Thursday 18 October 2012

الفلول حيبرشطوا علينا بكرة

الاسبوع اللي فات الاخوان برشطوا علينا وضربونا
الاسبوع ده الفلول حيبرشطوا علينا... بس دول غالبا احنا اللي حنضربهم... انا طيبة وقلبي ابيض عشان كده باقول لتوفيق عكاشة ومرتضى منصور وغيرهم من الفلول بلاش تنزلوا.. انا ما اضمنش العيال يبقوا مرقدين لكوا ومستنينكوا يطلعوا عليكوا غلب السنتين اللي فاتوا وترجعوا تقولوا دول بلطجية... اديني حذرت اهو... دي ناس خلقها في مناخيرها وقرفانة في عيشتها ودافنة صحابها وممكن تشوف وشوشكوا العكرة اللي اتسببت في كل اللي احنا فيه ما تحسش بنفسها..
انج سعد.. فقد هلك سعيد.. اذا كانوا من كتر الغل جروا الاخوان من الميدان وهم كان عددهم اقل واتاخدوا على خوانة ومش هم اللي باديين الضرب ولا كانوا حاطينه في بالهم.. انتوا حتاخدوا في ايدهم سبع دقايق بالظبط.. احترموا نفسكوا كده وخليكوا في نفسكوا تابعوا من التلفزيون باحترامكوا... بلاش يام بدوي
والله العظيم دي نصيحة مخلصة مش عشانكوا، بس عشان ماليش مزاج اليوم بتاع بكرة يبوظ راخر زي المرة اللي فاتت، لازمتها ايه المرازية دي انتوا تنزلوا ودماغتكوا تتفتح واحنا نتشتم وتبقى هيصة وبوليكة... ما تخليكوا في حالكوا
هو ايه البخت المايل ده... يا اما الاخوان يقولوا لنا انا جاي معاكوا كده يا اما الفلول يقولوا انا جاي معاكوا كده؟ ما تبصوا في ورقتكوا بقى ما ذاكرتوش ثورة طول السنتين اللي فاتوا وجايين تغشوا منا؟

4 comments:

Unknown said...

هو ده الكلام المظبوط.

Unknown said...

تسلم ايدك . هو ده الكلام المظبوط

Unknown said...

هو ده الكلام المظبوط.

متفائل said...

بصي يا نوارة .. حكاية تقسيم المصريين دي إلى ثوريين وفلول بقت تقرف وتزهق وتؤخر ولا تقدم .. طب الإخوان دول دولة داخل الدولة إختارت تنعزل على جنب بأجندتها الخاصة وبيقولوا : طز في مصر بكل صراحة ووضوح .. مش معقول بقى نقسم الباق إلى ثوريين وفلول وزفت .. يعني أمريكا وإسرائيل لسه ماقسموناش (وده حلم عندهم) قوم نقسم إحنا نفسنا ؟