محاكمة اسلاك خامس مرة عشان البيه

لا لا لا لا
اللي ما جاش النهاردة محاكمة اسلاك ابيح فاته تلات اربع عمره
شرباااااااات
في البداية استكمال مرافعة الادعاء
ناصر امين كان اترافع المرة اللي فاتت
والنهاردة استكمالا اترافع الاستاذ حمدي
وكانت مرافعة هايلة تناولت القضية من جهة اخرى
ملخصها: بلاش حقوق الانسان
امشي يا حقوق الانسان
وحشة يا حقوق الانسان
بخ بخ
احنا مش ناس مسلمين وموحدين بالله ونعرف ربنا
ينفع كده يعني اللي حصل ده؟
الحقيقة ما ينفعش مرافعة الاستاذ حمدي تتلخص
شوفوها فيديو
ثم
وركز معايا في ثم لو سمحت
ابتدت مرافعة الدفاع ان اسلاك ابيح
الاول الاستاذ انور عبد الله تقريبا ده اسمه مش متأكدة
انا برضه سجلتها كلها
تلات اربعها شتايم
وشتايم طبقية
حاجة كده على مستوى خبير الاصوات وعماد دول
ادب سيس خرسيس
جرابيع فلاحين
اخص اخص
الله وانا ح اتريق ليه
اليكم مقتطف من كلام الاستاذ انور: "خبير الاصوات الكهربائي الحاقد الجاهل الصايع"
فالقاضي قال له مافيش داعي للاهانة
قال له لا هو جاهل وحاقد ولا يحمل شهادات وبالدبلوم وكهربائي
القاضي قال له: انت بتقول عليه صايع
فاتلجلج انور عبد الله
راح جميل سعيد العقر لحقه وقال: لا لا هو قال صانع ما قالش صايع
حد شاف مسرحية الدخول بالملابس الرسمية: انت قولتي بكام
- انا يا فندم قلت بكام؟ انا قلت لمين بس بالودن الشمال تسمعيها بكام وبالودن اليمين تسمعيها لمين
بس جميل سعيد ح يلحق ايه وللا ايه
الراجل بعد شوية قال: خبير الاصوات الاهبل
كويس اني سجلت كل مرافعته
خصوصا صايع اللي هي صانع
- انتي ايه اللي رجعك؟
- الجزمة بتوجعك؟
للاسف البتارية كانت بتفيص والمساحة كانت قربت تخلص على ما الاستاذ جميل سعيد ابتدى يتكلم
اول ما اتكلم قال ان اسلاك ابيح حبيبه وابن حبيبه
اه والله، قال انا باترافع عن هذا الفتى اليافع الجميل اللي هو حبيبي وابوه حبيبي
وقال ان اسلاك عمل اتنين وتمانين قضية مخدرات
وانه متربي مع ولاده
وان والد جميل سعيد واخوه وابنه ظباط بوليس
انعم واكرم
وان عماد الكبير سواق ميكروباص
وان اللي قتل الظابط المتناوي
برضه سواق ميكروباص
وقال ان له عتبى على النيابة
"والعتبى غير العتب لأن العتبى رجاء"
والحقيقة ان الكلام ده مش صحيح
لان الرسول صلى الله عليه وسلم
لما كان بيخاطب رب العزة قال: لك العتبى حتى ترضى
ومش معقول يعني الرسول ح يقول لربنا لك الرجاء مني حتى ترضى
المهم انا حاولت اسجل على قد ما قدرت
من الحاجات اللي للاسف ما سجلتهاش
غير ان اسلاك حبيبه وابن حبيبه
ان الاستاذ جميل بيستند في الدفاع على اقوال عماد
وبيقول ان عماد لما اتسأل: اسلام اللي قلعك البنطلون
قال: لا
قالوا: طيب شفته وهو بيؤمر حد يقلعك البنطلون
قال: لا
واستطرد الاستاذ جميل: طيب يعني معنى الكلام ده
ان اسلام دخل لقاه قالع البنطلون
هو ماله بقى كل واحد حر في نفسه!
وتعقيبا على هتك العرض اكد الاستاذ جميل
ان ما هو في الفيديو مش هتك عرض
لان هتك العرض يستلزم ان الواحد يمد ايده في مكان حساس
او يقلع الضحية
وبما ان اسلام وجد عماد قالع لوحده
وبما ان اسلام استخدم عصايا مش بايده
يبقى مش هتك عرض
خصوصا انه ما دخلش العصايا
وشاور بالنضارة وقال: يعني انا لما اعمل لواحد كده بالعصايا
وما ادخلهاش ده ما يبقاش هتك عرض
ده يبقى تحضير
وعماد بيقول انه حاول يدخلها بس ما دخلهاش
واحنا عندنا في القانون لو الواحد تراجع عن الجريمة
ما يتحاسبش عليها بل يتكافئ على انه ما عملهاش
===
انا ح اسيب التعليقات والاصوات والاشارات للسادة القراء
على رأي مريم قالت لي: ده كان ناقص يقول بيمارس حقه الشرعي
عموما انا سجلت جزء كبير من مرافعة الاستاذ جميل سعيد
شوفوها فيديو
بالذات مشهد العروسة
اه وربنا
جاب عروسة ..عروسة لعبة مش عروسة ح تتجوز يعني
ونيمها على ترابيزة ورفع لها رجليها ووقف القلم جنب راسها وقال: ازاي بقى امين الشرطة
بيصور من عند راسه واللي بان لنا وشه
هههههههههههههه
والنبي الراجل ده شربات
المهم اننا كنا قاعدين عند المنصة
والموكوس مينا
اللي هو مراقب مصري بس هو مش قايل
ده سر بينا احنا السبعة الاف
قاعد بقى سي مينا
يسمع مرافعة جميل سعيد ويكركع من الضحك
لما فضحنا
مين بقى
لقيت لك واد امور كده قاعد في الصف الاولاني
تقريبا كان ح ينط يخنق مينا
بعد ما رفعت الجلسة جاله وقال له ممكن اتعرف عليك
المهم مينا أير كده وقال له ليه خير
غتت عليه يعني
في الاخر عرفنا انه طارق جميل سعيد
وانا خارجة لقيت محامية داخلة بتقول لطارق: انت ايه اللي بيشغلك محامي انت تقعد في بيتكوا
جري وراها واتخانق معاها
وبعدين لما سابها وهو بيتدور قال: يلعن ابوكي مرة بنت احبة
بس برضه ما كانش عندي مساحة اسجل الكلام ده
بس صورته وهو بيشتم صورة يعني مش فيديو
===
ملحوظات: مرافعات الدفاع كلها معتمدة على المفاهيم الطبقية
لدرجة ان جميل سعيد هاجم فترة الستينات
كمان جميل سعيد قال ان عماد ابوه وامه وعمه ومرات عمه تجار مخدرات: ومافيا تجار المخدرات
اتفقت مع مافيا حقوق....حقوق ايه؟ آه حقوق الإنسان
اي والله قال كده
رشا بتقول انه الظاهر ما يعرفش ان الدنيا فيها انسان
المهم مافيا تجار المخدرات اتفقت مع مافيا حقوق الانسان مع مافيا الفضائيات المأجورة
سيئة السمعة زي الجزيرة اللي منهم هويدا طه المحكوم عليها بالسجن لتشويه سمعة مصر
اخص عليكوا
بقى مظبطين مع بعض وسايبني من غير حتى لاب توب ولا كاميرا ديجيتال عدلة
طب شوفوني بحاجة بدل ما انا باصرف ع المدونة من جيبي
واتفضحت على قسط عربيتي ابو 400 جنيه
والحقيقة ان الاستاذ انور والاستاذ جميل وجهوا اهانات كتيرة قوي للاستاذ ناصر امين
وطبعا لكل سواقين الميكروباص على اساس انهم تنظيم
الاستاذ انور قال سواقين الميكروباص بيروعونا في الشوارع
والاستاذ جميل قال اللي قتل المتناوي سواق ميكروباص
الانكت من ده كله
ان في اطار "العتبى" الاستاذ جميل قال للنيابة بتقولوا له اين انت من المتناوي الشهيد؟
طيب مين قال لكوا انه مش شهيد؟
طيب ايه رأيكوا انه كان ح يبقى شهيد وربنا ما قسمش
طيب بكرة ياخد براءة ويموت شهيد واجي لكوا وافكركوا انه بقى شهيد
وربنا وربنا ما باتبلى عليه وشوفوا الفيديو
وكل الشتايم اللي حاز عليها سواقين الميكروباص بصفتهم الاجتماعية كوم
والشتايم اللي حظى بها الحاصلين على الدبلوم: الصيع الجهلة الاغبيا الحاقدين الهبل
كوم تاني
ما كانش ناقص غير يقولوا: ادي اللي اخدناه من مجانية التعليم
ولاد البوابين اتعلموا والروس اتساوت يا حوش
اميجو التركي
==
هوامش: الاستاذ طارق جميل سعيد طلع رافع قضية على صحفي
وقال لمينا انت متحيز ولو كتبت حاجة مش عاجباني ح ارفع عليك قضية
قلت له: ليه انا منحازة لعماد ومتوحدة معاه ونكتب اللي احنا عايزينه
قال لي: لا انت اكتبي...!!!! واذ بي افوجأ ان جميل سعيد بيقول لي اهلا بالمدونة العظيمة
وللا الجميلة حاجة كده مش فاكرة
انا اتلهيت بس في انه عرف اني مدونة مع اني المرة اللي فاتت اتكلمت معاه بصفتي الصحفية
مش التدوينية
وبعدين قال لي: ح تشتميني؟
قلت: انا باقول اللي بيحصل بالظبط
مينا اتسحب من لسانه وقال له: دي بنت احمد فؤاد نجم
الحقيقة انا عادة باتضايق لما حد بيعمل كده بس ما كانش وقته اطبق في زمارة رقبة مينا
فقال لي: باباكي راجل عظيم..وهو بقى مش بيقول لك دون لي شوي شوي؟
هاهاهاها
وبعدين طارق جميل قال لي: طيب لو ما كانش باباكي احمد فؤاد نجم مش كنتي قلتي عليه بيشتم؟
فالصحفي اللي طارق رافع عليه قضية قال له: طيب احمد فؤاد نجم مش بابايا وانا باحبه
طارق بص له بقرف ما اعرفش ليه وقال له: مش باقول لك انت
زي ما يكون بيقول له ايش دخلكوا انتوا يا حثالة!!!!!! قلت له لا ما كنتش قلت عليه كده
كنت قلت راجل بيقول رأيه
وبرضه سألته السؤال اياه: لو اخوك عماد كان ح يبقى شعورك ايه
قال لي: مش ممكن يكون اخويا عشان انا اخويا مش مجرم
وبعدين التعذيب كان زمان اسألي باباكي مش دلوقت
قلت له: يعني دلوقت مافيش تعذيب
قال لي: طيب افرضي اتعذب ماهو مجرم واتهرب من السلطات
قلت له: وافرض مجرم شغلة الظابط انه يعذب المجرمين؟
قال: هي هي هي انا مش ح اعرف اتكلم معاكي....طيب اسألك سؤال تاني افرضي انا ضربت الراجل ده وحد جه قال مش طارق اللي ضربه
دي نوارة مين بقى اللي يثبت
قلت له المضروب
قال لي طيب خلاص
!!!!!!!!!!!!
فين السؤال؟
==
ابو اسلاك طلع يقول انه ح يتصل بالنائب العام لان عماد هدد اسلاك بالقتل
والحقيقة ان عماد ما هددهوش ولا حاجة كل اللي قاله ما معناه انا كان ممكن اقتله
لكن انا لجأت للقانون
----
حاجة اخيرة مينا قال لي ما تقوليهاش
طيب مش عارفة اسكت
عموما انا ح اقولها بس ده بينا
قبل المحاكمة لقيت الاستاذ جورج اسحاق داخل
قلت له اهلا وسهلا
قال لي انا جاي بسرعة وح امشي انا بس جاي اشوف العيال
قلت له عيال ايه حضرتك عايز مين من العيال
قال لي مش النهاردة محاكمة كريم
قلت له كريم؟
قال لي : عبد المنعم
قلت له عبد المنعم؟
قال لي حد من المدونين
اتصلت بعبد المنعم قال لي: حرام عليكي يا نوارة انا واخد براءة
خرج جورج اسحاق واتكلم في التليفون وبعدين دخل قلت له: منعم مافيهوش حاجة
قال لي: خلاص خلاص عرفت
وخرج
خرجت وراه لقيت الشاب اللي كان جاي معاه قلت له: الاستاذ جورج عرف هو كان جاي ليه؟
قال لي: ايوة عرف لما يجي اسأليه
وبعدين لقيت الاستاذ حمدي محامي عماد الكبير بيقول لي: هو جورج اسحاق بيعمل ايه هنا؟
قلت له على اللي حصل
قال لي ده جه وسلم على عماد وقال له احنا جنبك يا عماد وما تخافش
طبعا عماد يا عيني واقف زي الاطرش في الزفة: مين ده
الاستاذ حمدي: ده بتاع حركة كفاية
عماد: كفاية ايه؟
الاستاذ حمدي: بيقولوا لمبارك كفاية حكم كفاية توريث
عماد: آآآآآآآآآآآه كفاية ديمكراطية وكده صح؟
الاستاذ حمدي: ......صح يا عماد........
انا ما قلتش حاجة احسن مينا يتخانق معايا
ده سر بينا احنا الخمستلاف..هه؟
الفيديوهات لسة بتتحمل
لما تخلص ح انزلها ان شاء الله
==
الخلاصة الجلسة اتأجلت ليوم 4/7 لاستكمال مرافعة الدفاع
حضر من المدونين وائل عباس ومينا اللي هو مراقب مصري بدون ذكر اسماء
وراندا زنزانة ورشا وخدامتكوا
ومن الصحفيين كتير وعلى رأسهم وائل عبد الفتاح
بس تشوف اشكالنا
مأجورين مأجورين يعني
حاجة تقطع الشراب

========

يا فضيحتي يا فضيحتي يا فضيحتي

كنت ح انسى اهم مدون حضر النهاردة

الا وهو عمر

اسد

اللي لولا بتارية موبايله العامرة

ما كنتش عرفت اكمل تصوير

بالمناسبة

كل محاكمة اسد يسلفني بتاريته

بعد ما بتاريته تفيص

لا مؤاخذة يا اسد

العتب على الزهايمر