Thursday, 15 July 2010

انا اتمرمطت

كرامتي كرامتي كرامتي كرامتي كرامتي كرامتيييي يا لهوتيييييييييييييييييييييييييي
انا انمرمنط
انمرمنط وانبهدلت وكرامتي انبعترت وبرستيجي انبعزق وانمسح بيا البلاط
اه يانا، اه يا كرامتي اللي واجعاني ياني.. يا عيني عليا، يا حرام، انا صعبانة عليا قوي، يا غلبانة يا انا
اصلي مش حاعرف اخد حقي.. ما حاولتش اخد حقي ومش حاعرف اخد حقي
ليه؟ عشان ام النضال على ام المبادئ وحاتفها تنزل في عبي واراذل الناس حتشمت
اه يانا يانا يانا
بس... ماحدش يسألني فيه ايه؟ انا بافضفض بس مش حاحكي حاجة
مافيش غير جمال عيد حبيب قلبي اللي جبر خاطري وعالجني ورفع من روحي المعدنية وفهمني اني ست الناس بعد المرمنطة اللي انمرمطها لولاه كنت ولعت في نفسي
دي تاني مرة في حياتي اعمل خير واحس اني عايزة اشفطه او الحسه، انا اصلا اعمل خير في ناس ويدوني على قفايا ده على طول، بيحصل اساسا معايا يوم اه ويوم لا، بس عمري ما ندمت، المرتين اللي ندمت فيهم مرة من ست سنين والمرة دي، والمرتين كانوا ناس مختلفة بس نفس الفصيلة، وكل مرة ما اعرفش اخد حقي عشان برضه كل مرة حاتفها تنزل في عبي، ما اعرفش اشمعنى الفصيلة دي من الناس اللي بتندم الواحد على الخير اللي عمله... بس بس، ما حدش يقول لي ما تندميش على خير عملتيه، عارفة انا الكلام ده، بس فيه ناس عندها القدرة انها تخليك تندم
هيييييييييييييييييييييه
الحمد لله، لولا كلمت جمال عيد كنت مت، ويمكن كنت انحرفت، انا قبل ما اكلمه كنت حاسة اني حاعيش حياة الفتاة المستهترة عشان انسى اللي جرا لي، لولا كلمته نشلني ما حكتش تفاصيل بس فهمته اني انمرمنط، وهو مننا وعلينا وقعد ينفخ فيا عشان يمسح المرمطة
وقال لي نصيحة... حاحاول اعمل بيها ولو اني ما باعرفش
اه يانا يا كرامتي... والدم يخرررررررر

14 comments:

taima said...

يا نواره انتي ست الناس كلهم ده انتي اجدع جدعه ... تعيشي يا نواره وما تاكلي غيرها وعلى الاصل دور

شمس العصارى said...

انا زعلان و مضايق
ومش حعلق على البوست ده
وخصوصا علشان ضرب و شتيمة البوست الى فات
المهم انتى مقلتيش ايه الموضوع علشان نشمت
قصدى علشان نجبر بخاطرك احنا كمان
ولو انى عارف انك حتقولى مش عاوزة حاجة من وشك
ههههههههههههههههه
ــــــــــــــــــــــــــــــ
المهم :
على العكس
الانسان ممكن يشعر بقيمته اكتر فى حالة العطاء و هو مش مستنى رد فما بالك لو كان متوقع العكس
ثم ان الانسان لما يتعامل بمبادئه و اخلاقه بدون النظر لمن امامه او من يقدم له بكده بيعلو و بيتسامى على الغير
..............
انا ليا عندك كده كباية شاى ههههههههه

utopia said...

بصى انا ما اعرفكيش شخصيا
بس كل اللى اعرفه انك انسانة كويسة واكيد مادام كان قصدك خير
ربنا هايزيل الهم عنك
واكيد اللى اتمرمط اللى غلط فيكى مش انتى

بجد ضايقتينى على المسا
ولا يهمك من حد يانوارة

hamto shanab said...

سأل الإمام أحمد بن حنبل ، حاتم الأصم وكان من المتصوفه :
كيف السبيل إلى السلامة من الناس ؟ فأجاب : تعطيهم من مالك ولا تأخذ من مالهم
يؤذونك ولا تؤذيهم
وتقضي مصالحهم ولا تكلفهم بقضاء مصالحك قال : إنها صعبة يا حاتم
قال : وليتك تسلم منهم

الناجى من الدنيا هو من جعل وجهته لله وحده ولم ينظر خلفه ليرى افعال الناس فهى لا تعنيه

حمتو

lastcrazyboys said...

انا ما أعــرفش هعــلق ازاااي عالبوســت ده ..بعد الكلام اليوتوبي الأفلاطوني في كل الكومنتــات اللي قبلي

وطبعاً هطلع أنا الميكافيللي اللي بيسخن الامــور

بس انا هقولها واجري على الله

بصي يا نوارة ..انا تعريفي للعلاقـة مع البشر " خصوووصاً في بلد زي أم البلد دي" .. ان هنــاك ناس معــارف ..وناس اصــدقاء ..وناس اشبــاه الأصــدقاء

وأشبــاه الأصدقــاء دول ممكن أشــوفهم كل يوم ..والاحتكاك بينا بيبقى اكتر من الأصدقاء ذات نفسهم وفيه منهم ناس ممكن يبقوا كويسين وولاد ناس بس برضه آخرهم "شبه صديق " وهتعرفي ليه في الآخــر.. والاحتكاك الدائم ده بالطبع يؤدي إلى وجود نوع من العشم يترتب عليـه استغلال قليل الأصل منهم لهذا الموضوع
عندها بقى يظهـر الأصدقــاء ..والذين
:يســاعدونني ويشدون من أزري عشــان
1- يطلعوني من حالة الحنق والغيظ التي تتملكني
2- ألاقي كتفهم في كتفي طوال المرحلة دي
3- المساهمة في رد الصـاع صاعين
.........لولود الـ

عرفتي ليييه بقى قلت ان هناك ناس كويسين وولاد ناس بس ما ينفعوش اصدقاء

lastcrazyboys said...

اه ..نسيــت اقول لك حاجــة برضــه ..يمكن عشــان الحــالة اللي بتتملكني وانا بكتــب عن عبدالنــاصر

الانســان من غير كرامــة ..موووته احســن

مفيييش حد يقنعني ان الخير يحتم ان كرامتي تهدر ..وليعذرني أهل المدينة ..فنحن قد نمنح أحــدهم الخير حتى الصبــاح
ولكن ان ترتب عليه هدر نقطة من كرامتنا .. اخذناه -بالخير الذي اعطينـاه - وهرسناهما معاً حتى لا يتبين احد صالحنا ...من طالحه

khalil said...

شكرا لجمال عيد انتى نوارتا

ابو حسين من اجل الحرية said...

بقى تبقى بنت احمد فؤلد نجم اللى محدش سلم من لسانه واللى ستك قالت له اوعى تبلع لسانك من يوميها ولسانه مبطلش شتيمة ورزالة على الناس الرزلة وتبقى بنت صافيناز كاظم اللى عمرها ما سكتت لحد ولا خافت من حد وتوصل بيكى الحكاية للمرمطة ...
انتى حد قص لسانك وايفه ولا ايه
اقول لك هاتى واحد من بور سعيد يكون استعمال سئ علشان محدش يعملها مهاك تانى
ماشى يا ست الكل

إنترنتاوي said...

عروستي؟
يمكن علشان الموضوع ده؟؟؟؟
http://www.masrawy.com/News/Egypt/Politics/2010/july/15/algerian_bouherd.aspx?ref=extraclip

MR.PRESIDENT said...

مكنش ولا عاش اللي يبهدلك

MR.PRESIDENT said...

مكنش ولا عايش الله يبهدلك

أبو هاجر said...

الحمد لله، لولا كلمت جمال عيد كنت مت، ويمكن كنت انحرفت، انا قبل ما اكلمه كنت حاسة اني حاعيش حياة الفتاة المستهترة

ألف شكر للأستاذ جمال عيد اللي حافظنا على البنت من الانحراف

Halim said...

نواره,هاقولك حكمه سمعتها من راجل صعيدي
اعمل الخر للعفش و الزين,ان جه في اهله فهو في اهله,ان ماجاش في اهله يبقى انت اهله

أبو أمك said...

طب وإيه يعني
زي ما قال ديكارت
أنا اتمرمط...إذاً أنا مخنوق
إلا صحيح يطلع مين ديكارت ده