Saturday, 24 July 2010

واجبي القومي يحتم عليا تحذير كل الشيباب

لسه قافلة التليفون مع واحد صاحبي واستأذنته ان احكي الحكاية مدام من غير اسماء وحتى لو قلت اسمه الاولاني ماحدش حيعرفه لانه من وسط تاني غير وسط التدوين، المهم، طبعا انا مسحت بيه البلاط، ثم نصحته، ثم عمل بنصيحتي، ثم جابت نتيجة والحمد لله وربنا ستر
الحكاية وما فيها ان الافندي مصاحب بنت زي الفل، حلو كده؟ راح زيه زي اي شاب مصري طفس الساحل الشمالي مع صحابه ومعاهم فتيات شريفات عفيفات
اولا سافر الساحل من غير ما يقولها عشان عامل عملة
ثانيا واخد بنات
ثالثا وهي الغلطة الاكبر قعدت تتصل بيه طول اليومين والافندي عشان عامل عملة ايه اللي حصل؟ ما بيردش.. الحمار ما بيردش
رابعا بعد ما راحت السكرة وجات الفكرة اكتشف انه عمل عملة سودا انه ما ردش عليها، قام الجبان خايف يتصل بيها لتنفجر في وشه
طيب يا فتح الله ما اتصلتش بيها ليه حتى تنقذ ما يمكن انقاذه؟
قال لي سايبها تهدا
انا مش فاهمة هم كل الرجالة اغبيا كده ليه؟
نداء انساني الى كل اصحاب القلوب الرحيمة: ما تسيبوش الستات تهدا ابدااااااااااااااااااااااااا
اوسخ حاجة ممكن تعملها في حياتك انك تسيبها تهدا
لانها مش بتهدا، كل ساعة بتعدي عليها وانت عامل عملة ومش بتكلمها بتكبر الموضوع وخيالها بيشتغل: واه طبعا، تلاقيه قاعد مبسوط دلوقت مع صحابه، يا سلام؟ للدرجة دي ولا على باله؟ هو ما صدق وللا ايه؟ طبعا تلاقيه مع الاشكال اللي بيلمها من الشوارع
(مش محتاجين نشرح ان اي بنت انت تعرفها حتى لو اختك في الفترة دي هي واحدة من الشارع طبعا)
طب ليه كده الغباوة دي؟ ليه؟
طاب طاب... من غير تقطيم.. وبما اني عارفة ان المرض ده مستشري بين الرجالة المصريين بالتحديد، كام نصيحة كده حطها حلقة في ودنك الله يخليك واسمع كلامي وعلى ضمانتي وشيل لي اني طلعت اسرار العائلة النسوية برة والستات حيشرحوني على اللي حاقوله ده بس برضه انتوا مالكوش اخوات صبيان؟
1- تحت اي ظرف مافيش حاجة اسمها ما تردش عليها، حتى لو عارف انها بتتصل بيك عشان تشتمك
وماله؟ اسمع الصرختين والشتيمتين وانت ساكت، وبعدين قول لها طب ممكن نتقابل عشان نتفاهم؟ وخلاص كده الموضوع خلص انتهينا
التبعات اللي حتحصل لك على اثر الرد على تليفونها وانت عامل عملة اخف بكتيييييييييييييييير من المصايب اللي حتحصل لك لما ما تردش عليها
بجد حتكهرهك بعد شوية.. انا باتكلم بامانة
2- تحت اي ظرف ومهما تكون عملتك سودا، ما تجيش تكحلها تعميها، ما تنيمهاش زعلانة ابدا، مافيش حاجة اسمها سايبها تهدا، ما بتهداااااااااااااااااااااااااااااااش ما بتهداااااااااااااااااااااااااااااااااااااااااااااااااااااااش بتتجنن اكتر ومش بقى كل يوم بيعدي بتتجنن اكتر، ده في الاول كل تلات ساعات، بعدها كل ساعة، بعدها بشوية كل نص ساعة وهكذا دواليب لحد ما تبقى في حالة هيستيريا وخلاص انسى بقى
مافيش جريمة شنعاء نكراء ممكن ترتكب في حق اي واحدة قد الاهمال والتجاهل، شوف، ولا الخيانة حتى، ايوة ايوة، انت خايف ترد او سايبها تهدا، هي ما بتبصلهاش كده، هي شايفاها اهمال وتجاهل وولا على بالك وبتتصرمح مع الاشكال اللي بتعرفها 
وكل ما الوقت بيمر كل ما بتحس انك بتقولها انت صرصارة ولا تسوي... حتئذيك
تعمل ايه؟ الحاجة الوحيدة اللي تخليها تهدا انك في اليوم اللي عملت فيه العملة السودا تفضل تتصل بيها تتصل بيها تتصل بيها وتزن تزن تزن، وكل ما زنيت اكتر كل ما هي كده بتهدا اكتر، ويا سلام بقى لو تبدع، بتاع عشرين ميسد كول على سبعتاشر رسالة (حل الكيس شوية بلاش دناوة) على تسع ميلات، على تتصل بيها من تليفونات ما تعرفهاش، استموات بقى
طبعا في الاخر حترد عليك.. خلاص كده المشكلة اتحلت، مش مهم ردت قالت ايه؟ حتى لو ردت وقالت لك انا مش قلت لك ما تتصلش بيا تاني؟ خلاص مش حينفع الموضوع، انا مش عايزة اشوفك..إلخ إلخ إلخ، مش مهم بتقول ايه؟ المهم انها ردت
حترد عليها الرد المعتاد: طب ممكن اشوفك ونتفاهم؟
وياسلام يا سلام لو في نفس اليوم اللي اتقفشت فيه تروح لها تحت البيت.. خلاص كده وفرت على نفسك كتير
3- مافيش حاجة اسمها: دي غلبانة والقطة تاكل عشاها، او دي عيلة ما تعرفش حاجة، احم... انا مضطرة اقول ان الستات مفطورين على الاذية، مش القاعدة انها ماشية تئذي عمال على بطال، بس لو ضايقتها قوي وحسستها انها صرصارة انت كده بتستحث جين الاذية فيها وبتضطرها تفهمك انها مش صرصارة وان انت اللي صرصار، والله لو عيلة عندها خمستاشر سنة، وتجاهلتها واهملتها حترقد لك وتمشيك بعد كده تكلم نفسك وحتعرف ازاي تئذيك، مافيش موديل للاذية طبعا كل شيخ وله طريقته، بس الحقيقة العلمية ان كل الستات مؤذية قوي لما تحب تئذي
طب ليه الغباوة دي؟ ما تخليك حلو
طب ده انا باشوف رجالة صيع والله العظيم، يبقى لازق البت على قفاها وملبسها السلطانية وهو اللي سايبها كمان وغادر بيها وهي عاملة زي القطة السيامي معاه... ما تسألوهم العيال دي بتعمل ايه؟ عارف بيعمل ايه؟ مش بيهملها حتى وهو بيسيبها مش بيحسسها انها مهملة ولا مش مهمة ولا مش على باله ولا متجاهلها، ويقعد يستموت كده، ومهما تعمل فيه يفضل ساكت، وتقول له انزل دلوقت - وهم سايبين بعض - ينزل، وتتصل تشتمه يقعد يسمع ولو اتصلت خمسين مرة يرد وهي مش بتضيف يعني بتشتم برضه.. خلاص شوية وفعلا حتخلص اللي عندها وتهدا وتبقى ميت فل وسبعتاشر وكده اتقيت شرها بدل ما تحطك في دماغها وفجأة تبقى مش عارف الضربات جاية لك منين، وكله حيبقى من تحت لتحت ومش حتعرف تمسك عليها حاجة وتمشي تكلم نفسك يا ولداه
الا هل بلغت؟ اللهم فاشهد... انا برضه عندي ولايا رجالة وما يهونش عليا
ربنا يستر على البهدلة اللي حاشوفها من البنات على الاسرار اللي طلعتها دي

55 comments:

راجى said...

ده على اساس ان اللى مصاحبها وزى الفل دى مرافقها ولا صفتها ايه بالضبط ؟
انتى جرى ايه فى مخك يا نوارة؟
طيب نقول انها خطيبته او مراته كده تعدى لكن غير كده يبقى احنا لامؤاخذة بقرون
اسف على اللهجة الجامدة بس ده لانى بحبك واحترمك

جبهة التهييس الشعبية said...

مصاحبها

مالك خير؟ مصاحبها.. بيحبوا بعض يعني
ما سمعتش عن اتنين بيحبوا بعض قبل كده؟
انت طالع من فيلم بطولة حسين رياض؟

mido said...

طيب انت ليه بتعلميه يضحك على البت و هو صايع اصلا ؟

جبهة التهييس الشعبية said...

لا هو واد كويس انا عارفة

عيل كمان وبيحبها
بس غبي شوية

mido said...

طيب عموما كده اى حد يعمل اللى هو عايزه و يلعب بديله و بعيد يعمل بالنصايح دى ؟؟؟؟

مواطن مصري said...

الحمد الله كل ما بسمع عن مشاكل الحبيبة

بحمد ربنا اني مريح دماغي من وجع الدماغ دة الحمد الله الواحد مش مررتبط

جبهة التهييس الشعبية said...

مش حيعمل بالنصايح دي الا واحد بيحب واحدة ويبقى له خلق يصبر عليها كده لو مش بيحبها مش حيبقى له بال ولا نفس على المجهود ده

جبهة التهييس الشعبية said...

الموضوع مالوش علاقة باللعب بالديل

القلم غلاط وعادة

- من غير زعل كده -
الرجالة جبنا

كلهم بقى ماحدش يقول لي الا انا

كلهم جبنا وبيخافوا من الستات ومن مواجهتهم

ممكن تبقى غلطة بسيطة جدا زي انه نسي عيد ميلادها مثلا ويصلحها بانه يتهرب من مواجهتها

غلط ده

كخ

mido said...

الا انا

و ناس اعرفها
:D

khalil said...

اسف اسف جدا لم استطع اكمال الموضوع انتى زعلانه ان ما ردش عليها ،ده هو اللى مزعلك بس ،يعنى لو رد عليها وهو مع واحده تانيه يبقى صافى يا لبن
ده انسان كذاب كذب عليها دى هى الجريمه، دى النصيحه اللى بتوجهها للشباب من الجنسين ،اعمل اللى انت عاوزه بس رد على التليفون ،نصيحتى لهذه الفتاه بطليه فورا مش عشان مردش على التليفون ده انسان كذاب ما ينفعش يتصلح

جبهة التهييس الشعبية said...

لا هو مش انسان وحش
مش كل انسان بيغلط يبقى وحش مدام حاسس بغلطه واتورط فيه يبقى مش انسان وحش
وبعدين انا مش لازم احكي ابعاد الموقف
بس المهم يعني هو مش انسان وحش ولا بيضحك عليها بس مش لازم اقول تفاصيل
غلطة ومش حتتكرر وغلبان والله وعيل صغير كمان

زقزوق said...

حقيقى انا استفدت من الكلمتين دول بس كان المفروض تحطيهم فى خانة جدعنات مش افففف
شكرا يا عسل

مي ..سماء الحرية said...

موضوع مثير للغثيااااااااان

مصاحب واحدة
!!!

و رايح الساحل مع وحايد "شريفات عفيفات" تانيين
!!!

و بتديله نصايح إزاى يصلح أحواله مع اللى مصحيبها
!!
و إذا إستغرب أو إندهش أو حتى إنكسف بنى آدام من المكتوب يبقى طالع من فيلم عبد الورث عسر و لا حسين رياض
!!!!!!!

mohamed said...

أفضل موضوع قراته عندك من فترة يانوارة و المصيبة لسه عامل حاجه شبهه من أسبوع فات وعلى فكرة عملت نفس الأخطاء وحصل معايا نفس رد الفعل.!!! هو كل البنات بينزلو بنفس الinstruction manual !!
الجميل بقى ان مافيش أى بنت راضيه تسامحك على افشاء الأسرار الحربية اللى انت سيحتيها ده ويسيبلك تعليق ولو حتى شتيمة:)

israaelsakka said...

الله يسامحك
أفشيتي أسرارنا
طب نبهدلهم إزاي بعد كده ؟؟؟ إزاااااااااااي إذا أنتي قلتلهم إيه اللي بيعصبنا و أننا مؤذيات :))

lastcrazyboys said...

اسمحيلي اسجل موئفي من الكلام ده سا استاذة
أولاً حضرتــك عايزة تمرري للشبــاب -تحت بند انهم بيثقوا في كلامك ثقة عمياء- سيـاسة المسكــنة والخنوع ..وانه يبقى لامواخذة زي ما نقول حدانا في البلد..دلدووول
ودي سيـاسة السم في العثل وواضحة جدا


ثانيـاً : انا بعترف ان الشبــاب بيحبوا الانحراف زي عينيهم ..ومايملاش العين دي غير التراب ..بس مش معنى ذلك انه مضطر يبرر للحاجة كل شوية هو كان مع مين ..اه هو المفروض يبقى "مسنجفها " اول بأول بس هي كمان لزم تعرف ان في حياة الرجل : امرأة واحدة لا تكفي

ثالثـا: سـاعات الواحد بيبقى محتاج شوية اكسجين ..نفس ..والتنفيض للست الرغاية افضل الحلول لتوصيل رسالة مغزاها ..انا مبحبش الورك ورك كتييير
لأن حضرتك مسكتي في حتة ان الولا عمل عملته ..وسبتي القطة الوديعة خلته يعمل كده ليه ..مايمكن من كتر الزن اللي أمر م السحــر

رابعاً بقى ودي مش ليكي ..للأستــاذ اللي علق في الأول اللي كلامه حسسني انه ابن اخت الحويني ولا عاجة .. وفي الآخر بيقولك اصل انا " بحبـك " وبحترمك
طب مانت بتعترف بالحب اهو ..أخوي بقى عاطفي اهو اي شعور نبيل ..عزيز ..محسن
اي اسم من بتوع السبعينات دول

ومتزعليش يا استاذة ..اصل انا كنت عنهــزر ..بس بجد شوية
:)

جبهة التهييس الشعبية said...

لاست كريزي بوي

ههههههههههههه لا اللي مش عايز الخنقة يفكه من الارتباط ويعيش طيارة بقى

اه

انا جالي دلوقت حسين صدقي وعزيزة امير يقولوا لي الحب عيب

ارجوكم ما تفهمونيش بالطريقة البطالة دي يا عزيز انت وهي دي مجرد عاطفة نبيلة بيكنها الشاب وبيحمل لها كل ود

انا اكرهك اكرهك اكرهك

علي الزيبق المصري said...

موضوع لذيذ ومفاجئ ف وسط سياسة وهم ..انا بنام وقلت اشقر على المدونة يمكن يكون في حاجة جديدة ، قمت نسيت النوم وقعدت اضحك !

نوارة هل فعلاً الستات بيفكروا بطريقة غير منطقية ؟ولهم طريقة غير مفهومة في تحليل الأمور والتعبير عن نفسهم ؟وبالتالي صعب الرجل يتنبا الأمور ماشية لفين ويقدر يعمل ايه أو يفهم
ايه من الانفعالات دي ؟
يعني هل مثلاً ممكن تكوني أنت معترضة على حاجة وهي سبب غضبك الحقيقي فتتنرفزي عليه في حاجة تانية بعيدة خالص بدل ما تتنرفزي عليه في الشئ الأصلي اللي مضايقك؟؟ ويقعد هو يحاول يصلح السبب غير الحقيقي تقومي تتنرفزي بزيادة !!!!! لأنه مش عارف انت زعلانة ليه في الحقيقة !

وشكراً على الاستشارة وما ننحرمش :)

khalil said...

ست الكل، رأئى ان التعليق يبقى كلمه وردغطاها،يا الموضوع عجبنى يا ماعجبنيش الموضوع المكتوب مكتوب وحش،وخاصه العنوان،واجب قومى والشباب
انا اعرف عنك انك انسانه غير عنصريه يعنى بتقدمى نصيحه للشباب من الجنسين يعني العمله السوده لوارتكبها فتى او فتاه بتنصحيهم يعملوا ايه، رغم ان سواد العمله
ملتبس . راح الساحل فى شله فيها فتيات عفيفات شريفات لدعم حق الشعب المصرى فى ارتياد شاطئ مارينا ومقالهاش لانها ما بتحبش الاشتراك فى المظهرات تفرق لوعيا عن انه رايح يهلس .انا بتكلم عن العمله السوده ومدى سوادها بالنسبه لفتى او فتاه فى حاله الكذبه البسيطه انه او انها رايحه تشترك او يشترك فى مظاهره وخاف يقول او تقول يبقى النصيحه اللى انت كتباها تصلح تماماوخطأ فاحش وجليطه وقله زوق انه او انها ما تردش ،ام اذا كان رايح او ريحايه تهلس او يهلس فالطريثه اللى عملها بطل القصه انه يدور الحرى يهرب يختفى لان الكلام فى هذه الحاله مهين للطرف الغدور .حتقول او يقول ايه ؟ممكن بعد سنه او اتنين يروح او تروح وتمرغ راساها فى التراب وتقول او يقول بعد مرور هذه المده لا استطيع العيش بدونك ارجوكى سامحينى وتكون هديت وخدت وقتها قتقرر تسامحه او تقولله يحنن انت عوزاه يرحلها والموضوع سخن وهى مهانه تبقى منحازه له وعاوزه تخدعيها دى البنيه خربانه نفسيا من العمله السوده اديها فتره سنه سنتين تفكر،اما ان الفتى ده كويس على عينى وراسى بس مثل هذا الموضوع ما يتلمش بالشكل ده ،طويلت عليكى يا ست الكل الموضوع ده طلع اوت .

مي ..سماء الحرية said...

بما إن الصحوبية بقت حاجة عادية و طبيعية
و بيتحطلها إرشادات .. كده عادى
!!!!!!

و بما أن السرقة و الإدمان و الفساد إنتشروا و بقوا برضة عادى

إذاً و بنفس المنطق المعوج
عايزين دليل الحرامى, و سلاح المدمن, و منهاج الفاسد

بس علشان نساير العصر و نطلع من كتاب حسين صدقى و أمينة رزق
و نقب لكشكول تموووووورة و حماقى و أبو الليف

ميرهان said...

انتشار تلك الظواهر الغريبة فى المجتمع , لا يعنى ابداً انها تبقى عادية و نتعامل معاها ببساطة

المفروض اللى بيصاحب او بتصاحب يبقى عارف انه بيعمل حاجة غلط , ترفضها كتير من النفوس السوية
و الا كان بقت السرقة و التحرش حاجات عادية لانتشارها الآن فى مجتمعنا الآيل للسقوط

دعاء فتحى said...

بدون تعليق !!!!!!!!!!!!!!!!!

علي الزيبق المصري said...

هو علاقة الحب بين الولد والبنت بقت انحلال رسمي خلاص في مصر وبيربط بينها وبين الادمان والفساد وخلافو ؟؟وبقت صحوبية امريكاني ومستدعية التعليقات اللي بيكتبوها الأخوة الزملا هنا ؟
بجد برافو للتيار السلفي في مصر ونشاطه المبهر على مدى عشرات السنين .هو التيار الوحيد اللي وصل للي هوه عايزه .فلوس وتحجر وكروش ودناوة وتخريب عقول شعب بحالو وفوق كده رضا ربناوالجنة ونعيمها .برافو بجد

مش فاهمه said...

كل كلامك صح اكتر حاجه تجرح الست هو الأهمال بس انا مرة سمعت احمد ادم فى برنامج بيقول كلمه عجبتنى قوى ان الراجل المصرى لا يمكن يتجوز واحده مشى معاها لكن ممكن جدا يتجوز واحده غيره مشى معاها

lastcrazyboys said...

أهي " منهــاج " دي لوحدها وضحت وبينت "المنهاج" اللي بتفكــر بيه الانســة مي

واسمحيلي اقول آنسة بغض النظر عن الحالة الاجتماعية ..لأن بحس ان اللي اسمهم "مي " بنفضل نقولهم انسـة حتى بعد ما تبقى تيتة ..ربنا يدينا ويديكي طولة العمــر

بس يبدو جليـاً وواضحـاً انه وصل مفهـوم خاطئ للناس ان الاستاذة بتروج للمواخذة المشي البطال ..وان البت تبقى مرافقة واحد وتروح معاه لأبعد مدي دون رقيب او حسيب
يعني العملية تبقى هردبيســة يابو عيسى..وكله على كله ولما تشوفوا قول له
وده موووش صح ..وموووش حلو

لأنه بالرغم من اني مابقبلش كلمة "مصاحبة " أو ان واحد يصف المرأة التي تعلق بها قلبه بحاجات بكرها عمى من ايام الجامحـة زي لفظة "المدام " برضه..-ياااااه دي بالذات كانت بتنقطني-إلا ان اللي يعرف نوراة كويس
هيعرف انها بتتكلم عن علاقة عاطفية حسية راقية .."مش راقية ابراهيم " عشان محدش يستظرف
وانما واحد "بعد الشر عليكو كلكو" وعليكي بالذات يا "انسة " مي
احاسيسه اتحركت تجاه شخص معين ..وصارحه بهذا الشعور ولولا متطلبات العصر من :شهادة -شقة - فرح - قايمة- مهر-شبكة-كان زمانهم معاهم سامح وسماح في اولى ابتدائي وكي جي تو

بس يعملوا ايييه .. والمشاعر ساعات بتفلت من الواحد غصب عنه

وعلى فكرة انا جايب الكلام ده من عشرة مع شباب ملتزم ..وشباب فلاتي

والشاب الفلاتي بالذاااات لو كان احساسه صادق..بيحافظ عالشخص ده زي عينيه
فيارييييت نحكم عالامور من منظورها الصحيح .. ومنحطش قوالب نمشي عليها من غير ما نحرك العجينة اللي ربنا اداهلنا اللي اسمها عقل ..واحنا راكنينها عشان نشكلها في صاجات عالعيد ان شاء الله
لسة العيد فاضل عليه كتير.. استعملوا العجينة دي شوية دلوقتي ..وربنا يحلها ساعة العيد وتتوفر حتة عجين اضافي .. نعملها كحك

اما اللي عايز يعمل مثالي ..ومن زمن اخــر على قفا صحاب المكان

فأظن ان صاحبة البيت لا تسمح بتواجدهم بتاتا..وانا شفتها كذا مرة بتمشيهم من اوضة المسافرين

ولكم مني كل التحية

دعاء فتحى said...

الأستاذ لاست كريزى بوى
الحب أنظف وأشرف بكتير من العلاقات دى إحنا فعلا لازم نحرك العجينة مش ربنا قال يغضو أبصارهم فهل بقى حضرته حيقعد يحب فى حضرتها وهو غاضض بصره ولا إيه

مي ..سماء الحرية said...

خلى بس حكاية التعليق على الأسماء تيجيي من حد تانى يا
last crazy boys
!!

و الحقيقة من إختيارك للإسم, و العجينة
ثم تخيلك لفضاء النت بمكان تستطيع أو يستطيع آخرين طرد كائناً من كان منه .. طرده يا كريزى !! طب كنت تقول عدم نشر تعليقه يا راجل

يعنى باختصار نمط تفكيرك فى الكتابة "و ده على فكرة تخصصي اللى بحضر للدكتوراة فيه خارج مصر" و عليه فمش حاقدر أثقل عليك إلا بسؤال واحد يا كريزى

تقبلها على أختك إنها تصاحب و تيجيي و تروح لوحدها على مرأى من الناس مع ... صاحبها
؟؟؟

مها said...

الولد اللي مش وحش
والبنت اللي منفض لها وما بتهداااااش
ومانيول النصايح بتاعك
كله على بعضه شغل مراهقين وناس غير ناضجين وفي منتهى السذاجة والسطحية ومش فاهمين يعني ايه علاقة سوية قائمة على احترام حقيقي مش مزيف ومصطنع

هى دي خلاصة تجربتك في الحياة كـأنثى؟؟
صوتك فى التدوينة دي *بالتأكيد* لا يعبر عن صوت كل نساء الأرض
والتدوينة ولا فيها أسرار ولا دياولو
الراجل اللي ميحترمش الست الباب يفوت جمل من غير حركات بقا واشتغالات
وشحن كروت واتصالات وشتيمات وشغل عيال


مش قصة هاي
مش فارقة معاي
على رأي الليدي فيروز

http://www.youtube.com/watch?v=wCrKH0eBQDQ

Eman Hashim said...

انتى مش هاتبطلى تتكلمى فى الادمان و الفساد و الرشوة يا نوارة بقى؟

انا مش مصدقة ... احنا فى 2010 صح؟
يا بشر ... بيتنيلوا بيحبوا بعض و ان شاء الله هايبقوا يتقندلوا يتجوزوا بعض

عامة انا كنت ليسة باتكلم فى ام الموضوع ده مع ناس كده مش مهم هم مين دلوقتى

عارفة يا نوارة ... الفكرة مش فى الكلام فى التليفون بس ... الكلاااااااااااااام
والله العظيم تلاتة و المصحف و المصحف الست نفسها الراجل يتكلم
مش عن الموبايل ولا اللاب توب ولا العربية
عنه و مشاعره و حياته , حاجات توحى بان فى انسان فى الكائن ده

بس مش انه يقول لها عاجبه ايه فى جسم كل واحدة ... لألألألألأ مش دى
نهايته
بنكلم نفسينا تقريبا

ramy13 said...

عشان كده انا مش عايز أرتبط قبل ال30 هى ناقصه خنقه رايح فين وجاى منين مش كفايه أبويا وأمى
وبعدين حتى لو أرتبط ما تسيبنى أتفسح
هى حتسحبسنى يعنى ولو أتصلت حرد عليها طبعا عشان انا مش عامل عمله
وطبعا لو مردتش عليها حتتنرفز زياده بس لما أشوفها هما كلمتين على قمصتين على لوية بوز حتجرى هى ورايا عشان تصالحنى مش تقوليلى بتاع وعامل عامله هما كده البنات لما يرتبطوا بواحد يحبوا انه يفضل لازق فيهم ما يسبهمش


وشكرا

علي الزيبق المصري said...

أيوة يا ست مي اقبلها على أختي ، قديمة اللعبة دي !
اولاً أختي مش ملكية خاصة ليه ، يعني بغض النظر عن قبولي لتصرفاتها من عدمو السؤال مش منطقي ..هي انسانة عندها وعي وعقل وكيان منفصل عني .ثانياً أوة مرة تانية اقبلها على اختي، العلاقة بين بنت وولد مش جريمة يا ست مي.تصدقي ف تعليقي الأخير كنت عايز اكتب عن موضوع تقبلها على اختك ده؟ وعلى فكرة ، كل اللي مش بيقبلوا على اختهم سواء رضيوا أم أبوا اختهم بتعمل اللي ف دماغها ف الاخر وده حقها ، ترجعي لنا بالسلامة وربنا يوفقك في الدكتوراه.

lastcrazyboys said...

الاستــاذة دعاء والانســة "مي " أولا اسمحوا لي الاستئذان من صــاحبة البيــت أنه ضيوفها يحتلوا المســاحة دي من مكانها

== أولا يا أستــاذة "دعاء" حضرتك أكييييد ولزمن وحتمن من متابعي قناة الرحمة وقناة الناس بشغــف
عشـان كده القيــاس بتــاع حضرتك مش جاي في محلــه ..لأن السيــاق كان على العموم ..مش في حالات خاصة
يعني متبقــاش عين اللي خلفــوه زايغــة عاللي رايحــة واللي جـاية

وأظن عندكم بيسمحوا بحـاجة اسمها "الرؤيـة الشرعيـة " برضه وبعد كده ممكن مايحصلش نصيـب ..فهل آجي أقـول :لأاااا ربنا قال غضوا من ابصاركم يبقى ما يشفهاش ويشيل عمياني
اسمحي لي ..دي مالهاش دعوة بدي
وأشكــرك على سعة أفقــك ..وتواصلك

=
الآآآآنسة "مي " واسمحي لي تاني أصمم عاللقب ده بغض النظر عن الرسالة اللي بتحضريها ..وربنا يوفقك فيها
أولاً : حكاية الاسم
Lastcrazyboy
فهو فعلا بيبعبر عن شخصيتي ..لأني بحب القفشـات والضحك ..وده متعارف عليه بين الاصدقاء
وكون اني علقت على اسم "حضرتك " فده مش معنها الاستخفاف وانما احنا شعب معروف انه بيحب الانبساط..طبعا قبل ما نقضيها جلاليب وتكاشير

انا لو مكسوف من اختياره مكنتش اخترته ..وبحكم حضرتك بتعملي ابحاث في هذا المجال فكان من الأولى إنك تربطي بينه وبين الكلام عن اسمك على انه من قبيل المزاح لا اكثر ولا أقل ..وليس استهتاراً -لاسمح الله - بالعكس
اعتقد ان الكل فهم انه الاسم بيفضل محتفظ بجماله "في مخيلتي" لدرجة أضطر معها إلى مناداة سيدات بلقب "آنسة"رغما عني
الشيء التاني بالنسبة للطرد -ولو اني مطلبتش الطرد من رحمة الله يعني عشان حد يزعل للدرجة دي- بس احب اوضح انها ايضا كانت جملة تشبيهية
وليست طلباً من صاحبة المدونة لطرد احد ..ثم لنفترض جدلا أني طلبت منها ذلك ..سيـاق الكلام يقع على اللي بيتعامل "بفذلكة " وبيستنصح علينا ..فمصيره بيكون الطرد وده اسلوب مجازي على فكرة ..ونوارة لا ممكن تطرد ضيوفها وبالذات لو في اخر الدنيا زي ما بتقولي
وكونــك أخدتي الكلام على نفســك فده شيء آخــر يحسب عليكي الصراحة

ثاااالثــاً وده الأهم : سؤالك العبقري اللي مسمعتوش من سنة 98 بتاع معندكش اخوات بنات والحاجات دي
فذكرني بحوار قديم مع صديق ليا سافر
:يشتغل بره كان فحواه
- هو ليييه السعوديين بياكلوا رز
-طب ماحنا كمان بناكل رز
- لا بس احنا الاساسي العيش ..هم الاساسي الرز
-عشان زمان قبل البترول كانوا على علاقة تجارية بدول الهند والصين اللي بتزرع الرز
بعدين واحنا مالنا ..يعني عشان احنا بناكل عيش كأساسي في الوجبة ..يبقى القياس ينبطع على كل الناس
:مثال آخــر
انا مثلا ضد ان مراتي تشتغل " ولو ان الاوضاع الحالية بتخلي الموضوع اجباري"
بس لو قعدت في قعدة نتكلم عن عمل المـرأة هكون من أكبر المناصرين لها ولعملها . هتيجي تقوليلي ترضاها !لمراتك واختــك
!!!!!!!!
وهفكرك كمان انه في بعض الاحيان بيكون الواد والبنت معروف انهم لبعض "جيران او قرايب" لكن منتظرين انهم يخلصوا دراسة عشان يكتبوا .. الكتاب ويعلوا الجواب
والأهل بيتساهلوا نسبياً مع بعض اللمحات البريئة العفوية .. "وطبعاً هتاخدوا كلامي انهه بيقفشوهم في بير السلم"ماهي نوايــا

وعالعموووم هريحك يا ست الداكتــورة : لا طبعا واحد مايحبش مراته تشتغل ..يبقى اكيد ميرضاش لأخته تعرف شباب..بس برضه مش فاهم القياس ..لامواخذة عشان التفكييير عالقد
آه ..كنت هنسى بعد حكاية الاسم بالنسبـة لحكاية العجينة فكان المقصود بيها انه ياريييت محدش يكلمني بأسلوب الحويني والناس دي

وإلى لقــاء قادم باذن الله

lastcrazyboys said...
This comment has been removed by the author.
lastcrazyboys said...
This comment has been removed by the author.
lastcrazyboys said...
This comment has been removed by the author.
lastcrazyboys said...
This comment has been removed by the author.
lastcrazyboys said...
This comment has been removed by the author.
مي ..سماء الحرية said...

كريزى
بصدق كتاباتك
case
تستحق الدراسة.. و ده مش ذم و لا مدح .. إنما وصف لحالة واضحة المعالم

مي ..سماء الحرية said...

زيبق
------

إيه ديه اللى قديمة
!!
---------------
كل اللي مش بيقبلوا على اختهم سواء رضيوا أم أبوا اختهم بتعمل اللي ف دماغها ف الاخر وده حقها
---------------
يعنى فيه ناس إلى الآن "2010" مش بيقبلوا الصحوبية .. لكن إنت بتقبلها
!!
ده رأيك تتحمل تبعاته.. لكن مش من حقك تعيب على من يرى أى علاقة خارج إطار الشرع و العرف تفسخ و إنحلال

دعاء فتحى said...

لاست كريزى بوى
بعد أخذ الإذن من نوارة بالمناقشة دى وأعتقد إنها مش حتمانع
أولا أنا مش متابعة القناتين دم مش لأن أنا شايفة إن متابعتهم غلط ولا حاجة بس لأن طريقة العرض لا تتفق مع شخصيتى
ثانيا حضرتك خلطت بين موضوعين بعيدين عن بعض الرؤية الشرعية دى لما واحد يكون ناوى على جواز والنية هنا معناها إنه مستعد تماما للموضوع ده من كل جوانبه بما فيها الجانب المادى لكن واحد عارف إنه مش حيتجوز دلوقتى خالص ويتن ماشى مع اللى بيحبها أظن ده مش داخل فى إطار الشرع
الأمر الأخير : أنا مش بقول إن أى شخص مش حيتعلق قلبيا بأى حد من الجنس الأخر بس اللى أنا بناقشه إيه حيبقى تصرفه بعد هذا التعلق
مع كامل الإحترام والتقدير لحضرتك

جبهة التهييس الشعبية said...

دعاء ومي

لا ما تبقوش تعملوا كده

ويارب ما تخلفوا بنات ابدا عشان ما يطلعوش معقدين ويكرهوكوا بعد كده ويحسوا انكم ضيعتوا لهم عمرهم

واللي بيقول لكوا الحب حرام يبقى ما بيفهمش حاجة

على ضمانتي انا حلال

هدى الأنصاري said...

دكتورة مي
دعاء فتحي
ميرهان
عمو راجى
خلاص الموضوع اتحسم و فضيلة الشيخة نوارة افتت بان خلوة الشاب بالبنت و ذهابه مع اربعة شريفات عفيفات للترويح عن النفس

حلال حلال حلال
LooooooooL

Alkomi said...

و النعمة ما جايبنا ورا الا المدادية و المحايلة دي

علي الزيبق المصري said...

فهم انسان معين للشرع مشكلته هوه مش مشكلتي أنا ، هو حر يفهم الشرع زي ما هو عايز وانا برضو حر ، انا عندي الشرع كله يتفهم من خلال عدم تعارضه مع مبادئ انسانية معينة ، لو اتعارض يبقى لازم اعدل فهمي للدين .مش اعدل مبادئي.
( مرة واحد مثلاً بيقولي الموسيقى حرام ، قلت له لو هي حرام يبقى انا مش عايز ابقى مسلم ببساطة، اصل ما اقدرش بجد اتخيل ان الانسان ممكن يعيش كانسان من دون ابداع موسيقي الا فقط عند السلفيين بتوع الدف والاناشيد والكلمات الهادفة.

عيب قوي في 2010 نستشهد بضغوط المجتمع ،وبالفهم المشايخي للدين ، لو هنستشهد باعراف المجتمع يا دكتورة مي فمن ضمنها السلبية والنفاق الاجتماعي والختان والرشوة والفكر الذكوري وكثير من السلبيات ، ليه هاسيب كل اعراف المجتمع واخد موضوع حكم المجتمع على تصرفات البنت ، وبعدين طريقة استدلالك ما فهمتهاش ! انتي بتقوليلي في ناس في 2010 ىبيرفضوا وانت بتقبل !طيب وانا مالي باللي بيرفضوا!!! انت زي ما يكون بتقولي في ناس بتعذب المواطنين في 2010 وانت ضد التعذيب؟؟؟؟

lastcrazyboys said...

أولا اعتذار واجب عن الخلل الفني الذي حدث في الجهاز وأدى الى تكرار الكتابة بشكل يوحي بأنها معلقة "ابن كلثــوم " في زمانه

أما بعد

آنســة مي .. أحب أبين لك فقط ان الاسم مسجل في الشهر العقاري والسجق المدني ..ولن اتنازل عن كافة الحقوق المادية الخاصة بالموضوع

المادية بالذااات انتي عارفة الظروف عاملة اليومين دول ازاي
==

ملوحظة صغنتتة
كل الكلام الوارد أعلاه غير صحيح بالمرة طبعاً ..ولو احتجتي اي حاجة احنا جاهزين وعقبال ما نشوفك داكتوووورة قد الدنيا
==============
الاستاذة دعاء اعذري حماسي بالنسبة للحديث للموضوع لكن انا بقيت مستغرب عالطريقة اللي بقينا نفكر بيها
والأحكام المسبقة اللي بنطلقها على كل حاجة لدرجة خلت الواحد يبقى طالع في الفيلم بمنظرين عشان مصيبة : طب لو حد شافني هيقول ايييييه ...!؟
مع العلم انه بيكون مابيعملش حاجة وحشة لا سمح الله
هقولك على حاجة مع اني مبحبش اتكلم في الحاجات اللي تخص حد بس أيام الجامحة انا كان معايا فتاة كنت بحق شايفها "بنتي " مش أختي الصغيرة
وكان الجميع عارف الحكاية دي ..وهي على أخلاق عالية ولا تتحدث إلا بجدية واحترام ..بس انا كنت شايفها بنوتة صغيرة ..ليس اكتر
ولاحظت ان فيه انجذاب بينها وبين ولد كان صديق مقرب لي جدا .. ولولا اني عارف انه "لخمة" ومش بتاع حوارات كنت خزقت عينيه من بدري
ولما لقيت الاتنين مش هيقضوا مصلحة..قلت لها
وكلمتها في الموضوع ..وهي كانت نفسيتها تعبت عشان حست انه مش حاسس بأي بدنجان
رحت قافشه في مكان واتكلمنا بصراحة لأني من الاول كنت عارف ان ظروفها المادية"بالنسبة لأهلها" الكويسة هي السبب ..وانه لسة يادوب مخلص والطريق طويييل..مع العلم ان ظروفه ماشاء الله كويسة بس والده بيجوز اتنين اكبر منه فهو لسة شوية يعني....وكمان هو الوحيد اللي كان شغال شغلانة محترمة -ماشاء الله- واحنا في الجامعة-

المهم انا قلت له خد خطوة وربك يسهلها ..بدأوا يتكلموا على عينك يا تاجر..مش خلبصة زي ما في دماغكم ..ولو كنت حسيت منه اي قلة "رغم انه صديقي أنا كنت خلصت عليه ..لأن الواحد بيبقى عارف بنات الناس من اللي عايزة تقضيها
وراح لقى أهلها بسيطين جداااا ..ومش بتوع مظاهر ..وأهم حاجة يابني انك تكون حطيت رجلك على بداية الطريق وتكون جاد في حياتك والكلام ده

والحمد لله ..اهم اتخطبوا وعملنالهم ليلة ولا الف ليلة وليلة ..والواد اتبهدل بهدلة يومها من العيال
نستفيد ايه بقى من القصة دي
v
v
v
v
متعزمش اصدقائك من ايــام الجامعة ..عشان محدش يفش غلبه فيــك ويبهدلك بالمنظرده
:))

يادي الهزار اللي هيزعل مننا انسة "مي " تاني ..المهم نستفيد يا ولاااد بجد
انه محدش يحكم عالأمور بشكل قوالب ..وإن كل حالة لها حكم خاص بها

شكراً لكم ولوقتكم .ولتواصلكم

lastcrazyboys said...
This comment has been removed by the author.
lastcrazyboys said...
This comment has been removed by the author.
lastcrazyboys said...
This comment has been removed by the author.
lastcrazyboys said...
This comment has been removed by the author.
الدرويش المرووش said...

يا نهار كوبيا

أنا قريت البوست و مت من الضحك

و كنت داخل أكتب تعليق كوميدى

قريت التعليقات

عيطت

وائل صلاح said...

أنا مش فاهم ايه العيال السيس إللى عاملة تلت و تعجن فى الكلام
متسترجل يا له منك له
والله صدقتى يا دكتورة الافندى ده حالة ... وازيد على كلام حضرتك و اقولك حالة هستيرية ... لكن تعملى ايه فى واحد بيحب السادات بطل الخراب و البتنجان... و مفجر الوطن بإتفاقية كامب شيزار

مهندس مصري said...

الله يكرمك يا عم لاست كريزي بوي
تعليقاتك المتكررة تمسحها من سلة المهملات اللي بلون رصاصي باهت تحت التعليق
مادام نوارة مش مركزة في مسحها و بتنشر كله بتكراراته

ثانياً
انا ضد المصاحبة و الحب قبل الخطوبة و الجواز
و ياما شفت ناس مأنتمين و بعضهم كان حب ملتهب لكن كام واحد و واحدة منهم إتجوزوا فعلاً

طب اللي ما إتجوزوش مش كانت علاقتهم دي حرام
دا مع العلم إن كل العلاقات دي بدون خطوبة هي مسخرة و غالباً ما تكون من وراء الأهل

عموماً سنبقى فريقين مختلفين في هذه القضية و لن نلتقي غالباً في الرأي

lastcrazyboys said...

لكـــن الفريقــان لا يمــكن أن يفتـرقــا يا بشمهنـــدس

والدليــل أنه لم يمكن الاستغنــاء عن نصائحك الغالية في الموضوع الذي كان مؤرقا لي بالفعل ..خصوووصا في هذا التوبيك

Alkomi said...

ايه موضوع الحب و المصاحبة قبل الخطوبة و الجواز ده حرام؟

هو انا في قناة الناس ولا ايه؟

شوية شوية تقولولنا حرام تشخوا عيال قبل سنتين جواز

Mohamed omar Zaian said...

nawara hwa eh 3elaket el post dah be shakawi el kahraba? ana a3dt 2a2ra we mestani ashof ay kahraba w mala21etsh 7aga gebteli e7bat :(