان الرجل قال الكلام دا من 200 سنه فلايعتبر اخطأ بل يعتبر تطور العلم مش بيغلط العلم بيتطور فقط
بالنسبة لتبسيط الأرض
القرءان قالك والارض بعد ذلك دحاها ودحاها بمعنى بسطها وممكن ترجع لأي قاموس ودا كان السبب ان علماء مسلمين ياما في عصور الظلام العثماني والمملوكي اتقلتوا بسبب انهم قالوا ان الأرض كرويه تدور حول نفسها يعني يبات في عابدين يصبح في المهندسين,"يقال:( دحا) الشيء( يدحوه)( دحوا) أي بسطه ومده, أو ألقاه ودحرجه, ويقال:( دحا) المطر الحصي عن وجه الأرض أي دحرجه وجرفه, ويقال: مر الفرس( يدحو)( دحوا) إذا جر يده علي وجه الأرض فيدحو ترابها و(مدحي) النعامة هو موضع بيضها, و(أدحيها) موضعها الذي تفرخ فيه. "
طبعا قرر بعض الأرزقيه انهم يقولك بما ان مدحى النعامه اي العش فحنقول ان دحو هو بيض النعامه فالارض بيضوية ,ودا اللي يسمى تعريص يا أستاذ.
فمتقوليش الأرض ذكرت كام مره الخ
ممكن تقولي الرد المنطقي,ان القرءان مالهوش علاقه بالعلم لانه كتاب عباده ,وتقولي ان ربنا يقصد المعنى البسيط من الدحو الصالح لفهم الأخلاق مش العلم وهو ان دحاها يعني بسط الأرض لمعيشة الإنسان,من غير فذلكة وتقولي علم والقرءان كتاب جامع مانع,لأننا لو فعلنا اخضعنا القرءان للعلم والمنطق فحيطلع حاجه لازم تكفر بيها.
اهدى من غير عصبية,انا بقول بكل بساطه مينفعش انك تخضع الثابت للمتغير ومينفعش تخضع الرباني للإنساني .
يعني عشان تحافظ على إيمان الناس لازم متتفذلكش بالقرءان ومتحملش القرءان اكبر من طاقته ,وهو زي الأمام علي "س"ماقال حمال اوجه,والجدال فيه مش بينتهي ,فنبعده عن العلم احسن ؟ولا ايه رئيك؟؟
بالنسبه للنشوء والإرتقاء تصدق اسؤ حاجه فينا احنا العرب او المسلمين اطلاق المواضيع على عواهنها .بقولك اكتشوفوا حفريات لانسان من كام ميت الف سنه وبيأكد على النشوء والإرتقاء,تقولي نظريه هبله وطالب يقدر ينهيها في ربع ساعه.
يا بني انت بتهزر ؟ماكانوا لغوها في امريكا ,اللي فيها اقوى مدى اصولي بروستانتي في العالم واللي النشوء والارتقاء عاملالهم زي الدمل في الطيز لا عارفين يقعدوا ولا يناموا بسببها.
انتا فاكر ان كل العلماء اللي في الدنيا مهمتهم محاربه الله والدين ,عالم بنت وسخه مش بتخترع ادويه ولا علاج ولاهندسه وراثيه بتحارب امراض ولا اي حاجه وكل همهم انهم يهدموا الأديان ؟
في ايه يا عم
بالنسبه للخلايا الجزعيه,مين ابن وسخه قال فين انها مالهاش لازمه ولا فتشه ولا حاجه هبله ؟
في اختراعات لعلاج انواع من السرطان قايمه على ابحاث الخلايا الجذعيه,في تطورات في العلوم الإحيائيه قايمه على الخلايا الجذعيه,انتوا بتتكلموا عن ثور معلوماتيه حاجه كدا زي اختراع الليزر او الكهربا.
انتوا اكيد بتهزروا
قصدك لامبروزو ؟
هو ايه اللي جاب سيرة الدين في الموضوع بس
وللا حتى النظريات العلمية؟
انا المقروصة اللي جبت سيرة الدين وكان قصدي حاجة تانية غير اللي اتفهمت
يا مالك
انت فهمتني؟
وائل عباس
اه هو
افتكر لي بقى اسم الراجل اللي في القرن التالت او الرابع العربي اللي اكتشف كروية الارض
انا عمري يا مالك ما قريت عن علماء اتقتلوا عشان قالوا بكروية الارض
ما ابن خلدون قايلها في مقدمته وما حدش قتله
وكان في عز عز ايام المماليك
انت جبت الكلام ده منين؟
ده حتى ابن خلدون كاتبها على انها حقيقة مسلم بيها يعني مافيهاش مجال للنقاش؟
والنبي ماحدش يدخل القرآن والانجيل في الموضوع
والله العظيم دي مقارنة زي اللي ما بين الكرسي الخرزان وصباع رجلي الصغير
الشمال
المهم اسمه ايه العالم العربي ده
معلش يا اخوانا
الحاجات دي بطلت اقراها من عشر سنين
والسن له حكمه
دلوقت باقرا عن الارمن
الا ايه لازمة القراية مدام الواحد بعدها بعشر سنين ح ينسى؟
على فكرة انا مش ح ادي الشيكولاتة لحد
ما حدش عرف انا باتكلم عن ايه
؛((((
مافيش غير ربع شيكولاتاية لبليفر بس
؛o
عمالين تتكلموا في حاجات مالهاش علاقة باللي في مخي خالص
هو انا ما بقتش موصل جيد للي في دماغي وللا ايه
:0
بطلى استهبال
لا انتى مخك كان فيه حاجه
ولا معاكى شيكولاته
وبعدين إحنا مالنا بالل انتى قصدك عليه
عمك ميشيل فوكو الفرنساوى الجامد ابن اخت سعيد حامد قال إن النص مقروء القارئ يعنى زى ما فهمه بمعنى إن سلطتك عليه ككاتبه انتهت بفرمتته بحروف اللغة وإيداعه التدوينه، نفهم بقى ونرد اللى على قد فهمنا وانتى تيجى وتقولى لأ قصدى فتضيفى للنص ما يغير دلالاته فأنا أفهم برضه النص بطريقتى، يعنى سلطتك على النص اللى انتى كتبتيه متعنيش إنك تقعدى تعتبرينا احمره
هو فعلا احنا تقريبا احمره بس متقوليهاش فى وشنا وغلا هانجيبلك فوكو
م الآخر
العلم اللى انتى بتتكلمى عنه فى نصك باعتباره العلم هو بالظبط مضاد العلم
نقول كمان
العلم مش حتمى وطبيعته متغيره وليس أداه ولا وسيلة لليقين المطلق وباكرر اليقين المطلق
هو آداة لليقين النسبى يعنى فى وقته وظروفه ووفق مقدراته المتاحه بيقدر ينتج يقين ما يحمل دائما مستوى معنويه يعنى بلغة بتوع أدبى مساحة للخطأ
وبناء عليه العلم مش مشغول بحل مشكلاتك اللى انتى طالبتيه بيها دى
الادباء اللى زى حضرتك يقدرو يعملوا زى توماس مور ويكتبو يوتوبيا او زى ابن طفيل ويكتبو حى ابن يقظان عشان يوصلوا للكمال المطلق ويحلوا مشكلات الظلم والكراهية والبتنجان
كون العلم محل للاستغلال والغرض ده شئ حقيقى وانت مصيبه فيه ومش قصدى انك مصيبه ولا ليه مش قصدى انتى فعلا مصيبة
المهم
العلم الطبيعى بيصعب فيه التدليس وقلت بيصعب مش مستحيل لإنه بيحتاج لمسوغات وأسباب وبراهين قويه للاقتناع بالكشف العلمى
الاستغلال عادة فى جانب التطبيق وحكاية الديناميت بتاع نوبل معروفه الراجل عمل حاجه تكسر الصخر خدوها وخلوها تموت البنى آدمين كلكم عارفين الحكاية وقصة الجايزه بتاعته اللى عملها عشان يكفر عن سيئات تطبيق اختراعه
خلينا اهمس فى ودنك
اللى مفيش بقى زيهم فى التدليس باسم العلم هما بتوع العلوم الاجتماعية أو الهيومانيتيز اللى بتشمل من اول علوم النفس والانثربولوجيا مرورا بالعلوم السياسية والاداب واللغات والاقتصاد وصولا للقانون والإدارة وغيرها
دى بقى علوم جزء كبير منها بدأ فى بيئات أكاديمية متحيزة، الراجل حبيبى الدكتور المسيرى عامل كتاب هايل عن التحيز فى العلوم الاجتماعية، وعمهم فى التحيز علم السياسة اللى بيتحفنا بنظريات من عينة صدام الحضارات ونهاية التاريخ والذى منه
طب هو احنا شابطانين فى بعض ليه لما الحكايه فله والأشيا معدن
مش عارف
ع العموم مبروك غسل العربية
اكتر حاجة ممكن تخليني اعيط طول الليل
ان حد يقول لي انت بتستهبلي
او كدابة
عشان باحس بالظلم
يعني لما حد بيقول لي يا غبية او عبيطة مش بازعل
لاني ماحبش حد يكدب عليا
لكن ما حبش حد يقول لي بتستهبلي
:(
<:(
<:o
ده اولا
ثانيا
اه انا قصدت كل العلوم
بما فيها العلوم الدينية كمان بقى
العلم بشكل عام ممكن يريح ضمير الانسان
ويبرر له جرائم
وهو مقتنع انه بيعمل الصح ما العلم بيقول كده بقى
والعلم مش لازم يبقى طبيعي ممكن اجتماعي او نفسي او ديني
والناس عندها ثقة في العلم كأنه القول الفصل
ولما يبقوا حاسين جواهم انهم بيعملوا جريمة
والعلم (اي علم بقى) يبرر لهم اللي بيعملوه
ضميرهم بيستريح
فهمتني؟؟؟؟؟؟
مش عايز توصيلة قبل ما العربية تتوسخ؟
يا استاذه يا عمتي ياخالتي
اولا الاديان مش علم ,دي سفسطه لو قلنا الأديان علم
بمنظور الناس اللي شبهي لان الاديان مش ماديه فالبتالي يستحيل اثبات اشياء كثيره فيها انما ايمانيه غيبيبه وانتا بتقبل بالغيبيات دي الخ وبتؤمن بيها
بالنسبة للحته بتاعت بأه ان ابن خلدون قال ولا عاد
ابن خلدون عامل زي ملحدي النهارده بالنسبه للعصر بتاعه
لو ملحد النهارده قال انه ملحد حيطلع دين امه,انما لو سكت وخفى على الخبر ماجور ويادوبك كتب كلمتين هنا وهناك يحاول يوصل بيهم رسالته الموضوع حيعدي .
المسئلة مش انت خطر اد ايه,المسئله انت ممكن تعمل دوشه وتشكك الناس فينا اد ايه ؟
وجزء من هيمنتهم كان الدين والايمان ان القرءان كتاب علوم وان الارض مسطحه"داحاها"وان في ارض سابعه وان في سما سابعه "علميا مافيش حاجه اسمها كدا ايمانيا ممكن نعديها باعتبارها مجاز مثلا"الخ يعني في حاجات ياما في القرءان القصد منها المجاز مش العلم او الحرفيه في الجمل فلو حد قال غير كدا وهما اللي بقالهم قرون قايم حكمهم على السلطه الإلهيه فدا كان شكل من اشكال هدم السلطه دي ,نفس اللي عملته كنيسة روما يعني لا اكثر ولا اقل بس الازمه اننا معندناس كنيسه او بابا او حاجه واحده عارفين الشر جاي منين فنهدها زي المسيحيين ماعملوا في اوروبا وتخلصوا من سلطة النص,الازمه ان الموضوع عندنا هيليهلي ,فيا تبقى مؤمن وجزء من القطيع ياتبقى ابن وسخه كافر.
عم مالك يا قمر
فلتت دي منك يا كابتن
اولا ابن خلدون مش زي ملحدي النهاردة
ده اتعين قاضي قضاة المالكية في مصر ست مرات
ده غير نفوذه اللي كان في المغرب قبل ما يجي مصر
وقاضي القضاة في مصر ده
يعني لازم يبقى مافيش على دينه اية شبهات خالص
دلوقت ينفع واحد ملحد يبقى قاضي
بس ايام المماليك ما ينفعش واحد بيقول كلام مختلف عليه علامات استفهام او خلاف يبقى قاضي قضاة وبدل المرة ست مرات
اظن ان اسم العالم اللي اكتشف كروية الارض هو الادريسي والله اعلم
ودي كانت قبل ابن خلدون بكتير
الارض مسطحه"داحاها"
ههههههههههه
انتوا بتجيبوا النكت ديه منين؟؟؟
نهايته
متزعليش يا ستى
مش قصدى انك بتستهبلى قصدى انك بتستهبلينا يعنى الاهبل عمليا مش انتى بل احنا
آهه ياختى مره قلت علينا احمره ودلوقتى باقول هبل
استريحتى دلوقتى
الجدع مالك ده برضه كلامه فيه إنه
بس حكاية إن الغيب لا يمكن أن يستقيم باعتباره علم دى عنده حق فيها
مربط الايمان غيبيات
ولا تجوز مناقشة حجيتها ولا واقعيتها، أمال تبقى غيب ازاى يعنى
ومالا تجوز مناقشته يبقى بره العلم
ميتافيزيقا بقى
تسمية علم الدين المقصود بيها العلم بالكتاب مش ممارسة البحث العلمى فى اللى قاله الرب دى بصراحة زياده حبتين وان كان البعض بيقول لان النص حق فيبقى ما فيه من اشارات نحو الاحوال الطبيعية حقيقة برضه ونقدر من الاشارات دى نهتدى لنظريات علمية
طيب وماله
الانقح من حكاية الالحاد وكده إن الجماعة اللى بيتكلمو فى الاعجاز العلمى للقرآن الكريم عملوا حاجة لطيفة جدا هما يتكلوما فى علاقة العلم بالدين عشان يقولو النص الدينى سابق بس وهما بيدللوا على كده بيستخدمو العلم الغربى اللى المسلمين ما عملوش فيه شوبش ولا بربع جنيه حتى
لما تراجع مقالات زغلول النجار ده لو استحملتها يعنى تلاقى كل حاجه حتى الصور مأخوذه من مراجع غربية
يعنى الغربيين عرفوا ربنا بالعلم واحنا عرفناه بزغلول
طب يا زغلول قلى
الملحدين دول آمنو بالعلم بديل عن الإله يعنى ولا آمنو بالشك كقيمة مطلقة وان لا فيه إله ولا دياولو
طب الجماعة اللى فى قلوبهم شوية إيمان دول عب خالص كده وسذج ومأفينين وضاربين دين قبل ما ينزلو الشارع يعنى
أنا مش فاهم بقى
وبعدين زهقت م التعليقات على الموضوع ده
وفقدت تركيزى
كده كفايه
اللي انا فهمته من كلامك انك مش بتحترمي العلم لانه متغير
على الرغم من ان اللي اكسب العلم احترامه هو تغيره المستمر
روعة العلم و العلماء عو انهم مش متحجرين...عندهم استعداد لهدم كل ما درسوه و تعاملوا معه كأنه من المسلمات فور اثبات خطأه
حاجة كمان...انت بتحملي العلم مسؤلية الفشل في حفظ السلام ونشر الاخلاق...عمر العلم ما كان وظيفته نشر الاخلاق...ولكن نشر الاخلاق الحميدة في المجتمعات هي وظيفة رجال الدين وليس العلماء
Post a Comment