Monday, 12 July 2010

ابو حذيفة بن عتبة

هو ماحدش بيجيب سيرته ليه غير في رضاع الكبير؟ 
ابو حذيفة بن عتبة ده اخو هند بنت عتبة
قال عمرو خالد يقول ستنا هند بنت عتبة وماحدش بيجيب سيرة الراجل ده خالص، ده اسلم من بدري جدا من قبل ما يدخلوا دار الارقم، وهاجر الحبشة، ورجع، وهاجر المدينة، وحارب في بدر وشال سلاح على ابوه واخوه وعمه، وطلع يطلب مبارزة ابوه وفضلوا قاعدين يقولوا له يا سيدي ارجع ما ينفعش اللي بتعمله ده لحد ما عتبة نفسه تراجع وما رضيش يبارزه، وشاف ابوه واخوه وعمه وهم مجرورين على قليب بدر وفضل ساكت لحد ما صعب على الرسول وصعب على سيدنا عمر نفسه، هي دي حاجات اي حد عادي يقدر يتحملها؟ واخته اكلت كبد حمزة والرسول توعدها وهو سامع وساكت يعني كل الحاجات دي فوق طاقة البشر وفضل يستحمل ويطلب الشهادة لحد ما استشهد في حرب اليمامة
والناس عمالين يقولوا سيدنا معاوية (المودا الجديدة اللي طالعة دي، احنا لحد التمانينات ما كناش نسمع كلمة سيدنا معاوية دي ابدا، ده حتى لما كانوا يعملوا مسلسلات وللا سهرات تليفزيونية كان اللي بيقوم بدور معاوية عبد الغني قمر، ده عمرو خالد بيقول سيدنا ابو سفيان كمان) وماحدش بيجيب سيرة واحد عاش حياة نكد ورا نكد ومصيبة ورا مصيبة وصابر وراضي عشان مؤمن لحد ما ربنا افرج عنه ورزقه الشهادة، لما باحط نفسي مكانه بافكر اني ممكن اتجنن
انا باتغاظ قوي من الحاجات دي، يعني اللي يتعب زي اللي ما يتعبش؟ اللي يسيب شغله واسرته ويرفع سلاح على اهله والناس كلها تبقى بتحتفل بالنصر وهو ميت له كل ناسه ومش قادر حتى يعيط عليهم زيه زي اللي اسلم بطلوع الروح وقعدوا ينطقوه كلمة: محمد رسول الله بالعافية؟ وياريته زيهم، ده من التسعينات ومطلعين لنا مودة سيدنا معاوية وسيدنا ابو سفيان دي اللي ظهرت فجأتن في مصر، عمرنا في مصر ما كنا بنقول كده، اخرنا كنا بنقول: العن يزيد ولا تزيد، دلوقت الفلوس الوهابي اتنطرت ويبقى اللي ما عملش اي تضحيات سيدنا ويبقى كل ذكر ابو حذيفة الصابر المهاجر المقاتل الثائر على اقرب الناس له من اجل ايمانه، انه ذكر في حديث رضاع الكبير؟ ماهو اللي ما عندوش ولاء لنماذج التضحية اللي راحت ما فيهوش خير للي عايشين، وده اللي بيخلي ناس من اللي عايشين يضربوها صرمة ويمسكوا صاجات ويقلبوا رزقهم، عشان شايفينا بنتجاهل اللي ضحوا ونعظم اللي استفادوا ولو على الفتنة بين الناس
كام مرة بيذكر فيها ابو حذيفة بن عتبة وتضحياته وصبره في خطبة الجمعة مثلا؟  

64 comments:

utopia said...
This comment has been removed by the author.
جبهة التهييس الشعبية said...

اسكت بقى السلفية حيخشوا يمرمطونا انا وانت ويقولوا علينا روافض

بس انا اتغاظت قوي من عمرو خالد فعلا، يعني هو مش سلفي ولا حاجة، بس ايه حكاية سيدنا ابو سفيان وستنا هند بنت عتبة دي؟ بجد والله
طب هو احنا نعرف عنهم ايه بعد الاسلام غير انها راحت تستأذن الرسول انها تسرق جوزها من كتر بخله فقال لها زي بعضه اسرقيه بس ما تحفيش؟

طب ابو حذيفة ده اللي مالوش ذكر خالص مع ان حياته كلها عذاب في عذاب وصبر على صبر وجهاد ورا جهاد ايه يعني؟

هو احنا قلالات الاصل ليه؟

مواطن مصري said...

نوارة نصيحة بلاش بوست من النوعيات دي بلالالالالالالالالالاش


بالنسبة لخطبة الجمعة اصلا اصلا الخطبة بتبقى معظمها عن انجازات عوكل

جبهة التهييس الشعبية said...

هو ايه اللي بلاش؟

انا كل ما افتح اي حاجة ينزل لي منها كلام عجيب حتى اذاعة القرآن الكريم

اختفى تماما ذكر معاذ بن جبل وسعد بن معاذ اللي اهتز عرش الرحمن لاستشهاده وابو حذيفة اللي ما بيتجابش سيرته وكل الناس اللي اتبهدلت وباعت اللي وراها واللي قدامها عشان خاطر الدعوة ومش بيكلمونا دلوقت غير عن ابو سفيان ومعاوية

فيه ايه؟

ده حتى سيدنا عمر وابو بكر ما بقاش تيجي سيرتهم خلاص لا على الميل ولا في الاذاعة ولا في القنوات الدينية

كله معاوية وابو سفيان

للدرجة دي؟

وطبعا اهل البيت دول سبة اساسا مايصحش حد يجيب سيرتهم

المسلك ده مسيس، وهم متعمدين يتجاهلوا الصحابة واهل البيت عشان ثوار ومتعمدين يضربوا امثلة بناس ما قدموش اي تضحيات ولا شاركوا في الثورة عشان يسكنوا الناس

دي سياسة دي مش دين

utopia said...

انا حذفت تعليقى علشان كتبت معلومة خطأ
بس برضه ابو سفيان اسلم وهو خايف
وكان من المؤلفة قلوبهم هو ومعاوية ابو يزيد (السفاح )
المرة الجاية تدخلى علينا باللى بيقول سيدنا ابولهب
ههههههه

جبهة التهييس الشعبية said...

ههههههههههههههه سيدنا ابو لهب من اهل البيت هههههههههههههههههههههههههههههههههههههههههههههههههههههههههههههههههههههه

utopia said...

وبعدين مين اللى قال انهم سلفية
امال الازهريين يبقوا ايه
انا بقى ازهرى ومش موافق على توصيفهم ده
وبعدين افكر اى حد قبل اما يرد
بقول الامام مالك
كل ياخذ منه ويرد عليه الا صاحب هذا المقام
الرسوول صلى الله عليه وسلم

جبهة التهييس الشعبية said...

طب انا ما اعرفش بقى هم سلفية على انهي موديل؟

هو مش بيقولوا انهم تبع ابن تيمية؟

طب بقى ابن تيمية له اراء متقدمة جدا في تشريعات الاحوال الشخصية هم بيتجاهلوها تماما

زي فتاويه في احكام الطلاق وعدم اجازته للطلاق البدعي وتعليله لعدم وقوع الطلاق البدعي ان اعتبار وقوعه فيه ظلم وخراب بيت للمرأة وان زي ما الراجل راح لوليها وخطبها وجاب لها مهر واتجوزها برضاها لازم يطلقها الطلاق السني اللي فيه انه يخطرها انه حيطلقها ويقعد شهر معاها في البيت ويشهد على الطلاق ويطلقها باحترام زي ما اتجوزها باحترام وان حياتها ما تبقاش معلقة بكلمة تخرج منه عشان مزاجه مش رايق

طب ده كلام فيمينست جدا

ليه بقى مش بيجيبوا سيرته؟ وللا بياخدوا اللي على كيفهم من ابن تيمية كمان؟

قهوة كتكوت said...

هو رأى جمهور العلماء ان الطلاق البدعى مكروه ولكن لو عايزين ياخذوا براى جمهور العلماء يبقى فى كل حاجة
انا لست مع اتباع مذهب معين لا انا ولا اصحاب المذاهب انفسهم ومنهم الشافعى رضى الله عنه صاحب مذهبين واحد فى العراق والتانى فى مصر

utopia said...

تقريبا سلفيين على موديل ال سعود
على فكرة الامام محمد بن عبد الوهاب قام بمهمة احترمها فى الحجاز فى القرن ال 19
لكن حكم ال سعود انشأ مذهب جديد
واتخذ المذهب الوهابى غطاء له

مطلق said...

دول طلقاء ابناء طلقاء

معاويه جزمه ابن جزمه و ياريت محدش يقولي انه من كتبه الوحي و الهجس ده

جبهة التهييس الشعبية said...

مطلق

والله العظيم انا موافقة على كلامك
بس لو نزلت تعليقك ما حيصدقوا يمسكوا في الهايفة ويتصدروا وينزلوا فيك شتيمة ويسيبوا اصل الموضوع

the magnificent ninja said...

يعني انتي يا حاجة مش عاجبك لا سيدنا معاوية و لا سيدنا أبو سفيان عشان الوهابيين
يقطع الوهابيين و تشدد الوهابيين بس محدش يفتح بقه بكلمة عن سيدنا معاوية أو سيدنا أبو سفيان و الا حاديله بالجزمة
و ملعون أبو الهبل

bang887 said...

طبعا إنتى عارفة حديث رسول الله (ص) [بُني الإسلام على خمس ....]،

هل سمعتى شيخا يحدثنا عن ماهية هذا "البنيان" وكيفية إقامة ؟

مع أن فى القرآن الكثير من الآيات التى تحضنا على الإيجابية والبعد عن السلبية. وآيات تحضنا على المبادرة والفعل بدلا من الاستكانة والخنوع.....

أيات كثيرة لو كنا عرفناها بمعناها الحقيقى مكانش خالد سعيد اتقتل وسط ناس بتتفرج وساكتة ......

تفتكري يقولولنا الكلام الصح علشان تكبر فى دماغنا ونشيل الظلم وأسيادهم الظالمين.

يا نوارة .... إنهم يشترون بآيات الله ثمنا قليلا (فيلا وسيارة ...الخ).

يا نوارة.... إنهم يحملون أسفاراً.

بس الغلط مش عليهم وحدهم، الغلط مننا إحنا كمان. ... إحنا بنقرأ القرآن قراءة جرايد .... الواحد فينا مش بيقرأ الآية ويسأل نفسه إزاي يطبقها عمليا على نفسه وبنفسه. كأن الآيات جاءت لناس تانية مش ليه هوّ شخصيا.

جبهة التهييس الشعبية said...

الجزمة دي تحطها في بقك ومعاوية ابو سفيان عبيد احسانات عفو الرسول دول اسيادك انت مش اسيادي انا
انا اسيادي اللي طفحوا الكوتة عشان الدعوة مش اللي على حس الاسلام تحول من صعلوك الى ملك
افتح صحيح مسلم كده حتلاقي سيدنا محمد بيقول على معاوية صعلوك
بقدرة قادر بقى ملك وبوظ نظام الخلافة كمان

جبهة التهييس الشعبية said...

bang

انا كان قصدي من البوست اننا قلالات الاصل جدا في قراءة التاريخ

بداية من التاريخ الاسلام ولحد النهاردة

وده اللي بيخلي اللي يبيع يبيع

سعد باشا زغلول زعيم الامة اللي صرف فلوس مراته على القمار وبقى رئيس حكومة وبرشط على ثورة تسعتاشر اللي اصلا كان عاملها العمال وبرشط على حزب الوفد اللي اصلا كان غيره ناس كتير عاملين مجهود واقصاهم

هو زعيم الامة العظيم اللي بيضرب بيه المثل ومعمول معبود

انما واحد زي محمد فريد شحت على الحركة الوطنية ومات في الغربة مفلس ماحدش بيجيب سيرته


واليومين دول طالعين في مودة سيدهم معاوية ده

بقى سبعين واحد يطفحوا الدم مع الرسول ويتشحططوا ويتبهدلوا وحياتهم كلها تتهد يتنسوا وواحد زي ابو حذيفة ده تتلخص كل قيمته في اللبن اللي في صدر مراته

واللي يبقى سيدهم وتاج راسهم اللي اذاعة القرآن الكريم ما وراهاش حاجة غير سيرته هو اللي نطق الشهادة بطلوع الروح

وابنه اللي كان بيسب الامام علي على المنابر؟

طب ليه قلة الاصل دي؟ ما قلة الاصل دي هي اللي بتبوظ الاجيال اللي بتيجي بعد كده لافتقادهم للامثلة المحترمة

قهوة كتكوت said...

قال تعالى:
ولو كنت فظا غليظ القلب لا نفضوا من
حولك
صدق الله العظيم
يا حبيبى يا رسول الله لو شفت امتك بيعملوا ايه دلوقتى؟
الاخ بتاع الجزمة انا قلت كلام فى الكتب مش من دماغى عندك رد رد
ولو صح هابقى معاك ما عندكش سد بؤ حضرتك

bang887 said...

يا نوارة ... أنا كان قصدى إن إللى اقتطع من القرآن إللى على مزاجه، حيصيغ التاريخ ويركز على أحداث أيضا على مزاجه.

فماذا تنتظرى ممن لا يعلم من المصحف كله، ولا يطبق عملياً إلا وفقط، ثلاثة أجزاء من آيات مقتطعة لتناسب هواه...

(الاقتطاع الأول): {... وَلَا تَنسَ نَصِيبَكَ مِنَ الدُّنْيَا ...} القصص77

(الاقتطاع الثانى): {... أَطِيعُواْ اللّهَ وَأَطِيعُواْ الرَّسُولَ وَأُوْلِي الأَمْرِ مِنكُمْ ...} النساء59

(الاقتطاع الثالث): {... وَلاَ تُلْقُواْ بِأَيْدِيكُمْ إِلَى التَّهْلُكَةِ ....}البقرة195

وكان قصدى إن إحنا (كأشخاص) زي ما قرأنا القرآن قراءة جرايد، بنقرأ كل حاجة قراءة جرايد. بننسى ما قرأناه بمجرد أن نتركه.

مش بنحس إللى بنقرأه، ولا بنربط بين أحداث وبعضها، ولا بنتعمق فى أى شىء.

يا نوارة ... كثير منّا عايش "كالأنعام"، وهوّ مش واخد باله.

وده دورك -وأمثالك- (بارك الله لكم) فى إخراجنا من حالة "الغفلة" إللى إحنا فيها. وإنت بتقومي بالدور ده كويس. الله يوفقك.

xMetatron said...

صباحو قطايف و تشيز كيك يا نواره

يوتوبيا ..تعليقك الأخير عن الأمام محمد بن عبد الوهاب صائب جدا..وناس كتيره

مش فاهمه ده..الراجل ده كان ثوره على التخلف و على المحتل ايامه..حرام

ينسب اليه الاشباه المتطرفه بتوع دلوقت .


اما بقى قصة "سيدنا" دي فانا بصراحه موافق عليها..انا شايف ان الواحد لازم

يبقى حساس قوي قوي في المواضيع دي و ياخد الأحوط

...طبعا "سيدنا" معاويه ليه موبقات مش أخطاء..كفايه بس حوار ان الأنتخابات

اتلغت و اتقلبت ملكيه...لكن احنا مش هنصب نفسنا الهه قضاء و محاسبه
ده كان من صحابة النبي..بغض النظر اذا كان عاجبك و لا لأ...يسري عليه اللي

يسري عليهم..لو في احتمال واحد من المليون ان ربنا يتجاوز عنه بسبب اي

موقف كويس عمله مع النبي.. كده شاتمينه لبسوا في الحيط

طبعا الصحابه مراتب..ان بحب الخلفاء السته فوق اي حد(للي مش عارف.. الخليفه الخامس سيدنا الحسين ..و السادس سيدنا عبدالله بن الزبير ..دول اللي جم بانتخابات)...لكن في الدين و سير الصحابه اوعى اللسان يخرج بكلمة بتقل من قدرهم..

ثم اناس اللي هتبدأ تحلل و تناقش لأثبات ان ابو سفيان و عائلته مسلمين درجه

تانيه على اساس انهم عملوا و عملوا...كلهم اسلموا و الأسلام يجب ما قبله..
"

سيدنا" ابو سفيان مات شهيد بسهم في عينه..هند بنت عتبه جات للنبي و عفى

عنها وقعدت تتعلم معاه باقي عمرها..ده وحشي نفسه قاتل سيدنا حمزه مات شهيد

في اليمامه و المسلمين بكوه بعد موته

ثم اللي حصل حصل..على رأي عمنا ابراهيم عيسى"محمؤيين على خناقه خلصت

من 1400 سنه"

الخلاصه..الشيعه اجننوا في دفاعهم عن الطرف المظلوم لما ا تهطللوا ..و

السلفيين بيبرروا بصفاقه زياده لطرف الظالم لما ضيعوا الحق...و القيادات

الدينيه و الحكومات بتصفي حساباتها مع ايران و مع بعضها بجعل التاريخ

الأسلامي مقصور على الفتره دي ...و احنا سايببين الأمثال المذهله(زي سيدنا ابو حذيفه) وغيروا على مدار 1400 سنه...نكبر و نعقل بقى..ممكن!

العواف

نديم

المهدى said...

يا ريت جات على سعد زغلول الحقيقة كان زعيم وخد على قد ما إدى ( ولم يفرط ) إنما المشكلة فى كمية السادة المشكلة فى الطافرين ( وأرجو أن ترفقى ذلك فى نظريتك ) لازملهم سيد فمن سيدنا معاوية لسيدنا أبو سفيان لسيدنا عمرو خالد لسيدنا تامر حسنى لسيدنا مبارك لسيدنا البرادعى لسيدنا المرشد لسيدنا أبوتريكة لازم سيد ووراه قطيع وممنوع أن تقترب من السيد
ملاحظتك ذكية جدا ولو تفتكرى حمى عدم الإقتراب هذه بدأت مع غزو الكويت أى مخلوق كان يقول بس ليه إزاى حرام طب نفكر طب نستنى كان الرد حاسم
يعنى انت مع صدام هه مع صدام خلاص انتهى واستمر مع العيال الغلابة بتوع الجماعات الإسلامية والجهاد كانوا بيتقتلوا كل يوم ويقولك إشتباك والكل ساكت ومتواطئ مع الدولة وممنوع تناقش أو تسأل ... لحد ما بقينا كدة ووصلنا لسيدنا الريال

طيف بدر said...

يعني مرة واحدة كدة طقت في دماغك علشان تتكلمي عن سيدنا معاوية و سيدنا أبي سفيان (رضي الله عنهما ) ؟؟
يعني إيه اللي استفدتيه ؟؟
أيوة معاوية و أبو سفيان أسيادنا ، لأن الله أمرنا ألا نجعل في قلوبنا غلا لمن سبقونا بالإيمان ... عاوزك بقى تشككي في إيمان معاوية و أبي سفيان و تبقي تكفيرية تشقين عن قلوب من مات و شبع موتا !!!
هل أخطأ معاوية و أبو سفيان ؟؟ نعم ، أخطأوا أخطاء فادحة لكن لا يبرر هذا أن نقدح في شخوصهم و ننقص مقامهمو كفى بمعاوية (رضي الله عنه) أنه كتب الوحي.
و معلهش بقى ... إنت يا نوارة عايشة الوهم في البوست ده ... مصابة بالتوحد لأن الإخوان بيترضوا على معاوية و يروون عنه و السلفيين اللي بيتكلموا عن سيدنا معاوية هم نفسهم اللي بيكلمونا عن سعد بن معاذ و معاذ و معوذ و عبد الله بن حيرام و آل ملحان و آل ياسر و ساعتها يتم اتهامهم بالترويج لثقافة "الإرهاب و الإنتحار"
و في النهاية تلك امة قد خلت لها ما كسبت و لكم ما كسبتم و لا تسألون عما كانوا يعملون
==========================
نوارة ... حاولي تكوني منصفة و بلاش تخلي الكراهية تعمي عيونك ...

شمس العصارى said...
This comment has been removed by the author.
شمس العصارى said...

ندخل بقا الى تحليل كلام موضوعك :
1-لا ادرى سببا وجيها او داعى حق للمقارنة بين سيدنا ابوحذيفة و اخيه سيدنا معاوية .... الصحابة كلٌ لا يتجزأ و مكملين لبعض
2- الفضل لله ثم رسوله فى تكوين و تربية الصحابة و خصوصا الرعيل الاول منهم هؤلاء اخلصوا دينهم لله و طهروا قلوبهم و سموا باعمالهم
مثل ابوحذيفة فى وقوفه ضد - دمه و ليس اهله لان الاهلية عند الصحابة و خصوصا ابوحذيفة و من شاكله هى اهلية الدين و العقيدة - الرجل مثله مثل عمر الذى وقف ضد ابنه و مثل مصعب بن عمير الذى وقف ضد اخيه و مثل عبدالله بن عبدالله بن ابى بن سلول الذى وقف ضد ابيه و مثله مثل معلمه و رسوله الذى وقف ضد عمه
كل هؤلاء و غيرهم وقفوا مع اخوة العقيدة و الدين ضد صلة الدم و القرابة
و يكفيهم فخرا انطباق الاية الكريمة
{لا تجد قوما يؤمنون بالله واليوم الآخر يوادون من حاد الله ورسوله ولو كانوا آباءهم أو أبناءهم أو إخوانهم أو عشيرتهم...}،
و عليه فى كل افعال سيدنا ابوحذيفة كان يشعر بسعادة قلبية غامرة لا توصف لانه باع نفسه لله و لم يشترى صلة الدم و منه قولك انه كان فى نكد ورا نكد و مصيبة ورا مصيبة ينتفى هنا تماما
3- اهل بدر و اهل احد و كل الغزوات التى شهدها الرسول الكريم لم تشهد احتفالا بالنصر كالذى تصوريه فى كلامك .....كانوا ينتصرون و يرجعوا يداوا جرحاهم و يبنوا حياتهم و يتعلموا و يتعبدوا و يتمنون الخير لاخوانهم فى الدم و يدعون لهم بالهداية هذا كان حالهم .
4- كوننا مقصرين فى حق أكابر الصحابة و كون جاهل تحدث بفتوى فاسدة عن رضاع الكبير كل هذا لا ينقص من قدر سيدنا ابوحذيفة و لكن العيب على عقولنا و التى تتخذ من هذا الموقف داعيا للتقليلل من شأن صحابة أخرين .

ـــــــــــــــــــــــ
على الهامش
عجبنى جدا كلامك عن وجوب قراءة و تحليل التاريخ الحقيقة و ليس الذى يريدون من الناس تصديقه و الذى يهدر اعمال و حق كبار عظماء اعطوا لمصر كثيرا و كل ذبنهم ان تاريخ مصر من بعد الثورة تاريخ موجه
بالمناسبة يا نوارة التاريخ الحقيقى فيه اثبات قاطع على تضحيات كان البعض يتساءلون عنها سابقا
هههههههههههههههههههه
هههههههههههههههههه
تعرفى هما مين
هههههههههههههه

شمس العصارى said...

ازيك يا نوارة
اغيب كام اسبوع و ارجع القيكى برضه زى ما انتى ههههههههه
وحشتنا موضوعات الخلاط الى بتتداخل فيها خيوط و تفريعات كتيرة جدا بدون داعى على الاطلاق زى الموضوع الحالى ........... و حقلك ليه:_
خدى المقدمة دى بعد ما تصلى على النبى و تطلبى رضوان الله على صحابته اجمعين :
اكبر مشكلة تواجه الاسلام على مر العصور هى سلوك اتباعه او من يدعون اتباعه هى دى اكبر اشكالية و هى دى الى معطلة انتشار الاسلام عالميا
و بالنظر لموضوعك لابد ان نقسمه الى اجزاء حتى يستقيم
1- يقول الرسول عليه الصلاة و السلام - ما تصلى عليه يا شيخة هههههههه - " ان الله اختارنى و اختار لى اصحابى " و يقول " اصحابى كالنجوم بايهم اقتضيتم اهتديتم " و عليه كل التقدير و الاحترام و التبجيل لكل الصحابة رضوان الله عليهم سواء سيدنا ابوحذيفة بن عتية او سيدنا معاوية و منه وجب علينا نحن المسلمين احترام كل الصحابة و نعترف بفضل بعضهم على بعض - بما فضلهم الله و رسوله به - دون الطعن او التقليل من البعض الاخر .
2- لا يجرنا حب فئة او كرهها لشخص للطعن فيه او عليه و خصوصا اذا كان صحابى و له فضل و لكن علينا البحث عن الحق بالطريقة الحق و اتباعه .

DrMoNajjar said...

هو الراجل بتاع المقصوص من القرآن اللي بيعلق في الدستور ما بيكتبش هنا؟

شمس العصارى said...
This comment has been removed by the author.
شمس العصارى said...
This comment has been removed by the author.
شمس العصارى said...
This comment has been removed by the author.
حسن على said...

يقول مثل (غير شائع)عن الجهلاء :"من حبهم فى النبى صلوا على عنتر " بس خلاص

جبهة التهييس الشعبية said...

بكرة يتقال على اللي بنى فيلا في التجمع الخامس بفلوس "النضال" مناضل وعظيم

وكل اللي شحتوا على الحركة الوطنية يتشتموا

عشان احنا اصلا ناس رمة

والله ما نستاهل غير سعد الدين ابراهيم

جبهة التهييس الشعبية said...

اذا كان السادات لقى اللي يدافع عنه معاوية مش حيلاقي؟

واحد كان بيسب اهل البيت على المنابر وتترضوا عليه

ربنا يحشركم معاه بقى

israaelsakka said...

قُل لا أَسْأَلُكُمْ عَلَيْهِ أَجْراً إلاّ المَوَدَّةَ فِي القُربى"

شمس العصارى said...

صلى الله على رسوله و سلم
ورضى الله عن الصحابة اجمعين
وحشرنا الله فى زمرتهم
" اى خدمة يا زوارة " هههههههههه
ــــــــــــــــ
نلتقى مع صحابة رسول الله

المهدى said...

هدى نفسك كل ده حيزول لما مصر ترجع مصر
فاكرة الشيخ متولى عبد الصمد ... لو مش فاكراه ارجعى أقرى الثلاثية

eslams99 said...

سيدنا موسى ياخذ بلحية سيدنا هارون ورأسه ويقوله افعصيت امرى .هما الاتنين انبيا واحرار مع بعض ,لكن ييجى واحد ويقول انا بشجع موسى وبكره هارون او العكس ده بقا بصراحة يبقى شغل بتنجان

ربنا قال
سلام على موسى وهارون
----------------------
سيدنا يونس دعى على قومه وساب الثورة ومشى من قلة ادبهم.هو نبى وربه الذى ارسله اعلم بالظروف التى دفعت نبيه لذلك وعفى عنه .لكن ييجى واحد ويقولى انا ما بحبش سيدنا يونس ده يبقى بصراحة شغل جنان

ويقول الله فى حديث قدسى فى البخارى

لا ينبغي لعبد أن يقول : إنه خير من يونس بن متى
----------------------
سيدنا حاطب ابن ايى بلتعة اخبر قريش بان النبى فى طريقه لفتح مكة وعندما اراد سيدنا عمر ان يفتك به منعه النبى وقال لعل الله اطلع إلى أهل بدر فقال : اعملوا ما شئتم ، فقد غفرت لكم.

ويقول رسول الله صلى الله عليه وسلم فى حديث صحيح ورد فى البخارى


لا تسبوا أصحابي ، فلو أن أحدكم أنفق مثل أحد ذهبا ، ما بلغ مد أحدهم ولا نصيفه

eslams99 said...

سيدنا موسى ياخذ بلحية سيدنا هارون ورأسه ويقوله افعصيت امرى .هما الاتنين انبيا واحرار مع بعض ,لكن ييجى واحد ويقول انا بشجع موسى وبكره هارون او العكس ده بقا بصراحة يبقى شغل بتنجان

ربنا قال
سلام على موسى وهارون
----------------------
سيدنا يونس دعى على قومه وساب الثورة ومشى من قلة ادبهم.هو نبى وربه الذى ارسله اعلم بالظروف التى دفعت نبيه لذلك وعفى عنه .لكن ييجى واحد ويقولى انا ما بحبش سيدنا يونس ده يبقى بصراحة شغل جنان

ويقول الله فى حديث قدسى فى البخارى

لا ينبغي لعبد أن يقول : إنه خير من يونس بن متى
----------------------
سيدنا حاطب ابن ايى بلتعة اخبر قريش بان النبى فى طريقه لفتح مكة وعندما اراد سيدنا عمر ان يفتك به منعه النبى وقال لعل الله اطلع إلى أهل بدر فقال : اعملوا ما شئتم ، فقد غفرت لكم.

ويقول رسول الله صلى الله عليه وسلم فى حديث صحيح ورد فى البخارى


لا تسبوا أصحابي ، فلو أن أحدكم أنفق مثل أحد ذهبا ، ما بلغ مد أحدهم ولا نصيفه

utopia said...

الاول شكرا لصاحب الجزمة بس دى مش اخلاق
مسلم.
احب اوضح بس انى مش موافق على تكفير معاوية او ابو سفيان ولا يحق لى ان اكفر احدا فلست الها
انما بيتهيالى البوست بتاع نوارة واضح بس اللى بيعترض حافظ مش فاهم
نوارة بتتكلم اننا بننسى ناس عظيمة
و ضربوا لنا امثلة عظيمة زى كمان سيدنا ميسرة الرومى فاكرينه؟
وسيدنا سلمان الفارسى
ومن العصر الحديث احمد عرابى ومصطفى كامل والنديم اللى المسلسل بتاعه
اختفى فى ظروف غامضة
وعلى فكرة مستحيل نقول على كل اللى عاصروا النبى صحابة
والا ليه ما قولتوش سيدنا وحشى ولا سيدنا زهير بن ابى سلمة على الاقل ليه قصيدة مشهورة فى النبى
وكمان فيه اقوال ان معاوية لم يكن كاتبا للوحى بل كاتب لرسائل النبى
وطبعا ابو سفيان على عينى وراسى شهيد ماشى انما صحابى ازاى؟؟
بتفكرونى باللى عاوز يعمل مولد أم النبى ص امنة بنت وهب

eslams99 said...

وبالمناسبة لاتوجد رواية لها سند صحيح
تقول ان سيدنا معاوية كان يسب سيدنا على

dr.lecter said...

لا وخدي دي كمان
سيدنا عمرو بن العاص

وماادراكي دور عمرو بن عاص في فرقه المسلمين

جبهة التهييس الشعبية said...

بالمناسبة

وارد في الصحاح ان معاوية كان يأتي بالناس ويقول لهم: العن ابا تراب

ووارد حتى عند ابن كثير انه كان يستنطق الناس بسب علي سواء بالترغيب او الترهيب

وده ثابت تاريخيا وكفاية نصب بقى

ولسه حاكتب بوست عن سعد زغلول كمان

انا حامسك لكوا الاصنام النصابين اللي انتوا عاملينهم عجل ابيس واهدهم واحد واحد

bang887 said...

@xMetatron

الخليفة الخامس كان سيدنا الحسن مش سيدنا الحسين.

جبهة التهييس الشعبية said...

شمس العصاري

يا سيدي انت عايز ربنا يحشرك مع مدمر الخلافة ولاعن اهل البيت وخالق الفتنة وشاري ذمم الناس واللي اجبر الناس على بيعة باطلة لابنه يسأل عنها امام الله؟

عايز كده؟

ربنا يديلك

ولو الموضوع خلص زي ما ميدو قال لي على التويتر كنت سكت عنه

لكن يا جدعان انتوا مش سايبين نصاب في التاريخ الا لما معظمينه ومش سايبين واحد اشتغل وطلع عينه الا لما متجاهلينه

ده كأننا متعمدين نقل اصلنا مع كل اللي خدمونا

والله بكرة كل النصابين بتوع الفريدم هاوس بتوع دلوقت لياخدوا السوكسيه كله وكل الناس اللي طفحت الكوتة عشان البلد دي حيتنسوا ويتشد عليهم السيفون

وكده احسن عشان كما تدين تدان

زي ما احنا بنتجاهل اللي قدموا تضحيات وبنعظم اللي نصبوا علينا واستفادوا وملوا كروشهم بكرة يتعمل فينا كده احنا كمان

قال بنحب الصحابة قال
اذا كان ربنا نفسه ما ساواش اللي انفق من قبل الفتح وقاتل باللي انفق وقاتل بعد الفتح

ما بال باللي لا انفق ولا قاتل ولم فلوس بس

يرضي مين واحد يشقى ويتمرمط ويتشرد ويتخرب بيته وتتهد حياته يتساوى بواحد ما اتعملوش قيمة ولا سعر الا لما دخل الاسلام واحد خسر اللي وراه واللي قدامه وواحد كسب والاتنين صحابة

ده عدل ده؟

ومش حتبطلوا ابدا، حتفضلوا كده، طول عمركوا حتفضلوا كده ظلمة وتيجوا على الشرفا وتعظموا النصابين ومستغربين ربنا مسلط علينا الظلمة ليه؟ لما نبطل نظلم حتى في تقييماتنا للتاريخ يبقى ربنا يرفع عنا الظلم

bang887 said...

("ولسه حاكتب بوست عن سعد زغلول كمان
انا حامسك لكوا الاصنام النصابين اللي انتوا عاملينهم عجل ابيس واهدهم واحد واحد")
--------------------------
عندى اقتراح: تكتبى عن الصنم، ومعه واحد من المغبون حقهم. أظن هيكون أفيد لنا، وأكثر تعباً ليكى.

lastcrazyboys said...

اييه ده ..انت عايزة تقلبي الدفاتر القديمة وتوضحي حقيقة القمرتجي ..الفلاتي بتاع السهرات وقعدات الأنس اللي قال إنى أوصى كل من يعيش بعدي من لهم شأن أنى إذا مت من غير أن اترك اللعب ألا يحتفلوا بجنازتي " أو على رأي ابويـا اللي مسمي نور المالكي ..سعد زغلول القرن الواحد والعشـرين
==
على فكرة النفطيين ممكن يسيدوا "معاوية " وابوه ..لكن ما يقولوش سيدنــا "بلال" لأنه كان حبشي اسـود من وجهة نظرهم

bang887 said...

بالنسبة لموضوع معاوية وأبو سفيان وعمرو بن العاص، بيتهيأ لى نحرّص شوية فى الكلام عنهم لسبب. نحن لا نضمن صحة الكلام سواء لصالحهم أو ضدهم. فكثير من التاريخ المكتوب والأحاديث الموضوعة والضعيفة تمت كتابته إما فى عصر الدولة الأموية أو فى عصر أعدائهم الدولة العباسية.

فأعتقد أنه من الأفيد أخذ هذه الأمور بنظرة تجريدية، بمعنى ننحى الأشخاص وننظر للجماعات والحدث بمنظور عام. مثلا:

لماذا سمح الله بحدوث الفتنة الكبرى وما تلاها من قتل سيدنا على وسيدنا الحسين وسيدنا عبد الله بن الزبير وحتى قتل الخليفة الراشد السابع عمر بن عبد العزيز؟

فى نظرى لأن الناس فى أيام الفتنة وما تلاها (نظرا لاتساع الدولة فجأة) ودخول أناس للإسلام لم تكن بصلابة ومثابرة ومبادرة الصحابة فى أيام الرسول عليه الصلاة والسلام. فكثير من كبار الصحابة كان مات، والباقى من الصحابة الكبار كانوا كبار السن جداُ، وباقى الصحابة أيام الفتنة، كانوا صغار السن أيام الرسول مثل سيدنا ابن عباس.

فأنا لا أفهم كيف استطاع مثيروا الفتنة (وكانوا على ما أذكر حوالى ألف شخص) السيطرة على المدينة بأهلها أياما بلياليها وقتل الخليفة سيدنا عثمان، دون مقاومة صلبة من أهل المدينة ولم يهب لنجدتها مَن كان حولها أو من كان بمكة المكرمة. أى الفئة القليلة غلبت الفئة الكثيرة معكوسة هذه المرة.

وبالتالى ما كان يجوز تولية أناس فى طهارة سيدنا أبو بكر أو سيدنا عمر أو سيدنا عثمان أو سيدنا علي بن أبى طالب، على مثل هؤلاء الخائرين الخانعين المستكينين. بل يُولَى عليهم من قرأنا عنهم فى التاريخ.

ما نستفيده نحن من هذا التاريخ -بهذه النظرة التجريدية- هو أن : خِور العزائم، والاستكانة للذل، و"أنا مالي" ..... تودينا فى داهية.

ونستفيد منه أن لما شعب تعداده 80 مليون يخرج منه فى مظاهرة 200 شخص فقط يطالبوا بالتغيير، وآلاف خرجوا للاحتجاج أمام السفارة الجزائرية .... يبقى مش يستنى معاوية يحكمه.... لأ ده يستنى جمال مبارك ... وبالثُلُث.

Mohammad Fathy محمد فتحي said...

كله الا الصحابة رضي الله عنهم اجمعين
صحيح القرآن جعلهم درجات !!
"لا يستوي منكم من انفق من قبل الفتح وقاتل اولئك اعظم درجة من الذين انفقوا من بعد وقاتلوا وكلا وعد الله الحسنى"
وقال صلى الله عليه وسلم :
"لا تسبوا أصحابي لا تسبوا أصحابي فوالذي نفسي بيده لو أن أحدكم أنفق مثل أحد ذهبا ما أدرك مد أحدهم ولا نصيفه"
اللهم ارضى عن ابي بكر وعمر وعثمان وعلي وعن العشرة المبشرين وامهات المؤمنين والصحابة اجمعين ومهم معاوية وابو سفيان رضي الله عنهم اجمعين
ياريت الواحد يهتم بنفسه بدل ما يبحث في الامور دي
دمتم بخير

Mohammad Fathy محمد فتحي said...

من أفضل من تكلم ووضح هذه الفترة من التاريخ الاسلامي فضيلة الدكتور طارق سويدان حفظه الله في سلسلة قصص من التاريخ الاسلامي
اللهم احشرنا مع صحابة نبيك اجمعين
اللهم ارضى عن علي وعمرو بن العاص ومعاوية وعن جميع الصحابة والتابعين

Auroramoslema said...

اكتبي انتي يا ستي ولا تزعلي نفسك ليس عليك من عمرو خالد ولا إذاعة القرآن الكريم شيء كل واحد بيقول اللي عايز يقوله اللي مش عاجبه اللي بيتقال يقول اللي يعجبه (حد فاهم حاجة؟؟).. ابدأ بنفسك..
اكتبي من غير ما تشتمي التاني بس وتدخلي نفسك في متاهات.. وخلي بالك انتي بتعملي زي ما الحكومة ومواليها بيعملوا بالظبط.. هم عشان يقابلوا التوجه الشيعي
(اللي باين جداااااااااااا) تطرفوا في المغالاة للطرف الآخر.. وانتي برضه عشان تقابلي تطرف الحكومة رايحة تتطرفي الناحية التانية..
ممكن نقد سياسي اجتماعي نفسي اقتصادي فني حتى للاحداث والشخصيات الخلافية في التاريخ بس من غير لا تجريح ولا شتيمة ولا تقليل من قيمة ولا تكفير طبعا ولا تحديد مصير جنة أو نار

واحنا أصلاً أصلا دلوقت أمة بطيخ وبطيخ مروي بمياه الصرف كمان لا عارفين جايين منين ولا رايحين فين.. ولا مين نحبه في الله ولا مين نكره مين معانا ولا مين علينا ..كلنا هذا البطيخ...

مستنيين مقالات العظماء المنسيين بس ركزي لله يا شيخة للـــــــــــــــــــــــه فقط لا غير..

عايزة أعمل Like
لرد طيف البدر والنديم بس مش عارفة.. ابقي حطي لنا حاجة كدة بدل ما الواحد يعيد ويزيد في الكلام

طنطـــا واى said...

يا ستناسيدنا ابو سفيان وستنا هند مقدور عليهم حظك حلو ان ربنا حياخدك وياخدنا قبل العصور اللى حيطلع فيها مشايخ تتكلم عن السيرة العطرة لسيدنا جمال مبارك... وسيدنا البرادعى ....

جبهة التهييس الشعبية said...

طنطاوي

ههههههههههههههههههههههههههههههههههههههههههههههههههههههههههه

ماهو ده اللي مخوفني

جبهة التهييس الشعبية said...

ملحوظة

حديث لا تسبوا اصحابي دليل على ان مش كل اللي قابل الرسول واسلم في عهده يبقى صحابي

وسياق الحديث ان خالد بن الوليد غلط في عبد الرحمن بن عوف فسيدنا محمد اتضايق ووقف يخاطب الناس اللي كانوا موجودين في المدينة ساعتها، وكلهم كانوا مسلمين وقال:

لا تسبوا أصحابي لا تسبوا أصحابي فوالذي نفسي بيده لو أن أحدكم أنفق مثل أحد ذهبا ما أدرك مد أحدهم ولا نصيفه

حد يرجع يقول لي كل اللي كانوا واقفين كانوا صحابة

هو بقى كان بيكلم مين؟ الهوا؟ اكيد ما بيكلمش المنافقين لان اصلا مش متوقع ان حد فيهم ينفق مثل احد ذهبا

والصحابي هو اللي صاحب الرسول مش كل واحد قابله في الشارع بقى صحابي

the magnificent ninja said...

أولا الأخ قهوة كتكوت
البوست اللي أنا كنت كاتبه ماكانش موجه ليك
ثانيا باقي الكباتن اللي عاملين نفسهم فلاسفة
اشمعنى سيدنا معاوية و سيدنا عمرو رضي الله )عنهما (غصبا عنكم)بتسبولهم الدين و تبهدلوهم مه ان معاوية رجل عظيم رغم أخطاؤه و النبي عليه الصلاة و السلام كان يصفه بأنه رجل حكيم , و عمرو بن العاص فاتح مصر و لولا لما أصبحنا مسلمين و مابتفتحوش بقكوا بكلمة عن يزيد قاتل الحسين ولا الحجاج قاتل عبد الله بن الزبير و سعيد بن جبير و قاصف الكعبة بالمجانيق و لا عبد الملك بن مروان الذي نهى عن الأمر بالمعروف و النهي عن المنكر
ولا تتكلمون عن جرائم أبو مسلم الخراساني ولا عن جرائم أبو العباس
كلكم ماسكين في معاوية و عمرو اللي أفضالهم مغرقانا
و كفاية ظلم و فتي و روحوا اعملوا حاجة مفيدة
و الأخ يوتوبيا أنا اعترضت فقط على طريقة الكلام عن سيدنا معاوية و سيدنا أبو سفيان رضي الله عنهما
و سيدنا أبو حذيفة بن عتبة على عيني و رأسي و أحمد عرابي و مصطفى كامل و النديم و البارودي و محمد فريد كلهم على عيني و رأسي

the magnificent ninja said...

و الأخ يوتوبيا أنا اعترضت فقط على طريقة الكلام عن سيدنا معاوية و سيدنا أبو سفيان رضي الله عنهما
و سيدنا أبو حذيفة بن عتبة على عيني و رأسي و أحمد عرابي و مصطفى كامل و النديم و البارودي و محمد فريد كلهم على عيني و رأسي

the magnificent ninja said...

أولا الأخ قهوة كتكوت
البوست اللي أنا كنت كاتبه ماكانش موجه ليك
ثانيا باقي الكباتن اللي عاملين نفسهم فلاسفة
اشمعنى سيدنا معاوية و سيدنا عمرو رضي الله )عنهما (غصبا عنكم)بتسبولهم الدين و تبهدلوهم مه ان معاوية رجل عظيم رغم أخطاؤه و النبي عليه الصلاة و السلام كان يصفه بأنه رجل حكيم , و عمرو بن العاص فاتح مصر و لولا لما أصبحنا مسلمين و مابتفتحوش بقكوا بكلمة عن يزيد قاتل الحسين ولا الحجاج قاتل عبد الله بن الزبير و سعيد بن جبير و قاصف الكعبة بالمجانيق و لا عبد الملك بن مروان الذي نهى عن الأمر بالمعروف و النهي عن المنكر
ولا تتكلمون عن جرائم أبو مسلم الخراساني ولا عن جرائم أبو العباس
كلكم ماسكين في معاوية و عمرو اللي أفضالهم مغرقانا
و كفاية ظلم و فتي

eslams99 said...

كما ان فى القران ايات محكمات وايات اخرى متشابهات لا يعلم تاويلها الا الراسخون فى العلم .

فانه فى السنة ايضا احاديث محكمة واخرى متشابهة لايعلم تاويلها الا الراسخون فى العلم
------------------
فى صحيح البخارى عن ابى الدرداء

انه كانت بين أبي بكر وعمر محاورة ، فأغضب أبو بكر عمر ، فانصرف عنه عمر مغضبا ، فاتبعه أبو بكر يسأله أن يستغفر له فلم يفعل ، حتى أغلق بابه في وجهه ،

فأقبل أبو بكر إلى رسول الله صلى الله عليه وسلم . فقال أبو الدرداء : ونحن عنده ، فقال رسول الله صلى الله عليه وسلم : ( أما صاحبكم هذا فقد غامر ) . قال : وندم عمر على ما كان منه ، فأقبل حتى سلم وجلس إلى النبي صلى الله عليه وسلم ، وقص على رسول الله صلى الله عليه وسلم الخبر .

قال أبو الدرداء : وغضب رسول الله صلى الله عليه وسلم ، وجعل أبو بكر يقول : والله يا رسول الله ، لأنا كنت أظلم . فقال رسول الله صلى الله عليه وسلم :

هل أنتم تاركون لي صاحبي ، هل أنتم تاركون لي صاحبي ، إني قلت : يا أيها الناس ، إني رسول الله إليكم جميعا ، فقلتم : كذبت ، وقال أبو بكر : صدقت .
------------------

فهل يحق لانسان يعقل ان يقول ان سيدنا ابو بكر وحده هو صاحب النبى صلى الله عليه وسلم وان سيدنا عمر وباقى من حضروا ليسوا من صحابة النبى وانهم غير داخلين فى حديث النبى الذى نهى فيه عن سب اصحابه رضوان الله عليهم. وهل يعقل ان يقول احد ان سيدنا خالد بن الوليد ليس من صحابة رسول الله صلى الله عليه وسلم

شمس العصارى said...

مشكلتك الكبرى يا نوارة انت محتكرة الحقيقة
كل قول نوارة سليم و ما عاداه لا يساوى شئ
صح
ــــــــــــــــــــ
انتى مش بتقرى ردودى و بعدين تردى بردود غير معنونة و بعدين تردى عليا بنقاط جديدة متجاهلة ما قلته قبلها
......................
انا قلت وجب علينا احترام الصحابة .... كل الصحابة و نعترف بالفضل - الذى اعطاهم الله و رسوله اياه - لبعضهم دون التقليل من شأن الاخرين
وقلت ان كره او حب فئة لشخص او جماعة لا يعطينا الحق فى التمادى على الشخص او الجماعة
يعنى انا لم ابخس حق من تعب و كافح كما قلتى لكن بالمقابل انا لا اتجنى على صحابى اينا كان ولا او اسير خلف من يروجون لمثل البوست ده
و انا قلتلك فى التعليق السابق موضوعك علشان يستقيم لازم نقسمع لاجزاء
1- وجوب معرفة العظماء و سيرهم و الاسترشاد بهم مثل سيدنا حذيفة بن عتبة او اسيادنا ابو بكر و عمر و عثمان و على و طلحة والزبير و سعد و سعيد و حمزة و جعفر و غيرهم كثيرا كثيرا
2- عاوزة تتكلمى فى وصف احداث حقبة تاريخية و تنتقدى تصرفات بعض رموزها - بدون تجريح ولا تقليل من شانهم ..... اتكلمى من هنا لبكره
3- مينفعش الخلط بين القديم و الحديث فى التاريخ و نساوى بينهم ... و متقولليش ان ده يخدم فكرة البوست الى هى اساسا فكرة غير سوية .... فكرة المقارنة
لكن بخلط كل الموضوعات السابقة يدينا الشكل الى طلع بيه البوست و التعليقات ثم متنفعليش قوى مع هلليلة التعليقات
مع احترامنا لشخوص المعلقين كام تعليق ينم عن فكر و نستفيد منه .... واحد او 2 او 3 من خمسين تعليق
فمش كعنى ان كتير هللولك يبقى بالضرورة رايك صائب و نافذ و محتكر للحقيقة و خصوصا انك بتطرحى افكار كتيرة فى بوست واحد وممكن الافكار تكون بعيدة عن بعض ... تعجبنا وحدة و نهمل عشرة
اعود واكرر ما جدوى اصرارك على المقارنة بين سيدنا حذيفة و سيدنا معاوية
و ما جدوى تفنيد احداث - فى غير موضوعها اقصد البوست و خليطه - شبعت تفنيد و احصاء و تدقيق سلبا و ايجابا و اختلف فيها كثير من الادباء و رجال الدين و لن ياتى احد بغير ما اتو به
و بعيدن ايه حكاية الاصنام الى بنعبدها .... اعتقد ان كل المعلقين لا يعبدون اشخاصا و لا اصناما ولا هى محاولاتنا فى السير بخطى حثيثةفى طريق شائك جعلتك تصفينا بعبادة رموز من التاريخ ايا كانوا
ــــــــــــــــــــــــــ
ايوه يا ستى انا عاوز احشر مع الصحابة اجمعين رضوان الله عليهم
و بدعى ربنا بكده و ياريت تدعيلى انتى كمان و بحلفك بالمدونة الغالية دى ههههههههه
_________________________________
على الهامش
فاكرة لما قلتك ان علشان نعرف التضحيات لابد من الرجوع للتاريخ الحقيقى ساعتها تجاهلتى التاريخ الحقيقى و تسائلتى ببراءة عن التضحيات
دلوقتى بتنادى مراجعة التاريخ الحقيقى
طبعا الكلام الى على الهامش ده حيستفزك و يخليكى تقذفى بشوية كلام من الى اتعودنا عليهم هههههههههههههه
نلتقى مع صحابة رسول الله اجمعين
اه نسيت اقلك احلى مسا عليكى يا نوارة هههههههه

Dr.Online said...

نديم
صح لسانك

Mohammad Fathy محمد فتحي said...

سئل علي بن أبي طالب ما تقول فيمن قاتلوك ( يعني معاوية وطلحة والزبير ومن كان معهم من الصحابة ) فيقول : إخواننا بغوا علينا .
ويروي لنا أبو نعيم في الحلية عن أبي صالح قال: " دخل ضرار بن ضمرة الكناني على معاوية فقال له :صف لي عليا ؟ فقال : أو تعفني يا أمير المؤمنين ؟ قال :لا أعفيك قال :أما إذا ولا بد فإنه كان والله بعيد المدى ، شديد القوى ، يقول فصلا ويحكم عدلا ، يتفجر العلم من جوانبه ، وتنطق الحكمة من نواحيه ، يستوحش الدنيا وزهرتها ، ويستأنس بالليل وظلمته ، كان والله غزير العبرة ، طويل الفكرة ، يقلب كفه ويخاطب نفسه ، يعجبه من اللباس ما قصر ، ومن الطعام ما جشب ، كان والله كأحدنا يدنينا إذا أتيناه ، ويجيبنا إذا سألناه ، وكان مع تقربه إلينا وقربه منا لا نكلمه هيبة له ، فإن تبسم فعن مثل اللؤلؤ المنظوم ، يعظم أهل الدين ، ويحب المساكين ، لا يطمع القوي في باطله ، ولا ييأس الضعيف من عدله ، فأشهد بالله لقد رأيته في بعض مواقفه ، وقد أرخى الليل سدوله ، وغارة نجومه ، يميل في محرابه قابضا على لحيته ، يتململ تململ السليم ، ويبكي بكاء الحزين ، فكأني أسمعه الآن وهو يقول : يا ربنا يا ربنا يتضرع إليه ، ثم يقول للدنيا إلي تغررت ؟ إلي تشوفت ؟ هيهات هيهات ، غري غيري ، قد بتتك ثلاثا ، فعمرك قصير ، ومجلسك حقير ، وخطرك يسير ، آه آه من قلة الزاد وبعد السفر ووحشة الطريق ، فوكفت دموع معاوية على لحيته ما يملكها وجعل ينشفها بكمه وقد اختنق القوم بالبكاء فقال معاوية رضي الله عنه : كذا كان أبو الحسن رحمه الله ، كيف وجدك عليه يا ضرار ؟ قال : وجد من ذبح واحدها في حجرها لا ترقأ دمعتها ولا يسكن حزنها ثم قام فخرج "

الغريب ان اي واحد ممكن يتكلم في الدين والصحابة رضوان الله عليهم بل ويمتدح من يسبهم مفيش مشكلة
لكن لما واحد يتكلم في الكورة وهو مش فاهم فيها يتعمل له فضيحة
عجبي عليك يازمن

Mohammad Fathy محمد فتحي said...

سئل علي بن أبي طالب ما تقول فيمن قاتلوك ( يعني معاوية وطلحة والزبير ومن كان معهم من الصحابة ) فيقول : إخواننا بغوا علينا .
ويروي لنا أبو نعيم في الحلية عن أبي صالح قال: " دخل ضرار بن ضمرة الكناني على معاوية فقال له :صف لي عليا ؟ فقال : أو تعفني يا أمير المؤمنين ؟ قال :لا أعفيك قال :أما إذا ولا بد فإنه كان والله بعيد المدى ، شديد القوى ، يقول فصلا ويحكم عدلا ، يتفجر العلم من جوانبه ، وتنطق الحكمة من نواحيه ، يستوحش الدنيا وزهرتها ، ويستأنس بالليل وظلمته ، كان والله غزير العبرة ، طويل الفكرة ، يقلب كفه ويخاطب نفسه ، يعجبه من اللباس ما قصر ، ومن الطعام ما جشب ، كان والله كأحدنا يدنينا إذا أتيناه ، ويجيبنا إذا سألناه ، وكان مع تقربه إلينا وقربه منا لا نكلمه هيبة له ، فإن تبسم فعن مثل اللؤلؤ المنظوم ، يعظم أهل الدين ، ويحب المساكين ، لا يطمع القوي في باطله ، ولا ييأس الضعيف من عدله ، فأشهد بالله لقد رأيته في بعض مواقفه ، وقد أرخى الليل سدوله ، وغارة نجومه ، يميل في محرابه قابضا على لحيته ، يتململ تململ السليم ، ويبكي بكاء الحزين ، فكأني أسمعه الآن وهو يقول : يا ربنا يا ربنا يتضرع إليه ، ثم يقول للدنيا إلي تغررت ؟ إلي تشوفت ؟ هيهات هيهات ، غري غيري ، قد بتتك ثلاثا ، فعمرك قصير ، ومجلسك حقير ، وخطرك يسير ، آه آه من قلة الزاد وبعد السفر ووحشة الطريق ، فوكفت دموع معاوية على لحيته ما يملكها وجعل ينشفها بكمه وقد اختنق القوم بالبكاء فقال معاوية رضي الله عنه : كذا كان أبو الحسن رحمه الله ، كيف وجدك عليه يا ضرار ؟ قال : وجد من ذبح واحدها في حجرها لا ترقأ دمعتها ولا يسكن حزنها ثم قام فخرج "

الغريب ان اي واحد ممكن يتكلم في الدين والصحابة رضوان الله عليهم بل ويمتدح من يسبهم مفيش مشكلة
لكن لما واحد يتكلم في الكورة وهو مش فاهم فيها يتعمل له فضيحة
عجبي عليك يازمن

ahmed said...

كيفك نوارة
انا اول مرة اكتب تعليق هنا
انا حاسس انك مزودها شويه ، في الموضوع ده ،
بس انا حبيت اقول حاجتين همه سؤالين بأسألهم لنفسي في موضوع الفتنة
س1: كم واحد قبلته اسمه على اسم سيدنا علي او سيدنا الحسن او سيدنا الحسين (خاصة في مصر) وكام واحد اسمه على اسم معاوية او يزيد او ابو

سفيان
اظن الاجابه واضحه

س2: لو حد كنت في معركة كربلاء كنت هتكون مع اي طرف .

KID said...

عن نفسي كسني لو في معركة كربلاء
ححارب مع الحسين بن علي كرم الله وجهه

شمس العصارى said...

http://dostor.org/politics/egypt/10/july/19/22768
هههههههههه
ههههههههه
و كمان هههههه
ايه الفكر التنويرى ده
الا مين الى ناقل عن مين
انا عارف يا نوارة انتى الى كاتبه قبله
بس سؤال لا مؤاخذة
هو اساس الموضوع فين
و مين صاحب الكلام الاصلى
و الكلام ده تبع اى فكر
ده سؤال مش برئ لا مواخذة
ههههههههههه

برجوازى صغير said...

اعتقد ان عمرو خالد بيعيد كتابة التاريخ الاسلامى نت وجعة نظر الارستقراطية القرشية - حكاية سيدنا معاوية دى غريبة اوى والاغرب منها سيدنا ابو سفيان دى ناس اسلمت فى الوقت بدل الضائع وعملوا المستحيل لاستغلال الاسلام لصالحهم فيما بعد

Hem said...

بلوج رائع ومميز تحياتى