Friday, 23 July 2010

كل سنة وانتوا طيبين

بمناسبة ثورة يوليو، المهم اني عندي شغل النهاردة وبكرة ويوم الاحد عندي اجازة، انا كده حيتحسب لي شغل في الاجازة وللا ايه؟ 
احب اسجل للتاريخ ان نتائج هزيمة 67 ثم انقلاب 15 مايو ثم اتفاقية السلام ثم مبارك وابداعاته المتفردة ان الناس دلوقت بتشكر في ايام الملك، مع انه والله العظيم كان فاسد وظالم وطين وقطران... بس الظاهر اتدهولت زيادة
لو الثورة اللي احنا بنحلم بيها حتقوم عشان بعد تمانية وخمسين سنة احفادنا يطلعوا يشكروا في ايام مبارك يبقى بلاها ثورة ابوس ايديكوا
مش طالبة خالص
شفتوا حلقة ابراهيم عيسى بتاعة رد انجي؟ رااااااااااااااااااااااائعة بكل المقاييس
يارب مصر كلها تكون شافتها عشان يرحمونا بقى من الهذيان بتاعهم

9 comments:

utopia said...

وأنتى طيبة يا نوارة:
انا مش شايف فرق بين قبل الثورة وبعدها
الفرق بس بين احتلال انجليزى و صداقة
سوفيتية واحتلال امريكى
كله زى الزفت
ياريت لو لقيتى رابط الحلقة بتاعة امبارح تحطيه هنا علشان اللى ما شافهاش

MR.PRESIDENT said...

مفيش حد حكلمها عدل من أيام بيبرس .

lastcrazyboys said...

معلش بقى السـت "عيوشــة " قالت بالفم المليــان : يوم الجمــعة أجــازة لكل العاملين بالقطــاع العام أوالخــاص

ودي نقــدر نعتبرها مكرمـــة حكوميــة ..لأن من زمــااان قوي الناس مخــدتش الجمعــة أجــازة زي ماحنا عارفيــن

=
وللأســف انـا مشفتــش حلقـة "عيســى" وهحـاول أجيبهـا ..إن كنت عند قنـاعتي انه ما يفــرقش كتـيير عن منتفعي النظـــام وأنه يشكـل الوجـه الآخــر
للعمـــلة

" باختصــار شخصيـــة ..."لزجـــة

شمس العصارى said...

انا مش فاهم حاجة من البوست
فين الثورة دى
و مين ابراهيم عيسى ده
يكنش ده الى بيقولوا عليه محتكر الفهم و الحقيقة فى مصر
ههههههههههههه
و بعدين مصر كلها عندهم هزيان
امال مين يا ترى العاقلين الكويسين الشاطرين الى فاهمين الوضع الحال بملابساته و المستخبى و المدبر
على العموم ربنا يعينهم علشان يفهموا شعب مصر الجاهل الهاذى
نلتقى بعد الثورة

دانتيلا said...

انا بترحم على ايام فاروق. اللى مكنش ظالم ولا فاسد. لكن عيبه انه كان ساذج وطيب. والطيب فى السياسة يتفرم.وحلفة رد انجى تدل على ان الضباط الاوساخ او الاحرار زودوها قوى فى الكذب والافتراء. مكنش فيه اسلحة فاسدة ولا يحزنون. ربنا ينكد عليهم زى منكدوا علينا عيشتنا من ساعة انقلابهم المشئوم

dodo555555.jeeran.com

dr.lecter said...

كانت حلقه مسخره جامده جدا

ابراهيم عيسي رقع صح في نظام يوليو

انا مضحكتش زي ماضحكت في الحلقه دي وخاصه اني فعلا بالوم النظام انه وصلنا للحال المزري ده

تحت الكوبري said...

مافيش لينك طيب ؟ :-)

SpoiledEgy said...

This is not our revolution, its theirs, this is the reason the country was pushed back for more than 50 yrs, this is what happens when you allow the military to control civilian life. Despite their down falls, the Monarchy sought to control their own powers, look at what Ismaeel did, seeking to have proper rule of law which means he wont be the one with the highest powers, the sought constitutions, a strong parliament. The Egyptians had some saying on who will form their governments. Most important King Farouk couldve been selfish and refused to leave and then the potential of a civil war in Egypt wouldve been high. He loved us, and choose to leave. Look at those in power today, they wont leave even though they know we dislike them and their policies and dnt want them.
Now, we are standing at a cross road, those whove tasted ruling Egypt wont let go of it until the very last Egyptian sole. Will we eventually have our own revolution and our own national day or will we keep on pretending we had one?!!

مصر 30 said...

معلهش صحيح التعليق متأخر بس أحسن من بلاش ..
بالنسبة لحلقة ابراهيم عيسى .. هو صحيح كشف كل مشاكل الفيلم التاريخية .. و اللى الناس اعتبرت جزء منها حقائق تاريخية .. بس مكانش منطقى ابدا انه يركب تسطيح الرؤية اللى فى الفيلم على اعتبار النظام الإعلامى له كفيلم رسمى للثورة على النظام الناصرى على النظام الساداتى على نظام الوكسة الحالى و اعتبار ان كل ده حاجة واحدة ..!!!
اكيد النظام الناصرى لا يتحمل نتيجة الإنقلاب عليه فى عصرى السادات و مبارك الا بقدر تحمل النظام الملكى لمسؤلية النكسة فى 67 و الوكسة فى 1977-2010
لقد خلط ابراهيم عيسى جميع الأوراق ببعضها فى سبيل حلقة كوميدية