Friday 12 October 2012

استهدوا بالله... وكله ينزل ماحدش يقعد في البيت

انا لسه صاحية ولاقية على التويتر ناس بتقول ان الاخوان بيضربوا الناس... والاخوان طبعا بيقولوا لا ما بنضربهمش هم اللي بيشتمونا
اولا انا حانزل اشوف بنفسي اهو عشان ممكن تكون فيه ناس بتسخن
ثانيا: هي مش بلطجة على فكرة.. مافيش حاجة اسمها الاخوان يكسروا منصة عشان كانت بتشتم المرشد
الناس احرار يشتموا المرشد زي ما هم عايزين، هو المرشد ده مصاب ثورة ولا مسجون؟ ده سلطة، واللي عايز يشتم السلطة هو حر
اذا الاخوان نازلين يأييدوا قرار الرئيس باقالة النائب العام اللي قرر يبلطج ويقول طب والله ما انا ماشي ده من حقهم
ما حدش من حقه يطردهم من الميدان.. لكن هم ما يخشوش على الناس زي أبناء الحاج إبو وامبارح قلعوا الاحزمة وجريوا ورا الناس والنهاردة بيكسروا للناس المنصات عشان بيشتموهم
ماهم لازم يتشتموا؟ مش هم اللي قعدوا يسعوا ورا السلطة؟ اللي بيبقى في السلطة بيتشتم.. ويتشتم وما يضربش الناس ايه البلطجة دي؟ 
كل الناس اللي في التحرير، سوا الاخوان ولا اللي بيشتم الاخوان، ضد النائب العام، ومش عايزينه يقعد، عايزينه يروح الفاتيكان، يروح جزر القمر، يروح هضبة التبت.. يروح في اي داهية بس يمشي
وماحدش واخد صف النائب العام ده خالص.. 
فمبدئيا دي نقطة مشتركة بين كل الناس
الناس اللي مش اخوان مش عايزين ينزلوا التحرير من غير ما يوضحوا موقفهم انهم ضد النائب العام وفي نفس الوقت هم مش مع الاخوان، عشان عمايلهم السودا، عشان فيه من اللي واقف اللي له عين طارت في محمد محمود واللي له صاحب مات في مجلس الوزرا واللي طلع ميتين اهله في شارع منصور، فمش طايقين الاخوان.. وبيشتموهم، وهم احرار، مافيش حاجة اسمها يقعلوا الحزام ويجروا ورا النار
يستهدوا بالله كده وينزلوا يثوروا حتى العصر تأييدا للرئيس وما حدش معترض على قرار الرئيس ويمشوا من غير ما يضربوا حد
ولا ينزل لهم الاولتراس بقى ويورونا بقى هم رجالة ازاي؟ ماهو الاولتراس لو كبرت في دماغهم وحسوا ان الاخوان بيتغابوا على الناس ما حدش حيعرف يحوشهم، ودول ما بيحبوش الحال المايل ولما بيسخنوا بياكلوا اي حد في وشهم
اديني حذرت اهو
ويالا توكلوا على الله ننزل كلنا التحرير

1 comment:

متفائل said...

ده اللي كنت متوقعه وخايف منه .. من هنا ورايح أي إحتجاج أو تظاهر ضد الإخوان سيقابلونه بنفس الطريقة ... الناس لما ثارت على مبارك مالقيش حد يقف معاه غير شوية بلطجية متأجرين (موقعة الجمل) الأمر مع الإخوان يختلف يا نوارة .. للإخوان أنصار من الشعب - مش بس من أعضائهم ذوي الكاربيهات - يسدون عين الشمس وهذا معناه إن أي ثورة قادمة على الإخوان سوف تؤدي حتماً إلى حرب أهلية .. من هنا كان مجيء شفيق إلى الحكم أفضل كثيراً .. لأنه - برغم كل عيوبه وأخطائه وخطاياه وكل اللي إنت عايزه تقوليه - من الممكن الإطاحة به في أي وقت كما أطيح بمبارك .. أما الإخوان فقصة أخرى تماماً .. الإخوان أتوا ليبقوا