Monday 8 October 2012

شوفتوا خطبة الريس؟ هههههههههههههههههههههههههه

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ايه يا ريس ده؟ ينفع كده يعني؟
مبدئيا، وعشان أكون منصفة، انا نمت في نص الخطاب.. وإنني لأحيي وأحترم وأقدر وأبجل كل إنسان تابع الخطاب لآخره وقاوم الرغبة العارمة في النوم
السيد الرئيس الدكتور المهندس يا بغل هو علاج ناجع للأرق.. تخيل لما أنا أنام.. أنا لا أنام يابني.. لا أنام فعلا على رأي الست فاتن لامؤاغزة حمامة.. لكن خطبة الريس نيمتني ننة هوووو
يوسف الحسيني زعلان من الريس عشان بيتريق على اللي ما بيصلوش الفجر، وبيقول يعني ماحدش يقدر يعترض على مرسي غير اللي بيصلي؟ يعني المسيحيين ما ينفعش يعترضوا على الرئيس؟ يعني اللي ما بيصليش ما ينفعش يعترض على الرئيس؟ 
أولا أنا مستغربة إن واحد بذكاء يوسف الحسيني يسأل عن المسيحيين في أي حاجة تخص مرسي... 
مرسي ما يعرفش إن فيه مسيحيين في مصر.. من أول لحظة في الخطبة: بسم الله، والصلاة والسلام على رسول الله، لآخر لحظة في الخطبة بتاعة دعاء ختم القرآن اللي هو عمله ده والجماهير بتقول وراه آمين
ثانيا: بالنسبة للمسلم اللي مابيصليش وبيعترض على مرسي، حنقول له كلمة واحدة نقتبسها من محمد حسين يعقوب: ما بتصليش لييييييييييييييييييييييييييييييييييييييه؟
ثالثا: ايه بقى موضوع الصلاة اللي عاملينه قصة ده محسسني إن اللي بيصلي ده عمل إنجاز... أنا شخصيا ما أعرفش إلا ناس قليلة قوي ما بتصليش، وأغلبية الناس بتصلي، وعادي يعني ينفع الواحد يصلي ويبقى ابن وسخة وظالم وكداب وما بيتقيش ربنا في الناس ولا في نفسه ولا حتى في ضناه... متهيألي يا ريس إنت مثلا ما تعرفش غير النوع ده من الناس.. زمايلك في الجماعة
رابعا: ماشي قشطة.. مش أنت مش حتسمع حد ما بيصليش، وأي حد عايز يعترض عليك لازم يصلي؟
طيب أنا باصلي يا ريس، من وأنا صغيرة خالص، من سن 12 سنة وأنا ملتزمة الحمد لله بالصلاة ولو حصل ايه لازم ما افوتش الصلاة ابدا وخلاص اتعودت ان اول ما الادان يدن ابقى زي اللي اتلدع ولازم اقوم اصلي، بعدين لما وصلت تانية جامعة عرفت اني كان مفروض اصلي من سن 10 سنين، فقعدت سنتين اصلي الفرض فرضين عشان اعوض السنتين اللي عليا، وايام الثورة اتعلمت حاجة اني اجمع مع دخول الوقت، يدن الظهر اصلي ظهر وعصر جمع، لو فضلت عايشة لحد ادان العصر اصلي عصر تاني، يدن المغرب اصلي مغرب وعشا لو فضلت عايشة للعشا اصلي عشا تاني.. عشان دخول الوقت.. عارفه بقى ولا مش عارفه انت، وكمان عشان يوم 2 فبراير ماما كلمتني وانا في الميدان وقالت لي الراجل التخين اتصل بالجزيرة وقال ان اسرائيل حتضربكوا بالطيران صليتي العصر؟ فقلت لها: صليت.. بس حتى لو ما صلتش يا ماما واستشهدت اكيد يعني ربنا حيسامحني في فرض.. قالت لي: وليه نجازف؟ انت حاسباها كده، افرضي رحتي لقيتيه هو مش حاسبها كده، ترجعي تاني تصلحي الموقف ازاي؟
:D
وعاملة عمرتين
مبسوط مني يا ريس؟ باصلي واصوم اهو...
مبسوط؟ 
اه.. اكيد انت ودلاديلك مبسوطين، بس الله اعلم ربنا مبسوط مني ولا لا بعد ما قعدت استعرض عباداتي وما رضتيش استعرض ذنوبي اللي ربنا عارفها وساترها عن الناس، ولو اي انسان، واولهم الرئيس، فكر انه زي ما بيستعرض نفسه وهو بيصلي وبيعمل عمرة كمان حق ربنا يستعرض ذنوبه المخزية قدام البشر حيفكر الف مرة قبل ما يستعرض صلاته، الناس شايفة اللي بيصلي بيصلي، بس ربنا وحده اللي شايفه رغم انه بيصلي بيعمل ايه، اشمعنى ربنا يستر ذنوبك قصاد الناس وانت ما ترضاش تستر طاعاتك اللي له؟ اشمعنى هو مش بيعايرك بالذنب وانت بتعايره بالصلاة؟ انا قلت اني باصلي عشان اكبس مرسي وجماعته اللي فاكرين ان ماحدش في الدنيا بيصلي غيرهم، لكن انا خاطية ومذنبة ذنوب وخطايا لو امي عرفتها حتقرف تبص في وشي، وربنا عارفها وسترني فيها ومش بيقرف يسمع مني لما باكلمه على كل اللي هو عارفه عني ويقدر يمنعني اصلي.. الصلاة اللي انتوا عمالين تتباهوا بيها على الخلق دي لو ربنا مش عايزكوا تصلوا يحرمكوا منها في لمح البصر لا فضل منكوا انكوا بتصلوا ولا عيب في اللي مش بيصلي، انتوا مش ربنا عشان تحكموا عليه، يمكن يكون احسن من كل اللي بيصلوا في الدنيا.. المفروض ان الواحد بيصلي ويصوم ويعمل عمرة لربنا مش للرئيس، ومش مفروض لما حد يسألك انت بتصلي ولا لا ترد عليه.. عشان لا هو ربنا ولا انت بتصلي له
بس انتوا واخدين على النفاق، واصلا لو كنتوا بتصلوا عشان ترضوا ربنا كان بان عليكوا، كنتوا بطلتوا كدب ونفاق وغش وخداع وفجر في الخصومة.. الصلاة حق ربنا وبالاساس هي تعود، انا عشان ماما عودتني من وانا صغيرة باواظب فيه ناس اهلها ماعودوهاش، بس مش معنى كده ان اهلها ما ربوهاش، يمكن ربوها احسن ما انا اتربيت، الصلاة حق ربنا، والحق والعدل والشهامة والكرم حق العباد، ربنا بيسامح في حقه ما يسامحش في حق العباد، تصلي لله وتكدب على الناس؟ ربنا ممكن يسامحك تفوت فريضة ولا عشرة ولا الف، لكن مش حيسامحك انك خدعت ناس وثقت فيك الا الناس دي هي تسامحك، وانا شخصيا مش مسامحاكوا.. مش مسامحاكوا في اي حاجة يا اخوان... من اول القعدة مع عمر سليمان، مرورا بسلسلة الكدب والخداع، وما خفي كان اعظم، كفاية اللي عملتوه ايام ماسبيرو ومحمد محمود ومجلس الوزرا.. ربنا يبقى يوريكوا النار اللي شوفناها 
وانا كمان باصلي.. ايه رأيكوا؟ وبادعي عليكوا في الصلاة كمان بالمناسبة.. وحسبي الله ونعم الوكيل فيكوا واحد واحد، باقول على الاخوان.. كلهم.. اي اخواني ما سابش الاخوان ايام محمد محمود ما يستاهلش غير ان الواحد يقول عليه حسبي الله ونعم الوكيل فيه ربنا يوريه اللي احنا شوفناه اياميها
وحيث بقى اني باصلي، يعني معايا كارنيه الاعتراض على الرئيس... تعالى لي بقى من خلال الشنطة...
انت ايه يا راجل انت اللي انت عملته ده؟ هاه؟ هاه؟ هاه؟ 
مرور ايه اللي انت نظمته وامن ايه اللي انت استعادته وبنزين ايه اللي وفرته وانبابيب ايه والواد اللي على العجلة وبيلف في الشارع والهذيان اللي انت فيه ده؟ ايه يا عم الحاج ده انت قاعد ع الترعة هناك في بلدكوا؟ 
بص بص بص بص يا حاج... الورق اللي انت ماسكه وقعدت تقراه لحد ما نيمتنا ده تبرمه وتحطه فييييي... عينك.. آه
انا بكلمك هنا بوصفي مواطنة باواجه ايه في حياتي
اولا: المرور 
عجينة طراش.. الموضوع مش حكاية ان الدنيا زحمة
عربيات الامن المركزي منتشرة في كل مكان صحرا ان كان او بستان، وهي عربيات ضخمة الجثة مشرئبة الفلنكات شلولخ، كمان بتقف بالعرض عشان تورينا نفسها... فيستحيل باي حال من الاحوال ان صلاح سالم يمشي او كوبري اكتوبر يمشي.. الطريقين دول في حالة توقف دائم... عقبالك
ثانيا: الامن والامان
ادعي عليك بايه وانت فيك كل العبر؟ الشرطة من ساعة ما نزلت بتفضل تقبض على الناس ويموتوا في ايدها، الناس بتموت في الاقسام وبتموت وهي بيتقبض عليها واللي ما بيرضاش يموت من التعذيب بعد شوية بينتحر زي الواد بتاع مرسى مطروح... هو ده الامن والامان؟ 
طب بالنسبة للكنيسة اللي اتهدت والامن ما اتدخلش 
اه.. دول مسيحيين صحيح، والريس ما يعرفش ان فيه مسيحيين في البلد... طب ندي له خبر بالموضوع، على فكرة هو مش جاهل ولا حاجة، هو عارف ان في مسيحيين في البلد، وحتى بيحبهم لانهم مسلمين وموحدين بالله زينا، بامارة مرة قال انه بيطمنا على وفاء والمسيحيين والقمامة
بس هو حد يفهمه ان المسيحيين مش مسلمين، احسن واضح انه فاكرهم مسلمين بس هم اللي مسيحيين كده يعني خلقة ربنا.. حنعايب على خلقة ربنا؟
رابعا: الكمامة
قمامة ايه اللي اتلمت؟ انت تدعونا ننزل من بيوتنا نلم الزبالة وتقول القمامة اتلمت؟ 
احنا نلم الزبالة احنا؟ امال بندفع ضرايب ليه؟ وطبعا ما نزلناش نلم الزبالة، ما تنزل بتوع الاخوان يلموا؟ هو نزلهم فعلا.. وما عرفوش يلموا الزبالة، فضلت الزبالة زي ما هي
يعني حتى لم الزبالة مش عارفين يعملوه؟ 
خامسا: البنزين
انا كمواطنة عندي عربية لانوس عليها اقساط لمدة سبع سنين لسه ما خلصتش مافيش مرة رحت امون الا الاقي بنزين خمسة وتسعين.. طب اسرق يعني؟ اسرق؟ انا عايزة بنزين تسعين، واحد زميلي في الشغل قال لي خلي الميكانيكي يركب لك فلتر وابقى فولي تمانين.. طب هو للدرجة دي البنزين تسعين ازمة يعني؟ 
طب انت بقيت تعمل زي احمد نظيف ومبارك.. يمسك لنا ورقة فيها ارقام ويقراها لنا ويحسسنا ان احنا اللي عندنا المشكلة اللي مش شايفين كميات الانجازات المهولة بنسبة خمسة وسبعين ستين خمسة وتمانين في المية
الا صحيح يا ريس ايه خمسة وسبعين ستين خمسة وتمانين في المية دي؟ هاه؟ فكرتني باللمبي لما قال ست تسع سبع سنين كده
سادسا:
ايه الرغي ده كله ده؟ هو كل واحد مراته مش بترضى تسمعه في البيت يمسك ودانا احنا؟ اتجوز عليها واحدة تسمعك.. انما احنا ذنبنا ايه نسمع ده كله؟ 
طيب.. رغم اني مش طايقاك ولا طايقة عيالك ولا طايقة جماعتك انا حانصحك نصائح لوجه الله عايز تسمعها اسمعها مش عايز تسمعها يا ريت عشان تخرب على دماغك ونخلص منك بسرعة:
اولا: ما ينفعش تتكلم كتير كده.. ده بجد، ما قل ودل، الناس مش فاضية لك، عايز تتكلم كتير وتنفس عن نفسك اكتب مقالات وانشرها.. بجد والله، انت لازم تبقى عارف انت ايه وبتعرف تعمل ايه وما بتعرفش تعمل ايه والناس تستحمل منك ايه وما تستحملش منك ايه
يا ريس انت مش خفيف الظل، ودي حاجة ما تعيبكش لو كنت عارف بيها، فيه ناس دمها خفيف خلقة ربنا كده.. طب حاقولك حاجة، فيه حد في الدنيا دي بيكره السادات قدي؟ ما اظنش ولا حتى اللي قتلوه بيكرهوه قدي.. بس السادات كان دمه خفيف، عبد الناصر كان دمه خفيف، مبارك عشان كان غليظ ودمه مش خفيف كان مستشاريه بينصحوه ما يطولش في الكلام
اهم حاجة في اي عمل له صلة بالجماهير هي خفة الظل، وخفة الظل دي مالهاش علاقة بالنكت، ماحدش قالك اطلع قول مونولوجات.. بس فيه ناس دمها خفيف كده خلقة ربنا حتى من غير ما تظهر، بتبقى خفيفة على القلب، زي مثلا سامية جاهين، هي مش مهرجة وما بتقولش قفشات، بس دمها خفيف كده خلقة ربنا، وهي ساكتة وهي بتتكلم عمرك ما تزهق منها... ده بيبقى حضور من عند ربنا
فحضرتك يا ريس دمك لامؤاخذة مش خفيف، ودي طبعا سمة في كل الاخوان المسلمين مش عارفة ليه، ما عدا البلتاجي، هو الوحيد اللي دمه مش تقيل في وسط الاخوان كلهم، بس انا مش عارفة هم الاخوان دمهم تقيل ليه؟ هل طبيعة الجماعة بتستقطب اللي دمهم تقيل، ولا هم بيبقى دمهم عادي ولما يخشوا الجماعة دمهم بيتقل.. بس انا بالاحظ ان كل اللي دمهم خفيف وكانوا في الجماعة سابوها، زي مختار نوح، واحمد سمير، وابراهيم الهضيبي، هم سابوها لاسباب انسانية واخلاقية بحتة.. بس القاسم المشترك ان كلهم دمهم خفيف جدا حتى من غير ما يهزروا.. 
هو انا كنت باقول كده ليه؟ اه.. ما ترغيش يا ريس.. دمك مش خفيف يا حبيبي، واللي دمه مش خفيف يتكلم سادة على رأي امي.. اتكلم سادة و
to the point
انت حديثك مش ممتع
ثانيا:
عارف مشلكتك ايه ريس؟ ومشكلة الجماعة كلها معاك.. مش انك حددت ميت يوم عشان تحل خمس مشاكل هابلة.. انك ما عندكش مشروع وطني حقيقي، ما عندكش خطة، ما عندكش رؤية، زي ما حسن مالك قال: سياسات مبارك لم يكن عليها غبار سوى الفساد
لا يا عم انت وهو.. سياسات مبارك عليها غبار الدنيا والاخرة، ولو ما كانش عليها غبار ما كانش اول ما ننفض شوية من الغبار ده تطلعوا لنا انتوا... انتوا اكبر دليل على الغبار اللي على سياسات مبارك
انتوا مجموعة منظمة، مبنية على السمع والطاعة، خبرة في الانتخابات، قدرة واسعة على الحشد، تقل دم منقطع الجماهير، روية فكرية صفر، رؤية تنموية صفر، مشروع صفر، خطة صفر، ادب يوك، اخلاق يوك، كدب كتير كتير أمان يا ربي أمان
بص انا عشان اشتغلت في العشوائيات عارفة كويس الاخوان بيشتغلوا ازاي وخطتهم ايه: وجبات، بطاطين، ابتسامات، طبطبات، ربنا يعزك يا رب، ربنا يكرمك، جزاكم الله خيرا يا توتة، الطرحة دي هدية مني عشان لما تحبي تتحجبي، احنا رايحين المسجد ما تيجي معانا، ده شريط عمر خالد....
وكوبونات بقى... واقفين في العشوائيات بكوبونات
فوق ده كله غرور وكبر ورفض لاي انتقاد او توجيه... تقولهم ما ينفعش تتعامل مع العشوائيات على انهم جواميس تأكلهم وتشربهم وتديهم كسوة الشتا والصيف وتتشرط عليهم ما تديهمش فلوس الا لما يبطلوا سجاير وبانجو وتسحبهم من ودانهم على الجامع وخلاص كده
دي مش خطة تنمية دي
لما تقولهم كده يشتموك ويتكبروا عليك ويتعالوا ويتبعوا صدقاتهم بالمن والاذى: الاخوان هم الوحيدين اللي بيسألوا في الفقرا وبيحسنوا اليهم
ما هي المشكلة انكوا بتحسنوا اليهم.. حط نفسك مكانهم، لو انت مكانهم تحب حد يحسن اليك؟ هو عايز يبقى بني ادم.. هو لازم يبقى بني ادم
وزي ما الاخوان كنت باشوفهم ازاي بيقعدوا يشتموا في سكان العشوائيات ويقولوا انهم هم اللي مش عايزين يشتغلوا ولا يبطلوا بانجو دلوقت الاخوان بيشتموا في الشعب ويقولوا الشعب هو اللي ما ساعدش الرئيس
نساعده نعمل له ايه؟ نغير له البامبرز؟
عمركوا ابدا يا اخوان.. ابدا ابدا ابدا ابدا ابدا.. ما كان عندكوا اي نقد ذاتي، ولا اي محاولة تعرفوا فيها انتوا غلطوا في ايه؟ لازم اي فشل يحصل يبقى الاخرين هم المتسببين فيه، من ايام العشوائيات وتعبية الفاصوليا والعسل الاسود في شنط رمضان وانتوا كده
الراجل في العشوائيات ضحك عليكوا وفهمكوا انه بطل يوزع بانجو وهو لسه بيوزع ومش عايز يشتغل معاكوا يبقى اكيد هو اللي غلطان وحاله عوج ومش عايز يتعدل وجات له فرصة ينصلح حاله لكن هو اللي غاوي نجاسة
عمركوا ما فكرتوا انه بيوزع بانجو عشان حاسس ان المعلم منه وعليه حتى لو كان بيتحكم فيه ويذله ويضربه وحاسس انكوا اغراب وجايين تتكبروا عليه وتحسسوه انه نجس وانتوا بتنضفوه وهو مش عايز يحس الاحساس ده
وفين الخطة في تنمية العشوائيات اللي عملتوها؟
ثم ان الشعب المصري مش سكان العشوائيات اللي بتشخطوا فيهم وانتوا بتوزعوا عليهم الشنط لما يتعوجوا عليكوا ويعوزوا شنطتين بدل شنطة واحدة
احنا مش عبيد احسناتكم وانتوا مش بتصرفوا علينا من صدقاتكم، انتوا دلوقت الدولة بتاخدوا من فلوسنا وضرايبنا والمفروض مؤتمنين عليها تراعوا ربنا فيها.. احنا مش خدامين ابوكوا
بس انتوا مش بس ما عندكوش خطة، ما عندكوش رغبة في الاعتراف بنقط ضعفكوا
العلاج ايه؟
مالكوش علاج الا اولا تعترفوا انكوا عندكوا مشاكل حقيقية، وان اللي بيشتمكوا مش بيحقد على الاسلام ولا حاجة، وانتوا مش الاسلام ولا حاجة، وانتوا محتاجين ناس بتفهم، ما يكونوش منكوا لان ما عندكوش حد بيفهم، ومافيش اي انسان بيفهم ينضم لجماعة سمع وطاعة ابدا، تجيبوا ناس بتفهم تحط لكوا خطة تنمية خاصة بمصر
لا تستورد التجربة التركية، ولا التايلاندية، ولا الصينية، ولا الماليزية ولا البوركينافاساوية
احنا مصر.. لنا طبيعة وموقع وثقافات متعددة وموارد خاصة بنا... لازم مجموعة تكون بتفهم، وعندها قدرة على الابتكار، وتعرف مصر كويس قوي تحط خطة تنموية تبقى هي المشروع القومي لمصر، وتبتدي حاجة حاجة
وليكن المشروع القومي الاول لمصر مثلا تحويل الطاقة الى الطاقة الشمسية... مثلا، تبقى دي اول خطوة، ويبقى كل الناس بتشارك في المشروع ده عشان يحسوا ان لهم فايدة، وتتعرض تفاصيل المشروع على الناس في الصحف، وفي التلفزيون، بشكل مبسط، وكل واحد يبقى عارف يقدر يعمل ايه
اعملوا المشروع الاهم واللي كل الناس حتشارككوا فيه خصوصا اليساريين: اعادة هيكلة الداخلية... بدل ما تنزلوا لنا الداخلية تضربنا تاني
انتوا مش حتعرفوا تعملوا نهضة... خالص، انتوا مش مؤهلين لكده
بس انتوا تقدروا تعملوا بنية تحتية، حتبتدوها من الصفر، بس الناس حتبقى معاكوا... بدل ما ماشيين تتخانقوا مع دبان وشكوا وتتكبروا على خلق الله كده
كمان لازم تصارحوا الناس.. ما تقولوا احنا اسفين احنا ما كناش نعرف ان الامور معكوكة كده واحنا محتاجين كل قوى الشعب تتضافر معانا، ومن غير اقصاء لاي حد، وما يطلعش عصام العريان يقول لما ناخد الاغلبية في البرلمان حنشكل الحكومة كلها اخوان
جاتكوا خيبة... يا ريت.. هو فيه في الدنيا اخيب منكوا؟ انتوا فعلا محتاجين مساعدة
ولما انتوا محتاجين مساعدة مافيش داعي لقلة الادب والتكبر وطولة اللسان والاقصاء
او اقولكوا.. ما تسمعوش الكلام
يا رب ما تسمعوش الكلام عشان تخرب على دماغكوا ونخلص منكوا في كام شهر بدل ما تقعدوا على قلبنا اربع سنين

32 comments:

Unknown said...

مش قصدى اهاجم لكن مش شايفة ان ده فشلكم كنخبة ان اكتر المرشحين الى تم دعمهم فى مصر كانو الرئيس مرسى والفريق شفيق؟ وقعدتو تقولو ان الرئيس الجديد هيبقى طرطور للعسكر وفاكس بقى الانتخابات دى؟

Unknown said...

مش قصدى اهاجم لكن مش شايفة ان ده فشلكم كنخبة ان اكتر المرشحين الى تم دعمهم فى مصر كانو الرئيس مرسى والفريق شفيق؟ وقعدتو تقولو ان الرئيس الجديد هيبقى طرطور للعسكر وفاكس بقى الانتخابات دى؟

Mohamed omar Zaian said...

الله أكبر عليكى يا نوارة وكل سنة وانتى طيبة يا عروسة وربنا يهنيكى بعريسك ويفرحكوا دايماً

mido said...

نوارة البوست عاجبني بس الصلاة على الرسول والبسملة في اول الخطاب مش تمييز ضد المسيحيين . عيب http://t.co/mp8JozKD

Salama said...

أولا: موتوا بغيظكم
ثانيا: الجملة الأخيرة في المقال التهييسي محتاجة تصحيح
ثمانية سنوات مش أربعة إن شاء الله.. وبعدين حازم

mido said...

او مش عيب بس جملة مبالغ فيها

مواطن مصري said...

انا بتمتع بالمدونة اكثر من التحرير
مقال جامد كالعادة

mido said...

على فكرة كلام الريس ده شغل مصاطب ومقصود بيقولك بياكل مع الناس, فعلا. بس مش خياكلوا منه كتير

Unknown said...

والله أنا مكملتش بقيت مقالك المبجل ده ! نفسى ف مرة يبقى نقدك محترم ! إنما على طول كدة لسانك متبرى منك ,,,,,

Unknown said...

برغم انني مقتنع تماما منذ البداية ان النهضة الاخوانية مثلها مثل مشروع المائة يوم ليس الا عنوان بلا محتوي لان الاخوان تجمع للمقلدين لا يتمتع اي منهم بملكة الابداع الدنيوي او الاجتهاد الديني لذا لا يوجد للجماعة فلاسفة او منظرون يملكون نظريات اقتصادية او سياسية او اجتماعية, برغم قناعتي تلك الا انني علي ما يبدو سادين لمرسي بفضل منحي متعة الاستمتاع بابدعاتك وابداعات ابراهيم عيسى

Jeje Abd El Raouf / Jeka said...

انا مش معارضة ولا مؤيدة انا محايدة بس الكلام عجبني جراءتة كمان عجبني صراحته فعلا الحجاااات دي بتحصل
احب بس اقول دينا دين يسر مش عسر

وربنا قال في كتابة العزيز :{ لو كنت فظاً غليظ القلب لنفضو من حولك} مش صح ان الرئيس مرسي يجبر الناس على الدين لان دي حاجة بين العبد وربه انت ليك بالي يخص البلد لكن الدين مش من حقك تدخل في أمور ربنا اتقي ربنا جاتك القرف قرفتني ده انا بكره الآخوان اكتر من كرهي لليهود
حسبي الله ونهم الوكيل اه انا بصلي من ٥ سنين بس مش معنى كده انتي مش متربية لا بقى ده انا احسن منك
انا الحمد لله في مكان اعظم من مكانك يا حيوان انا في السعودية وعند بيت الرسول وبعمل عمرة مل اسبوع وتربيتي كانت على ايد شيوخ وحافظة ١٢ جزء من القرأن ها ها مبسوط اني قلتلك على تديني مش مهم رأيك كفاية رضى ربنا علينا انت زي سلة الزبالة الي في شوارع مصر مش مهم أبدا انت شايف ايه ولا مهم ترضي سيادتك المهم ات ربنا هو الي يرضى روح ربنا مايرضى عنك ينتقم منك انت ومل الاخوان


www.jejeabdelraouf-jeka.blogspot.com

دي مدونة بتاعتي يشرفني مروركم اهلا وسهلا بالجميع المعارض قبل المؤيد انا من أنصار حمدين صباحي بالمناسبة

Jeje Abd El Raouf / Jeka said...

Www.jejeabdelraouf-jeka.blogspot.com

يشرفني مروركم

Unknown said...

بارك الله فيكى....اعطاكى الله فصاحه وتعبير سلس عن كل مايجيش فى صدورنا ببساطه وبخفه دم وجرأه منقطعه النظير...استمرى بلا ياس كفاحكوا اسقط اعتى الانظمه وانسوا اجيالنا اللى قال عليها وائل غنيم ان احنا كنا ماشيين جوه الحيط على فكره انا ممن هربوا من البلد بحثا عن الرزق خارج البلد استسهالا وعدم قدره على الكفاح املنا فيكوا علشان ولادنا الخايبه

Unknown said...

Well done Nawara

Unknown said...


Well said Nawara !

حميدو ! said...

انتي للاسف شكلك اتجننتي فعلا يا نوارة .. الفجر في الخصومة ؟ شوفي نفسك ازاي فاجرة في خصومتك معاهم .. انت عملتي نفسك حكم ونصبتي نفسك قاض عليهم واتهمتيهم بالكذب والخداع والنفاق .. رغم ان التيارات اللي انت منحازة ليها بتكدب وتخدع وتنافق وتشوه اكتر بكتير من الاخوان .. لو سمحت خليك موضوعية او علي اقل تقدير محايدة عشان متفقديش البقية الباقية من الناس اللي بيحترموكي ..

Unknown said...

Disregarding the sarcasm in the article (although its lovely and very native), but I agree with you to a great limit. I just want to evaluate them when they have the upper hand in everything, because without them working as a unity, the felool way still running free and overwhelming !

Unknown said...

انتى جبتى من الآخر من أول "ثانيا:
عارف مشلكتك ايه ريس؟"

Unknown said...

إنتى جبتى من الآخر من أول "ثانيا:
عارف مشلكتك ايه ريس؟"

Unknown said...

نوارة يعنى هو الأخوان بس اللى فاشلين ما البلد كلها فاشلة البلد كلها أخوان البلد كلها نفس الدماغ الوسخة
كله ماشى يقول اللى ضدى حمار وأنا اللى بفهم
مثال حى :نوارة بتقول الأخوان دمهم تقيل ومبيفهموش والأخوان بيقولوا نوارة قليلة أدب ومش متربية
هى دي البلد هى دى الأتجاهات السياسية هى دى مصر
ولا عمرها هاتنضف وهاتفضل ورا طول ما كل واحد بينتقد التانى بأسلوب بزئ :)
وعلى فكرة كلامى ده مش عيب فيكى ده طبع فينا كلنا محدش بيحاول يشتغل مع حد كلنا بنحب نتنطط على بعض
بكرة البلد هاتخسر مع مرسى وهايقفلها ويفتح مشروع نهضة فى بلد تانيه :)

معتز ختعن said...

يخربيت رغيك... دانتي رغيتي اكتر من مرسي والله مانا مكمل قراية

معتز ختعن said...

يخربيت رغيك... دانتي رغيتي اكتر من مرسي والله مانا مكمل قراية

Unknown said...

بس حتى لو ما صلتش يا ماما واستشهدت اكيد يعني ربنا حيسامحني في فرض.. قالت لي: وليه نجازف؟

osama said...

مش ملاحظة انك اتكلمني أكثر من الريس وبتعيبي عليه انه اتكلم كتير
أنتي اللي اتكلمتي عن الصلاة والتي انه بيرائي بيها يا تجري كشفيت عن قلبه
وبعدين ماهو سايبك أنتي وامثالك معارضي وياريت بأدب واحترام لكن بوقاحة موروثة وصفاقة مقتبسة
اذا كان يحيك في صدرك ذكر الله والصلاة علي رسول الله في الخطبة
انصحك بأن تراجع ايمانك
لو كنتي مقتنعة باللي بتقوليه فليس لي الا قول أنا لله وأنا اليه راجعون
وأنت كنت غير مقتنعة وبترددي كلام فأقول لك لا يكن احدكم امعه
فكري كويس قبل ماتتكلمي

Anonymous said...

أنا رايحة أعمل تحليل دم

يارب يطلع دمي خفيف
هههههههههههههههههههههههههههههههههههههههههههههه
عسل يا نوارة

Unknown said...

Raw3aaaaaaaaaaaaaaa

Unknown said...

روحي اتخمدي والا اقولك روحي موتي لا انت فعلا وصلت لاعتى درجات الحقد والوقاحه

Unknown said...

روحي نامي والا اقولك روحي موتي لحسن انت وصلت لاعلى درجات الحقد والوقاحه

متفائل said...

ولا حتى بنية تحتية يعرفوا يعملوها لأن فاقد الشيء لا يعطيه وكل إناء ينضح بما فيه ... وعلى فكرة حياخدوا الأغلبية المطلقة في أي إنتخابات قادمة برلمانية كانت أو رئاسية حتى لو لم ينتخبهم الناس .. فعلاً لم تعد هناك من وسيلة إلا إنك (تدعي عليهم) زي مابتقولي

Abeer Ahmed said...

يسلم قلمك يا نوارة وربنا يسعدك

Abeer Ahmed said...

يسلم قلمك يا نوارة وربنا يسعدك

فافى said...

انتى شايفه انمهم هايبقوا 4 سنين؟ :)