Saturday 24 July 2010

ما بين سيد البدوي والبرادعي

البرادعي ينزل بالبيان
سيد البدوي ينزل بكل رموز البلد بما فيهم ابويا
البرادعي ينزل بالاخوان
سيد البدوي يدعو الناصريين للانضمام ويقول انه حيلغي معاهدة السلام مع اسرائيل
عارفين عيلتين الصعايدة اللي بينهم تار وبنوا كل عيلة جامع قصاد بعض وبقوا داخلين منافسة عشان يلموا المصلين:
- الثواب في كل الجوامع بعشرة عندنا بعشرين
- صلي الضهر وخد العصر هدية
- ادخل الجامع بشبشب واخرج بجزمة
لحد ما في الاخر عيلة منهم وقفت تصقف بالشباشب: 
من غير وضووووء من غير وضووووووء... كل حاجة عندنا من غير وضوء
وكسة عليهم هم الاتنين... ووكسة على اللي قاعدين يتفرجوا عليهم.. ووكسة على اللي عندهم حاجة يعملوها ومش بيعملوها.. ووكسة على اللي بيعمل شغل على الارض ومش عارف يسوق نفسه للناس
ووكسة على البلد كلها جتكوا نيلة
ووكسة على الرفيقة الدادا ام عطيات الشغالة والحب في زمن الكوليرا جاتكوا نيييييييلة... ما تهزوا المؤخرة شوية واتحركوا  وبطلوا تتخانقوا مع بعض ومقسومين ستين حتة وانتوا كلكوا على بعضكوا خمستاشر واحد وقاعدين بتشتغلوا بآليات  متربة وعفى عليها الزمن من ايام البوليس السياسي يا اخي طب غيروا تسريحة شعركوا وقمصانكوا الكاروهات طيب الواحد كل ما يبص لكوا يحس انكوا خارجين من دولاب الفضية بتاع جدتي.. وقولوا كلام يتفهم.. انتوا بتقولوا ايه اساسا؟ 
ووكسة على الاقباط خنقوني، كل ما واحدة تدب خناقة مع جوزها يعملوا مظاهرة على اساس ان كل مطالبهم تنحصر في الوفاق الاسري، مدام كل مرا متستتة في بيتها مالهمش دعوة بالبلد انشالله تولع باللي فيها
ووكسة على الاخوان اللي عاملين زي اللي متقدم لها تلات عرسان ومقررة تقرا فاتحتها على ده، وتغمز لده من الشباك، وتدي ميسد كول للتالت كل يومين واخرتها التلاتة حيطفشوا منها وحتعنس وحيعشوا كمان تمانين سنة تانيين يوزعوا وجبات
وكملت بسيتي ستارز بتاع البرادعي ونايل سيتي بتاع الوفد دول كمان وكل واحد فيهم معلق اللمض ومشغل تامر حسني
لالالالالالا خنقة خنقة خنقة فعلا

14 comments:

mido said...

البرادعى مسافر و التوقيعات نازلة زى المطرة

امال لو قعد فى مصر حيعمل ايه ؟

البدوى مش حيعمل حاجة

Unknown said...

المول بتاع البرادعي بيبيع احسن؟ برضه الماركتينج الامريكاني احسن من الماركتينج الفرنصاوي بتاع الوفد
هيهيهيهيييييييييييييي

بر و ماء said...

احلى حاجه عجبتنى حتة الاخوان
100 ميه

:D

Abdulrhman said...

وسمعني أغنية أوكسني أوكسني بلآ وكسة !

ربك يسهلها انوآرة ...

Eldebug said...

بيفكرونى بتشبيه لحسن المستكاوى مرة .. زى مايكون القطر اتقلب وكل واحد راح لامم شوية من اللى واقفين وراح يزق من ناحية .. ولا هما استريحوا .. ولا القطر اتعدل

أنا - الريس said...

كله شغل عيال

utopia said...

سيد البدوى الحكومة لا مؤاخذة مأجراه زى اللامؤاخذة كليبرالى علشان يخطف الزباين
من البرادعى

والبرادعى مصافر يشوف شغله للغاية ما تجيله الاشارة من الاخوان ان كله تمام والعدد كمل علشان ييجى ياخد التوقيعات ويروح يشتكى الحكومة لماما امريكا
وبتوع 6 ابريل شغالين على استراتيجية الفوضى الخلاقة بتاعة الانسة كوندا

والمسيحيين معمول لهم غسيل مخ فى الكنيسة
والاخوان عندهم بارانويا
لينا حق ما نصدقش حد فيهم
اللى هما مش عارفينه ان الناس مستنيين الشيخ ابراهيم ينده عليهم ويطلعوا على قصر عتريس علشان يحرقوه ويخلصوا فؤادة
ونحن فى انتظار الشيخ ابراهيم
:(

أحرار مصر said...

وكسة على الاقباط. اى ست عندهم تتخانق مع جوزها وتطفش من البيت يعملوا مظاهرة على اساس احنا الى خطفناها عشان نخليها تسلم. جتكم القرف هوا احنا محتاجين حد يدخل الاسلام. من قلتنا يعنى.
انا عمرى مشفت حد مغيب وعاطى عقله اجازة زيهم

احمد أبو العلا said...

إيه يا خواننا جو اليأس والتبطيط ده

Unknown said...

0124610230لأ و الألعن من كدة إنزلي أرياف أومناطق شعبية مش هتلاقي حد يعرف ولا برادعي ولا وفد ولا بدوي
عن تجربة

مواطن مصري said...

حمج الله على السلامة اخيرا رجعتي تدوني من جديد

لا البرادعي ولا البدويولا جمال


كلهم بياعين كلام


و طز في دراويش البرادعي و دراويش البدوي


و مداد مداد مداد شدي حيلك يا بلد

Unknown said...

@Utopia: begad 27saan ta3leek

Ya nawara: el badawi ma3 eno shaklo mo7taram bas ma3roof eno metgab combarse, wel moseeba eno fi naas betfakar tente7'bo, we eh nas 3andaha mo7' kowaies we keddah.
Mawdoo3 Camp David, ya3ni el kalam sahl bas hal e7nna yenfa3 nel3'eha we man7arebsh maslan?!!

Masr ba2et 3amla zaie fawazeer Ramadan, we kol el nas 7atta el 2ganeb beyes2alo how eeh ele haye7sal we ma7adensh finna 3areflo egaba

مواطن مصري said...

حمد الله على السلامة

اخيرا رجعتي تدوني من جديد

لا البرادعي ولا البدوي ولا جمال


كلهم بياعين كلام


و طز في دراويش البرادعي و دراويش البدوي


و مداد مداد مداد شدي حيلك يا بلد

احمد خليل said...

اتعلقت بموضوع نصحيه للشباب وانهمكت فبه وعديت على الموضوع ده، ما اغبانى .ده اجمل موضوع قراته ليكى شعر وحكمه وتحليل سياسى يعيش ولا ما العمل، كل جمله فيه تنفع مانشيت سياسى وكسة عليهم هم الاتنين... ووكسة على اللي قاعدين يتفرجوا عليهم.. ووكسة على اللي عندهم حاجة يعملوهاومش بيعملوها .......طيب الواحد كل ما يبص لكوا يحس انكوا خارجين من دولاب الفضية بتاع جدتي.. وقولوا كلام يتفهم.. انتوا بتقولوا ايه اساسا؟ .. الالالالالا خنقة خنقة خنقة فعلا
انتى فعلا ست الكل زرقاء اليمامه بتشوفى قبلنا ربنا يخليكى .المختصر المفيد
جاتكوا نييييييله